728x90 AdSpace

Hot
Menu
Zon-ol na Donate

Latest News

American Baptist Boston Seminar (1973 kum in Sia Khup Za Go gelh)

American Baptist Boston Seminar
(Siamsinpawlpi Annual Magazine 1973-74 pan a kiteikhia)
Sia Khup Za Go

India pan USA ni khat thu a tun’ pen a uphuai lo zah a hih hangin thuman a hi hi. Bombay pan August 31, 1973 zingsang nai khata ding pen tua ni mah nitak nai 3:58 lian, ni san mahmah laiin Boston kitung hi. Tua laitak ka nai ka et leh, India gamah September ni 1, zan kim laitak hi zo hi cih ka phawk hi.

Gam khat leh gam khat Pasian nasepna a sai American Baptist Board of International Ministries in a masa pen thu kikupna ding a vaihawm uh 'Seminar' kici zanga kha li sung tam dinga pai ka hi hi. Calcutta pan August 30, nitak nai 10 in India vanleeng tawh nai nih sung ka pai zawh ciangin Bombay tung a, tua pan US vanleeng TWA tawh zan kimpi mahin dingkhia kikin Israel khuapi Tel Aviv zing khua vak pan cih dingin kitung hi. Tua pan amau gamah ni sang mahmah zo ta a hih ciangin kileeng khia kik leuleuin, Italy khuapi Rome ah tawl khat kikhawl kik a, tua pan France khuapi Paris kitung hi. Nitumna gam lam vanleeng in hong delhpih a hih ciangin ni niam ta cih peuhmah om tuan lo-in Paris pan penlepi Atlantic Ocean tungah kileeng kik leuleu hi. Penle tungah a kilen’ lai takin meiipi bekbek in mun khempeuh tuam khin a, nisa in tua meiipi pen paalpi pak bangin kap taang khin a hih ciangin muhnop pha mahmah cih lel ngel ding hi. Tua bangin penle tungah nai 5 sung khawng a kilen’ zawh ciangin American-te tanglaikhuapi Boston kitung hi. Israel gam pan kipan ni tum cih mahmah om nawn keei lo-a America kitung a hih ciangin tua ni pen kei a dingin a sawt peen ni a suak hi.


Boston pen Massachussetts State khuapi, US gam bup khuapi lian a kici sung pan 8-na a hi, tai patle 987 (Sq.Miles) lian hi. American revolution kipatna a hi ‘Boston Tea Party’ kici 1773 kumin hih munah piang kha a hih manin a min neihna khat hi a, Pasian nasem minthang Moody, leitung makai min nei Kennedy suahna khua, leitung sang inn min nei Harvard University leh a pua-ah a min kidawk khua khat hi.

Boston khua sungah Pasian Thu sinna 8 om a, tua sang inn giatte in Boston Theological Institute (BIT) ciin kipawlna nei a hih manin a hoihna, a manphatna lian hi. Tua sang innte Andover Newton Theological School, Boston College Department of Theology, Boston University School of Theology, Episcopal Theological School, Gordon Conwell Theological School, Harvard Divinity School, St. John Seminary leh Weston College a hi hi. Hih sangte peuhpeuhah kah peuh lecin adang khat peuhpeuhah zong course na deih bang na kah kawi kawi thei ding hi.

Seminar a kivaihawmna bul in, tu hun leitung khantohna a ngah zo nai lo gamte haksatna thu phawkna ding leh tua haksatna thute tawh kisaiin tu hun Khristian Pawlpite in i sep ding, i tavuan bang a hi hiam cih thu kikupna a hi hi. Tua a hih ciangin Africa, Asia lehLatin America kici gam sung mite tawh kipawl thu kilim ngaihsut diak hi. Tua banah khantohna a ngah khinsa gamte leh a zawng, a khangto nai lo, a pil zo nai lo gamte in, lungsim, ngaihsutna leh ngeina bangci neih uh a, bangzah kikhiatna om hiam, cih thu kikupna zong hi lai hi. American Baptist Pawlpi tawh Pasian na a sem khawm ngei gam pawlpite panin, a gam pawlpite in kilawm a saksak uh min a puak masak khit ciangun tua mite lak pan American Baptist Board in a sepna a bawlna, a pilna leh mun in a tuam ciat a hi thei dingin India pan Arjison G. Momin, Lecturer, Govt. College, Meghalaya; Archibald Shear, Pastor, West Bengal; B. Karunakar Thyagaraj, Pastor, Andhra Pradesh; Khup Za Go, Field Director, Chin Baptist Association, Manipur; leh Philippines pan Reinaldo M. Nolido, sitni (lawyer), Bocolod City teel hi. American mite lungsim paizia theihna dingin Donald Ng (Massachussetts) Richard T. Jolly (Massachussetts) gel a hun hunin kihel uh hi.

