728x90 AdSpace

Hot
Menu
Zon-ol na Donate

Latest News

MOM LAI LUNGZUAN. Gelh - Pu Awn Za Pau

   A nuai a thuluii (Mom Lai Lungzuan) tawh kisai tawm khat kong pu-laak phot masa nuam hi. Zangkong University leh Colleges/Institutes sangnaupangte’ vaihawmna tawh kisuak sak “Zomi Zingsol Magazine” (1968?) sung a hel ding a 1967 kum a ka gelh ahihi. A hi zong in laimai kiciangtanna huhau in kisuaksak zo lo hi. 1967 kum lai ih Zomite lawm ngaih lawm hel dan, tua hun lai ih khua lam dawi biakna sung a omzia ngaihsutna zia leh ngeinate theih kawm nang’ leh tonh zu-nun sa-nun sung nungak tangvalte kizop dan leh a lawpdan uh, mitkha tawh muhtheih leh ngaihsut tawm theihna ding deihna tawh kong suaksak hi.


MOM LAI  LUNGZUAN
(Khen Khatna)
      Amun: Saizang Khuapi, Ani Akha Ahun: Kum tulkhat zakua sawmguk kum (1960) Phalbi nitak nitum kuan, December kha ni 22 ni, nitak nai 4:30PM hun, ni taang san sim kike hun laitak ahihi. Ni taang lai cih hang in mual minthang mual zatamte bawl in, mun ci teng tanh khin gai zo nawn lo aa, luikuam gamkuam citeng liap dildial hi. Khua sung aa teng taangpi taangtate in, lokhawh singtuk bekbek mah tawh kivaak uh ahih man in, nidang hi leh hih bang hun in sim lo zo lo pan lokuan vaii kiciah san leltak ding hi.

   A hih hang in tua ni in piiteek puteekte leh mi zawngkhal mi dam lo lupmun ngakte sim loh, nungak tangval nupi papi numei naupang a neu a lian a puan neih uh a hoih theithei silh in, puanduum puan-gial puanlaizeem/puanlaisan cih bang a puanzaa thak leklak vive ngentang tek uh tawh, Pa Lian Khan Khupte inn lam zuan in, amun amun ah khualu khawtaw pan hongpai lamlam uh hi. Kong zing citeng kawi et kawikawi leng, a tai tawh a khawl tawh a pai tawh, khatte inn pan a veeng a veeng a kizawn ngeiingaii tawh, tua kawm kal ah nungak lokuan ciah hak kha thahte bang, tan ngo haahaa aa suangphah peek aa kisil buatbuat tawh bang tawh... tua hun laitak khual pan athu thei naii lo khat hong pai zenzen hi leh pawh, "Galtai ding hi le uh lah kituaci zeem zawzen liang kei ve un cin, Maang dawn ding hi leh uh lah tua bang zahta in nupi papi nau paw kawm nau tawi kawm liang in pai buang kei leh kilawm ven," ci teltel ding uhhi.

     A puanduum, a puan-gial, a puan laizeemte mel tawh kilawm khawm sawnsawn ding in, gamlak aa po neisokte leh khuasung aa phuitong paak zah phialphial a a etlawm meitei kungte’ zong a paak san laitak hi aa, ni tan' lai aci bang keek in ih  khuadakna ih khuakhattna mun san peuh ah, hong kilangh kawikawi pha diak se uhhi. Khuasung khua-nawl a po suangkuah kungte paang kungte zong, a sawt lo aa paakpalh ding in nguum ngiingeii in om san leltak uh aa, va ci peuh in tuanna'n nuamtuam khin hi.

   Huan sung ah a tehte dum pian buang eng pian buang khat in, benang gui leh bekang gui bawk litliatte lo-ngal, ankung dang om nawn lo hi. Thangmual hong nawk khin hi'n teh cia upmawh huai Phalbi huih in tua begui tehte a ling sak seuhseuh zo khop ding bektak in, zawt nun hi. A hih hang in vot hi. Hih bang aa, a lungzuangte lungzuan cikcik theih hun, a dahte dah theih cikcik hun, a lungdam sate lungnop cikcik theih hun laitak aa, a khua zang uh aa, phulum phul bang liang a, a pu-laam khengkhanghna uh pen, Pa Lian Khan Khupte tong uh hi ven sial gawh en ding aa pai uh ahihi.

     Tu in sial kigo ding hong hi petpet ta aa, Sialkong panin Tonh "misam" tangvalte nih in lau sim pian kawmkawmin mui ciaituai in a sial hong tuun leh tuun kha vanglak uhhi. A sial in a hih leh a si vat ding a kisa liang kei zong in, mihonpite a muhteh a lungmang mahmah ahi tam.. a lu hong pei belbel bek sam.... Hehpih huaisak tawh kisai lo aa ih pupa ngeina khat hong suak ahih man in, "misam" tangval nihte'n kai aa, a khau uh tonh song gil tung ah khat vei hong vial in hong kimawlpih hong ki-ommaihpih ta uhhi.

   A mei kuai ding in papi hang khat hong kiseh aa, gim baih lua inteh ci'n a kawng sat ding bang ki phallo phot zawzen uh hi. "Hang ta lai ei; hang ta lai ei;" cia a meikuaipa a ot dakdak tawh, a sial gote khawng siam pha kei in hang pha kei leh a huansak aa sial gawh en mi honpite'n, "Mapa’ a sa pya khat man bek pia vo, "misam" tangval di'n kilawm nai kei ei!," a ci tawh kiko gawp dikdek ek uh hi ven, hih bang aa numei no naupang note leh nupi papi kamtam thei pawl a ot toktok geuh uh a, akigamlum mahmah ziazua hang in, tangval pawl ngaknu pawl khatte leuleu ciangin, Gentehna'n; Tg Thang Khial Langh (Langno) bang in sialgawh et ding peuhmah kin kha man peuhmah lo in, a ton tuitawi ngaknu, Ciang Neh Man (Manno) a na et niloh malam mah bang in, tangval dangte zong sialgawh a etnop uh lian lo zaw in, tangvalte'n nungakte - nungakte'n tangvalte a etnop man vive hi zaw uhhi. (Misam tangval – Tonh zo dingin a khual gamla a meeltheihte a sam ding a kisehte a cihna hi. Tuitawi ngaknu – Tonh hun sung a kisam tui a tawi ding a kiseh nungakte a cihna hi.)

     A tung aa Langno ka cih pen tangval momno lai mahmah khat kum (17) khawng a pha pan ding khat hi aa, nungak lah vang ngaih ngam thei pian khin napi'n, a ngaihte cih thadah ngaknu khat peuhpeuh tawh kamsiam a kipaih ding khawng na leng a hang nai lo, a lungsim gim hun bektak laitak ahihi. Ama meel peen a meelhoih a migit mai a san ngo pian, a duang kikhai dingdiang khat, pau uunh sim buahbuah khat hi. Manglai tan 6 hong zawh khitteh nungak lam mah hong ukpian pian khit tawh, khua lam vive hong lungzuan lawh ta hi. A nu a pate mahmah inh zong sangkah zop toh ding na hanthawn tangtang lo zaw uh aa, a lokuanpih dingin iplah sim giugiau zaw ahih manin, - tu'n Tedim ah Manglai tan 7 zom suak nawn lo in a khaw sung aa lokho aa om ahihi.

   Manno leuleu a maa sang in a mom zaw ding mitmul del sim teutau, a mai a beem law lo a zawl law lo, duang kikhai ngingngeng khat - a mittang ciim sitset tawh hong et khak bang teh hong ngai peuh sak dekdek pahpah khat hi aa, numei cih ciang in Langno sang nau zaw a hih hang’ amah'n tangval lengna a na zuih zawh kumkhat bang na sawt zota ahih man in, ngaknut tangval thu a na thei khin mahmah, khawsung bang ah a meel hoihna bek hi lo in, a thusiam leh a lasiam man mah aa minthang khat ahihi. A hiang tuni ciang dong kua mah tawh genbaang nai lo tangvalte iplah bektak laitak ahihi.
     Langno in Manno a theihna bel, a lo kuanna uah a lo uh kigalsai hi ven, tua pan a theih a ngaihsut sim giugiau tawntung khat ahihi. Manno in ahih leh tu laitak dong  mah Langno in a vangngaih lam thei nai lo ding hi. Langno in a na etet laitak bangin, ama'n zong sialgawh a na et kei leh, tangval dang khat peuhpeuh na en kha zaw mai ding aa, Langno in tu aa bang aa, amah a vangngaih a hih lam tak ngaihsut in zong nei nai lo kha meek ding hi. Langno bel den aa gen bangmah aa zawlleng ding aa kithawi pan, a ngaihna thu a gen ngam nai lo, Manno ton tuitawi ding aa, akicial lam a theih teh - hun hoih tua bang om thei khong, ci a sial gawh et ding sa'ng Manno et ding a na kinzaw gige khat na hi  hi.
     Langno in Manno a etet a khattkhatt nop hang in tu'n a sial gawh uh zong gim mahmah ta aa, kitom zo nawn lo ahih man in, mi pawl khat a ciah nainai si uh leh khua lah hong mial pian si tawh, naupangte keel gawh zong ngak vet nawn lo in, khawl nuam lai pipi a inn lam ah Manno bekbek mah a lungsim sung ah ngaihsun kawmkawm in, lam banna lah nei lo in ciahsuak pah vingveng hi. A inn uh a tunteh pauna hamna lah nei mel lo in, a inn meeng uh aa, a lupna ah a khut a tal tung ah koih kawmsa in a thallup pah ziuziau hi. (etet khattkhatt > enen niloh, mit phia lo liang a enen, vilvil niloh)

