728x90 AdSpace

Hot
Menu
Zon-ol na Donate

Latest News

MIZO GAM TANGTHU.

MIZORAM STATE TANGTHU
Mizogam gamlim.

Mizoram pen a golna 8139 square mile (21,081 square Km) hi a, mihing tamna, population 2011 census ceptehna dan in 1,091,014 (1.9 million) zah pha hi. Pasal 552,339 pha in numei 538,675 pha hi. 

“Mizoram” or ‘Mizogam’ icih pen Zosuan minam khempeuh a dinga, Pasian piak ahi hi. Leitung bup a Zosuan te a lawm a kumpi thiehpih a I omna leh I tamna pen ahih leh ‘Mizogam’ ahi hi. British mangkang te in India ong uk lai un Mizoram pen state cih thadah, Union Territory zong hi nai lo hi. Assam State huamsung a om khat hi in, Lushai Hills District ci-in a headquater (phualpi) dingin  Aizawl khuapi na zangin Deputy Commissioner ii ukna nuai ah na om hi. 


Aizawl Khuapi.

India ki vaipuakna nuai a, a encik ding a kiseh ‘Bordolai committee’ te thusunna tawh kizui in Inida gamsung a nam niamzo te Tribal te ‘Sixth Schedule’ nuai a a omte amau leh amau kivai puak na ding in autonomous District Council kipia a, tua thu toh kizui in, ‘Lushai Hills District’ in zong tua  ‘autonomous district council’ 1952 kum in na ngah hi. Ahizongin a sunga teng mipite deihna bangin tua autonomous thuneihna in hamphatna tak tak pe tuanlo ahih manin Mizo Union cih kipawlna khat hong piang a, tua te in state thuneihna a kivai puak ding India kumpi kiang a nget ding ong vaihawm uh hi. 

Ahizongin deih bang in ong lawhcing pah lo uh hi. Tua ciang in, August 15, 1947 in India in British khut sung pan suahtaakna Independence ong ngah ciang in zong Mizoram pen India nuai ah om in, Assam state sung a district khat mah in om lai hi.

MIZO NATIONAL FRONT KIPATNA
MNF Emblem.

Kum 1959 in Mizogam ah mautam kialpi nasia tak in tung a, mi tamkhop in neek ding omlo in gilkial dangtak thuak in, a si zong tampi om hi. Hih kialpi (famine) hamsatna tawh kisai a huhna ahizong in akisam bang bang a sem ding in kipawlna khat  “Matam Front” kici 1960 in Pu Laldenga ii makaihna toh hong pan khia uh hi. Tua kum mah in “Mizo National Mautam Front” ci in khangno te in a min laih leu leu in, Mizogam khua teng ah antang hawm kawi kawi uh hi. 

MNF Paltante.

Hih MNMF kipawlna pen paisuak in “Mautam” kialpi hong bei ciangin ‘Mizo National Front’ ci in political demand nei in kiphinna ong nei uh a, a tup leh ngim pen uh ahih leh Mizogam pen India kipawlna Indian Union nuai a om lo a, suahtakna ngaha Independence a om ding cih ahi hi. 1966 kumin MNF president Pu Laldenga makaihna tawh Mizoram Independence ci in pulak khia in thau tawi in singnuai gammual ah India kala galkap te tawh ki kap in buaina hong kipan hi. 

March kha ni 5 leh ni 6 ni 1966 in India kumpi in jet fighter zang in Aizawl ah bomb khia in mi tampi si uh hi. MNF ten zong Lunglei, Aizawl, Chawngte, Chhimluang leh mun tuam tuam a India galkap leh kumpi zum te do in va la uh hi. Tua a kipan in Mizogam pen a dung leh a vai ah buaina nasia takin ong ki pan hi. India galkap Sikth regiment Punjab pan a galkap te ong sawl to uh hi. Tua galkap ten numei te buan in pasal a muh peuh uh bawlsia in kaplum ziah ziah in buaina nasa tak in om hi. Tuni dong in kala ‘vai’ te bawl siatna hang in Mizogam ah Vaite muh neuna leh simmohna lungsim nei lai lai mawk uh hi.

