728x90 AdSpace

Hot
Menu
Zon-ol na Donate

Latest News

Banghangin Lungsim Picing Thei Mahmah Lo?

Banghangin Lungsim Picing Thei Mahmah Lo?

A Gelh:  Awn Za Pau
   A Kawlgam a Vaigam tawh tehkak in gen naii kei phot zawzen ni. Bang hangin Zogam ah Ciimnuai’ tate ih muhna ih ngaihsutnate ih lawmdangte sang’ in picing zo lo zaw sese ih hiam? cih a hang’ a bulpi ding ka kankan ciangin, minam zui a ih luah suksuk picin lohna zong tawmkhat a kihel phial kha ta zongin, ahong khaktan pipen in anuai a thute hang hi ding in ka um hi.
   Picing lo ih cih ciangin nampi lungsim ulian lungsim kivom zo lo cihna ahihi. Tua bang ih cih ciangin kipawlna khat peuh ah ama deihna khat peuh kizui kei leh a langpan pah vaivai a nuaktai pahpahte zong khat in kihel ding hi. Kipawlna bup minthan nading sangin mi khat kia in minthanh lawh ding cih lungsim toi lungsim kawciik neihna zong ahihi. Sila lungsim ahi.. ei leh ei makai khat in om leh kithusimh nuam peuhmah lo in deidanna a tuamtuam kinei aa, mi namdang khat peuh hi leh thupi ngaihsut zaw kizui nuam zaw sese cihte zong ih picin lohna lianpi khat ahihi. Makai sunsunte’ ngaihsutna leh ih khuasak ziate ah Chin/Zomi minam bup aa phattuam nading cih thadah, Ciimnuai Zomite’ mailam kalsuan zia ding na-ngawn muhna leh sephuai nate kisem kimu thei zo naii mahmah lo in, ei leh ei sungah kinawngkaisak zo khop bektak ding ciangbek mah, kimu thei kisem thei zo pan bek hi, cihna ahihi.

A khatna: Etteh Taak Ding Hero Kuamah Om Naii Lo
   Akhangto khin a khangto laitak a khangto naii lo gam akipan gam khempeuh in amau gam ading ciat, suah takna ngahna ding ahi zongin gam khantohna ding ahi zongin, ama pumpi lungsim khempeuh kipia a gam makai hero pi khat tek ki-nei tek hi. (Gentehna in Kawlgam aa’ dingin General Aung San) 

   Tua mah bangin gam khat sung a om minam neuneu a tuamtuamte in zong, a mau minam ciat ah nopsakna phat tuamna a ngahna dingin, makai vaihawm minthang khat ciattek mah na nei kawikawi uhhi. Tua a makai vaihawmpipa pen hero pi in nei in, ama vaihawm siamna leh kipiak ngamna te etteh pah uh aa, zompaih suaksuak pah uhhi. Ama nungah makai semte in a gam a lei khan toh semsem nadingin lam thak a tuamtuam zongin hong hahkat semsem pah uhhi. Ama sep zawhna kipiak khiatna tungtawnin tangpi tangta in zong zahtaak takpi pah uh aa, vaihawmna khat peuhah thu kimang diamdiam pah uhhi.

   Ei Ciimnuai tate lakah tua bang a, ih minam bup a makai minthang ih hero pi ding tuni ciangdong kuamah a om naii kei hi. A om sunsun dia kithawite zong minam neu khat a’ding, khua leh tui leh beh leh phung sung ciang bek ahihi. Tupna gelnate township level zong a huam zo naii lo kitam mahmah lai hi. Mi nambup veina tawh a nuntakna sihpih ngam a luangkham ngam makai khat zong ki-om naii het lo khong hi.

