728x90 AdSpace

Hot
Menu
Zon-ol na Donate

Latest News

Khantoh Nadingin a Khangto Lungsim.

Khantoh Nadingin a Khangto Lungsim
Gelh - Pau Sian Lian

A kicing khantohna neih nadingin nawk loh a phamawh, seploh phamawh lampi honkhat le vai honkhat om hi. Tuate in mipite’ sum le pai (economic) lamah  khantohna, pilna(education) lamah khantohna, cidamtakin(health) nuntakna le gamvai(politics) lamah suakta takin lungsimpholak theihna nei-in, kim le pam te zong hih lampite ah tawsawn zawhna ahi hi.

Khantohna’  ngaimna bulpi-in mipite’ teeltheihna zaisak semsemna (enlarge people’s choices) ahi hi. Tua ahihman in zawnna cih in bangmah teel khuan omlo, teel theih ding a dang omlohna zong kici thei pah hi. Meh duh bangbang teel theihna, puan deih bangbang teelin silhtheihna  cihte zong khantohna honglak gamtatnate hipah hi. Nisim in gualkhadi lobuang nek ding adang, teel ding adang neih lohna pen a kilang mahmah zawnna hipah hi.

Khantohna tawh kisai-in muhzia tampitak om hi. A cithei sumbawlna tawh khantohna (development as economic growth), tangpi  tangta thumanna le a kikim hawmsiamna tawh khantohna (development as distributive or social justice) le hunlapna tawh khantohna (development as modernization) cihte zong khantohna muhzia nam tuamtuamte ah kihel hi. Hih thului ah hunlapna tawh khantohna thu tawm khat i sung ding hi.    

Hunlapna tawh Khantohna (Development as Modernization)
Khantohna cihpen hunlapna tawh ki zawitawn mahmah hi. Sumbawlte’n tangzai semsemin bawl aa, sum zong sum lei-na ah daupai semsemin, pun semsem nangin hih hunlapna (modernization) in hauhna (wealth) le manneihna (value) manawh gamtatnate (behavior) piangkhia sak hi.  Mipite in hauhna le cihtheih nopsakna a ngah nadingun  hunlapna in gamtat hoihte le thu manphate ngaihsut theih nadingin tawsawn den hi.

Hauhna manawh gamtatna  sungah hang takin phutkhiat ngamna (risk-taking), nathak geltawm bawltawmna (entrepreneurship), lungsim kihonna (open- mindedness), tuahna (experience) thakthakte maingat ngamna, vai tuamtuam thu tuamtuamte tawh kisawh theihna (being cosmopolitan), matutna bekmah maingatna (achievement oriented) cihte kihel hi.

Mahatma Ghandi in “Leitungah kikhelna na muhnop leh nang mahmah kikhel masa hamtang photin” cihi. Tua ahih manin, Zomite minamdangte tawh liangko kikim in, leitung thu le la piangte tawh hunlap in khantoh khop theih nadingin, Zomi khatciat hunlui mi hihna pan huhthak(hunlap) mi hihna, a khangto lungsim neihna, hunlap ngaihsutnate i neih masak ding hong kul ding hi.
  
Khanglui mi le khangthak mi kibatlohna
Hunlui Mi (Traditional Man)
Hunlap Mi (Modern Man)
-          Idea thak pongpong sang theilo
-          Ngeina luite ultung sak
-          Naihuaitengbek lunglut in buaipih
-          Muhna kibanglote thalnial
-          Information thakte kin meel lo
-          A piangsa thute sutsut in nitum
-          Tomkal vaibek thupi sa
-          A innkuan pih lobuang kuamah muanglo
-          Technology thak pongpong langpan
-          Biakna lo buang thudang bangmah thusa lo
-          To le sila kizopdan mah nuamsa
-          Toi ngaihsut
-          Dawi le kau cihte um den
-          A thakthak theinuam, sinnuam, tuaknuam
-          Kikhelna ultung sak
-          Khuapua, gampua lam ate thei nuam
-          Muhna kibang lote thupi san
-          Information thakte lawptakin ngai den
-          Hun lapden, tu laitak thupiangte kinbawl
-          Mailam ading a mannei tampi geel den
-          Midangte vaipuak zo ding-in umin muan bawl
-          Technology thakte zatsiam nang hanciam
-          Pilna sinna(education) le leitung nate’ thu(science)te thupi sak
-          Midangte’ vang le manneihnate thupisak
-          Zai ngaihsut
-          Na khempeuh a hoih lamin muden

Mi khat peuhpeuh in hunlap mi a suah nadingin a nuai a nate zong thupi mahmah in phamawh mahmah hi.
(a) Zinsuk zintohna (transportation) lam ah khantohna,
(b) A tangzai semsem, a kicing semsem kithuzakna (communication) le thu  kihopsawnna (media),
(c) Khuapi  suahna (urbanization) le khuapi suahna zia (urbanization system).
(d) Mun le khua tuamtuam ah tun ziauhziauh, hawh ziauhziauh theihna (geographic mobility)te ahi hi.

Mahatma Ghandi in “Zingciang a si ding danin nungta inla, a nungta tawntung ding danin thusin denin” ci hi. A khangto lungsim cih in na khempeuh sepna bangbangah zingciang si ding danin kituatin mualsuang hoihpen neih ding tumin sawm a,  nasep hanciam cihtak kuhkal mahmah det ding ahi hi. Tua bek thamlo-in, leitung thupiang la piangte ngai sim gige in, kikhelna a om the pilvang takin gamtat theih ding zong kisam hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Khantoh Nadingin a Khangto Lungsim. Description: Rating: 5 Reviewed By: Cinpu Zomi
Scroll to Top