728x90 AdSpace

Hot
Menu
Zon-ol na Donate

Latest News

MINAM VAI KHANLAWHNA PAN ZOGAM THAK PHUHNA DING HANCIAMNA AH.

Sia Khampeek te nupa (Tongsan Pu leh Pi)
Thupatna:   
Leitung ah minam tuamtuam a omna sungah Zomite zong minam kician khatin Pasian in hong bawlna thu nialtheih ding hi lo hi. Tua ahih manin Zomi a i pianna pen angtang le lungkim mahmah ding kisam hi. Minam khat peuhpeuh in a omnang, teenna ding le luahna ding mun le gam ding zong Pasian in geelsak a, Zomite' ading in Zogam (Zoland) hong piak manin Topa tungah i lungdam hi. Tua manin Zomi a i pianna thu le Zogam ah i teenna thute telcian hi leng minam itlo kua mah omlo ding hi hang. Minam le gam itna pen minam a bawl Pasian itna taktak hipah a, minam itte khawng piangthaklo or Khami lo bangin muhkhakloh ding thupi hi.

A taktak in minam itna/ veiina cih pen Pasian in i nu gil sung pan i suahpih khop a hong piak ahi hi. Pasian nasemte le gam makaite in minam a it theih kei le gualzawhna ngah ngeilo uh hi. Minam a itte mah Pasian in minam le Khrist kumpi gamah makai in pangsak pah hi. Akimutheilo Khamangthang (Soul wining)  veina/ itna neih theihna dingin, akimuthei mihing pumpi/ mimal itna neih masak theih ding kisam hi. Kamdang khatin gen leng Mimangthang na veii ciangin, Khamangthang kivei thei pan ding ahi hi.  Tua manin minam a it Zomite sungah i lungngaihsut khop dingin " Minam Khanlawhna pan Zogam thak phuhna ding hanciamna-ah " cih thulu 10 tawh Zominam le Zogam thak phuhzia ding kikumkhawm ding hi hang.

(1) Kawl Kumpite le Mikangte' Hangin Chin min Kingahna:
Kawlgam sungah gamkee (State and Division) 14, om in, minam tuamtuam nam 136 val om ci-in tuni ciangciang Kumpi thuneite in ciamteh uh hi. Tua gamkee (State) 14 sungah Zomi, (Chin) kici Laimi, Khumi, Mara etc.. te' teenna pen Chin State ci-in, Mikangte uk hun lai pek akipan tuni dong Kawl Kumpi in ciamteh uh hi. Zomi tangthu kan mipil masate le Kawlgam University tuamtuam pan Tangthu sulkan mipilte muhna ah Chin min pen minam min hiloin, Mikang hun lai a, Kawlte in a piakna bangbang uh tawh kiciamteh ahihna nial theih hi lo hi. Ka neulai akipan Sanginn ah Chin Pyine, Chin Hlumyo (Chin minam) ...Chin Sar etc.. cih tawh hong kihilh in, Zomi-Zogam cih hong kihilh ngeilo hi. Ahi zongin nisim annek, tuidawn, silh le teen, vanzatte tungtawn in Zomi cih kammal nisim in kilokhia den hi. Tua manin Chin pen i min ahihloh lam akitheih semsem ciangin, Chin minam le Chin State pan Zominam- Zogam ah akilaih nuam dinmun ah Zomite in hanciamna kinei ahi hi.

(2) Inn sung,Sanginn, Lasate le Mimasate' Tungtawn in Minam Khanlawhna:
Hun hong pai toto in, ka thu theih deuh ciangin Inn sungah Nu le pate le Siate in Khamtung gam, Zogam, Zomi, Zongeina, Zopau, Zolai cihte hong genna le Sangah Tanlang pan Tanli ciang Zolai simbu kisinto ahih manin, tuni dong Zolai ka gelh/ ka sim thei pah hi. Sang sungah Chin minam kici-in, inn sung le apua lamah Zomi ci-in ka thei toto hi. Zogam, Zomi cih min pen ka thutheih khit 1980- 1988 nung lam akipan Kawlgam buai akipan Zogam ah Zomi National Congress (ZNC) le Pu Chin Sian Thang,Pu Thang Lian Pau te hong lang leuleu hi. Tua mah bangin Manipur lam pan Zogam lasiam masa Tg. T.S. Khai (Zogam lapu) in, 1984 ? kim pawlah Gam itna la pawlkhat ahi  " Zomi' neihsa khuapi bangzah pha !, Vanman Tamlua!, Vangkhua lai-ah melma Burma te ci ! cih late hong khum ciangin, Zomi le Zogam cih kammal ka theihbeh toto hi. Tua banah Manipur lam mah pan Pu Go Gin, Pu Thang Khan Gin, Zo Khan Khual, Pu Lal Denga te le ZORO cih hong thang leuleu hi. Neulai (kum tawmlai) ka hih manin, amaute kuami? bang sem uh ? cihte ka theician mel kei a, ka kankhia tuan kei hi.

