728x90 AdSpace

Hot
Menu
Zon-ol na Donate

Latest News

Zomi Diaspora le Diaspora Zomi - Dr. Cope Suan Pau

Zomi Diaspora le Diaspora Zomi
Zomite Teenna Gamlim.

Diaspora Mission Hun le Zomite Dinmun Etkakna
Asung a om Thute :

I. Thukonghong
II. Diaspora Kipatna Koilai Pan?
III. Zomi Diaspora Kipatna
IV. Kawlkampau Diaspora Zomi Galkap Innkuante
V. Hun Nununglam Kawlgam galkap Diaspora Zomite’ Dinmun le Identity
VII. Zomi Diaspora Thumna: Gamdang Paina
IX. Diaspora Zomi le Pawlpi
X. Korean Diaspora le Diaspora Korean Pawlpi
XI. Leitung Diaspora Mission Etkakna
XII. Zomi Ngeina Identity Lui Khat: Zu Nekna
XIII.Diaspora Tungtawn in Minam, Gam le Pawlpi Khantohna
XIV. Thukhupna: Leitung ah Diaspora Zomi Mawhpuak [Vaipuak]

I. Thukonghong

Tu hun kumzalom 21 kipat hun pen leitung Diaspora Mission hun in ki ngaihsun ahi hi. Tua
hun tawh kituak in Zomite zongh ih diaspora ngeingai uh hi. Diaspora cih ciang in minam khat a tenna gam pan pai khia in mun dang gam dang ah ki thehthang ngeingai cihnopna hi ci le’ng ki khial kei leh kilawm hi. Exodus tawh ki bang ding a bat hang, kibang tatak thei lo ahi hi. Exodus pen minam khat gamdang mun khat ah pusuak khia in khualzin ngeingai cihna hi in, diaspora cih ciang in, gam pua lam mun tuamtuam ah ki zel ngeingai cihnopna ahi hi.
Zomi Diaspora tawh kisai research bawlna thu hong phuang khia masa pen Dr. Paupu [Rev. J.M. Ngul Khan Pau] hi le kilawm hi. A ma’ research bawlna thulu: “ Zomi in Diaspora for World Evangelism: 21st century Zomi Diaspora like 1st century Jewish Diaspora for World
Evangelizing…” cih dan khat hi in ka nei a, thukanna research bulphuh thu in tu laitak Diaspora Zomi-te leitung gam tuamtuam ah lungdamna thu tangko ding in ih kiging hiam, cih thu hi le kilawm ahi hi. Siapa’ research bawlna paper laibu in sim thei ding ngaklahhuai ahi hi. A ma’ cihna ah Zomite leitung mun tuamtuam gam 35 ah ki thehthangna pen ei’ thu tawh ki tung mawkmawk hi lo a, hong puak Pa’ deihna ih theih ding thupi hi, cih thu ahi hi.

Dr. J.M. Paupu’ in 2009 kum in dotna questionnaire pawl khat hong bawl a, ih dawnkikna tung tawn in research bawl hi leh kilawm hi. Ke’n ka dawnkikna ah Zomite leitung mun tuamtuam ah tu laitak ih ki thehthangna a hang bulpi pen ih gilpi khapkhat a ding khualna tawh nuntak nuamzawna mun kizong ahi hi: Zomi people are just seeking a better life…cih
thu ahi hi. Tua ahih le Zomite leitung gam 35 ah ih diaspora na pen leitung ah lungdamna thu tangko ding in Pasian in hong puak hi ih ci thei mah ding hiam? Tua bang ih cih theih leh lungdamna thu tangko ding in Zomi mimal le community kipawlnate in tu ni in ih kiging khin ta hiam?

II. Diaspora Kipatna Koilai Pan?

Diaspora cih ciang in Jews mite tawh kisai pha deuh in ki ngaihsun hi. Egypt pan in Jewish
Exodus tungtawn in Canaan gamah Judaism hong piankhiat mah bang in, Canaan pan Jewish Diaspora mah tawh leitungbup ah Christianity hong khangkhia ahi hi. Leitung Christianity pianzia ih et kik ciang in Christian mission paizia movement bulpi origin pen Diaspora ii huzap atmosphere tungah kinga cih thu kimu thei ahi hi.

