728x90 AdSpace

Hot
Menu
Zon-ol na Donate

Latest News

Tukum 2015 Kawl Gambup Kiteelpi Khitah Zomi In Koilam Maingat Ding?

         Tukum Gambup Kiteelpi Khitah Zomi In Koilam Maingat Ding?    
Thusung: Bob Tuangpi
Dated:October11,2015
Yangon,Union of Myanmar

Thukong Honna(Introduction)

                 Ivekpi’n izanuam aa zanuam takei zong, imu nuamin munuam kei zong, ibil dim, imitdimin izakzak, imuhmuh tunai thu leh late in nisuahna nitumna leh asak akhang igambup leh leitungbupah izakzak thu in, tukum gambup kiteelpi(general election) tak teh kua party mee pia ding? Kua party ii palai/tanggmi mee pia leeng, imailam kum(5) sung vilvel igamvai, iminamvai kizentakin deihsakna lungtang leh ngaihsutsiamnakhuak tonkhawmin hong makaihzo ding uh hiam cih gambup thawnin innsak innkhang, lokuanna vaiciahna leh mun citengah mi kici khempeuh, piteek,puteek,nungak,tangval leh naupangte in lawp mahmahna lungsim leh asia apha lametna khat ciat tawh kiseel, kikumin kigamlum mahmah ta aa, ahi ding takpi zong ahihi. Tua bang peello iphuutkhak ding thute, imailam ding deihkaih hetlo leh siangtakin thuman thutang tawh sutsuk giapgiap ekh ding hihang!

(1)     Myanmar Gambupah Gamthu Semngei Leh Asem Dingin Kigingkholte Thu Bulkhehkhiatna

      Kawlgam pen minam kim tawh kilam kiphutkhia gam(multiculturalism) gam hi aa, 1983 gambup gammi leh minam ciaptehna ah minam tuamtuam 135 val bang kiteeng khawm kibusa khawm hi. Tua minam tuamtuam lakah ahuampi in gamthu ah (political point of view) nammih bekin minampi nih kikhenkhia thei hi. Tuate in mualtungmite makaih mualtunggam phualsat minam tuamtuamte leh kawlzang phualsat kawlmite makaih kawl party te  ahi hi. Akhatna-ah kawlzang phualsat kawl mite makaih gambup huam party lian nih ahi NLD leh USDP om aa, tua banah sanggam Kawl mite mah ii makaih party tuamtuam (10) kiim mah om hi. Tua Kawl mi khempeuh pen Kawl biakna bia leh Kawl ngeina kip let mahmah uh aa, Kawlgam bup pen amau thu bek tawh pai ding, amau bek in Kawlgam bupah to sem dingin mualmi khempeuh pen amau nungzui ding leh sawltak ding bekin hong deih ban vuah, Kawlgam buppi pen Kawl ngeina, Kawl milim biakna umsak zuisak ding, Kawlpau pausak ding, Kawl tatdan, Kawl ngeina, thuciinte Kawlgam bup zanggam khamgamah kizeelsak ding cih ngaihsutna koi kiukiau khat tawh apanla vive uh hi aa, I gambup suahtakna kiciamna mualmi zangmi liangkokikimna tawh ipupate banzaal tawh  kiphutkhia Panglong thukimna leh kiciamnate ahaltum nuam leh abeisaknuam vive uh hilel hi.


          Tua ahih manin, minam tuamtuam tawh kilamkhia kiphutkhia gam khat pen ahuaikimin paina ki-ukzia(state-nation) tawh gam ki-ukna kalsuan ding kimlai, minam tamzaw khat bekin humpi sahawmin minamdang teng valhtumna gam ki-ukna kalsuanzia(nation-state) tawh mualmi teng hong valhtum nuam vive uh hi cin, akam vuah agenkhiat loh uh hangin akhekhap uh tawh ahailo peuhmah in kinaak theih lua mahmah hi.