Nipi kal khatin khatvei ta “Seminar” ci-in makai dinga a kiseh khat tawh kikah khawm zel hi. Hun awng dangteng pen komau utna leh deihna bang bangin sangnaupang dangte tawh Course kikah ciat hi. Tua tawh kisai-in Systematic Theology, Theology of Mission, Theology of Pastoral Care, Pastoral Counselling, Ethics and Mission kici te-ah ka kah pha pen hi. Sang inn tuamtuam ah a kikah thei kawikawi a hih hangin seminar ka neihna phual uh, Andover Newton Theological School-ah ka kah kim pen uh hi. A kiphuat zawh kum 166 bang a pha khin zo, Andover Newton pen Burma Missionary masa pen Dr. Adoniram Judson kah ngeina sang a hi hi. Master of Divinity (M.Div.), Master of Religious Education (M.R.E.), Master of Arts (M.A.), Doctor of Ministry (D.Min.) leh Doctor of Philosophy (Ph.D.) course om hi. Seminar a kineihna panin, a masa penin komau omna pawlpi, minam leh gam tangthu leh haksatna thute khatkhatin kikupna kinei phot hi. Hih tawh kisai-in Harvard University Library pan ka kawm laibu Structure of Chin Society in kimang thei bilbel hi. Tua ban thu tuamtuam kikupna panin, pawlpi lampai zia leh nasepna thu, Nature of the Church kici George Peck tawh ka kikum uh hi. North East India ah missionary hong sem ngei, tu-a Andover Newton Theogical School-ah ‘Dean’ a sem, George Peck pen Board of International Ministries ah upa khat a hih ciangin seminar uk ding, sai ding vaihawm dinga kiseh a hi hi.

American pawlpi leh gam pua lam pawlpite sum-le-pai vai a kipawlna a hi zongin, pawlpi nasepna tawh kisaia sum ngahna leh zatna vai leh mai lam cianga sum tawh kipawl gamtat zia ding thu Dr. James Sprigg in hong kikuppih hi. Tu hun science leh technology khan’tohna in noptuamna bangbang piang sak a, haksatna bangbang hong guan hiam cih thu theihna dingin Boston Industrial Mission a makai lian khat a hi Mr. Norman J. Famelli tawh kikupna kinei hi. Hih Mission in Pasian min tawh a nasepna zia uh hong gen ciangin a zaknop huai, a theih huai thu tampi hong phawksak hi.

America thu i gen peuhpeuh ciangin Mivomte (Negro) thu i gen thei puut hi. US tangthu ah gam vaihawmna a hi zong, annek tuidawn thu a hi zong, biakna thu a hi zong i gen ciangin Mivom leh Mikang thu in thu lian khat hi ngitnget hi. Hih thu tawh kisai-in Dr. Warner Traynham in hong makaih hi. Amah pen B.T.I. ah Director, Black Studies hi a, Mivom mi mah hi. Mivomte in Mikangte sangin America tung masa zaw uh hi, cih thu a hi zong, Jesuh in hong suak kik hi taleh Mivom minam sung pan hong suak ding hi, bang hang hiam cih leh, Palestine gam in Mikanggam hi lo-in Mivom gam hi zaw hi, cih thu hong gen ciangin Mikangte in Mivomte a nen’cip theih pen uh a kilawm lohna hong phawksak hi. Amau in “Negro” cih sangin “Mivom” cih pen thukim zaw uh hi. Bang hang hiam cih leh, khau vom in khau kaang zah mahin hoih veve hi, “Black is beauty” a ci uh hi. Hih in tu hun suahtakna thu ‘Liberation Movement’ tawh kisai a hih ciangin adiakdiakin Asia, Africa leh Latin America adingin thu lian khat a hi hi.

Tu hun leitung biakna paizia theihna dingin Harvard University Centre for World Religions ah ka kah uh hi. Biakna tawh kisai Ph.D. leh Th.D. sinna hi a, Hinduism, Buddhism, Christianity leh a dang sin nuamin leitung gam khempeuh panin mite pai thei hi. Department of Tribal Religion a om nai loh thu, leh a kulna thu a makai pa in hong gen hi.

