728x90 AdSpace

Hot
Menu
Zon-ol na Donate

Latest News

Pu Go Sawm Khup (Zomi Innkuan Makaipi) in Zomite ading a sepnop Gam leh Minam Mabante.

2015 Kawl Gambup Kiteelpi ah ZCD Party min tawh MP khatin hong kiteel hileh MP dinmun pan ka sepnop Gam leh Minam Mabante.
Pu Go Sawm Khup (Zomi Innkuan Makaipi)

Minam leh Thuneihna tawh kisai Thumeilet leh Ngimna Bulpite (Policy)
1. Ih minam min Zomi a hihna a kikipsak zawhna ding, leh minam picing khat hihna tawh minam thuneihna bukim akingah theihna ding (Zomi Identity and Self Determination)
2. Zomi-te in Kawl gam a lamkhawm minam tuamtuamte lak ah akihel, thuneihna kikim angah minam picing khat dinmun leh akikim minam hamphatna teng angah theihna ding (Equality and Human Rights)
3. Democracy dan diktak tawh a kilam, taangpi taangta a’ding in taangpi taangta in ateel, taangpi kumpi phuh zawhna ding (Government of the people, by the people, for the people)
4. Sumlei sumzuakna tawh kisai in mi khempeuh in suahtak takin kidem in sep theih bawl theihna ding (Open Market Policy)
5. Panglong Thukimna bulphuh in akibelpawl gam (Federal Union) picing khat akilam zawhna dingin Panglong Khawmpi lungsim (Panglong Spirit) tawh Gambup Thukhunpi gelhpha ding

Gam kimakaihzia leh Kivaipuakzia (Administration)
Pyidaungsuh Hluttaw sung ah;
Kawl gambup kilemna a omna ding, a kibelpawl gam picing (Federal Union) lam zawhna      dingin a nih veina Panglong Khawmpi bawl ding
2014 Kawl gambup kisimna sung ah minam khat hihna tawh a kikhum Zomi min pen          thuman takin a kipulakna ding leh Gambup Thukhunpi sung ah a kikipsak zawhna ding
Gamkee kumpi pen Gamkee sung a mipi deihna bangin kiteel dingin thukhun laih ding
Gamkee Chief Minister pen Gamkee Innpi (State Parliament) in teel ding: ZCD Party pan      khat akah theihna ding
Gamkee kumpi thuneihna pen tu a dinmun sangin thuneihna bukim angah theihna ding
   Pyine Hluttaw sung ah;
• Tu laitak a Chin State sung a District gamgi khenna puahpha ding, District (4) suah ding
• Tedim gam leh Tonzang gam nisuahna lam gam teng ah Zanggam Township khat phut        ding
• Paletwa leh Matupi kikaal ah Township khat phut ding
• Cikha gam pen Township dinmun in khanto ding
• Zanggam Township sung ah Khaikam khua pen Khuapi in lamto ding, vengthak behlap        ding
• Tedim Township, Tonzang Township, Cikha Township leh Zanggam Township teng              kigawm in Zogam District khat lam ding
• Zogam District pen Self Administered Area dinmun in a kilaptoh zawhna ding vaihawm        ding
• ZCD Party MP teng tha leh lawm Party-te tawh kipawlbawlna tungtawn in State                  Government sung ah Zomi-te in panmun atam theipen ngahna ding
• District, Township, Town, Village adawldawl ki-ukna leh kivaipuakna sung ah Zomi leh          Zogam a it takpi, amuan huai khua leh tui makaite, mipil misiamte mun angahna ding

