728x90 AdSpace

Hot
Menu
Zon-ol na Donate

Latest News

ZCD Candidate Pu Khup San Thang Tangthu atom in.

Zomi Congress for Democracy  

November 8, Meepiak Ni

“Ka nu, ka pa, ka sanggam laizom te aw, hong tung ding 2015 kiteelpi ah Pyine hluttaw, Khalkha meesandahne (2) ah meekuang ka lui ding hi. 

Khalkha pen ka pianna ka pa’n 1962 kum in gam-uk theihna ‘aana’ mipi tung pan ala ziau U Ne Win galkap pawl kiang pan i Zogam lak kik zawhna ding hanciamna hang in sisan naisan tampi aluanna khua bah ah, tua hang in thong kum 7 kiat lawh in a sangkah a tan 8 laisim kimlai din khol hi. Tua ahi man in, Khalkha pen kei a ding in thupi in manpha hi. Hih khua pan mipi phattuam na ding atang zai in septheihna ‘politics’ ka ki pan nuam se se hi. 

Khemna leh ngongtatna tawh hong ki uk-cipna hang in i gam i lei ah ki khuasa zo/ ngam nawn lo bektham lo in, i Zomi nam sung mah mah ah zong nam 53, nam 110 cih bang in hong khentam lai lai in hong sunawi khia pha mah mah uhi. I lungsim i kigawm kik ding lau mah mah uhi. Tua thamlo in azawng pen gam leh minam i hi-sawn sawn lai hi. Gam ki-uk dan ahoih loh man leh hong ki gakcip luat man hi. Gam leh minam khantoh theinna ding in ZNC/ ZCD in Federal leh Democracy ci-in thong kiat lawh suplawh bailawh in mipi ading nading tinten tawn tung hi.


Tun ahi leh ahi-ciang khat gamtat luhek theihna hun ki hong dan hi. Tua ahi man-in ka lunggulh mah mah ka sepnopte anuai-a bang-in hong gual ing:-

1. Pyine hluttaw i thuneihnate, thukikupte leh thukhensat-te ahun hun in mipi ko ‘report’ pah pah ding.Gentehna, budget bangzah nei, koi mun ah bangvai in bangzah ki geel, ki zang ding cihdante,
2. Mipi kisapnate ahun lap-in hluttaw ah khauhtak-in thusung in, hluttaw pualam pan zong ahun lap in vanzawh na ding lampi hanciamtak-in zong ding,
3. Hluttaw ah thu ‘bill’ kikupte mipi phattuamna ding ahi leh bek kuppih ding mee ‘vote- yes’ pia ding. Mipi agakcip ding thu ‘bill’ peuh mah kankuat ‘vote-no’ ding, 
4. Tu laitak a i dongtuahnate aban ban in akisam masa sa vanzawhna ding in state budget ban ah kipawlna tuam tuam pan huhna zong in aman lang pen in vaihawm ding, leh
5. Federal diktak leh democracy diktak ngah nading hanciam ding.

Hih teng i septheih na ding mee ‘vote’ hong pia un.”

Khup San Thang
Zomi Congress for Democracy
Mobile: 09 250 092 309
Email: ksanthang@gmail.com
No. 62 Thazin 1 (A), Myopat Street,
Kalaymyo, Sagaing Region

Zomi Congress for Democracy ZCD 
Thu atom in ciaptehna
1988 kum October 24 ni-in Zomi National Congress ZNC kipsakna lai Election Commission in pia hi. 1990 kiteelpi ah ZNC in mun 4 meekuang luina lak pan mun 2 zo hi. 

1989 kum in minam party 21 teng kipawlna ‘United Nationalities League for Democracy UNLD’ ki phuatna ah ZNC in presidium board member vaipuak la hi. 1990 kum August 29 ni-in UNLD leh National League for Democracy NLD in taangkona ‘Bo Aung Kyaw Road Declaration’ khat nei uhi. Tua sung ah hluttaw kha 1 sung in sap ding, 1990 kiteelpi azote pom ding leh pawl-thum kamkum ding cih thute khauhtakin pulaak ahi man in gam-uk theihna ala galkap pawl ‘State Law and Order Restoration Council SLORC’ lau-in linglawng pha mahmah uhi.

Galkap pawl ‘SLORC’ in 1990 kiteelpi a zote gam-uk theihna ap kik ding a kamciam uh palsat ban ah National League for Democracy NLD leh Shan Nationalities League for Democracy SNLD lo-buang 1992 kum in minam party khem peuh phiat ‘disband’ gipgiap uhi. Tua kum 1992 a kipan politics a semte bek tham lo tua a semte tawh kikholh pen khe langkhat thong sung atung khin tawh kibang in nuntakna mahmah zong lauhuai khia mahmah hi.

