728x90 AdSpace

Hot
Menu
Zon-ol na Donate

Latest News

Sia Go Lian Suum @ Daivid Suum Taangthu.

Sia Go Lian Suum @ Daivid Suum
Pianna: 
David Suum ci-a kithei Sia Go Lian Suum pen Dec.16, 1974 ni-in Mandalay-ah suak hi. A pa Hang Khan Pau (ATEO MUSE) hi a, a nu pen Dim Zam Cing hi. A khua lui uh Ngennung hi-in, Tedimah khangkhia hi. Tu laitakin a zi Nu Man Zen Niiang tawh Pasian nasemin Yangonah om hi. A nu leh pa in a pian khiatma pekin Pasian nasem dingin a ap khitsa ahi hi.

 Pilna lam: 
Tan 4 dong Tedim Myoma L.P. Schoolah kahin, Tan 5 pan Tan 10 pen State High School Tedimah kah hi. Tua panin B.A. (Theology) pen Evangel Bible College Yangon panin Academic leh leadership award tawh zo khawm hi. 2001 kumin Philippine gam panin Master of Church Music (MCM) degree a ngah hi.

La lam tawh kisai: 
A neu tunga kipanin la lam leh tumging (music) lam uk mi hi a, Tan 10 ong ding, tua ciang Lai Siangtho degree ngah ding cih a tupnate tangtung hi. Yangonah sang a kah ciangin a ukna kibehlapin music tawh hunbit a Pasian na sep ding lunggulhna lianpi nei hi. Khangnote music leh Pasian thu tawh pattah ding a lunggulhpi pen ahi hi. Hihte hih zawhna dingin Fil.4:3 siksanin “Hong thahatsak pa hangin na khempeuh ka hih zo thei hi” cih leh “upna tawh kalsuan ngam peuh lehang a piang lah na om lo hi” cihte bulphuhin a nei hi. Late 150 bulphuhin “Zeisu pahtawi ni” cih leh “Leitung khempeuh pai un” (Go into the World) cih late phuakin khui sungah a khum hi. A la phuak dangte zong Kawl kam tawh kitei-in khui 4 bang a khum zo hi. La leh music uk ahih mah bangin Philippine, Thailand, Malaysia, Singapore, Hongkong leh Japan cihte-ah pai kawikawi-in la tawh Pasian nasepna a nei ngei zo hi.

Festival of Praise (La Pawipi): 
Kum 3 sung bang Zogam leh Zomite in 2 Kum.7:14 bulphuhin kipumkhatna dingin Pasian maipha zon’ ding lunggulhna a neih khit ciangin tua phatna Pawipi pen Tedim khua Sanginn tualpi-ah Nov.30-Dec.2, 2005 sung Zomibup huap Pawlpi tuamtuam kipawl khawmin kizang hi. Lapawl 49 kihelin mihing 3900 in “Halleluijah Chorus” cih la Zo kam leh Mikang kam tawh Sia David Suum makaihna-in sa ziahziah uh hi. La kidemna leh Pasian pahtawina thupi takin bawl uh hi. Nitak simin thugenna om a, Rev.Dr. Cin Do Kham (AG), Rev.Dr. Do Suan Mung (EBC), Rev.Dr. Gin Khan Khual (ZBCM), Rev.Dr. Khai Khan Suan (AG), Rev.Dr. Dam Suan Mung (FGA) te in thugenna nei uh hi. Hih pen Zomi khempeuh in Pasian mahmah phat khawm a, tua phatna tawh Pasian maitang zongin tua tung tawnin kipum khatna leh gam leh nam khantohna a pian theihna ding deihna ahi hi. Tua kikhopna-ah nitak simin kikhawm mi 20,000 bang pha den hi. Tua hunah sum Ks.169,00,000 bei hi. Hih zah a thupi Pasian nasepna pen amah David Suum geelna leh makaihna ahi hi. ZOMUS leh TCF te panpihna tawh lawhcing takin a piang ngei nai lo, mai lamah zong a piang kik zo ding hiam cih zong a kigen thei lo “Festival of Praise” pen Tedim khuapi-ah kibawl hi.

Grace Music Institute: 
Khangnote pattahna dingin music sinna sang “Grace Music Institute” kici Yangonah 2005 kumin phuan hi. Tu-in kum thum ding hi ta a, batch nih in a zo ding hi ta hi. Hih zong Zomi sungah a masa pen hi dingin kiciamteh hi. Khangnote music lamah khantohsak ding a tupna leh a ngimna ahi hi.

Amah in a genna-ah Music in “Lungnopna, hauhna leh minthan’nate hong pia thei hi. Ahi zongin zang khial lehang siatna hong pia thei baih penpenin supna, zawn’na, mindaina leh leitung nuntakna beina dong piangsak thei hi. Music siamna Pasian lamah a zangte in vantung gam malepte hi. Vantungah Pasian phatna leh biakna (Praise & Worship) bek om ding hi” ci hi. A tangthu a kicing zaw-in a thei nuamte in www.GracemusicInsitute.org ah kimu thei ding hi.

(Hih pen Zomi Siamsin Magazine 2006 sunga Cingno in Oct.21, 2005 ni-a a holimpihna leh Festival of Praise thu kigelhna pan kikaikhawm hi)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Sia Go Lian Suum @ Daivid Suum Taangthu. Description: Rating: 5 Reviewed By: Cinpu Zomi
Scroll to Top