728x90 AdSpace

Hot
Menu
Zon-ol na Donate

Latest News

NANG LEH LAWHCINNA. Gelh - Dong Za Mung

NANG LEH LAWHCINNA
Gelh - Dong Za Mung

THU PATNA
Joshua 1:3 “Moses tungah ka ciam bangin na khe in a totna mun khempeuh nang tungah kong pia hi”.

A lawhcing mi tampitak a om mahbangin lawhcing leh kilawm napi‘n a lawhcing zolo mi tampitak mah na om veve hi. Banghangin lawhcing leh kilawm napi‘n lawhcing zolo mawk uh hiam, ci-in ngaihsun leng: amah le amah kitel lo; sem napi tupna kician neilo; geelna kician neilote na hi uh hi. Tupna nei phial mah leh zong haksatna nengno khat a tuah khak ciangin a lungkia pahpah leh a kimuang ngam lote na hi uh hi.

Paul E. Billheimer in a gelhna ah, ―Mihingte pen ukna a nei dingin hong kipiangsak ihi hi. Hong kibawlcil lai panin vangliatna a nei dingin hong kibawl hi. Pasian khut sungpan i piankhiat ciangin leitung ah uk theihna, kumpi septheihna leh nuntakna ah lawhcinnate ngah a nuam a sa dingin hong kipiangsak ihi hi‖, ci-in a gelh hi.

A lawhcingte in a sia pen dinmun ah a omphial uh hangin a tupna uh sangsak tinten uh a, tha sanin a kalsuan teiteite na hi uh hi. Eite pen Pasian in ama lim-le-mel sunin hongbawl khitciangin thuneihna, lawhcinna khempeuhte tawh thupha hong pia hi. ―…cipha-in tampi pha unla, leitung dimin zo un; tuipi ngasate tung, huihlak vasate tung, leitung ah a gamtaang, a nungtate khempeuh tungah ukna nei ta un, ci hi‖ (Gen. 1:28).

Na kalsuan ngam nakleh na khe in a totna ciang ciang nang tungah Pasian in hong pia ding hi. A lianpi na lamet a na tup leh a lianpi na ngah dinga, a neucik na lamet a na tup leh a neucik mah na ngah ding hi.

I. NANG
A. NANG MAHMAH KITEL MASA IN
Gen.1:26, 27 “Tua ciangin Pasian in, „Eima lim, eimah hong sun in mihing bawl ni …”
v.27 “Tua ahih ciangin Pasian in ama lim bangin mihing piangsakin, Pasian‟ lim bangin amah a piangsak hi…”.

Ps. 139:13 “Banghanghiam cih leh ka pumpi na khempeuh na piangsak a…….”.

A masa penin nang mahmah na kitel, na kitheih masak ding ahi hi. Nang mahmah na kitel nadingin bangteng ngaihsun ding na hiam cih leh:
Pasian‘ lim-le-mel sun mi na hih zia! 
Pasian‘ hong piansak mi na hih zia! 
Pasian‘ tawh kimemat mi na hih zia! 
Pasian‘ it mi na hih zia! 
Pasian‘ innkuanpih na hih zia! 
Pasian‘ hehpihna a ngah mi na hih zia! 
Pasian‘ angvanna a ngah mi na hih zia! 
Pasian‘ hanga a gualzo mi na hih zia! 
Pasian‘ tawh a mangkhawm ding na hih zia! 
Pasian‘ tatkhiatna a ngah mi na hih zia!

TL Osborn in a gelhna ah, ―Hi teng phawk in ci hi: 
 Pasian lim-le-mel suna hong kibawl na hi hi. 
 Aituam mi na hi hi. 
 Pasian ading leh midangte ading mi manpha khat na hi hi.  Na mawhnate sangin hong ki-itna lianzaw hi. 
 Hotkhiatna ngah na hi hi. 
Midangte a huhzo dingin thahatna hong kiguan na hi hi. 
 Pasian gam adingin sawltak khat na hi hi‖, ci-in a gelh hi.

