728x90 AdSpace

Hot
Menu
Zon-ol na Donate

Latest News

ZOLAI. Gelh – H. Gin En Cin, D.D.

ZOLAI.
– H. Gin En Cin, D.D.
Photo Credit : ZCMC -USA 2015.

Hih Magazine sungah suahsak dingin “Zolai” tawh kisai gelh dinga nong nget manin kei nasep lianpi khat ahih manin ka angtang mahmah hi. 

“ZO” kici kammal pen kuama kam kikawm hi lo-in Zomite ei le ei i kilawhna i minam min ahi hi.  Midang khatpeuh in minam dangte hong cihnate zang taleh midangte in ei hong cihna uh kammal hi a, en i zat ciangin midangte kam akawm i hi hi, ei neihsa hi lo hi.  Ei neihsa ahi lote i zat nadingah i zat khit ciangin akipiakik ngeina hi a, piakik nawnlo a, mi’ neihsa amau neihsa banga, anei suakte guta ahikeh mi gina loin kiciamteh hi.  Tua ahih manin mi-a akawm nuam i mipihte in akisap sung teng uh kawm taleh “Zo” cih kammal pen amau neihsa ahilam atheih uh ciangin akawm pen uh piakikin amau neihsa ahi “Zo” mah adeih hun uh hong tung dinga tua hun ciangin “Zo” mahah hong ciahkik ding uh hi.

Ei mi pawlkhatte leuleu in naupang pauthei nailo bangin “Zomi” aci theilo kineih uh a “Mizo” peuh ci uh hi.  Ahang in, mikawl peuh miIndia peuh aci leitung buppi-ah kuamah om lo hi. Tua banga a lo mite lakah Pasian in amau min amaan ci nuam mi khatpeuh akhansak hun ciangin “Zomi” mah acih nop hun uh hong tung ding hi.  Ahang in Pasian pen athumaan Pasian hi a, lungsim maan le thutak adeih Pasian ahi hi.  Tua ahih manin amah abia mite in zong thumaan a, anuntak ding uh Pasian in deih hi.  Pasian in Zomite amau min maan neihkhawm ding hunta asak ciangin i omna ciatah hih i min maan “Zomi” cih i neikhawm ding hi.  Tua hun ciangin Israelte Greek kampau Israel le Jew kampau Israel a om bangin i kampau kibang taktak takei leh kampau bek a kilamdang Zomite i hi ding hi. 

“LAI” hih kammal zong kuama a kikawm hi lo a, i pupite zat kammal kician mahmah khat ahi hi.  1925 kum pawla Cope in tu-a i zat Roman laimal tawh i lai hong bawlsak laitakin i pupite in “ca” peuh “lekha” peuh na ci loin “Lai” mah na ci pah lian uh ahih manin kuama kampau kikawm het lo Zomi tawh a piangkhawm kammal mah hi pah hi. 

Hih tawh i genkhawm dingin “SANG” kici kammal zong eima kam lian a i pupite in a neih hi a, thlawng, ahikeh skul cih banga ci theiloh pipi Kawlte a, mikangte a peuh kikawm hi lo hi.  Tua ahih manin ei Zomite in “Zomi” “Zolai” “Sang” i cih kammalte i pupite in Zogam a pian tunga a nazat uh hi a, i minam tawh a piangkhawmpah ahi hi. Tua hi a i minam ciamtehna a thupi tampi a omte lakah hih kammalte a kihel ahi hi.  Tua ahih manin ei Zomite goupi ahi hi.  Hih “Lai” le “Sang” zong i mipihte in mi a, a kawm uh “Ca” “Lehkha” le Thlawng” “Skul” a neite a piak kik uh cianga amau tawh i neihkhawm i neihgil pen “Sang” “Lai”mah hong zang ding uh hi. 

