728x90 AdSpace

Hot
Menu
Zon-ol na Donate

Latest News

JACKIE CHAN TANGTHU TOMKIM.

JACKIE CHAN TANGTHU TOMKIM.
Min : 
Jackie Chan
Min neu : 
Y'uen Lo
Sing Lung
Pao Pao
Min takpi :
Chan Kong-sang
Siamna :
Film Actor, Martial Arts Expert
Suahni :
April 7, 1954 (Kum 61)
Laisinna : 
Chinese Opera Research Institute
Suahna Mun :
Victoria Peak, Hong Kong
A zii min : 
Lin Feng-jiao ( mariage/Akiteen kum uh 1982)
A tate : 
Jaycee Chan, Etta Ng Chok Lam
A sanna : 5' 9"

Jackie Chan pen Victoria Peak, Hong Kong ah April 7, 1954 in piang hi. A pa’ min Charles Chan hi a, a nu’ min Lee-lee Chan ahi hi. A nu leh pa’n a suah cil in a min dingin Kong-sang Chan na phuak uh hi. Kong-sang Chan a khiatna in Hong Kong a piang a cihna hi. A suahna khiatna dingin a nu ki-at a, hong pian khiat in pound 12 pha hi. A nu leh a pa zawng lua ahih manin a nu’ ki-atna a sum beite sia vuanpa tungah na ba uh hi.

A Nuu leh Apa.

A nu leh a pa a zawn’ mahmah hangin nasep bel nei tuak uh hi. A pa’n Hong Kong a French embassy ah an huan nasep sem a, a nu’n mi inn ah nasem in sum zong hi. A neu a kipanin a pa’n zingsang thohbaih pih in, kungfu sinsak den hi. A pa’n kungfu sin leh thuak zawhna, hangsanna leh gamtatna khuahei kilawm hong sin ding hi cin ngaihsut hi.

Jackie Chan kum 7 a phak 1960 kum in in a pa in Charles Chan Australia a Americate embassy ah an huan nasep ngah ahih manin a nusiat loh phamawh hi. A pa’n Hong Kong ah nusia leng kungfu mah sin zom thei dinga, China Drama Academy ah khum leng kum 10 sung hih sanginn ah drama sin thei cih zong ngaihsut khawm ahih manin Hong Kong ah nusiat san hi.

Jackie Chan in a sangkah sungin kungfu, circus lahna ding a kisin gymnastic nam khat ahi acrobatic kici, lasak leh limcin (acting) cihte sin khawm hi. A sangkahna ah a sinte pen Peking Opera ah lasak, limcin, acrobatic leh martial arts kidemna a kihel ding utte kahna mun ahi hi. A sangkahna ah thumang lote dan khauh mahmah kipia den a, a haksat mahmah hangin a paina ding leh a omna ding mun dang om lo ahih manin Jackei Chan kah to suak hi. Hih sangah a kah sungin pai khiat ding kiphal lo ahih manin a nu leh a pa tawh tam vei kimu lo uh hi.

China Drama Academy ah sang a kah lai in amasa pen dingin, kum 8 bek a phak in Catonese movie “Seven Little Villian Fighters: Big and Little Wong Tin Bar” kici ah kihel hi. Tua khit a sawt loin tua sanginn a opera lasa “The Seven Little Fortune” kici sungah hong kihel hi. Hih sungah film tampi a a piah khawmpih a lawm hoih mahmah Samo Hung leh Yuen Biao zong kihel uh ahih manin lawm hoih mahmah hong suak uh hi. A sawt loin a thum in hong kipawl uh a, “The Three Brothers”  hong kici uh hi. Jackie Chan hong picin khit nungin film action stunman (film sunga kilimna lim a piah taktakte) in hong pang a, Hong Kong film industry ah a min hong kithei pian pah hi.

Kum 17 a phak in China Drama Academy panin graduate man hi. Graduate a man khit hangin tua hun in Chinese opera pen mi’n thupi sim nawn lo ahih manun hih sanginn panin graduate zo khia ten sep ding mu zo lo uh hi. Laisim ding dan leh lai-at ding dan zong hilh lo uh ahih manin siamna leh pilna nei lote sep ding ahih kei leh stunman nasepna zon ding cih lo buang lampi dang nei lo sawnsawn uh hi. Film/movie pen tua hun in Hong Kong bek ah kibawl a, tua a kihel dingin khangno, mi hangsan leh stunman hat mahmahte bek kideih hi. Jackie Chan pen a ngaihsutna manlangin, hih ding a kici khat peuhpeuh lauh nei loin hih suk ziauziau ngam ahih manin director ten deih mahmah uh hi.