Diaspora pen thulamdang pi zong ahi kei hi. Zomite’n tu hun ciang in leitung mun tuamtuam ah ih diaspora pan a hi in, leitung gam tuamtuam pan minamte diaspora zawh pen sawt kik khin ahi hi. Tua ahih le minam tuamtuamte diaspora pen Pasian’ deihna om hiam? Minamte diaspora sungah Pasian in a gam zaina ding naseem thei hiam, cih ngaihsutna om ahi hi. Missiological muhna sangmang mittang pan in kum zalom 21 pen ‘Diaspora Christian Mission’ in kingaihsun ahi hi. Tua ahih le Diaspora Zomite’n gam dang ah sangmang nasem a pai in ih ki ngaihsun thei ding hiam? [ Gamdang mun tuamtuam ah Zomi kithehthangna pen ‘Zomi Diaspora’ ih ci ding a, tua gam tuamtuam a kithehthang Zomi-te pen ‘Diaspora Zomi’ ih ci ding hi. ‘Diaspora Zomi’ te tu laitak in Dr. Paupu’ research bawlna bang ahih le gam 35 ah ki peem hih tuak hi.]

III. Zomi Diaspora Kipatna

A tatak in ci le’ng, Zomite zongh tu hun ciang in diaspora pan pan ih hi kei hi: nidang pek in
mimbang pianna Zogam nusia in Kawlgam, Vaigam ah diaspora khin zo ih hi hi. A tatak in Zomi Diaspora pen ih tenna khamtung Zogam pan colonial hun lai Chin Hills battalion sungah galkap tumna pan kipan khin ci le’ng ki khiallo ding ahi hi. A masa pen in Mikangte
khutnuai ah ih om khit 1890s pan kipan galkap ih lut a, Mikang galkap Chin Rifles min tawh
ih om hi. Chin Hills Battalions ci in gal hang in ih min thang vangvang mah mah hi. Tua Chin
Hills battalions sungah Christianity pen Diaspora Zomite’ identity khat na hi khin zo hi. Christian suak nai lo te zongh galkap sung ah hong convert tam mah mah ahi hi. Tua hi a,
galkap lutna Zomi Diaspora in Zomite Christianity sungah mimal khangto sak khin cih ding
ahi hi.

Galkap Chin Hills battalions sungah Zomite biakna kikhat lo [Tapidaw, Lawki, Laipian, Beltungmut] himah ta leh, a nung ciang in Christian hi lo te’n zongh a lawmte biakna hong zui uh a Christian hong suak uh hi. Tua bang in Chin Hills Battalions ii identity pen Christianity na hi khin cih theih ahi hi. Battalion sungah siampi chaplain nei zo nailo bek uh a, [ngen le hoh nei thei mah ding uh hi ven] khat le khat ki makaih in biakna bawl uh a,
khanlawhna bang om ngei khin ahi hi. Gentehna: Shwebo bangah khanlawhna nasiatak piang ngei a, Topa’ Jesu hong paita ding cih thu om ahihman in nasem nawnlo mawk uh a, duty lut nuam nawnlo mawk uh ahihman un, court-martial tawh hong ciah bang zongh om ahi hi.

British colonial hun masiah a Kawlgam, Vaigam ah Zomite ih teen kawikawina bel ahih le diaspora in ki ngaihsun thei kei le kilawm hi. Bang hang hiam cih leh, ih pu ih pa te in lono
na le tuidam luanna ah khua na sat in na teeng kawikawi cih ding ahi lel zaw a, nidang Zomi gam makaite pilvang hi le hang, Zogam a tangzai mah mah thei ding ahi hi. Colonial hun British uk sung pan kipan colonial hun khit Kawlgam le Vaigam suahtakna ngah hun sungte ah Zomi tangval cidam khempeuh phial galkap tum pen fashion pi khat ahi hi. Zomi pasalno khempeuh phial pen a tangval hun ciang galkap tum ding in kingaihsun a, nuntakna nasep professional hoih pen in ki tuat ngiat ahi hi.