Tu hun leitung mihing seh thum suah seh nih a uk ngiau zen ‘Communism’ in bang hanga hih zaha hong lian hi a, bang hangin mite in um a hi uh hiam cih thu a hi zongin, hih thu in Khristian upna leh zuihna hong suksiat sakna thu kikupna kinei hi. Pasian thu tun khitna a hi China leh tua gam makai Khristian a hi Chiang Kai-Shek pen bang hanga Communism (Marxist) leh Mao Tse-Tung in suankhia zo kik thei a hi hiam cih thute Dr. Robert Starburk tawh kikupna om hi.

U.N.O. in 1974 pen ‘World Population Year’ ci-in leitung mihing tamna thu leh, tua hanga haksatna piangte bangci le’ng veng sak thei ding i hi hiam cih thu kikupna dingin thukim zo hi. Leitung gam khempeuh panin hih thu kikum dingin Bucharest, Romania gamah August khain khoppi om hi. Hih thu tawh kisai kikupna Max Stackhouse tawh kinei hi. Amah in India gamah Visiting Professor in hong pai ngeisa khat a hih ciangin a lungsim takpi tawh a lunghihmawhna thu hong genpih hi.

Khristian Pawlpi kici-a minpiang Roman Catholic a hi zong, Protestant a hi zong, khat leh khat kihotheihna thu; tua banah Protestant Pawlpi sungteng nasep huan theihna ding, kipawl khop theihna ding thu, ‘Ecumenical Movement’ Rev. George Peck tawh kikupna kinei hi. America gam sunga Denomination tuamtuamte in a sep khop theihna thu zong kigen hi.
Tu hun leitung thu liante leh haksatna thute tawh kipawlin, “Leitung Khuavak na hi uh hi,” “Leitung ci na hi uh hi,” cihna za a ngah Khristiante bangci gamtat ding i hi hiam cih thu Rev. George Peck tawh nakpi kikupna a om hi. Seminar deihna leh ngimna bulpi in hih thu a hih ciangin thu lian, thu haksa khat hi a, mi kim in a kikup ding, lunghihmawh ding thu a hi hi.

Nitumna gam a hi zongin, American-te mahmah a hi zongin mite ngeina leh gamtatna phawkna ding, muhna dingin Boston khua leh a kiim-a om a hi England pan America a tung masa pen mite penle pan gunkuangpi tawh a kumkhiat ciang uha a khe uh tawh a sik masak pen uh suangpi, Plymouth Rock (1620), gunkuangpi minthang Mayflower II, a khua sat masak pen uh Plimoth Plantation (1627), Science Museum, Museum of Arts, tuipi sung ganhing nam kim khawina, New England Aquarium, ka en uh hi. Sang minthang MIT hawlin, Harvard University ah Seminar ka nei uh hi. Boston in leitungah a min neihna khat a hi Boston Symphony ah mi za khat in a kitona tumging a tum uh ngai-in ka pai uh hi. A makaipa pen Japanese mi hi bilbel hi. Minthang Boston Garden piah vuk tunga Hockey sat a hi zongin, Basket Ball kimawl a hi zongin ka en uh hi. Television (TV) ah ni simin kimawlna a tuamtuam I et den hangin a munah i mit tang tek tawh i et ciangin a nopna khat om hi. Oct. 10 ni-in vaihawmna inn Massachussetts State House ka hawl zawh ciangun, nitak nai 1 lai takin House of Representatives tu khawm laitak enin, Speaker in koteng maitang lahna House ah hong nei-in, vaihawm upate in khutbeengin hong pahtawi uh a, siam zo sawnsawn kisa hi.

UN Day a hi, Oct. 24 in Massachussetts Governor in Boston khua sung a om gam dang mi sangkahte khempeuh ‘International Students’ Day’ ci-in State House mahah hong sam khawmin, Senator pawlkhatte makaihna tawh Governor in thu genna a neih zawh ciangin Ocean zat zia ding thu tawh kisaia zaknop huai pha ngeel Debate ngaiin, tua zawh ciangin ankuang umna om zeizai a, khuangpi leh a ging thei khempeuh tawh Navy pawl in hong khim uh hi.

