728x90 AdSpace

Hot
Menu
Zon-ol na Donate

Latest News

VAANG (Dignity) - T. Zokhai

Vaang (Dignity)
Gelh : Pu T. Zokhai

Midangte-in hongpiimuhna, hongzahtaakna leh thupi hongsakna, gamtatluheek leh zialehtong hoihte’ hang-a ngahding kilawm thupisimna-in vaang ahihi. Midangte’ piimuhna cihpahphot-in vaangpen naakpi-in deihhuai-a, manphazong manpha mahmahhi, banghanghiam cihleh mite’ zahtaakna leh piimuhna-in hongmaaitai sakden-a, maaitainain cidamna leh lungsimdamna piangsak ahihman-in silmanpha mahmahkhat ahihi.
Micinmitang-in vaang neikim lohi, ahizong-in micinmitang-in vaang deihkimciat uhhi. Tua ahihman-in mikim-in vaang zongciat uh-a, gamtatluheek hoihte, citna siamna te-leh thuphabawlna te-tawh lamtuamtuam pan-in vaang kizong ciat-a, pawlkhatte leuleuin ahihleh lampelh tawn-in zuaugenna-tawh vaang zong-uhhi. Bangteng ahizong-in zuaugenna-tawh vaang a-ngah mite’ vaang-in sawtpi kho theilo-a, thumaan hongkilat ciang-in a-neihsa vaang-pen daina suakdenhi. Amasa-in vaang i-deihleh vaang asusia-thei gamtat kampaute pelhphotphot lehang zonlohsa-in vaang ki-ngah zaw-a, kho zawlaai-hi. Vaang asusiathei thu 99 te-leh lahciannate anuai-a bang-in encianding hihang!

1. Nulehpa’ thumang ngeilo mikhat-in vaangnei ngeilo dinghi, banghanghiam cihleh ama’ nulehpa athupibawl-lo mite kuamah’n piimuh ngeilo-hi. Ahizong-in nulehpa’ thumang khempeuh-in vaangpha ngahkim tuanlo-hi, banghanghiam cihleh nulehpa’ thumang adiil-in om-a, nulehpa’ thumanna bektawh vaang kineipah naailo-hi.

2. Nulehpa azahtaaklo mikhat-in vaang neilo ding-a, tanu tapate a-itlo mipeuhmahinzong vaangnei ngeilo dinghi, banghanghiam cihleh mihing’ neihding akilawm thute aneilo ahihman ahihi.

3. Atate ahilh zolo nulehpate-in vaangnei theilo-hi, banghanghiam cihleh atate-in zahtaaklo cihna hi-a, tanu tapate’ zahtaakloh mite-pen midangte’ zahtaak ding-a akilawm mizong hilo-uhhi.

4. Asanggamte-tawh akitawng niloh mikhat-in vaangnei ngeilo dinghi, banghanghiam cihleh kitot kiseelna-pen kizahtaaklohna, kithusimlohna pan-a hongpiang ahihman-in asanggamte’ zahtaakloh mikhat midangte’ zahtaakding inzong acinglo ahihmanhi. 

5. Azii alel mipa’ innkuan-in vaangnei ngeilo dinghi, banghanghiam cihleh Piangsakpain zii’ tung-ah thunei ding-in pasal’ tung-ah thupia hilo-hiam!

6. Nupa kitawng nilohte-in vaangnei ngeilo dinghi, banghanghiam cihleh amaute-nih aki-thusimloh nungsang kua-in thusim theituanding ahihiam!

7. Asunghte’ inn-ah atualbial niloh mi-in vaang aneihloh mahbang-in anualamte akiphatsakpih numei-in vaangnei ngeilo dinghi, banghanghiam cihleh tuabang mite-in nupa kiteenna akhiatna theicianlo-uh ahihman-in zumna meeltheilo mihai ahi-uhhi.

8. Abeh aphung akhuallo, theizong atheilo, awlmawhnazong a-neilo mikhat-in vaangnei ngeilo dinghi, banghanghiam cihleh tuabang mite abeh aphung-inzong thupiisimlo ahihman-in midangte inzong thupiisim thei-khollo uhhi, banghanghiam cihleh behlehphung theilo-te toptawm (adopted) naute-bang ahi-uhhi.