Hih banga kikapna leh buaina nasia lua leh mitam pi ten sih pih uh ahih man in India kumpi zong ong patau ta in, MNF leh Indian Prime Minister tualai taka a sem Pi Indira Gandhi ki thukim na tawh, January 21, 1972 kum in  Mizoram in Union Territory tawh ki vaihawmna ding Assam State, khut sung panin ong ngah hi. UT a ngah uh tak ciang in Pu Ch. Chhunga Chief Minister masa pen suak in ama nuai ah kivai puakna government ong nei uh hi. Ahizongin MNF lamte a lungtup uh pen Independence ahih manin UT bek tawh lungkim lo in, ki phin lai uh a, thau tawi in India kumpi do do lai uh hi.

Atawpna ah India kumpi zong lung himawhin kiho na neih pih a, tua laitak a Indian Prime Minister Pu Rajiv Gandhi leh MNF president Pu Laldenga ki ho in, Mizoram Peace Accord cih kithukimna June 30, 1986 in letmat sign pih hi. Tua ni pen tuni dong in India leh MNF te kilemna ni ahih man in June 30“Remna Ni” ci in kumsim in tuni dong in pawi khaam uh hi. 

Tua ki thumkimna ah Mizoram lam ten a Independence hi lo in Federal state of India a ngah ding uh hi ci in ki thukim uh a, tua kithukimna dungzui in February 20, 1987 in Mizoram state cih ong piangkhia a, tua kithukimna (agreement) sung mah a a om ahi, Pu Laldenga Chief Minister a sem ding hi cih zong om ahih manin tua laitak a UT nuai a Chief Minister ana sem Pu Lalthan Hawla in a za a (panmun) awn in Pu Laldenga CM semsak hi.

BIAKNA
Baptist Church of Mizoram

Mizogam, tu ma a Lushai Hills ki ci a Christian missionary (sangmang) ong pai masa pen pen a min William Williams Welsh, UK gam pan ahi hi. Amah pen Khasi Hills (Meghalaya) a missionary sem a om hi in, Lushai Hills a veh ding a gospel pai to pak dan ahi hi. Amah pen March 1891 kum in ong pai to a, nipi kal khat sung bek taam ding a pai pak (survey) ahi hi. 

A sawt loin,  January 11, 1894 in F.W. Savidge leh J.H. Lorrain te in Mizogam a missionary a sem tak tak ding in Arlington Aborigins Mission, Welsh, UK te sawlna tawh Aizawl hong tung uh hi. Amaute in Mizo pau sin ngek ngek in Mizo te laimal ding Roman scripts pan in “A, AW B…” laimal bawlsak uh a, tuni dong in tua mah aki zang lai ahi hi. Tuaciang in Thuciamthak Laisiangtho New Testament Luka, John leh Sawltakte Mizo pau tawh let (translate) uh hi. Tua pen Mizo te a ding a Christianity leh laimal ong kipat khiatna masa pen ahi hi.

A sawtlo in amaute mah London Baptist Missionary Society ten Lunglei Serkawn ah Baptist tuiphum pawlpi phuan ding in sawl leu leu uh a, tuni ciang dong Lunglei district ah Baptist tam pen lai hi. Tua khit teh JH Lorrian naupa ahi Rev. Reginal Authur Lorrain Saiha lam Maraland “Mara” mi te omna lam ah pawlpi Evangelcial Church of Maraland cih phuan in va pai a, tuni dong in Mara te lak a pawlpi lian pen hi lai hi. Hih sangmang te nasepna  hang in Mizogam pen tuni dong in India ah ‘literacy’ (able to read nad write) (lai sim/gelh thei) rate a tamna pen, a khatna ngah in India gamah (miphazah % toh ngaihsut in) Christian tamna pen state  suak thei hi.