Pilna Siamna (Education)
• Zogam ah University picing mahmah khat lam ding
• Tedim Sangpi ah Sang-innpi alui teng laihin a thak tampi lambeh ding, a picing College Level in bawl ding
• Gamdang pan kumpite, sangpite, pawlpite, kipawlnate in pilna sang atuamtuam sinna University/College-te ahong lam theihna dingun lampi hong ding, thukhun bawl ding, sam ding cial ding
• Sangsiate pilna siamna akhan semsemna ding gamdang ah pilna siamna sinbeh sak ding
• Pilna siamna namkim ahilh ding Sangsia tampi cialbeh ding, gamdang pan sam ding
• Tan (10) ciang a khawnkhong in kahsak ding, laidal laikung akicing in guan ding
• Tan (4) ciang sun-an vaak ding, Tan (5) leh (10) kikal ading sun-an akiman in bawl ding
• Kum (3) a kipan sangkahna, naucinna sang kicing takin hong ding, annek tuidawn akicing in vaak ding
• Sang khempeuh ah pilna siamna namkim ngahna ding Practical/Lab Class tuamtuam kicing takin bawlsak ding
• Kum (2) sungin Tan (9) tungsiah sangnaupangte in Laptop/iPad/Tablet khatta aneih zawhna ding huhna pia ding
• Kum (5) sungin Tan (5) tungsiah in sangnaupangte Laptop/iPad/Tablet khatta aneih zawhna ding huhna pia ding
Sumlei Sumzuakna (Economy)
• Zogam sung a leisung sumpiangte Zogam kumpi, District kumpi in to in, sumnu sumpa atam zaw a ngahna ding thukhun puah ding
• Gullu mual pen gamvengte in hong suh theihlohna ding kem ding, thukhun bawl ding
• Tuikangpi gun pang nitumna lam a Zinan khuuk teng Zogam kumpi thuneihna nuai ah a om theihna ding
• Zogam sung ah leisung sumpiang zonna lam hanciam ding, Zomite bekmah in zong thei ding
• Zogam tawh kituak lokhawh singpuakna lam tha pia ding, anteh theipuam ciinna pantah ding (Apple, Lenggah, Thawbat, Lengmaw, Coffee, Niangteh cihte…)
• Zogam ah singkung lopate kem in, suanbeh ding, Dol, Phuitong, Taak kungte cin’beh ding
• Thaangmual, Lunglenkawl, Lennupa, Fort White mualsangte ah Tourist Center bawl ding, Zomite thuneihna nuai ah omsak ding
• Gamdang kumpite, Company-te, Kipawlna tuamtuamte in Zogam ah Investment ahong bawl theihna ding lampi honsak ding, thukhun bawl ding
• Zogam sung ah gamdang mite suakta takin hong zin theihna dingin lampi hong ding, thukhun bawl ding
• Zogam ah cidam khansauna lam tha apia annek tuidawn bawlna Setzung lianpi lam ding

Gam Khantohna (Development)
Transportation:
• Kum (3) sungin Kawlpi-Tedim-Tonzang-Cikha-Khenman State Highway (SH#1) pen Asphalt tawh bawl ding
• Kum (3) sungin Tedim-Laitui-Ciau/Zokhawthar State Highway (SH#2) pen Asphalt tawh bawl ding
• Kum (5) sungin Tedim-Tuithang-Tungzang-Zampi-Tuimui-Ciau/Zimte State Highway (SH#3) pen suangphah tawh bawl ding
• Kum (5) sungin Tedim-Saizang-Kaptel-Heilei-Lennupa-Haimual-Bukphil-Zampi-Cikha State Highway (SH#4) pen suangphah tawh bawl ding
• Kum (3) sungin Kawlpi-Khaikam-Pidawta-Gullu Mual-Khampat State Highway (SH#5) pen Asphalt tawh bawl ding
• Kum (5) sungin Khampat-Balbil-Khuangkhan-Bizang-Kansau State Highway (SH#6) pen suangphah tawh bawl ding
• Kum (5) sungin Tedim-Aiphah-Mawnglang-Gullu Mual State Highway (SH#7) pen suangphah tawh bawl ding
• Kum (5) sungin State Highway khat leh khat kikaal khuate kizopna lampi limtak bawl ding
• Kum (5) sungin Meitei Gunpi kantanna Leipi mun (7) ah Sik leh Suang tawh bawl ding
• Kum (5) sungin Saizang khuataw ah Vanleng Tualpi bawl ding
• Kum (5) sungin Cikha zang ah Vanleng Tualpi bawl ding

Electricity:
• World Bank huhna National Electrification – National Grid pen Tedim, Tonzang leh Cikha khuapite dong a tuna ding hanciam ding, Chin State sung ah a nunung pen a kilam ding a hihna pan amanlang in a kilamna ding hanciam ding
• World Bank huhna Pre-electrification Projects dingin Tedim kuam, Thuklai kuam, Heilei kuam, Laitui kuam, Zampi kuam, Cikha kuam, Tonzang kuam, Khampat kuamte ah Mini-Hydro-power bawlna ding hanciam ding

Water Supply:
• Tedim, Tonzang, Khaikam khuapite ah tuinaak behlap ding, gamdang huhna zong ding
• Saizang, Vangteh, Khuasak, Suangpi, Gamngai, Laitui, Tuithang , Tungzang, Zampi, Khampat khuate a tuinaakte puahpha ding

