728x90 AdSpace

Hot
Menu
Zon-ol na Donate

Latest News

Laipian Pau Cin Hau Tangthu.

Laipian Pau Cin Hau.

Pianna Suahna mun

Ukpipa Pu Khua Cin in Tedim gam ah thu aneih laitak leh aukh hun laitak Tedim khuapi in khangto in inn zathum aphak hun laitak  in Tedim khuapi Bonuai veeng ki cihna munah ateeng  Pu Khan Lian leh Pi Cing Zam te nupa sung pan in 1859 December 28 ni in Pau Cin Hau piang khia hi.


Neulai nasep! 


Pau Cin Hau hong khanliat khit pian ciang in Apianna apa leh anu neihsa Sial leh Keel te Tedim khuapi tawh akinai Mualtuuk leh Saimual munte cingzel in nu leh pa nasep huh hi. Hihbang nasep hun laitak ama pian kum 17 apha hun 1876 kum in Tedim khuapi ah Mailam thu piang ding agen khol thei Pi Nuam Dim tung pan in Pasian in Ka Kamsang ding in Pau Cin Hau kateel hi cih' theihsak na Pasian hopihna, Pasian teel khiatna ngah hi.


Mangmuh kipat hun! 


Pi Nuam Dim tungpan in Pasian in Pau Cin Hau Kamsang ding in a teelzawh kumthum acin kum1879 in Vanglian pen Pasian tungpan thupiakna  Pau Cin Hau  tung ah Mangmuhna tawh thuzaakna ngah kipan hi.

(a) Thangvan azal sian za mang aw' Tongdam khak heem in za'ng e..

(b) Pupa phatloh khuavan nuai ah' Sian tongdam sinthu hi e.

Kum 15 sung kumzawm natna anei hun leh adam kik hun! 


1888 kum in Kum sawm leh nga  sung kumzawm natna kipan in dam lo in om a tua hun sung dawi te abiakna leh a kithoih na zu leh sa ngen loh miin leh taang seu 400 val beihi.  Damzo tuan lo in aom hun laitak Pasian in Hopihna pia a, Cidamna hong ngen in kahong pia ding hi' acih ciang in  Pau Cin Hau in zong 1903 kum in Ngennung gam sung Suang phuh mual kicih na mun ah amah nguak in Pasian paaina bawl in cidam na anget leh Dam siangtho na ngahtak pi hi. Kum 15 sung anatna pen damlo zawng khal natna ahihi.


(a) Lung a nongtup omlai laang aw, Zinleng biakna Niing leh aisa sim lei thangvan kiim sang e..
(b) Omlai khanlo bang leel tang ee. Lungzuan man in Sian Mang mun kihil ing e..

Dawi te tawh zehtan kidem nading thu ngahna  


Pasian in Pau Cin Hau Kamsang ding in ateel khit 1883 kum in Pasian thupiak nabang in ganhing thatloh ding kum 8 sung dawi tetawh zehtan kidem na kipan a 1891 kumdong ama khutlum tawh miksii thovai pan kipan bangmah thatlo in om hi. Zetan kum 8 acin khit akum 9 na ciang in Pasian in Dawi phiat ding in sawl leuleu a, Khamtung Zomi te dawibiakna nam 68 te Khua 155 ah pai in phiat sianghi.

Dawi biak upna akhauh mahmah hun sung gal leh sxa aih thupi hun sung ahih man in Dawisa siampi tulpite leh Khua Hausa lian te in Pau Cin Hau hua in muhdah uh ahih man in kumpi zum ah thu kineih na hang in hibang in la phuak hi.
(a) Zinleng nan leh Phungteng nan aw akop in puanbang thua'ng ee..

(b) Sianmang hawm siam lunglelh palbang nang ing e.. Zangzum tual ah thang ing e..

Laipian Pau Cin Hau in PUSA dawi aphiat sak masa pen ipute; 


Pasian tungpan dawi biakna phiat nading thu angah ciang in Zomi te in hamsa asak mahmah kumsim abiak leh athoih den Pusa dawibiakna anuai ateng in phiat masa uh hi.
1. Pu Vum Khua Thang Lailuikhua 
2. Pu Lian Khua Zam Lailui khua, 
3.Pu Zing Khai Thaangzang khua, 
4. Pu Kham Ngulh ( Keizaang/ Ciingpikot khua) 
5. Pu Cin Za Lian Tonzang khua, 
6. Pu Thang Zam Tualzaang khua, 
7.Neek Cin Tuilang khua te ahihi.