KI UK NA (Administration)

Mizoram pen tulai takin District 8 in kikhen hi. Union Territory a om cil lai in district 3 in kikhen a, tua te: Aizawl, Chhimtuipui, leh Lunglei te a hi hi. Tua khit tak ciang in Aizawl District pen mun 5 in kikhen a, Chhimtuipui pen district 2 in ki khen hi. Hih District min teng: Serchhip, Mamit,  Lawngtlai, Kolasib, Champhai, Lunglei, Saiha leh Aizawl te a hi hi. District khempeuh ah Deputy Commissioner khat leh Superintendent of Police khat ciat in uk uh hi. DC in thuneihna ci thum nei a, Magistrate nasep leh collector nasep sem khawm hi. Law and Order (Dan leh thupiak) te ah vaihawm lian pen sem in Collector na ahih leh Revenue leh tax lam tawh kisai kehmpeuh zong uk hi. DC pen a (head of the district) lungtangpi pa/nu ahi pah hi.

Mizoram Civil Cecretariat.
Aizawl, Mizogam.


LAI SINNA (Education)
Mizoram University.

I gensa mah bangin Mizoram pen literacy rate (lai sim thei gelh thei) a India gam ah sang mah mah a, kumsial in a 2na or 1na hi den hi. Mikang sangmang te nasepna hangin lai lamah khangto mah mah in Pilna sinna school zong tam mah mah a, Primary school, Middle School, High School leh Higher Secondary school aki gawm in 2000 val bang om hi. Pasian thu sinna pen Aizawl Theological College kici Rev DE Jones, sangmang te khat nuai ah 1907 kumin phut khia uh a, tu in Serampore University nuaiah affiliation la in Bachelor of Divinity, Master of Theology leh Doctor of Theology degree ciang ki pia ta hi. Pastor tampi tak hih sangpan in bawih (degree) ngah khin uh hi. Synod Theological Education Board nuai ah om in, Presbyterian Church te ii Laisiangtho sang ahi hi. Tun ahih leh Baptist pawlpi ten zong Laisiangtho sang khat nei uh a amin Academy of Integrated Christian Studies, ci in Aizawl ah om a, Bachelor of Divinity degree ciang ki pia hi. Secular sinna sang dang ahih leh 2001 malam bel Mizoram a college khempeuh NEHU (North Estern Hills University, Shillong Meghalaya) nuaiah om vek in, Graduate leh Post graduate sin theihna om lo a, NEHU Mizoram campus ci in MA sin theihna khat bek om hi. Ahizongin University Grant Commission te phalna in July 2, 2001 in Mizoram University Tanhril, Aizawl ah ong piang khia hi. Hih university nuai ah tu lai tak college 31 bang in kizopna (affiliation) la/nei uh hi. Hih Mizoram University in post graduate degree tuam tuam B. Tech, MA, M Phil, MSc, MBA, IMBA, PhD te pia uh hi.

KIPAWLNA (Associations)

Mizogam ah NGO (Non-Governmental Organization) leh Philanthropic (phatuamngai pawl/dongtuak huh) kipawlna ci tuam tuam om hi. Tua lak ah a lian pen YMA (Young Mizo Association) hi pah hi. Hih pawl lian pen in dong tuak te leh genvai sai pen hi. Central YMA ci in OB term nei in kitel uh a, khua cih leh veng khempeuh ah branch in ding uh hi. Sihna manna a om ciang in YMA in tavuan la in genvai khempeuh sai uh hi. Khat vei vei social issue zong sai in pressure group dan in zong pai thei zel uh a, a pai khial kha phial zongin kumpi in ki thiehmoh bawl lel hi. 
YMA te Logo.