Rick Warren in a laibu sung ah, ―Nang pen Pasian hong bawl na hi a, ama ading mah na hi hi. Tua tel a na theih masiah na nuntakna in man neilo ding hi‖, a ci hi.

A lawhcing ding mi na hih manin nang mahmah na kitela na kitheih masak ding ahi hi.

B. NANG KUA NA HIAM?
Gen. 1:27 “Tua ahih ciangin Pasian in ama lim bangin mihing piang sak…”.

Craig Hill in a laibu ah,―Piancilna Lai Siangtho in eite pen Pasian in ama lim-le-mel suna hong bawl ihi hi, a ci hi. Pasian pen thum gawm ahih mahbangin eite zong thum gawm ihi hi. Pasian pen Pa, Ta, Khasiangtho kigawm hi a, eite zong Kha, Lung sim, Pumpi kigawm ihi hi‖, a ci hi. Pasian in ama lim bangin hong bawl na hi hi. Tua bek thamlo in kha, lungsim, pumpi nei mi khat na hih manin a lawhcing ding mi na hi hi. Pasian lim le mel sun na hi hi.
Pasian piansak mi na hi hi. 
Teeltuam na hi hi. 
Nang bang mi nang bek na hi hi. 
Aituam mi ngiat na hi hi.

1.Teeltuam na hi hi
I Pet. 2:9 “Ahi zongin note pen Pasian in a hong teel khiat minam, kumpi, siampi pawl, a siangtho minam, Pasian‟ mite na hi uh a…Pasian in hong teel mite na hi uh hi”.

Dr.Do Kham in a genna khat ah, “Khua neu, lei vui lakpan na piang a, na khangkhia phial zongin Pasian in hong teeltuam mi na hi a, amah in hong phawk hi”, a ci hi.

Koi mun koi kuam panin na piangkhia phial zongin Pasian in a hong teeltuam ngiat mi khat na hi hi. Teeltuam mi khat na hih manin a lawhcing ding mi na hi hi.

2. Nang bang mi nang bek na hi hi
Jer.1:5 “Gil sungah kong bawl ma-in nang kong thei khin zo hi. Na suah ma-in nang kong teel khia khin zo hi……”.

Leitung ah mihing Billion 7.8 val bang omin a tam mahmah hangin nang bang lian pen nang longal khat zong om lo hi. A kibang mahmah i cih naupengte nangawn na kibang hetlo uh hi.
Mi tawh na kibatloh nate: 
Na thapuak zia mahmah! 
Na ngaihsut zia mahmah! 
Lim na sak zia mahmah! 
Na deih zia mahmah! 
Na gamtat zia mahmah! 
Na uuk zia mahmah! 
Na nopsak zia mahmah! 
Na khuahek zia mahmah! 
Na nuih zia mahmah! 
Na van pahtaak zia mahmah!

Charles R. Swindoll in a gelhna ah, ―Nang tawh kibang nangmah bekngiat na om hi. Na mai puakdan, na pianzia, na awsuah dan, na gamtat dan, na tangthu, na ngeina, na nuih dan, na lampai dan, na khutvik dan, mi na hopih dan leh na muh dan nangma vai khempeuh pen nangmah ahi-NANGMAH-tungpan ahi hi‖, ci-in a gelh hi.
Mihing tampi lakah nang banglian nang bek om na hih manin aangtangin, kipaakin, nuam-in, lungdam in. Midangte tawh kibang loin nang bek na hih manin lawhcin na in nang hong ngak hi.

3. Aituam mi ngiat na hi hi.

Eph. 1:5 “Pasian in Jesuh Khrih hangin ama tate ahi dingin eite a hong bawl ding a seh kholhsa hi a, tua bangin a hong bawl ding pen ama tupna leh a utna ahi hi”.

Na mimal ziate mahmah panin aituam mi na hihna kilang pahlian hi. Na pil a na hai zongin, na din a sang a na din a niam/tom zongin, na melhoih a na melsia zongin nang pen aituam mi ngiat—Pasian in hong sehkholhsa ngiat mi na hi hi.