   A kipan sunsun nih leh thum ih om tei hangin, gualzo paisuak taktak naii lo aa, a gah ih nek naii loh ciangin hero pi dingin min kivawh thei naii taktak lo deuh leuleu hi. Gentehna in: Kei mimal muhna leh kei phawkkhak pak na ciangciang ah Lt Col Son Khaw Pau, Sgt Thual Zen, Pu  J Thang Lian Pau leh  ZNC (Zomi National Congress), tu’n ZCD (Zomi Congress for Democracy) makaipi¬¬¬ Pu Chin Sian Thangte pawl in ama aituam nuntakna phattuamna ding nusia liangin, hangsan tak in gam leh minam aa ding kipiakhia ngam hi ci’n ka mu hi. Pu Chin Sian Thang in a mah bek hi lo in a ta leh a naiihuai teng khempeuh in  thuak lawh pih dikdek lai uhhi. Luang khaam liang aa, a kipum piak ngamte lak ah hong nuntakpih lai Pu Chin Sian Thang leh Pu J Thang Lian Paute bek mah om lai ahih manin, matutna leh  gah hoih gah phate hong gah khiat theih nading in thu nget sak ciat ni.  

    Tu hun ciangin amin in kipawlna atuamtuam a munmun a ciangciangah kitam mahmah nianua hi. Tua kipawlnate in zong, vaii thupi khat om leh kuamah ki-khaam ngam lo in mi khut aa gul man nuam vive lian tawh ih kibang hi. Kipawlna sung aa min leh zate sazukki puak in kipua lianluan bek aa, gam leh minam tawh kisai thupi thu lian sep taktakna ding a om ciangin, kuamah makai ngam mahmah lo zel hi. A makai thei taktak ding zong om lo lai mai ding uhhi. Kipawlna khat leh khat zong ki-nahvawhna om het lo lai mawk ahih manin, makai dingte a’ dingin,  kipanpihna kitawsawnna om lo pah phot hi. Tua ahih manin, kipawlna khat ii makaite in amau omna tatna mun ciat tekah mit phe khepkhep in na op khekha tek lel mawk uhhi. 

   Tua hi a, tu dong mah ih kisapna bulpi pen in makai ih etteh ding, a muantaak kuamah om naii mahmah lo ih hih ziak mah hi pi pen hi. Hih makai etteh taak ding ih pian zawh nai lohna in, tua bang a makaih theihna ding athu in hong zawn naii lo maw? A hong zawnzawn kimlai pi mah ei lampan akipia khia zo kua mahmah a om naii lo ahih hang maw.. cih ei leh ei kikantel phot ding kisam hi.

   Hih bangin etteh tak makai khat a nei hi leng, makaite thu khempeuh zong a tamzaw in ih zuisiam thei pah ding a, kipumkhat theihna ih nei pah ding hi. Tua kipumkhat theihna ih neih ciangin, kiphumkhatna ii hoihna leh gualzawhna a gah ih ciamta ding a, tua agah ih ciap khit ciangin liim sa in ih kipumkhat thei semsem ding hi. (Mai lamah khangno gam leh lei ki-ukna ding vaii - politics a lungtu zaw hiatte in, Political Science leh Law lam khawng nong zuih ding uh kong hanthawn nuam hi.)

Anihna: Tiddim In Township Ciang Bek Ih Ngah Man Hi
   Tedim khua Tedim gam pen Vuandok khutnuai Vuandok uksung (Township level) ciang bek in hong uk man hi pi pen hi. A zenzen in Mangpiza zum tutna khuapi khat hi leh (District level) hong uk uliante thunei uliante zong Vuandok Mangpi vive hong tam pah ding hi. Tua uliante khutnuai mahah ki-naiitak in tavuan nei Myo- oke, Lai-atpi za nei tampitak ki-om pah ding hi. Kumpi ukna sungah department tuamtuamte zuih ding thukhun leh pelh ding thukham a tuamtuamte zong zungthuk hongkha zo pah ding hi. Cih nopna ah hong ukzo pah dipdep ding hi.

   Zo gamah Tedim uksung pan Tonzang uksung, Cikha uksung akituam khen khit na-ngawn in Tedim uksungah mi lusih a tam pen mah ih hi lai veve hi. Tonzang uksung leh Cikha uksung a pian ma in kitam mahmah kan zaw lai hi. Tua pen Vuandok za khat in hong uk bek suak mawk hi. Vuandok khat bek in hong uk ciangin kumpi lam pan zong departmentte ah milian tampi hong kihel zo lo pah phot ahih manin, department tek a kipan a munmun a ciangciangah, hong uk kim zo lo hong ban kim zo lo pahphot ahihi.