(Khen Nihna)
     A zing ciang in Langno nute pate lah ton zo ding in pai uh aa, a lokuan khawmpih dang ding om lo ahih man in, Langno inn mah ah om zaw lel hi. Zingsang lam teng a lawmte kiang ah va vak tei hi ven, hong ciah kik teh innmeng aa, alupna mah kidenna pah aa, ihmu lah ihmu thei ngap lo, a thawhkhiat ding teh a sep taktak ding lah omsa vat lo in, a cim man in za peuh tep zel aa, a khu a bawk a bawk aa zaam to liatliat peuh ngau zelzal sa in en niloh hi. Tua bek tawh lungkim zolo in:-

    (a). Mom lai lungzuan lungzuan meel thei, lungzuan sam tui dawn khial ka hiam aw.
    (b). Zuan samtui lah ka dawn ngei  lo, lia paal sen ngaihno aw zuan lawh’ng  e.

    (a). Ka om muan in gualngaih min thei bang ka lawh ciang in, sinlai na e duang zen gual aw e.
    (b). Sinlai taang bang damna ding in, tong hong kha aw duang zen gual aw e....

   Huut sim thilthial khat aa lunglen lawh la vive a sak taktak teh bel, nidang aa la a sak ciang’ la hoih pipi a sak hang aa, a ging ngawh theithei ding bek peuh aa, a sak hi lel aa, tu'n deihna nei takpi mah aa, a sak sinlai duangkuai Manno mah a cihna vive hong hi khongta hi. La hong sak phot teh a lung hong zuang tektek hi ding hiam....? Zola hoih a sak mahmah ngaih a sak mahmahte na leng hawmthawh ta aa:-

(a)  Ngai buang veng aw lemnang bang huang buang veng, deih  zozam lah kaaitui bang, zawl ngam lang e.
(b)  Deih zozam lah kaaitui bang ka zawl ngam loh, lungzuan dawi ai a ka vei, na zungzung e.

         Lungkim zo nai tuan lo tua zawhteh:-

(a)  Tu aa kei vangngaih no aw zo heisa aw, ho ngam lang e sinlai kawm, ling bang do e.
(b)  Sinlai kawm ling bang do e lia neemno aw, na vang ngai in sunsawt hui, bang mau ing e.
    
   Tua bang teng tawh ni hong tum ciang in, a sihna pah phial ding a hi liang ta zong aa, Langno in tua nitak peuhmah Ton zu-nun laam et hamtang ding aa, a ngaihsutsa ahih man in, a lupna pan thokhia in kisil pah hi.

   Nitak an neek khitteh a puan laizeem silh in a innka uah kileh hothot niloh teei na pi'n, a inn uh mahmah zong ah om khong thei nawn lo ei de, tawm vei khitteh vakkhia zualzual aa, a lawmte tawh laam et ding ngakna peuh ci'n nungakte kiang ah hawh phot uhhi.

   Laam et hun ding hong naii takteh ciahkhia leuleu uh aa, a tongte phaitam zaang aa, misam tangval leh tuitawi ngaknute zola sak kaka khawng a zak uh ciang in a lawpna khang semsem a, om thei nawn mahmah lo in, kalnawh sa in tongte inn mah va zuan pah vingveng uhhi.

   Misam leh tuitawite bel nuam kisa lua kisa, meiphual kim aa kikawi giigeei aa om pen, Langnote pawl in a sak aa sahawk phung khat ah cil valh gangan geuh in en tazen hoh uh! Langno gimna tektek di'n Manno, Langno in hoihtak aa, amuh theihna ding mun san tak ah na tu kha citciat solnawn aa, a la  sak kawmkawm aa, a mau lam khawng a et khakteh kha det lai hi na ven, meii tua zah in liah aa khua mial tua zahta lak ah bangmah zong kimu thei ngap hetlo ding hi napi, Langno in, " Ka mit a zaw nuang liang," ci ta liang zen hoh ei!

     Inn tual aa, meipi sep a, taakluang khulte ko khin damdam ta ahih manin Langnote tun khit diak mah ciang in, misam tuitawi te a zola sak uh hong tawp aa phaitam zang pan kipan inntual lam manawh in:-
    
(   a)  Ka tonkhuang aw thang zawm aw e, ka hankhuang athang zawm  aw.
(   b)  Tonh khuang leh han khuang thuah ing e, mual ii nen ah thangnah e...

ci'n lasa in ton tuitawi ngaknute leh misam tangval kihelh dimdiam in a puandum, a puangial, a puan laisante uh silh kawmsa in, hong laam phei ngelhngelh tanghial uh hi.

     Langnote ahih leh sawl zong kul lo in, mitphiat kikal mah in a huansak aa meitei phung ah a lawmte teng mah tawh na tu khin ma lam uh hi. Inntual lam manawh aa hong laam phei ngalhngalh tak uhteh, Langnote aa kipan tangval pawl khat "Iu iu!" a ci tawh misam tangvalte a hazaat man a eenluat man a hi tam…, a na gual ko puutsaat ni loh uh tawh -- "Na keel taang uh hawm mengmeng vuau," cia naupangte a ot tuattuat geuh uh tawh kong sak kong khang, huan sak leh phaitam tung tengah kigam lum mahmah aa kisa ngengngang mah  hi. (Keeltaang - Keel gilzang taangtang thalh a akihuan minte a cihna hi.)

   Tua bang teng tawh inntual pan suangphahpeek kan suk in innka lam ah, tuangdung nawk phei in bikhalap lam ah, bikhalap pan inntual lam zuan in tonhsongpi kimveel in hong laamlaam uh aa, Tonhla dawng li dawng nga hong sak khitteh, "Laamsuak" dingte pawl a kongbiang uah a masa ding kikhiat aw - pawl zawnzawn aw - bang aw … ku lialua geuh uh hi ven, Langno zong a lawmte'n ei zong va laam ni cia a kaihkaih leh tangval no cih man lei, Manno ngai law zaw ahih man aa ut pipi mah ki "ui misi neek" hi de hiam aw kuata kaih zawh in om himhim lo in, khaw zan lamteh kisiik giauguau mah in a inn uah amah kia ciah leuleu hi. (Laamsuak – Misam tangval, tuitawi nungak ahi lo a pua lam pan a hong kibehlap khuasung nungak tangvalte pen ‘laamsuak’ kici a, ‘mualsuak’ ‘ta-anggsuak’ ih cih dan tawh akibang ahihi.)

     Pau lo phun lo hial in Langno a inn uh a tunteh lum pah tei hi napi'n, ihmu thei zok lo in a laam etna aa, a gei a paam a ngaknu tangval laam zong a en man tuan lo aa, puanzaa zawng hilhel peuh aa thu gen litlitte a phawk khak teh:- '  Aw.., ka lawm ka gualte kua mah dang a lunglen lawh tuanlo, hun zatna lel aa, a nei hi aa, tu'n kei ka tu cih pi di om lo..., Manno bekbek mah a ngaihsun hi khong ka hih ciang in, zingciang peuhmah laamsuak taktak vang inh, Manno tung ah kammal khat bek ka pau thei kei zong, hon muh di beek in va kilaak ning...' ci-in lungsim a khentat khitteh ihmu thei pan hi.

(Khen Thumna)
   A zingsang ciang in a ngeina mah bang in lungzuan khaw ngaih heh nepna'n lasa zel zatep zel, tua bang teng tawh ni hong tum aa, kisil in an a ne baih sim hi. Nitak khua mial philhphelh kuan sanggam meelmak hun ciang in inn pan vaak khia aa, a lawmte tawh laam en ding in kizawn uhhi. A zan nitak aa a tut masakna gei uh sahawk phung khat va tung leuleu uh hi. Langno in a lawmte kiang ah, "Bang bang ahi zong tu zan peuhmah laam suak hamtang di cia, ka khen tatsa hi," ci-in a lawmte kiang ah a lawmnu muhna ah bangci gamtat ding, a kampau dan ding khawng dong niloh hi.