9. Aminam, abeh aphung azumpih mi-in vaangnei theilo dinghi, banghanghiam cihleh aminam’ Piangsakpa azumpih suakpah ahihman-in Pasian-in amah zumpih dinghi.

10. Ama’ duangleh meel hoihsaklohna-tawh aphunphun, athuumthuum mi-in vaang aneihloh mahbang-in hoihkisa-a aki-a’sak, akiphasak mi-inzong vaangnei ngeilo dinghi, banghanghiam cihleh anihtuak-uh’n kiphatsakna-mah ahihi.

11. Zukham niloh mikhat-in vaangnei ngeilo dinghi, banghanghiam cihleh zukhamkham mite-in piltang-a agen ngamlohte zu-tawh suahkhawm den-a, thupi agensunsun cianginzong ki-awlmawh lo-in, tuabang zukhamte’ kiangpan-in mite kidaang denlelhi.

12. Khamtheih guihtheihtawh atualbial mite inzong vaangnei ngeilo dinghi, banghanghiam cihleh micitak, mi-muanhuai kisimna sung-ah amaute kihel lo-hi.

13. Thaaikaap (playing card) kimawl-a, gualnopna phualte-a atualbialden mite inzong vaangnei ngeilo dinghi, banghanghiam cihleh mite-in amaute muang theilo uhhi.

14. Numei kizuakte’ lak-ah atualbial mikhat-in vaangnei ngeilo dinghi, banghanghiam cihleh gamtatsia-te’ lak-ah akihhuai siatna-khat ahihman ahihi.

15. Numeinote ahihkeileh nungaknote a-no niloh leh numei limci-thu bekbek gen-a a-nei mite-in vaangnei theilo dinghi, banghanghiam cihleh tuate zulhtatna namkhat ahihi.

16. Zukhamthei numei-tawh akikhawl mipa-in vaang aneih ngeiloh mahbang-in zukhamthei numei-in vaangnei ngeingei lohi, banghanghiam cihleh zukham niloh pasal nangawn-in vaang aneihloh nungsang bangcih nawnding ihihiam!

17. Aangzual (mi-tawh aki-hih ziauziau) numei-tawh akithuahthuah pasalte-in vaang aneihloh mahbang-in aangzual numei-in vaangnei thei-ngei peuhmahlo dinghi, banghanghiam cihleh polhtehna leh zulhzaauna ahihmanhi.

18. Avaak-haat, pasal hopihding alawplua numei-in vaangnei theilohi, banghanghiam cihleh tuabang omziate-pen numei piicingte’ zialehtong ahihlohman ahihi.

19. Pasal khattawh tuaituum zeel-a, adang khattawh atuaituum leuleuzeel numei-in vaangnei ngeilo ding-a, tuabangmah-in pasal khat-in numei atuaituumpih alaih zeelleh vaangnei ngeilo dinghi, banghanghiam cihleh muanlahhuaina (unfaithfulness) bulpi ahihi.

20. Zahmawhthu amawk genden mikhat-in vaangnei theilo ding-a, zahmawhsil (sexual organ)-te agen ziauziau mi-in vaangnei ngeilo dinghi, banghanghiam cihleh tuabang kammalte kamkihhuai leh kamzumhuaite hi-a, mi-piicingte’n gen mengmenglo uhhi.

21. Ommunteng-a a-ciamnuui thapaaite-inzong vaangnei theilo dinghi, banghanghiam cihleh ciamnuih ahunleh amual khensiamlohna ahihman-in haina namkhat ahihi.

22. Meigong numei’ kiang-a amahbek paisim-a, azual khukhu pasal-in vaangnei theilo dinghi, banghanghiam cihleh meigongnu’ tungpan lam-etnei hi-a, tuabangmah-in meigong pasal khattawh akisimthuah niloh numei-inzong vaangnei ngeilo dinghi.

23. Meigongnu’ kiang-ah azual khukhu tangvaal leh meigongpa’ kiang-a aki-tahtah nungak-in vaangnei ngeilo dinghi, ahizong-in kiteeng vetleh vaaiteng siangpahhi.

24. Nulehpa nopna lamsang-ah akikeem zolo mite-in vaangnei theilo dinghi, banghanghiam cihleh piicingmi suahna ding-in muanhuaina naakpi-in kisamhi.

