728x90 AdSpace

Hot
Menu
Zon-ol na Donate

Latest News

Lailui Khua Tangthu.

Lailui khua Piankhiatna Tangthu.
Lailui Khua.

THU MASA.
Tediim khuapi a teng Rev. Pum Khan Nang in khua ciat aa khua tang thu deih a hih man in Lailui khua tangthu a kan dingin, Siapi Pum Khan Thang (Primary Head Master) Pension U Do Suan Thang (Primary Assitant Teacher pension) leh Lailui khua Hausa Council te tungah huh na ngen hi. Tua a hih man in, Lailui khua a pawl cingtak aa, kaih khop dingleh a maan pen a suah theih na dingin, a nuai aa beh tuamtuam pan Beh makai te tawh kikum in, Kapu kapa te ciapteh na bang leh ciapteh na tuamtuamte pan kai khawm in khua tangthu kabawl uh hi. Hih khua tangthu pen amaan pen dingin ka ngaih sun uh leh Ka thukim pen uh a hi hi.

       A nuai aa beh makai teng in kapu kapa uh tungpan un ka zak uh thu te leh mun dang dang pan kakaih khop te uh a hih man in, Lailui khua tangthu tawh kisai in, a man pen ding aa ka ngaih sut uh a hi hi. Hih hun lai in, Laitawh ki bawl ciapteh na om lo in, Kapu kapa te hong kamvai khak te ka ciapteh uh a hi hi. Tanglai ihpu ih pate in thu maan gen in zuau phuak ngei lo a hih man in, amaan pen mah a lak san pah ding lo ngal thu dang om lo hi.

Hih tangthu kaihkhopna ah et kak (Ref: ) aa ka zat uh a nuai aa bangteng a hi hi.
(1) Lailui khua Hausa lui Pu Tun Nang (Taithul Beh) ciapteh na
(2) Lailui khua Hausa lui Pu Do Suan Thang (Hangsing beh) Thu kaih khop te
(3) Ngennung khua mi Pu Pum Suan Pau leh Pu Suak Khua Pau te ciapteh na

KHUA TANGTHU KAI KHAWM BEH MAKAI TENG

No.             Min                                 Behmin                        
(1)     Pa Do Suan Thang                  Hangsing beh
(2)     Pa On Khaw Thawng               Hangsing beh
(3)     Pa Tun Suan Thang                 Sektak
(4)     Pa Kham Do Khen                    Sektak
(5)     Pu Sian Za Dal                         Sektak
(6)     Pa Thang Suan Lian                 Taithul
(7)     Pa Dongh Khan Mung               Taithul
(8)     Pa Thang Cin Thawn                Taithul
(9)     Pa Vial Khan Pau                     Kipgen
(10)    Pa Vial Vungh Thang               Kipgen
(11)    Pa Go Khan En                       Kipgen
(12)    Pa Go Khan Khup                    Haukip
(13)    Pa Gin Khan Pau                     Haukip
(14)    Pa Hang Cin Pau                     Haukip

       Lailui khua tangthu tawh kisai a beisa hun leh hong pai lai dinghunte ah a bawl a om leh mimal bawl hi aa deih kaih thu hi ci-in ki ciamteh ding hi.

LAILUI KHUA SAT CIL NA LEH KKHUA KIP A SUAH NA

(PU TUN NANG CIAPTEHNA)
       1885 kum ciangin, Gamkeek mikang kum pi galkap te in, Kawl gam zang lei sungteng a la khin uh hi. 1886 kum aa kipan in, mi kang gal kap mang Raikes Makai in Zogam sim dingin, Kawlpi pan in hong ki pan uh hi. Zomi ten] zong a hat na zah uh sit lo in, Gam leh lei na huu na dal uh aa, Tulsuk, Phat zang, Leisan mual cih mun te pan in, nasia tak in, khak tan in, Mikang gal kap te na do uh hi. Tua a hih man in Kum thum vilvel ki nang zo aa, ong kah to pak lo uh hi.