Sangnaupang kipawlna Mizo Zirlai Pawl cih zong om a, amau pawl pen pressure group, kumpi a lungkim lohna a neih uh leh zong nasia taka press (sawn) uh hi. Numei kipawlna Mizo Hmeichhia Insuihkhawm Pawl (MHIP) cih zong om a, numei kipawlna lian pen ahi hi. Mizo Upa Pawl ci in kum 65 tunglam te kipawlna zong om hi. Hih kipawlna tuam tuam te in khuasung/gamsung nuntakna encik in a hoih lo a om leh tua te a hoihna ding a mala in kumpi na ngawn advice pia uh hi.

BIAKNA Tuamtuam (RELIGION)

Mizogam ah Christian mah tam pen in 87.97% bang Christian hi a, Buddhism 6.93% hi in, Hindu 3.55% hi a, Islam pen 1.13% hi. Christian biakna ah pawlpi ah Presbyterian tam pen a 66% bang hi a, a zawm ah Mizoram Baptist Church pen 15.6 % bang hi a, Salvation Army 6% United Pentecostal Church 5% Seven Day Adventist 2.6% Roman Catholic 2.2% leh a dang te Kohhran Thianghlim, Lairam Isua Krista Kohhran, Congregational Church of India (Maraland), Evangelical Church of Maraland, Independent Church of India (ICI), Evangelical Free Church of India (EFCI) cih bang leh pawlpi neu tuam tuam zong a om hi.

TRANSPORTATION (Kizopna)

Mizoram kumpi (government) nuai ah department gol mah mah khat ahi, Department of Transportation kici khat om a, MST (Mizoram State Transportation) bus tampi tak om in, Mizogam sunga khua khempeuh ah bus a tun na ding ngaih sutna tawh a bol uh ahih man in, khua khempeuh ah motor tung hi. Hih pen a khantohna liam pen te lak a a cepteh tak cing mah mah khat ahi hi. Mizoram ah pen khua neu lua cih bang om lo hi. Hun khat lai in khua khempeuh camping na bawl uh a, khua neu te pen khua lian deuh ah ki khin ding in aana tawh kumpi in order in, na sawl ngei hi. Tua ahih man in zong khangto mah mah uh hi. Khua khempeuh ah tuciang in mobile phone tung ahih man in kihona communication tung vek hi. Tuaciangin Electricity leh Tui zong khuakim in ki cing takin ngah vek uh a, khangto mah mah uh hi. Health Sub-center zong khua kim in nei vek ahih manin cidamna healthcare zong hoih mah mah hi. Kumpi in Health Department nuai a nasem tampi tak nei in, mipi in zatui zaha zat ding kicing tak in nei uh hi. Food and Civil supply department zong thupi mah mah a, khua khempeuh in godon (buhpang) antang koihna nei a, kham ding in (ration) antang retailer te kiang ah subsidize (akiman zaw tham) in lei thei ciat uh hi. Mipi te a ding in, sum a om nak leh antang leiding pen bang hun bang hun in om den hi.

EMPLOYMENT (Nasep zonna)
Mizoram kumpi pen gol mah mah a, State Gross Domestic Product pen kumkhat in Rs 6991 Crore ($1.1 Billion US) bang pha hi. Department tam khe mah mah a, tua department ah pen nasem tampi tak om lai hi. Kumpi nasem te khasum pen sum beina hi den zaw hi. Department khat ah pen nasem tawm het lo hi. Gentehna ding in Home Department bang pen hici tuat leng Police battalion 10 bang om ahih ciang a, tul sawm val bang tua department a sem hi pah. Mizoram a governmental department teng hih a nuai a bang hi:-

