728x90 AdSpace

Hot
Menu
Zon-ol na Donate

Latest News

Rev Hen Khan Go Tangthu Tom leh Ama gelh Tuun leh Zua Article 2.

Rev Hen Khan Go Tangthu Tom


Min: Hen Khan Go (Gopu)
Pamin:  Zam Za Dal (Tawmbing/ging)
Numin: Zam Za Zen (Bawmkhai)
Suahni: April 4th , 1962.
 Pian pih sanggam:
1. Nu Cing Man Niang + Pa Thang Za Cin (Bawmkhai)
2. Pa Cin Za Mang + Nu Niang Zen Cing ( Hatlang)
3. Nu Cing En Hau + Pa Gin Do Pau ( Bawmkhai)
4. Nu Gin Tul Cing+ Pa Suan Ngaih Lian ( Zahlangh)

Zile ta Neihna:
Zimin: Nu Zuan Zen Cing ( Buansing) tawh 1983 August 7th ni in Rev Neng Suan Thang in Saipimual Tuiphum Biakinn sungah Siangtho kiteenna pia hi.

Ta Neihna:
1. Pa Dal Lian Mung (B.Th ; BCM @GMI) works at Whirlpool Company + Nu Vung Siam Lun Cing (Thomte) B.A in Geo IIyrs. USA
2. Pa Do Sian Lal (B.Sc Physic) work at Car Sale Man and Professional Consultant South point Chevrolet Group I Company  + Nu Cing Go Kim ( Naulak) USA
3.  Pa Mang Tung Thang B.Th IIyrs + Nu Cing Neih Sui (Sumthang)
4. Tg Zam Muan Tuang B.A in( Political Science)
5. Lia Dim Lun Kim ( Paisa)
6. Tg Samuel Kham Suan Thang ( II Years of Computer Science)

Pianna: Saipimual Khua, Tonzang Myone, Chin State, Myanmar.
Khan Khiatna: Saipimual
Teenna: Tahan, Kalaymyo
Khualui: Saipimual
Pilna Sinnate:
1. Tan 1/2 pan tan 4 SPS Saipimual
2. Tan 5- Tuimui  SMS-Tuimui
3. Tan 6&7 –SHS, Tonzang
4. Tan 9- No. 2 SHS –Tahan, Kalaymyo
5. an 10 –SHS-Tonzang
6. Dip. In Counseling –Madras-India
7. B.Th. Serampore University, India
8. M.A in Leadership ASCM-Manila
9. M.Div in Counseling PBTS , Philippines
10. Th.D candidate ABGTS@ PBTS –Philippines

Ukna:  Ki mawlna leh Music uk, siam luat neizo lo.
Nasepna leh Mapan nate:
1. Gam leh nam ading nasepna ( POLITICAL INVOLVEMENT)
2. Lansin lu nge (Socialist Youth Leader)- 1983-1985
3. Ngeng wat pih piahzi committee (Peace and Order Council member) 1988-1990
4. 1990 ki teel pi masa lai-in ZNC makai pi Sitni Cin Sian Thang leh Sia Thang Lian Pau a zawhna dingin vak kawikawi.
5. ZRDP secretary 200

Biakna lam nasepna te:
1. 1983-1991-Sunday school sangsia  Saipimual Tuiphum pawlpi ah
2. 1983-1986 Khangno lai at  Luangel Circle Baptist Church(LCBC) sia khawk ah-
3. 1986-1990President of Tonzang Township Baptist Association Youth Fellowship (TTBA)-
4. 1995-1998  -President of Communication department at TTBA-                   
5. 1995-1997-Assistance pastor at LCBC-
6. 1998-2002-Senior pastor at LCBC
7. 2003 July 1st  pan -Senior Pastor at ZBC-Tahan, Kalaymyo
8. 2005-2011-ZACC –Secretary at ZBCM ah
9. 2008-2011-Mission Secretary at ZBCM ah
10. 2011 pan Mission President at ZBCM – (on going)

11. 2006-2014-Academic Dean at Zomi Theological Seminary 

Kivaakna ding nasep:                      Pasian na kasepna in kei hong vak
Tup leh Ngim:                                    “Mite ading Thupha Naak”
Lai Siangtho bulphuh:     Isaiah 26:12 “Topa hangin ma ih tun hi”

