728x90 AdSpace

Hot
Menu
Zon-ol na Donate

Latest News

Zomite Ngeina "Tonh Thu". Agelh ~ Awn Za Pau

Tonh Thu
Agelh: Awn Za Pau

   Ih pu ih pate in ‘Dawibia’ ci in min a puak zenzen hang in a upna laigil taktak uh ah, ih sih khit ciang in ih kha vantung gam tung ding cih upna nei uhhi. Pasian om hi cih a up mah bang in dawi zong om hi ci’n um uh hi. Sih khit ciang in kimaimang kiuhkeuh cih bang om lo a, ih kha pen vantung ah kahto in ei mah ih hihna kithei suaksuak ding hi cih upna nei uhhi. Leitung a ih nuntak lai a ih lungsimte na dong in a keng suaksuak thei ding in upna na nei uhhi.


   Dawi a biak uh hang in, tu hun aa ih Pasian up bang in ih kha a’ding vantung gam ngah ding gitneihna tawh a na bia hi lo in, ih leitung pumpi ih nat ih sat ciangin dawi peh hi ci in na um ahih man in, dawite lungkimna ding in a na bia na hi bek uh hi. A biak a paaina uh ah zong ganhing tuamtuam go in a biak uh hang in, dawite tung ah ‘kheemna’ bek tawh na bia na khaii uh aa, a satak a limci nonote mihingte nek vive hi zaw gige hi. Dawi thoihna a kizang a zam, a khuang a daakbute, a sial a bawngte zong tungman vive lom in a bawl tawm vive tawh na khem bawl uh hi.

    A tung a ih gensa mah bang in Pasian thu  Zogam hong tun ma pekpek in Pasian um sa ih hi aa, Pasian pen ‘khuavak’ ci in dawi a hoih lo lam peuhmah pen ‘khuazing’ ih ci hi. An lim nono ih huan aa ih nek tata ciang in zong ih nek ma in “Pasian tai o! Lung zai tai o!” ci in kau ih buak/paih phot hamtang hi. (tai o!  > gilvah takin hong neeksak o! cihna ahihi.)

    Zomite ih kiteen limlim in ‘khahual’ ci-in akmit-etna (ak aisanna) in innkuan kim a’ding ak khat tek a gawh ban ah, zi nei thak pasal a’ding aklui khat, mothak min in akpi ahih kei leh aklaa khat go uh hi. Tua ak nihte pen nupa thak te tawh kisai nungsang a piang ding thute a mit en in dawisa pa’n gen khol thei hi kici hi. Akmit en a cih uh pen a mit en bek hi lo zaw in ak tawl meek in a sih dong akkhe gel kitom dan leh a sih kuan leh a sih ciang a, a keng kipeek dan;  a nunung pen a khe koih dan en in nungsang thu piang ding gen thei uhhi.

    A ak gawhte uh a huan khit ciang in a mothak min aa, a gawh akpi/a laa pen bel a pum bup in a sunghte (mothaknu’ nu leh pate) pia uh hi. Mothak pen a nu a pate tawh tua ni (akmit et ni) kimu sak lo in a zingciang dong zehtang hi. Nidang in mothakte in a pasalte inn ah an zong maingal tak in ne pah laplap ngam lo hi, kici hi. Tua ahih man in mothak nu pen tua “akmit et ni” zan a nu a pate kiang ah lah ciah thei lo, a ma lawmte kiang ah lah an a duh zah ne laplap pah ngamlo ahih man in, zan khuavak gilkial in ihmu thei lo hi, kici hi.

    Nupa a kiteen zawh kum tam simsim in, tanu tapa zong tampi nei khin in tuk an khaal an kicing a neih uh ciang in, ‘akmit et’ bek tawh picing nawn lo in, khangluite in neih leh lam, gawh leh lup, kidemna lah hi si, nupate ‘kha hualna’ lah ahi si, tonh ding in sam lai hi. Tonh ih cih pen ih pu ih pate upna ah, numei simna ci in a sih khit uh ciang in a kha uh vantung gam ah nupa bang aa, om suaksuak theih takpi na’ng ‘khahualna’ lianpi ahi hi. A zenzen in a zi si in a pasal in zi kik nei phial ta mah se le zong, a tonh thuah kei nak leh anupa in a sih zawh teh a kha uh a zi masa tawh kigawm zaw veve ding, nupa kop hi zaw veve ding cih upna ki-nei hi. Tua ahih manin a tongsa zi kik neite tong kik khollo zaw uhhi.

Tonh Ding Vaihawm Kholhna
    Tong ding cih ciang in an ih hauh kum ahih kul hi. Ei bek hauh zong tawh kivaihawm ngam lo in, ih beh ih phung, ih sungh ih pute zong, a neih kul hi. A hi zong in ‘tonh’ ding pen innteek te’n zong vaihawm masa ngam lo zaw uh hi. Behsung phungsung khat peuhpeuh ah a tong zo ki-om kei leh, beh dang phungdangte’n enneu uh ahih man in, a tong dingte sang in a beh a phung in deihsakna hanthotna tawh, behsung vaii lianpi vaai thupi mahmah khat in kinei aa, hamsa tanggpi mah a kivaihawm ahi hi.

   Hih vaihawmnate kipat khiatna pen khuado hun sung, khuado lawmh anneekpawi bawl hunsung ahihi. Khuado lawm anneek khawm pen behsung unau sung ah bangkuapi/thalloh pite inn ah kibawl aa, tua pan kipan in thu hong piang khia ahihi. Khuado lawmh anneek pen, sungh leh pute kikonlawh peuhmah lo in pasal unau laizom teng bangkuapipa inn ah kipawl khawmin kine a, tua sung panin kikupna leh khensatna hong piangkhia ahihi.

    Hih vaihawmna lian a kithukim pih a ni a kha a ciangtan khit na- ngawn in, a nuai aa bang in kipsakna zu a tong ding innteekte’n khol masa phot uh hi.

01. Thallohte zu khol aa, a mau a tanupi tuitak tawh ne khawm uh hi.
 Tonh hun sung ciang in Thallohte tawh kithuah khawm uh aa, a
 tongte a’ding in ‘khuangsua tanu’ kici pah hi.
02. Zin khakte khol aa, a mau zong a tanu tuitak mah tawh ne khawm in ‘zinkhak tanu’ kici pah hi.
03. Sungh pite khol aa, a mau zong a tanu tuitaak mah tawh ne khawm in ‘sung ken’ kici pah hi. ‘Sung ken’ in ‘Sapi’ ni in innsung mei sak ah zubeel khat guang in lup hi. Sungkente pen tonh sa sabil hon khat kipia ahih man in ‘Sabil kholte’ kici pah hi.
04. Sungh Sabawlte, Pute (atong dingpa’ pute) leh Pusa thoih ‘Tulpipa’ zong zu kikhol hi. Hi teng khit tak ciang in, tonh ding kipsakna a man hi petmah ta aa, ‘Tonh’ kipatni Pansikni ding a ni ciangtan hi. Innbawl ni zingciang kipan ni sagih vilvel mi honpi ten inn zang ding ahih man in, inn bawlni aa kipan tonh pawi a ven khit dong zu guang ding leh sa go ding beh sungpan thudotpi teng kimu kikum in  a kimtak in kiseh pah hi.

