728x90 AdSpace

Hot
Menu
Zon-ol na Donate

Latest News

Zomi le Power. Gelh : Pau Sian Lian

Zomi le Power

Gelh  : Pau Sian Lian

Tu laitak politic lam ah kilo mun mahmah kammal khat-in power cih a hihi. Politic lam mipil te'n power cih kammal a khiat uhteh, i deih(lungtup) khat  ngahzawh na dingin midangte zattheihna, na ci-uhhi. Makai khat, gam khat-in amau power zatna dingin a kisam pelmawh vanzat (tool) pawlkhat neih masak kulhi. Tua vanzat te pen power khauh, power nem leh smart power cihte ahihi.


Power Khauh (Hard Power)
Thatang zatna (zum-le-hiam) zatna in power khauh zatna hi. Tua bek thamlo ngimna khat peuhpeuh tangtunsakna hangin pahtawina zong power khauh mah a hihi. Thatang zatna i cihteh a diak-in thatang, thauvui thautang mahtawh do gawpnate hi a, ciang(stick) zatna zong kici hi. Lungtup tangtun sakna hangin pahtawi na cihteh gentehna-in, nidang Myanmar gam-ah democracy tha piakna-in US kumpite le gam pawlkhat-in sumlam a kipan vaitampi-ah Myanmar gam hong gawt (sanction) uh a, ki-ukna kikhelna nabawl zahzah uh pahtawina-in gawtnate hong khiam nung cih policy a neih dante-uh a hihi. Hih pahtawi piakna pen ankam bulbawk (carrot/mongla-uh) zatna kici hi.

Power Khauh Zia-le-tong
- Gal bawlnopna lahna in galkapte galdo ding kigin sak detna, setlam pan ahizongin suktheih sukmawh tawh midangte phinna
- Galhiam muanhuai theitata hanciam in bawlna
- Zawhthawh nop gamte' zuak vante gam sungah lutsak lohna, zuaknop leh zong siah tampi donna, sum-le-pai lamah gawtna,  thau-le-hiam zuak lohna, khaktanna
- Gamsung a om vanleng tual, tembaw khawlnate zatsak lohna le a amau vanlengte limlim zong gamhuang sungah nawkkhuan piaklohna. 

Power Nem (Soft Power)
Ngimna tangtun nading in thudam tawh zolna a hihi. I ngeina, i upna le biakna te a kipan i ki-ukna, thukizaknate midangte’n thupi hong sa, deihgawh le hong eng theihna a hihi. Tuatawh ki meizom-in ei thu hong man nading in thudam, awnem tawh zolna a hihi. Thu lam tawh zolzawh limlim na dan a hihi. 

Power Nem Zia-le-tong
- Palai (lengla) kikhahna tawh thudam in zolbawlna
- Ngeina, upna, biakna le sandan kilamdangte theihsiamna  
- Gamdangte thangthu tuanthu le makaite mimal thupitnate theihsakna  
- Thupiang na khat peuhpeuh ah a hang le a thu ciantak-in zoptheih taktak nading, kan tiltelna, kisap leh research kician tak-in bawl-in kan masa, mipi te ngaih sutna kantel masa, dong kawikawi cihte a hihi.
- Gamkhat peuhmah in power nem a deih leh (a) Ngeina hoih (culture – midangte lunglutsak na), (b) Politic tawh kisai man neihna (political values- gamsung gampua ah mite maitan sakna), (c) Gampua tawh kisai policy (foreign policy – thuman tak le thudik tak-in ukna  nei a hihlam gamdangte’ theihpihna) te kisam pelmawhhi.
Mimal vai-in aki genteh mipite lungsim ngahbaihna, zahtak huaina, mipitawh kizop siamna, tupna kician neihna, mipi lungsim ngahzawh ngiatna hipah in minam le gam khat dinmun tawh gen lehang kumpi, party in mipite’ thukimpihna, theihpihna ngahna hi.

