728x90 AdSpace

Hot
Menu
Zon-ol na Donate

Latest News

Gam leh Minam ading in nasem Pu Zokhai’ Taangthu Tomno

Pu Zokhai’ Taangthu Tomno
Pu Zokhai
Ahampi:
1974 November 10 ni-in Laaitui Khua-ah suak.
1993 – 94 …….. Siamsinna Danh-10 zo.
1996 – 98 …….. 2nd Year (Chemistry: Kawlpi) zo.
1998 – 2001….. Vaaigam bulphuh Zomi Masuanpi-ah mapang.
2001 – 2001 …. Tawntung Koppih Angkawi Paaibang pom.
2001 – 2002 …. Malaysia-ah Zomipihte beel kawm-in,
2002 – vaak kawikawi, Refugee Status ngetding athupiitna gen.
2002 – gamgii khatvei tung: Ampang-ah mawtaw silna-ah seem.
2003 – 2003 …. Kajang Thonginn: kha-6 + tawsaat nih.
2003 – 2006 …. Semenyih Deportation Camp, Malaysia
2006 – 2007 …. Zomi Association of Malaysia.
2007 – tuciang … Australia, Melbourne-ah.
2007 – 2011 ….. Zomi Association Australia Inc.
2009 – 2012 …. Bachelor of Social Science (Sociology)
2014 – tuciang … Master of Social Work (Melbourne Uni)
Pasian’ Thupha --- Tapa 4-tawh om.

Pu Zokhai, Cinpu Zomi, Thang Khawm Pau Zomi.
(US hong paisung manlah kawm kaal ah' ka nasepna ah hong baanna hi. Portland, TN USA.)


Pianna: 
Apianna Tuun leh Zua. Rev Neng Khua Vungh leh Pi Awi Khan Cing (paisa)

Pu Gualnam pan-in khang 12-na Pu Zokhai-pen 1974 November 10 ni-in Myanmar Christ Baptist Church Makaaipipa Rev Neng Khua Vungh leh Pi Awi Khan Cing (paisa) te’ sung pan-in Zogam Tumlam Laaitui Khua-ah suak-hi. Asuah khit ni 7 ni-in apano Pu Ngul Tun (paisa)’ mintamh-in Tun Sawm Khai min kiphuak-hi. Unau numei 6 leh pasal 4 hi uh-a, numei 2-te suaktuúng-a si leh khat-pen kum 12 kiim-a hong nusia hi-in unau numei 3 leh pasal 4 damkim laai uhhi. U-numei nihte mokha uh-a, khat ahihleh lungsimlam dammawhna thuak-in tuni ciangdong nungak siangtho-in omhi. Pasal teng avek-uh’n zii-lehta vive-tawh om uhhi.

Dammawhna pan-in Lungdamna:
Pu Zokhai aneutuúng-in dammawh mahmah-a, bilnatna leh naakbing vei-den ahihman-in anu-in a-ihmut mawhpih penpen nau ahihi. Kum 9 aphaak hun-in siamsinna danh-3 sin-a, tua hun-in apheipi ziatlam guh damlohna nasiatak-in tuak leuleu-hi. 1984 March 3 ni-in Yangon Khuapi-a Guhlam Kibawlna Kyi Myin Dai Zatopi-ah kibawl ding-in apianna Pa-tawh paisuk uhhi. Tualaai-ah, Guhlam siampi England siamsin khinsa vive 3 om-a, tuate-in, “Naupangpa kha 6 ciang-in si dinghi” ci-in ciahsak uhhi. Tua guhlam siampite aminpha mahmah-uh hi-a, Singapore leh Thai pan-in khangno kimawl-a khe, khut kitan mite-tawh zato inndei khat sung-ah akikhoi-khawm ahihi.

Lametbei-in Yangon pan-in May 20 ni-in Zogam, Laaitui Khua zuankiik-a, tua-a kipan nitaak sim-in innkuan thunget nei tawntung uhhi. Phuisam siampite-in va-zol zeel-a, “sumpiak kuullo, dam sitset dinghi” ci-in zolna a-om ciang-in naupang Zokhai-in, “ka-si zong-in ka’ tung-ah phuisam peuhmah tung ngeilo dinghi” ci-in khauhtak-in nial-hi. Phei-guh natna ziak-in lawmlehgual-tawh kimawl zolo-in lupna tung-ah Lai Siangtho-tawh kilawmta mahmah thei ahihman-in anungciang-in tua natna aguan ZEISU’ tung-ah naakpi-a alungdamna pulaak zeel-hi. Bone cancer: kha 6-a siding kici mahleh ZEISU’ Vaangliatna leh Thahaatna-tawh hongdam kiik-in, tuni ciangdong guhnatna suakkiik nawnlo-hi. ZEISU’ Min Vaanglian seemseem tahen!

Siamsinna: Laaitui Khua
1979 kum-in Laaitui Khua-ah Danhlang (Prep) kipan-hi. Danh-nih asin ciang-in pheengphia mahmah; sialkhum-tawh leh thebet haatlua ahihman-in laihuanna-ah subject khat-pen za-ah 40 ngah zolo-hi. Laihilhpa-in Rev Vungh’ kiang-ah, “Sia Vungh-aw, I’ nau lai-kia mawkven, I-ong saktam?” acih ciang-in apa-in, “Akia peuhmah akia-mah ahih kuul-hi, lungnuammawh kei-in” ci-in danh-nih akia hongsuak-hi. Saang honkiik ciang-in alawmte danh-3 kahto uh-a, amahbek danh-2 athaam takciang-in nuam hong salo-thei ahihman-in tua-a kipan themcik lai hong lungluut thei-in danh-8 ciangdong laihuan sim-in khatna, nihna ahihkeileh thumna ciang-ah omto paisuak thei-hi.

Danh-8 takciang-in Laaitui danh-8 laihuanna lai (exam-paper) te Khalkha kipuaklo ahihman-in laihuanna-in result neilo-hi. Saang honhun hongtun ciang-in nulehpate-in danh-8 a-ong zolo mah-in sehlel ahihman-in saangkah ding-in sawl nawnlo-hi. Tangvaalno Zokhai omtheilo-in saang-ah ama’ thu-in paisuk-a, aminpia ziau-in danh-2, 3 te’ laisinna inndei-ah luut-in laihilh giapgiap-hi. Tualaai laihilhsiate king-peuh kineih, nilum-peuh awi hiit-hiat-a omnuam asak mahmah-uh hun ahihman-in laihilh tangvaalnopa paakta bilbel uhhi. PTA Fund-a kipan sumdon tuamtuamte peng-a, cialloh laihilh kawm-in saangkah thuah-hi. Apianna nulehpa-pen midik, nunneem-a mi’ minzaakte ahih-tawh kituak-in atapa-uh paupih hetlo-in azia enlel uh-a, a-ute inzong paupih selo-in azia ento uhhi. Hih hun ciang-in aphei-guh natna damta-hi.

