728x90 AdSpace

Hot
Menu
Zon-ol na Donate

Latest News

A PALHPHA MOMNO. Gelh - Rev. Khoi Lam Thang

A PALHPHA MOMNO
Gelh - Rev. Khoi Lam Thang
(GS,Bible Society of Myanmar)

Thu konghong
MOMNO hun pen pak bang a palh hun ahi hi. Hoih hi. Namtui hi. Iplahhuai hi, Deihhuai hi. Manpha hi. Thupi hi. Etlawm hi. MOMNO hun pen tomno khat ahi hi. MOMNO ing cici kawmin MOMNO hun a beibei ahi hi. Pallai ni sauvei lo hi. Beipak hi. Tua ahih manin khang masate in la na phuak uh a:
(a) Len lai nunnuam i cih dingin, khawlhlai
nunnuam am aw lawm aw ee.
(b) Khawlhlai nunnuam am aw lawm aw,
tumbang vuaiten zong,khawlhlai aw ci, lenlai aw ci ee. 
ci ngeungeu uh hi.


Mihingte in MOMNO hun khat vei ciat bek a kizang kha ahi hi. Pawl khat in manpha takin zang uh hi. Palhpha uh hi. Pianman nei uh hi. Pawlkhatte in a hun manphateng mawk beisak hi. Palh man lo-in vuaikik hi.

A palhpha MOMNOte in a mailam ading gelkhol uh hi. Khualkhol uh hi. Midangte sangin hanciam zaw hi. Nasem zaw hi. Thobaih zaw hi. Citak zaw hi. Kuhkal zaw hi. A lawmte lak ah kidawktuam hi. Kikhaituam hi. A upat cianga a phatan ding kimukhol khin hi. Tua banga 
palhphat theih nadingin ngaihsut huai thuthum kong sung nuam hi.

1. A po mawkmawk hi lo hong kisuan hi.

Mihingte nuntakna ah ei deihtel ahi lo, ahi bangbang a i san ding thu pawlkhat om hi. Nu le
pa ding kitel thei lo hi. Beh kitel thei lo hi. Zomi hih ding kitel thei lo hi. Pianpih ahi hi. Hihte
utthu in kikhek thei lo hi.

Innkuan nuam, gam nuam, khua nuam, pawlpi nuam sung pan a khangkhia MOMNOte pen ahoih mahmah pakhuan sunga kisuan pakkung tawh kibang hi. A neu a kipan manpha pah hi. Kikem pah hi. Kipuah pah hi. Hoih pah hi. Ahi zongin a kilem lo innkuan, a kithutuak lo pawlpi khawng a khankhiat pen sing kawm suang kawm a po kha tawh kibang hi. Hamsia hi. Hoih ding haksa pha diak hi. Ahih hangin a phawkhuai thu in:Mihing nuntakna pen ama thu a munkhat peuh a mawk po hi lo hi. Pasian in ngimna le gelna tawh hong suan ahi hi. Apo mawkmawk (a li kia) cih bang om lo hi. Liat tan ding, sau tan ding, khanzia ding dongin Pasian in a gelsa ahi hi. Mun kilawmpen mun ah hong suan ahi hi. Apalh ding bek hi lo, a pung dingin hong bawl ahi hi. Na pona mun pen hong kisuanna mun ahi hi. Lungkim in. Hong kisuanna mun pan palhsawm photphot in.

2. Ekleiza, huihsiang tuisiang le nitang kisam:

Botany le Agriculture mit tawh gen huai tampi om ding hi. Ahi zongin mi nautang theih dingin singkung khat in ekleiza, tuisiang huihsiang le nitang kisam hi. Tuate pen hun khat sung bek hi lo, a po ma a kipan a sih dong ahi hi. Mihingte pen a khang thei a pung thei dingin Pasian in hong suan ahi hi. Ihmut kawm a hau, lupkawm a pil kua mah om lo hi. A palhpha a paisa mi minthangte’ nuntakna a tamzawte tagah enthei, mizawng daipam, mipoi mihem peuh na hi uh hi. A dinmun uh khuisat lawh lo uh hi. Khakun lawh lo uh hi. Takkheh ci-in hapei uh hi. Lungkia loin hanciam uh hi.

Ekleiza bang lungsim hoih tawh a nuntakna uh buak den uh hi. Hanciam nopna lungsim nei uh hi. Khuakpilna hang hi masa lo, lungkiat theih loh manin mipil suak uh hi. Sumbul tampi a neih man uh hi masa lo, a thuman a cihtak manun mihau suak uh hi. Tui siangtho le huih siangtho bangin thulela hoih, lai hoih, lawm hoih tawh kizem uh hi. Van nitang bangin Pasian maipha lunggulh pha uh hi.

3. Lungno kipetkha sak ke’n.

Singkungte pakkungte adingin thosi a kipan lungno, lunggam, kauphete dongin a lauhuai ahi hi. Tuate in singtehte petmuih-in sisak uh hi. Singpakte ne-in pulhsak uh hi. Tua mah bangin MOMNOte ading a lauhuai virus lungno tampi om hi. A manpha masasa man sulhsak nuam hi.

Suahtak nopna, kisin nopna, lamban tawn-a minthan nopna, lamban tawn-a hauhnopna, lawmngaihna, leitung khantohna tuamtuamte zuihna cihte pen a sia khin ahih loh hangin a zangkhialte a dingin lampialna leh pukna ahi hi. Hunzat siam lohna, thadahna, lungkiat baihna, gualnop luatna, mi enna, hazatna, lawm hoih lo neihna cihte pen khangnote hong pettum thei lungnote ahi hi.

Gentehna -in:
IT hun ahih manin internet, email, website, face book cihte a siam lo khangno pen hun in a paisan khangno ahi hi. Ahih hangin tuate uangzatluatna in khangnote kisiasak hi. Hi-tech thupi mahmah hi. Tuate hangin Low-touch hih khak ding, Pasian tawh kizopna, nulepate tawh kizopna a kiam khak ding lauhuai hi. Khangno lawm ngai thei lote abnormal hi a, ahih hangin lawmngaihna pen virus suak thei hi. A palh ding kimlai pulh-in vulcip thei hi.

Lungnote in damdam damdam in hong petpetmding hi. Singkung tung mah ah ong teng pah ding hi. A nek kawmin hong khangkhang ding hi. A tawpna ah singkung a kungkeu dongin ne ding uh hi.

Thu khupna

Atunga thuthumte lungngai kawmin A PALHPHA MOMNO hihsawm dih in. Nang MOMNO hun, nang a hi a, nih vei na zang kei ding hi. A PALHPHA pak a palh khit ciangin gahpha hi. A gahphat khit ciangin taksa hi. A taksat khit ciangin khaici suak hi. Tua khaici kituh in po hi. Khangin palh leuleu hi. Gahpha in khaici suak leuleu hi. Na MOMNO hunin na mailam hunsaupi a dingin a bulpi ahi hi. Pil sinna le siam sinnate ah a siam pen, hanciam pen, a citak pen, a thuman pen hihsawm photphot in. Na gam na lei in na pakzu hong dawn nuam hi. Na nu na pa in na hoihna hong en nuam uh hi. Na naute in na gim namtui dik nuam uh hi.

Source : 
MOMNO
LOM XX Hawm IV
A Palhpha MOMNO Zing kha (May ), 2012

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A PALHPHA MOMNO. Gelh - Rev. Khoi Lam Thang Description: Rating: 5 Reviewed By: Cinpu Zomi
Scroll to Top