728x90 AdSpace

Hot
Menu
Zon-ol na Donate

Latest News

GAMGI (Boundary). Gelh - Dr. Thuam Khan Thang

GAMGI
(Boundary)
Dr. Thuam Khan Thang (BBC,Tedim)

Leitung ah gam 200 val ki-omta a, Gamgi kinei ciat hi. Kawlgam ah State leh Division te in Gamgi inei ciat hi. I khua ciatah Gamgi inei hi. Mimal in Lo gi inei ciat hi. Gamgi icih ciangin, neihsa khenna, lahna, ahi hi. Eimau gamsung ciat ah tengding, mi gam sungah tensak loding cihna ahi hi.

        Biakna/Upna ahzong Gamgi inei ciat hi. Leitung aom biakna pi namli te inzong Gamgi neiciat uh hi. Upna gamgi, ngeina gamgi, kalsuanzia gamgi inei ciat hi.


A.   Gamlui Gamgi:
Tulaitak  ih Upna gamgi itheih nangin, a tenna lui mun thu itheih masak
ding kisam hi. Pu le Pa tehun, Pasian thu  atheih manun, Pasian mah na lunggulh uh a, Upmawhna tawh bia uh hi. Kiim le paam a om milim biate thu galzak uh a, amau upmawh thute tawh gawmkhawmin bia uh hi. Anungta Pasian om hi cih vaang up uh a, ahizongin ciantheih lo uh hi. Pasian langah dawi omhi cihzong thei uh hi. Pasian agennop uh ciangin “Khuavaak” na ci uh a, Dawi agen nop uh ciangin “Khuazing[1] ci uh hi. A theihcian lohuh Pasian[2] a zonkawmun, dawi le kaute launa tawh bia uh hi.Pu le Pa te’ Upna Gamlui sung thu, tudonga ibuaipih deuh thute enkhawm dih ni.
1.    Kha Upna:
Pu le Pa te in mihing in asithei lo kha nei hi cih um uh hi.  Kha ading
Khual mah mah uh hi. Khate’ tenna “Vantung” leh “Leinuai khua” om hi cih um uh hi[3]. Misite kha pen “Sikha” ci uh a kihta, lau mahmah uh hi. Sikhate hong lungkim lo thei, hong khemthei, hong hehthei hi cih um uh hi.
           Sikhate lungkim nang zong uh a, misi luanghawm limbawl uh hi. Misi it uh a, Sunden[4] ah tu sakin in tanu te in kem uh hi. Misite kha tuan nang ci-in Sakol go uh hi. Lampi ah  kongcingte (Sah Nupi)  athoih nanguh ci-in Khang hamte sasin salung kitawi saka, naupangte Aktui kitawi sak hi. Sikhate nek ding ci-in Si-ansiah kikoih hi. Tudongin Tapidaw hante ah Singlamteh phung ah tuibuuk leh nektheih tuamtuamte kikoih thei lai hi.
2.   Kau Upna:
Mi pawlkhatte Dawi in zangh hi cih um uh a, Kau, Nam, Gau cihte kihta mahmah uh hi. Mihing hong nethei, hong cina sakthei  hi cih um uh hi. Apiang ngei lo, aom ngei lo tangthu kibawltawmte[5] um mahmah uh a, nisimin launa leh kihtakna tawh nungta uh hi. Hih upnate Kha gilote in zangh a, lausak semsem hi.
3.   Upna tuamtuamte:
Mi pawlkhatte Mang (dream) in ukcip leuleu hi. Mang khempeuh mang pha le mangsia in khen uh hi. Mangsia amat uhciangin lungnuam lo uh a, lau uh hi. Tua bek hilo, Zulei lamkan, Ciikpi ham, Vasa ham zakngei loh khat peuh, pianngei ahi lo, apiangsual na khatpeuh amuh uhteh kihta uh hi. Lau uh hi. Tuhun Melmuh Tongsan (Television) sung a Discovery channel sung ganhing lamdangte Pu le Pa te in mu leh, Dawi a sakding tam mahmah hi.
Bum le Ai om hi cih um uh a, kihta in lau uh hi.
Hici bangin Pu le Pate in Launa gamsungah anungta uh ahihna imuthei hi.