              Hih Kawlte’ nungthuapah, gam biakna makai teng om uh aa, biakna dang teng zawhthawhthu tawh ahizongin, aiisa longeekzol bangin ahizongin sumtha tawh mimaltha tawh panla uh aa, tua teng pen Kawl mihau sumhau teng in bawhhuansuk lai uh hi. Hih biakna uangzatin alangkaipawl(radical Buddhists monks)te nungah Kawl minampi lungsim ngaihsutnavom(radical Burmese nationlists) teng amau mun tekah amau lampi(tactic) tawh taiciat uh aa, angimna akung uh pen limtakin geelkholhna(smart strategy) tawh mun khempeuh gambupah kipei tek uh hi. Amau ngimna bulpite in:Kawlgambup Kawl mite khutah om den ding, Kawlgambup Buddhist suaksak ding, Kawlpau leh Kawl ngeinate gambupah zungthuk khasak tetek ding, minam neu teng kawlmi suaksak ding cih ahihi. Hih teng banah amau mun ciat pan sumbawlna sumlei sumzuakna, gamthu lamah, galkap semlai semkhinte in athuap ban vuah tuate nungah kawl mipil misiam (strategists)te in alampi ding uh laikung tawh sialsak lai uh aa, hi mite pen amau mun tekah thunei mahmah mithupi leh mi’zahtak(elites&oligarch)vive uh hilai hi.

             Anihna, mualtung phualsat mualtung mite makaih mualtung party te ahih leh ideihna ilungsim itupna(political goal&political desire/demand) akibangkim sitset kei zongin ibulphuhpi in liangko kikimna Kawlmi peekkhat Zomi peekkhat cih Panglong lungtang(Panglong spirit) kibulphuh tek ahihi. Mualmi party ah thahat mahmah a om bangin anennen party zongh tampi tak mah om aa, ahizongin amau deihna bulpi leh ngetna sunmang ahih leh kilamdang tuanlo hi. Hih Panglong lungtang pen 1990 gambup kiteelna azo mualmi kipawlna(United Nationalities Alliance)te in khauhtakin len uh hi. Tualo, 2010 kiteelna ah alut mualmi party kipawlna(Nationalities brotherhood federation) pawl ahih leh hilam cizeel hualam cizeel dinna kician tatak neingamlo uh hi. Tua teng banah, thautawi kipawlna(United Nationalities Federal Council)te zong pawlkhate kumpi tawh thukimna suaikai dingin khu vingvung zeel, daizeel cih bangin upna ngetna khat tek tawh atawntawn laitak uh zong hi.  

(2)     Abucing Khantohna-ah Zomi Minam leh Gamkhatah Imualsuah Nadingin:

(a)   Mihingtha  bulpi(human capital)
(b)   Khuasak Nuntakna bulpi(social capital)
(c)    Leisung sumpiang bulpi(natural resource)
(d)   Gamthu ah munlakna leh khanlawhna bulpi(political capital)
(e)    Ngeina lapsangna leh kepbitna bulpi(cultural capital)

                  Hih atung aa teng thubulpi(5) tawh akilamkul hi. Tua tengah imualsuah nadingin suahtakna(freedom), minam panlakna(national politic) tawh ikalsuan khit teh ikisapna bulpite suaktatakin I Zomi nam buppi huamah damdamin kitai zo pan ding hi.  Zomi te in hih thubulpi tengah ilawhcinna ding leh I lamzann theih nadingin athupi pen in ei leh ei kivaihawmna(self-determination) kisam hi. Tua ingah masak theih kei leh hih atung aa  akhangto minam khat leh abungcing lawhcinna lampi ah I Zomi leh Zogam kimualsuahzo lo ding banah Kawlmangpa’mai mah ikunkun kul ding hi.