Danh-8 kum nihna sung-ah saangnaupangte’ tung-ah  gualzo mahmah ahihna ahoihlam thuneihna-in zangh mahmah-a, saang kiim-a singno suanding, tualpi deek-a taaksing note suan ding cihte laihilhsiate’ sawllohpi mah-in vaaihawm ziauziau-in, tuni-dong taaksing khawl-khat po hilhhelh laai-hi. Lungsiang mi hi-in, lau aneilo khat ahihi. Laaitui saang min-tawh Tedim-ah bawhlung kimawl ding-in makaai-in laihilhsiate-in seh uh-a, captain va-seemhi. Kimawl-zong kiva-mawhlo ahihman-in saangsiapipa’ thusiamna kawm-tawh Kam Hau Tualpi kimawl hunsung mah-in, “Laaitui Nambat 10: Myonee’ ai-a pangding kiteel khin” ci-in loudspeaker-tawh kitaangko-hi. Anitaak ciang-in gilvah salo ahihman-in alawmte-tawh vaak-in Mya-Twe sai-ah anne uh-a, video-zong ensuak vet-uhhi. Aciah ciang-uh’n coach pa-in paupih ahihman-in dawhkaan nih khawng tuanpaai-in nuakciah bilbul uhhi. Khua pan-in apa-in, “Bawlung-tawh minthang loding na-hive” ci-in nuihmaai hiit-hiat kawm-in gen-hi. Tuni ciangdong bawhlung-tawh minthang vangvanglo hihtuak-hi.

Pheekaapna (Thaaikaapna: Laithaai Kimawlna): 

Danh-8 kum nihna sung ni-khat anu-in keelnawi puak ding-in sawl-a, asawlna inn-ah apuak ciang-in pheekaap honkhat nana hihi. Agei-ah tu-in a-et ciang-in oltuak sa mahmah ahihman-in a’ keelnawi man ding-a innteeknu-in apiak peek- 4 tahsuk-in pheekaap kipan-hi. Cikmah-a pheekaap ngeilo ahihang-in meet mahmah-a, tua-ni ameet ks 200 anu apiakleh, “hih koi-a? koi pan-a na-ngah” ci-in sitpah-hi. Tangvaalno Zokhai-in ahibang-in agen ciang-in anu-in, “hihbang sum deih khang-ei. Pheekaap nawnkei inla, hih sumte aneite piakiik-in” ci-hi. Piakkiik peuhmah dingpen ngaihsun zolo-hi, banghanghiam cileh amah azo hikeileh alawmte mahzong sum kine nuam-a pheekaap vive ahihman-in piakkiik lo-in pheekaapna mah-in zangh kiik-hi. Tua hun-a kipan nitaaksim, zaanhak zeel cihbang-in papi vive-tawh kimawl uh-a, sum tampi angah hang-in inn-ah zat theihna, zeek theihna phalna ngahlo-hi.

1992 November 7 (Septawpni) ni ciang-in guh-cancer pan-a damna ziak-in Pasian’ kiang-a lungdamkoh biakpiakna cialpi khat Rev Vungh-in vaaihawm-in pawlpi miteng leh naaihuai sanggamteng kaaikhawm-hi. Tangvaalno Zokhai ahihleh Septawmpni saang kikhaak ahih-tawh ziingsang anneek khit-a kipan papi 3-tawh pheekaap-in mi’ inn-ah om-hi. Nitaak hunbawl ding ciang-in a’pa-in a’sanggamte samsak-hi. “Laklawh” ci-in kimawl zom ahihman-in amah kingaak lo-in biakpiakna kipan-hi. Ankuang uum ding ciang-in anihveina a’sanggamte-in vasam leuleu-a, “laklawh” ahihman-in lungdamkoh cialpi siim khempeuh an kivaak-a, amah ahihleh phee-dawhkaan gei-a tu geepgaap laai-hi. Atawpna-ah, akidempihpa-in zo thei mahmahlo ahihman-in asupsa khempeuh luakkiik-in tuul-nih pia ziau-a, “hihzong hampha luateh, nong’ kuanna tuul-khat bek-hi” acihziau ciang-in inn ciahthei-hi. Inn atun ciang-in khuaziing ta-a, ama’ ziak-a lungdam cialpi siimte-zong om nawnlo-hi. Nulehpa-a kipan a’ sanggamte kuamah-in paupih lo, phunsan lo, thamlo-in kitheihmawhbawl uh-a, amau’ manlahna ciat-tawh omlel uhhi. Tuni atuak thu-in naakpi-in patau-sak ahihman-in anne lo-in lupna luut-hi. Zaan thapaai-in thu ngaihsun-a ihmu lo-hi: Pheekaap-a I’ pan vetleh giitloh ngam kisam, kivuak akuulleh kivuak kuul,…., tua-lah Pasian-in deihlo., tua ahihleh khawl kuul., tuni kei’ hang-a apiang lungdamna tung-a biakpiakna-ah kihello, Pasian bangzah tak-in aheh-tam…….,” cihteng-in angaihsutna vaanhawmpi khempeuh thawn dumdum-hi. 

Ziingsang phalvaak ma-in tho-a, mei tawh-in a’pa Rev Vungh athawh ding ngaak-in meikiang-ah tu-hi. A’pa-in theitel mahmah-hi. Khuavaak ma mah-in hong thokhia-hi. Meikiang-ah hongtu-a, “lol siteh, Khai, bangci-na?” acih phet-in kisiikkiikna khitui khaam zawhloh-in hongpulh ziahziah-hi. Kampau theilo-hi. A’pa’ ang-ah luutphei-in kap-a, a’pa-in a’lutang leh a’eelzaang zuut hialhial-hi. Kampau nading tha aneih takciang-in, “Pa, vaantunggam ka’tung tam?” ci-in akitamzaan lungtang-tawh hong dong-hi. A’pa-pen Pasian’ sila muanhuai mahmah leh Pasian’ piak pilna ciimna-tawh akidim ahih-tawh kituak-in atapa’ lungtang angah nading lampi tel mahmah-a, “Pheekaap-a vaantunggam tunglo cihbang omlo-hi. Asiapenpen mi-zong ZEISU-tawh akimuh takciang-in mihoih suak-in vaantunggam tung thei-hi,” ci-in dawng hiat-hiat-hi. Tuhun biakna kampau-tawh cilehang tangvaalno Zokhai’ pianthak taktakna hih pan-in hong kipan-hi. “Tua ahihleh,” acih ciang-in a’pa-in, “Kitah kimawlna-pen mawhna hilo-hi, ahizong-in hong kizom totoleh neihsa-tawh kizom ahihman-in neihsa hongbei thei-a, tua ciang-in akhawl theilote-in mi’a leitawi hongkuul, leitawi kipia nawnkeileh guuk kuul, guukding omkeileh mithahna ciang nangawn hong tunthei kimawlna hi gige-hi” ci-in thun ngiatngiat-hi. Naakluut mahmah-a, Pasian’ maai leh a’ Pa’ maai-ah lungsim siangtak-in, “kitah kimawlna peuhmah-tawh ka’ nuntaakna nawngkaai-sak kei-ning” ci-in alungsim hong sungkhia peetmah-a, Vaan Kumpigam luahding kitelcianna lungdamna khitui luang-hi. A’pa-in mite’ omzia atheisiam mahmah ahihman-in ama’ ipsung pan-in sum 180 lakkhia-a, “Phee bu-nih va lei-ve” ci-hi. Lamdang sa-pipi mah-in tangvaalpa pai-in valei-hi. Suun ciang-in innka taang-ah a’sanggam pasalteng leh a’pa-tawh pheekaap khawm uh-a, ciamnuui-khawm liailiai uhhi. Tangvaal Zokhai’ ading-in “Leitung-ah suahtaak penpen ni” kiteel sakleh 1992 November 9-ni hiding ci-hi. Tua suahtaakna-in ama’ maailam’ ading meidumpi khempeuh muutsiang ahihman-in niitaang sung-ah kalsuan thei-hi.

