728x90 AdSpace

Hot
Menu
Zon-ol na Donate

Latest News

Gamdang ah Sumzonna le Khantohna. Gelh - Pau Sian Lian

Gamdang ah Sumzonna le Khantohna
Gelh - Pau Sian Lian

Gamdang-ah nasem-in sum thalawhte’n a gam uh bang ci bangin panpih kik zo hiam cih dotna pen mipilte’lunglut mahmah uh thukhat hi. 2001 Kum, September 11 ni  World Trade Centre a kisuksiat khit phetin, tua mi ngongtatte sulzuih dingin USA kumpi in a gam uh a om gamdang mi nasemte’thu, innlam ah sum a khak dan uh cihte a neng a tawngin kan tiltel-in leizon pah uh hi. Sum kikhak dan azia atongte kanin, a khak zahte uh zong ciapteh sak ciatciat uh hi. Hih vai sepna hangin mi ngongtatte’ thu a theih beh zuahzuah sam loh hangun, thuthak tampi hong mukhia uh hi. Gam dangah zin-in sum thalawh leitung bupah mimal awn 200 (200 million) bang pha-in tuate in a gam, a khuapihte uh bangzah ta-in huh zo mawk uh hiam, cih hong mukhia thak uh hi. Hih muhkhiatna tungtawnin, gam dangah sum thalawhna in, tangpi ading siatna piangsak lo bek tham lo-in, kiphattuam pih mahmah hi, cih hong mukhia uh hi.

Gamdangah sum a va thalawhte’n naham tuamtuam semin a ngah uh sumte innlam a khak uh summalte khempeuh gawm le hang a khangtosa ni tumna gamte’n gamzawngte a piak uh huhna summal phazah sang tamzaw hi, cimawk uh hi. World Bankte’ bawl sazian-ah, 2008 kumin gamdang ah sum thalawhte’ innlam khak sumin mak 328 (billion) pha-in, tua sumzah pen a hau gamte’n gam zawngte a huhna uh summal mak 120te’ zahnih sang tamzaw mawk hi. India gam bang ci le hang, gamdang ah sum thalawhte’ khakkik summal mak 52 phazah pen, India gamah gamdang mite’ tuh summal (Foreign Direct Investment) phazah sang tamzaw cimawk hi.

Leitung bupah gam dangah sum thalawhte’ sum khakkik (overseas remittances) a tam ngah pen gamte-in India, Sen, Mexico le Philippines gamte ahi uh hi. Philippines gammi bup pan 11% in gamdang sum thalawh in zin mang uh hi. Gamsung sumlut GNP bup lak pan 13.5% kim bang pen gamdang ah sumthalawhte (overseas Filipino workers) zon sa hihtuak mawk hi. Tua ahih manin kumpite’n “gam ading galhangte” (heroes of the country) ci-in pahtawina minpha pia uh hi. Khuahun siatna hangin dong tuak hun teh gamdang a om mipihte’ khak sumte in thu hong nei mahmah hi. Zogam ah zong innkang, mencim, kialtung, zusa lang cih bangin dongtuah zeuhzeuh teh gamdang a om mipihte’ sum le pai tawh gal huhnate in hong vai zangsak mahmah tuam hi. Zawnna khiapna (poverty alleviation) ah zong kizang thei-in mihingte nuntakna hong sangkhan to hi.

Gamdang ah na a vasemte’n sum le pai bek tham lo, a dang lampi tuamtuam tawh a gam uh lim panpih zo mahmah uh hi. UNDPte’n kumsim in a hawmkhiat uh Human Development Report 2008 ah gamdang ah zin-in sumzon ding thapia-in, hanthawn pha mahmah hi. Gamdang ah zin-in sum zonna hangin, sum bek kingah lo-in, a nuamzaw nuntakna, cidam kikepna, pilna siamnate zong kingah beh ahi hi. Tua a kingah pilna siamnate tawh lam kiatna khua le tui, gamte kihuh kik thei hi. Gam khantohna ding, ngaihsut piakna hoih nono, hanthotna, lamlahna, gam ading thuthuk tuamtuam kuppih kikthei mawk uh hi.

Tua ahih manin, Kawlgam kumpi U Thein Sein-in a nasep kipat zawh a sawtlo-in, gamdang a om mipihte limtak hopih, lawmbawl-in gam ading nasep khop ding zolbawl den hi. India mite zong gamdang panin a gam uh khantoh theihnang vai haksa tampite ngaihsut na hoih nono piakna tawh a kumpite uh panpih den uh hi. Tua ngaihsut piaknate zong a India kumpi-in limtak thupilakin taksuah sak pahpah uh hi. America leitang-ah om gam pawlkhat in zong, gamdang om mipihte’ khak sum phazah tawh kikim linlian summalte kumpi in zong lam tawhna, sang lamna-ah zatkhiat dingin kamciam pia pah ekek uh hi.

