728x90 AdSpace

Hot
Menu
Zon-ol na Donate

Latest News

INNKUAN SUNG NOPNA DING THU (6)TE.

INNKUAN SUNG NOPNA DING THU GUKTE
Photo : Siansian Zomi te Innkuan.

Tu kumin Pate ni phawkna kibawl ciat kha ding hi. Tua hun sungin, Innkuan sungnop theihna ding thu 6 te gen ding hi hang. Hih thute ih zuih theih khit ciangin, a beisa hun sangin ih innkuan sung ciat hong nuam zaw ding a, tua innkuan nopna in ih pawlpi ciat hong lawh ding hi. Tua banah, Innkuan le pawlpi hong nuam in, hong thahat ciangin, ih gam sungah zong nopna hong om thei pan ding hi.

1. Pate tavuan. ( Eph. 6:1-4)

Innkuan sung a nop theihna dingin, Pate in, Pa tavuan mah hoihtak a a lak ding kisam hi. Eph. 6:4 na sungah, Pate aw, na tate uh, hehna ding le thangpaihna dingin phin kei un la, Pasian thu tawh pantah zaw un..” na ci hi. Pasian thu bek hi lo-in leitung thu tuamtuam, innkuan sung, khua sung vai le a tuamtuam te ah Pate in, Pa tavuan mah la in, a makaih ding kisam hi.

Tua mah bangin, tate in zong, nanu napate uh THU MANG UN, na ci hi. Ih nu le ih Pa te sangin hong deihsakzawding kuamah om lo kha ding hi. Ih hoihna ding deihna tawh hong kigen thu te ih zuih theih ding, ih man’theih ding thupi kisam hi. Tua bek tham lo-in, ZAHTAAK UN, na ci lai hi. Innkuan pawl khatte ah nu le tate ki pawl in, Pa pen simmawh bawl in, langdo cih khawng zong om thei hi. Tua pen thupha ngah lohna le Lai Siangtho tawh ki leh bulh mahmah khat a hihi.

Pasian in Pate innkuan sung lutang dingin a sehsa ahi hi. Bang zahtak in pilzaw siamzaw ta sem le Pasian Nute innkuan lutang dingin tavuan na pia lo hi. Pate in, innkuan sungah PA TAVUAN la in, mah hoihtak a, a om diamdiam innkuante a hampha uh hi. Innkuan pawlkhat te Nu in thu khempeuh ukcip zaw in, Pa penbang vakkhia ding hi le ‘ ka bus saap ding 20 hong pia ve,’ ci in a zi kiang peuh ah a ngen om thei hi. Bus saap ding ih neih keile nget ding mahhi in, a hi zongin Pa pen in a ngen ding pa hi lo-in a pia khiading pa hi zong ngeel hi.

2. Innkuan sung uk zo ding. (1 Tim 3:4)

Innkuan nuam le Pasian thupha piak ding innkuante pen, Innkuan sung ki ukna le ki thu man diamdiamnainnkuan ahi hi. Innkuan sungah thu ki man’ diamdiamna aom ciangin, Pasian lungkimna om hi.

 Zi le pasal kilem lohna, tate in nu le pate thu man’ lohna le ut bangbang a om zelzul na pen a kilawm hetlo le Pasianthupha san’ lohna khat hi gige hi. Ih nu le pate hawmthawhhuai hi phial mawk ta le zum pih hetlo in ih amau thu mangin
ih kalsuanna pen Pasian deihna hi. Pate in zong innkuansungah thu neizo a, innkuan sung Pasian deihna bangin ukzawhna pen thupha ngahna khat a hi hi.

Sum bawlna le nasepna khat peuhpeuh ah meetna lesupna pen nasep siamna hang ahi hi. Nasep siamna geel siamna hangin meetna le supna a om mah bangin, innkuan sungah zong ki uk siamna le vaihawm siamna hangin, Pasian maipha ngahna om thei hi.

3. Hun zat khopna kisam hi. ( Deut 6:4-9)

Hih Lai Siangtho sungah Pasian in Judahmite tungah thu pia in, a tate uh a hilh zia ding le pattah zia ding uh gen hi. Inn sungah a om uh ciangin a gen ding thu pen Pasian thu hi ding hi. A lup khit nangawn uh ciangin Pasian thu mah gen ding ci hi. Lam pai kawm in zong hilh ding cih vaikhak hi.

