728x90 AdSpace

Hot
Menu
Zon-ol na Donate

Latest News

GOOD FRIDAY. By - Rev. Khoi Lam Thang

GOOD FRIDAY
March 25, 2016
Tedim Baptist Church – Yangon
By Rev Khoi Lam Thang

Leitung mite tankhia dingin Jesuh singlamteh tungah hong si hi cih pentangthu hi a, Jesuh kei tangin hong si hi cih penGUPNA ahi hi. A kiphawk kikkikte a thupi hi a, a nungta thute i nuntakna ah thaksuak kikkik hi. 2016 adingin tuni Good Friday (Jesuh hong sih ni) pen a ngeina bang lel hi lo, kei ading taktak hi na ci thei diam? Pasian hong itna a tul ngei loh mah bangin hong sihna zong kei adingin thak suak kikkik hi, na ci thei diam?
Jesuh in Dolorosa (Latin kam hi a, “genthuakna” cihna hi.) lampi a tawt khit ciang singlamteh tung pan a tangko khiat kammal 7 te phawkkik-in Jesuh tawh a sikhawm dingin hong zawn ing.

KAMMAL KHATNA
Ahi zongin Jesuh in, “Pa aw, amaute in bang hih ihi hiam cih thei lo uh ahih manin a mawhna uh na maisak in,” a ci hi. Luke 23:34
Pasian’ maisak zawh loh zah dingin a lian lua mawhna cih bang om lo hi. Mawhna khempeuh a maisak dingin Jesuh in thungen khin hi. Ahih hangin a maisak theih loh mawhna om hi. Tua in a kisikkik lo mawhna ahi hi. Jew mite in Jesuh a thah ding uh ciangin “Hih mipa’ sihna hangin gimthuakna, kote a kipanin ka suan ka khakte dongun ka thuak ding uh hi,” (Mat 27:25) ci-in amau le amau kisamsiat ngam liang uh hi. “Bang i hih hiam” cih thei lopi mah Jesuh a mawhmatna uh zong Jesuh thungetsakna sungah kihel hi. Tua hangin Jesuh thungetsakna tangtung a, Penticost ni-in Jew mi mi 3000 kikhel hi.
Sanggam, tu ni-in Pasian tawh hong kikhensak na mawhna bangzahin a liat hangin Jesuh kiang na zuat nak leh hong maisaksa ahi hi. Maisak nail oh mawhna om lo hi. Kisikkik na tawh a kila nai lo mawhna bek om hi. Jesuh in na mawhna hong maisak khin hi. Ciamteh nawn lo hi. “Phawk in nei nawn peuhmah kei ning, zuau lo Pasian in ci, note mawhna khialhna tangin ka ta’ sisan ka bua” ci in la in sa hi hang. Jesuh maisakna thupha a thakin na lak nak leh Gupkhiat lungdamna na ngah ding hi. Jesuh in na mawhna hong maisak khinta hi.
KAMMAL NIHNA
Jesuh in ama kiangah, “A mantakin ke’n kong cihin-ah: Tuni-in Paradais-ah kei tawh na omkhawm ding hi,” a ci hi. Luk 23:43
Internet manlang mahmah hi. Lei mong khat le mong khat kithuza ziauziau thei hi hang. Tua Internet sangin Pasian hong itna le hong kamciam thu manlang zaw hi. Mawh neipa a kisikkik phetin mawhmaina ban-ah thakhat thu-in vangam tung pah hi. Jesuh tawh a kikhai khawm mi that pa khat in “Ei tegel pen i gamtatna tawh kizui-in thu hong kikhen a, ahi zongin amah in khialhna bangmah nei lo hi,” a cih khit ciangin Jesuh kiangah, “Jesuh aw, Kumpi-in nong pai ciangin kei zong hong phawk in,” a ci hi. Tua khit phet in Jesuh in “A mantakin ke’n kong cihin-ah: Tuni-in Paradais-ah kei tawh na omkhawm ding hi,” ci pah lian hi.
Jesuh na san leh vangam nang a hi pah hi. Sihna pan in galkah in tawntung nuntakna a tungkhin taktak na hi ta hi. Hih thuthuk Jesuh in Singlamteh tung pan tangko khia a, a kianga mithat pa in ngah pah hi. Tua Paradais mun pen Pasian gam mah hi pah a, Lai Siangtho mun dang a, ‘Abraham Ang’ tawh zong a gen nopna mun a kibang ahi hi.
KAMMAL THUMNA