     A zaan zan aa lam kipat hun khawng mah ding ciang in, misam tangvalte leh tuitawi ngaknute kilak helh in hong laam leuleu uhhi. Tua ni zaan bel a zanzaan bang lo-in, kha lah meei in liah peuhmah lo, taang sim hinghiang nuai-ah, a song uh ngaingaw gil san henghang, a gawton tehte dum dikdek huih in a mut  khak teh  guaton kuitung mahmah dawn ah guaton bawk kikhai in tua gawton bawk nuai ah gua lum tawh kibawl a phelekte tang phelhphelh, ging sepsep, a kung kiheek sim ngelngel kawm leh, a phelekte om khong thei peuhmah lo aa, phe laplap te leplepte tawh Manno te tonla sa aa, a lam a muhteh bel, Langno zong zaktat maizum ding peuhmah khual zo nawn ta lo in, laam suak ding in hong kipan ta hi.

   A sawtlo in Langnote lawmta teng leh tangval hon khat, ngaknu nih leh thum tawh laam hong suak uh aa, laamgui hong sau mahmah pah dendan hi. Ahih hang in Langno leh Manno,  - Manno leh Langno kizom kha thei tuan lo in, mi li mi nga in hong hal veve hi. Langno a hih leh lasak ding, laam ding, Manno et ding - tua teng nam thum bang a mehkak ding hi in manlah kisa hial ngangtang dinghi.

     A den diak mah ciang in laamsuakte leh misam tuitawite neek ding in, zu a tuam in ngeina bang in suangphah peek ah hong kigual aa zu ne ding khawng hong kikaikaita hi. A hih hang in Manno leh Langno zubeel phung ah kituakkha thei tuan mahmah lo uhhi. Sawt veipi a laamlaam uh hangin a laamna ah zong kizom kha thei beek lo lailai uhhi. Tua hi a, Manno leh Langno akisawh khak theihna ding hong piangtawm thei peuhmah lo in kigalmuh kigal et ciang bek mah ahihi.

   Tua bang teng tawh khua hong zat simsim teh a laam uh tawl pian tek uh a hi tam.., hong tawp uh aa, innlim aa zola sa pawl aw - inn sung aa papi la/latung sa pawl  aw---pawl khat leuleu inntual a zupeeng kiciam aa kikom kigualnuam pawl aw -- tua teng kawm kal ah Manno leh Langno inn lim aa zola sate lak va tung kha theituak citciat hi. Langno in zu hong kham tektek aa, zahtak maizum mel zong ngaihsun zo nawn lo in, la khawng mah kam dimdim in hong sa zaizai ngam ta hi ven.. tua leh a zan a phaitam zang aa, misam tangval leh tuitawi ngaknute'n la a sak lai aa, Manno aw gingte khawng phawk khakha lai hi ding hiam....?
    
(a)  Tullel hiangkhawm a va teng pan, gam huiva mah a khuan siam  pen e.
(b)  Ningzu nee a lia phung cing lai ah, kei lungta mah zai oih siam pen e.  ….

acih khit leh Manno etkawm thuah se lai aa, a la gen tungg aa kipan Manno in a na lim et law keeisa ahih tawh, Langno mit kho zolo in, hong puk nuang leuleu hi. Tua aa kipan Manno in, Langno in Manno diksa pakta ahih lam a lungsim teng hong sansat thei pianpian ta hi. Ahih hang in Langno la gen thuk ding lah, a kipia ih suah ding ci tek uh hi de hiam aw, tua la a sak khit uhteh nungakte in gen vat ngam nai lo, la gen ding a kisehseh laitak in, innteek papipa’ pa Khup na-ngawn nungak tangval kigualnuam a muh teh lungkim lua hi ven cin, inn sung pan hoi sim deemdeem aa hong pai, bangkua sangkil tung ah tu kawm sa-in:-

(a)  Hih bang nunnop ka bawl hangin, al bang ka dah hiangsing bang zau e
(b)  Gua bang hin ding lah thei keng e, tung Pasian sinthu hi lawm aw e…
a cih la hong gen aa, tangval ngaknute in innteekpa neih leh lam hang aa, ngaknu tangval tukhawm khawlkhawm aa la sa thei hi hang … ci in, innteekpa, la gen lei ah kia sak man lo liangin lunglawp tak tek in a sak ziahziah zawh uhteh, inneekpa paahtawina la vive kigen hi. Tu aa bangteng tawh khua hong vak kuan ciang in Langno amah misam tangval ahih loh tawh, khua hun mel thei lai gawp lei aa, Manno hona kammal khat zong za kha hial lopi mah in, mangngilh nei bang hiamhuam kawmsa in, a sam phiah sim nenghnangh tawh ciah sim thei bilbel hi.

     Tua ton zu-nun sung aa hunhoih zat ding Langno aa'ding a om thei nawn lo suak ta aa,  Mannote lah ton tuitawi in tua zawh ni nga sung a mau inn ah om thei tuan nai lo hi. Tua hun sung in Langno a tual puan-aak silh in hei khat liang vat kawm in gampalak peuh vak hualhual zel aa, bangmah kinpi zong neih tuak tuan lo, ...haiphung singphung cih peuh ah tu ngeungau pong lel in, a ma zak khopkhop bek aa la sasa in nitum thei zel hi.

   Lum leh tho leh Manno bekbek mah a lungsim sung ah ngaihsun gengan ngitnget ei de, a anneek laitak bang a ngaihsut phat ngial teh zasan kuang sawk kha lo bek hi lo in, a an na leng haii/khaai mangngilh aa, khat veivei a an keuphal na leng kiatsuah dekdek thei lai mawk hi.

(Khen Lina)
   Ton zunun sanun hong ven’ leuleu ciang in, a inntual aa gawton tehte Langno leh Manno te kimuh cil lai bang nawn lo in, a teh keu kuan ding kisa'n hong au kaa'n sim dengdang ta hi. Langno Mannote inn ah a hawh nop pah hang in ton zu-nun sung a tuitawi na aa gim ding aa, ihmut zong cim om ngei lo ding ahih teh ci in, Manno aa' ding a khualna in hawh pah vat ngam sap lo hi. Ni nih ni thum hong sawt leuleu teh, "Bang bang hi leh sia leh sia..., pha leh pha .. zum leh dai aa si om kei," ci'n hawh masa lo liang in, a lawmpa Thuam Ngen Bum (Thuam Bum) a ngensak vit hi. Lawm ngen ding in Thuam Bum zong kua pawl kua gual lah deih se lo, nitaak khat khua mial philhphelh sanggam melmak hun ding khawng mah in Mannote inn ah va hawh khiankhian hi. (vit > vet tawh akibang hi.)

   Kam phatna tawh tua nitak Manno te innah "thu hosum sih sak" ding leengnaa dang hong pai lo bilbel ahih man in, Thuam Bum zong a lawm Langno in Manno a lunglen lawhna vaii teng a gen khit teh, "Na cit na siamna bekh beek ahi ta zong in ka lawmpa aa'di na khualna tawh, na ngaihsutna bangbang hon gen in Manno aw," a cih leh Manno zong zum lah zum buang napi, naupang thugen hi lo ahih teh ci-in, Thuam Bum a-et khitteh nuai hah sim zilzial sa-in, "U Thuam aw, U Langno in hi bang aa hon’ lung len lawhna teng non’ gen ciang in, ken zong ka na lunglen lawh dan tawh ka na ngaihsut kak khawm ciang, ahi takpi di mah sa dekdek khong ing inh ... pe .. peuh deihkaih in na ki-ummawh de..dek takpi khong mah ing. A lungsim takpi mah hi aa, sinsung lungsim thu le la hon’ kum hon’ genpi nuamtakpi ahih leh, na nih un zing lam teh hong hawh hong lengna zen hoh un... Nonh it nonh ngai takpi uh ahi kei zong in, a nomau tek mah hong hawh hong lengnaa le u cin, kei "mipii" a na tang tuam mahmah di hing," ci'n khing sim ngeungau in hong gen leh, Thuam Bum in a lawmpa a gen kal ding ngak lah lua ei de.., a zaa Manno a zialsak khitteh tuibuk muam tam kal zong khawl nawn lo in "mangpha" paih a,  maimalh sim hiheh in a ciahkhia pah hi. (thu ho sumsih sak > thu gen thu kikupna a nawngkaisak)

    A inn uh ah ciah suak masa lo lai in Langnote inn ah a ban pah leh, Langno nute pate leh a naute teng inn sung aa mei-awi aa sa litlit laitak va tuak aa, "Langno koi ah vaak ei ta nu Ning?" ci a, a dot leh a nu'n, "Tu sawng teng ka Langno uh a ci nuam lo ei de..., ka ci naa ka bang naa ah ci kei ven, a vah loh peuh teh lum pahpah veh aw...; innmeeng en lecin lum khin hi lo de hia, hoh ihmu nai kei tasop vem.." na cih san hi. Thuam Bum bel a lawmpa thu thei kisa nui kawm hiimhuum sa in, "Um bel mah ing ei," acih khitteh inn meeng aa, a lawmpa lupna va zuan aa, a ma ngaihsutna bang keek mah in, Langno kinuai sim phulhphulh kawmkawm in hong tho to ding aa kithawi, "Thawh kul kei ei lawm," ci'n a gei-ah a mah zong thal lup in, amaa paina vai thu teng kicing tak aa, a gen khitteh ciahsan pah hiat hi.

