728x90 AdSpace

Hot
Menu
Zon-ol na Donate

Latest News

Zomi Innkuan Adelaide (ZIA) - Australia Tangthu leh Thukhunpi (Constitution and By-law).

Zomi Innkuan Adelaide Tangthu
Zomi Innkuan Adelaide (ZIA) Logo.

Adelaide khua pen Australia gam South Australia State ii khuapi hi aa Rev.Dr. Chin Do Kham a sih ma deuh Adelaide hong pai laai in "Adelaide a tung masa ZOMI ka hihi" cih gen hi. Adelaide khuapi sungah mimal 1.3 million bang om aa Zomi pen 130 bang ki om ding hi.
Zomi Innkuan Adelaide pen 2012 inThukhun kician takin siksan in kiphuan zo hi. 2013 sungin Thukhun(Bylaw) a khat vei na kipuah masa aa, 2014 ciangin a nih vei na Thukhun puahphatna ki nei kik leuleu hi. Zomi Innkuan Adelaide te thukhun leh thumeilet pen Zomi Innkuan India, Zomi Innkuan DC area, Zomi Innkuan Norway leh leitung bup Zomi Innkuan te Thukhun te tawh et kaak kawm aa Adelaide dinmun tawh a kituak ding aa a kibawl ahihman in piicing in kip mahmah hi.

A kipat lam in kum 1 in khat vei ta kitelna om aa a tawpna thukhun khit ciangin Executive Committee te term pen kum nih in kikhan to hi. Amapen President a sem pen Pa Thang Sian Dal Gualnam(Laaitui) hi aa, a ma khit ciangin nih vei a kizom in Pa Zam Cin Khai Naulak (Tungzang) kiteel suak hi.

Zomi sungah hong lut nuam nailo I sanggam ZO te simloh Adelaide khuapi sungaa Zomi mimal 95 bang ZIA sungah lut kim gai aa Khuado Pawi leh Zomi Namni te Zopau mah tawh piicing takin a kimuakna khuapi khat ahihi.

Australia gamsungah pawlpi leh Pasian thutawh a kinah vawh kha lo aa Minam luanzia lian bek tawh a kalsuan te lak ah a piicing pen leh member a tam pen kipawlna ahihi. Pawlpi namkim huan aa Minam leh Biakna a khen sitset kipawlna khat ahihi.

Kum khat khit kum khat member ki behlap semsem aa kalsuan zia zong piicing semsem hi. ZIA sungah a lut nuam te pen kum khat ai $50.00 kidong pah aa $15.00 pen kumsum in kiciamteh hi. $36.00 pen Donghu fund sungah lut pah aa pawllut mite sihna bek ah a kizang dingin bank account khat kihong hi. Kumsum te pen Khuado pawi, Zomi Namni te ah a kizang bek hi lo in pawllut mite Pa, Nu, Nu kik, Pa Kik, unau sanggam laigui zom lian te (mundang ah) sihna mun ah $200.00 tawh siatvatna kipia in hun kibawl pih hi.

Mun tuamtuam ah a om Zomi Innkuan kipawlna te in Zomi Innkuan Adelaide te Thukhun@bylaw limtak in na en cian leh zattheih ding tampi omding in ka um hi. Zomi Thupha!!!


Dr. Lian Sian Sing Gualnam (Singpi Gualnam)
MBBS(Yangon)
2nd year Pharmacy student(University of South Australia)

Ps. Nidang ciang kipawlna Dial@Flag ding zong mipi te tungah dongin kipsakna kineih sawm hi.

                            Zomi Innkuan Adelaide (ZIA) mipi Khuado Pawi 2015.


Zomi Innkuan Adelaide (ZIA)
Thukhunpi (Constitution and By-law)

Khenpi 1: Kipawlna Min (Name of Organization)
Kipawlna min dingin “Zomi Innkuan Adelaide”, a tomin “ZIA” kici hi. Kipawlna min pen mangkam (English) in “Zomi Community Adelaide (SA)” kici hi.    