Dawi phiatna hang a, laphuahte:
(a) Ahangbel kua hang hiam aw e, Nuai zinleng leh Zaangsa kamkei hang bel e..
(b) Ahang nam cin belbang suanna, Savungh Zinleng kuul luh'ng ee.
(a) Pupa lunglelh zinleng hi e, Ipham na zatam sang e..
(b) Phamna zatam hambang nil ing Kei bang keek mi omlo e..

Laibawl theihna thutom 


Pasian in akamsang ding in Pau Cin Hau azat hun sung 1899 kum in vanglianpen Pasian in mangmuhna tawh lai hilh in sin sak a, kumnih sung Pasian tung pan asin khit 1901 ciang in nuamtak in aman zang thei pah hi. Laimal 1051 pha in Dawng guk/ Tanguk ciang in sim theih ding in bawl khia thei hi. Pasian tungpan angah lai mal te mal khat kamkhat hi in amasa pen Pau Cin Hau tung laisin masa mi khua tuamtuam pan kipai laisin mi 57 pha uh hi.  Tua lai sin te in Pau Cin Hau pen Min leh Vaang apiakna in amin in sap tang in LAIPIAN PA ci uhhi.

Lai bawl theihna ah Pau Cin Hau laphuah!

(a) Pupa patloh banzal zawikaih' Sian zalun sinthu hi e.. 
(b) Lungdeih a, lak Siantong dam aw nam cih duang ah bang thei e..
Laimal ngawm bawl khiatna! 


1930 kum in Laimal 1051 sung pan in laimal 37 tengkhia in  Laimal ngawm bawl khia uh hi. Hih Laimal ngawm bawlna ah Laipian Pau Cin Hau makai in Pu Sian Khaw Cin , Pu Thang Cin Kham , Pu Cin Khua Gin, Pu  Pau Za Dong te kihel uh hi. 1930 kum February kha in Dr Sherrat in Laipian Pau Cin Hau (fort write) Thaangmualpi vum ah sam in laivai thu dotna bawl uhhi.  Laipian Pau Cin Hau amah sakol tungtuang in vapai a, Pu Khual Suang, Pu Suan Zam , Pu Hau Khaw Pau, Pu Sian Khaw Cin te tawh kithuah uhhi.  Siktawllai khetna bawl ding in Dr Sherrat in vaikhak hi .

1931 kum March leh April kha khawm hun in Maymyo ah Pu Sian Khaw Cin, Pu Thang Cin Kham, Pu Cin Khaw Gin, Pu Pau Za Dong te in laimal ngawm tawh laikhet theihna Typewritter bawl ding in va pai uhhi.  1931 kum November leh December in laimal ngawm tawh laibu bawl khin uh a, sumla lo in Laibawl in apai te Rs 100 pia beh zawsop cihi.1932 kum ciang in Laimal ngawm tawh laibu in kikhen theita hi. Rev. Dr .W Sherrat pen British and Foreign Bible Society in Burma Agent ahihi. Zomi sung mipil masa te in Mikangten tawm vei hong uk suak lai hi leh Chinstate bup ah hih lai kizang khin ding cih lam en uh hi.


Tedim khuapi pan Lailui khua ah ateen na thu. 

Mikang kumpi te in Khamtung Zogam Tedim khuapi 1889 March 12 niin khuabup meitawh hal uh ahih man in Tedim khuapi omte khuaveeng ah gal tai uhhi.  Laipian Pau Cin Hau te zong Tedim pan in Vanglai khua tai in tua pan muntuamtuam ah atai khit uh ciang in Lailui khua ah 1891 kum in tung uhhi. Lailui khua pan in 1902 kum in Ngennung khua ah lal leuleu hi. 1904 ciang in Ngennung khua pan Vanglai khua tung kik leuleu Vanglai khua ah hunsawt omlo in Lailui tungkik leuleu hi. Ahang in Galhun ahih man in bu kawikawi uh a vialtai kawikawi uh hi.


