728x90 AdSpace

Hot
Menu
Zon-ol na Donate

Latest News

IH ZO NGEINA PHAWLKHAT. (Silh leh Ten)

Ih Ngeina Pawlkhat
L.C. Ngaihte

Leitung ah minam tampi tak om hi. Tua minam tampi tak omte in a pu a pate a kipan a na zuih uh leh a zat uh gamtat zia, nasep zia leh vai khat peuh sai zia a tuam tek in nei uh hi. Tua bang a zia nam tuamtuamte tu hun ciang in Dan, Ngeina leh tawnzia / ciinzia (Law, Traditions and Customs) cih bang a khen daudau in minam a kici peuh mah in tuam neih tek in zui ngeingai uh hi. Hicibang ngeina leh dante in minam thupi leh picing hihna hong lak thei a, minam ginat lohna zong hong lak thei hi. Minam tuamtuam zong phung khat hihna lak thei a, phung tuam hihna zong piang sak thei hi. Ei Zo minamte in zong tua bang a dan, ngeina leh ciinziate ih pu leh pate a kipat ih na sin toh leh ih zat toh detdet tampi tak om hi. Tua bangte in minam picing, minam lian ih hihna hong lak a, leitung a minam thupi khat ih hih na hong tangko sak hi.

Tua bang a ngeinate ih ki angtan sak mahmah ding a hi hi. Angtan ciang bek tawh zong hun sak lo in, ih puah leh ih kep; ih zuun leh ih zat tohtoh ding a hi hi. Ngeina a hoih lo, zu leh sa nekna, leh kithawihna leh dawi leh kau biaknate pen khawl ding mah hi a, a hi zong in ngeina hoih tampi omte ih zat ding in hoih mah mah hi.

En pak leng: Nidang lai in khangluite in ngeina a aneih uh, tuni ciang a kizang mel lo khat om hi. Tua in bang hiam cih leh, Puan tawh kisai hi. Puan pen pasal puan leh numei puan in khen uh hi. Pasal peuh mah in numei pual zang lo a, numei kici peuh mah in zong pasal puan zang lo pah lel hi. Pasal puan kici peuh mah pen numei puan tawh sawp khawm ngei lo uh a, a pho nangawn zong pho khawm ngei lo uh hi. Pasal puan pen a tung nung zaw in pho uh a, numei puan leh naupangte puan pen a niam zaw deuh ah pho uh hi. Tua ban ah puan pen ut bangbang a mawk silh theih hi lo hi. A cinh leh hau zaw deuh, a tong leh a ai zo zaw deuh leh gal man - sa man zote bek in a silh theih cih bang in na ki khen deudau hi.

Pasal puan leh numei puan tuni ciangciang a ih kep leh ih zat, minam puan ih cihte uh a nuai a bang hi.

Pasal puante (nam 5 pha hi).
1. Tang Cing (Tangcin): 
Pasal pha, gal leh sa ai zote bek in zang thei a, sahang man zote siken puan ding in kiguan thei bek hi. Misi dangte in siken puan in zang thei lo hi. 

2. Puanza Lai San (Puan Laisan): 
Hih puan pen ‘Dapzal’ puan zong kici hi. Pawi khat peuh om ciang a pasalte puanza neih thupi pen a hi hi. Gal man, sa mante bek in sih ciang in keng thei hi.

3. Tual Puan: 
Hih puan pen patkhau tawh kigan hi a, Silh tang zang in ki zang hi. Tukhun, khua khal hun leh phalbi hun cih om tuam lo a, kumtawn a kisilh thei a hi hi. 

4. Puantam Silh : 
A kang, a vom, a san leh a gial cih bang in nam tuamtuam om hi. Puanza liang vat in kizang hi. Gal man lo, sa lah man lo, Aih ding nei lo leh inn siansuah lote a sih ciang in situamna in kizang hi. Tua bang mite a sam nangawn zong kihiat sak thei lo hi.

5. Koptah Puan: 
Nahvawh li nei a kigan a hi hi.

Numei puante (nam 4 in kikhen hi).
Puandum : 
Numeite puanza neih lak ah thupi pen ahi hi. Nop bawlna, pahtawina leh situamna in zangthei uh hi. Hih pen nupite bek in a silh theih uh ahi hi. A silh ding nupite zong a pasal pen gal ai leh sa ai zote bek a hi hi.

Khe Phiau : 
Nungakte puanza hi a, puan tung ten in kizang hi. Puadum silh ding a kilawm
lo leh citna nei lote silh ding a hi hi.

Zo Niik : 
Hih niik pen niiksing hi a, khuk tung ciang bek tuam ding a kibawl a hi hi.

Puan tuamtuam tampi om lai a, tuate in a nuai a bang a hi hi.

Dial tuamtuam
Saiha dial: 
Hih dial pen a sauna tong 3 pan tong 9 bang pha a, a golna khuutpi li bang pha hi. Mun khat peuh ah sihna, manna tuah khak leh luang tuam zo ding a sau sak a hi hi. Cinghpi, salian man, miim leh tanng ai zote bek in khim thei uh hi.

Dialsan: 
Sahang mat simna hi a, sa aih ciang in Siampi leh siampute in khim uh hi.

Dialvom: 
Hih dial pen sakol leh sagual mat simna a hi hi.

Numei Dial
Lukhip: 
Hih dial pen numeite a hi a, Guahzu leh nisa dalna hi. 

Dialkhip: 
Tanglai numeite khip hi a, a lutung a niin tu ding dalna a hi hi.

Puanbu: Hih puan pen Zo mite zan puan thupi mahmah hi a, patkhau tawh kigan hi. A thup nei hi a, lum mahmah hi. Mothakte’n puanbu a ken leh nagtang mahmah uh hi.

Khi: 
Numeite in khii tuamtuam nei uh a, a vek pi in nam 9
bang pha hi. 
1) Khibah. 
2) Simkhi. 
3) Khinaal. (a
bem leh a zawl om hi). 
4) Khidum. 
5) Khinai. 
6 )Khikang. 
7) Khisan. 
8) Khimau. leh
9) Khi kilnei
cihte a hi hi.

Hih teng lak ah Khibah, simkhi leh khinai cihte a thupi deuh in kingaihsun hi.

Tu hun ciang in, I minam puante uh thang zat mahmah pawlkhat om a. kilawm peuhmah lo hi. Nupi pawl khatte in Tangcing puan peuh naupuakna in zang uh a, kilawm lo bek hi lo in zumhuai hi. Zum huai bek zong hi lo in hai huai hi.

Tuni ciang in saman galman cihte om nawn lo a hih man in ih puan zat zia uh zong I laih uh hi. Hih puan zat zia ih laih uh pen zong limtak ngaih sut thak kisam a, a kilawm zaw deuh in laih theih a hi hi. Pasal in pasal puan mah silh hen la, numeite in numei puan mah zang leh hoih ding hi. Khua dam sak man peuh a puan om bangbang mawk silh cih zong hai vai mahmah hi. Ih minam puante uh en zang siam le’ng minam dangte in hong thang zat sak lo ding hi. Ih minam makaite puah ding hi lo a, nang leh kei, a zang dingte mah in ih puah ih kep a, I thupi ngaihsut ding kisam hi. 

Source : ZOMI TANGKO TEDIM KAM LOM - I HAWM - 2.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: IH ZO NGEINA PHAWLKHAT. (Silh leh Ten) Description: Rating: 5 Reviewed By: Cinpu Zomi
Scroll to Top