Siamsinna: Tedim Khuapi, Lawibual Veeng
Danh-8 kum nihna hong-on ciang-in Tedim Khuapi: Lawibual saangpi-ah danh-9 zom-hi. Tua laai-ah, khuata pan-a saangkahte aki-simmawhna naakpi-in do-a, khuttum mah-tawh kisukna nangawn-ah thahaat-in pang giapgiap-hi. Lawibual Veeng-a alawmte-in panpih ahihman-in 1992 kum-a kipan Lawibual saangpi-ah khuata saangnaupang ki-neubawlna abei-phial zahdong ahihi. Danh-9 sungteng Tedim Saangpi No. 1 lam-ah gualneek khollo ahih kawm-in Kawllai-hilhsiapa-in thapia-in zol tantan ahihman-in limgelh kidemna-ah va-kihel thei-a, Tedim Khuapiseh High School Level-ah nihna va-ngah thei-hi. Prize-pen Kawlsum 15-lai dal-1, athak sitset hi-a, aciah ciang-in amah uap-a azuui alawmte-tawh Mey-Tha-Zine kuhva sai-ah kuhva neekna-in zangh uhhi. Apianna Pa-in, “bawhlung-tawh minthang loding” acih a-umlo ahihloh hang-in uuk veve ahihman-in, mi’ lak-ah kihel gawp-a, Lawibual Saangpi min-tawh Town League kimawlna khawng-ah kihel giapgiap-hi. Myonee ai-ding kiteelna khawng-ahzong kihel-a, ahizong-in amah akiteel khinsa nangawn akpi khat-in la-khia kiik cihbang-in bawhlung lamsang alampi vang khollo tosuak-hi.

Lawibual-ah nitaak vaakpih, saangkahpih lawmte atuam, music khoihpih atuam-in lawmnei thei-a, The Milky Way Band min-tawh Gaalkaapte’ Ni maleep bangpen Khuado Hall-ah zaii uh-a, Bass Guitar tum-in la-zong sa-hi. Lawibual Veeng-a lawmlehgualte-in it-uh ahihman-in Tedim kiim pan-a Tedim-a saangkah khempeuhte’ lak-ah nuam asa masapen, atualtang ngam masapen hikha mawhlo dinghi. Siate Lungdamkohna (ဆရာ ကန္ေတာ့ပဲြ) kibawl den-a, tangvaalno Zokhai-inzong The Milky Way Band-tawh siate aphuah la-khat asak takciang-in Siapipa Gin Khan Cin (paisa) lungdamlua-in pahtawina Kawlsum 200-tawh ala asa-kiik ding-in ngen-hi. Tualaai-in ks 200-in mannei mahmah laai ci-hi. The Milky Way Band: Lead Guitarist – Nang Sawm Tung & Khai Sian Langh., Bass Guitarist – Tun Sawm (Zokhai) & Paapeleng., Drummer – Lal Peek Saang (paisa)., Vocalist – Tun Sawm, ……………

Danh-9 zo naailo deuhtak-in apianna Nu-in Tawntung Tawldamna hongngah-a kipan ni 33-sung zudawn-in, mi-tawh kilaai-in ahun hong nopzat gawp-a, laihuanpi khit, khua-ah ciah-in tua gamhtatna hong zop takciang-in Laaitui Khua thuneite-in pummat-in zaan 11:30 pan-in ziingsang nai 2 (minute 150) sung kolbulh uh-hi. Tua pan-in hong kiheikiik-a, dahn-10 hongzom-hi. Lametlohpi-in Saangsiapipa-in hong nusia vat-a, Lawibual saang buppi-in asak ding-in Sia Thang Lam Cin Gualnam leh alawmte-in aphuak-uh khaakna la makaai ding-in tangvaal Zokhai kiseh ahihman-in saanginn-ah saangnaupangte sinpih-in, siapipa’ hun nunung-ah sa-thei uhhi. Tua hun-in siapinu-pen kaplo, khitui luanglo-a a-om sitset hun ahihi. Lawibual saangnaupang buppi’ khaakna la aman ciang-in thu tomno kigen-a, tua zom-ah Laaitui saangnaupangte’ khaakna la kisam-hi.

Laaitui saangnaupangte’ lak pan-in tangvaal Zokhai, tangvaal Langh Khan Khup (tu-in TBA-Gambup Secretary), tangvaal Nang Hau Cin leh tangvaal Thang Pian Suum (Zokhai’ nautumpen) teng-tawh tangvaal Zokhai’ lamal-gualh quartet kihual tak hongsak uhleh siapinu hong tuisuak-in akhuitui hongpulh zangzang-hi. Tedim kiim pan-a saangkahte’ lak-ah Tedim mipite’ maai-ah teektang tak-a mapang masate hi uh-a, “Laaitui saangnaupangte kipiimuh-tuam” mahmah-hi. Hihbang-in Tedim khuatual-ah tualtang-in nuamsa thei-a, laihuanna-ahzong gual malsim 56-tawh lawhcing-hi.  