25. Zuaugen-a minpha azong mi-peuhmah-in tomnosung’ ading mu-phial mahtaleh asawtlo-in mindaina lianpi thuak dinghi, banghanghiam cihleh thumaan kithei haknawnlo ding-a, thumaan kitheih hunsim-in zuauthu-in daina lianpi ngahdenhi.

26. Akiphasak mi-in vaangnei theilo uhhi, banghanghiam cihleh mipilte kiphasaklo ahihlam mikim-in theikhin ahihman-in akiphasakte mihai ahihlam kithei khinhi.

27. Theihcianloh thu-te genkhiat kaalding a-ngaaklah mi-in vaang nei-theilo dinghi, banghanghiam cihleh ciantak-in hongki genpha-leh amah zuaugen suakziau theihi.

28. Upmawhthu abaan-gen niloh mi-inzong vaang nei-theilo dinghi, banghanghiam cihleh upmawhthugenna-in zuauphuahna hi-a, haina kiciankhat ahihi.

29. Amahle-amah akipumphat niloh mi-in vaang neilo dinghi, banghanghiam cihleh kimawkphatna-in zuaugenna ahihman-in zuau’ khekhaapmah tawndenhi.

30. Sintom-a ahiamgahm mi-in vaang nei-theilo dinghi, banghanghiam cihleh piicing suahna ding-in lungduaina leh nunneemna-in akisam thu-manphate ahihman ahihi.

31. Khutzaang (hehna iipzolo-a vuakna azangh pahpahte) mi-inzong vaang nei-theilo dinghi, banghanghiam cihleh migilo, mihiamgahmte’ zialehtong ahihman ahihi.

32. Huaiham, duhhop, aangsungthei mi-peuhmah-in vaang nei-ngei peuhmahlo dinghi, banghanghiam cihleh tuate-pen miginalote’ neih thusiate ahihman ahihi.

33. Sumlehpaai tungtaang-a acitaklo mite-inzong vaang nei-ngeilo dinghi, banghanghiam cihleh tuabang mite kimuang lo-a, mapanpih ding-inzong kideih khollo-hi.

34. Mihau miliante amaaivil daidai, amahzong maai-etding a-uut mi-in vaang nei-ngeilo dinghi, banghanghiam cihleh kimaaivilna-in thumaanlohna leh aangsungtheihna namkhat ahihi.

35. Sumgolh apia mite-leh sumgolh aduh mite anamnihtuak-uh’n vaang nei-ngeilo dinghi, banghanghiam cihleh tuate-in simtatna leh zuautatna ahihman ahihi.

36. Gongthauklah uisan mite-in vaang nei-thei peuhmahlo dinghi, banghanghiam cihleh uisanna-pen gong khaamzawhlohna hi-a, gong khaamzolo ui bekmah ahihi.

37. Maaizumna meeltheilo mite-in vaang nei-ngeilo dinghi, banghanghiam cihleh tuabang zummawhna-pen midangte awlmawhlohna lianpi-khat hi-a, amahle-amah thupipen kisakna ahihman-in kiphatsakna-mah ahihi.

38. Amaaingal, akhuaval mi-in vaang nei-theilo dinghi, banghanghiam cihleh zumna meeltheilo mite mahtawh akisuun hi-a, mite’ linhahna ngah zawsopding uhhi.

39. Ama’ khialhna-ah zumna leh kisiikkiikna anei theilo mi-in vaang nei-theilo dinghi, banghanghiam cihleh tuabang mite kipuahpha cihbang omngeilo-in khialtosuak uhhi.

40. Meigong tagahte asimmawh, aniammuh, apaampaih mi-in vaang nei-ngeilo thamlo-in Pasian’ hehna ama’ tung-ah sosa dinghi, banghanghiam cihleh amaute Pasian’a ahihi.

41. Mipoi, damlo, dawivei-te simmawh-a aciamnuihbawl mi-in vaang neilo thamlo-in Pasian’ gawtna thuakdinghi, banghanghiam cihleh amaute Pasian-in hutuam denhi.

42. Midangkhat’ kicinlahna leh akhialhna ama’ kiang-ah pulaak-in hilh ngamlopi-a midangte’ kiang-ah puakden thamlo-in hoih asakzahtawh abehlapden mi-in vaang  neilo thamlo-in mite’ etcikna thuakdinghi, banghanghiam cihleh tuabang mite’ kiangah thuhoih thupha leh thupite kipulaak ngamnawnlo dinghi.