(a) Innbawl ni in zubeel ngengpi khat lup kul aa, innteekte’n a neih ngap kei leh, beh sung sanggam sung mah ah akilawm penpen a guang ding adang khat kiseh pah uh hi.
(b) Pansik ni kici sial gawh ni in ‘misam’ ‘tuitawi’ te neek ding zubeel gol mahmah a guang ding innteekte ngaih khat kisawl hi.
(c) Sial gawh khitteh ‘Song Suite’ nek ding zubeel nga, inn nga mah kisawl hi. Tua zute ‘Songzu’ kici hi.
(d) Meilah pua mi nih kisawl aa, amaute vakna ding zubeel ngengpi songzu cia mah a guang ding kiseh hi. (ngeng > gol)
(e) Sapi ni ciang in Innka dawn aa, zubeel ngengpi khat a lup ding in, behbul pente sung pan, panmun neilote kiseh aa,‘Sawkkhak’ kici hi.
(f) Sapini ‘Sialzu’ ci in bikhalap ah beel nga lup ding mi kiseh hi.
(g) Zinkhak ni (Sagual gawhni) in sagote a piak ding in inntual kiu sa sawl ah ‘Saneido zu’ ci in a taak/khaih ding zubeel ngengpi khat a guang ding seh khol uh hi.
(h) Tanute sagawh ni in zong a ‘Saneido zu’ ding mah sehkhol uh hi. Sagual gawh ni mah bang in sa gote taak sa in sialki tawh zu hawm uhhi.

Songsuite
    Tonh ding ciang in inntual ah song khat phut kul aa, sialkop go ahih leh a gawh zah zui in ‘tonhsong’ a ka, a sial gawhzah kibehlap hi. Beh sung phung sung ah tonh simna in meipum (bawng, sial, lawi), a gawh leh a gawh zahzah ‘songmam’ kiphut hi. Tua ahih man in tonh ding vai hawmna tungtawn in khensatna a om ciangin khuasung aa singsui siamte leh it leh ngaihte mah bulphuh in songsui ding mi thum pan nga guk ciang bang kicial kiseh thei hi. A mau pen ‘Songsuite’ mah kici pah hi. Song ding in ngaingaw sing gil mah kizang pen hi. Song a suih uh ciangin song dawn pen zum sak suak lo in lukhu guang uhhi. Songbul pan pi 9 a sanna santakah song geek ci in tua pan a golna tawm khat khiam in zum to sak hi.

Misamte
    Tonh sung in a khual a tual beh bulpi meltheih a tuamtuam a kho ding in tangval lasiam, thahat melhoih minthang pian teng leh meltheih naii-huai deihsak zaw hiat teng mah kiseh hi. Misam pen mi guk pan kua ciangdong bang kiseh thei hi.

    Hih tonh leh gal-aih sa-aih cihte pen ih khawh ih tuk, tuuk an vaimiim, taang, leh bete ih laak khit zawh khuado khit a kivaihawm ahih mah bang in khua dam hun laitak ahi November pan March kha kikal sung ah kinung pen hi. Tua ahih manin misamte in tonh sung aa, sa emna ding singkang leh, zanlam ‘inn tual mei sep’ ding singkhul zong a mau mah kiseh hi. Tonh, sial gawh ding zong a mau mah kizong sak in kikai sak hi. Pansik ni sial tawh kimawlpih ki-ommaih ding zong misamte nasep mah ahihi.

Tuitawite
    Ih Zogam khua tamzaw ah tuisik anhuan na ding leh dawn ding takpi zong haksa mahmah ahih man in, hih bang tonh sung zu-nun sa-nunna lianpite’ ah tui nakpi tak kisam a, tui tawi ding a tuam in, misamte zah mah veng leh paam ahi zong, ngaknu melhoih hong maingal leh deihsakte mah tui tawi ding in kiseh hi. Amau pen misam tangvalte tawh gualnuam ding leh sapi ni leh ‘sa gual gawh ni’ khuasung mipite ‘Laamlak’ ding hi pha pen uh hi.

   Tonh misam tuitawite’ khuasung ah a minthang pian ahih leh sialgawh en aw, laam en aw, kitam mahmah pha deuh hi. Tonh sung in misam tuitawite phual/mun lakna pen phaitam zang teng hi aa, a mau a tuam in zu ne in, anhuan uh hi. Tua ahih man in Tonh sung in, innteekte' inn pen tangpi tang tate aa’ linlian suak in, inn mai kongpi leh inn nung kawmhek (kongkhak) a sun a zan in honsa in kikoih hi.
    Misam leh tuitawite zan a a lup uh ciangin lawmhawm in nungak leh tangval a kopkop in inn liim ahih kei leh inn sung pialkhang tengah khaam/haam lup uh a, akisawk aki-hebang om tuan lo uhhi. Pasian thu a zui Khazih tate (Christian) ahih loh uh hangin, nungak tangvalte in a namtuina a sianthonate (virginity) na kem cing mahmah uhhi. (Lawmhawm > A lumkhawm ding kiseh)

Khaam lup/haam lup  > Kigual diudeu a phei lup

Meilah Late    
   Taaksing pona taaksing tamna khuate ah ton zunun sung det ding meilah la a tuam in kiseh tuanlo a phamawhte lak ah thusate gel kiseh tawm thei hi. Tua mah bang in singkhul ding zong a innteekte ‘singham’ pan singki-ek in kiging khol uhhi. Meilah haksatna khuate ah meilah zong ding atuam vilvel in kiseh ngiat hi. 

   Tonh pen innbawl ni zong sim, ni giat tanggciim  ki-nung aa, a nuai a bang in min kivawh hi.

    (1) Inn bawl ni,
    (2) Pan sik ni,
    (3) Sapi ni,
    (4) Sagual gawh ni,
    (5) Tanute gawh ni,
    (6) Taangpi antawi piak ni,
    (7) Tanute antawi piak ni,
    (8) Taitehte' antawi piak ni

(1) Innbawl Ni
    Tonh hunsung aa, mihon pite gamtatna gualnopna leh lamna ding ahih man in innka, tuangdung, tangzomte patauh dipkuat huaina omlo aa, kho tak aa omna ding, innsung inn pua muanhuai tak leh, mei a kangsak thei ninpa nahthel siangtak in innnuai inntung phiat uh hi. Innka khuam leh sualkalte a muanhuai kei leh a thak tawh khek uh hi.

