728x90 AdSpace

Hot
Menu
Zon-ol na Donate

Latest News

THEIHLOH A PHAMAWH PILNA: “Q” THU. (Revd Mang Tungg Thang)

THEIHLOH A PHAMAWH PILNA: “Q” THU
(Revd Mang Tungg Thang)

Tu hun pen IT khan hun hi-in na khempeuh sawt a kiploh hun zong ahihi. Na khat pen tukum a thak hi-in maikum the date out cih pian tamta mawk hi. Tu khang ate theih dinga kilawm taksa pumpi tawh kisai leh kha thu ah quality kikuphuai kasa hi. Mi khempeuh in ama tun nuam, lawhcing nuam tek hi. Pasian in ka kha tha (Spiritual Quality) bek tawh na maa na tun ding ci hi. Q in khiatna tampi nei hi. Hih lai ah kei gennop deuh nga pha hi. A bulpi ah cileng quotient (ineih/tanh) pilna cih ahihi.

1. Quantity
Quantity cih pen amal genna ahihi. Gentehna-in sum mal tampipi  kideih tek hi. Quantitative analysis cih bangin research Institute khawngah a maltamna tungtawnin thu khanin na a khensat thei ahi uhhi. A masa-in quantity (amal) a om masak ding kisam hi. 

a. 2012 June kha in I Kawlgam Rakhaing gama thupiang enleng: Rohingja a kici minam khat pen mimal-in tam mahmah hi napi-in Bangladesh te’n ahizong, Kawlgamte’n ahizongin ko gammi hi a ci omlo uhi. Tua tungtawnin amau pen mimal (quantity) tamlel ahih manin mimal pen hiam-in zangh uh-a, sih ding zong ki-itlo cih zah dong hiphial hi. Tua manin buaina lianpi a piang ahihi. Ken ka ciaptehna ah hih Rohingja te pen ‘Unidentified Nationality’-Minam hihna neilo (UN) ka ci nuam hi. Mimal a tam uh hang ciapteh/theihpihna a ngahlo ahi uhhi.

b. Zomite mimal quantity kitawm lai mahmah hi. Ahi zongin I hamphatna khatah India gam a omte, Kawlgama omte pen I omna munmun ah kumpi in gammi-in hong ciapteh minamte ihihi. Mimal tam ding zong kisam lai hihang. Quantity a tam khit teh I quality kiciamteh thei pan ding hi. Zomi nungak tangvalte in nungakpi, tangvalpi cihte suah sawm loding hihang. I mimal khan nading zong ngaihsun ding hihang. Pasian thupha piaknop minamte zong ihihi. Quantity I tam khitteh quality a kinei thei pan ahihi. (cf. Zechariah 4:6- quantity hilo-in quality)

2. Quality
Quality cihpen a khiatna in ahoihn/siamna a cihnopna hi-a, Bill Gates in 1980 panin quality, 1990 teh ‘the reengineering,’ 2000s ‘the velocity’ kithupisak ci-in na gen hi.  Qualitative analysis ci-in research bawlte in a hoihna tungtawnin thu hong kanin hong suahkhia uhhi. Bang manphasak na hiam? Zechariah Lai Siangtho sungah Keima kha tha bek tawh a cih ciangin a quality a gen ahihi. Tua a kilat nadingin galkap tamna hang hilo na ci masa hi. 

3. Intelligence Quotient (IQ)
Hih munah Quotient acih pen I neihzah/tanh pilna aci ahihi. IQ in ‘what I think’ (Pilna, khuak/tehtheih) na gen hi. 1912 a German psychologist William Stern in a muh/pat khiat ahihi. Leitung galpi hong pianna enleng midang gamdang a hatlo zawte leh a pillo zawte ukin minthang ding cih kiliatsak nopna bulpi ahihi. Tua leitung galpi I, II na cihte pen zong hih IQ kidemna nam ahihi. Mipil, thahatte in gualzo in lawhcing diing cih ahihi. Ahi zongin tua bang hong hikhin lo. Taksa-pumpi thupisakna ahihi (Performance Value- Sepsiamna). Kideidanna lian mahmah hi. Mite in IQ bulphuh luate pen thuakhaksa hi. Hehpihna cih om meello hi. Survival of the fittest cih Scientist Darwin in hong suahsak ciangin a thahatlote, a pillote adding lametna a bei tawh kibang phial hi.  Tua banah Olympic zong kidemna nam mah hi a, hanta leh siamna (IQ) kimawlna nam ahihi.