1995 kum in Daw Aung San Suu Kyi aki kepna pan ong suahtak ciang ZNC makaite va lengla pah hi. Tua kum mah in ama inn ah a kibawl Independence Day leh Union Day ah ZNC va ki hel hi.

1998 kum Fulai Hotel, Yangon ah ZNC in Daw Aung San Suu Kyi leh minam party tuamtuam makaite tawh Zomi Nam Ni (Golden Jubilee) bawl khawm thei hi. Tua Zomi Nam Ni bawlna hang-in Fulai Hotel ki khakcip sak cih ki nung zak hi.

1998 kum September 16 ni-in Zomi National Congress ZNC, Shan Nationalities League for Democracy SNLD, Arakan League for Democracy ALD, Mon National Democratic Front MNDF leh National League for Democracy NLD in kipawlna ‘Committee Representing People’s Parliament CRPP’ khat phuan khia uhi. CRPP in minam kilem-kik-theihna ding in hluttaw sap ding, 1990 kiteelna azote pom ding leh pawl-thum kamkum ding thu meilet ahi man-in gam-ukna ala galkap pawl ‘State Peace and Development Council SPDC’ lauthawng in  kum 3 (2006-2001) sung M.I (9) ah Pu Chin Sian Thang, Naing Htun Thien leh Saw Mara Aung kem uhi.

2001 kum May kha in minam party 11 kipawlna ‘United Nationalities Alliance UNA’ ki phautna sung ah ZNC bul phadiak in pawl-thum kamkum ding mah thu meilet hi. Pawl-thum kamkumna sung ah galkap pawl, NLD leh adang democracy mapang pawl, leh 1990 kiteelna alut minam party pawl leh minam hiamtawi pawl a ki hel ding hi.

Federal leh democracy gimnam lo thukhunpi ‘2008 constitution’ kipsak na-ding mipi ngaihsutna ‘referendum’ lakna ah mee khialo ‘no vote’ ban ah 2010 kiteelpi zong ZNC lutlo hi.

Gam ki-uk dan federal leh democracy asuah zawh na ding hanciamna hang in ZNC maikaite kol bulh khau khih thuak-in thong zong tam veipi kiat lawh uhi.

Kiteelna vaisai ‘Union Election Commission UEC’ in kiteelna thukhun ‘election law’ a gakcip pawlkhat kolsak zaw deih ahi-man leh Party matpongtin ‘register’ kei leng gam sung ah politics sepna ki nawngkai sak ahi man in UNA sung-a party teng in matpongtin kik ding thukim tek na tawh ZNC in zong 2012 kum February 28 ni-in matpongtin kik hi.

Kawlgam ah Zomi om lo ci-in UEC in ZNC matpongtin kik sang pak lo hi. Laibu tuam tuam pan Zomi thu aki-gelhte etkak ‘reference’ in laigelh kik ciang, Zomi ongsang pan hi. Hun gilo khangkhat sung bang ZNC in aphual, Kawlgam sung, pan gam ki-uk dan federal leh democracy ahih theih na-ding thaulawng mai ah hangsan tak-in leitungbup theih ding in taangko den ahih man-in, ZNC min nungta kik leh gam sung ‘Zogam’ gam pua ‘Kawlgam leh Leitungbup’ a Zomi buppi ‘Chin akicite zong’ tui bang in luang khawm in lawngkhat in ong ging ding a launa hang in Party min ding in Zomi Congress for Democracy ZCD kipsakna lai UEC in 2012 kum August 17 ni-in pia pan hi.

ZCD in ZNC policyte mah lencip hi.


Khang Kizom in Gam leh Minam ading Mapanna
Pu Kai Tuah khang pan Pu Khup San Thang khang dong
Pu Kai Tuah
Pu Kai Tuah pen 1835 kum in Mualbeem khua ah Pu Tuang Khual leh Pi Nem Niang sung pan suak hi. Unau pasal 5 leh numei 4 pha uhi. 

Saizang khua mite in Hausa dingin Mualbeem Ukpi Pu Khan Thuam khiang ah atapa Pu Gawh Pau na ngen uhi. Pu Gawh Pau in amimuan Pu Tuang Khual na tonpih hi.

Saizang khua ah Pu Kai Tuah hong khan ciang in galman saman in hong minthang in la na phuak hi.

a. Ka pianna beemtui aw e, ka khanna saitui aw e,
b. Tangbang khanpih saikiim ka gual, ka tung a tuang om lo ee.

