728x90 AdSpace

Hot
Menu
Zon-ol na Donate

Latest News

Kei le Ka Bosspa. Gelh - Khat Thang

Ka thazangin, ka maitai den hi. Ka lungsim lawpna le lemetna tawh kidim hi. Bang hang hiam cih leh nuntak hamsatna Kawlgam panin mi tampite utna mun USA gam tungin nasep kipan thei ding hi ta ka hih man ahi hi. 

Nasep nopsa le lawpna tawh nisim mapangden ka hih manin ka Managerte in hong it thei mahmah uh hi. Nasep a tam hun ciangin overtime sep ding zong ka thasial ngei kei hi. Ni le khate hong paipai-in, ka kimlepam naseppih khempeuh tawh ka ki-it uh a, unau bangin ka kikhawl thei uh hi. 


Zingsang khat alarm ging valval ahih manin nasep kuan ding kithawi saisai-in, zekai ding patauhna tawh ka tai vingveng hi. Ni dangin alarm gin ma in khanglo lianlian hi napi ing, a zan nitakin ka lawm ngaihnu in phone sung pan "Sian gawm loh hi mai ni, gi bang i khen kul ding hi, kei singdang anglai khat na zuan ta ning" hong ci ahih manin a thu, a la om lopi hibang thu ka zak manin zan thapai ihmu lo ka hih man ahi hi. 

Tua ni tawntung, ka nasepna ah maitai zo lo-in, ka khitui bang luang kha zel hi. Ka lawmte hong muh ding ut lo lua ka hih manin, dailen buk peuhah pai-in ka kidik vatvat kha liang hi. Ka mai phiatin nasep ka zom teitei hi. Ka mai puak hong en gige ka managerpa in, "Mr. Thang aw, tu ni lunch va nekhawm ni" ci-in hong zawn ciciat hi. Nial nuam lo ka hih manin, ut lopipi, sun-an ka ne khawmuh hi. An nek khit ciangin, ka managerpa in, "tu ni na maitai zo lo ahi ciangin ka lungnop lo hi, bang tuak na hi tam, kong dong thei dia?" hong ci petpet mawk hi. Kei zong, ka kuppih ding dang om tuan lo ahih manin, ka lawm ngaihnu tawh a zan nitaka ka kihona, zan ka ihmut theih lohna teng ka gen hi. Ka managerpa in "tua ahih leh zingciang ni khat na tawlnga hithiat in," hong ci vat hi. Kei zong poi kei ee, boss aw, ka cih nop hangin ka nasep lut cil lai a, nasepna sungah maitai den ding, customerte maitai takin hopih ding a deih ka managerpa thu gen phawk ka hih manin, "aw!" ka ci ta hi. 

A thai ciangin nasep ka kuankik hi. Tua ni pen, ka nasepna uh mei kisia in, computerte down ahih manin nasep tampitak kiphelh banah ka company uh kumpi lampanin inspection semte hong lut sawnsawn hi. Ka managerpa hong lungtom ta ahih manin, mai puamin, hong awitol bangbang keii ta hi. Nitak Inn ciah ding hun ciangin ka pusuah leh mawtaw parking ah managerpa a mawtaw sia in a na bawl niloh ka tuak hi. A gei ka va neih a, "kong huh theih ding a om hiam?" ka cih hang, "piang thei ken teh tu zan ka mawtaw hiah nusia mai ning, ka Inn ah nong kha thei diam Mr. Thang?" hong ci-in, kei zong "kingah lua ei Boss!" ka ci hi. 

Inn caih ma in ka boss pa tawh sai sung ka va lutkik pakuh a, ka bosspa in a zumkhan sung a, singkuang khat hong hongin van khat a koih bang khatin ka mu hi. Ahi zongin a khutah na khat peuh a tawi ka muh sak kei hi. Sai khakin Inn ka ciah uh hi. Ka bosspa' Inn ka tunguh ciangin a Inn sung donguh tawmvei ka zui suk hi. A zi le tate in "Pa hong tungta ci-in kawiin, nam keii uh hi. Ka bosspa zong maitai-in, a zi, a tate hopihin lungnop mai mahmah mawk hi. Ka ciah khiat ciangin ka Bosspa in ka mawtaw gei dong hong kha in, "Boss aw, tu ni i nasepna ah lawh cing het lo hanga, na mawtaw bang sia sawnsawn lai hi napi, Inn na tun teh bangci bangin na maitai-in hi ci om thei mawk na hiam?" ci-in ka dong hi. 

Ka bosspa in zong nui khawmin, "I ciah ma in zum khansungah singkuang sunga ka van koih nong mu kha hiam?" hong ci hi. "Mu mah ing, ahih hang bang hiam thei keng" ka cih leh "tua pen, tu ni tawntunga, i tuahsiatna, i ma kipelhnate le ka hehsuahnate ka Inn ah pua nuam lo ka hih manin zum khan a singkuang sungah a nusia ka hi hi. Tua teng pen zingteh a hoih zaw dingin ka bawlkik ding ahi hi." hong ci mawk hi. 

Kei zong tua ni a kipanin matai takin nisim ka nasepna nuam sa in, ka mapang den thei ta hi. Bang hang hiam cih leh ka Inn ah sing kuang nih tak nei ka hih man ahi hi. Singkuang khat pen lawmnu tawh ka lemlohna singkung hi a, a dang khat pen ahih leh Inn lam NulePa, sanggam ulenaute vai taumtaumte ka koihna singkuang ahi hi. Tu in, tua ka lawmngaihnu tunga, ka hehna, ka khasiatna, ka thangpaihna khempeuh ka guanna singkuang pen tuipi sungah ka paiikhia zo ta hi. 

Hih Thute Manpha Sa Lua Ni Teh!
Cih' Khat Thang gelh Laibu sung pan hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Kei le Ka Bosspa. Gelh - Khat Thang Description: Rating: 5 Reviewed By: Cinpu Zomi
Scroll to Top