1994 – 1995 Khualzinna
Danh-10 laihuan khit ciang-in gualgen vaangthang Mongshu (မိုင္းရွဴး)-ah alawmte tangvaal 3-tawh pai uhhi. Mongshu suangkhuuk-pen Mongshu pan-in taii 17 kiim hi-a, lamsaap khop bek-tawh kuan-uh ahihman-in Mongshu-ah suang haihna daalkuangvang, siiksem, temtawng, tupeek leh neektawm ding-in anguai alei zawhzah-uh peek-tawh pua-in khe-tawh Sailiong lam hong zuanto uh-a, Mongshu leh Sailiong kikaal-ah sumdonna tapong-gate mun 2 a-omlam theilo uhhi. Nitaak nai 6 pawl-a kuanto-uh ahihman-in nai 8 kiim-ah khua ziinglua leh alawmte zawm kisa ahihman-in mualzang khat-ah giak uhhi. Ngalkhuahaang gimnam leh husa kiza ahihman-in alawmte ihmu ngamlo-a, tua ciang-in tangvaal Zokhai-in, “Ihmu hiit-hiat vuau, keimah’n hongcing ning-ei” ci-in temtawng tawi-in tuto-a, alawmte khamuang-a a-itmut khit ciang-in amah-zong ihmu ziau-hi.

Ziingsang khuavaak maa nai 4 kiim-in dingkhia leuleu uh-a, asak diak-ah Shan tapong-gate tungto uhhi. Shan gaalkaapte-in “mi khat 90-lai dal 2-ta” acihleh apiak ding-uh om nawnlo-a, tangvaal Zokhai makaai-in pangpah-in, “sum nei-nawnlo, ka’ vante-uh na-deih bangbang la-un” acihleh gaalkaapte naak-hehlua ahihman-in Japan-paangbet ziahziah uhhi. Amah’n dawh ngiungeu-a, thusit leh bet athuaklo alawmte akhitui luangliang-hi. Atawpna-ah, “tapong na-za ngei-hiam? Laulo na-hihiam?” acih ciang-in, “tapong-pen minam itte cih za-ngei mah-ing, nong’ deih uhlehzong hongluut lelding hi’ng” acihleh Shanpau-tawh kiho ngeingai uh-a, tua ciang-in, “gaalkaap kisamkei laaitak-in, singtawn va-pua unla, tuateh hongpai saknu’ng” ci-hi. Alawmte’ lak-ah amoipen vanngak sak-in amau 3-in singluang zong uhhi. Kaampha mahmah-in anpheeng singluang akeu, gol mahmah, gik hetlo-khat pua-in aciahleh Shan gaalkaapte-in nasia salua-in, “Pai unla, sum neilo na-hih uhleh na’ temtawng 90-lai dal 4-tawh honglei ning-in, sak-ah Wa-gate omlaai ahihteh tua-ah pia un, Tedimte’ tem-pen hiam deuhse ahihteh,” ci-in temtawng 90-lai 1 bek-tawh alei-uh Shan Gaakkaapte-in 90-lai dal 4-tawh tatsak uhhi.

Hong paizom uh-a, khuavaaktel ciang-in Wa-gate tungto takpi-hi. Tua-ah Wa gaalkaapte nana khauhtuak zawlaai-a, Kawlpau-tawh kampheen nei sitset laai-hi. Aliangko-ah aksi adim liapluap puteek khat-in Seenpau-buang bangbuang-tawh hopih lualua-a, numeino khat-in kampheen-hi. Wa te-in mi-khat 90-lai dal 2-ta ala nana-hi sawnsawn ahihman-in tangvaal Zokhai sam uh-a, alawmte kongtual-ah dingsak uhhi. Kawlpau siam tumteenglo kawm-in athuumleh bet kician mahmah 3vei 4vei pia leuleu uhhi. Tua ciang-in avan sung-uh veelveel uh-a, tempi khat omlaai mu-in, “hih tempi honglei sak in. Tedim lamte’ temlei-pen siik-hoih hi tamtang-hi” ci leuleu-in, “na’ deih uhleh tang lel-un, hongpia ing” acih hang-in puteekpa-tawh amau’ pau-in kiho uh-a, tua ciang-in 90-lai dal-2 pia-thuah zawsop-in “pai unla, suang hoih lianpi na-muh uhleh Wa-te’ kiang-ah nana zuak un” ci-in paisak-hi. Sum neilo-a paito-pen Sailiong atun ma-in 90-lai dal 6 ngahthuah zawsop uhhi.

Sailiong atun-uh ciang-in leitang khawkno-khat lei pah-in buuk-khat lampah uh-a, tua buuk bulphuh-in suanghoihleineen (ျဗဳန္း) akiluak theihna-ah, va-hahkat saam taleh suanghoih tuaklo, lem theilo ahihman-in Wonkang-ah kituahphei uhhi. Tua laai-ah asanggamte khat’ thusiamna-tawh Aung Ice-cream Factory-ah naseem mawkmawk-in pang-hi. Sawtlo-in ice-cream bawlzia, ice-pole bawlzia-teng thei ahihman-in ice-cream siampi suak-hi. Sawtlo-in engine-zong leensiam ahihman-in tua factory-ah manager, accountant, engineer leh ice-maker thuah-in seem-hi. Khangno hi-in, sum naak luutlua ahihman leh a’pa-tawh kigamla ahihman-in singlaam-ganhing-4 akici kitah kimawlna nuamsa tak-in kimawl ziahziah-a, asum ngah masa bei masa-hi. Agenkiik ciang-in, “Sum nengcik peuh-tawh huaiham duhhop loh nading-in Pasian-in sum alomlom-in hong paaikhia sak liahliah-hi” ci-in Pasian’ tung-ah lungdam mahmah laai-hi. Pasian’ maai leh a’pa’ maai-ah “kitah kimawlna-tawh ka’ nuntaakna nawngkaai-sak loding” acih khitsa mahbang-in thusinna leh muhlehtuah cihciang-in ngaihsun-a, lungbuai ngaihsut vetlo-hi. Akiim apaam-a khuapih mipihte’ comment-pen, “numei kizuak hihzah-a ol, meelhoih theilaai, lawmpa-in kin hiaulo, zulah dawnlo, asumteng 4-kaunggin-ah apiak pahpah sang-in hihte su-ziahziah zawlehhoh agengending hizaw khading hiven” ciliang uhhi. Akimawl alelhkei naakleh thaa-puai akici suangzuakna muangzung-ah khutdawhngen tampite sum va-hawmsak zeel-hi, khutdawhngen mipoite-in thupha apiak ngaungau-uh za-nuam leh zaaknop sapenpen ci-hi.