Hih atunga thute enpak le’ng Zomite minam lian minampi khat i hihna hong lak hi.  Tua hangin i Zolai pen i minam zah a, i it ding ahi hi.  Zolai om kei leh i minam ciamteh nading a thupi bang om ding hiam? Zo Minam Ni nangawn kinei zolo a, Zomite kiciamtehna Vaphual limbek omlai hi.  Tua ahih manin Zomi ka hi aci peuhmah in Zolai sinloh phamawh a, theihloh phamawh hi.  Zolai i theihna bek tawh Zomi i hihna kilak thei lai hi.  Nang le na minam na it leh Zolai na it kul a, Zolai na it leh na theih ding kisam hi.

Tu-a i zat Zolai pen i neihzawh kum 90 val bang sawt ta hi.  A masa-in Ni Sagih Lai ci-in “a aw b ch” ci-in ni sagih sunga theihtheih dingin hong kipantah a, 1925 kim pawl ciangin tu-a i zat Roman laimal zangin Cope Topa in a theihnop mahmah dingin tuhuna sim thei, gelh thei ciang ahih nading akisinte bangin Laibu hong bawlsak hi.  Tua pen “Ka dah mahmah.  Ka pa a dah mahmah… ci-a kipante ahi hi.  Hih pen a kisin ding laimal teng (glossary) teng kisin masa a, tua khit ciangin alaigual a thunei dinga kisin pan laisinzia ahi hi. 

Tu hunin pawlkhatte in ciamnuihna peuhin zanga ka pa ha a na, pha ka sa,  La ka sa,  ci-in Cope in na gelh lawmlawm a, ci-in mawhsak kha thei hi hang.  Hihbang kamvuicing a thu kihual dinga Zokampau lo khat in a gualh hunlai-in haksa sa-in a khua-ulsa kai mun mahmah ding hi. Bangbang ahi zong ama hong bawlsak lai pen gelhthei, simthei cianga zat dingin tua sanga theihnop zaw le tua sanga hoihzaw lai sinna omthei lo hi.

Ahi zongin Cope kammal zat pawlkhat le sin dinga abawl pawlkhatte Mangkang gama zat ding ahoih tampi om a, ei gama naupangte in theih haksa uh hi.  (gt. Vukkhal tawh kimawlna, Sik meicihna tangthu etc....) Tua banah laisinzia zong a khuahun zui-in kilaih a, i gam i lei-a thupiang zong kilamdang ta ahih manin puahloh phamawh ta hi.  1972 kum ciangin Tedim gam sunga sanglam pilna neite le kumpi lam tavuan neite kopin Zolai simbu kipuahpha hi.  Cope zatsa tangthute Zomite ading akizang thei teng le laibute sunga naupangte lungsim a zoding, naupangte tungah ngaihsutna hoih a piathei ding (moral lesson) hoih nei pawlkhat zong kizang lai hi. 

Tanlang Laibu sunga ABC laimalte-a kipan laimal om khempeuh a malmalin naupangte in a zattheih ding khiatna nei kammalte kiguang hi.  Laimung khat le aw a suaksak nih ciang kisinsak hi.  Tankhat laibu sungah laimungte le aw a suaksak thum ciang sin dingin kiguang a, laimal gawm khempeuh Tanlang le Tankhat sungah a kimin kisinsak hi.  Ahi zongin Tankhat laibu a tawpna lamah thuhoih pawlkhat kisinsak a, Tannih laibu sungah tangthu tom nono naupangte ciamteh theih ding le a zuihpah theih ding uh thute kiguang hi. Tanthum le Tanli laibute sungah Zomite tangthute le Zomite theih ding a kilawm thupite kisinsak hi. 

Tua tangthute tung tawnin naupangte in Zomi itzia ding le Zolai itzia ding thei uh hi. Tua huna kipanin Zolai tawh lai kigelh ciat hi.  Biakna lam thu kizakna zong a tuamtuam kihawm ciat hi.  Ahi zongin laigelhzia kibang kim lo hi.  Pawlkhatte in amal malin gelh a, pawkhatte in ama pau bangbangin kinai sakin gelh hi.  Lai ngeina kician nei nailo i hihmanin nang akhial, nang amaan kici thei lo hi.  1972 pan 2000 hun ciangciang tua bangin Zolai kigelh ciat phot hi. 