       1888 kum ciangin,Mikang gal kapte pawl khat Tediim khua avaan ding in Kawlpi pan in hongpai to uh aa Bang mah ki cihna om lo in a ciah suk kik uh hi. 1889 kum ciangin, Nasiatak in ki thawi in hong kah to uh aa, Sihzang gam Vangteh khua leh Saizang khua te nawk in, 1889 kum March ni (3) ni in Tediim khua sim in mei tawh a hal tum uh hi. Thau tawi kikhai lua a hih man in gal kilel  asuak hi.

       Mikang gal te ii thah dingleh mat ding ki ut lo a hih man in, Tediim khua mi atamzaw leh Hausa lian khem peuh India gam sung Mulam gam dong ah gal a tai uh hi. Tua hun aa kipan in, ongten den pah uh a hih man in, Tediim gam sungah Tualgal aa kipan gal dangtuamtuam te om nawn lo hi. Tualgal aa kipan gal dang atuamtuam a om nawn loh hangin, Mikanggal kap te tawh ki lem na om lo in, Tediim gamsungah kua mah ki teng kip thei lo  hi. Bang hang hiam cih leh Mikangte in Zomite gallian pen a hih man ahi hi.

       Tediim khua mi a tam zaw leh Hausa lian khem peuh in, Tediim gam a lawih uh hang in, Pu Khai On leh Pu Mang Tun in na lawi hetlo in, Tumsih a lo buk vuah gal a tai uh hi. Tua mah bangin, Pu Tuang Khaw Thang te zong Vanglai (Lailuigam) a lo buk vuah galtai in a om uh hi.

       Tua hun laitak in mikang galkap te in, Valvum gam tungzang a kicihna mun ah giah phual sat in a om uh hi. Tungzang a kicihna mun ah Mikang galkapte a om uh hangin, Valvum khua mite bangmah cih lo in, lung nuam tak in ateng kip thei uh hi. Valvum khua pen banghangin, kip in ki hal lo hiam ci-in Pu Khai On te leh Pu Tuang Khaw Thang te a thu ki dawp in kikum uh hi. Tua bangin thu a kikup uh ciangin, Valum khua ah thu dongh ding in Taithul beh pan,Pu Mang Tun leh Suan Takbeh pan Pu Hau Suak a pai sak uh hi.

       Pu Mang Tun leh Pu Hau Suak in Valvumte a dot ciangin, ko aktui aktak leh Zuthawl tawh mikang gal kapte ka lut uh aa amau lungdam in kakilem uh hi. Tua ahih manin, lungnuam tak in a teng kip thei hi ung Valvumte'n na ci uh hi.

       Hi bang thu a theih ciangun, Mikanggalkap tetawh ki lem na dingin, Antui aktak Zuthawl tawh lut ding a vai hawm uh aa Pu Mangtun leh Pu Hau Suak mah alut dingin aseh uh hi. Valvumgam Tungzang a kicihna aa om mikang gal kapte Aktui aktak leh Zuthawl tawh a kiseh gel in, a valut uh ciangin, a mau lungdam in ki lem na om pan hi.

       Hi bangin Mikang gal kapte tungah ki lem na dingin gal lutna a bawl masa pepeuh te in, Tediim gamsungah na teng kip thei bek uh hi. Mikangte tawh ki lem na a bawl khem peuh te in, Tediim gam sung a utna mun mun ah khua sat in lung nuam tak in kiteng thei ta hi.

       Tua a hih ciangin, Pu Khai On leh Pu Mang Tun zong Tumsih a lo buk pan in Vanglai khua ah na teng khawm uh hi. Tua mah bangin, Pu Tuang Khaw Thang te zong Vanglai a lo buk pan in Ngen nungkhau  ah ateng uh hi.

       Vanglai khua pan in Pu Khai On leh Pu Mang Tun in, khua sat na ding gam a vaan uh aa, khua dai gam leh Lailui gam a van uh hi. Khuadai gam pen Ni ong niseh mun a hih man in Tuk an khal an hoih tak in piang ding hi. A hi zong in tui haksa khat om leh Zalui in hal a hih ciangin Tediim tawh kikawm na baih lo ding hi na ci uh hi.