(2) Pansik Ni
    Tonh kipat ni ‘Pansikni’ in a nuai a bangin sa kigo hi.
(a) Vok tuknga pan a tungsiah khat ‘lawigawh’ ci-in go a, aliang peek demdam khat Pute pia hi.
(b) Khuangsuate ci a, thallohte tanu tuitaak leh tanu sawlla (tanupi leh tanu nauzaw) te gawh vok tuk li sang a neuzaw lo nih kigo hi. Taksih nganhuan aa, voksa solgep tawh phamawh mun lente bek tham lo in songsuite dong in a zu a sa taksih nganhuan eel liang in kine hi.
(c) Nitak nai thum hun pawl ciang in vokno tuk nih cia a nu leh a pa go a, sialkong sak ah ‘nuhdo’ a dawn dawlnih kigeek tung ah sialsawl khiang/hiang khat leh sawl san khiang/hiang khat tawh a sa a sin a tuap a huaii gua hiam khat tawh khil aa, a kigawmin nuhdo tung ah kisiat hi. Nuhdo pen voksong aci pawlkhat om hi. Bangkuapi thoih pusa thoih ciang aa kongkan gei a guaton neu khat leh songmaam a neu kiphutkhawm pen ahihi.
(d) Nitak nai 4PM hun khawng ciang in sialgawh kipan ding hi ta hi. Tua tonna ding sial pen misam tangvalte in a ton ma ni nih ni thum sap in a tong dingpa’ inn nuai ah khihsa in koih hi. Sial go akicih hang in a ki-ommaih pih kimawlpih hi bek aa, Tulpi /Siampi pa'n phuisam kawm a, tei tawh a dawt ma in si zenzen leh a dang a zon    kul ding hi.
(e) Sial gawh maa in, a  tonh song pen inntual laizang mah ah kiphut hi. Sialkop go lote a’ding in songka khat kiphut hi. Song pen amah bek kiphut lo in ‘gua ton’ ci in gamsung aa, gua hoih penpen, a kuitung penpen kizong in tua tawh kiphut hi. Tua guatonh zong ding zong misamte mah ahihi.
(f) Guaton zong a etlawm theithei ding in bawl uh a, a kuisuk a dawn penpen ah a kui ngiilngeel ding deihna tawh a gik pian ding gawteh lom henkop in bawk nineii in kaai sak hi. Tua pen guaton bawk mah kici pah hi. Tua gua tonh dawn aa guaton bawk tawh kizom in a phelek kici, gaw lum a bem in sagih bang bawl a agolna kibang sak gai lo in, a dawn lam ah neu sak tektek a khau tawh kikhil diudeu hi. Tua gualum a beem a kikhil ngiilngeel te huih tawm nung leh phe leklek geuh ahih man in a ‘phelek’ a kici pah ahihi.
(g) Tonh ciang aa, sial gawhna ding sial khau pen a tong innteekpa' zawlpa'in khau sat ding vaipuak nei hi. Tua amaa lak khautang khau heek lamgiat sau khepnih suah tawh sial kikai ahi hi.

Vaphual Antah
    Pansik ni sialgawh man khit ciangin songgeek santak ah sialgawh ii sa-sin sa-lung leh taksih nganhuan, zu thawlnote nangphan sungah koih in vaphual neek dingin koih uhhi. Vaphual antah akipatkhiatna pen nidang lai Lawi Thang leh Sial Liante unau nihte tangthu pan hong piangkhia ahihi. A u Lawi Thang vaphual in piang aa anau an puak ni loh hi. A nau Sial Lian hong liat ciangin nuamsa in hong tong hi. A tonh ciangin a nau in zong tonh zo dingin sam pah aa, a u  (vaphual zong) tonhzo dingin hong pai takpi hi. Tua kipan khangluite in a ton sialsial in ‘vaphual antah’ ci in songgeek omna santak ah ‘vaphual antah’ kikoih hamtang hi.

Vaphual Antah Hong Pian Khiatna
   Nidanglai in Lawi Thang leh Sial Lian kici unau nih om hi. Lawi Thang a uzaw hi-in, Sial Lian a nau zaw ahihi. A neulai un a nu uh si a, a pa un zikik a nei hi. A nukik un Lawi Thang leh Sial Lian itlo in a pasal kiangah, “Hih naupang tegel tawh khuasa khawm theilo ding ka hihmanin, ahi thei bangin mundangah hawlkhia in” a ci hi. A pa in a tapate gel hehpihhuai sa in it mahmah napi a zi’ thu mang in gamlapi ah Bawm lianpi khattawh pua in paipih a aciahtheih nawtloh nang munah khawlpih in ihmusak in a ihmut kalun anusia vingveng hi.

    A tate a khanlawh ciangin, khua muita in akiim apaam a et uhleh a pa uh mu nawnlo hi. Acihna ding uh thei lo in, agil uh kial mahmah a, akapkap uhhi. Gamlakah nektheih zongin a vaak melmel uhhi. Nektheih a muh peuhpeuh uh, phelhawmin a ne uhhi. Ni khat vasa bu khat mu uh a, a u in a va et saisai leh vaphual tui tang khat na om hi. Khia suk lelah kitam ding, ne lelah a nau in ngawl ding ahihmanin a u in a kam sungah muamin sing tungpan hong kumsuk hi. Leilak a tunma in vaphual tui taam sakkha in valh kha a, vaphual a suakpah hi.

    A naupa in a u vaphual a suah ciangin dah mahmahin amah kia a kapkap hi. A u in “Nau aw kapkap kei ou! Nek theih Singgah ka muh peuhpeuh hong puak ning aw, Lau ken aw” a ci hi. A u zong singgah zongin a lenlen leh mun khat ah gamhoih gamnuam mahmah khat mu a, a naupa samin tua khua ah a tengsak hi. A naupa in tua  khua ah a sep khempeuh lawhcing in, a khawi peuhpeuh pung mahmah hi. Zi nei in ta nei in nuam a sa mahmah hi. A sawtlo in Khua Hausa nangawn a sem hi. A upa in zong vilkik nawnlo in kum sau veipi a kikhen uh hi.

    Ni khat ni ciangin, a naupa Sial Lian in ton ding hong vaihawm hi. Zu leh sa na khempeuh kicing zihziah khin a, a nunung penin a upa a sam nuam hi. Tua ahih manin a upa a sam dingin vasa khempeuh kaikhawm in a sam siampen ding sin kawikawi a, atawpna ah Vavui asawl hi. Ton kipat ni zingsangin, a u Lawi Thang hong tung huak-huak takpi a, inntual tungah hong laam hi. Sial Lian zong nuam mahmahin, a inntual laizangah hong pai a, a u amuak hi. A u in a mul khat bot in a khiatsuk leh, a nau in hoihsa mahmah in a lukhu tungah suang viuveu in mipi lai ah a laam hi. Vaphual mul tawh kilawm mahmah in mi khempeuh in hoihsa in a eng mahmah uhhi. Papi khempeuh in Vaphual mul ngen pah ngeingai uh a, a u in zong a mul neih khempeuh botbot in a khiatkhiat hi. A kha a mei abei dong botbot in khiatkhiat ahih manin a tawpna ciangin leng thei nawnlo in leilak ah hong kia a, a naupa in a tangsaal ah a kem hi.