A.   Gamthak:
Pu le pate lunggulh, azonzon uh Gamthak, Sangmangte in hong puak
ciangin lungdam takin sangthei pah uh hi. Sangmangte bawlsia, langpan cihte igam sungah om lo hi.  Pasian thu ahilh uhteh sangtheipah napi uh, Gamthak sunga tending, gamlui (Zulim salimte) te nusiat dingpen haksa sa uh hi.   
1.    Gamthak sung Nuntakzia:
Na khempeuh abawl Pasian ahi hi. Pasian pen itna Pasian ahi hi.
Jesu Khris: Pasian in abwlsa mite hon gumkhia dingin Jesu Khris hongsawl hi.
Jesu Khris Hon pa leh Gumpa in a sang khempeuh, Pasian tate suak hi. Mithak, Nuntakna thak, gamthak sungah nuntakna-Upna tawh kipan hi.
Gamthak sung nuntak ziading, Thukham Nam 10 tawh hong hilh
masa a, Topa Jesu hunteh Mualtung thuhilhna (Mate 5,6,7) tawh hong hilh hi. Sawltak Paul in mikim teltheih dingin laikhak bu 13 sungah hong cian gen hi.
          Gamthak sung nuntakna in Itna bulpi tungah kinga ahi hi.
          Pasian geelna bangin Leitung kihei a, Ama deihna bangin Gamthak sung nuntak ding deih hi.
          Dawite pen Jesu Khris in Singlamteh tungah a zawh khitsa ahi hi. Thu umte, Sikha launa, dawikihtakna, thu lamdang piangte hangin lauding patauh ding hi lo-in, Pasian bulphuh nuntakna tawh nisim nuntakding hizaw hi.

B.   Gamgi Khenna:
Pu le Pate in Pasian thu sang uh a, Khuavaak sung nuntakna a kipat uh
ciangin haksatna tampi thuak uh hi. U le nausung kitelkhialhana, Sabawl sazaang tatsatna, sung le pu kiho theih lohna, beh le phung tawh kikhenna, khua le tui pan hawlkhiatna cihte thuak uh hi.  Pasian thusung ah amakaih ding kicing nailo, Upna thu ah kip nai lo uh ahih manin, lungzuan khuangaih athuaklawh tampi om uh hi. La bang a sak uh ciangin, Sakkik (Chorus) pen la mah sa-in sa lanlan uh hi kici hi.
          Hici bang haksatna tetawh Pu le Pate khangto uh a, pawlkhatte, Tapidaw hinapi, Lawkite mahtawh nekhawm dawmkhawmin om uh hi. Tua ahih manin Sangmangte makai-in, Gamgi khenna masa pen July 23, 1926 in, Thuklai khua-ah bawluh hi cih Rev. Kip Thian Pau in ciapteh hi[6]. Tuate in:
1.    Tapidaw te in Zu ne lo ding hi.
2.   Lawki pawite ah kihel lo ding hi.
3.   Hanken/Kawsah/Lamtak zangh lo ding hi.
4.   Nipi Ni Pasian biading a, Na sem lo ding hi.
5.   Aisan/ Khut lamen loding hi.
6.   Tanu Man(Moman) ne lo ding hi.
Dawi biakna tawh kizom peuhmah Tapidaw te in zat loh, kihel loh dingin Sangmang teleh Pasian Nasem masate in hilh uh hi. Gamgi siangtakin na khen sitset uh hi.

C.   Gamkawm Nuntakna:
Leitung gam khangto te in  sumhaute, gam 2 ah tenkhuan pia hi.[7]Tuhun
the Pasian thuzui tampi takte in hih Gamkawm nuntakna sungah nungta-in, Gamgi kician nei nawn lo uh hi. Leitung ah gamgi kituhin galpiang thei zeel a,  mi  tampi pi in sihlawhin, Gamgite kician takin bawlsinsen uh hi. Tua mah bangin Tapidaw Upna Gamgi pen Gamlui gamgi tawh kikhensa hi a, Gam kawmin kiteng thei lo hi. 
Gamkawm tapidaw nuntakna icih te in:
-      Nipi ni-Kikhawmman lo-U le nau tutkhopni bekin kizangh,
-      Hanken/Kawsah/Lamtak te zatna,[8]
-      Thu-um khat le khat Kumpi zum ah kikhiatna,
-      Pawlpi khat le khat kilem lohna,
-      Lawki ngeina sungah nuntakkikna,[9]
-      Beh le phung, U le nau thubek thupisakna,
-      Bum le Ai zatna.

Thuciam Lui hunlai-in Izipt gampan paikhia Itazilah mite, haksatna athuakuh ciang, sa aduh uh ciang, tui a duh uh ciangin Izipt gam phawkden uh a, kileh kik nuam den uh hi. Hici bang mite Pasian in nawngkai sa-in gamsung ah si sak hi. Gamlui (Izipt gam) athei lo, khangnote khan ciangin Canaan gam lutpih bek hi.  Thuciam Thak in hici bang mite Buansung delhkik Vok leh,luak nekik Ui tawh hong genteh hi.[10]
          Khuavak leh khuazing,  Pasian gam leh Dawi gam, cihte kigawm thei lo a kikhen sinsen ahi hi. Gamgi Kalkak[11] kawmin  Jesu nung kizui thei lo hi. Jesu nungzuihna, Tapidaw icih in Thankik  bangin ahunzui, munzui a kikheel ziau ziau na hi lo hi. Gamkawma nungtate, gamthak sung nungta nai lo mite hizaw uh hi.