   Gentehna-ah: Falam pan a khangsiah Paletwa uksung dongin singkung itna singkung thupitna na thei uhhi. Singkung a kem uliante’n na ukzo pah uh hi. Ei Tedim gamah singkung itna meel theilo in a no ih suan loh banah, a kung abul pan    phuk in a selthuah ding in ih hawi nawn kei hi. Tua bek thamloh in a zung na leng tawh ih bullot lai tazen hi. Eimau te-ekhte-ekh in khawlmun khat peuh aa, a lim ih belh gegu singkungte na-ngawn, khut thak thoihna in nei in ih sat liam hamtang thei lai hi. A hiang na leng ih khiaktan thei lai mawk hi.

   Ih Zogam dangte singkung it zia pen ei aa’ tawh kikhai mahmah hi.  Mindat kum li ka om lai (1973-1976) in ka lam nasemte phalbi kipat ciangin mawtaw lampi sak leh khang pi 5 zai ding ka vaat sak hi.  Mawtaw lampi lai zang  aa taakno po zihziahte na vaat ngam peuhmah lo uhhi. Lam sak  kendang aa, a zung bek awh lai kingkiang apuksa singkung lian pawl khat  ka Lambu pa sawl lohin na phuk  na sattan ngam peuhmah lo uh hi. An sing a tom uh ciangin a baihsa sing keute a bei leh, singhing tungah kah tangtang in a hiang keute  sattanin tom uhhi.

   Hih pen gen taak kei si na cih khak leh hih bang a gamtatna in, ih lungsim gitnat lohna, picin lohna, ngaihsutna kawcikna, angsung bek ngaihsun aa duhhop huaihamna, gam leh lei it theihlohna, awlmawhna (awareness) neihlohnate akilanghsak cilna zong na hi pah hi. Ih luah tohtoh ahoih lo ih neu lungsim puak abupi himhim puah phat ding akisam pha mahmah gige ahihi.

   Haka kum 10 (1977-1986) ka om sungin Chin State forest department ah a sem hong nusiasa U Hau Za Nang Kim Lai te’n makai in kum khat in singno kung 10,000 bang kisuan den hi. Tedim leh Tonzang lamah suan maw suan lo maw cih ka thei kei hi. A suan kei leh zong eimau tek in taang tha tawh taak pona ah taakno, hiang pona ah hiangno, pakngiam pona ah pakngiam, hai pona ah haikung haino ahih kei leh ahiang kisuan theite ahiang suan ding cih ahihi. An sing ding bang peuhmah pen ih suan kik tangtang ding kisam mahmah hi. Ih gam aa a piang lo Kawl pau in mezali kungte pawl bang Zogam ah suan leng khang baih mahmah aa, sing khul ding hi ta leh, a teh dawn ngeek, a paak ngum leh a gah na dongin kine thei lai  hi.

   Tu hun leuleu ciangin a nei zo a lei zote inh singkung phukna a nemtuam dingin, gas anhuanna vive ih zat kim zawk ding leh sing nemtuamna thukh bungte zong ih zat tek ding kisam hi. Khuapi khua neu aa om ih mite ih tel siam sak ding leh singkung itna lungsim a zung ih khaksak zawh nadingin ih mipite ih theihsak ding thupi pha mahmah hi. 

   Tua hi a, Vuandok za ciang ki-ukna township level bek a ih om den manin, ih khua muhnate zong kawcik in tangzai thei mahmah lo hi. Ih bukmun ih khan theihna dingin lungsim picinna ih neih ding kisam hi. Ih khuapi mahmah zong a level hong sang leh ih lungsim picinna zong a sangto sak pah ding ahihi. Khuata vaii a beh leh phung bek tawh  kalsuan a aituam vaii bek thupitsaknate hong kiam hong dai tuam pah ding ahihi.