    A kha a mei akim dong akep khitciangin a khah kik hi. A u in a lenkhiat kik ding ciangin, a naupa’ kiangah khitui nulkawm sa in “Nau! hih lai mun sang a nuamzaw gam khat mu khin ka hi aw. Tua lai ah a tawntung ih tenkhop theihna ding ni khat ni ciang hongsam ding ka hi. Tua lai mun nong tunnop leh Thumanna leh Cihtakna kiptakin len tinten in la, na nuntakpih in aw. Mangngilh hetken aw Sial Lian!” ci-in a vaikhak khit ciangin a leng khia vingveng hi. Tua hun a kipanin tuni dong Vaphual ahi a u Lawi Thang leh a naupa Sial Lian akimu nawn kei uh hi. Tua ahih manin Zomite in Vaphual tawh ih kiciaptehna hih Unau Nihte’ Tangthu pan hong kipan hi ci in Zomi Tangthulam kansiam mipilten na ciamteh uhhi. (Source – Paul Thangpi)

Sial Gawh Dan
   Sial gawh akipat ma in tonhsong gil mahmah songka khat leh gua-ngal kung a kui tung mahmah tonhgua dingin la a, tonhsong tawh henkop in a phutna ding, inntual laizang ah, pi 2- 3 a thuk ding lei to suk hi. Tua  zawh ciangin tonhsong leh tonhmungte anih in  leisungah phut suk uh a, lei tawh vuk naii lo in tonhsial gawh ciang a, akip mahmah akho mahmah dingin sing khetphim vive a kim ah kigak takin khencip uhhi. Songgeek santak (Vaphual antahna) ah gua-tonh leh tonhsong kip takin hen khawm bikbek uhhi. Song leh gua kip mahmah muanhuai mahmah a sak khit uh ciangin, misam tangvalte makai in, tonhsial gawh ding hong kipan ta uhhi. (tonhmung, tonhgua, gua-tonh akibang hi)

    A zenzen in tonhsial banah, lawi, bawng, sakol cih bang akigawh thuah leh tuate simna in a gawh zahzah song maam kisui a, tonhsial simna songka tawh kiphut khawm hi. Sialkop gote leuleu ciangin a tonhsial gawh zahzah songka kiphut hi. A tung a pulaaksa mah bangin meipum gol nei gan ngeengpipite a gawh thuah uh leh, a gawh zahzah songmaam kiphut thuahthuah ahih manin, mihau mahmah sialkop gote’ inntual ah songmaam songka kigawm khuam tampi kiphut khawm kimu thei hi.

   Sial gawh hun ding ciang in misam tangvalte in, sialkong pan sial tuun uh aa, tua zawh ciang in song leh gua-tonh mung kiphutna ah kai in, songkhuam ah akhau vial khat paisak in, a sial ki-ommaih pih uh hi.

   A sial a na lua lo in ciang tawh sat, khat veivei a mei kuai ci in a mei ah man in a mei kuaih sak uhhi. Tua bang ciang in sial pen kitom in a song leh a tonhmung bang liingsak nalnal hi. A sial a  tawl mahmah dong nono in kimawlpih niloh uh hi. A sial gim mahmah aa, a puk teh muanhuai tak in henton in tulpipa ki-ap hi. Khanglui lai in mi tam mahmah a gen nopteh ‘Sial gawh en bang’… "Sial gawh en zahzah pha" acih mah bang in numei naupang ngaknu tangval in lawp thei tek peuhmah aa, khua zaang in ki-en zihziah hi.

   Tua laitak in innsung ah, innteeknu leh innteekte’ tanupi (tanu tuitaak) tanu nauzaw (tanu sawlla)te innsung teng ah kap ngutngut uh hi. Nuam lua aa kahna hi zaw hi. A sisa a tate ahi zong a nu a pate ahi zong phawk in, amau zong nungta lai in hong uap thei le uh maw.. lungkim huai toto mah sinteh.. cihna ngaihsutna tuamtuam tawh kap behlap uh hi.

   Sialgawh nopci leh nopci lo pen a sial a hat leh a hat loh, a git leh a git loh tawh kisai hi. Sial pawl khat hat lah hat, gilo lah gilo si ahih man in tangval meidawite sukngam ding bang hi vet lo hi.

   Sial a hen ton khit ciang in Tulpi pa’n teipak tawh a le-ah sun hi. A sih pah vat kei leh misam te’n a dek su in si sak hi. Sial pen gan dang gawh bang hi lo in a vun hok hamtang uhhi. Sialsa pen a sial in kihawm a, a phei meibaang ‘khuangsuate’ pia hi. A liang khat pen zinkhak te pia hi. A liang khat pen koih hi. A ngawng pen a zawlpa pia hi. Sialvun a hi a phaw pen sengnam a zat ding in tulpipa’ sengthum ai cing ding pia aa, a dang teng sapi ni sago teng hawmsak hi. A iksa leh a phuk teng tanute hawmsak hi.

   Sial a sutlup khit phet mah in tonh phuisamna sung mah a kihel a gawh ding lengkeel zong naupang pawl khat in ommaihpih phot uh hi. Keel a gim a tawl mahmah ciang in tulpipa in a phuisam khitteh gua taak hiam mahmah khat tawh a le mah pan dawt lum hi. Sial leh keel pen phuisamna a kizang tuak ahihi. Tua hi a, keel zong tulpipa sutma in naupangte’n kimawlpih aa, a zenzen in tawl lua in si zenzen leh a dang mah zon kulsak hi. Sial leh keel pen a tal/apa tuakmah hi nak hamtang ding hi. Keel lungtang pen tanu sawlla (tanu nauzaw) te keemsak hi. Mansuah thei lo hi.

   Tua ni zan in songsuite leh misam tuitawite neek din’ sa hoih a sak zah sasem te’n pia hi. A hi zong in ciamnuih leh cihtak in, phamawh sa a paih lohte misamte in, sa semte theihloh kal in laksak guksak thei uh hi.

   Tua ni zan pen ‘Songzu masa’ ci in beel gol lua lo zubeel guk, songsuite in sa min ma in peng nek uh hi. Sa nek khit ciang in ‘Songzu vaak’ci in bel golpi bel guk mah lup thuah a, zan thapai in ne uh hi.  Zingsang lam teh ‘Ailawng to’ ci in ailawng la sa uh a, zan khuavak mah in vei nguainguai uh hi.

   Mi sam tangval leh ngaknu tuitawite a ding a kisehsa om bang in phaitam ah zu bel kiguang a, amaute zong a tuam in na gualnuam mahmah uhhi.