Kawlgam suahtak khit hun ah Chin Hills Battalions teng mah Burma Rifle sungah kigawm in ki transformed khin ih hihman in, tuni ciang Kawlgam galkap migilo military juntas sazian sungah Diaspora Zomi galkapte khempeuh ih kihel khin hi. Tua thu tello in UNHCR zum asylum ngetna khawng ah nasep lui hong kidot ciang galkap kahi hi, a ci khawng zongh ki om lai mawk a, mi’n hong ngaihsutsak hetlo pah lel ahi hi.

IV. Kawlkampau Diaspora Zomi Galkap Innkuante

Kawlgam suahtak ngah khit post-colonial hun ciang in zongh khamtung Zogam khua le tui ciat pan Kawlgam ah Kawlgalkap ih lut a, Kawlkam pau in tu ni dong Kawlgalkap gilo ‘Myanmar military juntas’ a kici te lak ah a thu le a min in U.N. le leitung gam tuamtuamte’
muhna ah migilo sazian sung ah kihel ih hi hi. Tua hun lai Kawlgam Diaspora Zomi galkap innkuan peuhmah in Zokam pau thei nawnlo in Kawlkam bekbek siam zalzal uh hi. Tua zong
hunkhatlai Kawlgam galkap Diaspora Zomite’ identity khat cih theih phial ding ahi hi. Bang
hang in Zokam pau thei nawnlo hiam, cih leh mi lak ah zumhuaisa ahi hi: Kawlmi le Kawlkam bekmah thupisa in pimuh lua ahi hi. A ma’ minam, kampau, le ngeina neumuh khin ahi hi. Tuni leitung gam tuamtuam ah Diaspora Zomite in na tate uh tawh Zokam n’ong pau siam ciat lai mah uh hiam? Mi lak ah zumhuai peuh na sa uh hiam?

Diaspora Zomi Kawlgalkap tangval khat khuan [leave] hong ciah ciang in, khualam nungakte na kilamen mahmah uh ahi hi. Tua zahtak in Diaspora Zomi galkap tangvalte popular uh hi. Galkap khuanciah khat tawh a kiteeng kha nungak khat pen hampha kisa mahmah a, khuapih nungakte in eng in haza mahmah uh ahi hi. Tua Diaspora Zomi nupa thakte in Kawlgam galkap quarter sungah Zokam in a kiho ding uh maizum ta uh a, a lawmnu Kawlkam manlang thei pen in kisin tawm sak hi. Ta hong neih uh ciang in a tate kiangah Kawlkam bek in hong hopih ta uh hi. A nu in a tate kampau kisinsakna in leh a ma’ Kawlkam pau kisinna kawm in Kawlkam bek in a tate hopih se hi. Tua bang in Diaspora Zomite hong ‘Kawlsuah’ uh a, ‘Kawlsuak’ zongh om uh hi. Zogam ah khuanciah zinei lo te’n Kawl nungak khat peuh teenpih in Kawl a suak zong a khomkhat mah ki om ahi hi. [Diaspora Zomi galkap lak ah officer a bu a mang tam simsim in Kawl zi, Kawl ta hong nei uh hi.]

Zomite pen ih pianpih lungsim ah gal le sa mah teeng lai ahihman in galkap mah ih ut masak pen ahi hi. Tu in Kawlgam galkap sungah Zomite mun le za hong kipiak nawnlo tak ciang bek in galkap lut a khawl /khel thei pan ih hi hi. Tua zongh officer suaknopman a lut nuam ki om kiukiu lai veve mawk hi.

Kawlgam suahtakna ngah khit ciang in Mikang galkap Zomite Kawlgam galkap ih suak hi. Kawlgam a ding si le nai keh bek hi lo in, luang aitah in gal ih do a, tampi mah gal sung ah ih si khin hi. A hizong in galdona sungah Zomi galkapte ci in hong kiciamteh lo a, Kawl galkapte in hong ki ciamteh zaw ahi hi. Tual thah hun ciang bek in Zomi galkap Chin Battalion min puasak zel uh a, Kawlmibup in Zomi hong muhdahna ding ih Kawl kumpi in ngian nei lai ahi hi. Bang hang hiam cih leh, Burmo-centric Kawlkumpi ii Burmanization policy sung ah Diaspora Zomi galkapte Burma Rifles suak khin a, Defense Services min tawh
tuni dong Kawlgam galkap in ih om ahi hi. Tua hi a, tu ni leitung leh UN in Diaspora Zomi galkap khempeuh pen Kawlmi bek thupisak ethnocratic kumpi Kawlgam galkap migilo
juntas sazian sung ah hong mu ahi hi.