Housing:
• Khaikam leh Cikha khuapite ah Kumpi in taangpi inn ding dawl-thum asang innlum tampi lam ding, taangpi leisak ding
• Tedim, Khaikam, Cikha khuapite ah Kumpi zum leh Kumpi inn tampi lambeh ding
• Khenman/Behiang leh Ciau/Zokhawthar ah Trade Centers lam ding
Communications:
• Kum (2) sungin Zogam mun khempeuh ah, Kawl gam sung dinmun tawh kibangin, Wireless Telephone System akingahna ding
• Kum (2) sungin Zogam ah Radio Station atawm pen khat lam ding
• Kum (3) sungin Zogam mun khempeuh ah Internet Line / WiFi akingahna ding
• Kum (5) sung in Zogam ah TV Station atawm pen khat lam ding

Cidamna (Healthcare)
• Zogam sung a Zatopite ah Siavuan Siama kicing a omna ding
• Zogam Zatopite ah damlo velna vanzat kicing koih ding, Mawtaw a kicing nei ding
• Zogam sung a Zato lam ah zat ding Helicopter nih vaihawm ding
• Tedim, Tonzang, Cikha, Khaikam Zatopite ah zatui zaha akhwnkhong in hawm ding

Bitna/Lungmuanna (Security)
• Khuakim ah khua leh tui sung pan Home Guard Volunteer nei ding, Kumpi sum tawh cial ding
• Zogam sung ah Kumpi Galkap simloh nam dang, pawl dang pan gamnuaimite mun pialo ding

Khua leh tuivai (Social Welfare)
• Khuakim ah Khangno Kipawlna phut ding, Kumpi in Budget hawm ding
• Khangno kipawlna in khua leh tui, veng leh paam vaite ah tanu sem ding
• Sak leh khang, sim leh mal, tuipi galkhat a om laizom Zomi-te Zogam sung ah suakta takin ahong hawh theihna ding lampi hong ding, thukhun bawl ding
• Zogam khuapi teng ah upa khangham khuanu khuapate kikhawlhna mun leh mual bawlsak ding

Lai lam (Literature)
• Zogam sung, sak leh khang, sim leh mal, tuipi galkhat mun khempeuh ah akibang Lai kician khat akineih zawhna dingin vaihawm ding
• Zolai Simbu leh Zolai tawh kigelh Laisimbu Tan (10) ciang sim theih ding bawl ding
• Laibu Saal lam kawikawi ding, Zolai Laibu tampi kaikhawm ding, bawlsak ding, tha pia ding
• Zomite leh Kawl gam Vai gam a kipan Zomite tawh kisai gamte, minamte thu Zolai in tei ding
• Zolai tawh kigelh Thukizakna, Laihawm, Magazine tuamtuam suakta takin hawmkhiasak ding

Ngeina (Culture)
• Zongeina bukim akemcing ding asuakta Kipawlna/Pawlpi khat phut ding
• Zongeina kepcingna Innpi khat lam ding, zin leh leengte muh theih dingin lak ding
• Zongeina sinna sang khat hong ding
• Zongeina ahoih teng kaikhawm in, lamto ding
Music leh Gualnopna (Music and Entertainment)
• Zomi-te sung ah Music leh La lam tawh kisai thu khempeuh avaan dingin, Kumpi Budget zangin asuakta Kipawlna/Pawlpi kician khat phut ding, Kumpi in sai theilo ding
• Music leh La lam ah Talent anei, a uk, a kiva Zomi-te lamto ding, tha pia ding, pahtawi ding
• Zomi-te Music leh Lasakna lam ah gamdang mite dinmun apha dingin hanciampih ding
• Zogam sung a khuapite ah Kumpi in Entertainment Center leh Theatre atawm pen khatta lam ding, gamdang dinmun tawh kituak in bawl ding

