728x90 AdSpace

Hot
Menu
Zon-ol na Donate

Latest News

PENTECOST NI A THUPINA, PAWLPI PIAN NI (Church Birthday) A gelh - Mang Khan Khup

PAWLPI PIAN NI
(Church Birthday)
A gelh - Mang Khan Khup

THU MASA:

Christian pawlpi tampite in Christmas, Good Friday leh Easter Sunday zah a, a thupi ngaihsut khol loh uh, a thupi mahmah ni thupi ni-in  Pentecost ni hi a, tua ni pen Christian Pawlpi hong pian khiatni ahi hi.  Khangluite in "phulum phul nading leikha in petlet" cih paunak a neih mah bangin Pentecost ni pen a phulum ahi, pawlpi pian khiat nadingin a leikha ahi hi.  Leitung pawlpi tampite in hih Pentecost ni pen a thu a theih bek dingin, Kha Siangtho hong ki buakni leh  Sawltak te nasepna hi ci-in pawlpi pianni ahih lam phawk taktak lo uh hi. Pawk uh hi leh mihing pianni a kipan gam khat pianni te zong lim ngaihsut in Birthday bawl tangtang uh hi. Hih pawlpi pianna thu leh a zia ih tel nadingin Pentecost thu ih kikum masa ding hi. 

 I. PENTECOST BANG HIAM?
Pentecost pen mikang pau hi a, Greek laimal pentekostos pan kila hi-in, sawmnga(fifty) cihna ahi hi.  Judah mite' pawi nam sagih lakah a lina leh a lian nihna hi a, anlak zawh cianga a ki bawl lungdam kohna pawi ahi hi. Hih pen nipikal pawi zong kici a, paisan pawi a cin khit ni sawmnga dong kisim to pawi ahi hi.(Siampi 23:15-17)Tua banah Sinai mual tungah thukham sawm a piak ni zong tawh ki tuak lai hi. Christiante aadingin hih ni a thupi diakna ah, Topa Zeisu si-in a thawh kik zawh ni sawmnga ni a cin tawh ki tuakin Kha Siangtho ki bua a, Pawlpi hong pian khiatni ahih hang ahi hi.

 Christiante aadingin Zeisu nungzui masate tungah Kha Siangtho ki piak ni masa, ni thupi ciamtehna ahi hi.  Judahte' hun lai-in Hebrew kamin Shavuot a kici Nipi kal pawi ahi hi. Igypt gam sal tanna pan a pai khiat zawh uh ahih kei leh paisan pawi zawh ni sawmnga  ni ahi hi. Pentecost ni tun ma, Zeisu sihna leh thawhkik khit in zong Pawlpi cih bang om nailo hi. Pentecost ni hong tun ciangin Kha Siangtho ki bua a, tuani pen leitungah Pawlpi pianni (Church Birthday) hipah hi.


II. HIH PENTECOST NI-IN BANG THU PIANG?
Hih thu a pian nadingin tanglai kamsangte leh Topa Zeisu mahmah in a gen kholhnate na om khin zo a, tuate a tangtunna ahi hi.(Joel 2:28-33; Sawltak 2:16-21) Hih thu pianzia pen Thuciam thak sung Sawltak a lian nih sungah na kiciamteh a," Pentecost pawikham ni a tun ciangin amaute khempeuh mun khat ah a om khawm uh hi. Tua laitakin huihpi nung bangin vantung panin awging khat thakhat in hong suak a, amau tutna inn a dim sak hi. Tua laitakin meikuang tawh ki bang leiite ki khenin, amaute kiangah kilang uh a, amaute khempeuh in Kha Siangtho tawh kidimin, Kha Siangtho in thu a piak bangin kam tuamtuam tawh thu a hilh uh hi." (Sawl.2:1-4) Tua ni pan kipan in Zeisu min tawh na khempeuh sep kipan hi.