V. Hun Nununglam Kawlgam galkap Diaspora Zomite’ Dinmun le Identity

SLORS-SPDC hun sung in Kawlgalkap-Zomi innkuan sungah Zomi evengelists te tungtawn in a munmun ah kha khanlawhna hong om thei bilbel kik a, Christian biakna le Zomi ngeina hong pom kik mahmah uh ahi hi. Kawlgam khuapi mun tuamtuam ah galkap quarter-te ah Zomi galkap innkuante tung tawn in Christian fellowship/ church planting khawng ki bawl kawi kawi hi. Kawlgam sung Zomi omna mun ah Christian pawlpi thak piang hi cih paunak khat hong piang khia hi. Tua dungzui mah in Kawlgam galkap sung ah thusim policy khat hong om a: ABC STOP! [tua hun a popular American Beer ABC STOUT zui] ahi hi. A pen AIDS, B pen Hepatitis B, C pen Christian [especially Chin Christian] ahi hi. Tua hi a, Kawlgalkap-Zomi or Zomi Kawlgalkap-te a ding promotion ki barred banah, civilian service lam khawng ah hong hemkhia in hong ki nawlkhin ta ahi hi. Kawlgalkap sungah zakhanna promotion le position na deih leh Buddhist suak ding kisam ahi hi. Nang mah mah Burmanized ding a, na min Kawlmin le na biakna Buddhist hi leh lametna om mah mah cih ding ahi hi. Hi bang thu le la te in leitungbup ah Diaspora Zomi hong piankhiatna ding thu kipatnate ahi kik zel leuleu hi.

VI. Zomi Diaspora Nihna: Pilna Sinna le Kumpi Nasepna

Zomite khamtung Zogam pan tangval khempeuh galkap bebek in ih lenkhiat, diaspora khiat
khit nungah a nihna Zomi Diaspora pen pilna sinna ahi hi. Zomi khangnote in high schoolzawh khit pilna sin in College le University sangpi te ah ih pai hi. [Ni dang hun in numeite middle school 7th std ong peuh leh, Nursing Training College le Teacher’s Training College te ah ki kah thei ahi hi. Ne Win BSPP hun tak ciang in mualtung mite hamphatna teng beisa ta hi. Tangvalte high school man ciang DSA lut a galkap bu officer suak zongh tam sim mah om in, University graduate khit ciang OTS lut a bu suak zongh ih tam sim veve lai hi.

Tuni dong mah a tapa te uh High School pan in DSA sang lut ding, Degree ngah ciang OTS lut ding a lunggulh Zomi nu le pa ki om lai ve ve hi. Zomite galkap ih uk dan bel a bei thei nai lo cih ding ahi hi. US ah gam belte a ding in galkap lut ding bel compulsory hi lai mawk ahih tawh kizui in tangvalte bek hi loin, numei nangawn in galkap ih lut ta hi. Kawlgam ah galkap lutlo teng in kumpi nasem bekbek in mun tuamtuam ah ih om hi. Ih om nana ah Christian biakna kin ih hihman in, pawlpi piang kawi kawi ahi hi. Tua hi a, Kawlgam sung Christian pawlpi khantohna ah Diaspora Zomi kumpi naseem ‘government servicemen’ te ii role pen a thupi khat ahi hi. Kawlgam sung township 300 val a om sung ah Zomi omlohna khua om khol lo ding ahi hi. Zomi a om nak leh Christian cih theih sa ahi hi. A diakdiak in Kawlgam laizang keugawgam khuapi lian te ah pawlpi pian zawh kum 100 val khin vive hi napi, pawlpi mi 10 kim peuh a om tam mah mah mawk a, Zomi kumpi nasemte hong tun’ ciang in pawlpi nosuak tuam mah mah ahi hi: gtn, Monywa, Mandalay, Myingyan, Magwe, Minbu, Pakoku, Meihtila, etc.