Song La:
Innteekte La:
1. Zangleng ka buktui aw e, ka sawlsang te’n, theihloh nahnuai gamcin zan sial bang giah e. Zua lamhloh zaang sawlsial leh gam tulta aw, khan kituak aa tuah ih ciam ih hiai mah e.

Songteekte La:
2. Gamlai tulsing, aphung tawi hiang bang zau aa, ka ngaih lungtup kangaih  dawn, bang tuak mawng e. Ningzu leh aisa lai ah, tuangtung ding aw, zaang nun gia bang ken hon zun lah hi vang e.
3. Gamtulta aw na pian na koi lai ahiam?, mu nuam ingh e mun zaang lai hi ve vak e. Tui aa limnga mang bang aa na hek ngiingeii, tuai nih thum banzal liang ah, ni no  bang e.
4. Simsing deihci bang tel aa gam zang ka zawt, sunni tum mui khua ka ziin, ni tam tah e. Gam tulta aw na khan hawmthawh buang ingh e,  tuai sumhtual ah dit ding bangin, kaii  liangin zun nuam ingh e.
5. Kawi tawh sawmsial ka simna gamtulta aw, tulmawh hen aw, khuakim gen in om hen aw. Kammei ta’n na ziallo aw kiaklo lakah, kumsawt ka laamtual ka mel cikhna hi e.

(Songteek   > Songsuite lakah innteekte ngaih khat leh nih akiseh ahihi.)

Pansik Ni Lawm Hawmna (Zu lawm)
    (01) Tanu tuitak leh Tulpi,
    (02) Beh sabawl leh Sungh sabawl,
    (03) Sawlla leh Sawhkhak,
    (04) Sungken leh Behthusa,
    (05) Khuangsua zui leh Veengthusa,
    (06) Zinkhak leh Sunghpi,
    (07) Thalloh leh Innteek,
    (08) Zinkhak zui leh Meisak zu a site (sung ken),
    (09) Pute leh Saphuk bul,
    (10) Tawileih leh Songteek,
    (11) Nuphal leh Zawl.

Tonh Sa Lawm Hawmna (Sa Lawm)
    (01)  Zinkhak leh Tuitaak (Tanupi),
    (02)  Sunghpi leh Khuangsuazui,
    (03)  Beh sabawl leh Tanu sawlla,
    (04)  Sungh sabawl leh zinkhakte’ tanu,
    (05)  Pute leh Saphukbul,
    (06)  Zawlpa leh Saphukbul zom.

A Khiatna
Saphuk bul     =  Tanupite gel banah azom tanu masa pen.
Saphuk zom   =  A nihna
Songteek     =  Song suite lakah innteekte it pen ngaih pen khat kiseh
Tawileih          =  Thallohte phamawh sung pan hi.

Zinkhak ni ciangin a hawmkik Sa Lawm
A Phuk Lawm
    (1) Zinkhakte leh Thusa u zaw (Beh Thusa)
    (2) Sunghpite leh Thusa nau zaw (Veeng Thusa)

Tanute Gawh Ni Phuk Lawm
    (1) Tuitaak leh Thusa u zaw,(Behthusa)
    (2) Khuangsua zui leh Thusa nauzaw,(Veengthusa)
    (3) Sawlla leh Sasempa.

Kai Kha Lawm Zu Lep/Pan
    (1) Zinkhak ta – Khuang tum pa’n
    (2) Sunghpita  – Songteek pa’n
Sago dangte seh tawm hi a, atung aa teng pen pelhloh a zuih ding ngeina ahihi.

Akhiatna
    Zinkhak ta’  = Zinkhak te aa’
    Sunghpi ta’  = Sunghpite aa’

(3) Sapi Ni
     Zingsang nai 6:00AM pawl ciang in zingzu ci in beel ngeng lua lo beel guk mah songgei ah lup uh hi. Vaii kuan hun (zingsang nai 8AM-9AM) ciangin sialzu ci in bikhalap innka tung ah zubeel golpi nga mah lup leuleu uh a, khuasung a, a tongsa khempeuh kiciam in peeng neek uh hi. (peeng tawh teep in dawn uh hi).

   Sialzu meh ding ci in vok tukthum sang neu zaw lo khat go a, a tong ngeisa sialzu ne teng seh hawm sak hi. Zan nitak ‘Pansikni’ a, a gawh keelgil misamte’n bawl uh  a, taangthalh in nitak ciang a lam en dia hong pai, numei naupang, ngaknu tangval hawmsak hi.

   Tua nitak nai 8:00PM hun pawl in misam tuitawite'n a neih penpen a puanhoih a khihoih neih pente mah ok in, a puandum a puangial, a puanlaizem/puanlaisan, a tanghcingte uh tawh phaitam zang pan hong  kipan in innkun ah, innkun pan inntualzang lam zuan in hong laam phei ngelhngelh uh hi. Inntual pan suangphahpek kantan in innka dawn ah - tua pan bikhalap lam manawh in, inntual lam ah zuan kik in tonh song kimvel in laam uhhi.

   Ni dang lai in namgim mei cih lah kinei lo ahih man in inntual ah meipi sep in kilaam hi. La dawng nih dawng thum bang a laih khit ciang in khuasung pan nungak tangval  “Laam suak” ding ci in kongkan gei pan kipan in, misam tuitawite a laamte tawh kizom in hong laam deudau uhhi. Huansak a lam en nungak tangval a kipan naupangte na-ngawn om thei lo in khutkawi tum tawh awng ziazua uh a, kigamlum in nuam kisa mahmah hi. ( Meipi sep a khiatna >> Singkeu singkhuah golpipi mei in cih –Camp fire dan)

   Tua ni zan pen sehsa om bangmah in, misam tuitawite leh ‘lamsuak’te nek di’n phamawh a pang lo, zubeel khat beek tawh uap ni, a cite’ zu beelte, mi samte’n sun in tuamkoih uh a, tua nitak in lup uh hi. Gualnop dan tawh kizui in zanhak in kilamlam hi. A tawl uh ciangin inn sung inn lim zang in tutsa in la atuamtuam sa uhhi. Nuam akisa tateu zongin a zingteh vaii dang kipat kik ma in tawp bawl uh hi.  
    
Sapi Ni Tonh La Patna La Pawlkhat
01. Ka tonhkhuang aw thang zawm aw e, ka hankhuang a thang zawm aw. Tonhkhuang leh hankhuang thuah ing e, mual ii hem ah thang nah e.
02. Khau va sat khau va sat ve aw ‘Hawltham’ ah khau va sat aw.     Hawltham khausat sial khihna di, ka khua ‘Sihzang’ ei zawl aw.
    