Mipilte kammal hoih bulphuh:
 William Carey “ Pasian ading na lianpi sep tum in la, Ama kiangpan nalianpi lam en in”

Zomi Namte Minam vai ka muhna leh Deihsakna: 
  • Minam vai ah khan lawhna lianpi 2014 sungin hongpiang hi ci-in ka mu hi. 
  • 2014 sung mah in minam khat ih hihna Kawlgam kum pi theih pih nading 914 lampi khat Pasian in hong sial sak hi ci-in ka mu hi. 
  • Judah gam ah mikisimna a om lai tak in Leitung minam khempeuh a gum ding Zeisu asuah tawh ki bang ka sa hi.
  • UNO zumpi dongah Minam kician taktak khat ih hihna  2014 kum mah in  ZI-USA makaihna tawh hong piang khia hi ci –in ka mu hi. 
  • USA leh gam khangto te ah Pasian in hong puak gawp hangin ih nunzia (Civilization) in ih omna gam phazo (banzo) nailo –in Pasian hehpihna hang bekbek hi ci-in ka mu hi.  
  • A leikha pen Rev Dr Chin Do Kham hi ci in ka mu hi.
  • Minam vai ih ngaih sut sim in, ih pian lim in Zomi ih hi hi.  Ih Sisan ngiat Zomi sisan hi.  Ih Lungtang zong Zomi lungtang hi.  Tua ih lungtang Zeisu ih piak kim ding deih huai kasa hi.
  • Minam (Nationalism) thupi sak lua kisa in ei Zomi lo peuhmah gal bang a ih muh khak ding lauhuai kasa hi. 
  • Minam thupit sak dungzui-in, Khua kipawlna, Beh ki pawlna, ki thupi sak mahmah in ka mu hi. 
  • Ka deihsakna ah bel ih Zomi lip in Pasian khatna ah koih in Minam vai nihna ah koih leng lunggulh huai ka sa hi.
  • Awkaih zui- a kipawlna pen nei kei zaw maileng hoih zaw dingin ka mu hi.  Gentenna in kei bang kapu ciang Sihzang pau a, ka pa pan kei ta ciangah Teizang pau in, ka tuute Mangpau peuh hong hi thei dinga, aw kaih zui-a, ki pawlna ih thupi sak leng munthum ah ko innkuan ka ki pawl uh kul ding hi.
  • Tua Aw kaih zui ki pawlna in buaina piangsak thei ban ah kipum khatna susia thei dingin ka mu hi.  Awkaih pen Minam min ding neulua hi cih ih tel mahmah ding lunggulh huai ka sa hi ( Teizang kampau , Sihzang kampau, Saizang kampau, Dim kampau, Zo kampau, Phaileng kam pau, Losau kampau, Khuano kampau, Vangteh kampau, Paite kampau, Gangte kampau, Mal kampau, ki pawlna cih bang atuamtuam nei dah zaw leng aci nuam ka hi hi ) .
Zomite Lai Lam leh Pilna lam:
                Zomi te Pilna lamsang ah a dawndong ih tunna om mahmah ta in ka mu hi. Ahi zong anam kim in adawn dong ki tungzo nailo hi.  Israel te hih zah a mihau, mipil, atam na uh abulpi PILNA ahih man in, tua pilna angah Khangno tampi hong om leh ih gam hong paal lun ding hi.  Mailam ah khua hun ki hei zui-in biakna lam pilna (Theology) sangin Leitung pilna (secular) lam ki hanciam zaw dingin ka mu hi. 

                Ih lai pen A B C azang lai khat ih hih man in, kawlte bang sangin ih ma dawk zawkna tam pi om in ka mu hi.  Pau Cin Hau lai pen Zolai sangin thupi zaw aci pawl zong om a, hih laipen (Kawllai, Meitei lai, Hindi lai) hih nam thum leh ei kam khiatna anei thei ciangkang dan pawl khat aki gawm ahih man in- Zolai mah zuun in puah leng lai kician nei suak zaw dingin ka mu hi.