Khenpi 2: Kipawlna Phualpi (Headquater) leh kipawlna gamhuam (Area)
Kipawlna Phualpi pen Adelaide hiding aa South Australia state sung huam hi.

Khenpi 3: Kipawlna Ngimna leh Tupna Bulpite (Aims and Objectives)
(a)  I minam min “Zomi” thupi sakin tawisang ding.
(b) Zongeina, Zopau, Zolai thupisak in kemcing ding.
(c) Minam, beh, khua le tui leh pawlpi tuamtuam cihte kikhen loin Zomi sungah pum khat suakin nasepkhop theih nading.                                 
(d) Nopna, dahna ah ki uap in, kihuh kikhual nading.
(e) Leitung mun tuamtuam pan Zomi kipawlna tuamtuam te tawh kizomin I minam leh I Minam leh I gam aading nasem khawm ding.

Khenpi 4: Kipawlna Dinzia leh Thu meilet te (Motives and Policies)
(a) Hih kipawlna in Biakna pawlpi leh Gamthu (Political Party) kipawlna hilo ding hi.
(b) Hih kipawlna in South Australia State sung aom Zomite nopna leh dahna ah a makaih ding kipawlna hi ding hi.
(c) Hih kipawlna sungah aituam (Personal) vai te kilutpih thei loin mipite leh minam ading bek sepkhiatna hi ding hi.
(d) Hih kipawlna sungah numei leh pasal, a khang leh a ham, mizawng leh mihau, mipil leh mimawl, sakmi leh khangmi, Sim leh Zo kideidan lo ding hi.
(e) Hih kipawlna sungah ki-itna, kizahtaakna, kithutuakna te kibulphuh tawntung ding hi.         

Khenpi 5: Kipawlna thu bulphuh te (Mottos of the organization)
(a) Kipawlna thubulphuh pen “Zomi sungah Innkuan Khat ih hi hi”

Khenpi 6: Kipawlna ii ciaptehna lim (Emblem of the Organization)
Kipawlna ii ciaptehna lim(logo) a laaizang (centre) sungah Vaphual nih Ngeisok paak tungah kilutuah in, A tungah “Zomi Innkuan Adelaide” kigelh dingaa anuai ah “Estd-2012” leh “Australia” cih kigelh ding hi. Anung(Background) ah puan laaisan kisuang ding hi.

Khenpi 7: Kipawlna Makai dingte (Qualifications of the Executive Committee)
(a) Kipawlna Makai (Executive Committee) te pen South Australia state sungah a tawm pen Kum khat aom khinsate bek hiding hi.
(b) Kipawlna Makai dingte pen kum cingsa (>18years) hiding aa Zomi Innkuan Adelaide (ZIA) Pawllutman (membership fee) a pia mi hiding hi.
(c) Kipawlna Makai ding te pen Pasian nasemte hilo ding hi.
(d) Kipawlna Makai dingte pen Zomi Innkuan Adelaide thukhunpi te telin, zat dan ngeina te Bang aa nasem, kalsuan nuam mi hi ding hi.

Khenpi 8: Kipawlna makaipi te kitelna (Processes of Election)

(a) Makaipi te kiteelni (Election Day)
Makaipite kiteelna pen kum nih ciang khatvei ta omding aa lungdam koh pawi (Thanks Giving Day” June kha sung kibawl ding hi.

(b) Kiteelna hun-uk dingte (Election Commission members)
(i) Kipawlna makai (EC) hong sem laaitak te thukimna tawh makaipipa/nu (President) in Kiteelna hun-uk ding a kisamzah hong sehding aa, a kiteel hun-uk te makaihna tawh siangtho tak leh suakta (free and fair) takin kiteel ding hi.           (ii) Kiteelna hun-uk dingte pen kipawlna lut mite lakah akhanghaam khin, pilna leh theihna a Kicing leh a zahtak huai mi hi ding hi.
(iii) Guptuam leh deihsak tuam nei loin, thumanna tawh tangtak aa na a sem mi (Neutral Person) hi ding hi.
(iv) Kiteelna hun-uk dingte pen kiteelna ah a kiteel theilo ding mite hi ding hi.
(v) Makailui te in Makai thakte kiangah thuneihna te hong ap khit aa kipan Kiteelna makai te thuneihna a bei hipah aa Makaithak te in hun hong la-in hong makaih pah ding hi.