       Lailui gam pen ni kha nuai hi aa khal an hoih lo ding hi. A hi zongin, thu haksa khat om leh Tediim tawh kikawm na nai zaw ol zaw a hih man in Lailui khua sat ni ci-in a thu kim uh hi.
       Tua a hih ciangin, 1889 kum sung mah in Pu Khai On makai in, inn 7 in Lailui khua sat in a teng masa uh hi, Lailui khuasat Pu Khai On a hih manin, Hausa asem sak pah uh hi. Tua a hih manin, Lailui khua a h Hausa a sem masa pen Pu Khai On a hi hi.

LAILUI KI CIH NA THU.
       Pu Khai On khuasat ma hun khat lai in, tu laitak a teen  na khua pan Tai lang bang a gam lat na mun nisuah na lei taw lam ah lui neu khat a om hi. Tua lui neu ii a lang  tuak ah Zomi pawl khat a teng ngei uh aa, a khualai aa, lui om bul phuh in, a teng na mun lailui na ci uh hi. Hih Lailui cin min a phuak Zomite pen, Leitangh hoih na mun zuan in Saklam ah lal uh hi. Amaute suan haipi kung khat tu ding in hoih lai aa, Lailui Haipi ki ci hi. Amauteen na mun tu dongin Lailui kici aa, a inn munte uh zong ki mu thei lai hi. Tua mite phuah sa lai luimin pua in, Pu Khai On in khua nasat a hih manin, tu aa teen na mun Lailui khua a kici a hi hi.

       Mikangte tawh galki lem na a bawl khit ciang un, lungnuam ak in teen kip na dingkhua nasat thei uh a hih manin, Pu Khai On in a khua satna la a nuai aa bangin phuak hi.
(a) Lun awi  in vang khua sat ing ee, kum sawt phuh bang kho hen aw.
(b) Kum sawt phun bang kho hen aw, vangkhua min thang suak hen aw.

        Lailui khua sat khawm masa in (7) te in a nuai aa pupite nga ahi hi.
       (1) Pu Khai On              Hangsing beh
       (2) Pu Mang Tun           Taithul beh
       (3) Pu Sel Cin                Taithul beh
       (4) Pu Vum Pau             Kipgen beh
       (5) Pu Vum Kai              Kipgen beh
       (6) Pu Lian Neng            Kipgen beh
       (7) Pu Hang Kai              Hau kip beh

       Lailui khuasat khawm inn (7) teng lungnuamtak in, a teen kip khit huh khat ciangin, Mawng keen khua pan in Sektak beh Pu Thual Gen, Pu Suan Langh  Pu On Tawng  te Lailui khua ah a teng uh hi. Tua mah bangin amau teen na muntek pan in, Buansing beh Pu Hong Gin, Pu Son Zang te leh Sotebeh Pu Kam Neng te Lailui khua ah ateng uh hi. Hih hun laitak in a munmun pan in Lailui khua ah nakiteng aa, inn 25 ki pha hi. Hih teng ban ah khua sat te naute pawl khat inn a tuan ciang in, inn 30 ki pha hi.

       Lailui gam pen a neu ban ah Logam hoih mun tawm lua a hih manin, hun khat ciangin, Gam neem na leh gam zai na mun ah pawl khat a lal uh hi. Hih bangin gam neem na, utna mun tek ah ki lal san a hih man in inn (30) a pha khin sa pen kiam suksuk hi. Pu Hong Gin, Pu Son Zang te Lezang ah Pu Kam Neng atate Anlangh ah cih bangin ki lal ciat hi. Hi bang in kilal san zel a hih manin, Lailui khua pen inn (30) phak kik na ding baih lo hi, na ci uh hi.

