728x90 AdSpace

Hot
Menu
Zon-ol na Donate

Latest News

PASIAN’ DEIH NUNTAKNA. ~ GSPau

Gelh ~ GSPau

1. Lungsim maan nei ding: 
Pasian in lungsimtawng en a, lungsim maan a neite thupha pia-in, laamto hi. (1 Sam. 16:7) Mi pawlkhat pen kamkhum khol lo napi, thu a gen uh teh lungsim maan tawh gen uh a, mi khatpeuh a pahtawi uh leh zong lungsim maan tawh pahtawi takpi uh hi. Tua ahih manin Topa in a dau uh paisak hi.

Midangte in ei hong mudah, hong haza, hong gensiasia, hong langpan leh hong bumdan khawngin i upmawh thapai theih pen i lungsim a maan loh man na hi thei gige hi. A khangto pian leh a lawh­cingpian khat a om teh lungnop loh mikrnek­na, thu a hoihpen a kivaihawm phial zongin lungkim zawhlohna, na khempeuh a sialam vive a lehlakna cihte zong i lungsim a maan loh man ahi hi.

Lungsim maan i cih pen Jesu Khris’ neih lungsim bang hi a, a kilekkim lungsim le na khempeuh a hoihlam (positive) vive a muhna ahi hi. Lungsim maan takpi tawh na hoih khat a sem ihih nak leh kuakua in hong gensia-in hong langpan phial zongin kisuantakna nei lo takin om phiuphiau lel ding ahi hi.

2. Tupna maan nei ding:
Tupna Ilan neih ding thupi mah a, tua sangin tupna maan neih ding thupi zawlai hi. Mi tampi in i tupnate i pulak ciangin a hoihlam vive-in i gen pong hangin i lung­sim tawngah i tupna taktak pen ei angsung hamphat nading, i mindawk nading le mi­dang khatpeuh siatsak nopna khawng peuh na hi khinkhian thei hi.

Tupna maan i cih in Pasian’ deihna tawh a kituak tupna ahi hi. I tupnate Pasian’ deihna tawh a kituah nak leh Pasian in thupha hong pia-in hong tangtungsak ding hi. (Pau.19:21)Nehemiah’ makaihna tawh Jerusalem kulhpi a kician kik ciangin lawp mahmahna le ngimna maan tawh sem uh ahih manin Topa in ompih a, ni 52 sungin zo uh hi.

3. Piakkhiatna maan nei ding:
Pasian in ngimna hoih lo tawh piak­khiatna zong deih tuan lo hi. (Pau.21:27) Pawlpi sungah thu neih nop man le min deih man bek tawh sumpi tampipi piakna le van khatpeuh piaknate Topa in deih vet lo hi.

Mi pawlkhat in piakkhiatna khatpeuh a neih uh ciangin mipite’ theih ding deih uh ahih manin pulpit tung pan pulaksak ding le lai sung khawngah suahsak teekteek ding deih thei uh hi. Hih pen Pasian a pia hi lo uh a, mibingte a pia hizaw gige uh hi.

Piakkhiatna maan i cih in piaknopna lungsim tawh phal takin piakna, i sumpi piaksate koimunah kizang cih khawng kan­sut se !ohna ahi hi. (2Kor.9:7)

4.   Thumaan genna:
Tuhun ciangin thuman gen teltatte a hai-in kingaihsun a, a kulna bangin zuau a gen ziauziau theite mitei ci hi hang. Biakinn sung nangawnah thu i gen ciangin thumaan thutak sangin mipite’ zaknop a sak ding, mihau khatpeuh lungdam nading le tungsiahte’ lungkim nading, cih khawng kigen zaw thei hi.

Zo paunak ah “Thumaan gen le sazang kap” cih om hi. Mahatma Gandhi in “Thumaan na gen leh na lawmte nangawn in hong taisan ding hi.” a cih bangin thumaan genna hangin a val lawh zong kiom kha thei ding hi.

Topa Jesu in “Ahite ahi mah hi, ahi lote ahi lo mah hi, na ci un” ci hi. (Mt.5:37) Topa in thumaan gen ding deih a, thu-maan gente lamah pang den hi. Thumaan pen kuaman seelcip zo lo a, tawlkhat sung a guallel a bat hangin hun khat teh hong gualzo kik veve hi.

5. Sepzia maan ding:
Nasepna ah ei ading lopi khat pen ei adingin heitawmna, sum tamna mun teng tuh kawikawi-in tua lo teng midangte khiatna, na tawm sem peuh le’ng thaman deih pahpahna cihte pen sepzia maan lo ahi hi. “Kei” gen bangin sem un Ia, kei’ sep bangin sem kei un” cih zong sepzia maan lo ahih manin Khristianten zat ding hi lo hi.

Sepzia maan i cih in itna bulphuhin lungsim maan tawh sepna, bangbang i sem zongin mihing’ nasemin kingaihsun lo­in Pasian nasem taktakin kingaihsutna (Ko1.3:23), midangte a sawl ziauziau bek hi lo-in eimah ngiat in sep pahna, sepna ah zong itna le deihsakna taktak tawh sepna, sup lawh liangin sepna cihte ahi hi.

Nehemiah in Jerusalem kulhpi cian­na ah midangte sawl ziau loin ama’ thatang mahmah tawh hanciamin sem ngiat hi. Tua a sepna tungtawnin ama’ ading leitang bangmah Ia tuan lo a, gamukte’ ngah theih ding hamphatna (600:0) khat zong la tuan lo hi. (Neh.5:16,18) Hih pen Topa deih sepzia man taktak ahi hi.

Source : Zangkong awging June/2011

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PASIAN’ DEIH NUNTAKNA. ~ GSPau Description: Rating: 5 Reviewed By: Cinpu Zomi
Scroll to Top