Gamdang painop laina mun gam thum:
1. Israel gam
2. Australia gam
3. England gam

Leitungah Lasak siam kasak mi thum:
1. Michael W. Smith
2. Adam Levine
3. Celeron Dion

Zomi Sungah lasak siam kasak mi thum:
1. Kapno
2. Kam Sen
3. Cingsan

Zomi Sungah laphuah siam kasak mi thum:
1. Lengtong Pauno
2. Thawn Kham
3. Neng Khan Pau

Zomi Sungah Music Siam ka sak mi thum:
1. Deihpi
2. Cinpi
3. Khualtawng

Zomite bawl ka deih mahmah laibu buthum:
1. Zomi Chronological –Khup Za Go
2. Zomi Tatzia le Ngeina- Thang Khan Dal
3. Zo History –Vum Son

Laibu bawl:  Zawh siang om nai lo, mailam ah :
1. Makai leh Anasep
2. Kiteen na leh Innkuan thu
3. Pasian Nasepna ah Haksatna  hih buthum pen computer ah om khin in alem hunhun ah print ding.

Kizopna ding
                133/6 Tahan, Kalaymyo
                Sagaing Division,
                Myanmar.
Phone :959400307703
918-845-2239 (tomkal-US)

                gopucingtom@gmail.com

                Facebook: hen khan go
                Church facebook: Zomi Baptist Church


--------------------------------------------------------------------------------------------------------------------------

Pianna Zua Ngaih
Pate Zahtaakna in Nopsakna le Khansauna hi
(Ephesus.6:3)

Thupatna:
Pa thupi ahih man in,  Pasian tungah thu I nget ding ciangin zong “Vantung a om kote Pa aw” cih tawh kam pan hi hang.  Pate Ni ading lai ki gelh tampi ka sim kha a, thupi ka sa thei mahmah hi.  Innkuan sungah Pa te ii thupitna ka ngaih sutsut ciangin anuai ateng ka phawk khia hi.  Israel te in zong Pate hun cih khat na nei uh a Abraham, Isaac, Jacob, leh Joseph te hun ahi hi. Ihpu ihpa te khan lai in acih uh leh hih mi li te phawk pah uh a, theih sa dan in ngaihsun uh hi.

1.            Pate in Innkuan sungah Zingvai hawm te hi.
Pate pen innsung zingvai hawm ding a Pasian in sathau anilh khit ahih man in Pasian in innsungah Pate zangin vaihawm na ciang khat om hi.  Ih pate hong om nawn loh ciang ih pate zingvai hawm pi ahihna ki phawk sansan hi.  Zingvai a baih te ah ih phawk khak loh ni, ei vaihawm tawh ahih theih hun zong bel om mah hi.  Ahi zongin zingvai haksa khat ih tuah ciangin aw, “Ka pa dam lai hi leh”  dong nuam mah sing ki ci hi. 

Pa te dam lai napi vaihawm sak lo a, Nute zingvai hawmna inn, ta pa, tanu te zingvai hawm na inn khawng zong om thei hi.  Pawl khat ten’ apa si khin phial ta leh apa zingvai hawm mah zuizui uh ahih man in, apa zingvai hawm in sihsan lo hi.  Pasian in PATE zingvai hawm khuan pia ahih man in Hezikiah asih ding ciangin “ Si ding na hih man in na innsung vai ding vaihawm in” (2Kum 20:1)  ci mawk hi.   Pate pen innsung vaihawmna za apiak ngiat Pate ahi hi.

Zingvai hawm pa te ahih man un, innsung zingvai hawm man lo lianga, mundang, inndang, leh nasepna bek thupisak lua a, innsung buai pih man lo te atawpna ah ki hawm khai ding hi.  Inn sungah Pate pen hunbit (fulltime) “PA” ahih ding thupi hi.  Hunkhen (part-time) PA te in zingvai aki cian in hawm man taktak lo uh hi. 

Zi nga ciang bang anei thei  Muslim te bangin Innkuan khat ah hunkhen hi keei ding ahih man in, hunbit zah in zingvaihawm zo lo ding uh hi.

Thu vaihawm PA ahih mah bangin thukhen tatna zong aki cian takin PA te mah in aneih theih dinguh ki sam hi.  Phekap, Zudawn, Innkuan sangin midangte in ah hun tam zat zaw PA te pen ih innkuan adingin hunkhen hong suakta ahih man in zingvai hawmna ah ki cian zo lo hi. 