Athumna: Biakna leh Leitung Thu Ah Pawl Tam Lua
   Biakna lamah ahi zongin Leitung kipawlna khat peuhpeuh ah ahi zongin, a moi a khangham makai nuam kitam kik pha mahmah bilbel ta leuleu hi. Mi gam mi lei pan a hong pian khiatnate bul gen kik nawn kei leng, Zo gamah RC leh ABM, SDA, Methodist cih khawng hong tung masate lakah, adangte tua zahpi in kikhenthang nawn lo hi. ABM pan aka khia a ke tampi tak hong piang khia leuleu hi. A ABM sung mahmah zongah ZBC, ZBCM, TBC cih bangin Tedim, Tonzang, Cikha uk sungtengah kitok nawi ngeiingaii zelzul ta leuleu hi. Banghang hiam cih leh picing ngaihsutna kinei zo naii mahmah lo ahih manin, nu’ dinmun pa’ dinmun ah mapang in aki-leptuah ding sangsik in, a bulcin vive panin kikhen thangna hong piang thuahthuah  ahihi.

   Hih thu tawh kisai in a phat tuamna ding om peuhmah lo a hih manin, kua mawh hi.. kua tang hi.. cih kua mah ngawh ding a kisam tuan nawn kei a, eimau tek mah ki-ngawh zaw in mailam ah kizuun kipuah phatna teng aa ih neih theih ding thupi zaw ding hi. Pasian thu um Pasian nasem kici Pasian mizatte sung teng vive pan mahah, khat leh khat kilang bawlna leh ki-theihkhialhna nasia tak aa, a om ciangin, lungsim siangtho tak aa Pasian a um a bia te’ lungsim sungah Pasian a upna leh a pomna a zawngkhal sak a thakiamsak zaw semsem ih suah khak ding lunghimawh huai mahmah hi.

    Hih a tung aa thute huhau in, a omsa pawl tuamtuamte na-ngawn hong khuituah, hong kilomsak thei ding makai kician ih neihloh kawmkal ah, ABM sung bekbek ah Convention thum bang aa hong kikhen sawnsawn ciangin, lungsim siangtho tak a, Pasian thuzui tampi takte’ lungsim ngaihsutnate leh, khat leh khat kithutuak kipumkhat aa ih om kimlai laitak mah in, hong susia hong supoi hong khenthang thuah  dingin hawmthawh huai lo takin, hong piang thuah ta lailai hi.

   Biakna vaii tawh kikhenna tuamtuam a om bek tham lohin, beh leh phung vaii leh akituam khen thuahthuah taak lo minam vaii ih ultung sak mahmah sansan ta dihdih hi. Pawl khatte bang inh, a Kawlgam a Vai gam leh Mikang gamah pawlcing hong kisak pian uhteh, bangkua phamawh panmun len ding khawng hong phuang kik san phapha uhhi. Khanglui lai ih Zo ngeina hi ci in, ngeina kemcing cih lamin ih la aa, beh leh phung nei lo aa, bangkua panmun nei lote a’ding bangin, hong maimial huai phial mawk hi. Ahih hangin keima aituam muhna tawh gen leng, a hoih ding tawh akibat tei hangin, kinen suahsuah theihna ding vive hong uang sak hong thapia sak tawh kibang  hi.

    Tua bang aa beh leh phung vaii ih ultungsak luat ciangin, pum khat sa khat ih suah theihna ding aa hong dongkholh sak mahmah thu khat ahihi. A taktak amau innkuan ki-apna a Pawlpi inh nopna dahna ah vaii khempeuh tavuan la peuh leh kicing khin mahmah kasa  hi. Beh leh phung, sungh leh pu bek bulphuh aa, ih pai liang sang’in, ih ki-apna ih pawlpi bulphuh tek zaw leng, mai lamah khat leh khat a kuamah peuh, kipawlkhop nopna lungsim tha hong guan hong khangto sak semsem zaw nak hamtang ding ahihi. Mi a tam zaw phat tuam nading bulphuh lo aa beh vaii minam vaii bulphuhna a ven masiah, ih ngaihsutnate picing thei lo meek ding hi.

   Ih sanggam Falam pan a khang siah a diakdiakin Haka, Thantlang gam uksungah biakna tuamtuamte ka-khia neunau lo in ABM mahmah zong a tam zaw tham mah bit lai dingin ka ummawh hi. Biakna lam pangpan en leng bel ahih leh ei leh ei kibuaipih pahpah zaw hi kei leng, mundang gammial nasepna ah sem tek ni cileng, a pawlpi in zong kitam het naii lo hi.., cih theih veve ahi tei ta zongin, zat siam naii lo ih hih manin, ih mimal a kinensuah suah sak mah tawh ih kibang hi.  