Kimawlna (Sports)
• Zomi-te sung ah Kimawlna lam tawh kisai thu khempeuh avaan dingin Kumpi Budget zangin Kipawlna/Pawlpi kician khat phut ding, Kumpi in sailo ding
• Kimawlna lam ah Talent anei, a uk, a kiva Zomi-te lamto ding, tha pia ding, pahtawi ding
• Zomi-te Kimawlna lam ah gamdang mite dinmun apha dingin hanciampih ding
• Kumpi Kipawlna Makaipawl pen a kimawl mipi thuneihna tawh kalsuansak ding
• Zogam sung a khuapite ah Indoor Sports Stadium khatta Kumpi in lam ding, Tualpi khatta lam ding, a luite puahpha ding, gamdang dinmun aban dingin bawl ding
• Zogam khuata khempeuh ah Tualpi (Football/Volleyball) atawm pen khatta lam ding

2015 Kiteelpi tawh kisai sandan
• Zomi Congress for Democracy (ZCD) Party in Zomi ih minam min suang in 2015 Kiteelpi kilut hi. 2008 Thukhunpi deihlohna leh puahphat ding deihna tawh ZCD Party bulpi ZNC Party in 2010 Kiteelpi kilutlo hi.
• ZCD Party in Panglong Thukimna siksan in Democracy ngeina dan diktak zui a Thukhunpi gelh dingin Kawl gambup a om Party khempeuh, Minam khempeuh kizawn hi. NLD Party a kipan Mualtungmi Party tuamtuamte in hong thukimpih uh himah leh, hih Maban kalsuanna ding haksa semsem hi.
• Panglong Thukimna siksan in Gam kilam ding thu tawh kisai maban kalsuanna sang’in, 2008 Thukhunpi a hoihloh hangin Parliament sung pan thu vaihawmna lam zuih dingin Kawl gam sung a Party tuamtuam, Minam tuamtuamte hong kalsuan uhhi. Hih thu ZCD Party in dik kisalo a, 2012 Kaallak Kiteelpi ahzong kilutlo hi.
• ZCD Party in Kiteelpite lutlo a Zomi min leh Minam khat hihna tawh kidingtang suak himah leh; Panglong Thukimna cihte a thusimlo, Democracy ngeina dan diktak zui a Minam Thuneihna bukim ngah theihna dingin ma apang nuamlo, mapan dan ding atheilo, Zomi min leh Minam khat hihna tawh Parliament ah thu a sung ngamlo, Taangpi taangta lunggulhna leh thuneihna a thusimlo, … tu laitak a Mipi Tangmite (Members of Parliament/MP) ahong kah ciangin, Zogam leh Zomi kisum mahmah hi cih thu kimu hi.
• Panglong Thukimna siksan in Gam kilamna ding, 2008 Thukhunpi puahpha dingin Parliament pualam pan nakpi takin a kihanciam laitak in Parliament sung ah Mipi deihna tawh a kilehbulh vaihawmna tampi hong kibehlap hi.
• Tua ahih manin ZCD Party in tutung 2015 Kiteelpi ah lutloh phamawh hi ci in kikhensat hi.

2010 Kiteelpi tawh kisai sandan
• 2008 Gambup Thukhunpi kithukimlo ahih manin ZNC Party kilutlo hi.
• NLD Party leh Mualtungmi Party-te kipawlna UNA sung a Party khempeuh Kiteelpi kilutlo hi.
• 2008 Gambup Thukhunpi a sang thei, Mualtungmi Party akiphutthak pawl khatin Kiteelpi lut uh a, atawm zaw teelcing uhhi.
• Kiteelpi sung ah USDP in Metang gu uh ahih manin MP atam pen kiteelcingsak hi.
• Chin State Chief Minister ding pen President deihna bangin kiseh ahih manin Mipi deihna kimanglo hi.
• Zogam ah USDP Party pan MP atam pen kiteelcingsak uh a, a etlawm dingin Parliament Speaker, Minister panmun neuneu khat leh nih kipia in, bangmah sem zolo uhhi.
• USDP in Chin State Government lam uh a, Tedim Tonzang gamte panin USDP atam zaw kah ahih hangin District nangawn ngahzolo uhhi.

2008 Gambup Thukhunpi tawh kisai sandan
• Hih Thukhunpi pen taangpi taangta deihna bangin a kigelh Thukhunpi hilo hi.
• Galkap Kumpi in amau thuneihna a kip tawntung theihna dingin akhun uh, amau deihna bangbang in a thukim dingin mipi thuneihna azuak palai pawl khat sam a, Khawmpi bawl in agelh uh ahi hi.
• Taangpi taangta buppi in a kikim hamphatna leht huneihna neih theihna ahi Democracy ngeina dan diktak siksanlo a, atuam vilvel in hamphatna leh thuneihna anei ding mi pawl khat khentuamna Thukhunpi ahi hi.
• ZCD Party bulpi ZNC Party in hih Thukhunpi kithukimlo hi.