Jesuh in ama nu le a it a nungzui pa a dingkhawm a muh ciangin a nu kiangah, “Nu aw, tua lai-ah na tapa om hi,” a ci hi. Tua ciangin a nungzui pa kiangah, “Na nu tua lai-ah om hi,” a ci leuleu hi. John 19:26-27
La phuak pa in “Lunggimna huan ah zong zui ning, lam tawntungah amah zuizui ning” na ci hi. Jesuh gimthuakna lampi ah a it a nungzui pa le a nu in zui a, singlamteh phung dong nusia lo uh hi. Nungzui taktakte pen lunggim haksak hun nangawn ah khahsuah loin lamtawp dong a zuite ahi hi. Tua bang nungzuite Jesuh in awlmawh mahmah hi. A nu le a nungzui pa sam khawm in, a ki-en a kikem dingin vaikhak hi. Nungzui hihna in innkuan don lo ngei lo hi. Jesuh nung a zui taktaakte adingin khat kia zawttawm cih bang om ngei lo hi.
Tulai thupiang IS-te’ hangin Syria gam Khristiante in nakpi takin bawlsiatna thuak uh hi. Pawlkhatte in a gam uh nusia in gam dangah gambel in taikhia uh hi. Ahih hangin Khristian honkhat in “Ei tai khia leeng Khristian om nawn lo ding hi. Haksatna a om leh om hen, Syria gam Gupna khaici dingin i gam nusia kei ni” ci ngam uh hi.
KAMMAL LINA
Nitak nai thum hun pawl laitakin Jesuh nakpitakin kiko a, “Ka Pasian, ka Pasian, bang hangin kei hong nusia na hi hiam?” a cihna ahi, “Eloi, Eloi, lama sabakthani,” a ci hi. Mat 27:46
Jesuh Singlamteh tungah a kikhai khit, sun nai sawm le nih hun a kipan nitak nai thum dong, nai thum sung, tua gam sung khempeuh ah khim zing hi. Bang hang hiam? Leitung mi khempeuh mawhna ama tungah kisuan ahih manin, ni in zong en ngam loin buksan hi. Tua manin khimzing hi. Leitung in zong giksa ahih manin zin ling hi. Jesuh in hih lampi a haksat ding thei khol hi. “Pa aw, hih hai tawh hong kipelhsak in, ahih hangin nang deihna bang hi zaw hen” ci in thungen khin hi. Kipelh thei lo hi. Haksa lua mahmah ahih manin Pa Pasian in a taisan khin bangin ngaihsun hi. Haksa a sak luatna hanga kikona ahi hi.
Sanggam aw, hihte khempeuh mawh nei lo Jesuh’ thuak ding hi lo a, nang le kei thuak ding hi napi, mawhna a ciamkha kilkel lo Jesuh in a thuak manin nang le kei a suakta thei ihi hi. Mawhna thaman in sihna hi napi, sihna tawh kipelh a i nuntak tawntung theihna ahi hi. Nang le kei thuak ding a thuak ahi hi. Mawhna hangin Pasian tawh a kikhen leitung mite dinmun ah Jesuh hong kikham ahih manin tua leitung mawhna in Pasian tawh a kikhensak ahi hi.
KAMMAL NGANA
Tua hun ciangin Jesuh in na khempeuh kicingta hi, ci-in thei ahihmanin Lai Siangtho sungah a kigelh thu a tun theih nadingin, “Ka dangtak hi,” a ci hi. John 19:28
Jesuh gimthuakna singlamteh lampi pen Gethsemani huan pan kipan hi. Zan thapai lunggimna thuak hi. Lum kha lo hi. Ihmu kha lo hi. Mut nang hi. Mawh nei lopi mawhsakna thuak hi. Thu kikhen hi. Sun thapai lunggim hi. Kona thuak hi. Cilphihna thuak hi. Khua-ul suak hi. Bawlsiatna thuak hi. Kisat kivel hi. Sisan naisan luang hi. A pumpi khempeuh liamma tawh kidim hi. A pumpi sunga om si le tui teng kangta a, tui duh mahmah hi. Dangtak mahmah hi. Tua hun ciangin Jesuh in a thuak dingteng kicing khin ta, cih thei ahih manin Lai Siangtho thu (Late 69:21) a cinna dingin “Ka dangtak hi” ci-in kiko hi. Jesuh dangtakna tui tawh cim lo a, Jesuh tuiduhna lenggah zu hau tawh dam kik lo hi.