Rick Warren in a laibu sung ah, ―Na nu in gil sung ah hong paai mapekin Pasian‘ lungsim sungah na om khin hi‖, ci-in a gelh hi. Pasian in na suah mapek pan ama lung sim sungah hong aituam ngaihsut khinzo hi. Abang abang na hi zongin Pasian in ama lim-le-mel sunin hong bawl na hi a, aituam mi ngiat na hi hi.

Aituam mi ngiat na hih manin a lawhcing ding mi na hi hi.

“Na nu‟n hong paai mapekin Pasian in hong paai khin zo hi”. Rick Warren
“Pasian in hun beisak theihna peuh a mihing a bawl hilo ahih manin mi manpha khat na hi hi”. Mary Growley
“Na hihna pen Pasian hong piak hi a, na sepna pen Pasian na piak ahi hi”. Danish Proverb

C. KOI PAN NA HIAM?
Gen. 1:27 “Tua ahih ciangin Pasian in ama lim bang in mihing piangsak in, Pasian‟ lim bang in amah a piangsak hi; amah in pasal leh numei piang sak hi”.

Koi pan na hia lawm? ci-in mi khat in hong dong leh; Ka min: Dong Za Mung; ka pa: Dal Khan Sian; ka beh: Munluah; ka khua: Mauvom; ka minam: Zomi ci-in ka dawng kha ding hi. Tua ka dawn nading pen khial hi kici thei tuanlo hi. Ahi zongin a tangzai zaw, a thuuk zaw in ngaihsun taktak leng eite pen Pasian kiangpan mah; Adam khang panin a kizom suk ihih manin ‗Sian baanzal‘ ihi hi.

Na khua na tui, na beh na phung thupi mahmah a, tuate sangin Pasian hong piansak na hihna leh Pasian kiangpan na hihna thu na tel masak ding thupi zaw hi. Koi pan na hiam-Pasian kiang pan na hi hi. Tuni-in na kipatna tel inla, kiniamsak leh kineusak lo in, thasanin, hanciamna tawh kalsuan lecin lawhcinna nang aa ding ahi hi.

D. KOI AH OM NA HIAM?
Haggai 1:7 “Tua ahih ciangin Vanglian TOPA in ka hong cihin ah: Tu laitaka na om zia uh limtak in ngaihsun un”.

Pasian lim-le-melsun na hihlam na kitheih khit ciang in a lawhcing ding mi na hih manin koi ah om na hiam cih zong na kitel mahmah ding thupi pen hi. Mi tampi takte lawhcing nuam na pi‘n a omna mun kitello uh ahih manin, a laklawh gawpin om kha thei uh hi. Banghanghiam cih leh a tupna, a ngimnate tawh kituak loin a dinmun, a nuntakzia kilehngat kha na hi thei hi.

A lawhcing nuam mi khat na hih leh koi ah om a, bangci khuasak, bangci nuntak, bang tupna nei cihte na kitheihcian masak ding ahi hi. Koi mun ah om na hiam i cih ciangin: na ngaihsutna; na tupna; na sepna te lawhcin nading lampi tawnin a pai hiam cihte a gennuam ihi hi. Lawhcinna lam zuan maw? Lawhsap na lam?

“Koilam manawh na hiam cih na theih kei leh mun khat peuh na tung ding hi”.
Lawrance J. Peter

1. Na tupna
Haggai 1:7 “…..tulaitaka na om zia uh limtak ngaihsun un”.

A lawhcing ding mi khat in a tupna, a omna a telcian masak ding kisam hi. Na tupna bang mun ah om ahi hiam? Pilna, siamnate zongzong, sinsin napi‘n na tupna koi ah om hiam limtakin na ngaihsut masak ding thupi mahmah hi. Tupna na neih kei leh na lawh cing ngei kei ding hi.

Na tupna koi mun ah om a, koici dante geel na hiam? Bangte sep sawm, bawl sawm na hi hiam? Solomon kumpipa‘n, ―Topa ka Pasian‟ min dingin biak inn khat lam ding ka sawm hi” (1Kgs.5:5b) a ci hi. Nang e bang na sawm a? Koi ah na tupna om hiam?