Powerte Tonkhopna
Hih power tegel pen kisam khawmtuak uhhi. Khat veivei teh power khat lam zawzaw kisapna lek thei zawhi. Gentehna-in mipilte muhna-ah Arab Spring lai, Arab gam a om mipite ngiat ki thutuak tak-in a lungpho man-un kikhelna piang hizaw-in thauvui thautang tawh kipan masa uh hileh kikhelna pi pianglo zaw dinghi, ci-uh hi. Ahi zongin galpi nihna lai-in America in nuclear bomb hong zat ek tak uhteh, galpi veng pan suak leuleu hi. Power te tonkhop dan le kizat theihdan ngaihsut huai thupawl khat om laihi. 

9/11 buaina pian ma-in Al-Qaeda te'n USA te phin zeuhzeuh zeeluh a, tua laitak president sem Clinton in Afaghansitan kumpite power nem zangin kamkhum tawh lengla na khahngei hi. Ahi zongin Talibante pen kamkhum ciangtawh kizol thei pawl hilo-in Al-Qaedate amau gam-ah suakta tak-in butom sak veve hi. President Bush leuleu lah 9/11 vai khitteh power zang nuam lua liangin, kisam lopi Iraq va do se a, ama lapsang nop democracy ki-ukna pen Arab gamte'n mudah lawh zawhi.

Hih power nem le power khauh cihte pen mihoih, misiate'n amau deih dandan-in a zattheih uh vanzat te a hih lam phawk huai denhi. USA in Taliban le Al-Qaedate do nading in power khauh a zat laitak uh, Osama Binladin in power nem tawh nungzui tampi na zol ziahziah zo hi. Hitler bangbel minam itna cih power nem tawh Germany gam ah miteng khemzo mawkhi. US galkapte power khauh zatna hangin Arab gamte ah minsiat dikdek laitak mahin Tsunami tuikhan thuak dikdek Indonesiate huhgawp uh ahih man-in, power nem a zang hong suakkik bilbel a, Asia gam pawlkhat-ah maipha ngah mahmah uhhi.    

SMART POWER
Harvard University ah professor sem Joseph Nye in 1990 kum pawl-in, smart power cih zia thakkhat hong phuankhia-a, tu laitak America kumpi-in gam tuamtuam tawh kizop na-ah hih smart power mah zatpi-in nei uhhi. 

Smart power cih-in power omsa te geel (power khauh & nem) kisam dandan in gawmtuah in zatsiam na ahihi. Tuate geel gawmsiam na tawh vailian geel in eima neihzah zat theih vangilte(resource) tawh tuat khawm a gamtat na hihi. A mun a mual ciantak-in kankhitteh tua tawh kituak-in gamtat theihna zong hipah hi. A diakdiak in sum meetbawl dan-in genle hang kei lampan ka zatzah a sumlom (sumbul) tawh ka meet kikzo mahdiam cih tuatkholhna ahihi. 

Kumpi khat bang hihleh a muanhuai, khauhpai galkap neihzawh nang hanciam kawmkal mah-in kumpi dang, gamdang makaite, gam tuamtuam a om kipawlnate tawh ki lawm bawlna, ki maingap semsem nading hanciam na ahihi. Gam vai-ah zawl hau semsem lehang thukhat peuhpeuh vaihawmteh amau' thukimpih le theihpihna kingah in mavang tuam mahmah hi. I aw zong thawl zawdeuh hi. Tua hih man-in smart power cihpen kipawlna khatkia, mimal khatguak ki pumpei, tangtat cihbang om theilo-in zawl, lawm-le-gual zotkul hamtang hi.   

Smart power zatna pen sunkhat thu-in ki nizawh theih ziauh hilo a, kal tampi kisiau khual zinna khat ahihi. Smart power zat dingteh ngaihsut masak hamtang huai thu pawlkhat omhi. Tuatengin
- Ken bangdeih?, Bang thu sungnuam(agenda)?
- Hih vai-ah bang kipawlna (institution)teng tawh kimei zomthei?
- Hong pawm thei ding lawm-legual/zawl kuateng nei, kuateng ki zolbeh thei?
- Ka thuneihna power bangteng hiam? 
- Ka power te koiah kizang thei hiam? Koicih zatleng bun phadiak dinghiam?
- Power kizatna ding mun-le-mual, khuahun dante koici dan hiam?
- Power nem le khauhte zatna pan piangthei ding thute ka khinkhai masa hiam? Hih power tegeel koicih gawmtuah siamding? 
- Ka power te a zattak mahdiam? 
- Mipi le belpawl gamte thukim pihna ka ngahzo hiam?
- Bang (result, outcome) ngahkhia nuam? , cihte geel kawmin a kizom deudeu sepna khat ahihi.