(Khen Ngana)
   A zingsang teh nisuah limtak mah in Langno gam vak mawkmawk dan ding kithawi in, Thuam Bum va zawn khia aa, a khua nawl uh aa suangpi tung khat ah ni haam awi kawm hithiat sa-in, a zan nitak aa, a paina vaii teng dam dot kikkik phing niloh hi. A tel lo lah hi khol lo a zak nopnop man aa, a dotdot leh a sawt teh a lawm pa'n, "Lawm aw, bangmah kam tam ken la, non’ dotdot hang lah hi kan kon’ gen thuah tuan mel di om nawn kei in, zan aa kon’ gensa bang mah hi. Tu'n na hawh loh aa phamawh di ahih teh, tu nitak aa ih hawh pah saisai di lah kilawm nai buang kei in..., zingciang ih hawh hamtang kul di hi," ci in a thu kikup ih a khentat khit uh ciang, lunglen la peuh sasa lel aa tua bang teng tawh ni tumsak hi.

(a)     A mi zatam za ii lai ah, nang tawh khawl lo kei ka zuang  sese.
(b)     Singta tongdam tuu bang khum zong nang tong sang lo kei ka zuang sese.

   A nitak khuamial khit naupang sawmciah huntak ciang in, Langno leh Thuam Bum Mannote inn ah hawh dingin, puanlaizeem (puanlaisan) liangvat tuak kawm sa in Thuam Bum te inn pan hong taikhia uhhi. Thuam Bumte lawmta Mannote inn mah ah lut pah vingveng uh aa, khanglui papite’n nungakte kiang ah zawlleng a innsung ah tawmvei sung beek tu lo liang a, bangkua pan a kilehkik pahpahte pen’ ‘uital zawlleng tawh kibang’ acih ding lau ahih man in tawm vei sungtang phot uhhi. Inn sung ah Manno nute pate tawh - Manno pa sabeng ukpian ahih lam a theih teh Thuam Bum zong Manno pa’ diksak theihtheih di'n, sa be'n vai khawng cil leng zangzang liang in va genpih paampaam tei se hi. Langno ta leuleu, Manno a ngaih vang in anu apate na leng zahtak hi ding hiam aw, lim pau ngam het lo aa, a lawmpa a nuihteh na nuihpi mualmual zel bek mawk hi.

   Tua leh.. Thuam Bum in khua hun a sak pian teh a pangbawm aa, a zabawm la in, Manno pa a za zialsak hi ven Manno pa bel a gualnuam thei bilbel pawl ahih tawh, "Tangval za ciam nuam mah hang e, ko khan lai in tuibuk vive kizang hi ven" ci'n nui kawm bembam in a za a zial khit phet phial mah teh a nu apa "mangpha" paih in, tangval gel zong innka lam zuan uhhi. Innka a tun maa, bikhalap nuai a tun laitak un Manno in ngeina mah bang in,"Innka beek ah na khawl vua uute vaw," ci'n a mui kheek kimlai gapkhuam tung a kikhai kawnggom/bawmta sung ah koih in innka lam ah hong zuikhia hiangghuangg hi.

   Innka-ah a thum un tu uh aa, a lokuanna uh, a zan nitak aa, a vahna a ciahna uh, zawlleng tangval lengna neih cih aa kipan -- khuasung thu lamdang atuamtuam a kidot khit uh teh, Thuam Bum in, "Kei zong ka ut lai mahmah hang, no na kikup na kigen nop tuam uh om di ahih teh, kei na ciah ning," ci'n a lawmpa a nawsia hi.
(Tua bang dan a lawm ngen a, a zat palai te pen khanglui pau in ‘kawnggom’ ahih kei leh ‘bawmta’ kici hi. A taktak kawnggom/bawmta pen gapkhuam ahih kei leh sutpi tung a kikhai akizang mun mahmah van nengnengte  koihna ahihi.)

     Thuam Bum ciah khit ciang in Manno leh Langno a pau masa vat thei mel lah om lo, tawm vei dai dide aa, a om zawh teh.. Langno zong hemnawl sim nangnang, a aw zong tun zo taktak lo, ling sim huphup in, "Ma..Manno, na kong biang na bang kua uh kong suah phet un, ka lungsim dite nang zong na na sansaat theihpah bang mah di'n..., kei hi bang aa zahtak maizum khual zo lo aa, na teeng na paam aa kongtut kongkhawl pen, kei kisuanna kei kimuanna zong hi peuhmah lo, nang pumpi kon’ it kon’ ngaihna a letluat man aa, hong hawh hong lengna hing in, nang ahih leh lamdang bang honh sa phial vakte...."cia zom vat thei nawn lo aa, a om laitak Manno in, "Hawh le lengnaat ahih leh non’ it non’ ngai ta kei uh zong, hehpi huai non’ sak man un ahih kei leh zong na cim thoihna un, hi nu kiang ah va hawh leng amah na nuam mahmah lel ngawn na di ahih te cia, na dik na siam man uh a hong hawh hong lengna zong hi vak uh cia u Langhno aw.." cih a kipan kamsiam kithuk lua kisa khuazat lammel theihloh kal in zan-aak hong khuang ngalhngalh petmah hi.

   Tu aa bang aa kamsiam akipaihna lam ah Pu Lian Khan Khupte ton lai aa, a gam tatna teng khawng mah kigen man zal uhhi. A gen ding bei zong hi tuanlo - a ut nawnlo lah hi lo, ut se lua Manno in a cimtak khak ding a khualna in, ut lai pipi mah mangngilh nei bang hiamhuam in, Langno a inn lam ah a ciah leuleu hi. 

(Khen Gukna )
   A thai ciang in Thuam Bum mah tawh va hawh leuleu hi. Tua bang mah in ni khat hal sim phial in a va hawhhawh leh a sawt teh, Manno lungsim hong siang theih ta aa, lawm ho lawm ngai tuak in ki-ngaihsun in, ngaknu dang tangval dang lunglen lawh ding peuhmah hong hi nawn lo tuak hi. Manno bang in Langno ngaih ding kimuang ngam lo zaw si leh, Langno lah tangval dangte bang aa, a kam tam zalzal a vakhaat lua cih bang ahih loh tawh, nungakte ngaihna lungsim a nei thei lo liang ding peuh sa kha aa, a maingap ngam lo hi kei leh, a neu limtak aa dik a sak mahmah gige khat ahih lam Langno in a theih tak teh, a it a ngaihna bang hong lian semsem hi.

  Khat leh khat ki-it kingai-in om in, Khuado, Sialsawm bang ciang in zawlzu zawl-an kikholtuak tangtang uhhi. Tu leuleu teh innka tang ah a tutkhawm a khawlkhawm uh hangin, zawlthu gen nawnlo zaw vet in ciamnuih peuh gen zel la peuh sa hialhial khawm zel uh aa, Langno bang kha det lai kha liiklai diakdiak bang ciang: –

(a)     Zan khang kimkhen len khang kawlni, a lai ah gam suan
 mawngneel khawl e.  (len khang kawlni > kha taag a cihna hi)  
(b)     En dih aw Man.. thangvan suan mawng, ei nih lungtuak a lel  kai lim ah, tulkung lengthe no in khuang leng e.
     
a cih la deihdeuh se hi.

   Tua bang aa Langno leh Manno ki-it kingai aa Langno pumpi Manno aa' Manno pumpi Langno' aa', cih bangzah dong aa khat leh khat kisihpi ngam ek dong ding aa, a om laitak un Langno ii a lawm a gualte galkap tum tawh, palik tum tawh, mawtaw hawl dan a set bawl dan sin ding cih bang in, amau mailam nuntakna lampi ding vive a zong nainai tekta uhhi. Langno in a hih leh tua bang a ngaihsun nuam ei leh, ni nih ni thum Manno tawh akimuh loh khak ding na leng seh thei lo in, khua hong khal ciangin, anneek ding kicing nawn lo a, khua dangah antawk ciang cih loh buang, khual zong zin ngam ngei peuhmah lo hi.