   Tua kawm kal ah Leitung thu ah zong  kipawlna a tuamtuam tampi tak om khin zo ta aa, “Universal” min huam aa kipawlna a om ding bekmah in sam lai hi. Tua kipawlna te in, khat leh khat kizop kipawlna om lo lai mawk uh hi. Kipawlna khat peuhah panmun len ding a kiseh ciangin, a omsa kipawlna atuamtuamte bulphuh ding leh ahuam kim ding sawm masa lo - kikum masa lo in, Galkap kumpi arnar (Authority/Power) neite bangmah in pum seh ziauziau in kipawlna ih phut thuahthuah hi. ( LZI leh ZIUSA bel  a lunglut mi kimkhatte  teel hi kik bilbel hi.)

    Hih kipawlnate in  Standing Committee dan khat ahih tei sam hangin, khasum sang aa hunbit nasem ahih loh mah bang in, tu ciangciang akisempi penpen inh, ahun tun ciang aa, a kiseh tawm vat Ad Hoc Committee ih cihte sep bang linlian in, ahun a tun ciangin Zomi Nam Ni, Khuado Ni cih te leh, mi mal aa pahtawina piakte ciang bekmah kisem zo pan phot tadih hi. Tua kipawlnate in a tuam vilvel tek  ahih sawnsawn uh ciangin, Ciimnuai Zomite a dawl a dawl in hong khenthang thuah leuleu hi.  Ciimnuai Zomi bup tawh kisai vaihawmna ding kikup ding khat om zenzen hi leh, a innteek ding a makai ding kiseh tawm biangbuang phingphing kul sansan ding bang khat hi aa, tua kipawlna liapluap teng mah in hong dongkholh sak mahmah kik ding hi ta lawmhlawmh hi.  

   A taktak in ih sep taktak ding a bulpi in tua Zomi Nam Ni, Khuado Nite bawl ding bek lawmhlawmh hi lo zaw aa, ih Zogam leitang leh ih Zomite bang ci bangin khangto sak ding, bang ci bangin ih gam ih lei leh ih mite tungah nam tuamtuam tawh hong susia hong bawlsia nuamte tung pan bangci hotkhiat ding, bang ci dal ding cih a kipan, ih kikup diamdiam ding hi zaw hi. Gentehna in cikmah hun aa Zogam aa bengh kiciing ngei naii lo kim lai, tu maa kum tam het lo a kipan Tonzang gam aa bengh kiciing cih pen, ei Zomite aa’ dingin a hoih het lo thubuai lian mahmah (big issue) khat ahihi. (Sawtpi pek a kiciingsa ahi phial zongin, mipi theih leh mipi gen sawt nai lo hi)

   Ih gam ih lei khantoh nading zong kiu a tuamtuam pan muhna a tuamtuam teng tawh gawm khawm in, a nam a nam in sep ding bawl dingte gelkholhsa khunsa in koih khin dildel masak phot himhim ding ahihi. Sum leh paai ki-neih ciangin ih sep khiat pah theih dingin ahi zongin,  tavuan nei kumpi lam pan uliante in a kisap ciangin ahi zongin, akisap hunhun a mau mah tawh kikop a ih theihsak ding (feedback) dingin gel kholh bawl kholh sa in khibah tang bang aa kikhiil diudeu sa  aa, a khilkhil a ih neih kholh gige ding akisam pha mahmah ahihi. Hih thukhunsa  vaihawmsa (planning/project) ih neih theihna dingin leitung pilna nei mipil misiamte mah amau mun sansan ah zatsiam theih ding ahihi.

