728x90 AdSpace

Hot
Menu
Zon-ol na Donate

Latest News

Zomi Innkuan kipawlna hong piankhiat zia, (How came the Zomi Innkuan)

Singapore  Khuapi.
Singapore khuapi sungah om Zomite in, Zomite sungah, Ki-itna leh kipumkhatna a khan semsem nading; Nopna dahna ah khat leh khat kipuakpih nading; Anungta Pasian biak khop nading; Zo-ngeina kemcing nading; Zolai zuun nading; ngimna te bulphuh in, 1997 kum March kha ni 9 ni-in, Zomite Kipawlna khat phuan khia uh hi. Aa min dingin Zomi Innkuan (Singapore) (ZIS) Kipawlna na’ phuak uhhi.

Zomi Innkuan Singapore Logo.

America gam, Florida gamkee sung aom Zomite in, Zomte Kipawlna khat 2000 kumin na phuankhia uhhi. Aa min dingin Florida Zomi Innkuan Kipawlna na’ phuak uhhi.

America gam, Oklahoma gamkee, Tulsa khua sung aom Zomite in, Zomite Kipawlna khat 2000 kum beikuan lam in, na’ phuankhia uhhi. Aa min ding International Zomi Fellowship (IZF) na phuak uhhi. Tulsa khua aa aom masa Zomite a vekpi phial un, Oral Roberts University (ORU) leh Victory Bible Institute (VBI) sangnau pang vive hi aa, Kipawlna min “Christian” kihello saan’ hak/deih zolo uh ahih man in, tua IZF kipawlna min Zomi Christian Fellowship (ZCF) in 2001 kum in kikhek kikpah aa, Pawlpi a hilo, Biakna lam Felowship in tuni ciangciang om toto lai hi. Tulsa khua ah Zomi hong tamsemsem ciang, 2004 kum ciangin Zomi Kipawlna khat na phuan uhhi. Aa min ding Zomi Innkuan Oklahoma (ZIOK) na’ phuak uhhi.

America gam ah, Zomite nikhat khit nikhat hong tung ziahziah hi. Tu-in, America gam State tampi leh Khuapi tampi ah Zomite kiteng kawikawi hi. Zomi kipawlna zong kiphuan kawikawi aa, aa min ding Zomi Innkuan Kipawlna mah na’ phuak uhhi. Tu in USA gam bekbek ah Zomi Innkuan Kipawlna 47 omta hi.
ZIUSA -Logo

2005 kum ciangin, Zomi Innkuan USA Kipawlna (ZIUSA) kiphuan hi. Tu in kipawlna picing mahmah khat hong suakto aa, United Nations khutnuai Economic and Social Council (ECOSOC) an NGO’s Guide to Consultative Status ciang dinmun kingah khin zo hi. Tu ciangciang leitungbup kipawlna vekpi lak pan Consultative Status dinmun ciang a’ngah kipawlna 3400 bangbek om hi.
LZI Flag (Dialkhai, Puanlap)

Leitung gam tuamtuam, khua tuamtuam te ah Zomi Innkuan Kipawl na kiphuan kawikawi hi. 2010 kum ciangin, Leitungbup Zomi Innkuan Kipawlna (LZI) kiphuan leuleu hi. Tu in Leitung gam tuantuam ah Zomi Innkuan kipawlna gam 14 ah omzo ta hi.
Leitungbup Zomi Innkuan - LZI Logo

Christian te in, Christian Biakna thu ihgen (or) ih-at nop leh Itazila mite taangthu ihgen (or) ih-at lo a’phatmawh ngeingei mah bangin, Zomi Innkuan Kipawlna thu ihgen (or) ih-at leh, Zomi Innkuan (Singapore) Kipawlna thu ihgen (or) ih-at loh a’lo theilo a hihi.