Kum 2000 khit ciangin computer hun hong hita a, laigelhna le limsuaihna khawng baih mahmah hi.  Tua hun ciangin mi khempeuh in laigelh ding kilawp ciat hi.  Ahi zongin mi theih dinga Zolai maantaka gelhding a haksat lam kiphawk ciat hi.  Tua hun pen ei Zomite adingin lai lamah i mit kihon hun cileng maanpen kha ding hi.  Pawlkhatte leuleu in ama thu-in Zolai puah sawmin Cope in Zolai a kihel lo laimalte a cih “f, j, q, r, x, y, nangawn Zolai suahsak sawmin hanciam leuleu uh hi. Geelgeelin gelhgelh uh hi.  Ahi zong a geelte nangawn in a simkik uh ciangin simthei nawnlo thei uh hi.  Tua banga hanciamna neite Zolai hoihsak nuam ahih manin phathuai mahmah hi. 

Pawlkhatte in Kawllai banga a aw bawl sawmin hih i zat laimalte mah zangin a aw ding geel leuleu uh hi.  Hih pen kei muhnaah Cope in Zolaimal abawl lai-in Kawl laimal na zang leh buaipih kul loin Kawllai bangin a-uun, a-eu kibawl thei pah dingin ka um hi.  Ahi zongin tu-a i zat Zolaimal pen Roman-te a i zat ahih manin ei deih bangin a aw bawlna-in kizang thei lo ding hi.  Kizang thei hileh Cope in na zang pah kha ding hi.  Tua hi-a a piang thei lopi ding khat a hanciam i hih khak leh i hun, i sum, i thatang beite pammaih hi. 

Zolai puahphat theih nading bulphuha zum hong ZCLS te in a siam tawpun Zolai na puah uh hi.  1986 kumin ZCLS Secretary sem masa Rev P. Thuam Thang makaihna tawh tua huna Biakna lam thukizakna Endikpite Tedim ah kisutuahin thu kikupna (seminer) kinei hi.  Tua munah Zolai gelh cianga ka buaina khempeuh laiin gelhkhia-in seminer paper ka puak hi. Tua kei buaina tampite tung tawnin laimal zatzia ding tampitak kipuahpha hi.  Tua munah kikupnate a tampen in Cope laimal gawmzia i zatsate pai tuan loin a kitelzaw in bangci puahto ding cih kibulphuh ahi hi. A telhaklua mahmah a kitheikhial dingte a kitheihpah lianlian nadingin laimal tuam neihsak ding cih loh puah theih nading dang om thei lo hi. 

2000 May kha ciangin Presbyterian-te makaihna tawh Tedim ah seminer kinei a, tua hunin zong hih 1986 kuma buaina teng le a hoihzaw a kimuh beh teng kikumnawi leuleu in, nakpi-in Zolai hoih tuam hi.  2000 kum sung mahin ZCLS-te makaihna mah tawh Leipi biakinnah biakna lam laigelh teng seminer kinei leuleu hi.  Tua hunah zong a masa-a kikup teng banah muhbeh omlaite kikup beh lai hi.  2003 January ciangin Yangon Zomi Momnote le Rev. Dr. Chin Khua Khai kipawl khawmin seminer mah kinei leuleu a, tuate laibu-in bawlin Zolai Endikte khutlet ci-in laibu-in kisuaksak hi. 

Hih hun ciangciang i Zolai malgawmzia tampitak kiphattuampih a, i laigelhte zong simnop zaw-in a khiatna teltakin kithei thei zaw hi.  Mailam ah i Zolai i puah nading kei ngaihsutna-ah a laimal mahmah a tuamin neisak a amal khat in khiatna atuam a nei honpi khat i neihsak ding hoihin ka um hi. 