1967 kum in Pu Gawh Pau tapa Pu Thuam Thawng leh Pu Tuang Khual tapa Pu Kai Tuah te makai in Kaptel khua nasat uh hi. 

Zogam ah 1888 pan 1894 kum dong gamkek England te tawh kidona om hi. 1891 kum June 23 ni-in Thuamvum (Thuamvum, Thangmual) ah Zogam Ukpite Mikang Capt. Rose tawh sial khat go in kilemna thuciam na bawl uhi. Tua zawh asawt lo-in England Kumpi in Thangmual thukimna tawh a kituak lo ahi, sial, thaulawng, phiangsiah tuam tuam piak ding hong ngen kik uh hi.

Tua ciang in Pu Thuam Thawng (Kaptel Ukpi), Pu Khan Hau (Heilei Ukpi), Pu Khai Kam leh Pu Kai Tuah te makai in ciampel England Kumpi te Zogam pan hawlkhak kik ding ong vaihawm uhi. 1892 kum October 9 ni-in Myo-Uk pa leh Galkap 30 val na suam uhi. Tua suamna pen Myo-Uk suamna ahk Mangvum suamna ci-in minthang hi. Galki do ma in thuciamna khat na bawl uh a, Pu Pau Dal min ding in mihing sagih in Myo-uk pa kap masa ding. Tua khit ciang avekpi un a namsau uh dok in galteng thatmai mang ding, kua mah ki tai san lo ding cih thuciam na bawl uhi. Tua thuciamna tawh ki zui in Pu Kai Tuah leh alawm 6 in Myo-Uk pa kap hi. A kapkhit phet in Pu Kai Tuah in a thau singphung ah nusia in a namsau dok khia a galte phual lak ah valut in gal nih na man beh zolai ahi man in la na phuak hi.
a. Lei do khuai bang hang lawm lawm ee, ka gial man in, katawi lentual ah khiang ee,
b. Tun aw suihlung na zuang lo aw, namtem katawi kathah lenmual ah sua’ng ee.

Galzo a hong ciah Pu Kai Tuah te pawl pen Saizang Innpi ten vok tuk (4) tawh lawm na ompih in zan thapai na lamgui uhi. Pu Kai Tuah in England te hong pai kik ding theikhol ahih man in:-
a. Lia leh tang tam bang kitawi aw, nun-nop tomkal khat hi ee,
b. Nun-nop tomkal khat aw ee, huih khidam lan kal hi ee, 
ci-in la na phuak hi.

1893 kum ciangin England te Zogam ah ong kuan kik in April kha sungin Pu Thuam Thawng, Pu Pau Dal leh Pu Kai Tuah te aban ban in amun mun pan hong man uh hi. Indian Penal Code Section (302) tawh mawh zong in Kindat thong hong puak uhi. Pu Thuam Thawng (1947 kum Pinlong Agreement a sign thuhpa Pu Thawng Za Khup pen Pu Thuam Thawng mintam hi.) tapa Pu Pau Dal pen 1894 kum January kha in thong sung pan hong nusiat ciangin Pu Kai Tuah in a it man in Pu Pau Dal luang kumpite tung ngen in aphei tung ah sial a i Zongeina bang in asam hiat sak kawmin la na phuak hi.
a. Besam phungpha zun mawh tawh, phualngo no aw kawltui ah thel bang kia ding nalawm lo ee,
b. Tun zu’n paallai huihkhi sem a, heu aw, phualngo dingdiang melmaak a, vai tham aw ee.

Pu Thuam Thawng te pata in hong nusiat ciang in kumpite in cidamna tawh ki tuak lo ci-in, Pu Kai Tuah pen Kindat thong pan Myanyan thong ah 1894 kum in na puak uh hi. 1899 kum ciang thong sung pan cidam in Kaptel khua hong ciah kik hi. Gam leh minam itna hang in thong kum 6 vival na kia hi.

Pu Kai Tuah makai in 1906 kum in Kaptel khua pan Zampi khua nasat hi. Zampi khua ah zong i Zongeina bang in sialkop go in hong tong hi.
a. Teltui ka vangkhua aw ee, sang leh langmual kasuahna aw ee,
b. Zamtui ka vangkhua aw e, tonzawi hanzawi ka kaihna aw ee.

Pu Kai Tuah pen Zampi khua ah 1926 December kha in teknatna tawh hong nusia hi. Kha 3 sung aluang ki kawih in, 1927 kum Feb 27 ni-in Zongeina tawh kigui hi.