November 21-23 dong New York City ah ka hawh uh hi. Nov. 21 ni-in National Broadcasting Corporation (NBC), Rockefeller Centre ah pai-in Radio Tv Studio leh thukizakna zum United Press International (UPI) leh Associate Press (AP) ka en uh hi. Nai 11.30 AM in TV show ah “What’s My Line?” a bawl laitak ka en kik uh hi. Nitak nai 3:15 PM ciangin leitung bup vaihawmna zum, UNO ka hawl uh hi. Hih zum ah kha pan a kingah suang et ding om hi. Nov. 22 ni-in mi 6200 tut theihna Radio City Music Hall ah Jesuh suahna tangthu, “Nativity” kilak ka et zawh ciangun leitung bup inn sang pen “Empire State Building” ah ka kah uh hi. Nov. 23 ni-in suahtakna ciamtehna ‘Statue of Liberty’ enin Liberty Island ah sun an ka ne uh hi.
Pawlpi paizia muhna dingin Methodist, Lutheran, Congregational, Baptist, Evangelical Baptist, Free Evangelical Baptist leh a tuamtuamah kikhopna ka nei hi. Mivom Khristian pai zia theihna dingin nihvei Seminar minin Black Church ah kikhawm ung. Seminar min mahin biak inn tuamtuamah hun zatna kinei hi. ‘International Students Night’ kici Park Street Church, Boston, in Oct. 14 nitakin hong vai hawm a, gam tuam tuam pan pai mite in an nek khopna leh Pasian thu tawh kihansuahna hun kizang hi. India pan pai tengin Hindi la khat ka sa uh hi.

December 15-18 sungin American Baptist Zumpi, Valley Forge, Pennsylvania ah meileeng tawh hawh in India leh Burma missionary hong sem ngeite leh makai dangte tawh kimuh banah vuk pi lom tang ka tuak lai uh hi. George Washington inn leh a galkapte giah buk ‘Camp’ i muh ciangin hong lungzuan huai phial hi. Hih zum dawl thum a pha, a beema kilam, a sauna pi 800(ft.), a zaina pi 600, nasem 700 omna, ‘Baptist Taj Mahal’ ci-a a nophuah liang uh hawlin, makaite tawh annek khopna, niang hawp khopna a kineih zawh ciangin Chin Hills Missionary nunung pen Rev. Dr. Robert Johnson in Philadelphia ciang hong kha-in, Christmas zang dingin Bostonah ka ciah kik uh hi.

US ah tu hun lai-in bang “huih” nung pha pen hiam ci-in kidong pak le’ng - numeite khan’toh nading hanciamna, Black Movement, Khristian pawl tuamtuam kihotheih na’ng, Ecumenical Movement; gam khat sung mi nam khat sung hi lo leitung bup Pasian nasep nopna, World Mission; leh nitumna gam khangnote in nisuahna gam mite ngeina, gamtat, puansilh niikten’ a uuknate uh, kigen thei ding hi. Roman Catholic Pawlpi sungah Kha nasepna, Pentecostalism, a tun’na zong thu thak khat hi, kici nuam ding hi.

FOCUS (Friendship for Overseas College and University Students) in Dec. 21 nitakin kikhakna ankuang tungah “Christmas Presents” hong piak zawh ciangun America ah Khristmas zangin, London leh Jerusalem Khristmas kibawlte TV pan a ki-et veve zawh ciangin Dec. 27, nitak nai 8 in kong din' khiat teh, vanleeng sungah thukizakna ka sim leh, 1973 kum leitung thu piang, thu lian zaw diak nam 10 a gualh suk ciangin: nitak sim TV-a suak ngitnget, mihing gitlohna kiphawkkhiatna; Watergate thusia; sum thu hanga ana(force) tawh US Vice President, Spiro T. Agnew a kitawpsakna thu; Vietnam gal beina leh gal matte kikhahkhiatna; leitung nek leh dawn haksatna; Israel gam kikapna; phalbi khuadam a behlap mahmah Energy Crises; Texas gamah pasalno 27 a kithahlup thu; Vietnam gal a piang sak, gal a bei leh a sih akituak kha President Johnson sihna; Skylab Space Mission leh Marxist deihna tawh vaihawmna gam Chile ah galkap in vaihawmna a suh sak thute, a ci ngelhngelh hi.


TWA vanleeng mah tawh Boston Logan International Airport pan ka tot ngei lampi teng mah tawna kong ciah khiat leh, Dec. 29, zing nai 5 lianin Bombay hong tung kitung kik a, December 28 pen mang hiau hi cih ka ngaihsun kha het kei hi. Zindo a hahkat zin-leh-leeng ho a siam, ngeina hoihte phatak a keem, dangka sik tungah “Pasian i um uh hi” cih a tuang sak mi nam leh gam ciah san ka hih lam kiphawk kha bek ing.

Source :
REV KHUP ZA GO’ GEN LEH GELH THUTE
Compiled from Leivui Panin – An Autobiography by Rev Khup Za Go

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: American Baptist Boston Seminar (1973 kum in Sia Khup Za Go gelh) Description: Rating: 5 Reviewed By: Cinpu Zomi
Scroll to Top