Tua ahih man-in hih sepna pen bucing geelna khat zong kici theihi. Hihdan smart power zatsiam makai tawm mahmah lai a, Americate president semngei Theodore Roosevelt tepawl bek dan-in kiciamteh hi. Smart power zatsiam nading hanciam na-in sumbawlna lam, kipawlna lam, politic lam-ah gambup huam, khuakhat huam, veengkhat huam makaite thukhensat ziate kancianna, theihtelna ding sinna-in zong kizang theihi. 

Smart power tawh kisai gambup huam-in a kigenteh Norway gam pen etteh tak gam-in kimu diak hi. Banghang hiam cih leh, 
- Norwayte pen mipi ki-ukna ah kihual mahmah hi. Tua pen democracy kician, zatna zong a ci omhi.
- UN ah ki thukimsa leitung gamhau pente’n gamzawngte gam hauhna GDP pan 0.7% piakding hita leh gamkhangto sa tampite-in pia zolo uh-a, Norway gam ahih leh GDP pan 1% gamzawngte huhna-in piakhia ekhi.
- UN makaihna tawh leitung bup tawh kisai vai tuamtuam te-ah lawp tak-in kihelden
- OSLO zum hongin, gam tuamtuamte’ gamsung buainate ven nading (peace keeping) lamah hanciam-in panpih uhhi.

A tung a te pen kumpi lampan power nem zatna hi-in, mipi kipawlna lamte-ah zong power nem zangin ei deihdan-in gam dangte ki huzap zo veve hi.

Power Thak
Power tawh kisai power nem, power khauh le smart power te i gen zo a, mipi makai khangno minthang Jeremy Heimans muhkhiat khangthak hun a power thak luanzia le power lui te kilamdanna tehkakna tomno zong i en pak dinghi.

Power Lui Power Thak
Sum (currency) Ahual (current)
Mitawmnote neih (Held by few) Mi tampite bawl (Made by many)
La (download) Pia (upload)
Sawl (command) Hawmkhawm (shares)
Makai bulphuh (leader driven) Lawm & gual bulphuh (peer-driven)
Kikhak (closed) Kihong (open)

Smart Power Kua tengin Zangthei?
Kum zalom 21 khitlam, setkhuak pilna phatak-in hong khankhiat mahmah teh power ki thehthangna (power diffusion) khat hong omhi. Nidangin kumpite bek zattheih emailte tun mikim-in kizangta a, galkap ulian te bek zattheih satelite tawh leitung etna pen tun google earth zangin mi khatpeuh-in leitung bup pheklek ziau thei tahi. Tua ahih man-in power pen mi tawmnote sungbek ah om nawnlo-in ki thehthang ta hi. Thomas Friedman in tu laitak hunpen mi khempeuh in na khat peuh-ah, gamla tungzo zaw, kinawh zaw, tawmman zaw, thuklut zawk theihhun hi, na cihi.

Hih thuteng hangin smart power zat-na ah kihel thei(player) pen nam tam mahmah hi. Khenpi nih-in khen lehang kumpi lam le kumpi ahilo lamte (state actors and non-state actors) te hita hi. Kumpi lampan cihteh galkapte, thunei uliante cih telnop khin a, kumpi lo lam pan cihteh sumbuk zuakte, mediate cihdan, India gamte’ Bollywood a kipan USA gam a Harvard University dong kihel ngeingai hi. Kumpi ahilo lam-ah OXFAM, World Vision cihte kihel mah bangun Al-Qaeda, Boko Haram, ISIS cih mi ngongtatte zong kihel a, tua teng tungah power pen kithehthang zihziah tahi.  

Power-te Phualsatna
Power kithehthang(power diffusion) meizom in tu laitak globalization hun-ah gam tuamtuam a om kipawlna khempeuh (kumpi lam, mipi lam) kizop, kimat, ki-awh ziazua na ong khauh pai semsem tahi. Tua ahih man-in, gamgi-kheng kizopna(transnational) cih  kammal ki lim zat mahmah tahi. Hih gamgi-kheng kizopna cian tak-in enthei lehang Zomite’ kisap power koicih ngahding? Koi cihzatding? Koi-ah zang ding?, cihte tampi kingaih sun thei tuam dingin ka lamen hi. 