Pu Kai Tuah leh Pi Ot Khoi Tate
(1) Pi Niang Don + Pu Kham Suan, 
(2) Pi Ciang Ngak, 
(3) Pi Khoi + Pu Kai Khai, 
(4) Pi Kam Naing + Pu Uap Thang, 
(5) Pi Khual Vei Thang + Pu Dong Vung, 
(6) Pu Khual Khen + Pi Nok Diah, 
(7) Pi Don Cing + Pu Thawng Khawm, 
(8) Pu Song Suan + Pi Neam Kho Zen, 
(9) Pi Khai Ning + Pu Vung Suan

Pu Kai Tuah leh Pi Hang Men Tate (Pi Ot Khoi in hong nusiat khin ciang)
(10) Pi Don Kho Ning + Pu Nok Cin Pau,
(11) Pi Ngaik Kho Cing + Pu Hau Vung, 
(12) Pi Cinn Kho Ning + Pu Tun Kho En, 
(13) Pi Gin Luan + Pu On Za Kham, 
(14) Pu Khual Khan Thang + Pi Niang Khan Ciin 

Galpi khatna 1917 kum Zogam pan Piantit (France) a-pai Indian Labour Corp No.62 Group ah Pu Khual Khen Zong na pai hi. Galpi nihna Japan gal (1944) hun in England Kumpi in Pu Khual Khen pen kha 6 sung Locked up in na kem hi.

Pu Khual Khen leh Pi Nok DiahTate

(1) Pi Khoi Khua Thang + Pu Vungh Za Nang, 
(2) Pi Giak Vung + Pu Cin Khual, 
(3) Pu Tuah Za Lian + Pi Ning Khaw Zam, 
(4) Pu Tun Do Khup + Pi Ning Sial Cing 

1962 kum March 2 ni-ni U Ne Win in gam uk-theinna ‘aana’ hong lak ciangin Zogam ah Thual Zen Gal akici ‘Anti Communist People Freedom Organization’ hun in PuTuah Za Lian pen tua kipawlna sung ah gam makai ‘political leader’ lam ah kihel ahih man in Kumpi in kum 3 sung hong kep sak hi.

Pu Tuah Za Lian leh Pi Ning Khua ZamTate

(1) Lia Diah Luan Cing, 
(2) Taang Khen Za Cin, 
(3) Taang Vung Sian Lian, 
(4) Lia Cing Gin Don, 
(5) Lia Thang Nuam Maan, 
(6) Lia Cing Khan Huai

Pu Song Suan leh Pi Neam Kho ZenTate

1. Pu Tuah Cin Kap + Pi Tel Khen Cing 

Pu Tuah Cin Kap leh Pi Tel Khen Cing Tate 

(1) Pa Suan Do Nang + NuThang Suan Niang, 
(2) Nu Zen Za Niang + Pa Suan Kho En, 
(3) Pa Hang Go Thang + Nu Cing Sian Piang, 
(4) Pa Lian Khan Pau + Nu Cing Lam Maan,
(5) Pa Lian Sian Suang + Nu Ning Do Cing 

Pu Tuah Cin Kap leh Pi Dim Ngaih Don Tate (Pi Tel Khen Cing hong nusiat khit ciang)

(6) Pa Suan Khan Mang + Nu Luun Pum, 
(7) Nu Awi Do Cing + Pa Song Go Lian, 
(8) Nu Vung Ho Nuam + Pa Thang Khan Pau 

Pa Suan Do Nang pen gam leh minam a it man in Thual Zen Gal hun mah in luang kham in sem aa, 1965 kum Feb 17 ni-in Rih kikapna leh 1965 kum March 5 ni-in (5:45 A.M) Hakha kikapna pan thautang in a khe kha ahih man-in a ki kholhpih Pu Rang Nol (Minister Pu Rang Nol) suahtak theih na ding in amah kumpi tung ah ki ap hi. Myinyin thong sungah kum (7) sung kia hi. ZNC ki phuah a kipan hong nusiat 2004 kum January 1 ni ciang dong ZNC ah khauhtak in mapang makai khat hi.

o Pa Suan Do Nang leh Nu Thang Suan NiangTate

(1) Lia Cing Za Khawm (Emmanuel) 
(2) Taang Kap Khan Khual (Anthony) 
(3) TaangThang Lian Tuang (Gabriel) 
(4) Taang Khup San Thang (Michael)

Anthony Taang Kap Khan Khual pen leitungbup theihpih ahi Kawlgam bup a lungphona ‘2007 Saffron Revolution’ hang in kum 8 thong ki khia in kum 5 sung bang Insein thong leh Pathein thong ah 2007 kum pan 2012 kum dong kia hi. 2012 kum June 19 ni-in NLD Headquarters ah Unknown Hero Award Committee in Unknown Hero Award pia hi. Unknown Hero Award pen gam tuam tuam atung Kawlgammite tawh aki phuan hi in Unknwon Hero Award Committee pen Japan gam ah om hi. 