                   Eima innsungah eite in ideihna pen thuneihna leh kibelpawlin kizingvaihawmna(self-ruled&shared ruled) hizaw hi, eite deih ipupate sunmang zalmang sanggam aw! Igamah igamthu ah thuneihna (legislative power, judicianry power, excutive power) teng ineih theih I khutsungah ingah theih nadingin iminam siksanin panla I minam party bekin muibuntakin sem thei bek ding hi. Panglong thukimna-ah eimun tekah kitualvaihawmna(autonomous)leh kibelpawlna(federal union) tawh pai ding cih a om banah inntuantheihna(right to succession) om lai hi. Greek kammal pan hong piangkhia autonomous akhiatna in auto=ei leh ei, normous=thukhun acihnopna-ah ei leh ei ki-ukna leh I ki-uk nadingin ei mahmah in thukhun bawl cihna ahihmanin ei hamphatna pen ivengte va kholhkholhlai ding maw sanggam? I hamphatna I satanh ong kiguuksak pen Zomi te in va maibiakbiak sawm lai ding ihiam? Hibang himawk leng zingciang imailam bel dahhuai mahmah mawk ding banah guu anei singkung pen tui va buakbuak tawh kibang ding hihang cih phawk hun lua mahmah ta hi.

(3)     Hangsaktakin Zomi Ading Nuntak Hunta!

Tukum gambup kiteelpi teh zanggam khamgamah akidem ding hong makaih nuam hong uk nuam party leh palai/taangmi(MP) dingte khuaikhasing bang hethutta uh hi. Myanmar gambuppi ah mun (1158)  hong kituh ding uh hi. Gambupah innpi dawltungnung( house of nationalities/upper house/amyotha hluttaw) palai dingin mihing(168 mps), innpi dawlnuainung ading mihing (330 mps)(house of representative/lower house/pyituh hluttaw), tua banah gamkee(state&region/division) (14) innpi(state&region parliament) bupah taangmi mihing (660 mps) munah vuikhu liang meitungliangin hong kidem ding uh hita hi. Angahte in maikum March11,2016 kum panin March11,2021 ciang dong gambupah thuneihna leh vaihawmna mipite sawlna leh piakna dungzui-in hong vaihawm ding uh hi.

     Zogam(Chin state) Phualsat Party Tuamtuamte

       IZogam ah adem ding party te’tangthu suutkik pak hileeng, USDP pen tulaitak kumpi party ahih banah galkapte’ innsung pan hong piangkhia party hi a, 2011 pan tuciang dong igam makaih party ahi hi. I Zogam leh Zomi ading asep uh khat zong omlo-in lampi nangawn tudong Thangho leh Liando te unau’ lenlai mah bangin leivui kitungin pupate bang hong phawksak mahmah khat party ahi hi. Zomi leh 2014 gambup milip kisimna-ah hi party pan I palaite in I mipih sapih Zomi vive hinapi’n leitungah Zomi cih ipupate kilawhna I minam min abeisaknuamte ahih ban vuah Kawlmangpa’ sawltakte ahi uh hi. Kum(5) sung Zomi te in muangtakin tanu semsak khin hang aa, amau an avak apute khut hong keikik ekh mawk uh ahih manin maikum (5) sung pia lai leng igam hong zuaksak ta ding uh hi. Ngaih sun thei leeng anai himai! Naak ngaihsut mahmah oo!

           NUP(national unity party): zong eimi palai mah hong kipan ding hi. Hi party pen U Ne Win gamhluah party hi aa, 1988 gambup buaina khitah Mah Sah Lah party(Myanmar socialist programme party/Burmese way to socialism) in mipi akhemkik nadingin aphutkhiat Ne Win huancingte vive makaih kawlte’ molhtum mah ahi hi. Kawlgambup ASEAN gam(10) ah ahau penpen gam pan azawng penpen khutdawhngen gam isuahna dingin gambup atoknoi asemnen asatzan, Zomi te sanggam melma-in I kitotot nading kikhemkhapna(divide&rule) avaihawmkhia leh I beh iphung, iteenna khuazui-in hong satkham 1983 gammi hihna upadi abawlkhiate suan leh khakte’ party hizen hi. Kawlgambup ASEAN(Association of Southeast Asian Nations) gam khempeuh lakah gamzawng pen asuaksak ekh champion hi uh aa, tun mee piakik inla igam uksak lecin Zomi bup in lampitung tengah khutdawh inget ding simloh lametna omlo hi. Ngaih sun in! Naak ngaihsut mahmah in! Sahang meilen ibang kha ding hi!
   