VII. Zomi Diaspora Thumna: Gamdang Paina

1990s-2000s SPDC hun sung in galkap kumpi thak hong kah khit sumbawl, paibawlna hoih nawn lo ahihman in, gam dang ah sum thalawh hun hong tung leuleu ahi hi. Galkap kumpi in gamdang zin ding hong phal ta a passport hong pia ahih ciang in, minamdangte mah tawh kibang in Zomite zongh gamdang ih zin ziahziah ta hi. Kumpi nasemte, khangnote bek hi loin sumbawl pawl khat, sumhau minthang kimkhat nangawn gamdangah sum thalawh nasem in ki pai khia ngeingai ahi hi. Biakna lam theology sang kah dingin zongh tampi mah gamdang ih pai ngeingai a, gam ciah kik pawlkhat a om mah bang in, a ciah nawnlo a om suak in pawlpi kipan zong pawl khat ki om ahi hi. Minamdangte’n Zomite leitung bup ah pai khin ci in hong pi muh mah mah bilbel kik uh hi. Passport zumpi ah passport ngah sazian en le’ng mi 10 lak ah Zomi 2 le 3 kihel hamtang ahi hi. Percentage in tuat le’ng Zomite gamdang pai tam pen ding ahi hi.

VIII. Zomi Diaspora Lina: Refugee Gambelhna

Tu laitak 2000s nunung lam leh 2010s kipat hun pen Diaspora Zomite gambel fefugee fashion hun cih ding ahi hi. Gamdang tai pen fashion khat hong suak khin mawk ahihman in, gambel ding a a tai zo teng pen ki eng mah mah in, mi hamphate ih ci hi. Gam thumna tungte bang Pasian’ thupha taktak hi ih ci hi. Ahitakpi ding hiam? Refugee cih pen mi cimawhte, galtaite cihnopna hi a, ei a tai zo teng pen a cithei zaw deuh teng, inn le lo zuak ding nei teng, u le nau sum thagui hat zaw deuh teng, sum leitawi na’ng a muzo teng, etc. ih hi hi. A cimawh tatak teng pen ih gam ah ki nusia ahi zaw leu leu hi. A mau teng hoh refugee ding in UNHCR te kiang ah nget sak ding a hoih zaw tam maw? Gam thumna tung khat ih om ciang in UNHCR te’ thusiamna leh gamthumna kumpi [e.g., US kumpi] hehpihna tawh kitung ci in ih tangko zel hi. A tatak in ci le’ng kuama thusiamna le hehpihna hi tuan peuhmah lo a, a thu om sa khat tung tawn in, Kawl kumpi gitloh paulam in refugee thukhun tawh kituak teng in asylum ngah kha ih hi lel hi. Kawlgam kumpi policy hong kilaih le bang mah thusiamna/ hehpihna cihte om nawn lo ding a, a sawtlo in Zomi Diaspora hun khat hong bei thei ding ahi hi.

IX. Diaspora Zomi le Pawlpi

US leh leitung mun tuamtuam ah paunak khat om ahi hi. Sen mi [Chinese] te inn kuan li le nga on leh an sai ‘restaurant’ kipan pah ci hi. Korean mite li le nga ki tuntuah le uh pawlpi ‘church’ khat kipan lian uh ci hi. Zomi li le nga ih ki tut tuak ciang bang ih kipan lian hiam?
Tu ni in a mun mun ah Diasora Zomi Pawlpi ki pan kawikawi cih kimu ahihman in minam mantan’ nading pan hong keem ding thu khat ahi hi. Diaspora Zomi pawlpi le community in
Zomi Christian min tawh ih identity hong kipsak tuam ding ahi hi. Kawlgam ah Kawl Christian sanggamte’n paunak thak khat nei uh a: “Zomi nih a om leh pawlpi thum piang…” cih ahi hi. Cihnopna in Zomite pawlpi kikhen/ a thak kipan pahpah, ‘phuan’ hat lua sakna ahi hi. Bang bang ahizong in pawlpi phuat pahpahna in Zomite identity khat hong suak khin ta cih ding ahi hi. Tua in Zomite manthan lohna ding hong keem ding ahi kik bilbel hi.