Banghang hiam cih leh Zolai malkhat in khiatna khat bek nei loin tampi nei hi. Amal kibang veve mah a aw tawm kikhel leh a khiatna a tuampi khat suak hi.  A khiatna zui-in a mal tuam vive neisak ni cile’ng lah i lawhna a aw nangawn kibanglo lai ding ahih manin i bawl hangin kizangtang thei peuhmah lo ding hi.  Tua ahih manin leitung bupa kizangtang Manglai mah bangin a mal khat in khiatna khat a nei pahpah pawlkhat nei le’ng a, tua i zatsa banga i zatsuak ding lah haksa sa kei le’ng hoihpen leh kilawm hi. 

Gtn. Cope in i tenna inn agelh ciangin “inn” ci-in “n” nih a zat pen nuamtuam mahmah hi. 

Laimal khatbek a aw kibang a khiatna kilamdang khat “tu” en pak le’ng.  “Tu” bekbek in khiatna 9 nei a, a aw kibang 2 in khiatna 2 mah nei-in; a aw kibang 4 in khiatna 4 mah nei-in, aw kibang 3 mah in khiatna 3 mah na nei a, a vekpi-in “tu” bekbekin khiatna 9 nei hi. 
1.  “Tu” (sit) - hiah tu inla pau kei in. 
2.  “Tu” (Sugar cane) - hih kawltu “tu” tu laivah ahi hi. 
3.  “Tu” (sheep) - “tuu” khawi-a tuumul puan a nei hi = “tuu.” 
4.  “Tu” (land) - vanleng a “tu” hi. 
5.  “Tu” - thallam cilsiat eima tung “tu”. 
6.  “Tu” (hoe) - “tu” in lo kikho hi. 
7.  “Tu” (sheves) - buhvui zut a, a “tu” a khol hi. 
8.  “Tu” (grand child) - ka pu’ “tu” ka hi hi. 
9.  “Tu” (now) - “Tu” mahmahin inn ka tung hi.

Hihte khempeuh amal a bawl ding haksa mahmah ding hi.  Ahi zongin pawlkhat laimal khat khiatna khat nei honkhat nei thei le’ng Manglai bangin Zolai zong tellah nading om lo hi.  Hih a nuai-a bangin laimal khat khiatna khat neihsak dingin i zatsa pawlkhat kong suaksak hi. 
1.  gou = (inherit) = Damsunga neihgil, lamgilte pate-a tate in a luah tohtohte, 
2.  gamh = (heir) =A neite inngamh a, a neiding omlo midang khat in a luahte 
3.  meii = (cloud) = vana kai tui malneute 
4.  lamh = (placeta) = nau suah cianga, a nungzui pen 
5.  sangh = (glean) = An lak khit a kinusiate 
6.  tanh = (share) = Ei adinga i satanh tuam pen 
7.  paii = (conceive) = Nau paii, gai. 
8.  cingh = (generous) = Neih bangbang phaltaka piakhia nuam. 
9.  gongh = (throat) = Gawl anglam pang. 
10. tangh = (chickenpork) = vun natna nam khat. 
11. aam = (jealous) = Hihna peuhpeuhah deihsak lua 
12. lei = (tongue) = Kam sunga lei 13. lii = Lo lai-a a mawkpo ankungte 
14. aa = his = Ama neihsa 
15. taa = their’s = Amaute neihsa. 

Hih a tunga bangin amalin bawlle’ng sim khialh nading tampi phatuam dinga, a khiatna kitelpah lianlian ding hi.  Tua banah a gualhzia siam peuhle’ng Zokam theihkhialh ding om lo a, a khial dingin simle’ng, amaan khat beek om lo hi.  Zolai na sim ciangin a khiatna nei dingin sim in.  Manglai zong limtakin etsak le’ng a aw suak hetlo laimung tampi om hi. 

Mailam ah Zomite le Zolai omzia ding kei muhna ah : 
Hun khat ciangin i Zolai malgawm kibang dinga tua hun ciangin Manglai computer tawh i gelh cianga, a khialte a nuai asan-a a git bangin kigit ding hi.  Tua ciangin nang laigelh maan, kei a maan kei cih bang om nawnlo ding hi. 