Lailui Khua pan Mualbeem khua atun nathu;

Lailui khuapan in kum 18 Vanglianpen Pasian nasem in aom khit ciang in Beh leh Phung U leh Nau te leh Pasian thukimpihna natawh Mualbeem khua teeng Pu Khai Hau in luah ding in lailui khua pan Mualbeem khua ah AD 1922 kum apai hi.  Mualbeem khua ah kum 26 sung Pasian deihna bang in na asep khit ama pian kum 89 aphak laitak  AD 28 December 1948 ni zingsang ni vaihamsan hun' Sial cingte Sial khah khiat hun in Vantung Pasian gamnuam Dawl 30na Siangsawn mun ah ciah ta hi. Leitung ah Pasian na kum 69 sung asem hi.

Tua man in Laipian Pau Cin Hau aneu tungpan kipan Pasian sawl na bang in nasep asep hun, Damlo zangkhal hun, Laisin hun, Lai hilh hun leh Zogam khua 155 ah Dawi phiat hun, Gal lau in Tedim khua kim vial in tai kawikawi hun Lailui pan Mualbeem khua ah alalhun tawh hun bei in koi mah puaphial thei lo ahihi. 

Laibu etkakte:
1. Pasian thubu, Pasian labu.
2. A (58)veina Laisang kikhop leh Lailo khua Pasian thutun kum 100 cin laibu.
3. Khamtung Zomite laineihna kum 114 cin Lailui  GLKP Magazine bu.
4. Tualzang Khua Pasian thutun kum 100 cin Magazine bu.

Akai khawm: Hau Thang.

********************************************************************************************************

(Theihding : Hih Laipian Pau Cin Hau Tangthu tawh ki sai in Pa Hau Thang kiang ah hong atsak in ci in, huhna ka nget ngiat ahi hi. Aman zong Zomite theih ding deihsakna tawh hanciam in kan aa, sep., 20/ 2015 ni in www.cinpuzomi.com ah hong piak ahi hi. 

Alungdam : 
Cinpu Zomi.)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

4 comments:

  1. taang seu 400 hileh tulai kawlte zat "Tiin" bangzah tawh a kikim tam aw

    ReplyDelete
  2. Laibusaal phuanpa tung ah ih minam ading na hoih na sep peen thupi sa ingh. Ahizong khua pawl khat ah thumaan leh lai aa kisuah kibang den lo hi.

    Kei peen Suangpimi Suante beh ka hi aa, Suante be sungah Suanphut teng ii innpipa ci lehangh ki khial lo ding hi.

    Tua hi in, Suangpi Mualsuang na khet kik peen alungdamhuai thu tawh kibangh napi asung aa kingelh thute amaan siat loh lam hong theisak nuam ingh.

    Tua Suangpi Mualsuang laibu sung aa ki-aat thute peen a-aatpa Bu Sing Khua Khai ahihhangin (laibu sung akingen mahbangh in) ngaihsutna apia Rev. Thang Kaam hi.

    Hih laibu in Suanphut beh thu tampi a-aat hangin Suanphutte khat zongh thu dongh ngeilo hi (see Reference section). Hih laibu athumaan lohna bulpi peen Khuasat vai hi.

    Hih laibu sungah Suante' khuasat peen Naulak khuasat bangh in aat hi. Ataktak in Naulakte in Suante' khuasat abeel hinapi in amau khuasat bangin ngen hi.

    Na aat zop ding leh zop loh ding bel nangma thu hi. Ahizong laibu khat ih bawl ciang in ih ngen thu hong paina(source) peen thupi ding um ingh.

    Tua hi in, hih Suangpi Mualsuang peen khen kik aa online ah nong ten zel sawm leh kei tawh hoihtak kikum phot lehangh hoih ding hi. Banghang hiam cih leh tua laibu aki thoh beh loh nading,kuamah in zongh reference aa azat nawn loh nading Thukhaam (law) tawh kizui aa ka khaak sawm laitak hi.

    Minam na iitna leh na hanciamna bel thupi sa mahmah ingh.

    Cin Khan En Do Pau (John)
    Ph. 0933663321
    E-mail: jpau05@gmail.com





    ReplyDelete
  3. This comment has been removed by the author.

    ReplyDelete

Item Reviewed: Laipian Pau Cin Hau Tangthu. Description: Rating: 5 Reviewed By: Cinpu Zomi
Scroll to Top