(3) Laigelh Siamte' Tungtawn in Minam Khanlawhna:
Zolai thu i gen ciangin Pu Pau Cin Hau lai or Zotual Lai le CopeTopa hong patkhiatsak Roman Alphabet (ABC) tawh Zolai cih namnih i genkhoploh phamawh zel hi. A hi zongin tuni dong Cope Topa bawl Zolai bek mah tawh i laigelh siam masate i laigelhna tam zaw kha dingin upmawh huai hi. Cope topa mahin " Tedim Thukizakna " cih laihawm na pankhia in, tuni dong Zomi sungah laihawm a masa penpen dingin kiciamteh hi. Tua zomah Siamsin lamte in akhangkhang in Zolai tawh Siamsin Magazine bawl zel uh a, tuni dong kizomzom lai hi. Mipite' lam panin abeisa 1990- 2000 hun sung akipan Zomi / Zogam cih tawh kisai hong laang leuleu in, Zomi Tangthu (Zo History) laigelh masate ahi Dr. Vum Son (late), Rev. Khup Za Go (late), Sia J. Gin Za Tuang, Rev. Job Thawngno etc..laigelhte hong laang leuleu hi. A diakdiak in Manipur lam pan minam thu le (Zomi) cih tawh kisai laihawm Rev. Khup Za Go i patkhait " Zo Aw " le " Lungdamna Aw " cihte ka sim kha hi. Tu lamlam ciangin Lai nasep kipawlna le laigelh tuamtuam zong om kawikawi ta hi. Tua ahih manin, Zomi sungah i mipil laihgelh masate' tungtawn in, mipi sungah minam khanlawhna le minam itna thak kineithei cih kimukhia hi.

(4) Biakna Pawlpi Hangin Minam Khanlawhna:
ZBC pen Zomi sisan sitset mah ahi Rev. S.T.Hau Go i patkhiat ahih hangin, ZBC min hangin Zominam vai khanlawhna cih om tuan loin, Chin kicite tawh kum tampi sung kipawlkhawm thei lel hi. Hun hong paito zelin, abeisa 1995 kum? ZBC pan ZBCM hong paikhiat ciangin Chin le Zomi min vai buaina hong kipankhia kicithei hi. Tua zahkhop mahin ZBCM in zong " Thupha Ngah Minam " cih bulphuh in nasepna zongah " Khamang thang le Mimangthang veiina " cih bulphuh in nasem uh a, pawlpi zong tuni dong khanlam manawh uh hi. ZBC sungah Chin le Zomi tawh omkhop sung teng Zominam Khanlawhna om lo a, Kikhenna a om ciangin Zominam khanlawhna hong om kicithei pan hi. Tua manin ZBC le ZBCM kikhenna tungtawn in minam sungah Zomi khanlawhna hual khat om cileng kikhiallo ding hi. Ataktak ah hih biakna kipawlna ahi ZBC pan CBC ah akilaihkhiatna thusim taktak pen Chin le Zomi kidemna (Politics) mah pan ahihna phawk huai mahmah hi. 

(5) Thukizakna Tungtawn in Minam Khanlawhna:
Tua tawh kizomto in 2001 kumin Kawlpi pansan in " Zo Aw " cih Nipi kalsim laihawm kinei-in, Zomi sungah Nipisim laihawm masapen zong hipah dingin kiciamteh hi. Hih Zo Aw laihawm pen Zomi sungah mi muanhuai Committee mi 30 valte makaihna tawh kiphuankhia ahih manin, Zomibup huam laihawm hong suak pah ahih manin, Kawlpi pan kipan Zogam, Tedim, Tonzang, Cikha, Tamu, Mogoh, Maymyo, Mandalay, Yangon, Malaysia, Japan, USA cihte dongah kihawmkhia hi. Tua lai pen tuhun bangin Internet baihlo ahih manin, Laito pan laibawl tawh tuam ngiatin Nipi sim kikhak ngiatngiat hi. Hih  Zo Aw hangin Zomi sungah minam vai ukna le khanlawhna kineibeh mahmah bek tham loin, laisimna le laibu bawlna cihte kilunglut tuam mahmah hi. Tua hun akipan Zomi sungah kipawlna le biakna pawlpi, District level, Association, Conventin level cihte pan laihawm/ lainasep lam khanlawhna kibehlap in, tuni ciang dong Zolai tawh Internet Online tungtawn in Zomi Network tampi kinei ta hi. Hih pen Zomite thukizakna lamah khanlawhna hual thak khat kicithei hi.