(c) Ateel theiding Mite 
(i) Zomi Innkuan Adelaide member te lak pan kum 18 a cingsa khempeuh in mee (vote) pia thei ding hi.

Khenpi 9: Kipawlna Thudotpi te (Advisory Board)
(i) Kipawlna Makai thakte in Kumpi lam tawh kisai thudotpi leh Zomi Innkuan  
Adelaide innsung tawh kisai Thudotpi  ci-in thudot picing (Professional Advisors) ki seh ding hi.
(ii) Thudotpite pen a kiteelthak kipawlna Makai te-in muang takin minpia (nominate) dingaa kum cingsa (>18) pawllutmi a tamzaw thukimna tawh kikipsak ding hi. 
(iii) Thudotpite pen Executive Committee thukikupna (meeting) te ah akisambangin kihel theiding hi. Ahih hangin amau pen EC member hilo ahihmanin Mee (Vote) pia theilo ding hi.
(iv) Thudotpite term pen makaipite tawh kibangin kum nih sung hiding hi.

Khenpi 10: Kipawlna Makai dingte (Executive Committee)
                  (a) Makaipi                             - President
                  (b) Thuzeekpi                         - General Secretary
                  (c) Sumkempi                       - Treasurer
                  (d) Makaihuh                         - Executive Member
                  (e) Makaihuh                          - Executive Member
Atung aa bangin panmun te kiguang hi. Ahun leh kisapna zui in sub-committee dangdang te makai a tamzaw thukimna tawh kibehlap theiding hi.

Khenpi 11: Kipawlna Thuneihna leh Thu vaihawmna (Powers and Procedures)

(a) Executive Committee (E.C) Makai te pen:
(i) South Austraia State sung aa Zomi tawh kisai vaihawmna, sepkhiatna khempeuh ah Panmun la dingte (Executive Body) ahi hi.
(ii) Zomi Innkuan Adelaide Thukhunpi leh zatdan ngeina (By-law) te a gelh thei ding leh Puahphatna a bawl thei dingte (Legislative Body) ahi hi.
(iii) Zomi Innkuan Adelaide member te sungah minam vai tawh kisai a kisam bangin thukhen thei dingte (Judicial Body) ahi hi.  
(b) Thukhunpi (By-law) tawh kizui in E.C Makai a tamzaw thukimna tawh vai kikhawm ding Hi.
(c) Thukhunpi (By-law) sungaa kihel lo thu dangdangte vaihawmna ah mipi a tamzaw Thukimna tawh thu kikhensat ding hi.

Khenpi 12: Kipawlna makaipite nasep dingte (Duties and Conducts of the Executive Committee)

(a) Makaipi (President)
(i) Kipawlna ii lutangpi hi ding aa, vaihawmna tengah makaipi sem-in meeting sam thei ding hi.
(ii) Kipawlna tawh kisai a sia apha bawlna khempeuh theihpih ding hi.
(iii) Kipawlna nasep te a panpih zoden leh adin pihngam, a sem ngam den khat hi ding hi.
(iv) Kipawlna nasep te vaan in minam dangte leh Zomi sung minam kipawlna tuamtuam te tawh kizopna Ah a makaipi hi ding hi.   
            
(b) Thuzeekpi (General Secretary)
(i) Thuzeekpi pen kipawlna sung nasepna ah Tanupi hi ding hi.
(ii) Makaipipa (President) a om theih lohna leh  manmawhna a neih ciangin thukikupna (meeting) sap Theihna nei ding a makaipipa/nu tangin thuneihna ne ding hi.
(iii) Kipawlna tawh kisai kikupna (meeting) khat peuh ah makaipipa kihel theih lohna a neih hun ciangin tua kikupna a kah makaidang te in thu khensatna leh thukimna te a manlang pen in makaipipa/nu tungah zaksakna nei ding hi.
(iv) Kipawlna meeting te ah thu khensatnate ciamteh dingaa, kipawlna ii lai tuamtuam (records & membership) te kemcing in a kisam hunin member te tungah zaksakna nei ding hi.
(v) Kipawlna nasepnate ah makaipi tawh min thuh khawm dingaa, thuzaksakna, sapna Leh lai tuamtuam te geelin hawmkhia ding hi.
(vi) Ahunzui in a kiphuan sub-committee te nasep vaan ding hi.