43. Ameeltheih mi-khat’ khialhna akigen ciang-in hehgawp-a agum daidai mi-inzong vaang neilo dinghi, banghanghiam cihleh tuabangte kiphatsakna lianpi ahihi.

44. Ameeltheih mi-khat’ khialhna iimpih den-a, ahilhnuamlo ahihkeileh ahilhngamlo miin vaang neilo-hi, banghanghiam cihleh siatna atawsawnsawn ahihman ahihi.

45. Ama’ khialhna akipulaak ciang-a ahehgawp, athangpaihlaak mi-in vaang nei-theilo dinghi, banghanghiam cihleh hihte-pen mihai leh migilote’ zialehtong ahihi.

46. Haksatna, dahna lianpi khatpeuh atuak ciang-in akikeem zolo, uangsantak-a aliinglawnglua mi-in vaang nei-theilo dinghi, banghanghiam cihleh tuabangte piicinlohna hi-a, kihihsakna namkhatzong hilaailaai ahihmanhi.

47. Tuamahbang-in tuahphatna, gualzawhna khatpeuh a-ngah ciang-a uangsantak-a alaam thapaai, pulaakgawp-a, akisial thapaai mi-inzong vaang neilo dinghi, khatvei phazohi, hihkiikkiikding hilo-hi, banghanghiam cihleh hihbangte haina namkhat hi-a, piicingte’ ading azumhuai-khat ahihi.

48. Niik-hoih puahoih akinlua pasal-in vaang neilo dinghi, banghanghiam cihleh pamei (gay) lungsimpuakzia hi-a, tuamahbang-in niiklehpuan khelnono, tunglehnuai dawk, phialphial puan-aangbak, puantomlua, niiksiinglua, pheituam kigaaklua, apandelhdalhlua azangh numei-inzong vaang neilo dinghi, banghanghiam cihleh tuabang kizeppen aangzuak (whore) te’ zialehtong namkhat ahihi.

49. Sepzawhlohding thulianpipi gen niloh-a, bangmahlah ahihlo mi-in vaang neilo dinghi, banghanghiam cihleh mite-in pil-leh thupi asakding a-uut hilel uhhi.

50. Midangte’ nasep ahoih kimlaai asiatgen niloh mi-in vaang nei-ngeilo dinghi, banghanghiam cihleh tuabang lungsimpen migilo leh misiate’a ahihi.

51. Mi-khat’ neihsa ahihkeileh alawhcinna ahazaatlam aki theikhiasak mi-in vaang neingeilo dinghi, banghanghiam cihleh hazaatna-pen migilo leh misiate-a ahihi.

52. Mi’ zia mi’ tong etsiamlo ahihkeileh theilo-a, ama’ nopsak bangbang-a a-om ziauziau mi-in vaang nei-theilo dinghi, banghanghiam cihleh voktawh akilamdanna omlo-hi.

53. Kamciam apelh mi-in vaang nei-theilo dinghi, banghanghiam cihleh ciampelhna-in zuaugenna hi-a, ginaatlohna lianpi-khat ahihi.

54. Makaai a-uutlua mi-in vaang nei-theilo dinghi, banghanghiam cihleh makaai ding-in mite-in sehlo ahihman-a makaai a-uutna akilanghkhia hizawhi.

55. Sumlehpaai bekbek thugen-a anei mi-in vaang nei-theilo dinghi, banghanghiam cihleh ama’ hauhnopna leh asumdeihna apulaaklaak suak-a, aki-zuakthaang ahihi.

56. Mite’ neihsa adeihgawhna leh a-eenna-thu agen niloh mi-in vaang aneihloh mahbangin ama’ neihsa aphatphat mi-inzong vaang nei-theilo dinghi, banghanghiam cihleh apiicing mite-in mite’ neihsa adeihgawhlam kitheisak lo-in, ama’ neihsazong kisialhpih ngeilo uhhi.

57. Guahzu, meiikaai-a kipan khuahunsiate’ ziak-a aphunphun mi-in vaang nei-theilo dinghi, banghanghiam cihleh Piangsakpa aphunsan suak-a, mawhna namkhat ahihi.

58. Suahngalna-in hoihna a-neihsaam hang-in alungsim-a ombangbang asuahkhia pahpahte-in vaang neilo-hi, banghanghiam cihleh gennading amun amual atheilo ahihman-in haina namkhatmah ahihi.