X. Korean Diaspora le Diaspora Korean Pawlpi

Ei mai ah a na diaspora khin a, minam identity vai tawh a na buai masate lak ah Koreante zongh kihel uh a, ih etteh theih ding thu pawl khat om khin ahi hi. Tu ma kum 60 lai 1950s hun Korea gal sung le gal khit ah anneak tuidawn le nuntakna haksa lua sa ahihman un tu hun ei Zomite mah bang in tua lai hun in a cithei zaw deuh teng gamdang tai in diaspora ngeingai uh ahi hi. A tamzaw mikanggam teng mah ahi Canada, USA, UK, Australia, NZ, leh Europe gam tuamtuam banah, Latin America, South America, lam zongh ah tai theihna peuh ah lono na, tuidam luanna mun delh in diaspora khin uh ahi hi. Mun tuamtuamah Diaspora Koreante mangthang tuan lo uh hi. A hang in a mau a tun’ nana uh a pawlpi kipan pah uh a, community hoih tak in nei ahihman uh cih kimu khia ahi hi. Gam tuamtuam tung Diaspora Koreante in a mau om nana vuah Korean mi mah in om uh a minamdang suak tuan loin amau’ identity kiptak in nei uh hi.

Kamsiatna tawh Mexico gam tung Koreante in tu ni in a mau le mau Korean ka hi uh ci ngam lo uh hi. Mexican minamneu khat in kikoih, kiciamteh ta ahi hi. A hang a kikan ciang in a kimukhia thu khat om a, tua in a mau Mexico gam a tun cil lam un pawlpi kipan lo citciat uh hih tuak hi. Christian hi mello/ tamlo khawng zongh hi thei kha ding ahi hi. Tua in tu ni Diaspora Zomite a ding lesson khat ahi hi. Diaspora Zomite ih tun’ nana mun ah Zomi
pawlpi/ kipawlna khat manlang pen in kipat ding kisam mah mah ahi hi. Tua pawlpi/kipawlna sungah Zokam pau in Zolai tawh thukizaksakna neih ding hong thupi mah mah ding ahi hi. Tua hi kei le mailamah Zomi hi nawn lo ding a, native minamneu khat ki suak thei ding ahi hi.

XI. Leitung Diaspora Mission Etkakna

Leitung ah Christianity kizelna etkik ciang in diaspora tung tawn in pawlpi piang kawikawi cih kimu thei ahi hi: gth, Antioch pawlpi. Kum zalom khat hun Jewish Christian-te kigawtna le haksatna tuamtuam hang tawh gamdang peem in a diaspora na uh pan leitung mun tuamtuam ah Pasian gam zaina piang ahi hi. Sen gam China ah Korean pawlpi piankhiatna thu etkik ciang in, Diaspora Korean khat tungtawn in piang khia cih thu kimu ahi hi. Tuni in
Kawlgam, Vaigam bek hi loin leitung gam 30 val ah Zomi pawlpi hong piang khia khin suak ahihman in Pasian min ih phat hi.

Zomite pen nidang in saklam pan Kawlgam Irawaddy le Chindwin gundung zanggam ih zuat
lai in ih khekhap bekmah kimu lai ahihman in ih sanggam Kachinte in ei pen ‘Khang’ hong ci
uh hi. Khekhap cihnopna ahi hi. Ih sanggamte’n hong mansuak khin uh a, a mangthang mite in hong ngaihsun uh ahi hi. Tuni in Diaspora Zomite ih tuntunna ah ih khekhap a kician lai ding hiam? Ahihkei leh ih mangthang sak lel leuleu kha diam? Kawlgam kumpi kiukzia hong kikhel toto in hoihlam hong manawh leh ih gam ih ciah kik sawm ding hiam? A hihkei leh ih ciah nuam nawn kei lel ding hiam? Ih ciah nawn a, ih ciah nawn kei zong in Zogam pallunsakna ding pen tuni Diaspora Zomite’ mawhpuak, vaipuak hong hi ding hi.