Hong Kong ah hong pai in stunman dingin hong pang hi. Kum sawt lo khit nungin Hong Kong film industry in sum meet ngah zo lo ahih manin a nusiat loh hong phamawh kik hi. Australia ah a nu leh a pa kiangah hong paisuk in, restaurant leh in van bawlna mun cih khawng peuhah hong kilawh kawikawi hi. Australia ah a nasepna ah a min Kong-sang cih lawh haksa sa ahih manin ‘Jackie’ ci’n sam uh a, Australia ah a nasepna mun panin ‘Jackie’ cih min hong ngahin, Jackie cin amin kisam suak hi. Australia ah nasepna haksa lua ahih manin Australia gam cimtak huai sa mahmah hi. Australia ah a om lai in Hong Kong film industry ah director/producer minthang mahmah Lo Wei kicipa tawh nasem leh khawm film Manager Willie Chan in film thak khat bawl sawm a, tua dingin mi kisam ahih manin Jackie Chan telegram tung panin hopih in sam hi. Hih pen Australia gam panin a pusuakna ding lampi om sun hong suak hi. Tua hun pen 1976 kum hi a, Jackei kum 21 bek hi pan hi. Willie Chan in “New Fist of Fury’’ cih film sungah kihel dingin cial ahih manin Australia nusiatsan pah hi.

Hong Kong a tun khit phet in Willie Chan in a kisapna khempeuh leh a maban ding khempeuh vaihawmsak pah a, lawm hoih mahmah hong suak pah uh hi. A lawhcinna thu a gen khak peuhpeuh ciangin Willie Chan’ min lo khial ngei lo hi. Ahih hangin hih film ah a director ten Jackie siamna lamsang lim takin zangsak lo uh ahih manin hih film pen lawhcing lua lo hi. Amah pen kungfu leh ciamnuih piah khawm lamsang siam mahmah ahih manin a sawt loin ama’ siamna tawh kituah mahmah ding “Snake In Eagle’s Shadow” kici hong bawl a, hong minthang khia pah hi. Tua khit in “Drunken Master” kici hong bawl leuleu a, hih film in blockbuster hong ngah kik leuleu hi. Tua khitin “Fearless Hyena” kici hong bawl zom a, hih film zong film hit mahmah leh minthang hong hi leuleu hi. Bruce Lee a hun lo pi in hong sih vat manin ama za laih ding Hong Kong film industry ah om lo ahih manin Jackie Chan in Bruce Lee za hong laih in film tuamtuam hong bawl zom zel a, Asia bup gen tak loh leitung mun tuamtuamah amin hong kizeel suak pah hi.

Asia sungah hong minthan’ khit nungin America ah hong pai hi. Ahih hangin deih bangin a min hong kilang zo lo ahih manin America nusia kik hi. Mangpau siam lo ahih manin tuitum zo lo suak hi. Jackei in Mangpau leh limcin khop pen haksa sa pen ing cin gen hi. US ah a bawl “Rumble In The Bronx” kici kum 10 khit nungin US ten hong khuanung muh nuam  panpan ta uh hi. Tua khit in “Shanghai Noon” leh “Rush Hour 1,2 &3 “ hong bawl kik a, hih khui khempeuh Hollywood A list sungah hong kiciamteh in leitung khempeuh in amin hong thei suak uh hi. Tua khit in “The Tuxedo”, “The Medallion” leh “Around The World In 60 Days” hong piah kik leuleu a, ahih hangin amasate bangin hong minthang khia zo lo hi.

Jakie Chan kum 61 val a phak khit hangin action film leh stunman mah in pang veve lai hi. Nung diak a kipanin action film tam bawl lua nawn loin a film bawlte pen fantasy, drama leh romance lamah hong laih hi. Tu lianin a hun tam zaw pen dongtuakte huhna leh huh ding kisam cimawh, tagah, beidongte huh in ‘charity work’ lamsang pi bawl mahmah hi. Tu in UNte Ambassador for UNICEF/UNAIDS in pang a, khanghamte, naupangte leh lam-et bei a natna tuamtuam neite leh AID natna neite huhna in a hunte zang zaw ta hi.

A innkuan limlaak uh.

Jackie in December 1, 1982 in Lin Feng-Jiao tawh ki teng in, a no tawh luak khawm hi. Tapa khat, December 3, 1982 in Jaycee Chan kici nei uh hi. A tapa zong limcing(Kineih Siam) mah in pang hi. Jackie Chan a lawm ten Y’uen Lo, Sing Lung, Pao Pao cih bangin zong sam uh hi. A tun sang lo a bat hangin pii 5 leh letmat  8½" (1.74 m) pha hi.

A Website & Source : http://www.jackiechan.com/

Chinese Zodiac' Melmuh Tongsan akim in ki en thei hi.



Director: Jackie Chan

Writers: Frankie Chan, Jackie Chan
Stars: Jackie Chan, Qi Shu, Xingtong Yao



*************************************************************
Theih ding : Jackie Chan Tangthu tomkim pen Tg. Thang Khan Lian (India) in www.laibusaal.com ading ngiat in hong gelh sak ahi hi. I biak Pasian in hong zatsak semsem ta hen. Hih mun pan laisim khempeuhte tang in lungdam i ko hi.
Cinpu Zomi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: JACKIE CHAN TANGTHU TOMKIM. Description: Rating: 5 Reviewed By: Cinpu Zomi
Scroll to Top