Zomi Innkuan (Singapore) Kipawlna hong piankhiat zia in hih bang ahihi. 1988 kum State Law and Order Restoration Council kumpi in, Kawlgam hong uk ciangin, Kawlgam mite gamdangah legally aa, off shore nasep thei nading phalna hong pia hi. Tua dungzui-in, 1990 kum pawl aa kipan Zomite zong Malaysia, Singapore, Japan gamte ah, Work Permit, Employment Pass, tawh nasep hong kipan uh hi. Tua hun laitak in Myanmar Embassy Zum, Singapore khuapi ah, Tg Khual Cin Kam in kumpi nasem in na’ om aa, zintu’n muan khat hong suak ahih manin, Zomi nasep zong hong kibeh lap tuam hi. Zomi nasep leh Laisiangtho sang kah sangnaupang hong ki behlap toto hi.

1997 kum ciang’ in, mimal 300 val bang hong phata hi. Thu leh la piang zong hong tam pianpian ta hi. Pa Zam Khan Kam maakai in, papi innbul tengah leh Taang Gin Za Pau maakai in taangval teng kiangah, Zomite kipawlna khat neih zawh na’ng lunggulhna, campaign hong pai kawikawi uhhi. 1997 kum March kha, ni 9 ni, nitak nai 1.00 pan 9.00 ciang, Bedok veeng Pa Mang Khan Khup te innsap na ah, Zomi Khawmpi hong ki sam aa, Pa Zam Khan Kam, Tg. Gin Za Pau, Pa Mang Khan Khup, Pa Hang Khan Lian te in Khawmpi makai hong sem uhhi. Khawmpi khah mipite tungah, Tg. Gin Za Pau, Pa Zam Khan Kam, Maj. Khup Cin Pau, Pa Pau Za Mung, Pa Sian Khan Mang, Rev. Khai Za Dal, Rev. Ngul Cin Thang, Pa Khup Khan Thang, Pa Mang Khan Khup, Pa Hang Khan Lian, Pa Mang lian Thang, Pa Kam Khen Mang, leh Tg Vum Khan Kam te in Zomite Kipawlna khat phuat ding lunggulhna thu hong sung uhhi. Khawmpi kah Zomi tengin, Zomite Kipawlna phuat ding kithukim kiim ahih manin, “SINGAPORE ZOMI BUP IN, ZOMI KIPAWLNA KHAT PHUAN DING IN IH THUKIM HI” ci-in, khawmpi a kah mipi teng diing (Stand up) in a pulak uhhi. Rev. Ngul Cin Thang in THUPHA pia in, Thukimnate A NUNGTA PASIAN tung ap hi.

Khawmpi session masaa kihial bawl aa, khawmpi maabaan session nihna kizom to pah zeenzeen hi. Khawmpi session nihna Taang Go Sawm Khup in hong makaih hi.

Amaasa pen-in, Taang Go Sawm khup in, kipawlna Ngimna Bulpi leh Thumeilet, Thukhunpi te kiciantak aa gelh kul ding cih thu hong gen hi. Khawmpi in Kipawlna Ngimna Bulpi, Thumeilet leh Thukhunpi gelh ding in, mipi tel maakaipite tavuan/mawhpuak piak ding in kithukim hi.

Kipawlna min ding kikumto pah hi. Kipawlna’ minding in,
(1) Zomi Fellowship,
(2) Ciimnuai Fellowship,
(3) Zomi (Chin) Christian Fellowship,
(4) Myanmar Zomi Christian Fellowship,
(5) Zomi Christian Community,
(6) Zomi Christian Fellowship,
(7) Zomi Innkuan,
(8) Zomi Innkuan (Singapore), min tampi kisungh himah tase leh atawpna-ah akikhawm mipi khempeuh in “Zomi Innkuan (Singapore)” cih dingmah unanimously in kithukim pah hi. Tua ban-ah mailam hong pai ding hunte ahzong, Zomite leitung mun tuamtuam ah nasem in kipai khia ding cih vision zong kinei aa, agamgam akhuakhua atuntunna ah, Zomi-te in kipawlna hong phuan nuam dinguh cih muhkholhna zong kinei hi. Tua ahih ciangin tua aki phuanding Zomite kipawl na te in, min khat (Same name), tupna ngimna khat (Same objectives and mission) leh kipumkhatna (Unity) a’neihthei nading gelna tawh, Zomi Innkuan (Singapore) (ZIS) agam’ min or a khua’ min bracket sungah koih sese dingin ki khensat pah hi. Tua a hihman in, Thukhunpi (Constitution), Thumeilet (Policy or Principle) khat zong kizangh khawm theipah ding lam-etna zong kinei hi.

