728x90 AdSpace

Hot
Menu
Zon-ol na Donate

Latest News

Myanmar, Zogam le Zomite’ Zawnna.

Myanmar, Zogam le Zomite’ Zawnna
Gelh - Pau Sian Lian
Zawnna tehna piciang nam tampi om a, tua lakah a baih pen-in ni khat dollar khat nuai-siah ($1.25 tawh ateh om) a ngahte mizawng ci-in kiciamteh hi. A dang zawnna tehna piciang nam tampi om lai hi. Kawlgam zawna (poverty rate) pen UNDP lam a mipilte’genna ah 2010 kumin 32% hi, ci hi. Kawlgam 1/3 pen zawnna nuai-ah ki-om lai cih ding ahi hi. Kumpite’n bel 2011 kum pekin Kawlgam zawnna 26.5% hi, ci-in pulak uh hi. Journal pawlkhat-ah Kawlgam zawnna taktak pen tudong 46% hi lai, a ci om hi.

Kumpi-in 2015 teh zawnna 16% ahih dong khiap zawh nang hanciam ding cih gen hi. 1987 kum-in UNte’n leitung bupah gamzawng pen (least developed country) sazian ah Kawlgam hong helna uh pan 2015 teh paikhia ding. Tu laitak mikhat’ ngah khasum a zah (3) khangsak zo ding cih a tum uh hingeu hi.

2011 kum Kumpite’n gamvai kikhelna bek hilo-in sumbawlna policy tampi zong hong khel uh ahih manin, khantohna honkhat mah om cih ding hi. Asia Development Bank (ADB)te’hong tuatsakna-ah Kawlgam in hih bangin kikhelna a zop tohtoh leh 2012 kum-in gamsung sumlut (GDP) 8% kahin, a zenzen-in GDP 8%ta kumsim i kahsak det zawh leh 2030 teh Kawlgam pen leitung bupah sumlut laihawl pawlgam (middle income country) ah lut zo dingin hong muang uh hi. Kawlgam pen “Asiate Sahang” (Asia Tiger) hi kha thei ding, “Asiate Aksipi” (Asia Star) a ci tawh, Sen (China) gam bangin khangto mahmah thei ding hi, cih bang liangin hong kilamen na hi mawk hi.

  World Bankte’ ciaptehna ah sumlut tawm gamte ah mikhat in kumkhat in a tam pen US $ 1025 sumlut nei hi, ci hi. Tu laitak ei zong hih dinmun i hi hi. 2030 kum teh gammi khat-in kum khat-in US $ 2000-3000 sumlut nei ding hi, ci-in ADB in hong tuatsak hi. 2030 kum teh mikhat’ kumkhat sumlut pen a zah thum-in khang ding cihna hi. 2030 kum teh sumlut laihawl gam khat i hih zawh ding pen lungdam huai mahmah hi. Ahi zongin i gamvengte tampi pen tua 2030 kum teh sumlut hat gam (high income country) ahih zawh nadinguh a tum, a sawm na himawk uh hi. Gamvengte tawh hauhna le dinmun i kikim nop leh amau zah nih-in nasep hanciam ding hong kul hamtang hi. A sawt nailo khatin Dr U Myint (Chief economic adviser to the president) in a tuattuat teh Kawlgam 2030 teh sumlut laihawl gam ahih ding a um ngam lo dan hihtuak lai hi.

  Kawlgam ngiat hong zin, leitung bup a mipil minthangte’n Kawlgam ading ngaihsut piakna tampi nei uh a, tua te lak pan tawnno cik enkik pak ni.

Joseph Stiglits - Leisung sumpiangte (natural resource) pan a kingah sumte leitung a om mihingte’ sungah (human resource development) tuhkik huai hi. Tua hi keileh, Kawlgam in “Gamhau, mizawng” suak ding hi.

Paul Collier – Kumpi mei mahmah a hoih nading kin masak huai hi. Africa gamlamte’ khantohnate pan zong sintheih ding tam mahmah hi.

Francis Fukuyama – Kawlgam in gamvai-ah a lawpmite (political activists) sangin sumbawlna ah a siam mi (competent economists) tam kisam zawta hi.

  Zogam zawnna pen 2011 kum-in UNDPte’ muhkhiatna-ah mizawng 73.3% ki-himawk hi. Kawlgam ah a zawng pen gam ahi hi. 2004 lai pekin tua zah percentage mah kihi a, tua kum ma lam a saziante nei lehang zong kibang lel kha ding hi. Zomi 40% pen neek le dawn cingtak zong a ne zolo dan kihi mawk hi. Zogam ah innkuan khat-in innsung sum zatna sungah neek le dawn adingin sumngah vekpi lak pan 76% kizang khia hi. Singaporete’n 14%, North Korea 65% hi-in, Kawlgam bup huamleng 71%,  Zogam bekah  76% ahih manin leitung bupah a sukpen kihi ngelngel ding hi.