(c) Sumkempi (Treasurer) 
(i) Kipawlna sumte kemin sazian tawh kician takin koih ding hi.
(ii) Kipawlna sumte kipawlna makaite theih loh, lungkim loh in zang thei lo in, pia thei lo ding hi.

Khenpi 13:  Thukikupna tawh kisai (Meeting)
(a) Kipawlna makai(EC) te pen atawmpen kha thum in khat vei ta kimu (meeting) ding aa tua kithukupna ah EC khempeuh kihel kim hamtang ding hi.
(b) Thukikupna khat peuh ah EC member a tamzaw (>75%) a kim kei leh tua thukikupna khomcing lo kici ding aa tua mah bangin a kisamsa mi(invited only)  a tamzaw (>75%) a cing ke leh ua kikupna khomcing in kiciamteh loding hi.
(c) Thukikupna khat peuhah thukhensatna khat peuh a kibawl ciangin a thukikupna (meeting) ah hong kihel Mee(vote) pia theiding atamzaw te thukimna tawh kikhensat ding hi.
(d) Thukikupna khat peuh ah kithukimna om zolo-in, pai khiatna (Walk out) a om leh khop kik ciangin akisap leh President pa’n Mee (Vote) zangin kensat ding hi.
(e) Thukikupna khat peuhah thusung nuam te-in “Khut lam in” hunuk (Chairperson) pa/nu kiangah hun ngen ding aa hunuk (Chairperson) pa/nu phalna bek tawh thusung thei ding hi.
(f) Thusung nuam mikhat sang atamzaw hunkhat sungin a kituak ciangin hunuk (Chairperson) pa/nu’ apiak penpen in thusung masa ding hi.

Khenpi 14: Kipawlna Makaite (E.C) hun (Terms of the Executive Committee)
(a) Kipawlna Makaite hun pen kum nih sung hiding hi.
(b) Makai khatin panmun khat ah a kizom in term nih ciang sem thei ding aa ahihhangin Makai panmun dangah kitel kik thei ding hi.
(c) Makai khat South Australia State sung pan paikhia ahih kei leh panmun pan a tawp, a kikhawlsak leh E.C member a tamzaw thukimna tawh EC member thak dingin kipawlna member sung pan a muanhuai mi khat ki la ding hi.                       (d) Kipawlna Makai khat in kipawlna Thukunpi (By-law) siiksanin na hong semlo-in kipawlna hong langpan leh E.C pan Warning kipia dingaa, a nih veina hong tat laai teeiteei leh E.C  atamzaw thukimna tawh panmun pan kikhawlsak thei ding hi.

Khenpi 15: kipawlna Makai te ki-apna (Handing-Over of the Executive Committee)
(a) Kiteelni aa kipan kha khat sungin (Within one month) vai khempeuh, sum khempeuh ki-ap siang ding hi.

Khenpi 16: kipawlna Makaithak te kiciamna 
(a) Kiciamna hong makaih dingin Election Committee Makaipi hiding aa a nuai aa bangin kiciam Sak ding hi.
“Kei mah ( Minpulaak ding) …………………….in tuni aa kipan khenpi 14 sungah a kikipsak term bei dong Zomi Innkuan Adelaide member atamzaw in hongtelna panmun ah ka lungsim khempeuh, ka thatang khempeuh leh ka theihna khempeuh tawh kasem dinghi cih Pasian mai leh mipite mai ah kong kiciam hi.”