2.            Pate in Kisapna te hong siik Pate hi.
Pa te pen ih kisap na teng hong siik ih Pasian mah bangin, innkuan sung adingin ih pate tungah ih kisap teng ih ngen den hi.  Ih neulai bangin Khedap khat, puanthak khat ih kisap ciangin ipate kiangah ih ngen a, Pate in zong koi hong vai hawmsak uh hi.  Ih pulaak, ih nget sang ahoih zaw ong pia nuam ih pa te ahi hi. 

Tua man in Zeisu mahmah in “ Pa ahi note khatpeuh in na tate un anlum hong ngen leh suangtum apia ding, ngasa hong ngen leh gul a pia ding kua om na hi uh hiam?” (Matt. 7:9-10) na ci hi.

Ahih theihzah val, aneih zah val a hong vaknuam, hong zeem nuam, hong guan-nuam, hong inntuan nuam Pate hi. A piang zo hi leh Taihinn(Building) Motaw (Car) khawng tawh at ate a inntuan nuam Pate hi. Ta te khempeuh in Tan 10 ong-in, Degree sang pipi ngah sak zo le uh a ut Pate vive hi.  Bawllung khawng siam in, Tumging tuamtuam te tum siam in, Lasak khawng siam in, mite mai ah ki langh mahmah hen la, ata te uh mi minthang vive suak le uh a ut Pate ahi uh hi.  Tate gualzawhna ah a angtang khe mahmah Pate ahi uh hi.

3.            Pate in hong cimtaak lo Pate hi. 
Ta nih le thum anei pate in atate lak ah agen hak deuh, athu mang lo deuh, aphengphi deuh khat om leh ciimtaak huai mahmah napi-in, cim taak het lo in athuak keeikaai Pa te ahi hi.  Ih tate ahi lo, mita te in ahaksatna, aki sapna hong ko leh nihvei, thumvei ki huh zo thei dinga, ahi zongin tam vei lua leh ki ciimtaak in, ki pau kha bek tham lo-in, ki pia nawn lo thei ding hi. 

Pasian leh ama tapa Zeisu a um te ki zop na dinmun zong tua dan mah  ahi hi.  Pasian in ata te hong ciimtaak loh mah bangin, I pa taktak te in zong hong ciimtaak ngei lo uh hi. Ih biak ih pa in kisap nateng hongpia thei a, Leitung pate in hong pia khin zo lo tua bekbek ki lamdang hi.  Pilna, siamna, huahna, minthanna ih neih sunsun pen ih nule ih pa te hong pantahna tawh Pasian hong piak ahi hi.

Gentehna: Khat vei lampi geikhat ah mikhat accident in amai tang, apum pi teng si leh nai tawh ki dim in san ziazua hi.  Akim ading Palikte, motaw pikel te, mipi khem peuh in a tua pa gal et in, zong kih huai sa mai uh a, hehpih huai na pi-kua man va lawng lo uh hi.  Ahi zong aden deuh ciangin apa hong tung a, nu aw KA TA ci-in kua mah zong khual zo lo in pomto a, ata si le nai teng ama tungah bang hi.  Tua banglian a hong Ciim taak lo, hong ninglo Pa te hi. ( Ka tapa thumna accident tungtang thu hi).

4.            Pate in ih thupha naak hi.
Nu leh Pa kiang pan thupha ngah cih pen ki lunggulh ciat a, ahi zongin athupha zawi tawt haksa hi.  Ih nu ipa te thupha Gansi taak in ih dawh man a, thupha hong luang pah zuahzuah ding zong hi khin pah lo in, tua thupha hong luan nading a, alung kim theihna uh na thupi mahmah hi.  Tua thupha pen amau om nawn ta kei leh nungta thei lai mawk hi. 
Khua khat ah, ahat lai in apa lei denna in, buhtei golpi tawh asat tapa khat om ngei a, tapa nei lo pah lian in, ta numei bek nei a, aki siik ciang ahun ki taan ta hi.  Tapa nei lo mah in si mawk hi.  Ih gamtatna neu khat, ih kampauna malkhat in thupha zawi khantawn ading khak tan thei hi.