       Lailui khau a vekpi un a lal khiat khak ding Upipa Pu Hau Cin Khup in hoih salo a hih manin Khuasat pa kiang ah Pu Khai On aw, Tediim kongpai ciang aa kong zintunna dingleh Tuibuk kong sim na ding in nang nalal peuh mah ken, na lau leh ong lal san te Gawl thuap sagin in na phut in na ci hi. Tua a cih mah bangin, Pawl khat a lal hangin atam zaw lal khia lo in na teng kip suak uh hi. Tua a hih ciang in a hun hun in, inn tuan thak om a hih man in, Lailui khua pen inn tam semsem in, khua kip leh khua thu pi a suak hi. 1904-1905 kum aa ki pan a hon a hon in khua dang pan in, ong ki pem a hih manin, Lailui khua pen inn tam semsem hi. Khua sat cil in Beh li kigawm inn (7) ki pha tu hun ciangin beh (9) kigawm in 124 ki pha ta hi.

Pu Pum Suan Pau (Naulak) leh Pu Suak Khaw Pau (Manlun ) ciapteh na

Pu Khan Lian Te U Nau Ngennung khua ateen na thu.
       Mikaang gal  tediim khua sim in meitawh a hal tum mapek hun khat lai in, Gamngai khuapan in Sukte beh Pu Thang Khaw Pau Ngennung khua ah teeng in Hausa asem hi. Pu Thang Khaw Pau in Hausa a sep hun sungin Tediim khua pan in, Sukte beh Pu Khan Lian Ngennung khua ah a teng hi.

       Pu Khan Lian pen Ngennungkhua ah sawt veipi ongteng aa, logam zong a kicingin a nei hi. Tuni dongin a gah limtak aa aneek uh ahi haisan kung khat leh Haivom kung khat zong Pu Khan Lian Suan ki ci aa, khua pha zang a kicinna mun a lotan sung ah asuan a hi hi.

       Mikang gal in Tediim mei tawh a hal tum ma hun khat ciangin Pu Khan Lian teekta a hih manin a si hi. Tua Ciangin, a ki hinglap na dingin, ngen nungkhua aa teng Manlun bek Pu Mangsuak Sial a ki zabotan a pha khat lei tawi in ki hing lap aa, Ngen nung khua ah ki vui hi. Tua a hih man in, Pu Khan lian pen a sih dong ngennungkhua ah a teng a hi hi.

       Pu Khan Lian tate a hi, Pu Vum Kam te U Nau in, zi leh ta a neih ma un, Ngen nung gam sung a deih na mun teng uh, a lo gam dingin a kham khol uh hi. Hausapa Pu Dim Kam leh Upate in, inn tuan masa zui in logam apiakciang in Pu Vum Kam te U nau in, a kham kholh na mun logamte a kihel hi. Tua ciangin Pu Vum Kam te U nau in, ei leh ei hi na pi hang hi bang aa ki bawl lawmlawm ci-in a kha sia uh hi.

       Mikang galkapte tawh kilemnaa om khit ciangin, Vanglaipan in Pu Tuang Khaw Thang te Ngennung ah a teng hi. Hih hun laitak in Ngennungkhua ah, kel ki lim khawi mahmah aa huan sung ah neek thei bangmah ki cingthei lo hi. Hih bang thu huhau in, keel phiat ding ki ngaih sun aa, Hausapa Pu Dim Kam in khuazang aa phiat ding ngaihsut hak a sa hi.

       Tua ciangin Hausapa in Pu Tuang Khaw Thang kiang ah, Keelphiat ding vai hawm in la, naphiat zawh leh aliang khatta la in a ci hi. Pu Tuang Khaw Thang in zong Keel Phiat ding vai hawm in a phiat zotakpi a hi man in, A liang khat ta ala hi. Tua a hih man in Keelsiah kaaipa kici hi. Pu Tuang Khaw Than pen Ngennung khua ah tawl pi khat mah teng in, hun khat ciangin Tonzang khua ah a lal hi.