Chin Affairs Minister
• Kawl Gambup Thukhunpi athak gelhpha dingin lunggulhna tawh a kithukimlo 2008 Thukhunpi siksan in Kiteelpi kilut ahih manin, tua 2008 Thukhunpi sung ah Chin Affairs Minister panmun zong, thukim takeileng tuh hamtang ding kisam hi. Tuabek hilo, Direct Election tawh Myanmar President kiteel ding hileh ZCD Party min tawh atuh huai ahi hi.
• 2008 Thukhunpi siksan in Kiteelpi akilut hangin a Thukhunpi dik a kisa ahihloh bangin, Chin Affairs Minister panmun a kituh hangin Chin hihna a kithukim hilo a, tua panmun panin Zomi Affairs Minister panmun a kikhun theihna ding thukhun gelh ding lunggulhna ahi hi.
• ZCD Party panin Zomi khat in Chin Affairs Minister panmun kingah ding a, 2016 kum Myanmar Census Result a kipulak ciangin Zomi Affairs Minister khat amanlang theipen in akiteelna ding hih panmun pan ma kipang ding hi. Zomi Affairs Minister panmunzong ZCD Party panmun Zomi khatmah in kingah ding hi.
• Chin Affairs Minister in Kawlpi khua ah Zomi, Laimi, Asho, Khumi, Mara, Thado, Mizo cih minam tuamtuamte Innpi khat lam zawhna ding vaihawm ding, minam ngeina leh tangthu khempeuh kaikhawm in tua Innpia ah kemcing ding
• Zomi, Laimi, Asho, Khumi, Mara, Thado, Mizo cih minam tuamtuamte pau leh laite kip semsem in akhantoh theihna ding vaihawm ding 
• Sagaing Division sung ah Zomi-te in Self Administered Area ahihkei leh District khat angah zawhna dingin hanciam ding

ZCD Party MP-te Mawhpuak
1. Zogam leh Zomi tung ah citak in thuman ding
2. ZCD Party 2015 Kiteelpi Kamciam a tangtun theihna ding ma pang ding
3. ZCD Party Ngimna Bulpite a lawhcin zawhna dingin hanciam tawn tung ding
4. ZCD Party Thumeilette (Policy) zahtak in ZCD Party kivaipuakna bangin kalsuan ding

Mimal Aituam Sandan
2015 Kawl Gambup Kiteelpi ah ZCD pan MP khatin hong kiteel hileh, MP hihna tawh ka sepnop Gam leh Minam Mabante pen keima mimal aituam deihna leh sandan ahi hi. Tulian laitak a ZCD Party pan MP Candidates teng hita leh, Makai khetpeuh tawh hita leh kikupna ahi zong, hanthotna ahi zong, ngetna ahi zong, anei ka hikei a, keima ommuan in, tuipi galkhat pan ka lungngaihna hizaw hi.

Tuamah bangin, Kawl gam sung a MP khat dinmun tawh akisem thei ding ciang Mabante bekmah ngimna hipan hi.

Hih Mabante pen abeisa kum (5) sung, Kawl gam kalsuanna enkik in, tu laitak a dinmun tawh siksan hile’ng, asuksia penin 2008 Thukhunpi akipuahpha keiphial zongin, akilawm ciang khat ma a kitun zotham dingin ka ngaihsun a, MP khatin kum (5) sung in, maban atamzaw lawhcing takin vaihawm zo ding hi ci in ka um hi.

Tuamah bangin, tutung 2015 Kawl Gambup Kiteelpi sung ah Zomi-te Minam Party minsel ZCD Party pan akiteel ding MP-te inzong mai Term khat, kum (5) sungin, hih Mabante hong sem, hong vaan dingin ka lam-en hi.

GSKhup
Tulsa, OK
September 11, 2015

Source : https://www.facebook.com/gskhup.zomi .

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

  1. A kua mah peuh in ciamteh tek ta hen. Tua bang danin a neu a lian in tupna leh geelna ih neih ngiat tek ding
    ahihi.

    ReplyDelete

Item Reviewed: Pu Go Sawm Khup (Zomi Innkuan Makaipi) in Zomite ading a sepnop Gam leh Minam Mabante. Description: Rating: 5 Reviewed By: Cinpu Zomi
Scroll to Top