728x90 AdSpace

Hot
Menu
Zon-ol na Donate

Latest News

LAMDAWT. Gelh - Rev. Dr. Thuam

LAMDAWT
Zogam ah Pasian thu hong puak masa
Mikangte Sangmang khat in, "Zomite pen misi
le lamdawt zuak le'ng hong lei ding hi," na ci ngei hi.

Gelh - Rev. Dr. Thuam

          Tua Sangmangpa cih mah bangin  ei mite in misi pen  i it mahmah a, ni tampi
pi kikoihin i tutpihpih a, i lampihpih hi. Lampi zong lamphei lamnuam om ta-leh a nai theithei utin to taleh i zui teitei hi.  Tua lamdawt i zuih nopna lungsim tawh ki-zui-in na khempeuh a baih theithei, a ol theithei i ut hi. Ahi zongin Pasian thu ah lam-dawt cih bang om loin Pasian' kammal Lai Siangtho banga nuntak ding ahi hi. 

1.      Upna lamdawt
Pasian' thu upna sungah thu um mi khat koici khantoh ding cih Lai Siangtho
sungah kigelh hi. Sawltak Pawlu in Pasian thu sung nuntakzia pen naungekte'n nawi-zu a nekna dinmun panin anham ne a khantohzia tawh na genteh hi (1Kor.3:2, Hb. 5:12). Mi tampi in Pasian deihna tawh kituakin kalsuan masa loin lamdawt i zong hi.

Piangthak pan bek mi teng hawmthawh pahin Pasian' thu a theipen i kisa pah hi. Thu ngen lopi'n Pasian' zat mi minthang khawng i ut a, Lai Siangtho sim ngei lo-pi'n Kha lam thuthukte khawng i kitheisak nuam pian hi. Kiniamkhiat lopi'n Khalam picinna i deih pah a, sianthona nei lopi'n Kha Siangtho letsongte i deih pah hi. Ki-ap na kician om lopi'n dawite i hawlkhia ziahziah nuam pah a, Pasian' adingin nungta lo, kipiakhia lopi'n Pasian' thuphate deihin i kikhami sak nuam hi.

            Na khempeuh pen a masa ding a nunung ding om tawntung hi. Naungekte'n nawizu bek ne masa phot a, hong khanna tawh kizui-in anham ne thei-in hong picin-tohtoh mah bangin ni simin Pasian' thu tawh nungta-in Lai Siangtho simin thu ngenin ki-apin Pasian' kammal tawh nungta peuh le'ng ngaklah luat kul loin Pasian' thuphate a kingah lua ding ahi hi. Pasian' thu sungah "lamdawt" cih om ngei lo hi.


2.      Hauhna lamdawt
Leitung ah tawmvei i khualzin sungin nektawm ding i zong tek a, Pasian in A
tate damna hauhna thuphate hong pia hi (3Jn.2). Pasian thu tawh i khantohna tawh kizui-in ei mi sungah mipil misiam mihau milian tampi i om ta a, Topa min i phat hi.

            Sum le pai zonna, nuntak zonnate ah pawlkhat in lamdawt tawn uh hi. Gim kul lo a, hauh theihna, manlang taka hauh theihnate kizong ta mai hi. Hih banga hauh pak-theihnate pen khangluite'n "Ngalhawk khan le tuita khan" na ci uh hi. A ngaih-suthuai khat, a nungta Pasian a bia lote pawlkhat hau mahmahin a tu khang a ta khang dong kikhom a, a nungta Pasian a biate'n khang khat nangawn a kikhom loh theih pen ahang khat om ding hi.

Hih a hoih lo lamdawt i cihte pen, kumpi thukhunte palsatna, mihing' nuntak-na suksiatna, ei meet nop mana mi khatpeuh lehhekna… cihte ahi hi. Thuman lopi tawh hauhna in innkuan sung susia hi (Pau.15:27). Pasian in Itazila mite tungah lo na khawh uh hangin kham zo lo, na sum koihna thungipte a taw vang hi (Hag.1:6,NIV) ci hi. Lamdawt tawh sum zonna in thungip tawvang sunga sum kep tawh kibang hi. Sum tampipi i ngah hangin i thungip taw vang leh bang phattuamna om ding hiam?