2. Na geelna
Prov. 20:18 “Hoihtak-a geelna tawh na sepna tangtung hi; geelna kician om lopi in galsim dingin kipan kei in”.

Bang teng geelna nei na hiam? Na geelna mahmah limtakin ngaihsun in. Tupna kician na neih khit ciangin bangcih leng tangtun thei ding ka hi hiam ci-a geelna hoih na neih ding ahi hi. Na tupna van dawn ah om napi, na geelna, lei lak khawng beka, kiveivei thapai peuh hilel mawk leh na tupna taangtun zolo kha ding hi teh!

Na geelnate lawhcin nading maw? lawhsap nading? cihte ngaihsun pha in! Na geelna koi ah om hiam?
―Na geelna nang tawh kilehbulh hi loin, na lawhcin na‟ng ahih theih nadingin makaih in”.
Kenneth Hagin Jr.

3. Na sepna
Prov. 4:26 “Na khatpeuh na sepna thu thei telin; tua hi leh na sepna peuhpeuh ma vang ding hi”.

Hun leh nite‘n mite hong ngak lo hi. Na dinmun na theihtel ding thupi a, na lawhcin nadingin na nasep a nam zong bang nam hiam? cih na theihcian ding ahi hi. Hun bei, sum bei a na sepnate lawhcin nading lampi ah a om hiam? Sum le paii beite phamawh kei phial, ahi zongin na hun beisa kila kik thei nawnlo hi. Na hun beite paammaih lua hi.

Na lunglut lohpi khat hun bei, sum bei a na sepsep sangin na lunglutna mun ah om inla, sem lecin nuam na sa dinga na lawhcin pih ding hi. Tua ahih manin koi munah na sem in, bang mun ah om na hi hiam cih ngaihsun pha inla, na lawhcin nadingin na sem in. Mite‘n sem tah ci-in sem kenla, mite‘n a sem kei zongin na uukna ahih naak leh hanciamin sem in. Na lawhcing ding hi.

“Na khat peuhpeuh ihih ciangin mi‟n hih tah ci-a i pum hih, i upmawh hih mawkmawk pen ei ading leh midangte adingin phattuamna om hetlo a, „hih ngei sam‟ cih min bek kingah hi”. TL Mungbawi

II. LAWHCINNA
A. LAWHCINNA I CIH BANG HIAM?
Ps. 1:3 “Amah pen luitui luang gei-a kisuan, ama gah hunin gah a, a teh a vul ngeilo singkung tawh kibang hi. A hihna khempeuh ah a ma pai hi”.

Lawhcinna i cih ciangin san dan leh ngaihsut dan a tuamtuam om kha ding hi. Lawhcinna pen mite sangin matun zo, gualtungtuang, sepna thaman ngah, midangte sang madawk zawkna zong ahi hi. Gualzo, minthang, tupna, geelna bangin taangtun!

Jamie Buckingham in mi lawhcingte ci-a mite ciapteh dan a genna ah:
a) Mi pawlkhatte‘n.. ―Lawhcinna pen sum hau a lungkim taka nuntakna‖, ci uh
b) Pawlkhatte‘n… ―Neihsa gam lianpi nei-in, tuate tawh sum bawlin, gan khawng ahaute‖, ci uh hi.
c) Pawlkhatte‘n… ―Leiba neilo, ama neihsa inn-le-lo, mawtaw (motor) mantam pente hawl, van zuakna thupi tata ah pai-in deihdeih a lei zote‖, ci uh hi.
d) Pawlkhatte‘n… ―Innkuan nuam, zi hoih, pasal hoih leh ta thumang neite‖, ci uh hi. e) Pawlkhatte‘n… ―Nuntak khansau, nat-le-sat tawh ki pelhte‖, ci uh hi‖ ci-in a gelh hi.

John C. Maxwell in bel, ―Lawhcinna i cih pen:
(1). Na nuntakna ii a deihna teltak a theihna,
(2). Na sep theihna khempeuh a tawp donga sem dinga khan tohna leh
(3). Midangte phattuam nadinga nasepna ahi hi‖, ci-in gelh hi.