KAMMAL GUKNA
Johan 19:30  Jesuh in tua leenggahzu-hau ciamin, “Man khinta hi,” a cih khit ciangin a lu puksukin a it a hi.
Jesuh’ dangtakna pen Lai Siangtho a tangtunna hi napi, galkapte in theithei lo uh hi. Tua ahih manin beel sunga om leenggahzu-hau sungah tuihupna diahin puknah hiang dawnah a koih khit uh ciangin Jesuh’ kamah tahto uh hi. Jesuh in tua lenggah zuhau dawnin a dangtak a nuamtuam dingin ngaihsun uh hi. Pasian gelsa thuthuk telpha lo uh hi. Jesuh in tua tui ciam-in “Man khinta hi” ci-in zawhna thu tangko khia hi.
Man khinta hi, cih kammal (tetelestai) in, “Leiba kiloh siang khin ta hi. Sep ding teng kikhin khinta hi. A kisam om nawn lo hi. Vai siangta hi. A zozo hi” cihna ahi hi. Mihingte thuak ding mawhna thaman khempeuh Jesuh in kicing takin loh khinta cihna ahi hi. Khat vei biakpiakna tawh a tawntunga kimang ding tatna nasep ki zo siang cihna ahi hi.
Jesuh in zawhsiang khitna thu tangko khin ta hi. Nang na suakta nai hiam?
KAMMAL SAGIHNA
Luk 23:46 Tua ciangin nakpitakin Jesuh kiko a, “Pa aw, nangma khut sungah keimah kong ki-ap hi,” a cih khit ciangin a si ta hi.
Jesuh in Pasian sawl nasep pi a sep ding teng zo siang khinta hi. Mawh nei lo Pasian tuuno mawhnei pen pa bangin singtungah a kikhai petpet ciangin ni mial-in leitung khempeuhah khimzing hi. Biakinn sung dalna puan phelnih a suak hi. Jesuh in zawhna thu tangko khin ta hi. Tua ahih manin, Jesuh in “Pa aw, nangma khut sungah keimah kong ki-ap hi,” ci-in tangko thuap hi. Pa aw, sepding nong sawl thute zo siang taktak ta ing ci a, a matutna a genkik ahi hi. Amah le amah a ki-pulakkik ahi hi.
“The Passion of Christ” movie minthang a vaihawm pa Mel Gibson tungah thu kidong a, “Tua ahih leh nang muhna ah Jesuh singlamteh tungah a that taktak Jew mi makaite hiam, Rom galkapte hia? Kua hi zaw hiam?” a cih uh leh Mel Gibson in “Jesuh a that keima mawhna ahi hi” ci in na dawng kik hi. Nang hangin Jesuh si khin ahih leh nang ee Jesuh tungah bang na sem thei ding hiam? 2016 Good Friday nang adingin bang thuthak na sang kha hiam?
Jesuh in Leitung mite tankhia dingin Singlamteh tungah hong si hi hi lel zaw ding na hiam, Jesuh kei tang dingin hong si taktak hi, na ci zaw diam?

A SINGLAMTEH KEN VELVEL LENG
Key F                                (When I Survey the wondrous Cross)
  1. Vanglian Kumpipa hong sihna, a sing lamteh ken velvel leng  
Kei hauhna kei kiphatsakna, ke'n tu'n bangmah in sim nawn keng.
2.      Khrih ka Pasian sihna simloh, kisialhpih ding bangmah om kei,
Ka deihbel teng khat zong siitlo, a ma sikhekna in ka nei.
3.      En ven a lu a khut a khe, dahna itna hong luang suk khawm,
Na mu ngei maw ling lukhu le, itna dahna gawm kilawm khawm.
  1. Leitung khempeuh pia thei hi leng, tamlua ka ci ngei kei ding hi,
A hong itna ke'n ngaihsun leng, ka pum ka tak ka pia nuam hi.

*************************************************************

Sia Khoi Lam Thang in Zomi eLibrary ading in hong khak ahi hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GOOD FRIDAY. By - Rev. Khoi Lam Thang Description: Rating: 5 Reviewed By: Cinpu Zomi
Scroll to Top