Wonkang-ah khamtheih zatui-tawh asi honkhat lak-ah Zomite-zong tangvaal Zokhai’ khut sung-ah luang 3 kivuui-a, amahmah-in pheek, puanza leh singlaamteh nangawn bawl ziauziau-in lemsak meengmeeng-hi. Biakna Gai-paung-song acih minam kigawmkhopna ahzong Kawlla khawng phuakziau-in saziau-zeel ahihman-in Kachin te’ lak bang-ah gamta mahmah-hi. Kachin Baptist Biakinnpi akihon ciang-in lasa ding-in special-in kicial-a, ama’ phuakpak khat-tawh Pasian phat-hi. Pasian aphatna pan-in Pasian a-it mite-in citpiak tampi pia uhhi. Cane-ball (Chinlong) team phuan-in Kachin te-tawh ki-team-a, citpiak angahteng tua-ah kitah-uh ahihman-in beigai kiik-hi. Ahizong-in Kachin te’ itna, sanggam bawlna teng-tawh lungkim mahmah lel-hi. Tua hun-in Zomite-zong biakna kikhopna mun-nih nei-a, Canaan leh Mawngnuai hi-in tangvaal Zokhai-in kuamah langbawl lo-in anihtuak-ah kikhawm, lasa-in khangno hihna-tawh gualneek tak-in kihel-hi.

1994 June kha-a Kawlgam danh-10 laihuanna Radio-tawh aki taangko laaitak-in Kachin Defense Army uliante-tawh radio khat uum zihziah-in ama’ min leh tutphah malsiam genkhol-in ngaak uhhi. Radio-in, “ခုုံအမွတ္ ၅၆၊ တာန္ တြန္႔ ေဆာမ္း ခိုုင္” acih takteh awng ngeingai-in radio khaak uh-a, KDA ulianteng-in lopsak ziahziah uhhi. Tua-a kipan KDA, KIA, Khunsa te-in heel den-a, ahizong-in amah’n nial den-hi. A’ sumteng kitah kimawlna-ah abei denkeei hong sawtsim ciang-in Khunsa-ah luutding kamciam hong bawl-hi. Tua-thu atheih ciang-in asanggampa khat khua-ah ciah vingveng-in Zokhai’ pa leh sanggamte’ kiang-ah gen-hi. Yangon-a a’ upinu kiang-ah a’ upipa a-om laaitak ahihman-in amau kiho-in tangvaal Zokhai vala vingveng-hi. Tua hunleh Kalay College kahding hong kituak to-a, 1995 kum-in Kawlpi-ah zilsaang siamsinna hong zom-hi.

Kawlpi College: 1995 – 1996
College-ah hongtun ciang-in hostel saap-pen an-ngah 450-bek hi-a, saangkah mi ataangpi mi khat-in kha-khat atuul-sawmsawm-a abei ziahziah-pen tangvaal Zokhai-in kha-khat 450-vaal tampi zangh lo-hi. Zulehsa-tawh kisukha lo-in, zaila leh tumging lam-ah kipia-hi. Alawmte: Nga-pauh, Fetti, Ye-pih, One-planet te-tawh Shwe-Kha-Maut minpua-in teektang tualtang mahmah uhhi. Fresher Welcome leh Farewell te-ah teektang-in nuamsa mahmah uhhi. Tangvaal Zokhai-in Sai Thi Sai’ late bekbek-tawh mipi khimden ahihman-in “Ko Thi” min ngah-in, ama’ mintak athei om khollo-hi. Kawl nungaakte-tawh zawlthu hihello lawmta hihna-tawh kithuahzaw uh-a, Zomi leh Laimi nungaakte-tawh kithuah khollo uhhi. Azawnlam thei ahihman-in niik-hoih puanhoih lunggulh lo-in bawhlung-puan malsim 9 avom khat silh thapaai ahihman-in a-Kawl lawm numeite-in, “nangmahmah bawhlungpuan hau tak-ciai” cise uhhi. Seih-Kan-Tha veeng-a sanggam Zo nungaak khatbang-in kilawm salolua ahihman-in ama’ Jean Puantungsilh kawmh-in silhsak tantan lianghi. Khahpi’ pailet puanteen khat leh bawhlungpuan khat-tawh lem mahmah-a, sum beilo lua ahihman-in a’ upipa-in muangmawh-in azawlpa, aneulawm, asaangkahpih lawm En Piang (paisa) ama’ omzia en ding-in Aung Zeyar hostel-ah va-giaksak liang-hi.

Nopna cihpen hauhna ahihlohlam tangvaal Zokhai-in teci apanna khat-pen ama’ college life ahihi. Tutor leh Lecturer te nangawn-in it-in paakta mahmah uh-a, saangnaupang ahaute’ thuphabawl alim nonote Ko Thi tepawl-in ngahkha den-hi. Saangnaupang te-in Ko Thi acih-uh hang-in tutor te leh lecturer te-in “Taang Tun Sawm Khai” ci-in a-aw maan mahmah-tawh sam setset thei-hi. Hih-pen Pu Zokhai-in “namdangte-in I’ min hong lawh theihloh khaakding patauh kuul hetlo-hi, hong theih nading-in om peuhlehang hong tel-in hongsam siam mahmah lel-hi” ci-a ateci panna khat ahihi. Hunnuam-pen beibaih deuh-a, sawtlo-in Kawl leh Chin State saangnaupangte’ kaal buaina tuihual-in amaute’ paradise hong tuumcip ahihman-in 1996 kumbei lam-in saang hong kikhaak-hi. Hih tungtaang aneng-atawng-in ama’ laibu-ah kigelh-a, hihlaai-ah hongki hialbawl phot-hi.

Buaina nung-ah alawm-it khat-tawh Shan Gamseh, Thachilake-ah pai uh-a, sum thalawh kisin-hi. Ni-khat, a’ boss pa-in amau lawmta sumbawm mu-a a-iim daan-in ngawh ahihman-in naakpi kinialna nei uh-a, “na’ gilpi sung uh-ah siikling, thawlthem adim-in hongkoih thei-ing” acih ciang-in, “hongkoih lel-in, ka’lau peuhmah kei-uhhi, ko Pasian abia hi-ung, athumaan tintente hi-ung” ci-in dawnggiap uhhi. Aziingsang ciang-in anteh theipuan namkim taakzaupi khat dim-in a’ boss pa’ naseempa-in hongpuak-a, “Hihpen boss te’ ngeina-ah thuumna lianpen khat hi, hiah lai-ip khattuak, asung-ah baht 1000 tuak om-hi. A’ sumbawm atapa-in saang-ah ana pua-kha hi-in kisuang mahmah-a hongthuum ahihi” ci-in luui-hi. Tangvaal Zokhai te lawmta-in saang nuamlo uh-a, atawpna-ah, “Maaisak hi-ung, ahizong-in Zomite thumaan tiuteu ahihna thei un, sumtang ahihleh saangkei nu’ng, hih anteh theipuamte saang ung” ci-in anaseempa ciahsak uhhi. Tangvaal Zokhai-pen tuiphih lem salo ahihna leh music lam a-uukna ziak-in alawmpa-tawh kikhen-in Yangon-a a’ upinu kiang-ah ciahsuk-hi. Tua-ah One-Planet tawh kimu kiik-in, kizuui zeel uh-a, One-Planet’ ziakmah-in biakna pawlpi khat: Kawlpau bek-tawh piakbiakna pawlpi khat-a lalam-ah mapang-hi. 