Taang Khup San Thang
Taang Khup San Thang (San Thang) pen Pasian thu a-um mahmah Catholic thuzui mi Charles Pa Suan Do Nang leh Anna Nu Thang Suan Niang sung pan 1987 kum September 15 ni-in Kalaymyo ah suak hi. A Nu leh Pa pen adiak in Tonu Maria amuang mahmah ahi mah bang un, Chindwin gun tungsiah ‘Upper Chindwin’ mun teng ah Tonu thu athang sak leh Khi Thunget Dan ‘How to say a Rosary’ ahilh masate lak ah akihel uh ahi hi. San Thang pen Kalaymyo ah a u nau sanggamte tawh teng hi.

Pilsinna
2006-2014, BA (Philosophy) Degree, Kalay University
2006- 2009, General English Course, Capacity Building Program, Certificates, British Council, Yangon
Feb 24-28, 2014, Democracy, Governance, Party Building, Certificate, Sandhi Institute, Yangon
April 5- July 20, 2012, Development Studies Course, Social Science Course, Certificates, Myanmar Minerva Education Center, Yangon
December 4-14, 2012, Peace and Open Society Course, Certificate, 88 Generation (Peace & Open Society), Yangon
September 2013, Peace and Conflict Resolution, ‘Be Agent of Regional Change for Peace’, Certificate, Mekhong Peace Journey, Yangon
Conference Kahna
May 27-27, 2013,Youth and Politics, Konrad Adeneur Siftung, Singapore
November 9-11, 2013, Youth for Decentralization, Naypyitaw

Biakna pawlpi lam mapanna
2005-2006, President, University Catholic Association- Catholic University’s Students Association
2001-2012, Youth Catechist, St. Peter & Paul Church, St. Peter & Paul Parish, Kalaymyo

Politics lam mapannna
2007-2008 kum sung in ZNC min tawh British Council, Yangon ah sangkah khangno pawl khat tawh Zomi khangnote leh Zogam khantoh theihna ding ngimna tawh Chin Conversation Club phuan uh in, tua kipawlna ah Secretary sem hi. Amin ding pen Hornbill Conversation Club ahi-kei-leh Zomi Conversation Club cih ding hoih asak hang, amah losiah alawm dang teng in Chin Conversation Club mah cih ding hoihsa ahi-man-in atam zaw deihna ‘democracy’ na zui hi. Kum khat khong bek mah van pih zo in, ki hel zo hi.
2013 kum January kha in ZCD zum Kalay leh Tedim ah hon kik sung in mapang mahmah hi.
2014 Census a 914 code ah Zomi gelh ding ci-in akhua khua ah campaign zui kawi kawi hi.
2014 kum March 16 ni-in, UNA leh 88 Generation (Peace& Open Society) sem khawm in 2008 Constitution puahphat theih dan ding kikupna ah ki hel hi.
2014 kum March 28 ni-in Kalay khua laizang ah mipi 1000 val mai ah article 436, 59 F khel zawh na’ng ZCD ta’thu gen hi. Hih pen 88 Generation (Peace & Open Society)- Kalay branch, NLD, ZCD leh Upper Chindwin Network and the Student Union te vai hawmna hi.
2014 April kha in ZCD Sagaing Region Secretary ding in ki tel hi.
2014 April kha water festival hun sung in St. Peter and Paul Church ah khangno 60 val Human Rights tintan pia hi.

References;
1. Committee, Jasuan Beh Teizang Nam Sagihte Khang Tangthu Bu, 2004 - p-33
2. Committee, Jasuan Beh Zahlangh Fung Khang Sialna, 2nd Edition, 2003.
3. Dr. Vumson, Zo History.
4. Sukte Beh Laibu Bawl Committee, Sukte beh Leh Tedim Gam Tangthu, December 1996, p-119-120.
5. Carey and Tuck, The Chin Hill, Vol.2.
6. Laibu Bawl committee, Jasuan Beh Zahlangh Fung khang Sialna, 2nd Edition, 2003.





Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZCD Candidate Pu Khup San Thang Tangthu atom in. Description: Rating: 5 Reviewed By: Cinpu Zomi
Scroll to Top