Gentehna:  Tapa 5 leh ta nu khat anei Pa khat sangkah in gamdang pan in hong ciah in apa kiangah damlo thei lua na hih man in, limtak in Zato pite ah ki veelsakni ci-a, Kawlpi leh Phaipi, Lamka te ah apa pai pih hi.  Kawl lam ah pai pih aa, tawm pha tuam hi.  Lamka leh Phaipi (Imphal) ah zong pai pihding gelna nei-in, apa zong ngap ki sa pian ta in akhua uh pan-in khe tawh hong ding khia uh a, khua khat ah giak uh hi.  A zing ciangin tua khua pan in dingkhia kik uh a, tai khat na khawng a pai khit uh ciang apa pai thei nawnlo, paizo nawn lo in om a, nusia in adin khiatna khuate sam ding hi leh lah apa kia muanglo ahih man in, angap dandan in, apai zawh tantan apa puanteen khat tawh naupuak in pua hi. 

Muh tawp tai lang kim khawng atun uh ciangin ata pa zong pa puak gimlua in tuk dek tak a, apa in ka lai tawng gim lua teh mi ongpai ngak ni-in, khawl phot ni ci a ata pa in dawngin  “Pa aw ka neu lai a nang hong puapua, ken tun khat vei bekbek kongpuak hi” acih leh apa Khitui hong luang keuhkeuh mawk hi. 

Pa aw ka tuk leh zong a tuk hi ning mi ongpai kei kha leh eipa ta kia gamlak ah nuam kei lua in teh ci-in, paipai uh a, atupna khua uh zankim phial in tung uh hi.  Tua thu ah apa lungkim lua mahmah in tamvei pi adam sungin gengen hi. ( Hih thu pen laigelh pa leh apa hi-in, Cikha pan Khenman zuan a apaina uh kum 2000 thu hi).

Thupha ih cih pen Ankuang, puansilh niikten tawh thupha dawh ci-a, mipi muh a ih dawh zong hi kha mah in teh, ahi zongin mi ong muhpih loh hun a, inn sungah inu, ih pa te a lungkim sak mahmah gamtatna te zong ahi hi (Pai.20:12).

5.         Pate Zahtaakna in Khansauna le nopsak na hi.
Leitung ah pate itin zakta a khantom mahmah zong om kha thei ding hi.  Hih pen thupiak (commandment) leh khapna (promise) aki thuah thu khat ahi hi(Ephesus 6:3).  Khasua pong a anuam sa het lo tampi om thei hi.  Khasau napi nopsakna leh thuhoih thupha a sin kha mello om thei hi.  Khansau in na nopsak theih nadinguh ci ngeungau mawk hi (Thukna. 5:16). Khansua keei a, tuailuai, kambaak kei, zun leh ek ki siak keei, cih zong nopsakna hi khin lo hi.  Hau keei napi- inn bangah om ngam lo, nopsakna ciam kha lo, gal tai bang kei cih zong nopsakna hi lo hi.  Khansauna le Nopsakna aki thuah pen PA TE zahtaakna pan a ki ngah ahi hi.  Zomi khempeuh angah kim dingin Topa in thupha hong pia kim ciat ta hen.

Thukhupna:


Ih inn sungah ih PATE thu vaihawm pi din mun ah koih den ni.  Ih kisapna te hong zonsak, hongsik, hong vak PA ahih lam mang ngilh kei ni. A tul theilo itna tawh hong ciimtaak het lo a hong it den Pate ahihna phawk khial kei ni. Ih thupha nak ahih lam zong mang ngilh kei ni.  Ih mang ngilh ni ni ih thupha hong kang ding hi. Ih Pate ih zahtaak man in Khansau na le Nopsakna ngah ding pen thupiak leh khapna a omsa a hih lam zong mang ngilh kei ni.  Ih pianna PA te tungah ih bawl bangbang eita ten’ ei tungah zong hong bawl kik thei ding ahih man in, ih san nop leh thute pianna PA te tungah bawl kei ni.  Pianna Zua Ngaih tungah lungdamko ni, Itna lak ni, pahtawina apia siam kim dingin Topa in thupha hong pia kim ciat ta hen!

