728x90 AdSpace

Hot
Menu
Zon-ol na Donate

Latest News

Laisim a Thupitna. Gelh - Lian Than Tuang

Laisim a thupitna
Gelh - Lian Than Tuang

Laisimsim mite bekin laisim mi leh laisimlo mi khen thei uh aa, laisim ngei mello te in, laisim mi leh laisimlo mi khen theilo uhhi. Laisimsim mi khat in, mi khat peuh tawh a kiho ciang, hih in lai tam sim in teh, hih in lai sim ngei tuakkei cihte khentel thei pah aa, laisim mello mi khat in a hih leh kuakua tawh a kiho zongin amah ding dan vive sa thei hi. Laisim mi khat in, laisim mi dang khat ii thupitna mu thei in, a theihna te zahtak sak theizaw deuh aa, laisim mello khat in a hihleh a khat ii thugen, laigelh khat zongh a thupit lam phawk khalo thei hi.
Laisimsim te sangin laigelhgelh te ii thu ngaihsutna pen geltelzaw ci in, research bawl tampitak in gen uhhi. Ahizongin, laigelhgelh zawh nadingin, lai tampi mah sim masak kul zel a hihi. Laisimna pen, lungsim khuak ngaihsutna khuadakna, khualzin khiatna nam khat hi in, khuamuhna kipatna a hihi. Khuamuhna zaizawzaw in thungaihsut kaak theih ding hauzaw uh aa, thu khinkhian siamzaw pah uhhi.

Laisim na ii thupitna in, i khuak ngaihsutna te mawk om saklo aa nasem sak den a hihman in, hih pen, pumpi aa ding gym kimawl aa exercise hih dan mah a hihi. Lungsim kizepna, khuak thasanna a hihi. Laisim na thadah leh na khuak a zawmsak na hi aa thulian, vai thupite ah thazaw in thu leh la a geel theilo, a geel zolo pawl na hi pah ding hi. Laisim cihna ah thu leh la tuamtuam sim theihding namkim in om hi. Naupangno te cartoon bu khawng a hizong ciamnuih a hizong sim sak ding phamawhlo hi. Khangno te zawlthu, novel tuamtuam sim ding zongh a sia hilo hi. I lunglut leh i theihnop te bek kisim a hihman in, i uk peuhpeuh simna pan in, laisim nopna lungsim ong kipan khia a hihi. Tua pan in, a hunzui, kum leh picinna, kiim leh paam kithuahpih kikholhpih kihopih mun tawh kisai in, laisim nopte ong kikhel toto lel ding a hihi.

Ahizongin, kumte tam semsem ta, i gennop, i kupnop pen level sangpipi hi aa, i laisim te ciamnuih peuh, rumour kici thulengzau peuh, a manpha lo lai ki gelh tuamtuam tawh buai aa i hun i beisak zel aa leh, kawngnuai siahzaw uhamte mah kibang zel ding a hihi. Gen thei pau thei napi, semkhia zolo. Laibu tuamtuam a hi aa news tuamtuam a hizong, bangdan laibu, bangdan news te sim na hiam, sim mun na hiam, hoihsa na hiam cih tungtawn in, na uuk banghiam, na ngaihsutna bangtan hiam, na muhna leh na kinthu in bangdante hiam cih ong kilangkhia sak ding a hihi.

Leitung ah a kikhawng penpen laibu in, Christian te' Laisiangtho bu a hihi. Rome empire hun bek panin, tuni dong phial mah Biakna kinenniam nuam, biakna taih a thuak penpen zong Christian biakna mah a hihi. Ahizongin, biakna manglo, kiamlo, beilo hi. Ahangin, Laisiangtho kiciantak in nei, a hunhun in, version tuamtuam aa huntawh kituak in teltheih ding aa kigelh beh, leitung aa namneu mahmah te ii pau na ngawn dongin, kilet khia a hihi. Hih in lai ii power nam khat mah a hihi. Lai ii power hilo, Khasiangtho humuap a hihman bel himah aa Khasiangtho Pasian in lai tungtawn mah panin na ong sem hi. Pasian nasem, Kamsang, thuummi khat in Laisiangtho a simkei leh tua mi in a hawmpi mah hiveve hi. Tua mah bangin, politics uuk khat in zongh politics tawh kisai, sim beek, ngaih beek a neih kei leh huih bek mah tawh a upmawh pau kul hi.

8888 makai Ko Min Ko Naing in, thong sung ah a kiat laitak, ong kisatlo ong kivualo aa kiim leh paam ah laisim theih ding khatzong a om sakloh uh pen, kisat kivuat sangin thuak hakzaw hi ci hi. Laibu ci aa i sim tangtangloh hang, signboard khat, limkiang aa lai kisuang khat peuh i lungsim in a sim khak zel man aa, laisimlo in kiomom thei tawh kibangbek hi in, sim theih ding a om vetlohna mun ah, laisimlo in mihingte khuak in om ding a haksat mahmah lam ka phawk kha hi ci hi. Bangzahtak in laisim nuam hiam cih leh, thong a lut khat peuh ii pumtung ah tattoo ki gelh a om leh tua lai pen en phapha in sim kikkik ci hi. En gelh tawm aa i sim pen, i sim ma in i gelh a hihman in, kithei khin aa i sim dan nuamlo hi ci hi. Van khat a kipuak leh tung aa laidal themnen baang pen dawmtak in phel aa kisim himai hi ci hi.

Leitung ah pau pen a kicing aa nei minam kiomlo hi. Leitungbup ii zattang mikangpau in zongh namdang pau tampitak kawm uhhhi. Tuasangin a thupizawkna khat vuah, a laigelh siam uh Shakespeare in, laibu tampitak gelh aa, tua laibu te sung ah a phuahtawm kammal tampitak guang hi. Tua a laibu simte in tua a om ngeilo kammal a phuah tawm te zangtoto uh tuhun ciangin, pau leh ham a kicing, zatdan a nuam mikangpau ong suak hi.

Research bawl tampite ii genna vuah, sumhau a tamzaw in, business news, books leh political news sim uh ci hi. Mipil a picingte ciang, thu/idea cih dan lamte sim uh aa, middle class leh lower class a tamzaw in sports tuamtuam, entertainment tuamtuam te lim kin phadiak uh ci hi. Gam khangto tampite ah meileng bus a tuang kawm na ngawn un, laisim or la ngai in a om tam phadiak hi. Gam khangtolo te ah kiho, khatkia a hihleh mi en, khuadak cih tam diak a hihi. A khangto gamte ah, naupangte sim nophuai laibu te pen khot baih phadiak in, a khangtolo gamte ah naupangte muhnophuai video khui te khot baih phadiak kici hi.

Laisim ding ii thupitna paunak tampitak om hi. Gtn. leader must be reader, the book you don't read won't help. Laisim a tam mipi, minam pen theihna ngaihsutna te kibangzaw deuh kihual baihzaw deuh in kithutuak baih, kipumkhat baih a hihi. Bekthamlo in, a beisa kum tampi lai aa thu (history) nasim leh, a beisa hun pek pan in, tuhun dong ah a nungta mi khat tawh a kibang na hihi. Mi/khuak tmapi ii gelh Laibu tuamtuam tampi na sim leh khuak tampi (ngaihsut theihna tuamtuam) a nei na hi pah hi.

Lai gelh pa Tg. Lian Than Tuang

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Laisim a Thupitna. Gelh - Lian Than Tuang Description: Rating: 5 Reviewed By: Cinpu Zomi
Scroll to Top