Lai Siangtho sungah Judah mite tawh ih kilamdan’na na mu thei uh hiam? Inn sungah ih tutkhop ciangin, ih gen thu bang a hi hiam? Nipi ni kikhop khit ciang inn ih tun’ kal ding bangngaklah zaw zen a ih omna pen ih gennop bang a hi hiam? Biakinn a lasa khat peuh, thuhilh khat peuh le ki khawm mite sungah nungak khat tangval khat peuh om zia te peuh hi thei hi. Tua te hoihna gen ih hiam, hi lo zaw in hong kicial het lo a hoih lohna le kilawm ih sak lohna teng nag en ngeingai uh ciangin, thu tam a thei nai hetlo nata neuter in na kiangah na za gige uh hi.

Khatvei, innkuan ah in, amau innkuan kia a om hun in, pawlpi upate om zia khat gensia gawp uh hi. Ni khat ni ciangin tua pawlpi upa pa hong hawh a, thutel taktak nai lo, ta neu
khatin, ‘zan lam a ka nu le ka pa in, upa pa in an a neek vokpi anne tawh ki bang a cih pan nang na hia.’ ci in hong genkhia hi. A gen khia masa nu le pate a dingin maizum huai pian hi. Innkuan sung a ih gen thute naupangte lungsim sungah ciamteh uh a hih manin, up mawh loh hun khat ciangin, hong pulaak khia ding uh hi. Tua hun ciangin ih lungkim ding hiam? Tua tanote gen pen Lai Siangtho lot ngah cih khawng, labu sungah late sa hi le bang zah tak in ih lungkim ding a hih hiam?

Tua ahih manin, innkuan in hun zang khawm a Pasian thu le thu hoih genkhop ding kisam hi.

4. Etteh hoih hi ding kisam hi. ( Titus 2:7)

Sawltak Paul in Titus kiangah, gamtat hoihna le cihtakna ah etteh hoihna hih ding hanciam in ci hi. Innkuan sungah Pate in ettteh hoih a hih ding kisam mahmah hi. Naupangte in a golsa et gamtat zia hong en in tua bang mah in hong gamta pah uh hi. Na khekhap hong zui dinguh hi.

Innkuan sungah motor neite tate motor bawl zia khawng kineih uh hi. Zato lam naseem te cina veel khawng hong kineih uh hi. Ki mawlna lam uuk te a tate un ki mawlna lam ah hong kineih pah ding uh hi.

Tate a neutung in, a etteh ding uh (hero) kisam hi. Thupi a sak ding uh kisam hi. Pasian naseemte thupi sa hiam? A hi kei le TV sung khawng na muh zelzel kineihsiamte peuh thupi sa hiam? Ki mawlna lam a siam a minthangte thupi sa hiam? Pasian le Pasian kamamal LaiSaignto mah thupisa in, tua bang zui a nuntak ding hanciam nopna lungsim a neih ding uh kisam hi.

Tate in hong etteh dingin, bang ih nusiat hiam? Zateep, tuibuuk muam, Kuva hai, khaini muam, laithai kap, zu neek a kipan thu hoih lo tuamtuam te peuh a hi hiam? Pate in innkuan pihte tungah ngongtatna a hi zongin hamsia ztana a hi zongin ih neih khak le tuate tate lungsim sungah kiptak in kicamteh ahihi.

5.      Innkuan sung khat le khat ki it ding. ( 1 Cor. 14:1)

Innkuan sung nopna dingin khat le khat ki itna pen a bulpi hi. Ki it theihna dingin, mihing ih hih manin kimai sakna zong kisam hi. Sawltak Paul in Korin pawlpi ta kiangah ‘ki itna neihna ding na hanciam un..’ na ci hi. Pasian in a teeltuam Israel mite kiangah itna thukham lian pen dingin na koih hi. Lai Siangtho thak sungah ki itna mah bulphuh a kalsuanding hong vaikhak lai hi. Tua hi in, “Ki itna in Pasian aa hi..” cihte a hi zongin a it thei mi in Pasian lungkim sak hi cit te a hi zongin kimu thei hi.

6.     Innsungah Pasian liansak pen ni. ( Ps. 127:1)

Topa in inn a lam kei le alam mite nasepna a mawkna hi ci in Late aphuakte in hong hilh uhhi. Leitungah bang zah takin siamin, pil in, hau in, siamhi ta le hang, Topa tawh ih omkhjop kei le amawkna pi a hihi.

Source : Upnalai Gil Vol-10,No-4 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: INNKUAN SUNG NOPNA DING THU (6)TE. Description: Rating: 5 Reviewed By: Cinpu Zomi
Scroll to Top