   A diakdiak in Zogam ah anneek tuidawn khawhsa ih kham theihna ding, khua khempeuhah mawtaw lampi tun theihna ding, cidam ludamna ding leh laipil laisiam tampi tak ih piansak zawhna ding, akideih leh a kisam bulpi mah hi pi pen ding hi. Ih gam leisung sum piang bangmah om lo a hih manin a neu a lian in pilna hanciam aa, kumpi nasem company na sem aa ih kihel zawh kim theih nangin laipil laisiam tampi tak ih piansak kul ding hi. Lai theih laisiamna pan nasep ngahna bek hi lo in, ih lungsim ngaihsutnate leh ih khuamuh nate a picing a zai semsem nadingin, ih khuak kong khakte leh ih mit kongvangte zai tak aa ih hon theih ding zong thupi toto lai ding hi.
Thu Khupna:
   Tua hi a, atung a kipawlna tampite leh biakna a tuamtuamte a ki-khuibit kik dingin, a kuamah tek in lunggulhna kinei ciat tek hi. Kipumkhat theih nang ih ommuanin kilunggulh mahmah ki-iplah mahmah tek hi. A taksuah sak zo naii lo bek ih hihi. Tua a taksuahna ding a vaihawm dingin, a thu in nang leh kei hong zawn mahmah ta hi. (Tu laitak in ZRDP - Zogam Rural Development Program, President H Vum Nang in amah leh amah hanciam tawmna tawh ih mite hanthawn in khuasim ah mawtaw tun theih nangin hong makaih hong vaihawm pen, a taksuah sep khiatna taktak khat ahihi.)

   A tung aa ih gensa bangmah aa khat leh khat ih kithuzak loh ih kipawl loh huhau in, ih gam ih lei leh ih minam vaii ah lungkim lohna khat peuh a om ciangin, kipawlna atuamtuam tampi tak om napi, a huaii masa ding a thu vaan ding vaiipuak akisuan ngam om lo in  aki-pengg theithei dingin pauhlap tuamtuam kizong zaw behlap hi. Kipawlna atuamtuamte in zong, atung lam ahi aa aphei lam  ahi zongin, khat leh khat kizopna om kilkel lo lai mawk hi. A hunhun aa kumpi ki-uk zia leh thu pai dan a mong mu thei ding a san a zawi tawn thei ding zong ki-tawm mahmah lai hi. Tua kawmkal ah kikup masak kidot masak diamdiam om masa peuhmah lo in, ih omna tek ah eimau tumtak tek in uino lei ko bangin leh, bul nei lo vansam bangin makaihna leh lam hilhna thu bulphuh om lopi in ih bangkua tek ah ih awng tuattuat leltak aa, kua mah’n ih aw zong hong za ngei beek lo uhhi. A za zongin hong awlmawh beek lo lai ding uhhi. 

   Tua bek tham loh in ih gitnat ih satnat lohna teng midangte hong theihpih semsem nadingin, internet sung khawngah thu khat peuh tawh kisai muhna a tuamtuam ih kigen ciangin a thu bulphuh lo in a mi vive kibulphuh zaw in khat leh khat kikawk kitawng kisel kiko in ih thapaii niloh hi.  Masuan vaii thupi leh ih tuppi pen bang hi cihte tel tumtum meel lo in, ei tumtak tekin ih ciakciak pong mawk aa, lamkal ah hun ih beisaksak lel mawk hi. Imh huai imh huai lo cih khentel thei meel lo in a kul lo tata ah ih sungthute ih pholaak thei pha mahmah bilbel  hi.
   Mi pil misiam mi ngaihsun thei mi picingte in dai takin theihsak huai teng, a theih masak sak uh na kiko pah lianlian uhhi. Tua a thu a kohna tawh kizui in kipawlna sung aa om a lian pen pan a neu pen dongin, a mau san ciatah na thei kim pah lianlian uhhi. Thu lian thu neu tawh kizui in a kul bangbangin kuamah theih loh kal in, na kisim kup pah diamdiam uh hi. Tuak lai peuh in pum dian pum ot pah ang-ang lo uh a, a hun leh a mun a mual zui in na gamtang uhhi. A thu a la a pian zia kan dikdek phot uhhi. Tua zawh ciangin lampi hoih lampi maan a zawi na zongin, a theihsak nopte zak dingin lawng khat in na kiko uh aa, tavuan neite’n na za pah na thei pah na sang thei pah lianlian uh in muibun takpi pah uhhi.
  Ei Ciimnuai Zomite lakah zong politics thei/political minded makai picing khat om thei leng tua bang aa, gam leh lei khantoh nading thu hoih thupha ngaihsutna hong pia thei ding ei sungah zong na om kiukiu sam ding hi. Ih zat theih ih zat siam ding bek kisam hi. Tua ahih manin gam leh minam aa ding aa, a deihsak taktak, politics a uuk mahmah leh a thei a siam, a picing makaipi hoih mahmah akisam ih hihi. Tua mah bangin makaite’ a lampii/ngaihsutna pia ding ahuh ding leh a nung zui siam ding mi akisam mahmah semsem sann ih hihi. 
   Tua hi aa Ciimnuai Zomite in a picing/nampi lungsim ngaihsutna leh gamtat lu hekna ih neih theih kim ciat nading leh, unau laigui zom bang aa, ih kipumkhat theih nading ih lunggulhpi pen ahihi. Ih lunggulh mah bang aa hong pantah hong makaih thei ding, makai Hero pi dingin khangthak Ciimnuai Zomite aw.. ih gam ih lei in nang leh kei hong konlawh mahmah ta hi cih phawk kim ciat ni. 
+++++++