Zoheisa leh ZRO: 1998 – 2001
Yangon-ah masuan kicianlian neilo kawm-in TDK La kidemna-ah minpia-in registration bawlna ciang-a lasakna va nei-a, late original key vive-tawh sa ahihman-in lapute-in thapia mahmah-in alawp mahmah laaitak Kawl Gamukte-in tua TDK La Kidemna-ah akihelding mi tamlua ahihman-in khaakcip ziau uh-a, lametbei suak leuleu-hi. Kawl TV-a Program lianpi-a aneih-uh Lasak Kidemna (ဆိုၾကမယ္ ေပ်ာ္ၾကမယ္)-ah ama’ phuahsa, amahmah-in guitar tum-a sakding minpia leuleu-a, lapute-in phuak-man, guitar tumman-tawh “mat tampi ngahzo” ci-in thapia mahmah ahihman-in alawp mahmah laaitak “minam thu” cihkhat Thachilake apaipih alawmpa’ tungpan-in natna kilawh vat-a, Yangon Khua laaizang-a Lampi 37 niangtuisai khat-ah minam’ ading hihzawhzah-a pangding cih kiciamna, khutme vut-in sisan luang sak-in Zoheisa Aksi tung-ah sisan gawmkhopna hongnei uhhi. Sawtlo-in Lamka lam-ah tualsung buaina asosaan-tawh kituak ahihman-in tua sisan gawmkhawm atamzaw paito pah-in ZRO-tawh khut kileenkhawm-in mapang uhhi.

Paltan kalsuanzia-tawh kalsuanding hita-uh ahihman-in political training azawh nung-ah paltan training nei-in, tua-a kipan Tg. Zokhai-in Mizoram State panla-in naseem-hi. Gaalkaap taktak-in kiseh ahihman-in zulehsa leh numei peuhmah-tawh aki-sukkhaak loh nading-in kikeem den-a, thungetna leh lungsim piakna-tawh Pasian phawk tawntung-hi. Pasian-in maaipha pia ahihman-in taangdung-ah amasuan vang hat-hat-a, kum 24 tangvaal khat ding-a akilawmlo lawhcinna lianpi ngah-hi. Thumaanna leh Itna bulphuh-in ZOMI bekmah phungvuh nading angiimna ahih-tawh kituak-in Mizoram State gamgi dung-a Minbung, Hiangmun (Hriangmun), Teikhang, Kawlbeem, Ngopa, Selaam, Vaaikhawtaang (tlang), Khuangphah, Hahlaan, Vapaal (par), Ngul (Ngur), Tonsim, Sesih, Leisanzo leh Aizawl teng-ah naakpi-in Zomi vaai upa kaaikhawm-a thugenna, thusunna, kikupna naakpi-in nei-hi. Ama’ cihtakna leh pumpi kikepna-tawh itna lakzo ahihman-in taangdung teng-ah mipi’ pahtaakna leh itna ngah-hi.

Atuntunna-ah, ataangpi Mizote’ political tuihual mah-in anawkgawp Zomite party ki-elna leh party buaina-in susia ahihna taangko khia-in party khempeuh phiat-a, party seal leh document khempeuh kaaikhawm-in Hiangmun-ah seng-hi. Mipi-pen Zomi min-tawh ding-ding, vote lawngkhat-a luangding, tua hileh Mizo Gamukte-in I’ deihte hongtah zawthamding, mipi naakpi-a phatuamding cihte-in mipi lawpsak mahmah-hi. Tua party aphiat te’ lak-ah Paite National Council-zong kihel ahihman-in Lamka pan-in ZRO Vice President, General Secretary leh Secretary of External Affairs teng-in Mizoram State bialsaipa zasak lo-in Teikhang-ah luutsim uh-a, PNC Seal athak liklek pua-in phutkiik uhhi. Tua uliante-in Mimbung-a a-om Tg. Zokhai sam uh-a, “Ngasa beng-ung, ne khawm-ni” ci-hi. Tg. Zokhai-in kamtaai Capt. kiang-ah, “Zokhai-in mehlim anlim lunggulh-a minam naseem hilo, mehpok bekzong lim salel, vaci-ou” ci-in nolh-hi. Nai 1 vaal khitteh kamtaaipa hong tungkiik-a, “Kam kumkhawm nuamhang” ci-in zol tantan ahihman-in, “akhentat khit-uh kupkhop ding omnawn diam-maw” ci kawm-in, zuui-hi. 

Ngalliam’ Luankhi:
Teikhang-ah ZRO gaalkaapmaang aseem ngei khinsa khat’ inn-ah uliante nih om-a, Vice President ahihleh ciahkiik khin-hi. GS –in thukong hong-a, thu honkhat agen khitteh, “…. Mizoram-ah PNC I’ kibukna ahihi, I’ umberella ahihi” acih ciang-in Tg. Zokhai akhitui luang-hi. Paite-ah kibu ding-a akuankhia ahihlohlam kithei-hi. Paite-ah kibuk genmalak-in Paite ahonkhia lak-ah akihel ahihlamzong kitel-hi. Zomi-ah Paite-a kipan namneu khempeuh agawm nuam-a akuankhia ahihlam kitel ahihman-in ngalliam kahpasiik lungtang kitam-in khitui taak kelhkelh-hi. A’ kawng-a thautom tung-ah akhut ngasuk kawm-in, minsial liang-in cillum-tawh ahehna valhsuk-hi. Ahizong-in tua phawkna-in lampi adang zon nading khaici khat hong suak-hi.

Tonsim Thonginn Sung-ah: 2000 February – June 26
Zomi sumsinte Mizote’ khut-ah aheek theiden Tonsim-a ateeng Ngaizawl khuasuak mi khat-pen Zomi kamkum khopna-ah hong kihel nuamlo ahihman-in Tg. Zokhai’ gaalkaapte nih-in sam uh-a, tua mipa-in heipi-tawh adelh ciang-in Tg. Zokhai-in aheipi suui khia-in lei-ah asukpaai ciang-in heh mahmah-in, a-upa-in Mizo palikte’ kiang-ah heek-hi. Mizo palikte-in thupilaak mahmah ahihman-in Mizo Arm Police Battalion khat – Lory 4, Wagon Sumo 6 –tawh palik mimal honpi-in Tonsim, Bethel Kawn nuai kuamteng 2000 February 15 nitaak nai 6:15 hun-in uumcih zihziah-in Tg. Zokhai man uhhi. Ama’ gaalkaap 4-tawh kiman uh-a, Mizo palikte-in alutang mahmah naakpi-in tupsak uhhi. Tg. Zokhai-in paulo haamlo-in dawh hiit-hiat-a, Tonsim palik lianpen Superintendant Amon-in, “anuam-em?” ci-in nuhnau-hi. Tg. Zokhai-in, “Nuam-e” acih ciang-in heh seemseem uh-a, naakvuak seemseem uhhi. Akhut-uh dulhmang-in sisan luang-a, Tg. Zokhai ahihleh Pasian-in thahaatna guan ahihman-in sa-pimpem cihciang thuak-hi. 