Politic lam mipil Robert Keohane le Joseph Nye in a nuai-a lim bangin gamgi-kheng kizopna a om ziazua dan gentehna-in hong lakkhia uhhi.

  
Hih limdan kizop zia tungtawn-in Myanmar gam le USA gam kizop dan gentehna-in i enpak dinghi. Lungtup khat peuhpeuh a dingin kumpi le kumpi maitang sai-in kizop na om theihi. President Obama in ama lungtup ngah nading-in U Thein Sein tawh ki maitang tuah-in kumkhawm, zol theihi. Obama in gam tuamtuam kumpi lam kipawlna (UN, Security Council) tungtawn-in U Thein Sein tawsawn theihi. 

Obama in USA gam a om mipi kipawlna (Human Rights Groups lamte le a tuamtuam) te tungtawn-in Myanmar gam a om mipi kipawlna (Actor Kyaw Thu, Yangon Free Funeral Services cihte) tawh kithuah-in Myanmar kumpi hopih theihi. A hih keileh Obama kumpi ngiat-in Myanmar gam a om mipi kipawlna (88 Generation Group - Open Society cihdan) tetawh kithuah-in ama deihna hanciam theihi. Tua bektham lo UN Security Council tungtawn-in Myanmar gam a om Myanmar Human Rights Council te thuhilhna tawh Myanmar kumpite phin thei hi. Mipi kipawlnate ut bangin zangthei cihna hilo-in luptup gina i neihleh sepkhop theih cihna hizaw hi.     

Hih pen a telnop pak theih dingin ka geelpak hi-a, kipawlna khat peuhpeuh in hih phungpi te tungtawn-in kimawl theihna lahna hi. Ngaihsun zole hang tam semsem zaw lai dinghi. Zomite’n power i cihcih, Zomite lungtup ngahzawh nading in hih gamgi-khengkizop nate pan power zat nading, power lak nading, power khop nading phungpi pawlkhat kimu theihi.   

Zomite le Power
Power vai thukhup nadingin Zomite’n bang power teng nei-in, koicih zat ding cih kei mimal ngaihsut paktheih teng kong sung dinghi. A taktak-in hih pen Zomi bup khuak tui liangin kikup niloh kul thulu khat a hihi. 

Zomi le Gamtat hoihna; Zomite pen nidang pek a kipan pu-le-pa te mi citak, thuman in minthang sa i hihi. Tua pen i soft power hi gige-in vaipuak khat peuhpeuh ah hong kimuang mahmah pahhi. Tua lungsim i pat kikkul hi. Koicih patding? Christian 99% omna Zogam-ah golhguk a kipan, gamtatsiatna(corruption)cih peuhmah omsak lo ding hihang. 

Myanmar gambup pen hih gamtatsiatna-ah uang lua khina, Zomite ukna zumte,  Zomite teenna Zogam-ah golhguk piak kisang ngiatlohi, cih ngeina hoihkhat hanciam huaihi. Banghang hiam cihleh, golhguk nekna pen i biak Pasian in deihlo hi. I gam-ah tangpi nasemte kumpi-in khasum a zah nih hong khankhin hi. Mipih gamdang tung tampi-om ta a, sumlut om zawdeuh in kisap teng cing ahih pahloh hang nuntak lemzaw deuhhi. 

Zomi le Thukizakna; Media pen zangthei lehang power khauh mahmah khathi. Tu laitak Zomi Radio station khat I hanciam tahi. Zomi Radio (Zo pau, Burmese), Zomi website (English, Burmese), Zomi Monthly Journal (Burmese) te hanciam huai mahmah hi. I Zomi radio ah minute themkhat a hiphial zongin Burmese program zong helhuai hi. Zomite upna, ngeina hoih, dinmun, haksatna, muhna le awgingte Myanmar gambup le leitung bup theihsak ding tupkul hi.