     Chin cih min paulap Chin party tuamtuamte: Naak ngaihsuthuai zaw tham hi sanggam! I vengte ci ding ihiam?I pakik ii tate ci ding ihiam? Igamhluahza hong sut dingin kitomtomte uh hi cih na thei hiam? I hamphatna ding om sunsun teng hong liaktumsak denkeii sanggam melmate uh cileng ka khial diam? Apualam mite’hong sapna Chin cih adeih kineihkhem uh aa, ipupa ngeina leh gamhte sum tawh zuakzuak ta uh hi. Ngeina kician tatak neilo uh ciding ihiam Kawl ngeina peuh thupisakin zuih kipanpanta uh hi. Kawlte kiangah tokai ding bek gengen uh aa, milim peuh biaksawmsawm ta uh hi. Chin cih pen sumbawlna leh pawlzotna-in nei lel uh aa, thuman thutang leh pupa ngeina taisan sawm uh ahih manin lampial ta uh hi. I pupa ngeina leh Vanglian Anungta Pasian’tate ihihna iminam hihna alakkhia(our national identity) sum tawh zuak kipanpan ban vuah kawlte maibiakna-in hong neihsak lel ta uh hi. Chin cih min paulap pongmawk uh aa, asungthu vuah beh khat lawhcinna ding amau tanau suan leh khak golzol nading ciang peuh tawh pai lunglung lel uh hi. Zomi te nungah molhtum tawh ideeklam pan hong ngimngim ta uh cih na phawk ta hiam?

      NLD party zong amau leh amau in gambup party(union party) peuh kici nong zen uh hi. Naak hihloh lua mahmah hi. Thuneihna angahma-un mipite aisa-longeekzon aa hong zol uh hilel hi. Gambupah nung abeisa kumpi semte sangin ahoih zawk leh hoihzaw kha mah in teh! Ahizongin Zomi leh Zogam ah innteek ding leh zingvai nitakvai hawm ding pen kawlte sangin Zomi siksanin minam leh Zogam ading munla I minam party(ZCD) bangin vei tatak ding uh hiam? Naak ngaihsut mahmah ni maw! Kawlte Zomi leh Zogam suahtakna ding leh khantohna nangin banghunin bangzah thongkia ngei uh hiam?Hai om mulmul mawk nawnlo-in an Ineek aa igil avah kilkel ciangciang tawh awng auau pong mawkin ciakciaklo ding hihang! Zu leh va ganhingte zong a namnamin tonkhawm busa nungta liailiai buang uh hiven!


 Deihsak Vaikhakna leh Thubuptuahkikna(concluding remarks)
  

      Ute naute, itluat ka mipih sapih Zomi khempeuh aw, tutung gambup kiteelpi ah ademding party leh mimal tuamtuam atung aa kong gensa mah bangin kawlgambup ah (100) kiim bang kidem ding uh aa, Zogam ah zong konggen khak loh party adem ding adil aha-in om lai ding hi. Mite in bangbang agen zongin, minam ading minam siksanin asem dingin hunhaksat lai pek pan tuni dong anuntakna asisan khua-ul kai-in Zomi leh Zogam aci tinten den hong hu ding hong aangvan ding minam minsel party Zomi Congress for Democracy(ZCD) bek Zomi Zogam phualsat meekuanglui dingah amuanhuai lametna om hi. Gamthu semngeilo, gamthu theilo, minam itlo taangmi/palai khat mipite in mee(vote) pia dih zen mawk leeng bang tawh kibang ding hiam cih leh galkap ngeilo, thauging akihta zawzen khat galmai samai ah akuan dingin asawl mihaipa/nu tawh kibang lel ding hihang!