Judah mite' ngeina bangin Pentecost pawi ni in Jerusalem khua ah gam sung mun tuamtuam pan hong pai pawisim mi nam 17 te in a zak ngei loh uh kam tawh pau bualbual a Pasian' min phatna a zak ciangun lamdang a sa mahmah uh hi.  Pawl khat te in a mau pianpih kam bangin a za uh hi.  Pawl khat in hai ngaihsut uh a, zukham bangin  ngawh liangin zahko uh a, pawl khat a lungsim uh vut in a ki khel uh hi.(Sawltak 2:12) Hih hun sungin Kha Siangtho a ngah lam uh ki theihna ahi, theih loh pau, glossalalia(Greek glossais lalo) in pau uh a, Pasian tawh kiho na bek hi-in, kuamah in a pau theilo uh hi.(Sawl.2:4; 10:45-47; 19:6; 1Kor.14:2) Tua hun lian mahin amau kam ciat a, a ki za thei kamtuam pau zong om a, tua pen mimal leh pawlpi ki puahphat nading kamsanna tawh kizom kamtuam pau ahi hi.(1Kor.14:5-6,13-17)

Paul laikhakte sungah Kha Siangtho letsongte thu kician takin na gen a, tuate khempeuh Sawltak te hun sunga thupiang vive ahi hi.  Hizah takin kitel takin  Kha Siangtho thu leh thuman thutak a gen hangin a za mite’ lakah lungsim nam nih om tawntunga, a um thei pawl om mah bangin a um theilo a, a langdo zong om tawntung hi. Tudong mah tuate a kizom lai hi a, nitawp ni ciangin a upna leh up lohna thaman ciat uh hong sang ding hi.

III. THUCIAM THAK PAWLPI HONG SUAK KHIA
Mate 16:18-19 sungah “Ke’n kong cih-inah, nang, Piter na hi hi. Hih suang tungah ka pawlpi ka lam ding hi. Hell khua kongkhakte in tua pawlpi a zo kei ding uh hi.  Vantung Gam kong hon’nate nang kong pia ding hi. Nang in leitungah na hen khempeuh, vantung gamah kihen ding hi. Leitungah na phel khempeuh vantungah zong kiphel ding hi,” ci-in na gen khol hi.  Luka 24: 47-49 sungah zong,” ama min tawh mawh kisik kikna thu leh mawhmaisakna thu Jerusalem khua pan akipan mi pawl khempeuhte’ kiangah a kigen ding hi ci-in ki gelh hi.  Hih thute ah teci nahi uh hi.  Pa’ thuciamna kong pia ding hi.  Ahih hangin vantung pan vangliatna na ngah matengun, hih khua ah na ngak lai un,” a ci hi. Sawltak 1:8 ah zong Jerusalem khua-a  kipan leimong dongin ka teci nahi  ding uh hi, cih a tangtunna ahi hi.

Hih a tunga Topa Zeisu kamciam nate pen Pentecost ni ciangin hong tangtunga Piter in Topa Zeisu thu a up ding uh a gen ciangin tua mite a lung uh vut a, “Ute naute aw, bang ka ci hih ding uh hiam? Ci-in Piter a kipan a dang sawltak te kiangah a dong uh hi. Piter in, “ Na mawhnate uh kisikkik unla, na vekpi un, mawh ki maisakna dingin Zeisu Khris min tawh kibaptaiz un, tua bang na hih uh leh, Kha Siangtho’ thupha letsong na ngah ding uh hi.  Bang hang hiam na cih leh, kiciamna in note leh na tate uh ahi zongin, gamla ah a om Topa ih Pasianin a sap ding mi khempeuh ading ahi hi,” (Sawl.2:37-39) ci-in a gen hi.   Tua thu a mang mite ki baptaiz uh a, tua ni-in mi tulthum bang a ki behlap uh hi.(Sawl.2:41)

Hih a tunga Piter ii vantung gam kong honna leh Pawlpi pianna thu bulphuh te ih et ciangin a nuaia thu laigil te ih tel ding kisam hi.  Bang hang hiam cih leh hih Jerusalem khua thupiang bek hilo in, a dang pawlpi dinna khempeuh ah a din pih thu bulpi uh kibangin kamsangte leh sawltakte’ tungah a ki zom pawlpi ahi hi.(Efesa.2:20-21; 4:5-6)