Tuni in Diaspora Korean-te in khang nihna 2nd generation khangno tampi tak in a gam uh
zuan kik ziahziah ta uh a, a gam khantohna ding nakpitak in a pilna a siamna a hatna uh tawh thanuamtak in na sem ziahziah bek uh ahi hi. Diaspora khangno te zong gamdang ah pilna siamna nakpitak in sin ding kisam ahi hi. Ei Zomite’ thaneemna lian pen khat in pilna siamna sin thadahna ahi hi. Migam ah tung khin in 1) kampau le lai lim sin nuam lo; 2) nasepna ah sum thalawh ding bek, nitha tung ding le khasum tamzaw ding bek ngaihsun in nasep siam ding ngaihsun lo; 3) biakna kikhopna te ah lungsim takpi tawh kihel zo lo; 4) Pasian in missionary khat in hong puak hi cih ngaihsutna nei zo nai lo; 5) gam khangto te ih tun’ ciang ei zong a khangto khat in kituat in kinasia sak, ki lian sak, ki pilsak, ki hausak, etc.; 6) Ei culture hoih te kep sawm nawn loin mi’ culture hoih lo teng zui pah, ciing pah; 7) Zu dawn pah; etc., etc.

XII.          Zomi Ngeina Identity Lui Khat: Zu Nekna

Zomi ngeina identity lui khat pen zu kamnam kinken ding ahi hi. Zomite pen zu duh mah mah le nek le dawn siam lo pawl ih hi citciat se lai hi. American Baptist Mission pan sangmangte Zogam hong tun’ ciang in Zomite zu nakneklua hong sa ahihman in Christian sungah zu nek ding hong kham hi. Zomi Christianity ii identity pen ‘zu ne lo’ ahi hi. Zu ne mi/ inn le Zu ne lo mi/inn tawh Christian le Christian lo ih kikhen hi. Tu in ih kikhen thei lai mah diam? Zomite’ lelh pen khat in zu ahi hi. Tu in zong leitung muntuamtuam ah ih tung ngeingai a zu nek nuamsa vive dan zongh kitam tuak ve ve mawk hi. Mun khat bang ah Zomi zu kidek zo nawn lo a, zato ah kidek liang hi. Zato tuah khit a sawt lualo in zu dawn kik a si nangawn ki om lai hi.

Korea Christiante’n zu ne lo uh hi [a ne simsim khat le nih simloh]. A mau zongh ei Zomite mah bang in mualtungmi hi uh a, khuadam ahihman in zu zongh duh mahmah uh hi. Tua banah a ngeina ngiat ah Zomite mah bang in zu tawh thu gen pawl ahi uh hi. American sangmangte ei kiang hong tun hun phial pawl mah in Korea na tung uh a, Koreate zu duh lua a muh uh ciang in ei mah bang in zu nek na kham uh hi. Korea Christianity ii identity zongh nu nekloh mah ahi hi. Zomite tulai tak gam bel in ih diaspora ih belhna gamte en le’ng Mikang gam vi ve ahi hi. Mivom gamte ah gam ih bel kei hi. Korea le Japan zongh Mikang gam mah ahi hi. Ih tun tun na ah ei’n mi Christian nuntakna ih pantah hiam? Ahihkei leh mi’ pattah ih kul lai zaw pian hiam?

Mai lam ah Kawlgam kumpi kiukna hong kilaih to to leh Zomi Diaspora hun khat hong bei thei ding ahi hi [tu in zongh hun kikhel nuam mah mah ta ahi hi]. Tua hun ciang in tu a gam thumna tung khinsa te pawl pen hong ciah nawn khol lo ding a, hong tun’ beh lah om nawn kei mawk leh migam milei ah mangthang ding lauhuai ahi hi. Zomi pawlpi kiptak in phut in kipawlkhoptheihna hong thupi mah mah ding ahi hi. Tua hi kei leh tu khang sung bel kician lo ding in, khang sawnte hun ah beilam manlam manawh ding ih hi hi. Tua Diaspora Zomi pawlpi sungah mailam ciang Zokam a ki pau nawn diam?