Palikte-in avuak-uh agim takciang-in thudotna pawlkhat nei-a, aw liinglo, lunglau hetlo tak-in dawng setset ahihman-in palikte-in “Zokhaia’n laulohna damdawi ne hi’nteh” cise uhhi. Zun leh eek-tawh kidiah “lock up” acihna uh-ah Tg. Zokhai leh a’gaalkaapteng khum uh-a, “Pu Zoramthanga leh Pu Tawnhluia te phone-tawh hong hopih sak un” acih ciang-in zahko-in awlmawh lo-hi. Tua-ma kaalkhat laai-in Mizoram Gamukte’ CM Chamber-ah Pu F. Aithanga: Advisor to CM –tawh kamkum khawm khinsa ahih-tawh kilehbulh ahihman-in naakpi-in thangpaai-a anngolh lungphona kipan-hi. Ni 3 khit ciang-in Mizo palikte-in “asi zong-in poilo” ci-in nuhnau gawp ahihman-in Tonsim-a zinpipa hopih-in besan leh ankam huankhop vaaikha-in anne kiik-hi, banghanghiam cihleh Mizo palikte-in ‘si’ leh uut zawlaai mahmah lelding, Pu Tun Khaw Pum-zong an-ngolh kawmkawm-a akaaplup-uh cihthu-in piangthak sak-hi.

Lock up sung-ah ani 4-na ciang-in Mizoram-a palik lianpi Dierctor General H. Tumsanga Aizawl pan-in kuansuk-in Tg. Zokhai leh a’ gaalkaapte thudotna nei-hi. Mizotong siamlo leh pau nuamlo ahihman-in a’ gaalkaap khat-in kampheen-in Tumsanga-tawh kiho uhhi. “Nang lautuak hetlo, khantawn thonginn hong khumthei-ing, banghang’n laulo na-hihiam?” acih ciang-in, “Mizote’ tung-ah khutkhialhna, lungsim kampau nangawn-a khialhna neilo kahihman-in lau nading ka-thei kei-hi” ci-hi. H. Tumsanga-in, “Tapong hi-a, banghang-a khial kisalo?” acih ciang-in Tg. Zokhai-in, “Nungkaal mah-in Pu F. Aithanga-tawh kamkum khawm-ung, Pu Thangliana- Ex-MNF President zongtawh ankuang uumkhawm-ung. Tapong kahih-uh hang-in India gam lam-a mite nawngkaai saklo, thamlo-in Mizote-in nong’ panpih ding-uh akisam ahihi. MNF laai-in MNF gaaltaai honkhat ka’ pute-in huh-in hum-hi. Kawlgam-a Zogam leitang kankiikna vaai-ah Mizote-zong piicing lungsim aneihleh hong panpih ding-uh thumaan ahihi”, acih ciang-in H. Tumsanga-in kuun ngeuhngeuh kawm-in agei-a aliing kauhkauh Amon’ kiang-ah, “no abanghang-a Pu Zokhai te man?” ci-phei giap-hi. Amon-in awliing gulhgulh-in, “amau hongpai, Champhai khua hong subuai,…” acih lianleh Tg. Zokhai-in, “Champhai peuhmah subuai lo, …” ci-in dawng-hi. H. Tumsanga-in akhut-tawh ‘telsiam-ing’ cihna lim lak-a, tua ciang-in ahunlap-a khahding avaaikhaak khitteh a’ bodyguard te-tawh ciahkiik uhhi.

Atungsiahte-in khahding cinapi banghang-in Champhai Superintendant Police Amon leh DC Rialchoa te-in Tg. Zokhai te lawmtateng khah nuamlo-hiam cihleh amau-pen CNA damiahte-in Zomite’ tung pan-a asuh-uh sumlehpaaite-tawh amaai-et denkeeite hi-a, ui-khawng go khawm-in zu-khawng akhamkhawm zeelte ahihman ahihi. Khahlo thamlo-in tonsim thonginn puaksuk uh-a, tua laai-ah 2000 April 4 ni-dong khum uhhi. April 4-ni ciang-in Aizawl pan-in Ex-MNF upate kuansuk-in va-lakhia uh-a, tualaai-ah Pu Dingliana – Ex-MNF Thukan Ulianpi., Pu Lal Muanpuia – India Suahlam Saangnaupang GS., Tonsim YMA makaaite leh Zomi Siamsinte-in ui gawh-in muakna nei uhhi (genlehsakte aneng-atawng-in ama’ gelh laibu sung-ah).

Tg. Zokhai akikhahkhiat phet-in, Assam Rifle Commender Capt. Niraj-in muak pah-a, April 5 zaankim 12 hun-in Ngul Khua-ah holimna leh thukimna abawl-uh Mizote-in atheih ciang-in April 7 ni-in mankiik leuleu-hi. Matkiik hun ciang-in vuakna saatna omsak nawnlo uh-a, thongsung deenna-pah uhhi. June 26 ni ciang-in Lia Vanlalveni-in va-lakhia leuleu-hi. Hih liapaal-pen Tg. Zokhai’ lawmpa khat-in Aizawl pan-in akimuhpih hi-a, Zomite dongtuak, mattuak tampite ahonkhia pahpah minam vei-mahmah numei thupi khat hi-in, thongpute inzong azahtaak mahmah khat ahihi. Aizawl atun-uh ciang-in Headquarter pan-in Lamka paiding thupiakna dungzuui-in Lamka zuankiik uhhi.

Lamka – Takvom - Aizawl: 2000 – 2001 
Lamka atunkiik ciang-in Phualpi’ vaaihawmna-tawh gaalkaap tungtuang siamsinna kipan ding-in Lamka pan-in Takvom Khua zuan-in Saktiman mawtaw golpi-tawh kuankhia uhhi. Pu Zokhup (WZC)-a kipan ulianpite nihleh-thum leh gaalkaap ulian vive 12 dingkhia uh-a, mawtaw tung-ah Takvomte nupi naupaai khat leh piteek khat tuang-hi. Takvom Khua tun dektakna keenpi atun-uh ciang-in mawtaw kibung-hi. Keen lak-ah kiasuk uh-a, Takvom nupi nihte ahihleh lampi kiil-ah ding litlet uhhi. Tg. Zokhai-in lamdang sa-in, “no adiangkhia maw?” ci-in adot ciang-in, “ahici-a omziau, ko bangmah thei hetlo” ci uhhi. Tg. Zokhai’ pulaakna-ah, “Vaanmite-in domkhia ziau hiding-hi” ci-hi. Mawtaw hawlpa, Trainer Pa Gen, Commander-in-Chief Pu VK Paupi, Home Miniter Pu Zokhup, Tg. Ai Pau, Tg, Tungpi cihteng liam uh-a, Home Ministry- Director Tg. Zokhai leh gaalkaap dangteng liam lo-uhhi. Tua pan-in Lamka zuankiik uh-a, Tg. Zokhai ahihleh Lamka-ah tawmvei om-in, asawtlo-in Aizawl kuankiik-hi (aneng-atawng-in azaaknop mahmah honkhat ama’ gelh laibu sung-ah om-a, 2001 February 23 ni Aizawl pan-in Yangon apaisukna lamkaal thupiangte., ama’ Ngaihno-tawh kimuh kiikna cihte-zong kigelh diudeu-hi).
Pu Zokhup tawh kum tampi zawh ciang akimuh kikna. 2015