59. Mi-kitawng, mi-kivuate’ thu awlmawh lualiang-a, genkaalding ngaaklah, suutcim theilo mi-in vaang neilo dinghi, banghanghiam cihleh midaisakna namkhat ahihi.

60. Mi-kitawng, mi-kivuate’ lak-ah kisai khollopi ava-kitaaklah niloh mi-in vaang neilo dinghi, banghanghiam cihleh kigolh ahaat mi-in thusia alawmbawl ahihi.

61. Thadah mi-in vaang nei-ngeilo dinghi, banghanghiam cihleh thadahna-pen miginalo kisimna lak-ah khat ahihman ahihi.

62. Heekman-a zianei mi-in vaang nei-theilo dinghi, banghanghiam cihleh heekmanna leh zianeihna-in thadahna’ zialehtongte ahi-uhhi.

63. Alangkhat-ah, athanuam bangkhat-a lelop laplap, apataau pappap mi-inzong vaang nei-theilo dinghi, banghanghiam cihleh piicinlohna zialehtongte ahihman ahihi.

64. Sepding’ sang-a neekding lam-ah amanlaangzaw niloh mi-in vaang nei-ngeilo dinghi, banghanghiam cihleh uisanna-khat hi-a, tuabang mite kuamah-in neekngaih zolo-hi.

65. Tuamahbang-in mihaute’ inn-ah azualden, ahawh thapaai mi-inzong vaang nei-theilo dinghi, banghanghiam cihleh uipi bang-a muinamna azuan kicihlawh dinghi.

66. Ihmut haatlua ahihkeileh thupi-kin omlopi-a avaak-haatlua mi-inzong vaang neitheilo dinghi, banghanghiam cihleh tuate-pen thadahna’ zungpite’ lak-ah kihel-hi.

67. Ama’ pumpi ahehpihlua, atha-aam mi-in vaang nei-ngeilo dinghi, banghanghiam cihleh apiicing mite-in tha aam ngeilo uh-a, amahle-amah ki-ngeekbawl khollo-hi.

68. Alangkhat-ah, akhial upna’ ziak-a ama’ pumpi agawtkhial mi-inzong vaang nei-theilo dinghi, banghanghiam cihleh tuabangmi-in mindaina leh zahkona lawhtaak dinghi.

69. Biakna naseem mipeuhmah-in sumlehpaai deihna-ah akidop zawhkeileh vaang neingeilo dinghi, banghanghiam cihleh Pasian’ naseem hilo-in sum’ naseem kici dinghi.

70. Biakna naseem hi-a, mihaute’ inn-a hawhding alawp nilohleh vaang neivetlo dinghi,banghanghiam cihleh tuabangte-pen muinamna azong uipi-tawh kidanglo-hi.

71. Biakna naseem hi-a, mihau miliante vehding leh thungetsakding thusuak a-ngahnawh luatleh ama’ thusuakpen ama’ meetnadingbek ahihman-in vaang nei-ngeilo dinghi.

72. Biakna naseem hi-a, pawlmite vehna-ah khentuam aneihleh vaang nei-ngeilo dinghi, banghanghiam cihleh ama’ naseppen Pasian’ Nasep ahihlohman ahihi.

73. Biakna naseem hi-a, pawlmite’ ettehding zia-hoih zia-pha aneihkeileh vaang neingeilo dinghi, banghanghiam cihleh ama’ tung-ah Khazih’ zialehtong omlo-hi.

74. Biakna naseem hi-a, pawlmite’ ngeekbawlding, piibawlding a-uutlua mi-in vaang neingeilo dinghi, banghanghiam cihleh Khazih-in a-tuute’ ading a-nunna hongpia khinhi.

75. Biakna naseem hi-a, numeite’ komding, zuutzuutdingpeuh a-uut mi-in thumaan mite’ maai-ah vaang nei-ngeilo dinghi, banghanghiam cihleh zulhzaauna namkhat ahihi.

76. Biakna naseem hi-a, azii atate athuzawh keileh vaang nei-ngeilo dinghi, banghanghiam cihleh azii atate a-uk zolo mi-pen midangte ukding-in tawicinglo-hi.

77. Biakna naseem hi-a, numei zulhzaau khattawh ateenleh vaang neilo dinghi, banghanghiam cihleh nupa kimawhna thute pawlpi’ maai-ah hilh ngamlo dinghi.