1.  Mawhna kisikkik un la, Zeisu Khris min tawh ki baptaiz un,tua hi leh Kha Siangtho na ngah ding uh hi, cih thu thum tawh na ding uh hi. Ki sik ding mawhna leh maisak nadingin mawhna phungpi nam bangzah om a, tuate bangci maisak cih ki kum suk ni. Mawhna bulpi nam thumte: 
(a) Luah suk mawhna:  Hih pen Adam leh Evua tungtawna ih luah suk mawhna ahi hi.  Hih mawhna a mai nadingin kumsim a kigo gansi te’ tang dingin Topa Zeisu khatvei hong sihna tawh mihinga min piang khempeuh hong tan khin zo hi.  Hih sisan tawh a umte bek hong tan hilo in a umlo, biakna nam tuamtuam te zong a tatsa ahi hi.(Rom.3:23; 6:23;1 Kor.15:22,45)
(b) Zeisu Khris Up loh Mawhna: Mihingte a it manin Kha Pasian kimlai mihingin hong paisuk a, a sisan tawh hong tanin hong thawh kik khit teh tua hong puak suk Pasian’ min neipa Zeisu up loh mawhna ahi hi. Judahte in zong Zeisu pen a mah leh a mah Pasian bangin ki gen cih mawh sakna bulpi tawh a thah uh ahi hi. (John 19:19) Hih mawhna pen ama min ahi Zeisu min bek tawh tui kiphumna in maisak thei bek hi.(Sawl.2:38; 10:47;19:4-5;22:16)
(c) Nisim Mawhna: Hih pen Zeisu sungah ih suah kik khit ciangin si leh sa tawh ki nungta lai ahih manin ih ngaihsutna a kipan genna leh sepna tawh kizom mawhna te ahi hi.  Hih pen lungsim kisik takpi in thu ngen leng ih mawhna hong maisak hi.(1John. 1:9)

(2). Hih ki ciamna pen kuate’ aading hiam cih tawh ki sai-in, note acih ciangin a gei a om Judah suante a gen hi a, Pasianin a sap ding gamlapi ah a omte cih pen Gentail mite ahi hi. (Efesa.2:11-13)Zeisu pen Judahte leh Gentailte’ or mi khempeuh aadinga hong pai  ahi hi.

Tu in hih a tunga ih gensa Jerusalem khua ah hong ding masa(Original Church) ii ki ngakna bulpi a tomin sut kik lehang; Jehovah in hong gum khia hi cih min hong pua Zeisu tungah a kilam pawlpi hi a, amah bek Pasian hihna tungah a kinga pawlpi ahi hi.(Thuhilh kikna 6:4;1Kor.8:6; 1 John 5:20) Amah in Si, Tui, Kha tawh hong pai mah bangin amah a umte in tua teci pang thum mah tawh dawn tuahin ih neih ding hong kal hi.(John 8:32; 1 John 5:6-8) Hih thu a telsiam dingin Topa’ Kha Siangtho in na lungsim kha hong hon sak tahen.

IV. HIH THU A PIANG TAKPI MAHIN IH UM THEI HIAM?
A khial theilo Pasian’ kammal ahi, Lai Siangtho a umte aadingin Sawltak bu sunga thute zong umin muang thei dinga, ahi zongin Lai Siangtho ii thu neihna(authority) um zo taktak lo in a lunghiang lai mi na hih leh hih Sawltak  sung thupiang pen na muang zo taktak kei ding hi.  Hih Sawltak bu sunga thupiang pen mipil pawl khat in a man leh manlo a kan ciangin, a dangah ki khum lo a, hih bu sung bek mah ahih manin hih bu sung longal lak theih leh tehkak theih ding a dang mu tuanlo uh hi.  Tua Sawltak bu sunga a muh bangun tangthu te Encyclopedia sungah na ciamteh uh hi. Tua bangin Lai Siangtho lam pilna neite in zong a kan ciangin, pawlpi pianna thu, thupi lak mel lo in, Kha Siangtho ki piak zia leh a kiim a pam teng lumlet in gen zul pongmawk uh hi.

Sawltak bu zom a ki gelh laikhak tuamtuam te zong Sawltak hun sunga pawlpi dingsa teng leh thupiangsa te tungtawna ki khak bek ahi hi.  Tua bang theisa hinapi-in pawl khat in a pawlpi ki ngakna zia taktak sangin a kisapna tungtawn a thu hilhna peuh bulphuh zaw thei uh hi.  Sawltak Laibu gelhpa pen Luka hi a, Thuciam thak bu a thumna gelhpa mah ahi hi.  Hih Luka Laibu ih muan leh Sawltak laibu zong ih muan kul hi.  Luka Lai Siangtho gelhpa in Sawltak bu sungah kuamah in a zak ngeiloh, theih loh pau tawh Kha Siangtho ngah lam hong ki theisak a, tuani mahin Pawlpi pian na thu na ciamteh hi.