   Lo a kuan uh ciang in tonkhawm thei zel uh aa, a tonkhawm theihloh ni sunsun un, a ciah a kuan a lo lamka uh ah sawl kipaih tawntung uhhi. A lo a tun leuleu uh ciang in, buktau pan a kibik uh tum letlet in kigal etet in khat veivei lo hun lai diakdiak bang kii phul kaamh khin peuh leh, Lang no Mannote buk ah va hawh in vaimiim gau em leh tangmai peuh ne khawm uh aa, Langno leh Manno a'ding in leitung nuntak a nop mahmah hun laitak ahihi.(Kibik ih cih pen pawl khatte’n a gol mahmah sing tawh kibawl a sung kikhuat khat bek a zang zong om hi. A tamzaw in dakbu khat bang in aw thum nei ding in kibawl a, dakla, phit la, kibik la ih cih pah mai diam.. a tuamtuam kitum thei hi.)
1.(a) Thei bang sen aa tong kisaang sa, singtawi paal zong kei ka zuang lo e.
(b) A sing hi leng phung khat po khawm, huihkhi sem huang nawn loh ding aw e.

2.(a) Neusen pian aa lia ka lungtuak, phammawh dawi-ai nang hong tawi veh aw.
(b) Sesum minthang ke'n ka ngai lo, na tongdam nuam ka sial lian pen e.

(Khen Sagihna)
   Tuuk - Phalbi - Khuakhal..., hi bang teng tawh hun a zatzat uh leh kum thum hong cing pet mah aa, Langno lah amah leh amah kimuang ngam nai lo, a ute in zi a neih nai loh si tawh Manno tawh ten vat ding seh thei nai lo deuh hi. A lawmte galkap tum pawlkhat a khuan hong ciah khin na leng om aa, nidang aa inn aa, a om lai khawng aa bang mah zong aa, a sim hetloh pipite tu'n a mitheek a kampau uh hong kikhel in, thugen ding mah hong hau si, a mel a sa uh zong puansilh niikten a hoih nono hong silh zawk diak tek uh tawh, a ci a sa uh hong zol sim hilhial geuh uh a muhteh Langno in hong en-gawh pianta mawk hi.

   Ama nuntak zia ding a tuatteh zong khua-ul kaai liang guhtui kang liang aa, lo a khawhkhawh uh hang aa an tawk loh kum om ngei meel lo cih a phawk khak teh, lokhawh ding zong seh thei pha lo tektek hi. Tua kim laitak in a lawmte galkap khuan ciahte'n a mah na thusim pha lo, papi nupite'n lah maithak hong suah uh tawh dot ding gen ding mah hong neih diak se uhteh, Langno in hong thangpaih laak mahmah ta aa, "...Kei zong kapa tapa hi'ng, hun nawn lo phaat nawn lo cih bang hi lo ka hih teh..." ci-in galkap tum ding hong sawm pah biangbuang hi.

     Manno a theihsak loh liangding ki-awi peuhmah lo ahih man in, nitak khat khuamial limh phial mah in Mannote inn ah maigum ngemngam sa-in va hawh hi. Manno nute pate'n Langno maitang a muhteh ni dang tawh kibang sa hetlo ahi tam, athu ala teng a dot leh, Langno zong im zo tuan nawn sam lo in amaa galkap tum ding leh bang hang aa tum ding sawm cih, amaa ngaihsutnate a khong a khia in a khempeuh gen khia pah ngelhgelh hi.
   Tua thu a gen khitteh Manno amah a pau se ding lah hang ngam lo, dah lah dah khasia lah khasia buang,... "Nidang aa galkap tum di vai peuhmah khat vei mahmah zong hon genpi ngei lo hi na pi'n, tu aa galkap tum phingphing di honh sawm vat.. bang thu bang la za hi diai ta? Kei pumpi hoh nidang zah aa honh it honh ngai nawn lo hi di ei de leh..? ci-in a lungsim sung ah heh lah heh buang, dah lah dah buang sii khat in mit phe khepkhep in om aa, a etna mel ding lah thei lo in a cih mawhteh pauhlap zong in, a singkhul ding sum tawng ah va la hi.
     Tua kal mah in Manno nu'n a lupna pii paam aa zu um a ngawng zol ketkatte khat tawi in hong tum kikik aa tua kawm in - "Zu khum ta kei zong kithei lo.. ih neih sunsun ciam sak ni leh Langno Kawlgam vaigam aa pai di, a maa omloh kal aa ih na sih mel," a cih leh Langno in, "Lup kei o' nu Cing, kei ka zakta zaw ei," ci pualpual tei hi ven, "Ka zu uh khum in bang in duh vak teh zong aci hi kang e.. ih hon’ tepsak nop man mahmah khong hi; tu sawngteng zu sak lah tuak thei peuhmah lo aa," a cih zawh a sawt lo in Manno pa kiang ah tui phel khai khat leh langva hai khat tawh Manno nu'n zu beelkhe nei golpi khat hong tung petmah hi. Manno pa'n a zu leih pah aa, a peeng bulh khit ciang, "Kon leepsak zek loh in na lung lah kim kiak in," ci'n nui pialpual in a tawm a neeksak khitteh Langno a nee sak hi. (Khang lui lai in zu kilup ciang in itna ngaihna takpi tawh zu lup ahih lam theihsakna in innteekte’n leep masa a, ahi zong in a hai khat bit zong ne peuhmah lo in kamnih kam thum khawng a ciam bek mah ahihi. Bumna, gu sawh a hih loh lam lahna hi.)

     Langno zong a zu teep ding aa kithawi tawp kik vat in, "Nu Cing aw na zu lup hong ciam beek aw leh..., Koi.. hong pai ve vua hong teep ve un," ci-in Manno en kawm in ci pappap aa Manno nu'n, "Na ne aw zong khum ngap kiak.. ka tuibuuk muam lah taam nai kei in..; tuh.. kawl miimpi zu khum lo peuh sang’ ka tuibuuk muam hoh it zaw sop ing, den lamteh hong teep ning," cih san hi.

   Manno pa leh Langno in thu a tuamtuam mah hong khinkhin ta uh aa, Manno pa bang amau neulai aa sial peuh bawng peuh kineih aa, sikh peuh singlaam peuh a kineih lai khawng, lui lak aa kheel dulh vetvat geuh aa aisa sawk peuh vasa beng peuh aa, a nitum tum lai khawng uh leh tuhun khangnote laisin dan, ki ommaih dan a tuamtuamte a ngaihsut khawm ciang van leh lei in kikhai sa lua aa, tu lai naupangte a en-gawhna dan vive mat leh zet in genpih gaihgaih hi.

    Manno nu in lah a tui a kiam pian teh na leihsak zel, tua kawm kal ah Manno pa nung kaih lai ding ci le lah Manno pa'n, "Kon tepsak loh liang di nuam na sak loh khak di ka cih man hi. A nu'n ka lokuan ciah in zong non lup in, kei kicing ta ing," na ci zel aa Langno bekh mah'n a neek leh hong kamnuam mahmah zo simtham hi.

     Khua hong zat pian aa zu hong peen' pian teh Manno nu'n, "Na u Langno zu .. zu zong nam nawn peuhmah kiak in koih sak in," ci hi ven Langno zong kisiamsak lua kisa tua acih zawh teh, "Khum lai mah e!" ci'n hai khat bit mah ne beh lai hi.

   Ciah hong hunta aa Langno in Manno a den aa, a khasiat tuak dan khawng a muh teh.." Zinglam teh lah vaak kik man nawn lo di ka hihteh, Manno tawh a tuam vilvel aa ka kimuh uh kul hamtang lai di..," ci'n ngaihsun aa, anu apate "mangpha" a paih khitteh innsung pan ciahkhia in innka ah Manno tawh a tukhawm uhhi. Innka pan ahih leh a kikah dekdek phial mah uh hi in, a tawpna ah Manno in, N.. na tup viuveu ahih khong tak in bang ih cih sap de maw u Langhno -- a sia aa nong pian le lah kei a kamsia hi khong veng," ci-in a khi-awhte mal kawmkawm in kun ngiungeu in aw dam mahmah tawh gen ngeungeu bek hi.    
                 (a)  Pahtaang galdot khua phei hem aa,
                        Lungtup lenmual na kai zuan law'ng e.
                 (b)  Lungtup lenmual kaikia tah aa,
                        Ngaih heina Sian Maang aw dawng hon aw.
                 (a)  Cing Khup Ngam Bawm lenlai sinthu,
                        lam len guikhau bang zom ve ning e.
                 (b)  Ei san sinthu khen ding lelte,
                        ngaihno aw maukii bang na vaan aw.