Nitak an nek khit ciang Khawmpi ki zom toto aa, kipawlna kivaipuak zia, (Organization Structure) dingzong ki geelpah hi. Kipawlna a maakaih dingin, Executive Committee (or) Innpi Vaihawmpawl panmun zong a nuai abang in kiseh sukpah hi. Kitelna zong kibawl pah hi.

Zomi Innkuan (Singapore) maakaiding mi a’kitel theih nadingin, Khawmpi in Kitelna Tanu (Election Commission) ding in, Maj. Khup Cin Pau, Pa Pau Za Mung, Pa Sian Khan Mang, Rev. Khai Za Dal, Rev. Ngul Cin Thang te kitel masa hi. Maj. Khup Cin Pau in election commission maakaipi hong sep pah hi. Free and Fair election a om theih nadingin, Nomination Committee ki sehlo hi. Banghang hiam na cih leh, tua Khawmpi kah Zomite avekpi phial-in, Myanmar Socialist Party hunsung aa, a’khaang te hi aa, Kawlgam kiteel danin Party Unit te sehte (Chiah pyah) bek a kiteel theih bek mah bangin, Nomination Committee te’n a’ nominate mi te bek a kitel thei ding a’sakkhak ding uh patau na ahihi. Mi khatpeuh in makai ding adeih mimal khat propose aa, a thukimpih mi khat aom leh tua mipa in, telthei ding candidate khat ahi pah hi.

Election Commission makaipi Maj. Khup Cin Pau maakaihna tawh, Zomi Innkuan (Singapore) Kipawlna makai ding, Executive Committee/Innpi Vaihawmpawl maakai ding kitelna, Khawmpi in nei pah aa, anuai a bangin panmun kitel hi.
i. Pa Khup Khan Thang : President
ii. Pa Zam Khan Kam : Vice President
iii. Taang Go Sawm Khup : General Secretary
iv. Taang Gin Za Pau : Associate General Secretary
v. Pa Hang Khan Lian : Treasurer
vi. Pa Mang Khan Khup : Assistant Treasurer
vii. Pa Kam Khen Mang : Auditor
viii.Taang Gin Sian Thang : Assistant Auditor
te a’hi uhhi.

Tua ban ah Zomi Innkuan (Singapore) kipawlna Upa Pawl (Patrons) ding in, anuai aa upate Khawmpi in, kiseh pah hi.
i. Pu Khup Cin Pau
ii. Pu Pau Za Mung
iii. Pu Sian Khan Mang
iv. Pu Hang Khan Pau
v. Pu Mang Lian Thang
vi. Rev. Khai Za Dal
vii. Rev. Ngul Cin Thang

Kipawlna ii sepding bawlding aa, aki geelte, asem abawl dingin, Zomi Khawmpi in, kipawlna Madawkpawl (Committee) panmun kigual suk pah aa, Madawkpawl maakai ding zong anuai aa bangin kiseh pah hi.
i. Pa Mang Khan Khup Chairman, Biakna lam Madawkpawl
ii. Pa Hang Khan Lian Chairman, Sum leh Paailam Madawkpawl
iii. Tg Gin Sian Thang Chairman, Ngeinalam Madawkpawl
iv. Tg Gin Za Pau Chairman, Lai leh Thukizaknalam Madawkpawl
v. Pa Zam Khan Kam Chairman, Nopna, Dahna, leh Donghulam Madawkpawl

Madawkpawl panmun anuai a bangin Khawmpi in gualhsak hi.
i. Makai: (Chairman)
ii. Makaihuh: (Vice Chairman)
iii. Maapang.1: (Member)
iv. Maapang.2: (Member)
v. Thusa: (Secretary)

Tua khit banah, Zomi Innkuan (Singapore) Kipawlna THUKHUNPI at dingin, Khawmpi in telcing Innpi Vaihawmpawl tungah thuneihna apiakna dung zui in, Innpi Vahawmpawl in zong, alunglut mimal khat ciat in, Zomi Innkuan (Singapore) Kipawlna, Thukhumpi ding hong at ciat nading in, thumna pulaak hi. Tua a ki at Thukhunpi teng gawmtuah aa, Zomi Innkuan (Singapore) Kipawlna THUKHUNPI at dingin zong kipulak pah hi.