(6) UN Refugee Tungtawn in Minam vai Khanlawhna:
Nuntakna haksakna tawh Malaysia lamah sum zongin Zomite kipai ziahziah hun khat hong om leuleu in,UN cih min tawh gam thumna tunna ding thu tawh hong kizomto  hi. UN ah kamlet le nasemte pen sanggam Hakha, Thanlang lamte mah na madawk masa zaw dan ahih manin, UN makaite in zong Chin min bek mah thei uh cih kigen hi. Tua banah UN kamphente in minam deidan in Zomi (Tedim mi) te deihsaklo ahih manin, Malaysia gamah supna le guallelhna tampi kithuak hih tuak hi. Chin min azangh Hakha, Thantlang, etc.. lamte' nenniamna le deidannate kithuakzo nawnlo ahih manin, UN theihpih dingin Zomi min tawh ZAM, Ciimnuai, Zomi Innkuan Malaysia etc-.. cihte kiphuankhia hih tuak hi. Hih minte picingto zel ahih manin UNHCR tawh kizopna tuni ciang dong kip le khotak kinei hi ta hi. Hih pen Malaysia pan Zomi le Zogam min tawh kisai khanlawhna hualpi khat in kiciamteh thei ding hi. Tua mah bangin aneu alian in, Chin min limlim kizadah in Zomi min kisihpih/ kinuntakpih ngamna lianpi hong piangkhiato cileng kikhiallo ding hi.

Hih UN / Refugee hun akipan tuni dong adiakdiak in gampua a tungsa Zomite sungah Zomi/ Zogam cih veiina kineihlawh himai hi. Abeisa Kawlgam om lai khawnga minam vai peuh mah a thei kha ngeilo le a awlmawh ngei hetlote nangawn in, minam itna le veiina kinei kheukho ciat hi. Thukhat ah gen hi leng UN om manin, Zomi sungah minam vai khanlawhna thak kinei kicithei hi. Tua ahih manin minam itzia, minam min ngaihsut ziate le nasepzia cihte kitheician loin, Chin muhdahna ciang lel tawh Zomi kipumgup/ kipum it cih dinmun khawng hih tuak hi. 

(7) Chin pan Zomi (C-Z) tawh Kibuaina le Khanlawhna:
I gensa mah bangin abeisa 2000 kim akipan Zomi vai khanlawhna thak a om tawh kiton in, gam pua lam UN Refugee pan C-Z kibuaina le khanlawhna hong khuahpai semsem in tuni dong meikuang kizomsuak kici thei ding hi. Adiakdiak in gam thumna a tung masasa Zomi vai le Chin vai tawh Internet maitang dimin nisim phialin kisel/ kitotlawh izong ki om hi. Khanlawhna i cih limlim apianna peuh ah upzia le sanzia zong kilamdang pah ahih manin, kiselna le kidemna zong a om ngeina mah ahi hi. Tua bek hi loin, Zogam, Tedim gam sung tengah abeisa CNF/CNA te hangin Chin min kizadah semsem a, Chin vai gencianna a nei khate bang thahlup ding zongin kideihlo liang dinmun ah ki om laitak hi.

Hih thute hang mahin Chin State pan Zogam (Zoland) tawh laih zawhna ding le Zomi min tawh minam kiciamtehna ngah zawhna ding ciang dong kihanciam sawm hihtuak hi. Zomi, Zogam itna le ngaihna la kiphuak in, laikigelh ziahziah a, " Zomi ka hi hi " cih kammal pen kideih pha mahmah hun laitak zong ahi hi. Laphuak le lasiam Lengtong Pauno, Thawn Khawm, T.S.Khai le a dangte in Zogam le Zominam itna (Gam ngaihna la) vive kiphuak khengkhang hi. Chin le Zomi vai pen abeisa bang hun hiam akipan tuni dong akhangkhang in a kibuaipih toto lai ding thu ahi hi.. A hang bel Chin kici nuam phadiak Hakha, Thanlang, etc.. lamte le ei Zomi te pen gam le nam vai bek hi loin, biakna vai dongah kipawlkhawm thei ngeilo ding hi hang. ZBC nangawn ah tuni dong mah buaina om bek hi loin, tu-in ZBC pan CBC ah kitungto ta cih i mitmuh ahi hi.