(Khen Giatna)
    Uukna - thang paihna leh ki siik kikna - tua teng thuah aa Langno galkap tum ahih mah bang in a lungsim thahat in a lawmte dem nopna lungsim nei aa, a nasepna mun peuhpeuh ah zo-in a tungsiahte paktat mahmah pa khat hong suak hi. Tua ban ah a lawm a gual leh a tungsiahte tawh kizop dan siam aa, a lawm a gual amaa nopsakna ding mun a om zong in, a haazaa ding peuhmah om lo ahih man in, kum thum sung in san khat hong ngah ta hi.

   A khua muhna zong hong zai semsem aa ih Khamtung nuntakna hamsatna dan ih ngeina dante leh a dang a tuamtuamte amah'n a na tam theih mahmah khinsa ahih tawh - tu a galkap tum sung midangte om dan ngeina dante tawh ngaihsun kak in, ei Zomite phattuam theih theihna ding bekbek ngaihsun in, khat veivei bang amah kia zanhah thei zanzan hi.
     Langno om loh kal in Mannote'n tangval dang hawh ngei khol lo aa, Thuam Bum bek mah hawh thei giaigiai zel hi. Manno in lah Langno lawmpa (a kawng gompa) ahih man leh Langno laikhah a ngah uh ciang aa, a thu gen a la gen peuh uh kikum aa, a mah'n a ngah kei zong Thuam Bum in Langno  kiang pan lai ngah in a thu teng genpih peuh leh Manno in nuam nasa tuam zo mahmah ahih man in,  Thuam Bum na limbawl aa, tua teng nuamsa in "Ui a neekna sa ah zual" a cih bang keek in va hawh thithe hi.

   Tua bek genloh a sawtsawt ciang in a lawm Langno lawmnu ahih  lam na leng hong mangngilh nuam pianpian khong ta mai in, tenpih ompih ding na-ngawn in Manno hong ngiim mawk aa, a lawmpa heekkhiat ding na leng hong sawm miau hi. Tua mah bang in kum thum hong cing ta petmah aa, Langno in ciah ding vai peuhmah a gen nailoh teh, Manno zong khua hun a kisak tawh a lungsim hong kheel pian hiaihiai in, "tang sap awng hukna" cih bangin Thuam Bum hong ngaihsun thei pian khongta hi.

     Thuam Bum in lungsim hoihlo hong vom ciang in Langno in Manno a laikhakte Laito (post office) pan la in na pia nawnlo, tua mah bang in Manno in Langno lai a khak teh a khiatsak ding kuamah dang muang het lo, Thuam Bum bek mah a muan aa a khiatsak pahpah hi ven, tu'n a u Thuam Bum in lah a vel khit phitphet ciangin meikhuk sungta na tun pahpah ahih man in, Manno leh Langno - Langno leh Manno lai a kikhak uh hang a lai kikhak uh a ngah loh zawh uh kum khat phialphial hong sawtta aa, a lai kikhakna sung uh aa –

(a)     Na luan neemno vaimaang thelnah lunggin hong tuangtung mawh e ngaih aw.
(b)     Tong nong lel loh zingdam solno, lam-et kumkhua sawt sa'ng
        ngaih aw e.
(a)     Khawhlo mazap tuncing aa ka hul ningniang, ngaihno in kei zuan nong thei, lo ding hi e.
(b)     Ka zuan lam lah theilo dia tongdam kai zil, dawi-ai zeh bang
        kong taa'n kum, khuasawt sa'ng e.
(a)     Pupa phaksap zang don ah lung ka gelciang, theisen tongsan
        ngaih aw ka, sial cing sa'ng e.
(b)     Solkha dang zong ngaih aw lung na zuang lo aw, mualhem lawkta lungzuang tau, na ngai veh aw....

     cih aa kipan a la ngaihnono kikhahte uh a mawkna hong suakta hi. Hi tan veita Langno in lai a ngah loh hang in a thu gen a la gensate uh kho khin kip khin lua sa mahmah ahih ziak in, midang zong tawh ummawh thei tuan lo veve hi. A hih hang in amaa ngaihsutna tawh a kikeelki mahmah thu khat inn lam pan za aa, Thuam Bum leh Manno! Kiteeng!! ci'n a za hi. Langno in um zong um zo lo phial napi'n khuisa kawm in a vangngaih lai bang keek in, a lupna tung mah kidenna pah ngiat aa ... ....

....   Aw.. numei ih cih paak bang hi ngeei khong mah aa, mi’n hon’ ngaih lai mi hon’ deih lai a ci hi khong mah di ta ven.... ... leh , ... Bang bang a hi ta liang zong in Manno... Ni leh kha leh aksi nuai aa thu le la guah se zah ih kikup ih kigensate om buang hi ven.... naupang thugen lah hi nawn  liang lo hang aa. Nang hih zahta a thu leh la ih kikup ih kigensate tuikhu bang a maimangsak sak pah ziau tazen liang maw Manno! ....…….Dauh!!!... .. No numeite! .. Na ngaihsutna uh tom lua uh teh..,Khut lum leh bang uh te.. ngaklah deuh u teh!... .... .. zong hi zeel mah e mate.. Kei gal lak sa lak aa om suak aa maw... cih buang teh papite'n  “ Ih ki-it ih kingaih mahmah hang kiteen tuanna hi lo;’ A kiteeng kheempeuh lah a kilim ngaih akilim it diak zong hi khin gai tuan lo, “ acih ka up kholloh tun kei kungtung mahmah zong ah a maan takpi mah hong hi khong ta ve...., Ken pawh..., Pasian in sii leh sa hon’ guat lai teng hi hun cih ciangtan om lo in, non’ na phawk ngitnget khong vang e maw Manno..!!!..
    
(a)     Tong zatam phung bang kiciangsa, sansa lia honuam, na hei dang sa'ng e.
(b)     Hei dang lungsim tui bang lehluan, ciamna kum vangla na sa
       hiam aw.
(a)     Vang kingai aa tup tuangtung lo, bang di'n kisaang ih maw ngaih aw e.
(b)     Maimawng aa hei lel tuangtung lo, bang di'n gual lel baang ih
        maw ngaih aw.
(a)     Khan kumsawt aa tum bang guai zong, tui bang kiam lo mu bang kong ngai e.
(b)     Sumlu besam a kaang zong in, anglai kep bang ke'n hong vom
vang e... !!!....
(Khen kuana)
   Langno in Manno tung ah a lungkim lohna, a khasiat lawhnate a tung aa bangin khuisa kawmkawm in, a tawpna ah a thu bek ahi lo, la na- ngawn tawh Manno a vaikhak nop a theihsak nop hangin, laikhak ning ci tuan nawn vet lo in a nuai aa bangin a naupa Tedim aa tan kua sin laitak, Khual Luan Pau (Luan Pau) Thu Hilhna lai a khak hi.                        
                                                                          
                                                                                         Kutkai, Shan State
                                                                                           Nimit:  5 - 12 - ‘67
Ka nau Luan Pau aw,
     Cidam in lai hong khak ing. No inn a omte ihnu ihpa leh sanggam meltheih teng tawh na na dam lai buang na vuam? Tu kum vaimiim bawk bang zah tel nei ih hiam? Khaal an khawng a hoih tuak nam? Ko kiang lam ah lah innlam aa theih dia kilawm thu lamdang kong gen vat ding mel thei kei khong ing. Tu naii gamsung pai ngei kong in, ka Batalian uah om leltak ung.

   Luan Pau aw a nuai aa kong thu gen dingte pen, kei khialhna pan ka phawk kikte leh ka galkap tum sung aa ka vahna ka ciahna pan, ka theih ka muh - ka kikholhpih a Kawl a Zote tung pan ka ngah khak thute vive hi in, papi vaii tawh kisaite inn lam aa ihnu ihpa ih mel theihte kiang ah a hoih theithei di'n na gen inla, sang naupang tawh kisai kong gente na lawm na gualte zong na theisak in. Ka galkap tum man in sum leh paai niikteen puansilh mi neih zah mi lam zah nei zo het kei nang in, inn ah om leng tu aa kong gen dingte kiphawk kha man hetlo ding ahih ciang, tua mahmah zong a manpha peen ding bang khat in ngaihsun ing.

Khatna Ah Ih Nuntak Dan:-
   Mi dangte nuntak dan ka et ciang in ei Khamtung aa nuntak dan tawh kikhai lua hi. Zanglei aa lokhote'n bawng tawh kho in, tua a khawhna-ah buhtang khamval lua kisa in taangpi taangta hong vaak zo lai hi napi'n, ei Khamtung ah kum khat bit zong kikhom lo in, kum sial in an taw in ih tai nainai hi.

   An ih tawk leuleu teh a bawngleng a mawtaw cih khat tawh hi lo lai in ih lu in pua hi hang. Tua haksat nate ka ngaihsut ciang in ih gam ih lei; tuan aa ihpu ihpa teenna ci cinten dah hoh in, nungsang ciang aa ei tu ei ta khang ciang a, a nuntakna lampi ding ngaihsun in, gam hoihna an pianna ding leh kikawm kizopna a olna ding mun peuhpeuh ah, teng lel leng hoihsa  ing.