Hun khat ciangin “Zo” cih min neikhawm ding hanga, midangte kam i kawmte i piak kik hun hong tung ding hi. “Ciimnuai” le “Lai” i cihcihte toi lua sa-in i nunglam i etkik ciat hun hong tung dinga, tua hun ciangin “Zo” mahah i kituah kik ding hi.  Tua hun ciangin “Mizo” a kicite in zong a min uh amaanin lothei ta ding uh hi. Paite in a min uh guallelhna min sangin “Zo” deihzaw ding uh a, Gangte in Gawngmual khua-a galvil-a a omlai uh a min sangin “Zo” deihzaw in Simte in simgam ngallak-a a omna uh min sangin “Zo” deihzaw-in, Hmarte in zong Sim le Zo kikal malnote laka, a ten lai uh min a puakden uh sangin “Zo” mah deihzaw ta ding uh hi.  Thahdote in zong amau pupi’ min guak minam mina neih sangin Zomi khempeuh minpi “Zo” mah a telzawk hun hong tung ding hi. 

Hih amau omna min a kilote in omna munmin peuh sangin i pupite in i minam mina a zat uh Zomi mah ahihna kithei ta ding hi.  Zomi khempeuh in ei min ciatmah ahi “Zo” thupisakin i min i nei khawm dinga i omna peuhpeuh ah i minam le i ngeina lenkipin i biak Pasian in minam lian khatinhong koihin ama sungah nuam i sa khawm ding hi.  Lushei kampau Zomite, Hakha kampau Zomite, Falam kampau Zomite, Tedim kampau Zomite cih bangin i minam min i neikhawm ta ding hi.  Ngaklah huai sam ei!!! 

H. Gin En Cin in TBA khutnuai-ah kum 5 sung Khangham Zolai thei lote hilhna ah Thukhungpi a sep sungin Tedim gam Tonzang gam khua khempeuh phialah Khanghamte Zolai laihilhna sang phuan hi. Tua kum 5 sungin lai gelhthei, simthei ciang mi 1000 theihna laipi pia hi.  Zogam a Press om masapen Tedim a, Cope Memorial Press ah kum 4 sung manager sem hi.  1972 Zolai kipuah phat tunga kipan hih lai agelh dong kum 34 val Tedim gam Tonzang gam Zolai sang khempeuh adingin Laisimbu kitasam sak loin ngahsak den hi. Christian Biakna Labu kipuahphatna khempeuh ah kihel kim hi.  Pasian huhna-in Laisiangtho NIV panin ZIV suaksak hi.  Laisiangtho thak le pilna laibute kici bu 5 teng Mangkam le Zokamin etton (Diglot) theih dingin suaksak hi. 

Zogam sungah lawki bei nading ngimna tawh Harvest Camp Ministry phuan a, Director sem hi.  Kum 10 sungin khua 7 ah lawki beina mualsuang phut hi.  Hih teng le a hanciamna tuamtuamte hangin Pasian in tawisanga Bethel Bible College, Tedim in 2005 December14 ni-in B.C.  Min. degree pia hi.  Hihte khempeuh baanah a khan kum 70 a phakkhit ciangin Pasian in lamsang lailai a, International College of Bible Theology - Sikeston, Missouri, USA, le Reaching the World Bible College, Yangon-te in 2006 Feb 25 ni-in Doctor of Divinity degree pia uh hi.

Source : ZOMI SIAMSIN MAGAZINE ( Vol 2, 2008 Page . 63 )

********************************************************

ZBCA Khawmpi 2015 Nashville ah Zolai Pupi H. Gin En Cin, D.D. te nupa, Atapa Pil Mung leh Cinpu Zomi (www.lainusaal.com).

Zolai Pupi pa Tangthu na sim nop leh hih link mek in : http://www.laibusaal.com/2013/12/zomi-te-khang-tangthu.html

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOLAI. Gelh – H. Gin En Cin, D.D. Description: Rating: 5 Reviewed By: Cinpu Zomi
Scroll to Top