Rev Hen Khan Go


--------------------------------------------------------------------------------------------------------------------------


Pianna TuunNu  Lungdam Sak In.
Paunak 23:25

Nu Ih  cih kammal:
Nu aki ci kammal pen athuk mahmah kammal khat hi a,  ih haksat ciangin zong nuvei pavei ci-in, na ih sak mahmah ciangin zong nuaw, nuaw ci-in kap hi hang.  Ih nulepa ih lawhna ah zong “NU” mah ki masak hi.  Minam dangte in zong nute thupi sak lua uh ahih man in apianpih kampau pen “Mother tongue” ci-in kanu pau tua hi naci se uh hi.  Tua bang mah in biakna khawng a gen uh ciangin zong “mother church” ka nu pawlpi ci uh hi.  Tua ahih man in NU cih kammal pen akhum ngaungau khat ahi hi.  

Nuten’ tate mawhna maisak zo a, tate in nute mawhna ki maisak zolo thei hi.  Nute in tate sawmbang hong vak zo thei uh a, tate sawm in nukhat pen vak zolo in baak vat bangin a om na mel ding thei lo in, nop asak na mel om lo in ki tai kawikawi sak kha thei a, atawpna ah aki vak zo lo, aki lungkim sak zolo na hi gige hi.

Nute itna pen ih kanngno lai in ki telkim zo lo thei a, ei mahmah nudin mun, pa dinmun ah ih om ciangin ki tel san pan thei hi.  Ih tel ihphawk ciangin ziakai thei hi.  Tua ahih man in ahun lap a nute itna ih theih ding deihna tawh nute itna thu agelh ih hihi.
I.             Nute Itna aliatzia:
1.            Lai Siangtho sungah nuten’ tete ait zia:
a.            Nupi ten’ nawipia limtak kem (Is.60:16)
b.            Anawi atep nau mangngilh lo (IS. 49:15)
c.             Hagar in Ismael it mahmah (Pian. 21:16)
d.            Moses nu in si ngam in kem (Pai. 2:3)
e.            Hanah in Samuel it mahmah (2Sam. 2:19)
f.             Ta nei taktak zaw nu in a itzia –asih sangin taan ngam(1Kum.2:26)
g.            Shunem numei nu in ata ait zia (2Kum .2:20)
h.            Cannan Numei nu maizum khual lo in ata itna lak in damna ngah(Matt.15:22)
i.              Mary in Zeisu a it lua in Cavary mual dong ah zui (John. 19:25)

Mipil khat in alai gelhna ah nute itna gentehna zangin gen a:
1.            Nute itna leitung cia ahih leh tate itna guateh cia
2.            Nute itna agol mahmah Pacific cia aphak leh tate itna guah mal cia
3.            Nute itnaAsang mahmah Everest mual dawn tan ahih leh tate itna Bawngtal ki tan khawng bek hi na ci hi.

Pianna tunnu din mun ah kua mahmah lut thei lo a, kua mahmah in laih theih lo hi.  Neu tunga nute’ itna a ciam kha lo te in nute Itna kial mahmah uh hi.  Ih nute mah in thu ong hilh in ong sat kha phial leh zong “NU AW, NU AW” mah ci –in ong sat numin mah lo in ki kap hi.

Nupi te itna thupi lua mahmah ahih man in amau pumpi tunga om a nawizu ngiat uh zong tate adingin manpha hi.  Ta te mahmah zong ih mit na leh nawizu taak leng dam hi.  Nawi zu tawh akhang khia leh nawi aki pia lo te mipil ten’ aki lamdan na zonguh a, nawi tawh akhang khia te in, khuak pil zaw, guhkhauh zaw, cidam zaw ci ngiat uh hi.