D.   Gamthak sung Kipuahthak ding Thute:
   Khamtunggam Pasian thu hong tunkhit Kum 100cinpawi ibawl khin a,
Kum 200 sungah manawh tota ihi hi. Khangciamtehna bang hileh Khang 5 nasung tungta ihi hi. Itheih lohkalin, igamgi itelnawn lohna, Gamlui sung itunkikna te pan anuai abangin kipuah kik hunta hi.
1.    Upna lam ah:
Tapidaw Upna bulpi in Jesu Khris Honpa le Gumpa a sanna ahi hi (Efesa
2:8-9). I pu le pa te’n haksatna tampi thuak ngamin nasang uh hi. Tuhun khangte’n  mimal tapidaw suahna mah ineician hiam? Gupngah ikitelcian hiam? cih kitel dot masak ding thu ahi hi. 
Dawi upna thu-ah, Dawite pen Singlamteh tungah Jesu Khris in eite
a dingin a zawhsa ahi hi. Kihtak ding lau ding hi lo a, Jesu muanna sungah I khamuan ding hizaw hi.
          Kau upna thu-in milim biate upna pan hong pai ahi hi. Kau kihta anuntak hun hi lo a, Pasian muanna tawh nuntak ding bek ahi hi.
          Bum le Ai:  Bum le Ai cihte Dawi vanzat hi a, Pasian tate tawh kisai nawnlo hi. Lauding, kihtak ding sangin Pasian muan dingmah hizaw hi.
          Milim biate Upnate: Kaam (uHw7m:)  upna khempeuh, Milim biate Upna ahi hi. Kaam tawh nasepna khempeuh zathuai lo hi. Fund zonna te ah Kaametna (uHprf:) ci lo-in Fund zonna mah hiding ahi hi. Che tawh kizom sumzonnate zatding hi lo hi.
          Upkhialhnate (Supersticious) :Mang upna, Zulei lamkan upna, Cikpi ham up na, vasa ham lamdang upna, apiang ngei lo khat apianteh khiatna neihsakna up te khempeuh, milim biate upna ahi hi. Pasian tate updingin Lai Siangtho kicinghi.
          Thupiang khatpeuh ahang(cause) kankanna in I Pasian upna hong siasak hi. Ahang Kankan napan, dawi upna tuamtuam tawh kizom hi. Ahang kan ding hi lo-in Topa tungah ikingak bit ding ahi hi.
          Ni Upna: Ni Upna cih ciangin, Nipi kalsung nite ahoihdeuh ahoihlo deuh omsakna ahi hi. Gentehna in Kawlte Upna ahi Sani ni nausuakte Gilo deuh hi cihte pawl ahi hi. Lai Siangtho gen hilo ahih manin milim biakna tawh kizom hi a, upding zatding hilo, gen ding zong hi lo hi. Pasian tate adingin Ni khempeuh siangtho hi.   
          Inn gawngheek, Innpeem, inn khin hoih lo cih Upna: Hih upna tezong Dawi biakna tawh kizom a piangte hi a, Tapidaw huangsung Upna hilo hi.
2.   Ngeina Lam:
Misi thu: Pasian tate adingin Sihna in, ihmutna, anuamzawgam lutna ahih
manin  vai thupi lua hinawn lo hi. Dahhuai lua, buai huailua hi nawn lo ahih manin, Misi neihna pen  saklam sanggamte bangin inn ah sawt ompih loh theih theih hoih hi. Misi puak kawikawi zong zang nawn keileng hoih ding hi. 
Sih sagawh: Misi neih ciangin, tuhun teh gamdang omte sumtha
hong hatin Sa gawh itamzat ciat hi. Sunsiah bawlpen ngeina hoihkhat hi napi, Samal a kihawm ciangin Lawiki vai hi leuleu hi. Samal hawmna in Dawibiakna tawh kizom ahih manin hawm nawn keileng Pasian thutawh kituak bek hi.
          Nuntak laiteng ki-it siamin, sihciangin anungta laiteng  nuntakna buaihuai sak lothei thei hoih hi. Misi zankhat val koih nawn keileng hoih pen ding hi.
          Nopna-Dahna hunte: Nopna dahna hunte ah, Lai Siangtho hilhna zui-in, Pasian thutawh kituak thei penpen izat ding hoih hi.
Mo kiten ciangin, khang lui ngeina leh I minam ngeina tuamtuamte zangh lo-in,  Tapidaw ngeina mahtawh kitensakna hoih hi. A hizongin a siangtho lopi letthat deihpen thupha khak tan hi. Siangtho na kisamte inn thunget hoihtak a bawlding kisam hi.
Kisiatbatna, kitutpihna, lungdamkohna, vaitun muakna hunte ah, Pasian thutawh kituak thei penpen izangh ding hi. Innsung ate leh innliim ate dawn kibang lo cihbang omsak lo ding hihang.
           Nipi Ni zatzia: Nipi Nipen  ni 7 lakah nikhat Pasian biakni ahih manin, Pasian biakni bekmaha zatding ahi hi. Nipi ni Sihvui, NGO Meeting, Party meeting, Veeng meeting, Khualzin cihte-in zat lohding ahi hi.
          Nek le dawn thu: Lenggahzu leh adang  a ki-um, kikham theite peuhmah zat loh ding ahi hi. Annek tuidawnte khempeuh ah, siangthona hanciamin, pumpi cidamna kepsiam ding hun ahi hi.
          Khanglui ngeina ahoihteng kepcing ding hi a, dawibiakna tawh kizomte, nusiat sinsen ding ahi hi.
3.   Gamtat Luheek:
Nisim gamtat kampaunate ah, Pasian thutawh kituak hi, hoih  muh
siamna (optimism) neih ding kisin hun mahmah tahi. Innkuan sung, pawlpi sung, veeng le paamsung, khuasung tawh kizopna ah Hoihmuh siamna, thapiaksiam mite ahih nangin kisin hunta hi.
          Kipahtawina: Khat le khat kipahtawi siamding hun ahi hi. Innkuansung, pawlpisung, veengsung cihte khempeuh, thaneemna kimuhsak lo-in kivakna, siamna sun ineihtawh kipahtawi siam ding kisin ding hun hita hi.
Thuneih laneih ciangin: Thuneih laneihna  aom ciangin, pawlpi ah, pawlpi kipawlna adawldawl zui-in kineih dingbek ahi hi. Kumpi zum peuhmah ah kikhia lo ding hi (1Kor.6:1-11).
          Kim le Paam kepsiamna: Pasian bawlsa Singkung Lopate it siamin, ganno te zong itsiam ding hi. 
          Biakna Laihawmte: Biakna laihawmte ah, Pasian thutawh kituak lo, Gamlui gamgi huamsung thute suahsak ding hoih lo a, Pasian nasemte in zong Gamlui thute gengen ding hinawn lo hi. Thu lamdang kici khempeuh gen ding hi lo a, Pasian thutawh kituak tengbek gending, gelhding hibek hi.
 