78. Biakna naseem khatpeuh-in aangkawmna hongzatleh vaang nei-theilo dinghi, banghanghiam cihleh Pasian’ zaakdah mawhnate’ lak-ah khat ahihi.

79. Biakna naseem hi-a, minam akhuallo mi-in vaang nei-ngeilo ding-a, Pasian’ naseem hilo dinghi, banghanghiam cihleh Taanglaai Misiangte minam itlo kuamah omlo-hi.

80. Biakna naseem khat-in pawlpi panmun lending-in tawicingleh cinglo encianlo-in ama’ mite aguan ziauziau-leh vaang neilo dinghi, banghanghiam cihleh tawicinglo mikhat-in upa makaai asepna pawlpi muanhuai ngeilo dinghi.

81. Biakna naseem khat-in ama’ sang-a tawicingzaw makaaipa’ koihsa upa-khat ahazaatleh vaang nei-theilo dinghi, banghanghiam cihleh hazaatna-in siatna ahihi.

82. Biakna naseem khat-in thumaan leenkiplo-in azii atate’ genpeuhtawh vaai ahawmleh tua-pa bekthamlo apawlpi nangawn-in vaang neilo thamlo-in mindaina thuak dinghi.

83. Biakna sung-ah sung-mi pua-mi akhentuam upa ahihkeileh makaaite-in vaang neilo thamlo-in tua pawlpi-pen biakna kicilo-in innkuan kipawlna kicihsak dinghi.

84. Biakna nasepding paulam-in numei-khat azinkhiatleh vaang neilo ding-a, azinpih pasal inzong vaang neituanlo dinghi, banghanghiam cihleh atuak khinsa numei mindai naakpi-in tam-a, Pasian’ min athanna’ sang-in adaina tamzaw tawntunghi.

85. Biakna sung-ah numei-in upa makaai seem-a, thuteng avaaihawmleh thu-umtaktakte’ maai-ah tua numeileh apawlpi-in vaang nei-ngeilo dinghi, banghanghiam cihleh Sawltaak Paul’ genmahbang-in Pasian-in numeite biakna thuneihna pialo-hi.

86. Biakna naseem hi-a, zii-nih a-neihleh thu-umtaktakte’ maai-ah tuapa-in vaang neingeilo dinghi, banghanghiam cihleh zii khatbek nangawn lungkimsak zawhdingpen mikim-in azawhlohna Zomi pulehpate nangawn-in thei-in zii-khatmah neiciat uhhi.

87. Biakna naseem hi-a, gamtat kampau akidawm zolo mi-in vaang neilo dinghi, banghanghiam cihleh vaan-a Pa’ minphat nading khuavaak neilo ahihman ahihi.

88. Biakna nasep paulam-a summeetbawl mi-in vaang neiloding thamlo-in Pasian’ hehna thuakkha dinghi, banghanghiam cihleh siatna namcinte’ zungpi-in sum-itna ahihi.

89. Biakna naseem hi-a, meigong tagah, mizawng daaipaamte khualna aneihkeileh ahihkeileh mihau miliante ahopih, a-itbawl bangmah-a daaipaamte’ tung-ah abawl keileh tuabang mite-in vaang neilo thamlo-in Pasian’ phulaakna thuakdinghi, Dignity banghanghiam cihleh amaute Pasian-in entuam vilvel-hi.

90. Biakna upa hi-a, thutheihna leh thumuhna adiak-in Laai Siangtho theihcianna ahoihkhomkhat aneih keileh vaang neilo dinghi, banghanghiam cihleh lovaat ding-a akipan mi-khat atemta hiamkeileh singkungte genloh lopa nangawn vaatzolo dinghi.

91. Biakna upa khatpeuh-in azii’ cihcih akawi amaam-in azuihleh vaangnei ngeilo thamlo-in minsia dinghi, banghanghiam cihleh azii-in upa nasep aseemtawh kibanghi.

92. Biakna upa khat-in azii thuzawhlo-in vuakleh velhtawh akhuasakleh vaangnei ngeilo dinghi, banghanghiam cihleh vuakna velhna-pen pasianneilo mite’ gamtatsia ahihi.