II. Nute pahtawina tawh thupha dawh ni:
Mipil tampi tak in anu te apah tawina un anuai abangin na gen uh hi.
1. Bishop Thompson in “Nu cih kammal sungah lungnopna nam cin om hi” na ci hi.
2. BeogeHerbert in “Nu hoih khat pen sia 100 tawh ki kim hi” naci hi.
3.Abraham Lincoln in “US president ka suah na ka nu ong pantah na hang hi “ naci hi.
4.  Rosa Wallace in “Nauluai a vei khut in leitung buppi uk hi” na ci hi.
5.St. Augustine in “Nute hong pia un; amau te zangin leitung hong ki lamdang sak ding hing” na ci hi.
6.R.A.Torry in “ Nu hoih sang a azah taak huaizaw kua mah dang om lo hi”naci hi.
7.D.L Moody in “ Nu khempeuh kei ma nu dan hi leh leitungah thonginn ki sam lo ding hi “ naci hi.
8.Susanah Wesley in “ Tapa 19 pan tah a, avekpi un mi minthang vive suaksak hi” (mipil tampi tak ii gelh te hih lai ah ih lai sau lua ding ahih man in gelh khin zo kei ni).

Thukhupna:
Na nu adam lai leh napianna nu kiangah thupha dawh hamtangin, na ki sik kei ding hi. Thu-um mahmah khat in thupha deih in zongin, dawh kawikawi a, Pasian kiangah zong thungen in bangci dan in thupha ngah ding ka hi hiam ci-in Topa dong hi.  A zan ciangin amang sungah Topa in ki laak a, thupha na ngah nadingin gamla pipi ah zon kul kei, mi khempeuh kiangah zong dawhdawh kul kei, na kiang a a tu khiukheu na nu teek na pianna nu lungdamsak in cih kam mal amang sungah ki gen hi.
Tua ahih man in anuai ateng ih ki dong nuam hi.
1.            Na nu anungta lai hiam? –Anun taak lai leh thupha dawhna tawh lungkim sak in.
2.            Na Khasia sak ngei hiam?-A kha siat ngei a, adam lai leh mawh mai na ngen in.
3.            Na zi/ nata hangin akha sia ngei hiam?-Akha siat leh nazi na ta, na nu zak loh kal in hilh in, la na nu zahtaak na pia sak in.
4.            An lim ih neek ciang ih ne masa sak ngei hiam?-Ih masak ngei kei leh pia masa ham tangin , a lungsim tawng na lungkim mahmah ding a, thupha zawi hi.
5.            Na pai nading a om ciang nu aw tua lai pai ning ci-in na gen ngei hiam?-Tek lua ta bangmah gen kul kei ci-peuh mah ken la, nu aw tua lai, tua te inn ah va pai pak ning ci in.  Na tun kal ngaklah mahmah ding hi.
6.            Gamla pi ah nutawh ki gamla in na om leh zong alung kim nadingin na hopih ngei hiam?-Atawm pen kha khat in khat vei na nu adam  lai leh phone tawh ahi zong na aw ngiat azak theih nading nam khat peuhpeuh tawh ho pih in.
7.            Puansilh lui teng kholna hilo –in athak sitset na leisak ngei hiam?-Ih leisak ngei mel kei leh tu kum NU NI ciangin athak khat beek hanciam in leisak ni.
8.            Na hih zawhding ahih leh adeih mahmah “Khi bah, Suaikhi, Bilbah, khut bulh, cih ten a guan ngei hiam? Na guat zawh nai kei leh na tha lawhsa mah tawh neih zawh sak sawm in.
9.            Ih neu lai atawm penpen kum nih/kum thum sungbang ih zun ih ek asiak ih nute ahih man in, zun leh ek siak kik akul ciang na siak sak hiam? Kih het lo in siak sak ding ki sam hi.
10.          Ama hong itna zah mah it thuk ding alung gulh ih nute ahi hi. Nu aw nong it nate hangin nuam ing NU AW ong it ing ci ci mai-in, nu dang lei tungah ih pianna nu sim loh adang om lo hi.
Aw mim bang pianna tuun nu—tan bang tehpih ding om lo tunnu, singta gamlei ka heizongin, tun nu itna zah a itna koi mah ah mu zo keng nu aw ongit ngiat ing ei!

Topan’ asim kha khempeuh nute itna thupha hong pia ta hen!

Rev Hen Khan Go.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Rev Hen Khan Go Tangthu Tom leh Ama gelh Tuun leh Zua Article 2. Description: Rating: 5 Reviewed By: Cinpu Zomi
Scroll to Top