(8) Gamthumna Tung Zomite' Tungtawn in Minam min Khanlawhna:
I gensa mah bangin leitung gam tuamtuam ah Zomite i kitheihthang ciangin, Zominam veiina lian semsem in, ahi zongin gam le nam nasepzia/ kalsuanzia (Policy) kitel taktak lo hi. Tello, cianlopi mahin Zomi / Zogam i cih thapaina zong a lungkimhuai veve ahi hi. Tua bangin gam thumna tungsa Zomite sungah Minam itna le Zogam ngaihna pen a tunga i gensa gamnihna UNHCR pan minam vai kilangpanna/ kideidanna pan a gah hi dingin kigenciat hi. Gampua pan minam veiina hang mahin Zomi Kipawlna tuamtuam hong kiphuankhia ziahziah in, gam sung lam dongah hong kilawhkik liang hi. Zomi kipawlna thupi pawl khat enpak hi leng,,, LZI, Zomi Association, ZCFcihte pen gam pua lam a tungsa Zomite' lungsimtawng pan a piangkhia vive ahi hi. Tua mah bangin Zogam puahna / zuunna ding zong gamdang tungsa Zosuante' tungtawn mah pan hong kipankhia ding i lamen hi. Gamdang ah pemta in i omna pen Zogam thak phut dinga Pasian in hong puak ahih lam i mangngilh ngeilo ding kisam mahmah hi. 

(9) Zomi Kipawlna Tuamtuam Dinna tungtawn in Minam Khanlawhna:
Zomite sungah a hang tuamtuam le ngimna deihna tuamtuam tawh kipawlna tampi kiphuankhia khin ta hi. Hih kipawlnate pen kipumkhatna le minam bup huam khantohna ding ngimna vive mah hi dingin i lamen hi. A hi zongin gam le nam nasepna lamah Zomi min pua ZNC/ZCD party khat bek kinein a, tua sungah Zomi khempeuh i kipumkhat theihloh khak ding dahhuai mahmah hi. Hih i gengen gam le nam hutna le ukna gam khat neih theihna dingin nasem thei taktak pen ZNC/ZCD bekbek mah kinei a, a panpih thei dingin gampua pan WZC kinei hi. Hih kipawlna nihte pen tatzia akibat lianloh hangin, ngimna le tup (kungmong) kibang linlian ahi hi. Thubulphuh " Zogam leitang ngah kik ma teng " cih ahi hi.

Zomite' gam taktak ahi Kabaw valley, Kawlzang teng, le Zogam i cih theih ding Township 3 teng peuh mah bek ngahkik sawm leng kua mahin hong khaktan zolo ding hi. Zomite in leitang kician neihsawm lel in, i leitang tungah ei le ei ki-uk/ kimakaih in, Zomi galkap ngait i neih zawh ciang bekin Zominam le Zogam (Zoland) kiphut thei pan ding hi. Tua ahih manin, ZCD le WZC-ZIA te' neumuh mawkmawk nawnlo in, phungvuh in panpih  zaw leng Zominamte in Zogam (Zoland) kineizo pan ding ahi hi. Tua bek tham loin, India gam Manipur ah ZRO / ZRA galkapte tawh kibelpawl sawm in, lampi om bangbang in mapankhop ding zong makaite in ngaihsut huai thu ahi hi. Zogam (Zoland) phuhna ding le a bucing khantohna manpangtak om theihna dingin GZA akipan gampua lam kipawlnate in mapankhop ding kisam hi.

(10) Chin State le Zogam (Zoland) ah Panmun laksawmna:
Zogam i cih manin Chin State sung (leitang) kinial / kituh hi mas loin, i minam min mahmah akinial/ kibuailawh masa i hi hi. Min kibang neihkhop/ zatkhop theihna om lopi-in, gam khat / leitang khat tungah teenkhop ding a baihlo le apiangtheilo ding ahi hi. Minam thu ah kituak theilohna hangin biakna lam nangawn ah kikhenlawh suak i hih manin, Chin deih pawl le Zomi deih pawlin ki Akgual khen kul ding hi. Zomi i kicih ngam le Zogam / leitang khat i neih ngam zong akisam ahi hi. Tua mah bangin Chin mi akicite in zong Chin State or...etc.. Chin gam kici leitang ukna khat a neih zawh ding kisam uh hi. A tawpna ah Chin State buppi Zogam/ Zoland i cih zawh kei le zong Tedim, Tonzang, Cikha le Kawlzang le Tamu kabaw valley kuam ciangciang i Zogam dingin hanciam sawm leng Kawlgam tangthu le thukhunte tawh kisemthei kha ding hi. 