   Tu'n ngaihsun leng, tu laitak kei bang inn mun logam ih neih tei hang in zi leh ta tek tawh ih om hunteh ih unau in hawm in, tua teh ih tu ih tate zong tua bang mah in na hawm sawn lailai leh, ei khang ah ih khawhna mun ding a awng mahmah zong in, ih tu ih tate khang ciang an a pian loh ding ban ah, a khawhna ding takpi zong mun awng om nawn lo ding hi. Tua ahih teh ih tu ih tate aa' ding ih deihsak leh, sanggam khat leh khat, zawlta lawmta kiphawh lohna, ki-it kingaih loh man ci lo in, nun takna nuam zaw'n teh ih cihna mun ah teeng in, tua tak ciang cidam in kihawhhawh zel peuh leng, ki-it kingaihna zong khangto zaw semsem zawsop ding ka cihteh, tu aa Tuisiang khawng Khampat khawng aa, a taitai te pil ka sakna hong thei sak nuam ing.

    Tua bek tham loh in ih khamtung khuate ah hauh sawm hauh za a ih hau nuam ta zongin ei khua sungah sum tang ih neih khempeuh kigawm leh tul sawm khat zong pha zo lo ding hi. Khuapi sungah sum zong paai zong sum leng sum zuak in om leng a khuapi gol zah liat zah tawh kizui in sum a tam pah ding hi a, sum zon siam leng, a naak (source) hoih mahmah a ngak ding ih hihi.

     Khanglui te'n zong:-
(a) Sinlai hual bang a khatsa tong kuppih sa, theihloh Kawltui nen ah
      sing, dang tang aw e.
(b) Hing khen lunggulh zo leitaang bang dam peuh leng, phung suan
      sang zawi bang kikai, nawn ta ning e.
   na ci buang hi ven.
Nihna ah Ih Ngeina:-
   Ih Khanglui ngeinate pen hoih mahmah napi'n, a tung aa ka gensa bang mah in ih zawn ih ngau tawh kituaklo mun zong om ka sa hi. Ei ton bang nang thei kei ni cin, kum tulkhat zakua sawmnga leh thum (1953) kum hi aa, tua tung tang bang ei inn pan bekbek aa beikhia a zu a sa tu hun sum in tuat leng, tulnih tulthum peuhmah bei naak hamtang ding ka cih teh, tua bang aa  ih zat sa'ng in en' ih kham val leh zong ih u ih nau hop bawl ahih kei leh kep bawl leng kimeet zaw in ka um hi.

   A "Tongte" bek hilo in a beh leh phung in sa a gawh tawh zu guan' tawh, "sa gual gawh ni" bang tak tak voktal tuukli pha ngentang ding luang sawm bang go uh aa, tua teng pen ni sagih sung aa, a beicip pah hi lel mawk ka cih ciang in,ih khanglui ngeina kideemna hi kei leh buang pawh, paammaih mahmah sa'ng. Tua ban ah ih sialgawh bek zong ngaihsun leng, en' nop ih sak ni aa nuntakna nei ganhing khat ih bawlsiat gawp ka ngaihsut teh, mihing ding in ngaihsun tase kei leng zong, etngam huai peuhmah lo aa, cizaathuai mah mah hi.

     Tua bang mah in a dang ihpu ihpa ngeina,"hihneih" "gal aih"ih cih ni khat thu a voktal golpipi luang tampipi go a beisak mang pah cih ka ngaihsut teh, ko galkap an bang in sa tawmtawm leh anteh nengneng tawh huankhawmin meh in bawl leng inn lam ah lim kisa mahmah lai ding ci leng, ni tampi kikhom ding ahih ciang in ih zawn' tawh kituak lo mahmah hi. (Hihneih  - Gal aih sa aih a genna mah hi. A min a lawh taktak ding ut lo in a hem genna hi.)

   A hi zong in tu aa kong thu genteng bang teekhteekh in ih pate kiang ah gen leng hong beeng hongvel hong vua nuam phial ding hi. Hi mah hi; hih ih ton ih gal-aih sa-aihte peen, ei khangnote muhna pan a thupi luat khol kei hang in, nidang in gal-ai sa-ai zote leh a tong zote zu nunna sa nunna lak ah na taltang mahmah uh aa, tua bang ahih zo lote’n zu kangg khat (zu kangg khat = Zubel dim in tui kileih hi aa, a tui a kimuh nawn loh dong/ a tui a kivun nawn loh dong a cihna hi.) zong na ne kha lo in, a-u anau khat peuh in neekngaih in a teepsak leh cih loh buang ama neek khak ding zong om thei vatvat lo in mite nawl khat ah muk hul kam hul in tu khilkhial geuh bek uhhi. (‘Nau zaw taangban/taangzom pet’ a cih tua pan hong piang hi.)

   Gal-ai sa-ai a tong zote buang ahih leh ama zaa tawh kituak in zu lim tata amau zu neek ding tamlua kisa'n neek zawh loh bang in om thei hi. A sih uh zong ciang in lasak theih ding mah hong tam tuam sawnsawn lai hi. Hoih hi;  ahih hangin, tu hun tua bang ih bawl hang "hau si!" hong ki ci nuam diai leh "hai si!" hong kicih hun ding ahih teh, tua bang ngeinate ih lungsim ahih kei leh lai in keem in, a hi zong in ih tak in haksa pipi in hambawl nawn dah hoh in, tua bang hunte beisak leng…

     Ngeina phiat tuak ka cihteh ih ton ih gal-aih sa-aihte hi aa, ahi zong tuate mahmah zong ih zawn' luat man aa haksa pipi'n bawl ding ih zawn ih ngau tawh kituak kei ka cih man bek hi a, a thu in hoih a sa lo ka hi het kei hi. A puah phathuaite leuleu ih la, ih khuang, ih zaam te leh ih puansilh ih nikkteen te aa kipan hi aa, theih ding, kep ding, phuahphat mahmah ding kisam hi. Ko omna khang lam khawng ah "Minam Ni" khat peuhpeuh teh, minam dangte'n amau minam puan vive silh aa, ei mite'n puan-aak a nei lo hi tuanlo napi hang, ih vaihawm lah man sii leh, ih Zo ulian masate puanzaa taam liangvat diapduap peuh aa, a na kikhop ziak in ih tual puan-aak leh ih Zo numeite niik leh puante hong kilanghkhia nai lo hi. (khang lam > Kawlgam Kawl zang a cihna hi, Kawlpi khangsiah teng a cihna hi. Ni dang lai 1970 masiah  a inn lam nupite in a tu a tate leh khuapih tuipih a kua mah peuh khang lam pai leh a kimu thei a kithuza thei gai ding mah kisa hi.)

   A lungdam huai khat ah kum tulkhat zakua sawmguk leh guk (1966) kum nung kum sung mahin, Zangkong sang naupangte'n tualpuan leh numei niiktual gansak uh aa, tu'n numei puan-aak ding zong kigansakta  ci'n zaa ing.  Khamtung pan a hong pai Zozum uliante leh Kawlgam bup pan hong pai taang mi ( kusale) khempeuhte mai ah tua ih Zo niik ih Zo puante silh lianluan tek kawm sa in Zomi nam ngeina laamna tawh  a sawm nih vei na Union Day  ( 20th Union Day )  - 12 February, 1967 ni in Zangkong Kyaikkasan Ground ah  kinei masa hi. Tua ahih manin tua ni tua kha tua kum a kipan Zo minamte pasal puan leh numei nik picing tak  in a nei a zang ih suak ta hi.

   Luan Pau aw, ih puansilh ih niikteen ih kizeepnate na thusim lo ke'n! En' ih thusim kei leh kuan hong thusimsak lai zang ding hiam..? Ih Zo Laam ih Zo Late zong thupi mahmah hi. Mihing khat a lungdam ahih kei leh a heh a dah leh, a lungdamna a hi zong a dahna a hi zong, a kilat akitheih khiatna ding in bang khat teitei aa, a kihil kul hi. Tua ih laam ih lasakte pen ih lungdam theih man a hih kei leh ih heh ih dah theih man aa, a nei hi hang. Laamna lah neilo la sakna lah nei lo in mawk om leng, dahna mel nuamna mel theilo nun takna nei na pi'n phawk theihna ngaihsut theihna lungsim neilo ganhing bang ih suak ding hi.

   Tua hi aa, hih ih laam ih la sakte in ngaihsutna lungsim nei mihing ih hih lamtak hong kilangh sak in, ih puansilh ih niikteen ih kampaute tawh akigawm khawm teh minam khat ih hih lam hong kilangh thei pan suak ahih ciang in, ih Zo ngeina gualnopnate nawtsiat ding hi khin lo hi.