Mipi makai Daw Aung San Suu Kyi mahmah zong kum (20) val khitteh gamdang ah a zin masak pen penna Thai gamah, Kawlgam mi sum thalawhte kiang va hawhin, thapiakna le vai lianpi honkhat va vaansak hi. President Thein Sein’ zat mipil Winston Set Aung (economic advisor president) in zong Kawlgam tawh kisai reasearch tampi a bawlna tung tawnin gamdangah sum thalawhna pen hoih hi ci-in thukim mahmah hi. Kumpite’ lampan gamdang ah sum thalawh nuamte a huh zawh pah zuahzuah kei zongin passport vai a kipan vai tuamtuam ah a manlang theipen vai hawmsakin nawng kaisak loh ding thupi hi.

Thu hoihlo lam-in en ni ci le hang, hih bang mipihte’n i gam hong nusia ziahziah mawk uh ahih manin brain drain cih, khuak luankhiatna hong piang hi. Mipil, misiam tampi a kisum suak mawk hi. Amaute a paikhiat nuam loh nadingun “Pull factor” cih kisam hi. Gam sungah a om nop theihtheih nadingun kumpite mah makai-in lawpsak, zolbawl kul hi. Tua hi lo-in, “Push factor” a kici, amaute nawlkhin, pampaih, awngthong sak, gilkial dangtak sakin nehpik san lehang, lonnona-ah hong taisan ding mah uh hi. Gamdang ah sumzon nasepna pen tu ciangciang hoih hi, cih theih hi. Bang hun ciang dong hong hoihsuak ding cih bel kam kisang ngam nailo hi. Tu tadihin bel leitung bupah mipha zah lak pan 2% in gamdang ah nasem hi, kici hi. Zomite zong kum 2000 khit pawl a kipan nitumna gam lam-ah lampi tuamtuam tawh kitung ziahziah hi. Tua gamlam manawh mipih honkhat gam nihna ah tamlai uh hi. Tua ahih manin Zogam ah khangno ngumngek heupian cih phialmawk theih hi.

Hih vai-in a hoihna le a hoihlohna zong honkhat om ding hi. A lungdamhuaina khat en le hang, “The Bottom Billion” laibu gelh, a pil mahmah Paul Collier in gamzawngte’ awkna thang (trap) nam (4) om cihi. 
(1) Tualgal (civil war), 
(2) Gamsung piang na manphate’ hamsiatna (resource curse), 
(3) Gam veng hoihlote’leitang’umcip, tuipi tawh kigamla gamte (landlock with neighbours), (4) Kumpi te’ uksiamlohna (bad governance) cihte hi, cih gelhkhia hi.

Tualgal a pianna hang phadiakte lakah thu khat-in pilna neilo naupang tamna hang, ci hi. Zomite haihang, pillo, ciimlo hihang cihna hilo zaw-in, Kawlgam akipan Zogam phadiakah pilna hoih kingah zolo hi. I naute, tate pilna hoih taktak i piakzawh keileh i gamah tualgal a piangpah kei zongin, gamlumna tamin zawnna thang-ah ki-awkawk ding hi. Mi zawngte zawng uh hi. Banghang hiam cihleh amau zawng uh ahih man hi. (The poor are poor because they are poor) cih thang ah ki-awk thei ding hi. Tu’n ahih leh, munnuam gamhoih, pilna siamna a khauhpai mahmahna gamte-ah vatung thei-uh ahih manun lungdamhuai mahmah hi. Ni dangteh amau zonsa sum le pai, amau sinsa pilna siamna, a mau kansa thuthukte tawh i gam zunkik zo dingin i lamen hi.

Tu tadih kiallap ngaihsut huai khat-in, gam le minam’ mailam adingin gamdang atungsa i mipihte’n pilna mah kin belin nei-in, sintheih tawpin hong sin, hong zon masak ding uh thupi ding hi. Tua bek thamlo, sum le pai a va zongte’ hong khak sumte zong inngakte’n zatsiam kul mahmah hi. Sawmah khat sumpi biakinn i tut khitteh, ute’n khua-ul luangin a zonsa uh sumte nu le pate’n a naute’ pilna zonna ah tuh, vawh beh kik leh hong hoihpen ding hi, cih ngaihsun ing. Pasian le pilna tawh Zogam paallun sak ni.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Gamdang ah Sumzonna le Khantohna. Gelh - Pau Sian Lian Description: Rating: 5 Reviewed By: Cinpu Zomi
Scroll to Top