 (Hawltham > Saizang khuapi pan tai 2 val khawng a gamlatna
  Saizang – Kaptel mawtaw lampi tungah om hi. Sihzang > Sihtui
  omna Saizang khuapi a, Sihzang veeng a kicihna munteng mah
  ahihi.)
03. Khuamual a len sesing aw e, nauzu a ka lak aw e.
      Nauzu a lak len sesing aw, gam sing bang mang khong tah e.
04. Daiteng phuigua khan siamno aw, thai tawh deih a zeek ing e.
      Thai tawh deih a zeek ing e, gual tungtuanna’n bawl ing e.
05. Simsing lungdeih sawmsial a lak, sumtual ah kui ngilngel e.
      Daiteng phuigua phunglai ningzu, sumtual gawl bang kim sang e.
06. Ih sumtual ah phuigua lum zem aw mauki hunna ka sa e.
       Mauki hunna lah hi lo a, kawi tawh laukha ka hualna hi e.
       (La tampi omlai hi, Tonh la-ah atuam in kigelh hi.)

*Sapi ni in, Pansik ni a sial gawhna Tonhsong leh Tonhgua/Tonhmungte       lei vuk in a kip a kho ding in kiphut pha kik hi.

(4) Zin Khak ni/ Sa gual Gawh Ni
    Tu ni sago teng a nuai aa bang hi:
    (1) Zinkhak               -aneupen voktal tuk 4 tung siah,
    (2) Sunghpi              -aneupen voktal tuk 4 tung siah,
    (3) Pute                     -aneupen voktal tuk 4 tung siah,
    (4) Beh sabawl         -aneupen voktal tuk 4 tung siah,
    (5) Sungh sabawl     -aneupen voktal tuk 4 tung siah,
    (6) Zawlte                 -aneupen voktal tuk 4 tung siah.

    Tu ni a sa kigo khempeuh sehthum suah in innteek, zinkhak leh khuangsua zui te’n seh khat tek in hawm uhhi. A hi zong in sago khempeuh in amau’ sagawh ciat a phei mal tutphah/ tangg kik uhhi. A tung a, amasa thumte in a sa teng amau’ phamawh panmun len teng hawmsak sawn ahih man in, amau nek ding zong a tampi val tuan lo hi. Beh leh phung, sungh leh pu tampi lawhtak ding a kiseh kihawm hi a, khanglui ih pu ih pate thu khualna leh pilna pen dawm peuhmah lo hi. A beh a phung a sungh a pu sanggam numei leh pasalte teng mah a panmun letna tawh kizui a sa akitanh dimdiam ahihi.

    Sa go teng in zubeel nihta lup a, innsung leh innliim ah beel khat tuak in khen uhhi. A zu uh pen a phamawh teng simna ahih mah bang in a banban in ngeina bang in peeng nek uhhi. ‘Sakuang um’ ci in panmun len thupi zaw deuhte’n um masa, zu zong leepsak masa uhhi. Thusate in sa ngoi letmat nih leh a langta ding, sagote kiang ah ngen uh a, atongte beh papi khat tawh ne khawm uh hi. Tua ni sun in siallu kheuh a, siallu kheuh te’n ak pum khat ta tawi uhhi.
   Zan nitak sapi ni mah bang in tu nitak zong zan nitak a, a laam bang ngeiingeii in misam tuitawite phaitam zang pan honglaam phei leuleu uh hi. Hih laam kawmkawm a  lasaknate ah la dangdang kisa lo in tonhla vive bek kisa hi. La gen/sut ding a tuam in kiseh a, ama gen bangbang in kisa hi. Gualnopna tawh kizui in kilaam suaksuak a, a tawl uh teh inn limah tut kawmsa in zu peeng kiciamin om uhhi. A zingciangin tuitawi nungakte a sep a bawl ding om lai ahih manin zanhak suak ngei khollo zaw uhhi.
                         
Tonh La a zom…
07. Ih tonh sawl leh ih han sawl aw huihkhi ta’n na sem lo aw.
       Huihkhitan’ na sem lo aw e, a pal lai na heu lo aw.
08. Thawmte sawmsial lim a lian aw, laukha ka hualna aw e.
       Laukha hualna sawmsial limlian, zua pangmai-ah aki hiangsing
       bang  zau e.
09. Simsing ka lungdeihno leh daiteng phuigua, kop in tu bang suan
      ing e. Tulmawh hen aw sing gualgen di’n, zodam thalpan kai hen
      aw.
10. Ih sumtual ah sawmsial limlian aw, phung in bawm e miza in
      bawm e. Phung in bawm e miza in bawm e, kuahsuang pallun e
      vaza in bawm e.
11. Ka thai lungtup thawmte sawmsial, kawmpal kaisak zel ing e.
      Keima lungtup leido sumlu, alva zo sak zel ing e.
12. Sumtual tonh sawl setang gel ing, seino lungtup tung sang e.
      Seino lungtup tung sang e, sumtual buancim kai sang e…
      cih a kipan tonh la vive sa in zanhak uh hi.

(5) Tanute’ Gawh Ni
     Tuni in tanute gawh ni hi a, sago teng in zanni ‘sagual gawh ni’ a gote mah bang in zubeel golpi nih ta guang a, innsung leh inn liim ah luup uhhi. Zan a, a siallu kheuhsa uh siallu innsung ‘baallei’ ah suang uh a, tanu tuitakte sagawh a phawhlawh solna tawh siallu zut in puankhuh uhhi. Sehkholhna sa om bang in sagualgawh ni leh tanute gawh ni a sago teng dawn ding in, zubeel gol theithei khat inntual kiu sa sawl ah kiguang a, a zu taksa in kihawm hi.

   Ni dang in hai tang’ in sialki kizang hi. Sikkeu tang’ in ‘keu’ ci in um phalkeu kizang hi. Tu ni in ‘khuangkhup’ kici in khuang kitum thei lo a, la sak nop leh khuang tum lo in singbawk peuh tum in kisa  hi.

(6) Taangpi Antawi Piak Ni
    Tu zingsang in tanu sawlla (tanu nauzaw) pa in, sawlsan khiang khat leh 'nah' ci-in sialsawl sing nam ateh a ngeng zawte khiang khat sat a, gua hiam khat tung ah sabak khil in, a thum in lomhen in gawtonh ah vomhkhau tawh henkop hi. Tua pen ‘vaphual antah’ kici hi. Tangpi an tawi piak ni a deihna in a dang hi lo a, ‘ Sagualgawh ni ’ a sago teng in antawi hong piak uh acihna ahihi.

    Antawi pia ci a, voksa solgep leh sialsa tawh taang ngan huan (taksih ngan huan) leh zubeel gol simsim khattek tawh ban ah, sagual gawh ni a, a sagawh uh vokphei mal a tutpah/a gawl ciat uh, a tongte inn ah hongpua kik uh hi.  A sasempa leh beh papi in vaihawm in a phei malte phamawh sa in hawmkhia leuleu uhhi.

    Taang nganhuansih leh sa, satui meh in gilvah taktek a, a nek khit uh teh, misam tuitawite kikopin, taksih nganhuan leh sa solgep lomsa tanu khakte tawh kibak in sa dekdak uhhi.