Thukhupna
Adolf Hitler hunsung a Germany gam a Pasian Nasem minthang, a Upna
hang a thahna athuak Rev. Dietrich Bonhoefer in,
-“Jesu nungzuihna pen abaih hi lo hi. Haksatna tampi thuakkul hi, banghang hiam cih leh Jesu in anuntakna pia-in hong gupkhiatna hang ahi hi”[12] ci hi.
-“Hehpihna namnih om a, a man-ol leh amanpha hehpihna ahi hi. Jesu hehpihna in manpha mahmah hi[13] ci hi.  
Gam lui leh gamthak kalkaak kawmin ut bang tak a nuntaktheih hi lo hi. Gamthak mi ihihleh gamthak ngeina bangin gamthak gamgi huamsung ah nuntak ding ahi hi. Tapidaw nasuahzawh kum bangzah? Tui na kiphum zawh kum bang zah, na pianthak zawh kum bangzah? Na nisim nuntakna in Gamthak mi na hih leh na hih loh kilanghsak hi. Kum 100 cinkhit galkah nuntakna ah, kipuah pha-in, Pasian tate, Pasian tate bangin nungta ciat ni. Ih gamgi pua ah iten theih loh bang, ikhua gamgi pua ah lo ikhawh theih lohbang, I pawlpi gamgi pua ah I omtheih loh bangin, I Upna gamgi pua ah ding lo-in, gamkawm Upna nei lo-in, Jesu Upna hangah, gamthak ateng mithak, lungsim thak, nuntakzia thak
tawh nungtakna, iupna gamgi sungah anungta-in kalthak suanciat ni.

@@@@@@@@@@@@@@@@@

References:
1.    D. Kip Thian Pau: Trials and Triumph of the Chin Pioneers; 1999
2.   Sing Khua Khai : The Theological Concept of Zo in Chin Tradition and Culture; 1984
3.   JM. Ngul Khan Pau: When The World of the Zomi Changed; 1995  
         

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GAMGI (Boundary). Gelh - Dr. Thuam Khan Thang Description: Rating: 5 Reviewed By: Cinpu Zomi
Scroll to Top