  Kumpite’ phuatthak National Economic and Social Advisory ah member-in a kihel, Professor Dr Aung Tun Thet (retired - UN College principal) kiangah UNICEFte tawh gam tuamtuamah na sepna tungtawn-in Zogam zawna khiap nading ngaihsutna piakna ka ngen ngei-a a tomno in thu (4) hong gen hi.
(1)   Zomite’ nuntak kivak nadingin gamsung piang van le nate (lenggah, coffee) zuak nading sumzuakna phual (market) kisam ahih manin market zonsak huai hi.
(2)   Zogam tawh a lemthei ding, tam lah a man veva tuan samlo setvan hoih kisam hi. (appropriate technology)
(3)   Biakna pawlpite mah in makaih-in, upna tawh sepkhiatna kisam hi. (faith movement)
(4)   A mun a mual tawh kituakin vai geelsiam theih ding hanciam huai hi. (local solution)

Hih a tunga hong ngaihsut piakte pen seminar khat-ah ka kidot pak uh hi-in, a thukim lo, tha ngah lo le kicing a salo zong tampi om kha thei ding hi. Tedim khua a omte ngiat kiang ka dot kawikawi leh ngaihsut piakna, muhna tampi ka ngah a, tuate pawlkhat kong hawmsawn kik hi.
(1)   Kumpi mei mah hong hoih limlim photleh tua-in vai haksatna tampi hong zawhpih ding hi.
(2)   Education care le health care kinang lua hi. Khuata lamah zato neih sunsunte na ngawnah siavuan kinei zolo hi.
(3)   Sangsia zong tawmlua-in, khua tampi-ah sang sia/siamah nih bek in (khat omna zong tampi) tan lang pan li dong hilh mawk uh hi.
(4)   NGO zong tam nailo-in, a om sunsunte na ngawn sihkham na ciang hipan hi.
(5)   Sumzuakna phual (market) omlo cih kawmkal mahin a zuak sunsunte’ading vanbul (raw material) tak zong i cin zo kei hi.
(6)   Zogam bup Chrsitian i hih lai-takin a zawng pen i hih se pen, a langbai i hi diam?
(7)   Biakna pawi kibawl-in, gan tampi thatin pawi i kham ziahziah laitak i mipih naupang no tampi sang kah zolo-in biakna dang (lutol) te’ sang na bel ziahziah ta uh hi.
(8)   Inn simin gan khawi huai hi. Gan khawina pan innkuan sumlut 35% bang kingah hi.
(9)   Tangpi ading a kikoih vante zong innteek lungsim tawh kepna (ownership spirit) kinei nai ngiatlo hi.
(10)  Ih theih tamin, i tel taktak tawm lai hi. I theih sunsunte zong kinuntak pih taktak lo hi.
(11)  Neih sunsun neektheih mehteh mehgahte zong a lim le cidam tha-om nadingin kihuan thei nai lo hi.
(12)  Neih sunsun leisung piang nate zong a hampi mahin kikem a, man neih beh sakna (value added) kisiam nailo hi. Tua tawh kisai pilna sinhuai hi.    
(13)  Makai lam zawdeuh, i muan i suan khatkhatte lah minam bup, gambup taktak huamin vei zolo lo uh. Amau pianna khua, beh le tanaute bek buaipih thei uh. A veina uh tangzai nailo.
(14)  Gam dangah nasem, pilna sinte’n Zogam tawh kituak, Zogam khua hun tawh kilem, sum suak thei ding, khaici (seed) hoih tampi hong kan, hong zong unla, hong ciahpih un. A tuh dan, a ciin dan zong hong hilh un.

  Hih a tunga thute pen Tedim khua a omte’ muhna, kisapnate amau genna lian bang mahin kong gelhkik ahi hi. Zogam adingin Rural development, Agriculture, Entrepreneurship, Microcredit cihdan pilnate kisam mahmah hi.

  Zogam-ah NGO om sunsunte-ah a semkhate pen thupi kisa, kilungdam pihin, i gamah sum le pai haksat luat manin amau khasum pen a ki-eng dinmun himai hi. Tu laitak a NGO-ah kihelte’veina tawh a sepna uh kimuhsak lua nailo zaw-in, a ngahna uh ki-et sak zaw hi. Ahi zongin i gam khangto taktak hileh, NGOte ah a kihel nuam khempeuhte’n “Ka Pasian nasepna hi. Ka vei man hi keileh khasum hoih nasep tampi ka neihte nusia-in sum meetna nasep ahi lo (non-profit), volunteer nasep ahi NGO-ah sem het kei ning.” cih dinmun hong tung ding hi.

Lai gelhpa Tg. Pau Sian Lian

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Myanmar, Zogam le Zomite’ Zawnna. Description: Rating: 5 Reviewed By: Cinpu Zomi
Scroll to Top