728x90 AdSpace

Hot
Menu
Zon-ol na Donate

Latest News

NEPAL GAM TANGTHU

Nepal Gam lim (Map of Nepal)
Federal Democratic republic of Nepal pen leitunga mualsang pen Himalaya pang a om ahi hi. A gam pen Sq.Km 147,181 in taangzai hi. Mihing 27 millions kiim Nepal gam sungah teeng uh a, Nepal mi(Nepali or Gorkha) gam pua a teeng zong 2 millions val om lai hi. Leitunga gam lian tehna ah 97 na ahi hi. Mihing tam lamah leitungah 41 na ahi hi. Ni suahna lam, sim leh maal lam ah China tawh kigi hi. Nitumna lamah bel India tawh ki gamgi hi. India state Uttarakhand, Uttar Pradesh, Bihar, West Bengal leh Sikkim tawh ki gamgi banah Himalayan mual a Tibetan Autonomous Region tawh zong ki gamgi hi. Nepal khuapi pen Kathmandu hi in khuanuam leh khangto khat ahi hi. Van kiman ahihmanin Mizoram khawng pan sumbawl tampi takin Kathmandu ah van la zel uh hi. 

Kathmandu Khuapi (View of Kathmandu City)
Nepal gamah leitunga mual sang pen pen 10 bang om hi. Tua te lakah leitunga mual sang pen Mount Everest zong om a Nepali ten Sagarmatha ci uh hi. Sea level pan in 20,000 feet  a sang mual 240 bang om hi. A gam sim lam bel khaicinna ding leh gankhawina dingin hoih bilbel vanglak hi. A gam mipi 80% ten Hindu biakna zui uh hi. A gam tawh ki zui in gam khat a Hindu biakna a tam pen na mun ahi hi. Budhist biakna hong piankhiatna ahih mah bangin Nepal gam in Budhist biakna tawh kizopna hoih tak nei hi.
Everest Mual sang (Mount Everest)
Nidang lai pek pan in Nepal gam pen vaihawmna ki luahsawn (Monarchy) gam khat ahi hi. Galhang Prithvi Narayan Shah in gam neu nono gawm khawm in a uk hun lai kum 1768 in Nepal zong uk khawm kha hi.A hizongin Communist Party of Nepal kici Maoist te ki phinna hangin  November 22, 2005 in 12 Point Agreement kigelh hi. May 28, 2008 Nepal gambup kiteelna ah vaihawmna ki luahsawn a deihlo pawl te gualzo uh hi. Tua aki pan in mipi vaihawmna gam khat hong suak ta hi.

Nidang lai in Nepal gamah Hindu siampi Ne kici khat om hi. A man a teenna kiim teng limtakin puah in juun hi. Tua siampi Ne in a puah a juun gam pen Ne ii’ gam, Nepal kici hi. Nepal gamah a teeng masa pen Kirata nam tea hi uh hi. Kirata nam te Nepal gam ah kum 2,500 sung vingveng teeng uh hi. Jesu pian ma kum 500 kkim lai in biakna lam laibu Nepal Mahatmya ah Nepal gam etlawm zia kigelh hi. Kum 564-483 BC kiim in nam hangsan pawlkhat hong kilang uh hi. Amaute laka khat kumpi pa’ tapa  Siddharta Gautama in lungmuanna leh khamuanna zon cih takin zong hi.Tua ciang taansak  (enlightened) in hong om in Buddha kici hi ama’ sinsakna pen Budhism kici hi. Budhist biakna hong pian khiatna ahihman in tua biakna a zui te adingin gam thupi mah mah khat suak hi.
Buddhist Pilgrimage Tour

Kum zalom 12 na hun in Nepal gam pen gamke 20 valah kikhen hi. Kum zalom 14 na ciangin kumpi gam khatah hong omkhawm thei kik uh hi. Ahizongin kum 1482 ciangin Kathmandu, Patan leh Bhaktapur ah kikhen kik hi. British East India Company leh Nepal te gamgi tungtang ah ki mukhial thei zel uh hi. Tua ahihmanin 1815-1816 sungin Anglo Nepalese War hong pian lawh hi.Tua laiah Nepal (Gorkha)galkap te hangsan mah mah uh ahihmanin tu dongin galkap dingin ki deih mah mah hi. Kum 1923 ciangin British leh Nepal kumpi in ki lawmtakna thuciam hong bawl uh hi.Kum 1959-1989 hun in Nepal gamah Panchayat System kizang hi.Mipi te malakna  “Jan Andolan” hangin kumpi Birendra in zong mipi deihna tawh kituakin May 1991 in mipi vaihawmna thukimpih hi.

Nepal Dialkhai (Flag of Nepal)

Communist Party of Nepal(Maoist) ten kum 1996 pan in thagum zangin aki luah sawn kumpi suan khiat sawm uh hi. 
Tua in tual sung buaina piangsak in mi 12,000 tak in si lawh hi.June 1, 2001 in mi tampi ki that in tua lakah kumpi Dipendra leh kumpinu Aiswarya banah kumpi innkuan mi 7 si uh hi. September 2005 ciangin Maoist te tawh hong kikap kik uh hi.Kum 2006 ciangin mipi vaihawmna a om ding kumpi pa Gyanendra in thukimpih hi.Mipi vaihawmna House of Representative  pen April 24, 2006 ciang hong piang kik hi.May 18, 2006 ciangin Nepal gam pen  biakna a tuam neih lo gam(secular state) hong suak hi.Tua in hun sawtpi peka om Hindu kumpi gam nuai mang ta hi.
Scenic Mountain

April 10, 2008 in Nepal gam kiteelpina om hi. Communist Party of Nepal(Maoist) te a cing tam pen uh hi. A ki pawl khawm vaihawmna(Coliation) hong bawl uh hi. May 28, 2008 ciangin a kiteel cing ten kumpi thak bawl nangin vote khia uh hi.Member 564 lakah 4 bek in kumpi lang pang uh hi. Tua pan in Nepal gam pen mipi teelcin te’ vaihawmna Democratic Republic bucing hong hi ta hi. Kumpi(king) teenna inn Narayanhiti Royal Palace zong ni 15 sungin hawm(empty) sak pah uh hi. Tua inn pen van lui koihna (Museum) in zang lel uh hi.
Nepal gam Gross Domestic Product(GDP) pen kum 2012 in  US Dollar 17.921 Billion ahi hi.Per Capita Income zong 2012 estimate ah US Dollar 623.624 ahi hi. A gam uh a neu na zah tawh ki tuak in a sum laklut uh tam vanglak hi. A sum muhna uh Services, Agriculture leh industry hi pipen hi. Politics hangin Nepal gam deih bangin khangto thei lo kawmkalah kum 2012 in a GDP  uh 5% a khang dingin ki tuat hi. Nepal mipi te’ lakah Below International Poverty Line (BIPL) zong tuma kum 7 aki pan  tawm tek tek ta sam hi.
Ngeina Laam (Nepali cultural)

Kum 2009  sung Nepal gamah khualzin(Tourist) 509,956 tak lut hi. Tua bang kawm kalah Nepal mi gam danga zin zong tam cihtakin tam zel hi. Persian Gulf leh Malaysia bek ah zong Nepal mi sum thalawh 700,000 bang om ding hi.

Gelth : Thangpi Naulak.
Source : Dei Gratias

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NEPAL GAM TANGTHU Description: Rating: 5 Reviewed By: Cinpu Zomi
Scroll to Top