Mi tampi in a theih loh lai-in a nialnial hangin Pasian Kha Siangtho ii nasep tawlnga tuanlo hi.  Nidang hun leitung leh ih Zogam mahmah ah Kha ki buak cil lai-in mi tawmno cik bekin sang thei a, a hai zah dongin a ki lipkhap liang hangin tuhun ciangin leitungah a manlang taka khang pen khat ahi hi. Pasianin a hunhun in thuman thutak hong lak toto in ih phak, ih theih nailoh thuman thutakte a ki nialnial lai hibek  a, theih loh kalin ih nialnialte’ nung a kizuizui ahi hi.  Hih Pasian’ tat khiatna thu pen khang khat khang nih thu leh a kum ki ciangtan khat vai ding bek hilo a, a bei ngeilo tawntung thu ding ahih manin ei ii leitung lungsim lel tawh neu ngaihsut a, ka cihsa ka cih ci a, lungtang khauh ngam dingte nam hilo hi.  Mipil misiam leh a tamzaw thukimna peuh tawh vantung gam thu a ki khen ding hilo hi.  Hehpihna hun sung Pasianin thuak keiikai in hong zol hi bek a, thu a khen ni ciangin pammaih hongs a hetlo ding hi. Hih leitung nuntakna pen tawntung nopna leh Gawt mun khat zawzaw pai nading ki gin kholhna mun bek ahi hi.

V. THUKHUPNA
Pentecost a kici, ni-in vang liatna a nei hilo a, tua ni a thupiangte in vang liatna nei hi. Anlak pawi leh nipikal pawi Pentecost ni pen Topa tungah lungdam kohni ahi hi.  Sinai mual tung pan thukham lak ni ahi, Pentecost ni-in mi 3000 in sih lawh a, Topa Zeisu thawh kik zawh ni sawmnga cinna Pentecost ni-in mi 3000 in nuntak lawh hi.  Tuhun ciangin a tawntunga ki mang ding Kha nuntakna sangin tomkal sung bek ki mang ding leitung nuntakna ki thupi ngaihsut zaw hi.  Thuman thutak sangin a puatham teng ki lunggulh zaw a, nuntakna sangin sihna lampi ki telzaw ta hi.(Isaiah 30:10; 2Tim.4:3-4)

Sawltak hun sunga Jerusalem pan hong kipan pawlpi diktak thu bul phuh sangin khuamial sahpi sunga pawlpi piangtawm te thukhun te ki zui nuam zaw ta hi.  Kha nuntakna sangin taksa nuntakna bulphuh in pawl leh gual sep leh bawl ki zong zaw ta hi.  Hihte in ih theih nailoh thupiangte hilo a, tua bang hun hong tung ding hi ci a, kamsangte leh Lai Siangtho gen vive a tangtun na ahi hi. Zeisu leitungah mihinga hong pai lai-in bawngan kuang sungah hong tuanga, mi ten sihna tawh thu a khen hangin, a nih veina hong paikik ciangin sakol kang tungah tuangin a mah in thu hong khen ding hi.
 Nitawp ni ciangin na pilna, na hauhna, na pawlpi, mi tamna leh na suan na muan te in nang hong gum zolo dinga, Gawtmun na tunpih mi a tam mahmah hangin nuam na sa tuan kei ding hi.  Leitungah pawlpi tampi a om hangin lei Jerusalem khua pan kipan pawlpi tawh ki tuak upna leh kalsuanna na neih kei leh Sawltak te tunna na tung ngei kei ding hi.  Sawltakte tunna na tun kei leh a lailak ah khawl mun om nawnlo a, a dang khat pen Hell meiilipi hipah hi. Lai Siangtho pen a umte’ aadingin nuntakna hi a, a umlo te’ aadingin sih tawntung nading haamsiatna ahi hi.(Mang.20:15) Na tawntung mun ding ni khat zan khat thu in na khel thei kei dinga, ahih hang, na tun nading lampi tu mahmah in na khel thei hi. Lawm aw tuni-in Nuntakna leh Sih tawntungna koi na tel zaw diam? Hell gam in na ciah kik nading return ticket neilo hi.  Hih thute a telsiam dingin Topa in thupha hong pia ta hen.

Note tawh Topa’ lenggah huana mapang Khawm,

     Mang Khan Khup
     Tulsa, USA
     May 15, 2016(Pentecost Day)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PENTECOST NI A THUPINA, PAWLPI PIAN NI (Church Birthday) A gelh - Mang Khan Khup Description: Rating: 5 Reviewed By: Cinpu Zomi
Scroll to Top