4. Emotional Quotient (EQ) 
EQ in -what I feel (ka vei) na ci hi.  1985 kiim pan a kizang hi-a lungsim pilna bulphuhna ahihi.  Gamtat/lungsim kikepzawhna bulphuhna ahihi  (Character Value). Gamtat hoihte in gualzo in lawhcing hi ci uhhi. A hizongin gamtat hoih tampi hong lawhcing thei tuanlo veve uh hi. Kikepcingna thupisak hi. Kidopna vive hi-in suahtakna cingtaak om zolo hi. Hehpihna om napi in itna cingtaak om zo nailo hi. Kineih khemna om a, golhguk omthei lai hi, mite’ mai muhnopna bekbek a bulphuh ahi uhi.

5. Spiritual Quotient/Intelligence (SQ)
SQ in ‘what I am’- ka hihna taktak  cih na gen hi (Intrinsic value- pianpih man na bulphuh hi). 1990 pawl panin in kizangin pianpih mihing hihna bulpi thupisak hi. Business Sectorte in hong patkhiat hi-in mimal thupisak ahih manin ki-itna bulphuh in Agape itna tawh kizom denin a tawpna ah Pasian tawh a kizom khinkhian ahihi. Pilna, gamtathoih thupisak masaloin mihing Pasian bawl ahihna manphasak ahih manin SQ kizatna ah mite in nuamsa in khangto hanhan hi. Hih bang kimakaihna pen Biakna lamah a zathuai mahmah ahihi. Ganhing in IQ+EQ nei in SQ neilo hi. Mihing bek in SQ nei thei hi. Deidanna omnawnlo-in Mi khempeuh in nwamsa hi. Itna bukim leh suahtakna kicing om hi. Peacemaker (Daih-Nunna) hi-in ahibang- thu bang a gamtate: zuau, kineihna cih omtheilo-in, kha (Pasian) in thusim a theih man ahihi.

IQ  pen dictionary/encyclopedia sungah om khin in, EQ leh SQ pen om nailo hi. Ahangpen IQ pen a kituat thei hi-in EQ leh SQ pen a kituat theilian nam hilo-in mi tampi in telzo nailo-in a kihelzo nailo suak hi. Hih teng pen Topa Zeisu in na nei masa pen in a zang masa pen hipah hi. A IQ pen Farise te thu dot a dawna ah (Luk. 20:21-26) kimu in, EQ pen mite a hehpihna ah kimu (Mt. 5:7), SQ pen amah amat sawmte bil abulhsakna ah kimu hi (Luk. 22:51).

Ka Ideal pen kua ahiam cih leh American Kumpi 16na Abraham Lincoln hi. Hih pa pen a minthanna ka etteh IQ, EQ, SQ cihte a nei kim mi khat na hihi. Presbyteriante hi-in kikawm ngeilualo kici hi. Banghang cihleh Mark 12:30-31… Hi bang dan pawlpi ah ka lungsim kha khempeuh tawh ka kizom dinghi, tua bang pawlpi ka mukei cihi. Lincoln ii galte a suksiat dampen tuamdang hi: “Am I not destroying my enemies when I make friends of them?”- Ka galte lawm ka suahsak ciangin a susia hilo ka hiam, ci ziau hi. Tua banga mi suksiat dingpen thupi ka sa hi. Topa Zeisu pen I Ideal diing hilo in TOPA (Pasian) diing ahihi. Mihingte Ideal ding mi minthang tam mahmah zo hi. Zeisu ka Ideal a cite Christian hilo hi. SQ saangte pen Liberal leh Spiritual Intelligence a thuahte ahihi.