Abeisa 2012 kumin ZNC/ZCD Party in Register abawlna ah Kawlgam kumpite in Kawlgam sungah " ZOMI omlo" ci-in hong nial ngei uh hi. Gencianna kineih banah gamdang mun tuamtuam pan Zomite in Lungphona akineih ciangin, " Zomi om mah " cikik saisai uh a, tuni dong Zomite minam kician khat i hihna kician semsem ta hi. Hong tung ding 2014 Kawlgambup misimna (Census) hun ciangin Zomi cih ngiat tawh minciamtehna bawlsawm leng a, tua khit ciangin i gam i leitang ding tawh hong kizomtosuak thei dingin i ngetkhiat sawm ding hi. Hih pen tulaitak gam makaite le thumute i tavuan dingin koihsak nuam hi hang. Tuni akipan hih Zogam khuapi 3,4 tengah Zomi min tawh kilungtuak tak a, Census bawl theihna dingin, mesuai in makaite in hanciam huai mahmah hi. HIh gambup misimna (Census) panin Zomi tawh kiciamteh le hang, Zogam (Zoland) cihte zong damdam in hong paitoto thei ding thu ahi hi.

India gam Manipur State sunga om Zomite kipawlna (ZRO) akihel Zosuan namkee honkhat makaihna tawh zong Manipur State sungah amau le mau suaktatak ki-ukna gamtuam / gamkee (State) khat neih theihna dingin India kumpi tungah ngetna nei laitak uh cih kiza hi. Tua bangin gamtuam aneih theihna dingun Zomi galkap ZRA zong kiciantak neipah uh hi. Hih pen paizia/ kalsuan a man/ adik hi a, ahi zongin Gamtuam hong ngah phial mah le Kawlgam sunga om ei Zogam kici teng pen hong huamsuk mawkmawk thei lo zel hi. A hang bel India le Myanmar gamgi (Boundary) in hong khen ahih man hi. I gennop bulpi ah Manipur lam ate in zong hih bangin ZOMI it-in, ukna gam neihzawhna ding hanciam uh ahih le Kawlgam a om Zomite in zong Zogam (Zoland) phuhkhiat zawhna ding hanciam hun mahmah ta hi.

Thukhupna:
A tunga i gensa om bangin Zominam min kician khatin hong kiciamteh/ kitheihpihna om khin ta ahih manin, Zomi le Chin min vaii tawh lunghimawh ding le kinialnial ding hun hi nawn lo hi. Zomi le Zogam cih kammal mahmah i lungtang satak tungah belhcip sak in, a thu in gengen in a la in sasa in, lai tawh gelhgelh ding ahi hi. Zomi nam i hihna hangsan tak pulak ngamin, i luahna ding Zogam (Zoland) kician i ngah mengmengna dingin, Zosuan khempeuh in khut kilenin mapang khawm ding hi hang. Zogam Lalpu in, " Lunglaulo aw Zogam lei aw... sawt nawnlo ding, Sianin lumbang hong sungh dinga, Ni hong tang ding" ci-in a laphuak pen a sawtloin in hong tangtung taktak ta ding hi.

Tua hi a, Kawlgam ki-ukna zong hoih lam hong manawh toto lai dinga, i ngaklah lah ahi Democercy lampi man/ dik tungah hong kalsuan toto peuh leh Panglong thukimnate tungtawn in Zomite in i leitang tungah ei le ei in ki-ukna/ thuneihnate ngah  pelmawh ding hi hang. Pasian in Israel te saltanna pan kum 400 khit ciangin, maute gam le lei(khapsa gam), Canan gamah puakkik veve hi. A neihsa minam min le gam le lei tungah thupha ngahin teengsak kik hi. Tua bang mah lianin Zomite zong Pasian in hong piaksa Zogam (Zoland) ah ei le ei suaktatak ki-uk theihna ( Self Determination or Administration) i nei pelmawh dinga, tua ni ciangin  " Thupha Minam " kicithei taktak ta ding hi hang. Zomi (Zo people) le Zogam (Zoland) a phutkhia zo teitei dingin Zomite Topan thupha pia hen.

Mimal muhna le Veiina tawh,
Sia Khampeek (Tongsan Pu)

Source : www.tongsan.org

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MINAM VAI KHANLAWHNA PAN ZOGAM THAK PHUHNA DING HANCIAMNA AH. Description: Rating: 5 Reviewed By: Cinpu Zomi
Scroll to Top