Khenpi 17: Pawllutna leh Pawltawpna (Membership)
(a) South Australia gamsung ah a om Zomi khempeuh kipawlna in huam hi.
(b) ZIA Thukhunpi leh zatdan ngeina te thukimin, kipawl khopna a lunggulh mikhempeuh pawllut man (membership Fee) pia in kipawlna ah lut thei ding hi.
(c) Kumsum (annual fee) pen mikhat ciang kha khat in $1.25 kidong dingaa, hong piak ni aa kipan a mai June kha (30) ni ciang huam ding hi.                             
(d) Kumsum ( annual fee) kua mahin lakik thei lo ding hi. (Non-Refundable)
(e) Member lutsa te sungpan naungek suakthak a om leh kumsum (annual fee) apiak masiah member khat ii phattuamna khempeuh ngahlo ding hi.

Khenpi 18: Pawllutna hang aa Phattuamna (Benefits)
(a) Pawllutmi khat peuh ii innkuan sungah a Nu,Pa (Nu kik,Pa kik), Zi, Pasal, tate 
Leh sanggam laiguizom te-in sihna a tuah zenzen uh leh ZIA in hehnep tutpihna nei ding hi.
(b) A tung aa bangin dahna a om leh ZIA min tawh $200.00 kipia ding hi.

Khenpi 19: Donghu (Welfare)
(a) Kipawlna alut member khatin Donghu sum dingin mi khat ciang kha khat in $3.00 kidong ding aa, Hong piak ni aa kipan a mai June kha (30) ni ciang huam ding hi.
(b) Azenzen in ZIA member sungpan Sihna/Dahna a tuak a om leh Donghu sum sungpan $ 5000.00 tawh sihgaalna kipia ding hi. Donghu (Welfare fund) a kicin kei leh a kisam zah ZIA member sungpan mimal zui in ki donbeh ding hi.
(c) ZIA pawllutna kumsum (annual fee) pialo in Donghu(Welfare fund) kipia theilo hi.

Khenpi 20: Thu kizaaksakna (Correspondence)
(a) Kipawlna min tawh laipai, lailut nasepna khempeuh makaipi, thuzeekpi te in semding, Geel ding hi.
(b) Kipawlna makaipi( E.C) te thukimna a hihkei leh pawllutmi a tamzaw thukimna a om Loh in kuamah peuhin ZIA min tawh thugen, laigelh, sumdon leh palaai sem theilo ding hi.

Khenpi 21: Kikhoppi Nite (Functions and Gatherings)
(a) Khuado Pawi (Harvest Festival) pen October Kha sung hiding hi.
(b) Zominam Ni (Zomi National Day) pen February kha sung hiding hi.
(c) ZIA kumcin kikhoppi (Thanks Giving Day) pen June kha sung hiding hi.
(d) Thu phamawh mipi kikhopna (Emergency Meeting)

Khenpi 22: Thukhunpi puahphatna leh kipsakna (Bills and Amendments)
(a) Zomi Innkuan Adelaide Constitution leh By-law puahphatna leh behlapna  (Amentments) khat peuhpeuh aom leh Makai (E.C) atamzaw thukimna tawh kibehlap thei dinghi. Behlapna (Amentments) a kigelh khiat khitciang mipite ettheih, simtheih dingin kihawm khia dinghi. Mipi te sungpan puahphatnop leh behlapnop aom leh kikhop pi nite ahi zong, thuphamawh mipi kikhopna (emergency meeting) kisam in mipi a tam zaw thukimna tawh kikipsak ding hi.
                
(b) Puahphatna leh Behlapna (Amentments) ciaptehna
1. A Khat vei puahphatna (Amendment I), 2013
2. A nih vei puahphatna (Amendment II),2014

Khenpi 23: Minam thupit sakna
(a) Minam dangte kiangah ih Zomi pih te gensia, zuak, daisak loding
(b) Ih Zomi simloh, minam dangte thupi masa sak loding

Khenpi 24: Thukhunpi a kigelhna Laibulpi (Original Language)
Hih ZIA thukhunpi a kigelhna Laibulpi pen “Tedim Zolai” hiding hi.l

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Innkuan Adelaide (ZIA) - Australia Tangthu leh Thukhunpi (Constitution and By-law). Description: Rating: 5 Reviewed By: Cinpu Zomi
Scroll to Top