Kawllai in monthly journal ciangbang hanciam huai laihi.  Zogam thu ki thei nuam semsem ta a, ei thu eimah-in mi dangte theih dingin i gen keileh midangte’n amau ut dandan in hong na gen ding uhhi. John Arquilla in, tuhun global thukizak hun-ah gualzawhna cih pen khat veivei teh kua galkapte’n galzo cihsang kua tangthu in zo cihtawh ki khensat theizeel tahi, na cihi. 

Kidop ding khat-ah hih media nasep (industry) pen, mi teitang khat, mi tawmno, biakna, party khatte neihsa bangin zatkhak loh ding thupihi. Gentehna-in China kumpi-in media te pen amau deihkaih thute bekbek suaksak uh a, kuama lungsim la zolo pah uhhi. India Bollywood a hihleh kumpite sawhkhakna omlo in suakta ngiat uh a Bollywood hangin India-in leitung huam power khat neizo suak hi. Tua ahih man-in mediate zuihhuai thudik(media ethics) mah tawh sep huaizaw hi. Joseph Nye in, “The best propaganda is not propaganda” na cihi. 

Zomi le Mipi kipawlna; Zomi sung-ah kipawlna thupi, omkhong lo kipawlna tam ta hi. GZA aki pan ZYA, TTWF, TYF, Siamsin, CNRWG, ECODS cihte om a, thapiak huai mahmah hi. Americate’ power nem neihbang aki lim kanteh, kumpi lampan sang mipi kipawlnate hang hizaw, kici hi. Myanmar gampen thukhunte ukna(rule of law) hat hetlo ahih man-in Zomi bup-in i dinpih ding, minam dangte’n Zomi, Zogam tungah thuman lo-in zawhthawh, simmawhna a omteh gamsung le gamtuamtuam kizopna thukhun tawh mipihte hong panpih ding sitni(lawyer) network neizo lai lehang hoih dinghi. Gambup huam le gam tuamtuam a lawyer network te tawh ki theihneih zawhding thupi kha dinghi.

Zomi le Thu kikuptuahna; GZA khawmpi a kipan Siamsinte’n kumsim seminar nei a, Zosuan Tuailai Khawmpi, Zomi Forum cihte kinei khinhi. Hih khawmpite a hawmthawh om kha mah dinghi. Khawmpite pan sepkhiat na lam a kizom zalzal zo pahkei phial zongin khawlhuai hetlo hi. Mipi kimthei semsem hanciam-in muhna, ngaihsutna, veina kibang masa kei tase mahleh kimuh khop limlim, thu kikup khop, thu sinkhop, thu ngaihkhop, thu kikuptuah khop limlim pen picing nading kal masa kisuan-in ka muhi. Zogam Zomi mailam ki-uk, makaih, kilam zia ding a thu beek ahiphial zongin ki kumkum, geelgeel mai lehang zong kikhial lo dinghi. 

Zomi le Gam tuamtuam Kipawlna; Zomi Innkuan USA in UN ah consultative status khat ngahta ahih man-in i lung dam mahmah hi. Gam tuamtuam a om Zomi kipawlna om peuhmah-in amau gam a mipi kipawlna te tawh kizop semsem zawh nading le omna a inntek kumpite theihpih kipawlna hihding zong hanciam huai semsem hi. Gam tuamtuam kipawlna UN cihdante ah zong i kihel zawh detding lunggulh huai mahmah hi.  

Zomi le Palai Sepna; Democracy ki-ukna in mipite thu neihna ahih man-in a kizen mipi hihding kisam hi. Mipi palai i teelkhitteh omthawng sak lo a i haksatna, deihna, kisapnate ko, zasak-in kisap le MPte sepkhiatte bangteng hiam cih kan kik-in ahi bangbang mipi bup zaksak kik kulhi. Banghang hiam cihleh vai tampi-ah kumpi kihello-in lem ngiatlo pawl khat omse hi. MP te gawt nop man hilo-in democracy ki-ukna zia hong hita hi. Mipi bup le mipi palaite kikal-ah khauhtak sepkhop na (mechanism) khat i kisam hi. Tua sepna lam-ah kiva mipi kipawlna zong pantah, thapiak zawh ding thupi mahmah hi. 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi le Power. Gelh : Pau Sian Lian Description: Rating: 5 Reviewed By: Cinpu Zomi
Scroll to Top