93. Biakna hitaleh minam kipawlna, khawk kipawlna, tualkipawlna koipeuh-ah upa panmun aleen mikhat-in taangpi mite’ ettehding haanciamna aneihzawk keileh vaangnei theilo dinghi, banghanghiam cihleh mipi’ masuan-a apangte ki-encik tawntung-a, haanciamna leh matutna a-ngah makaaite nangawn kigensia laailianghi.

94. Gensiatna athuak ciang-in maaizum theilo, kisittel nuamlo, kipuahpha tuanlo mi-in vaangnei ngeilo dinghi, banghanghiam cihleh ama’ khialhna amulo mi-in mihai ahihi.

95. Gensiatna athuak ciang-in dahlua, nasa-lua leh lungkiatna-tawh amasuan akhawlsan mi-in vaangnei ngeilo dinghi, banghanghiam cihleh matun lopi-in adinkhawl suak-hi.

96. Itna aneilo mi-in cikmah hun-in vaangnei ngeilo dinghi, banghanghiam cihleh Itnapen ZEISU hi-a, lungduaina, nunneemna, thumaanna, haangsanna, laainatpihna, deihsakna, midangte’ phattuam nading sepnopna leh sianthona-tawh kidimhi.

97. Pilna aneilo mi-in cikmah hun-in vaangnei ngeilo dinghi, banghanghiam cihleh Pilnapen Pasian hi-a, thumuhna, khentelsiamna, thukhualna leh hehpihna-tawh kidimhi.

98. Leitung-a laailamsiamna, setlamsiamna, daatlamsiamna, kungle-tehlamsiamna, ganhinglamsiamna leh akisinthei siamnate Pasian ahi Pilna bang-a a-ngaihsun mi-in Pilna neite’ maai-ah vaangneilo dinghi, banghanghiam cihleh tuabang siamnate Itna’ tung-ah kiphutlo thamlo-in, tuabangte-in Itna’ lang-ah pang zawsop theihi.

99. Akhaakbel thu-in, bangbang ahizong-in itna leh pilna aneilo mipeuhmah-in vaangnei theilo dinghi, banghanghiam cihleh leitung pumpi leh akiim-a vaanhawmsil (vaanhawmpi sung-a Ni, Kha, Aksite-a kipan silte) khempeuh pilna leh itna bektawhbakibawl hi-a, itna leh pilna-tawh kizomlo silte-pen dawite, mihai, misia leh migilotebek ahihi. Tua dawite nangawn itna-tawh akizoploh hang-in pilna-tawh kizom laaibuanghi, banghanghiam cihleh Pasian’ phalna omlopi-in bangmah bawlngamlo uhhi. Nitawpni ciang-a Meikuangpi-ah gawtna thuakding kitelcian pipimah-in Pasian’ Thu lo-in dawite-in bangmah bawlngamlo uhhi. Tuahileh banghang-in mihing akici mihai pawlkhatte-in dawite’ sang-in siatna bawlding haangsanzaw, Pasian kihtalozaw, Meikuangpi laulozaw-thei lawmlawmliang ahihiam! Haina taktakmah ahihi! Banghang-in pil kisa laailaaiding ihihiam!

Source : AMANPHABEL LAMPI: T. ZOKHAI June 6, 2005
*************************************************************************

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

3 comments:

  1. Laiat at bang siam mah mah sim zaw zen,nasep muibun napi cin sum leh paai ah ciktaklo,2006 ZAM na phuat khiat lai na lawm te khasia sak,Zomi pih te khasia sak mah mah,hong um ten hong um ven cin maw,Zomi kipawlna sum teng ne tum gawp,Zo Khai.

    ReplyDelete
  2. This comment has been removed by the author.

    ReplyDelete
  3. Min nangawn gelh ngamlo-a lawlawmsong. ZAM kei' sepsung sum neeksimding om cih thadah ka' tu teteng' tungpan-in neektawm ding nangawn angen ziauziau hi-ing. Anlim tuilim nangawn ne lo-in Nasi-Lima peuh-tawh adiang ziahziah kahihlam hongki theileh mihing lungsimnei te-inbel hong hehpih peuhmah inteh. Mawkciakciak kei-ni, mihai pawlkhat-in um thei-mawk ahihteh nuamkei. hehehehe.

    ReplyDelete

Item Reviewed: VAANG (Dignity) - T. Zokhai Description: Rating: 5 Reviewed By: Cinpu Zomi
Scroll to Top