Lawhcinna pen matun, geelna bangin taang tung, mite sang gualtungtuang zaw cihna ahi hi.
“Mi lawhcing i cihte pen amah a kidenna suangte tawh a bul kiptak-a a phutte ahi hi”.
David Brinkley
“Lawhcinna i cih pen kua vei tuuka, sawm vei thawh kikna ahi hi”. Jon Bonjovi
“Lawhsapna pan pilvang taka hanciam kikna in lawhcinna ahi hi”. Slyvester Stallone (Rambo)
“Tawpsan lo a hangsan taka a sem teiteite lawhcing uh!”. Napoleon Hill

B. LAWHSAPNA I CIH BANG HIAM?
Gen.4:7 “Limtakin hih lecin, nang hong kisanglo ding ahi hiam? Limtakin na hih kei leh nang hong hih nuamin mawhna in hong buk a, nang hong uk nuam hi. Ahih hang in nang in tua mawhna na zawh ding ahi hi‟ a ci hi”.

Lawhsapna pen a sepna ah limtak hih loin a tupna tangtun zolo, guallel, lawhsam, lawhcing zolo cihna ahi hi. Lawhsam cih ciangin ngimna, geelna, tupna, sepnate ah ngah dinga kilawm bang ngahlo, lamet bangin piang zolo, hamphatna sangin ham siatna lam bekah om cihna zong ahi hi.

1. Lawhsapna san dan nam nih!
a). Nam khatna
Lawhsapna pen mi pawlkhatte in a sia lamin a sang uh hi. Amaute‘n a lawhsap uh ciangin ―a tawpna‖ or ―a beina‖ danin sang uh hi. Maizumna-in ngaihsun uh a, thadah-in a nuntakna uh bei lawh liang thei uh hi.

b). Nam nihna
Lawhsapna pen mi pawlkhatte‘n a hoih lamin sang uh hi. Amaute‘n lawhsapna pen “mi hing ngeina hi; a thaka kipat kik nading hun hoih hi”, ci-in hanciamna-in nei uh a lawhcing uh hi.

2. Lawhsapna bang danin na sang hiam?
Dr. Pum Za Thang in a gelhna ah; ―Lawhsapna pen san dan nam nih a om hi. Tuate a sia lam suaksakte leh a hoihlam suaksakte ahi uh hi. A sialam suaksakte‘n-Lawhsapna pen maizumna hi. Lawhsapna pen a tawpna ―a man‖ hi ta, lamet beina hi ci uh a, a hoihlam suaksak ten-Lawhsap khak pen mihing ngeina ahi hi. Lawhsapna pen a tawpna ―a man‖ hi zenzen kei. Lawhsap pen lawhcin nading a kalbi (stepping stone) ahi hi‖ ci-in gelh hi.

Thomas Edison a company innpi mei-in a kat tum khit ciangin a nasemte kiangah, ―Mei-in a kang tum pen a lui teng hi a, tu-in a thakin i pan kik ding hi‖, a ci hi. Nang na lawhcin loh khak ciang bang danin na sang aa? A tawpkhaakin ngaihsun na hiam? A thak kipat kikna dingin hun hoih hi ci-in na ngaih sun hiam?

Lawhsapna masak na hih manin lawhcinna in hong ngak hi.
“Hanciam lo a a tawpsante lawhsam pelmawh ding uh hi”. John C. Maxwell
“A lawhsam mi 99% te pen paulam a zongzongte ahi uh hi”. George Washington Carver
“A sem ngeilote lawhsam ngeilo”. Emmett Le Compte
“Uukna neilote sangin tupna neilote lawhsam zaw uh hi”. Billy Sunday

C. LAWHSAPNA NA TUAH CIANG IN!
John 16:33b “… Leitung gimna na thuak ding uh hi. Ahi zongin keimah in leitung nate zo khin ka hih manin lungnuam in om un‟ a ci hi”.

Lawhcinna leh lawhsapna cihte pen leitung ngeina hi a, nang zong leitung ah a nungta mi khat na hih manin lawhsapna leh lawhcinna a tuak thei mi na hi hi.