(7) Tanute Antawi Piak Ni
    Tanute sa gawhni a kihel teng in 'tangpi an tawi piak ni' mah bang in taangngansih leh sa solgep, satui, voktui, sialtui ne in kitai mahmah hi. Tua ban ah, a lim theithei tangho, kawlkai leh gatam ciauh cih khawng an limnono leh an lamdang nono a cingkim theithei in  atongte’ inn ah antawi in kipia uh hi.

(8) Taiteh te’ Ni
    Taitehte acih pen phamawh panmun len ding a, a matte hi lo in, taiteh pho ding a, akiseh nuphalte ahihi. Innbawl ni a kipan in Tonh zu-nun man ni ciang dong, inntek lamte lup zu pengsa te “a te” a muat a ap lo ding in ani ani in a tongte' a veeng a pam meltheihte innka-ah pho keu uhhi.  A keu ciang in taiteh kici a, silngo/tol nuh/sawh leuleu in zu in kisa kik hi. Tua zu pen ‘taiteh zu’ mah kici hi. A thak a kisa zute tawh helkhawm in kilup thei hi. A masa zah in lim zolo ahih hang in, tangpi nek ding in nungsang ciang in kiguang kik, kilup kik thei veve hi. Ton zunun sung in bel kilup kik man sam lo hi.

Sialkop Go
    Tonh zu-nun sa-nun pen inn-bawl ni simloh ni sagih vilvel sun leh zan kitatsat lo-a, kibawl ahihi. ‘Sialkop go’ ci-in kitungnun sakna om sawnsawn lai a, sial-pen nih sang tawm zaw lo go uh hi. Sialkop go te’n inn bawl ni in innka dawn ah tapluak a meivak zihziah hi. Sialkop gote a sih ciang in a tanupite in puanbu thup nei tawh siluang tuam hamtang uh hi. Innka a, a tap luah pen a sih ciang in  nitak pusuah a meivakna ding hi pah hi.

Thu Khupna
   Tonh ih cih pen ih Zo ngeina ah a sang penpen kidemna ahihi. Nupa kha-hualna lah hi si a, gual tungtuanna zong lah hi si ahih man in, tuhun lai ih om dan ih ngaihsut dan tawh ih etkak teh a ‘haivai’ a bat hangin, amau hun tawh kizui in a thupi pen, a kidem huai penpen ding mah hi ci’n ih mu thei hi. Vahna ciahna zu-nunna sa-nunna khempeuhah, mun limci ngah in taltangg bek thamloh in tualtangg mahmah lai uh hi.

(Taltangg = va-anghnei, maipha ngah; Tualtangg = mai-ngal, teektangg, ki-innteeksak)

   A sih uh ciang in zong mi mawkmawkte tawh kibang lo in la zong tonhla mah sa pah uhhi. Gal-ai sa-ai ngeite’n galla sala mah sa thei pah uh hi. Si a gui ciang in zong mi mengkengte tawh kibang nawn lo hi. Tonh lah a tong ngei lo, hihneih gal-aih sa-aih a bawl ngei naii lo bangkua khat a sih ciangin, galla, sala, tonhla a sak ding dawng khat mahmah zong om lo khong ahih manin, a sih uh ciangin, naupang ngeek lai mahmah nipi khat zong a kim naii lote akigui mah bangin, ulian uhamsa pipite zong aki –kunngui hamtang uh a kul ahihi.

 (Hih neih > Gal-aih ahih kei leh sa-aih a cihna mah hi. Gal leh Sa a min a a lawh gallgall ding a utloh man’ hi. Kunn-gui > Khuadak lo a kunn ngiungeu a kigui cihna hi. A lasak ding om lo in, si luang lah innka ah kilaamh thei lo kipusuah thei lo ahih manin, si a gui ciangin inn sung pan kipusuah in hankhuk dong ah akigui pah vingvengte a cihna hi. A siluang pua tangval papite a mai uh zum in zong khuadak ngam lo uh ahih manin, tua lai pan ‘akikunn-gui’ cih kammal hong piangkhia ahihi.

Mi mengkeng > mi mawkmawk, mi menmen, mi gina lua khollote cihna hi.)  

   Tonh sung in dawi vai tawh kisai dawi biakna taktak om lo a, innteekte nupa kha-hualna mah hi pi pen hi. Ahi zong in tua kha-hualna ah Pasian tung ah ngen lo in dawite tung mah ah ngetna kibawl ahih man in, dawibiakna tawh kisai lo kici thei lo zel hi. Tua hi a ton ih cih pen nupa kha-hualna leh neihsa lamsa hauhna kidemna pawipi hi, ci in ih ciapteh dingin hoih  hi.

Khuang, Zam, Sialki

10. Tonh La
Apat na;
(A) Sial honglaam sial honglaam e, Thawm ii sialkhawi honglaam e.
(B) A tatna Khumtui hi e, a pianna Tuithang hi e.

(A sak dan kibang lo hi. Anuai a athahna pan kipan a nuaisiah aban teng Latung la sak bangmah in kisa hi. Thawm ii sialkhawi  > Thawm behte sung pan a minthang mahmah Pu Mang Sum khan lai in sial leh bawng tampi nei uh a, tua sial leh bawngte mah bulphuh in “ Thawm ii sial khawi ” a ci hi teltel ding hi. Khumtui – Saizang khuapi tawh a kigalsai linlian ‘Khumvum mual’ a cihna hi. Tuithang pen tu a Tuithang khua mah a cihna mah hi leh kilawm hi.)

Tonh La Veei: Athahna
(a) Tu a ka tup hi hiam aw e, zangleng phualmul ngai ing e.
(b) Zangleng phualmul ngai ing e, sen a mung bang ka tup e. 