       Pu Pau Cin Hau Zong kum (15) hun sung a cinat na pan a dam theih lo ciangin, amah leh a mah thau tawh kikap lum ding a sawm hun zong Ngennung khuaah a teen hun sung mah a hi hi. Tua ciang in a thu nget na mual a kici Suangphuh mual zong Ngennung khua pam a gam la lo Teek lui khua lam a hi hi. Tua ban ah Ngennung khua ah Pu Pau Cin Hau in, A Biak inn ding in khat a lampen, Hausapa Pu Dim Kam in Suangtum tawh a den vang sak hi. Hih bangthu huhau in, Pu Pau Cin Hau Ngen Nung khuapan Vanglai khua ah alal hi.

PU TUN NANG CIAPTEH NA.
Sukte beh Lailui khuaa tun na thu
       Pu Kai On in, Hausa a sep laitak hun khat ciagin khuasat cil sung aa ki hel a hi Pu Vum Pau in, ih tote mah in Hausa sem in hong uk leh ut hang ci in, vaihawm aa Unau bang a ki-it pih te a hi Pu Vum Kam te u nau Ngennung khua ah a vasam hi. Tua a hih ciangin, 1904 kum sungin, Pu Khai Pau ongtung masa aa Pu Khai On inn mun a suan khia hi.

       Tua khit ciangin, Pu Cin Khaw Hau ongtungleu leu aa, Pu Khai Pau in a inn mun awn in, khua zang in Pu Khai Pau inn mun ding ki ziik sak hi. Pu Cin Khaw Hau in, inn a lamh khit hun khat ciangin, Pu Vum Pau in Pu Khai On kiang ah, na hau sa sep Pu Cin Khaw Hau khiat in a ci hi. Tua ciangin Pu Khai On in ngal hat kisa nawn lo a hih manin, Nong awi zawk uh a hih leh ci-in a hausa sep Pu Cin Khaw Hau a khiat hi. Tua hun aa kipan in, Pu Cin Khaw Hau in Lailui khua ah Hausa a sem pan a hi hi.

       Pu Khai Pau leh Pu Cin Khaw Hau Lailui khua ong thun khit ciang in,hong tungnai lo asang gam Pasal te, ahun a hun in ong tung uh hi. 1908-1909 kum sung in, Vanglai khua pan in, Pu Pau Cin Hau ongtung in amah ongthung nunung pen a hi hi. A mau Unau Pasal giat pha uh aa, Lailui khua inn giat a ki beh lap ong suak hi.
       Tua U nau Pasal giat te in, 
(1) Pu Vum Kam 
(2) Pu Khai Pau 
(3) Pu Tual Hang 
(4) Pu Pau Cin Hau 
(5) Pu Thang Khaw Kam 
(6) Pu Khai Za Deng
(7) Pu Vum Khaw Thang 
(8) Pu Cin  Khaw Hau te a hi hi uh hi.

       1922 kum sungin Mualbeem khua ah, Pu Khai Hau ngam luah dingin, Pu Pau Cin Hau pai in a teng suak hi. 1922 kum sung mah in, Pu Tual Hang Ngennung khua ah tai kik in, a teng suak hi.

       Japan gal ongtun ciangin, Pu Tuang Khaw Thang tate sung pan in Pu Thawng Pau te inn kuan Tonzang khua pan in Uk pua In dia gam ah lal ding a sawm uh hi. Tua ciang in Pu Cin Khaw Hau in kikawm na haksading a hih teh ci in vai hawm in va la uh aa Tozang khua pan in, 
(1) Pu Thawng Pau 
(2) A mo Pi Awi Khaw Niang leh a ta te, 
(3)  Pu Kham Cin Pau 
(4) Pu Khup Cin Thang 
(5) Pu Thang Za Kam te 1945 kum Jannuary kha 1 ni in Lailui khua hong tung uh hi. Pu Thawng pau in Tapa  4 a neih sung uh pan in, 2 ongteng kip a hih man in, Lailui khua inn nih a ki  beh lap suak hi.

Source : Leo Tungpi / Blog.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Lailui Khua Tangthu. Description: Rating: 5 Reviewed By: Cinpu Zomi
Scroll to Top