Pawlkhatte'n bang bangin sum zong taleng sehsuah biakinn ah pia peuh le'ng Pasian in thupha hong pia hi, ci uh hi. Topa Zeisu in mihaute' sumpi khiat zuahzuah-te sangin meigongnu'n dangkasan painih a khiat pen tam sazaw hi (Lk.21:2). Pasian in sumpi mal tam sangin ngahna siangtho, ngahna namtuite bek thupi sa hi. Pasian pen thuman bek a deih Pasian hi a, (Jn.14:6) ei sumpi khiat khawng tawh maiet pak-pak theih hi lo hi. Tua ahih manin sum le pai zonna ah lamdawt tawn loin sum siang-tho sum namtuite mah i zon ding pen Pasian deihna ahi hi.

3.      Pilna lamdawt
A hunhunin pilna siamna khangtoto a, tuhun bang pen Computer hun kici hi.
Computer pilna bekbek tawh na kisem ta ahih manin Computer pilna pen theih loh hong phamawh ta hi. Pilna thupi semsem a, pilna nei lote'n pilna neite' na sepsak hi.

            Pilna zonna ah bang pilnate kum bangzah kisin ding, bang teng kisin ding cih a kikhen dimdiam hi a, sum le pai tampi bei-in hun tampi kipia a, thaman tampi kipia  hi. Tua bek hi loin laivuanna a zawh ciang bekin a gualzo hi pan hi. Hoih takin lai a simte in laivuan pen haksa sa lo uh hi.

            Pawlkhatte'n baihlam taka degree ngah ding bek sawmin nei a, a kiciangtan bangin sin sawm lo uh hi. Lamdawt tawh pilna zong ahih manin laivuan ciangin lai etteh uh hi. Lai etteh tawh lai a vuan zawh hangin pilna ngah lo hi.

            Tan sawm tungsiah pilna sinnate ah zong degree khat ngah nadingin laisin ding le a hunte kiciangtan dimdiam hi a, a sinsa teng a zawh ciangin degree kipia hi. Degree neih manin pilna kinei hi loin a neih pilnate ciaptehna-in degree a kipia hizaw hi. A khangto gamte ah degree sangpipi a nei tamlua ahih manin nasep a kisap ciang-in thudotna ah bang degree nei, cih kidong loin bang teng sem thei, bang nasepte kiva cihte kidong zaw uh hi.

            USA, Chicago-Deerfield khuapi a Trinity Int'l University a Ph.D te' sang ah ka hawh lai-in zum maia siate' min kisuang sungah a degree uh a kigelh khat zong ka mu kei hi. Mipil taktakte'n pilna bek mah thupisak uh hi veh e, cih ka mukhia hi.

Pilna sinna ah zong lamdawt om lo hi. Mailam ah pilna mah hong thupi sem-sem ding a, degree nei le nei lo cihte sangin pilna neite le a nei lote hong kilamdang semsem ding hi.

Thukhupna:
            Lamdawt i thupisaknate beisak hun ta hi. Pasian thu sungah lamdawt cih om lo hi. Lai Siangtho kammal bangin nungta peuh le'ng i nget i ngaihsutna sangin a ki-cingzaw hong pia nuam Pasian ahi hi. Sum le pai zonna ah zong lamdawt tawn nawn kei ni. Sum siangtho sum namtuite zong ta ni. Haupak, zawngpah cih pen Pasian' zia hi lo a, damdamin hau toto, kiampak nawn lo cih pen Pasian' zia ahi hi. Pilna zonna ah zong lamdawt a tawnte'n laipi (degree) ngahthei a, ahi zongin pilna taktak ngah lo hi. Tuita khan loin thusau khualin nampi lungsim nei ni. Lamdawt tawnte gim pipi-in tung a, lamphei tawnte tawldam takin tung hi. 

Source : Zangkong Awging April 2005.


Tedim leh Tonzang kikal.
Photo credit : everZomi

Photo Credit : Laibusaal


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: LAMDAWT. Gelh - Rev. Dr. Thuam Description: Rating: 5 Reviewed By: Cinpu Zomi
Scroll to Top