XIII.      Diaspora Tungtawn in Minam, Gam le Pawlpi Khantohna

Korea minam le gam khantohna pen 1988 Olympic pawipi innteek a sepna pan tha khat thu in ki khai vat ahi hi. “Ei leitung ah pusuak ding, leitung in ei gam hong lut ding!” cih pen Korean-te ‘motto’ hi a, president Noh, Tae-Woo hun sung a hanciamna ahi hi. Gam mite passport pia in gamdang ah zin ding phal a, gamdang mite gam sung ah lut ding entry visa phal uh hi. Tua tak ciang in a gam uh pilna, siamna, business, etc. a khantoh mah bang un missionary khah khiat zongh nakpitak in hong khang ziahziah ahi hi. Tu laitak in gam tuamtuam ah Korean missionary 24,000 val om hi. Tua mah bang in Korea gam sung ah gamdang mi tu laitak 1.5 million om ahi hi. Diaspora tungtawn in Pasian gelna om hi ci in Korea pawlpi in um hi. Tua ahihman in gamdang mite a ding pawlpi ah a mau pau ciat tawh biakpiakna bawl sak uh a, a mau minam pastor cial sak ngiat uh hi. English service zong neih zawh ding hanciam uh ahi hi. Topa’ Sawlpina ‘The Great Commision’ pen sangmang sawlkhiatna ‘sending missionary’ bek tawh tangtung zo lo ding a, sangmang sanna ‘accepting missionary’ tungtawn in tangtung fulfilled pan ding hi cih pen globalization paradigm muhna ahi hi. Sawltakte tangthu 13 sung ah en le’ng Antioch pawlpi ah sawltakte gamdang diaspora mi vive ahi hi: Barnabas—Cyprus pan; Simeon— Niger, African mi; Lusius—Cyrene mi; Manaen—Roman mi, Saul—Tursus khua mi, etc.

Tu ni in Korea gam sung ah pawlpi 50,000 val om lak ah, mission nasepna ah kihel tatak pen 15% bekmah hi pan hi. Gam sung zongh ah pawlpi khangto loin kiam lam manawh zaw ta [2000s hun sung khempeuh] ahi hi. Tanglai Antioch pawlpi pen a ettehhuai model Diaspora pawlpi khat cih thu Korea pawlpi in ngaihsun pha mah mah kik ahi hi. Tu laitak Korean mi 8.5 million leitung ah Diaspora in ki thehthang uh a, minambup ii 10% ahi hi: leitung mun tuamtuam gam 175 ah pawlpi phuan kawikawi uh suak ahi hi. Sengam China ah Sente mat thongkia khat tung tawn in pawlpi piang ahi hi: Russia, Hawaii, Mexico, Middle-East, America, Europe, Africa gamte ah peem kawikawi uh a, Mexico gam sim loh mun khempeuh ah pawlpi phuan kawikawi uh ahi hi. Philippines ah pawlpi 70,000 val om a, gamdang ah missionary a puak zo kei uh zong in naseem sumthalawh in a pai tampi om ahi hi. Tua te in a gam a ding gamdang sum zong bek hi loin, Christian upna leitung mun tuamtuam ah kizelsak ahi hi. Pilipino te pen Zomite mah bang in 90% val Christian ahi uh hi. Tuni in leitung mun 35 ah Diaspora Zomi bangzah ih om hiam? Ih thalawhsa sumte ih gam ah ih khak ciang in ih gam in gamdang sum a thalawh suak a, migam ah ih cihtakna tawh Topa Pasian’ gam zaisak ih hihlam ih ki ngaihsun kha hiam?


XIV.     Thukhupna: Leitung ah Diaspora Zomi Mawhpuak [Vaipuak]

Kawlgam, Vaigam le leitung mun tuamtuam ah tuni in Zomi pawlpi bangzah a om ta hiam? Diaspora Zomi pawlpite in leitung mission tawh kisai bang ngaihsutna le muhna gelna vision ih nei hiam? Tuni in Diaspora Zomite zongh leitung mun tuamtuam ah Christian upna kizelsak ding in Pasian in hong puak hi lo kici thei lo ahi hi. Tua ahihman in ih nuntakna, ih om zia, ih gamtatzia te limtak in kidop mahmah ding hong thupi ding ahi hi. Mite in ih nuntakna hong en in, laisim in hong sim uh a na hi hi. Ih kam pan gen khiat sang in ih nuntakna in aw ging tak le ngaih tak in gen khia zaw ahi hi. Tuni in Diaspora Zomite ih dinmun koi ciang ahi a, ih vaipuak bang ciang ahi hiam?

Diaspora Zomi sungah,
Sia Suanpi @ Dr. Cope Suan Pau.

Source : Thupha Zomi. Jan 17, 2012

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Diaspora le Diaspora Zomi - Dr. Cope Suan Pau Description: Rating: 5 Reviewed By: Cinpu Zomi
Scroll to Top