Agriculture Department, Mizoram
Animal Husbandry and Veterinary Department, Mizoram
Art and Culture Department, Mizoram
Co-operation Department, Mizoram
Disaster management and Rehabilitation Department, Mizoram
District Council Affairs Department, Mizoram
Economics and Statistics Department, Mizoram
Election Department, Mizoram
Environment and Forest Department, Mizoram
Excise and Narcotic Department, Mizoram
Finance Department, Mizoram
Fisheries Department, Mizoram
Food, Civil Supplies and Consumer Affairs Department, Mizoram
General Administration Department, Mizoram
Geology & Mineral Resources Department, Mizoram
Health and Family Welfare Department, Mizoram
Higher and Technical Education Department, Mizoram
Home Department, Mizoram
Horticulture Department, Mizoram
Industries Department, Mizoram
Information and Communication Technology Department, Mizoram
Information and Public Relations Department, Mizoram
Labour, Employment & Industrial Training Department, Mizoram
Land Revenue and Settlement Department, Mizoram  
Law and Judicial Department, Mizoram
Legal Metrology Department, Mizoram
Local Administration Department, Mizoram
Minor Irrigation Department, Mizoram
Personnel and Administrative Reforms Department, Mizoram
Planning and Programme Implementation Department, Mizoram
Police Department, Mizoram
Political and Cabinet Department, Mizoram
Power and Electricity Department, Mizoram
Printing and Stationeries Department, Mizoram
Prison Department, Mizoram
Public Health Engineering Department, Mizoram
Public Works Department, Mizoram
Rural Development Department, Mizoram
Sainik Welfare & Resettlement Department, Mizoram
School Education Department, Mizoram
Science and Technology Department, Mizoram
Secretariat Administration Department
Sericulture Department, Mizoram
Social Welfare Department, Mizoram
Soil and Water Conservation Department, Mizoram
Sports and Youth Services Department, Mizoram
Taxation Department, Mizoram
Tourism Department, Mizoram
Trade and Commerce Department, Mizoram
Transport Department, Mizoram
Urban Development and Poverty Alleviation Department, Mizoram
Vigilance Department, Mizoram.    

Kumpi nasem bel tawm lo ding hi cih ki thei pah lel hi. Khuata (rural) a a teng te bel a tamzaw lonasep mah Zo ngeina bang in na sem veve uh hi.

MINAM, PAU LEH HAM (Ethnicity & Language)

Mizogam ah pen “Lusei” pau “Duhlian” pau pen gamsung khempeuh ah kizang pen hi. Mizogam sung a a teng nam tuam tuam gam dang pana sum bawl a pai ten zong Mizo pau thei vek uh hi. Kumpi ceptehna ah Mizoram official language pen Mizo leh English ci in ciamteh uh hi. India gamke khat hina pi in, Hindi pen kizang pha het lo a, Hindi tawh a pau zong tawm mah mah pah hi. Mizoram pen zosuan te tenna ahih mah bangin, mikhempeuh a khanggui sut leng, Ralte, Hmar, Hualngo, Pawih, Paite, Mara, Lai, Kuki, Vaiphei, Duhlian, Sailo, Zadeng, Biate, Gangte leh a dang dangte kigawm a Duhlian pau a zang teng “Mizo” kici na hi bek hi. Mizo nam ci a a tuam a gen ding pen a khang gui ah na om tuan lo hi. Sailo pen nam thupi leh a lianpen a hih hang in Guite/Paite te zawlta na hi lel dih hih tuak hi.

*******************************************************************
Mizo Gam Tangthu gelhpa kammal.
Mizoram tawh kisai gelh ding tampi zong om kha dinga, ahizong in ka phok teng kong at vat ahih manin, a kicing lo leh hih khelh a om leh hehpihna tawh ong na maisak un. Asim kha mimal khat kim Topan thupha ong pia ta hen!!

By : KL Muana Khuptong (Portland Oregon).

( Laigelh pa KL Muana Khuptong (Portland Oregon) kiang ah Zomi te'n Zolai ngiat tawh sim theih ding leh www.laibusaal.com ading in Mizo Gam Tangthu hong gelh sak in cih' ka ngetna tungtawn in Zomite veina tawh, aman hunhun in hong at sak ahi hi. I biak Pasian in hong zatsak semsem ta hen.
Lungdam,
Cinpu Zomi.)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MIZO GAM TANGTHU. Description: Rating: 5 Reviewed By: Cinpu Zomi
Scroll to Top