Makai Hoih Makai Picing
   Makai hoih makai picing ih cih ciangin, Sente (Chinese) ngaihsutna ah tembaw (ship) bang hi aa, nungzuite in tui bang hi ci uhhi. Makaite a mainawt sak pen mipi hi aa, makaite a tumcipsak, a puksak zong mipi mah hi a ci nuam uh ahihi. Akilawm akituak aa thu khentat theihna, nasep ngamna pen “pilna” kici aa, makai khat in tua a neih hamtang ding kisam hi, kici hi. Sia leh pha theih bek tawh kicing lo aa, pilna ciimna tawh thu khensat theihna, nasep ngamna leh nasep kisam sakna a neih thuah ding hi kici hi.
   Thu maanna, cihtakna, kuhkalna, hanciamna, midang khualna, mite itna, mite deihsakna leh mite thalawpsakna, mite zolsiamna, mite thuhilh/taihilh siamna, pawlbawl siamna cihte bek tawh makai gina suak khin lo hi kici hi. Makai a kicite pen a kisin tawm a om hangin, a pianpih lungsim leh a mi pianzia tawh makai gina hih nading, a nei khin uh ahihi.
   Makai gina khat in thanghuai takin gamta lo hi. Ama pumpi leh ama pumpi uknate kideek zo in kikem zo aa, ama nungzuite tungah zong tua bang gamtatna hoih lak khia zo uhhi. A nungzuite a’dingin limpha ettehpha suak uhhi. Midangte itna khualna leh midangte huaisiamna nei in, ama neek tang ding na-ngawn midang a pia ngam leh a deihsak masa ngam mite ahihi. Ama gilpi a khual masa tawntung makai cih bang om ngei lo hi. Midangte zahtak siamin, midangte thupi bawl siam aa, midangte in a mah zong tua bangin mu pah lian uhhi. Mi khempeuh a kikimin ngaihsun thei aa, midang sang’in kitungnungsak zaw, kinuainungsak zaw cih bangin om lo hi. Liangko kikimin kalsuan thei uhhi.
   Dahna kahna munah a khasiatna kideek zo aa, a khitui khamm zo hi. Lungdamna leh nop bawlna munah zong, a lungdam luatna lak tuan lo in, a lungdamna val luasak cih bang kideek zo aa, a hoih leh a kilawm in kidawm zo hi. Kahneh lua nuih hatlua cih bangin om lo hi.
   Ama khantohna ding leh a ma gamtat hoih a behlapna dingin, mite gamtat luhekte en in ki-puahto ngitnget aa, ama khanna hangin midangte tungah khanna a pian nadingin, a kilawm a kituak in zeelkhia kik thei hi. Midangte tawh kikholh kiholim ding thupi bawlin, mite ngaihsutna atuamtuam zakpih thei in, a hih hangin zuihpih  khin tuan lo aa, a sia a pha teng khia in khitt (khaihkhia) thei hi. A theihloh khat peuh a om leh midang dong ngam in, sum tawh lei ding ahih leh zong a man pia ngam hi. Thalawh a kul leh zong hun leh tha bei in zon ngap hi.