   Ziiphian (RC) ahih kei leh Tapidaw (Baptist) kim khatte in, a inn uah la kisa in khuang kibeng leh cih tha dah, a phawk nai lo pha diakdiakte bang Zo la dawng khat bang sa kha thah leh Pasian tung aa khelhna mawhna sa kha uhhi. Tua bang mah in Khuado nunnop bawl khawng ciang "mualsuak mei dete" ahih kei leh “tangsuak” te lakah va kihel kha leh ih biak Pasian in a tawlsan suk pah ding a ngaihsun kha tampi om aa, tuate pen sau gen kei leeng; gamdang pan aa hong pai a biakna naseemte (Sang mangte) in Zomite ih pil baih ding deihsakna tawh ih ngeinate ih zuih ngawh nawn loh ding hong thu hilh in hong makaihnate ih telsiang nai loh man na hi gige hi. (Tawlsan – A tawl a meek cihna hi)

   Tua ahih teh na lawm na gual a thei khialkhate na hilh in. Biakna tawh zom ngeii leng, ih khanglui biakna pen hoih peuhmah lo, maan peuhmah lo hi; cih tu tadih in ci nuam keng.... A hiang "Khanglui" ngeina ih cih mah bang in tuhun pai daan tawh kituak nawn mahmah lo in hong khanglui vai law takpi aa, ih khaw muh nang', ih thu theih nang' mun tampi hong khaktan in, ih muhna hong toisak tuam mahmah hi. Tua ahihteh ih pate khawng "Biakna" kheel ding a kulna dante a tel theihtheih nang  in na paupih zelzel tan. A kheel nop kei hamtang uh leh zong, zatui zahaa tawh kibawlna kidamsaknate beek a up theihtheih nang' na gen pihpih in.                       
A Thumna Ah Pilna:-
   Pilna pen ih khawsung khawng ah kisam ih sak le zong, khasum sanna peuh leh ih lawm ih gual Kawlpau Mangpau aa hong pau teh ih thangpaih bawl man peuh hi lel in, pilna saang ih neih kei hang ei khawsung taktak ah zong nuam mawh het lo hi. A hiang’ khang lam tung leng pilna kinak sap lua kisa ih upmawh loh thau tawi thei peuhpeuhte omna galkap sung khawng na-ngawn ah, lai a kisapna dan kilim theih pha diak hi.
   Galkap vaii ih theih maa in gal bekbek mah a kap gai pah ding ih sak leh tua bang na hi deksuai lo aa, laitan neite aa' ding galsim lohna a dang a tuamdang nasep tampi tak om lai hi. Tungsiah za khanna ding leh a bu a mang suah theih nangin tan 10 ciang mah on kul hi. Koi mun koi munah ih sem zong in bangmah lai theihna nei kei leng, galkap nautang tektek ih hih hang in, ih lawmte'n bawng bang lawi bang aa hong bawl nuam sawn pah hi aa, khuapi sung vak leng lah, ih vahna ih ciahna khempeuh ah lai vive tawh hong kisai pian pahpah hi.
   Innlam aa ih pate khawng in: "Tu hun lai thei tam in, lai ih simsim hang akimanna om nawn kei" acih za mun ing. "Lai thei tam hi;" a cih pen maan hi ci mai ni. Tua ahih leh lai thei tam tua zahta lak ah, en' lai va thei kei lailai leng, ih lawm te'n hongsim mawh in ganhing bangmah in hong ngaihsun in  hong enneu mahmah lo ding hiam!.....? tuate na ciamteh pha mahmah ta'n.
   Ei Zo numeite hamsiatna leuleu nu’ leh pa’ a tam zaw in:- "Numei lai sinsak kul kei - ei lawhtak to hi kei," ci'n thu kin bawllo uhhi. A sum a paai nei zote aa' ding in tua bang a, angsung pilluat ding hi lo hi. A sum a paai hong pia zo tase kei leh zong, a pilna a siamna tawh hong huh zawhna mun zong om ding hi. Na tanu pil leh liat ziakin a nu a pa va-angh hong pia ding hi. Tua ban ah amah a pil a siam man in ih Zo numeite’ minam dangte'n hong simmawh sak ngam lo pah ding hi.  Sum leh paai sa'ngin minam liatna pen ei Zomi taangpi taangta aa' ding in thupi zaw lai hi lo a hiam…? Tua bek tham loh in nu pil pa pilte in a tate uh hong pattah siam pah ding uh a, tua aa kipan a gei a pam a kitheihpite khempeuh in etteh in hong nei in mi tampi hong zelh pah ding uhhi. Ei Zomite kisappi pen naupang kipattah zia ahihi.
   Tua ahihteh khat leh khat na kigal bawl phial uh a na kilemlo phial uh ahi zong in, na mipih nop tuamna phat tuamna ding ahih leh na minam aa' ding khual in, na vahna na ciahna peuh ah a kuamah peuh na huh theihna zahin huh inla, haazaatna lungsim nei ke'n.

A Tawpna Ah;
   Nang a’ding aa thupi penpen, pilna zon laitak aa kidop ding kong gen nuam lai hi. Tu'n nang kum (16) pha ta aa, tu laitak pen nang aa' in a lau-huai bektak laitak hi; ih ci ding hi. Tangval kipat hunsung pen lungsim kidop mahmah hun ding, Laisiangtho pau leng "ze-etna" tampi thuak laitak ahihi. Gamtat hoih ding leh  hoih lo ding, tua hun mahteh hong kithei khia ta hi. A tom in genleng tua hun laitak in, ngaknu leh ih kikholhpih ih lawm ih gual kidop ding kisam penpen hi.
   Ngaknu tawh kisai lamsang pan a dang gen ta kei leng, kei tuahsa teng mah gen leng kicing gawp inteh. Na theihsa mah bang di'n Manglai tan guk ka on leh ka tangval kipat hong kituak mawk aa, ih pate'n hong hanthot loh sii leh, kei mahmah zong lailam uk zo nawnlo in, Manno ka vangngaih hun laitak ahih sawnsawn tawh, ka lawm ka gual sangkah nawn lote'n lah sangkah tawp ding lam vive hong hanthot bungleh uhteh, keima thu het mah a, a tawp ka hihi.

   Mai lam thu ding themcik zong ngaihsun khol meel lo a, ka lungsim sung ah Manno bekmah vomvom kha in sangkah zop sang’ in ih khua ah om in lokho zaw mai leng ci in ka sangkah ka tawp hi. Manno bang tawh kum nga kum guk sung bang kingai hi napi ung, Pasian in hong gawm kei peuh leh kiteen theih tuan omlo veve ahih ciangin, ngaknu lam peuhmah na lungkham ngaihsut masa nai ke'n. A hun hong tun teh zi nei ta nei ding aa Pasian hong siam hong deihsak na hih nak leh, nang lungkham kullo in hong pai na lel ding hi. Ka laisim gualzo toto peuh leng, kei aa' ding in zi ding ta ding lung hihmawhna  om kei...cih lamin na ciamteh zaw in.

   Tu laitak bang khangmom lai mahmah na hih ciang in nungak khat tawh kingai phot lecin, nang aa' ding phat tuamna hong pia lo taktak ding hi. Khangno lai pen lungsim khensatna leh tupna kician mahmah khat ih neih masak kei leh, kim leh paam bawl in kipuk baih mahmah hi. A diakdiakin ngaknu lamsang na lungzuan lawhloh theihtheih na’ng in, nang leh nang na ki-uk pha mahmah in. Tua banah kham theih guih theih a ne a zang thei na lawm na gual a om leh zong na peel siam hamtang in.

    Kong it mahmah leh kong deihsak mahmah ka nau Luan Pau aw, "MOM LAI LUNGZUAN" ken a na sin khin hi'ng in, ih lenlai ih vahvah lai in zu lak sa lak ngaknu lak ah ih lawm ih gualte tawh va tualbial gawp leng a nop mahmah tei hang in, ih kidop kei leh a tawpkhakna ah ih kongbiang ih bangkua ih nu ih pa kiang ah ih suan ih hil ding peuhmah zang khat zong hong om lo in, eimau siatna lam vive ding hong mainawt pih hi. Kei khelhna pan a hoih ding thei in na kikeem mahmah in la, na lai kumsial aa na on' zawh tawntung na ding bek hi lo in, gual tungtuang a na on zawh ngiatna dingin, na lai na hahkat mahmah ta'n.....
   Hih zah tawh tawp bawl phot ning.
                                                                                                Na dam un.
                                                                                           Hong it,
                                                                                           Na U, Langno.


<<<< Beita >>>>


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MOM LAI LUNGZUAN. Gelh - Pu Awn Za Pau Description: Rating: 5 Reviewed By: Cinpu Zomi
Scroll to Top