01. Ka tonhkhuang aw thangzawm aw e, ka hankhuang aw thang zawm
      e. Tonhkhuang leh hankhuang thuah ing e, mual ii nen ah thang ing/nah e.
02. Khau va sat khau va sat veh aw, ‘Hawltham’ ah khau va sat aw.
       Hawltham khau sah sial khihna di, ka khua ‘Sihzang’ ei zawl aw.
03. Khuamual a len sesing aw e, nauzu a ka lak aw e.
       Nauzu a lak len sesing aw, gamsing bang mang khong tah e.
04. Daiteng phuigua khan siamno aw, thai tawh deih a zeek ing e.
       Thai tawh deih a zeek ing e, gual tungtuan na’n bawl ing e.
05. Simsing lungdeih sawmsial a lak, sumtual ah kui ngilngel e.
       Daiteng phuigua phunglai ningzu, sumtual gawl bang kim sang e.
06. Ih sumtual ah phuigua lum zem aw mauki hunna ka sa e.
       Mauki hunna lah hi lo a, kawi tawh laukha ka hualna hi e.
07. Ih tonh sawl leh ih han sawl aw huihkhi ta’n na sem lo aw.
       Huihkhitan’ na sem lo aw e, a pal lai na heu lo aw.
08. Thawmte sawmsial lim a lian aw, laukha ka hualna aw e.
       Laukha hualna sawmsial limlian, zua pangmai-ah aki hiangsing bang  zau e.
09. Simsing ka lungdeihno leh daiteng phuigua, kop in tu bang suan  ing e. 
      Tulmawh hen aw sing gualgen di’n, zodam thalpan kai hen aw.
10. Ih sumtual ah sawmsial limlian aw, phung in bawm e miza in bawm e. 
      Phung in bawm e miza in bawm e, kuahsuang pallun e vaza in bawm e.
11. Ka thai lungtup thawmte sawmsial, kawmpal kaisak zel ing e.
      Keima lungtup leido sumlu, alva zo sak zel ing e.
12. Sumtual tonh sawl setang gel ing, seino lungtup tung sang e.
      Seino lungtup tung sang e, sumtual buancim kai sang e…
13. Sial aw ka lamh lohpi aw e, sial ii ki mah tum ing e,
      Taang aw ka khawh lohpi aw e, taang ii zu mah tep ing e.
14. Na vum veh aw na vum veh aw, ciin khuamual ah na vum aw.
      Ciin mang teng ngauzu tawina aw, khuamual bemtang bang vume
15. Ka nu cia lah pha lang e, ka pa cia lah pha lang e.
      Kei pawh hi cia phet pha ing  e, simsing sumtual ah sia’ng e.
16. Simsing lungdeih sawmsial a laak, sumtual ah kui zilzial e.
      Daiteng phuigua phunglai ningzu, sumtual gawl bang kim sang e.
17. Daiteng phuigua khansiamno aw, thai tawh deih a zeek ing e.
      Thai tawh deih a zeek ing e, gualtung tuanna’n bawl ing e.
18. Zua tonhsawl leh zua hansawl aw, huihkhi ta’n na sem lo aw.
      Huihkhi ta’n na seem lo aw, a paallai na heu lo aw.
19. Daiteng phuigua a meng masa, gual in a dawn lai lawng e.
      Gual in a dawn lai lawng e, kui zilzial sial aa lang e.
20. Sumtual tonhsawl nahzing nuai ah, sawmsial tanggul bang lum e.
      Sawmsial tanggul bang lum e, gual aw hong zo ta veh aw.
21. Daiteng phuigua kui ngilngel e, sawn liang in tui bang lang e.
       Sawnkhan liang tang bang pha tah e, mim leh sawmtang sung dim e
22. Sawn aw khuamual hongsuak tang e, pahtang sunni liap sang e.
      Pahtang sunni liap hi lo aa, tonh sawl leh han sawl hi e.
23. A tong suan tong leuleu e, hang ii suan hang leuleu e.
      Tong ii suan leh hang ii suan aw, khuakhang siah bang pel mawng e.
24. Simsing gil leh dai teng phuigua, kop in tu bang suan ing e.
      Tul mawh hen aw khuakim gen ding, zodam thalpan kai hen aw.
25. Phung aw na hawm siam sang e, sumtual nuam pahtang nuam e.
      Sumtual nuam pahtang nuam e, phung in tuan gual in tuan e.
26. Sunni nuai ah zua pahtang ah, sawmsial nang lailu lang e.
      Ka tun langlam vaimangnu khen, lumsun zangni liap silsial.
27. Ka sial aw e sial tum kaang aw, aki tangtawi ka lap na.
      A kii tangtawi ka lap sang in, a phaw laltang ka nawhna.
28. Zua na tonmung sawmsial simna, sumtual phei vei dim sang e.
      Sumtual phei vei zata na kholhna, tausang dawh neem zingzin na biakna.
29. Ka mang bang e ka mang bang e, zanciang ka zalmang bang e.
      Zalmang hilo ciinthang tonhsawl, zua aw meel na mu nam aw.
30. Hi nu aw e hi pa aw e, khuasak ah muantui phul e.
      Khuasak muantui kai zawl tah a, pahtang sial mei bang khawh e.
31. Ih sumtual tam diudeu e, sawmsial tangkhau ka khihna.
      Ih pahtang tam diudeu e, hanluang aisa ka sehna.
32. Seino gual in lungtup nun vom, len sesing phung cing sang e.
      Len sesing phungcing sang e, sumtual buanciim kai sak e.
33. Khuasak mualpi sang zawm aw e, khangsuan mualpi sang zawm e.
      Tulka mualpi sang nuai ah e, tonggulhnu ni bang lun e.
34. Tang in ka tup tungsak tang e, pam a hualpi lai lawh’ng e. 
      Lianu’n ka tup tungsak tang e, tonsing leh setaang thuah’ng e.
35. Sawmsial na gawh na nuhthai tawh, na nun kum khua sawt hen aw. 
      Setaang na khawh na von dawng tawh, kumcin gual in gen hen aw.
36. Phung aw sawmsial ih gawhna aw, ih sumtual tam diudeu e.
      Miza sok bang a sanna aw, ih pahtaang tam diudeu e.
37. Sawmsial lam aa gualsing aw e, laimi hen aa thang aw e.
      Gual tung va bang tuanna ding aw,  theih loh a zun gia aw e.
38. Sumtual tonhsawl setaang gelcing, seino lungtup tung sang e.
      Zang dolcial tawh kiang laihen tawh, pahtang sunni liap sang e.
39. Sial a tunna sial a tunna, ka lamh sawmsial a tunna.
      Taang a tunna taang a tunna, ka khawh sawm taang a tunna.
40. Ih sumtual ah simsing gil po e, simsing gil po sawmsial in si e.
      Ih pahtang ah lai hen va bang tuang, lai hen tuang e mi za in bawm e.
41. Kei pawh ka seino lai in e, ka zuapa’n sawm taangza ai e.
      Ka zua’n sawm taangza ai tah e, kolsa sawmsial in sun e.
42. Gendong aw e Gendong aw e, Ciimnuai a Gendong aw e.
      Ciimnuai a Gendong hi tah a, a von tem bang paai tah e.
43. Ka kipat ka kipat aw e, lokho a ka kipat e.
      Thai tawh tukawl ka tawi lai in, hi ci ta ve leng ci’ng e.
44. Saitui ka kiakmun hi tah aa, lai ah dawhlei tam aw e.
      Sakciang ka kiang oih mun ah e, awhkhi anglai ah sia’ng e.

      (Tonhla a zom dawng 45 om lai hi…Hi ciang pulaak phot ni.)

…Beita…

Lai gelhpa Pu Awn Za Pau te nupa akum tawm lai.
Mek in :=>> Pu Awn Za Pau Tangthu


Zomi eLibrary 
www.laibusaal.com ) tawh 
kizopna ding : cinpuzomi@gmail.com .

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomite Ngeina "Tonh Thu". Agelh ~ Awn Za Pau Description: Rating: 5 Reviewed By: Cinpu Zomi
Scroll to Top