          I minam party ahilo, party tuamtuam teng, Chin min pua party ahizong, Kawlmi te makaih party ahizongin abeisa kumnga sungin mee piakhin hihang! Hoih leh hoihlo ithei khin ciat hi. I minam minsel party ahi, Zomi Congress for Democracy(ZCD) party leh taangmi/palai te peuh mah bel tutungin amimal leh a party ideih aa, deih kei tateu zongin sin limlim phot leng kikhialo ding hi, ka cingam hi. Adang teng itheihsa hiven mataw! Kamsiatna leh deihloh penpenin, ZCD party leh palai/taangmi teelcingte in iminam I Zomi leh Zogam tungah hong citaklo-in adangte bangin hong nehpiiksan vial vua leh bel Democracy in mipi tungah hamphatna hong piak leh gammi khat hihtheihna thuneihna om bangin I minambuppi in khutzepin entuanlo ding hihang!


       Zomi   Sisan thu, leitang thu gamh leh gou thute gen dingin Kawlgambup innpi(hluttaw) ah isawltak ding leh I thuvan dingin  ipuak ipaisak, tutna tawmvei ipiakte in Democracy thuguipi palsat leh mipite hong simmawh vua leh nu leh pa ahi mipi in athumanglo itate thukhun om bangin mawhpaih giapgiap ding hihang! Taangpi taangta kisapnana(people’s needs), mipi deihna(people’s desire/demand) thudonlo leh mipi thuakna leh ngaihsutna(public opinion) hong zahtak kei vua leh gawigiapgiap  lel ding hihang! Mipi pen tawntung Nu Leh Pa ahih mah bangin Nu Leh Pa’ thumanglo tapahai/tanuhai pen adaupailoh lawhcinloh nahlawhpeekloh mah bangin Nu Leh Pa ahih mipi khempeuh in ithuneihna(voters’rights) tawh hemkhia lel ding hihiang! Mipi zong pilvangin I taangmi/palaite simtat maw? Zuau tat maw? cih etcikna phualpi(watch dog) tampi igeel toto lai ding hi. Akizen gammi (active citizen) tampi zong I makaite I khihna(check&balance) dingin hanciam toh lai ding kisam hi.
       

           Tua ahih manin, ute naute, pi leh pu, nu leh pa, lia leh taang, Zomi kici khempeuh aw, ka lungtang leh ka khuak sung pan deihsakna tawh iminam ading ka geelgel tak ciangin, tutung kiteelpi petpet ah bel I minam minsel party ahi Zomi Congress for Democracy (ZCD) limlim tutungin na lungtang kiu khat pan na hih theihna iminam leh gam adingin na meetang khat na pia phot limlim in! cih zahtakna leh itna tawh hong thumcip ing! Iminam ingeina ahuding leh akem ding panlakna(national interest), ileitang iminam akem ding(national security) ding leh gamthu ah minam siksanin panlakna(national politic) dingin ZCD simloh zanmah aa muinam zaakman leh ulian ut man peuh tawh kam dimdimin apaupaute’khemna um het ken aw Zomi!

      Tungtham muhtheihnate pen kuakua kumpi akah zongin, khantohna(development) pen hong naaksep mahmah ding uh aa, aseploh uh phamawh, sem kei le uh leitungah amaitang uh kumpi in lakngam nawnlo ding uh hi!Khantohnate pen hong naakpai lua mahmah ding hi! Ei’ kisap masak pen Pasian’ hong piaksa I pupa minphuahsa iminam Zomi bulkipsak ding leh lapsang ding abulpi phutkipna(foundation) leh zungthukkhakna(uplifting)hi. Kawlgambupah Zomi tangzaitakin taisak ding ahihi.  Hih nasep sem dingin ZCD lo peuh mah kuama’ tu kuama’ ta tutadihin omlailo hi. Naak ngaihsut mahmah in! Zomi leh Zogam’ading ZCD panpihin buakhuan photphot dih ni Zomi aw taikhua valta!

*****************************************************

I Website ading in phalna hong piak ahi hi. Lungdam,
Cinpu Zomi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Tukum 2015 Kawl Gambup Kiteelpi Khitah Zomi In Koilam Maingat Ding? Description: Rating: 5 Reviewed By: Cinpu Zomi
Scroll to Top