Thukhupna: Muhna - Views: Worldview Nih om 
1. Secular worldview (Leitung thu muhna)– 
Mit in kaih 200 ciang bek mu zo hi. I mittang muhna kiciangtan hi (Finite, limited). Hih pen IQ leh EQ dinmun ahihi. IQ nunna ah a ding deuhte in Lai Siangtho pen a vek in sang zolo uhhi. Pasian vangliatna tehnuam uha, kiteh theilo, mu theilo uh ahih manin LST thute a vekpi-in saang zolo uhi. Tua manin Cult biakna (eg. New Age Movement cihte) hong piangkhia ahihi. Hih biakna makaite zong IQ, EQ ahoihte mah ahihi.

Tua mah bangin EQ bulphun luate in zong Lai Siangtho sunga thu pawl khat pen LST sunga gelh dingin kilawmlo hi ci-in saang zolo uhi. Leitungthu Politics ah hih IQ leh EQ a kithupisak mahmah ahihi. Maitaina, nuih maisa a thugenna cihte thupisak mahmah uhhi. Pasian nasem nasem a tamzaw tham zong hih IQ  leh EQ tungah kinga lai uhi. IQ leh EQ pilna pen leitung a university tuamtuamte ah a kisin thei ahihi. Mipilte’ tungpan a kingah thei ahihi.

2. Theological worldview (Kha Thu Muhna)–
I mittang in a muhzawh lohte mu zo hi. Extraordinary, infinite (Jere 33:3) … a ki-imcip thusimte kong lak ding ci hi. Mite muh leh theihsa bek bulphuh in a ki-imcip thusim imuh khak keh khamit a kihong nailo Jere 33:3 a dawnna a ngah nailo ihi ding hi. SQ ah pen thuman banga gen ahih manin a lungdam huailo thu, -- pulak ding ahih manin nuihmaisa cih bang zong thupisak tuanlo uhi. Ahangpen Pasian in a lungsim a theih khit lam thei-in kineih khem sawmlo uhi. Pasian nasem zong tawm khat bek hih SQ tungah kinga zo hi. SQ pilna pen sintheih man hilo-in Pasian kiangpan direct a kisin thei bek ahihi. Mipil Scientist pawlkhat in zong SQ thu saangzo ta hi. 

Tuhun Christian Pawlpite ah mi tampi in thuman-thutak kimasak nawnlo hi. Hih pen Paw Lu in Timothy Nihna 4:3-5 ah a genna a tuna ahihi: Mite in thuman a ngaih noploh hun, amaute’ deihna bek a zuihnop hun, amaute’ zaknop thute bek a gen ding sia a cial thuahthuah hun hong tung ding hi. Thuman thutak ngai nuam nawnloin tangthu phuahtawm peuh ngaihsutpi-in nei ding uhi. Tua manin Pawlpite, Pasian nasemte’n kisit phathuai hi.

Kamsang Joel’ gen kholhna pen Sawltak 12:17-18: Pasian in Nitawp ni ciang, mi khempeuh tungah ka Kha ka sung ding, keima thu taangko ding uh. Kha Siangtho hun ahih mah bangin mi deidanlo in Pasian in a kha pia a mitampi in SQ thu tel uhhi. IQ, EQ, SQ cihte pen balance diing thupi hi. 
1. Theihna (Material Capital)- IQ Lungkham thei lai.  
2. Ngaihsutna (Lungmuanna-Patauthei lai) -Social capital- EQ. 
3. SQ pen Thuakna (Spiritual Capital)-Khamuanna (Daihna). 
IQ & EQ pen mite tungah kingakna hi in, kineih, kiqemthei/ngam lai hi. Ahi zongin SQ pen Pasian tunga kingakna ahih manin kikhemtheilo ahih manin pilna dinmun ah a saangpen ahihi. Tuhun a khang mite in hih thute I theih khak keileh inuntakna ah ma itut ding hamsa kha ding hi. 

---********************************************************************---

Theih ding : Hih Thuluui/Article pen Sia Revd Mang Tungg Thang in hih website ading ngiat aa hong piak ahih man in i lungdam mahmah hi. I biak Pasian in hong zatsak semsem ta hen... Laisim mimal khempeuh Pasian Thupha.
Cinpu Zomi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: THEIHLOH A PHAMAWH PILNA: “Q” THU. (Revd Mang Tungg Thang) Description: Rating: 5 Reviewed By: Cinpu Zomi
Scroll to Top