   Deidan nei lo in midang huaikim siam aa, a sia a pha zong nolh khin la khin pah lo in, hoih a sak leh sia a sakte zong lawhciang sung aa baalke om bangin khaih (teel) siam hi. Mi nam khempeuh tawh kikholh siamin, ngeina tuamtuam en thei aa, tuate lakah a hoih a phate ama a’ dingin huai siam hi.

   Na khempeuh a kipolh (kiciau) zau hi cih tel aa, a sia a pha a kihelzau ngeina hi cih zong tel hi. Ahi thei a om mah bangin a hi thei lo zong om hi cih thei aa, ahi thei lopi ding ah hun mawk beisak lo in, ahi thei ding thute ah manpha takin mainawt sawm hi. Lauhuai kihtak huai a om leh kidop siamin, “hunpha” zong teitei aa, haksatna mun ah zong meet bawl theih om hi cih tel hi. Haksatna nawk zo khin peuh leng, haksatna in hong nawkkik ding haksa semm hi cih tel hi. (Haksatna in hong nawk kik hangin tua haksatna in hong zawh ding haksa ding hi, thuak khin ngei ahih manin kidal siam ta hi cihna hi.)

   Ngeina zuihdan, zatdan, cih neihsa nei lo in a kisam bangin a kisapna munah, a kisam bangbangin zat siam hi. A ngaihsut tawmna tawh a mun leh a hun ah, a kituak a kilawm bangin zat siam aa, a kigingsa in om cih bang hi tuan se lo in, a kul leh a kisam bangin gamtang thei hi. Makai khat cih pen  tembawpi khat tuipi tung aa khualzin tawh kibang hi aa, tuipi pen a kilok thei hi cih phawk aa, a kilok ciangin tembaw a kibut loh nadingin tembaw hawlte in ahawl akep bangmahin, lungkham patauh nading a om ciangin amah leh amah kikem thei hi. Tuipi kilok ding leh kilok lo ding ih muh kholh loh ciangin daidide in  a om khikhe bangmah in, mipite lungsim ding telsa in nei kei ta leh, a kisap hun aa gamtang thei dingin, ama suahpih makaih siamna na nei khin gige hi. A makaih siamna a kiselsim hi lo aa, akimu khol thei zong hi lo hi. A zat khiat taktak ciangin kimu thei pan aa, a mahmah in kam tawh gen khol ding hi leh, genkholh theih nei hi tuan lo hi. A kiselcip hi lo napi akimu thei lo bek hi aa, a kimu lo dingin a mah’n a selcip a khuhcip zong hi tuan lo hi.

   Lungmuang tak lungdai tak lungkim takin om hithiat lel aa, mite nuntakna ah kicing lah sesu lo napi, mite lungsim leh nuntakna ah a manphatna a kigen thei lo lungdamna leh lungnopna guan aa, thanuamna leh lung lawpna piangsak in, mainawt ding leh hanciam ding tha pia den hi. Ama kivakhna (talent) hi aa, ama neihsa siamna ahihi. A zon tawm zong ahih loh mah bangin, a tha lawh tawm zong ahi kei hi. A pianpih a neihsa ahi limlim dingin a piangsakpa Pasian in a guat ahihi. Makai gina dingin a kiseh, a piangte leh makai gina dingin a kisinsinte, mipite a’dingin ki-ngakhna leh ki-muanna hi aa, ih kalsuan hong tawlsak lo hong bahsak lote ahihi.

NB: Bangbang hi ta leh nungzui siam leh makai kician a kisapna sungah, makai siam makai picing mah akisam masa penpen ahihi. Hih “Makai Hoih Makai Picing” cih  thuluii (Article) pen hih keima  thuluii/thukhil tawh kituaksa lua ka hih manin, Singapore aa om Dr Hau Za Cin – Phuitong Liim in internet sung aa hong khahkhiat, kong teikhiat sawn ahihi. (Laigelhpa)
@@@@@@@

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Banghangin Lungsim Picing Thei Mahmah Lo? Description: Rating: 5 Reviewed By: Cinpu Zomi
Scroll to Top