Malaysia: 2001 – 2007
Hih hun sungteng English-tawh agelh “Three Years in Malaysia” laibu sung-ah kicing tak-in om-a, ama’ laibu “Ziing Ka’ Zinna” sung-ahzong Zolai-in gelh-hi. Taangthupi khat suak ahihman-in hih mun-ah hongki guang nawnlo-hi. Atom-a theihding-in: ZAM hong pankhia-a, gilkial dangtaak, gimlehtawl-zong phawklo liang-in Zomite panpih-hi. Adiak-in UNHCR alunggulh mite aki-tuahpih peuhpeuh huh-a, Zomi dammawhte, Zomi naupaai nupite naakpi-in huh-hi. Ciamnuih cihtak-a agenzeel khat-pen, Malayo Nurse te-in, “Zokhai, zii haupa,” cih ahihi. Nupi gaaite zato-ah paipihden ahihman-in “na’ zii –hiam?” cih dotna “Himah”-tawh adawn keileh lemlo himawk ahihman-in “zii haupa” minlehza ngah-hi. A’ laibu sung-ah aneng-atawng-in kiciamteh-hi.

Australia: 2007 – Tuciang
Australia-ah 2007 – Ngaihno’ Suunni: Feb 14 Nikaai nai 2 hun-in Brisbane Vaanleengtual tu-a, nitaak nai 4-in Melbourne leengphei leuleu-in Malaysia a-om laai-a alawmpa te’ inn-ah kha 2 sungkhawng om-hi. 2007 April 1 ni-in Australia-a Zomi upa khempeuh’ thukimpihna-tawh ZAA hong phutkhia-a, Secretary seem-in, zumkong mangkong phu-a, Khuado, Pawlzu/Sialsawm cihte Australian te’ lak-ah akilat nading-in gamukte’ tung-ah lawmhsum ngen-in ngah toto ahihman-in Khuado, Pawlzu/Sialsawmte nopci tak-in bawlpih den, gamuk ulianpite, councilor-a kipan ulian tuamtuamte sam-in Zomite’ Ngeina Cialpite hong-uap uhhi. Tua bang-in 2011 kum ciangdong seemto kawm-in Bachelor of Social Science (BSS - Sociology) sin-a, 2012 April 12 ni-in lukhuneelkaai khu-hi. BSS khit ciang-in kum khat sung tawlnga-a, 2013 kum-a kipan Melbourne University-ah Master of Social Work sinzom-hi.
Lalam leh Neelzuunsiamzil (Music and Art)

Pu Zokhai’ pianna Rev Neng Khua Vungh-pen Pasian’ naseem ahih-tawh kiton-in tua hunlaai-a Siapi Vungh Cin Thang-in citpiak-a apiak guitar anei masa hi-a, “music-in khangnote zo-hi” cih mu ahihman-in amau’ inn-ah guitar khat leh nih kilawi ngeilo-hi. Pu Zokhai-in aneulaai-a kipan-in guitar khoih zeel-a, ahizong-in akician sinsen-a ahilhding mi neilo ahihman-in ama’ zontawm guitar siamna nei-hi. Lasak uuk mahmah-a, naupangno ahihlaai nangawn-in asanggamnu’ pattahna-tawh ZBC Labu sung-a late maantak-in sasiam-hi. College kum 2 asin khitnung ciang-in tua uukna khempeuh heemkhia-in minam’ ading mapanna-ah apan man-in a’talent te akiseecip bang-in kilangh lo-hi. Nunna Khualzinna lam haksateng akhit nung, Australia atun khit ciang-in ama’ uukna leh kivakna lasak ahithei bang-in hunngah zil-in hongzom zeuhzeuh-a, ZBC Labu sung-a late ama’ library-ah akhum ziau-pen lawm leh gual nih leh thum’ thapiakna-tawh ZBC Phatna Late: Zokhai Quartet ci-in hawmkhia-a, Australia-ah ahihleh ZBC La Neemnote: Zokhai Quartet-zong hawmkhia-hi. Sum apialo tamzaw-a, Pasian’ nasepna khat-in seh ahihman-in phamawh salo-hi.

2015 August sung-in Zomi Zogam Digital Zaila ci-in cd bawl-a, minam leh gamlei-tawh kisai ama’ phuak vive dawng 12 guang-in, Lazy Club makaai Pu Cinpi leh ama’ teeltuam tumsiamte-in tumging tum-in, Audiovisual Diploma zo khinsa Pa Pau Daalkhek leh Australian engineer te-tawh worldclass tumging hong hawmkhia-hi. Zomi Zogam 2 (minam leh gamlei-tawh kisai la bekbek) ahizong-in Tuun leh Zua (Nulehpa itna, nulehpate’ hong itna la bekbek) ahizong-in, ZEISU Ka’ Bangkim (Phatna, kipiakna leh thungetna la bekbek) ahizong-in azomzom-in geelna nei-hi.

Kawlgam leh Vaaigam gamgii dung teng-a muhlehtuah aneng-atawng., 2001 kum sung Kawlgam-a muhlehtuah., Malaysia-a muhlehtuah aneng-atawng cihte khempeuh ama’ laibu “Ziing Ka’ Zinna” sung-ah kicing tak-in om-a, 2016 kum-a hawmkhiat ding-in geelna nei-hi. 

Hih thute khempeuh ama’ phalna-tawh hongki suahkhia ahihi. Laisim khempeuh-in minam itna khaici posak henla, paak sak-in gah sakding ama’ lunggulhpen khat ahihi.

***************************************************************

Theihding : Pu Zokhai tung ah' ka ngetna tungtawn in itsiik lo tak in, i website ading in phalna hong piak ahi hi. I biak Pasian in hong zatsak semsem ta hen.
Alungdam : Cinpu Zomi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Gam leh Minam ading in nasem Pu Zokhai’ Taangthu Tomno Description: Rating: 5 Reviewed By: Cinpu Zomi
Scroll to Top