ZIS Innpi Vaihawm pawl in, khawmpi in thuneihna a’pia tung tawn in, a hi thei teng ZIS President pa inn ah, hunawng pen ahi sani ni (Saturday) nitak nihvei bang zanhak liang in, ZIS THUKHUNPI ding kikumkhawm in, atkhawm uhhi. Ahampi (Draft) a’ki man ciangin, Tanjongpaga park ah Zomi taangpi picnic kuankhawm in, tua mun ah, THUKHUNPI mipi tung pulakna leh mipi thukimna lakna (Referendum) nei pah in, mipi tawh THUKHUNPI KIPSAKNA bawl dingin taangko na nei uhhi.

Hih taangkona thu a zak uh ciang in, tuni dong Singgapore khuapi ah atenglai (Still domiciling in Singapore) Zomi papi sagih khawng in, tua bang ziau aa, mipi tung pulakna leh kipsakna bawl thei ding hilo hi ci-in, hih vaihawmna thukimlohna President pa Pa Khup Khan Thang tung, amin uh thuh (Suaikai) in lai pia uhhi. Innpi vaihawm pawl leh papi pawl khat kikum in, Zomi picnic kuan veve ding, a hizongin ZIS THUKHUNPI pulakna neilo ding kipsakna neilo ding ci-in ki thukimna kibawl aa, Zomi Picnic bel kikuan veve hi.

Zomi Innkuan (Singapore) kipawlna in, hih Innpi Vaihawmpawl ii bawl ZIS THUKHUNPI pen, kipsakna aomloh hang in a HAAMPI in zattheih teng zat dingin thukimna kinei hi.
1998 kum October kha ciang in, a kum nihna telcing President pa, Pa Khup Khan Thang te innkuan in, Singapore U.S Embassy zum pan in, U.S.A. gam pai theih nading VISA ngah a, Singapore nusia ding hong hita hi. Tua hun ciangin, THUKHUNPI lah kikip sak nuamlo ahi manin, ZIS President ding By Election tawh tel ding maw? (Or) a kikipsa nailo THUKHUNPI zui in, Vice President kahto sak ding maw cih thuhamsapi khat hong om hi. President pa in amaa thuneina zangh in, amah Farewell kipiakna kikhopna sungah, Vice President pa Pa Pau Za Mung ZIS President dingin kahto sak ding, cih hong pulakhi. ZIS in tuni ciang THUKHUNPI nei maw? Nei nailo maw? Ka theihpih nawn kei hi.

Thukhupna: 
Leitungvai kipawlna khat pepeuh in a kipawlna THUKHUNPI leh THUMEILET DAN te hoihtak a zuih nak leh tua kipawlna khangto pah lel hi. Thukhunpi leh Thumeilet Dan te a zuisiam pawlmi ih hih nang hamciam ciat ni. Tua mah bangin, Gam khat pepeuh in a’ mipite thukimna tawh ki-at, a THUKHUNPI (Constitution) hoihtak zui-in Upadi (Law) in a uk nak leh khangto pah lel hi.

Khup Khan Thang (The then ZIS President)

Khupkhan Thang Taithul
5104 Ladbrook Street
Norman, OK 73072
U.S.A.

(405) 409 0536

Source : Zomi Mail groups , Zomidaily.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Innkuan kipawlna hong piankhiat zia, (How came the Zomi Innkuan) Description: Rating: 5 Reviewed By: Cinpu Zomi
Scroll to Top