Lawhsapna na tuah ciangin bangci danin kalsuan ding na hiam?
o Lawhsapna pen lawhcin nadinga kipatna ahi hi, cih phawk ding!
o Lawhsapna masak na hih manin lawhcinna in hong ngak hi, cih phawk ding!
o Lawhsapna pen mi lawhcingte‘n zong a na tuakkha khin uh hi, cih phawk ding!
o Lawhsapna pen tomkal sung bek hi, cih phawk ding!
o Lawhsapna pen nang bek a tuakkha hilo, cih phawk ding!
o Lawhsapna pen hilhtupa (sia/teacher)hoih khat hi, cih phawk ding!
o A ―hitheilo‖ cih kammal ka dictionary ah om kei ci-ngiat ding! (Napoleon Bonarpate)
o ‗Kaamsia deuh ing‘ ci-in ki ngaihsun lo ding!

Lawhsapna na tuah ciangin ahoih lamin sang in; hilhtupa hoih (good teacher) pen dingin zangto pah inla, lawhcinna kongpi lam ah kalsuan pihpah lian in. Tua hi leh na lawhcinna hong picing dinga, mite adingin zong etteh taak na hi ding hi. Na lawhsapna a hoih lamin sang in.

“Lawhsapna pen pilvang taka kipatkik nading hun hoih ahi hi”. Henry Ford
“Na lawhsap khak manin mi lawhsam na hi kei hi”. Joyce Meyer
“Lawhsap khak pen lawhcinna taktak kipatna hi a, lawhcin nadingin lawhsapna in hong puahpha hi”. Joyce Meyer

D. MI LAWHCINGTE THUSIM

Prov. 3:3-4 “Thumanna leh cihtakna khah suah ngei kei in la, na ngawng ah tuate ok-in, na lungtang tungah gelh in. Tua hi leh, Pasian leh mite‟ mai-ah mai pha ngah in na mavang ding hi”.

Mi lawhcing, mi madawk deuh leh leitung lum let a, a mangmawh ding tangthu a neite in thusim na nei ciat uh hi. Tua a thusimte uh a tangpi-in kibangkim pian tek hi. Mi lawhcing i cihte pen mi lawhsamte mah na hi uh a, a puk ngei, a tuk ngeite mah na hi uh hi. Ahi zongin amaute a tukna mun uah lumcip loin a na tho teiteite, lungkia ngeilo a a hanciam teiteite na hi uh hi.

Prof. C. Thang Za Tuan in a laibu sungah mi lawhcingte leh mi thupite hi bangin na ciamteh a; ―Amaute a tamzaw pen mizawng, mi gentheite‘ innkuan sungpan leh khua ta/neu pan mi khuasuak vive tamzaw uh hi. A sangtun mi ahih nak leh a citak, a kuhkal, a genthei a sekdo deuh, lamet ngimna lian nei a, a thumaan, a sim hanciam den gigete hi zaw uh hi,‖ a ci hi.

Henry Kaiser lawhcinna lampite
A niampen pan a sang pen mun dong tungin mihau minthang Henry Kaiser pen a naupan lai-in a nak zawn mahmah mi khat ahi hi. A ci zong a dam hetlo khat hi a, pau zong awk sawnsawn lai hi. Ahih hangin kum 16 a phak ciangin mihau lawhcing mahmah khat hong hi ta a, sawtpi zong hong cidam hi.

Leitung haksatnate kawmkal panin mihau, mi lawhcing khat hong hi hi. Kum 80 a phakin zong nasep hoih mahmah sem zo lai a, Hawaii tuikhulh gam ah inn lianpi lamin thalawp takin vai hawm zo lai hi.

Thakhat thu-in mihau hong suak ziau bel na hi peuh mah lo hi. Haksatna namkimte sungpan lungkia loin hong sep teiteina hang ahi hi. Hun pen thupi sak mahmah-in minute khat nangawn mawk beisak nuamlo hi. A lup ciang nangawnin a lukham gei ah laibu no khat koih den a, zan a khanlawh ciangin a lungsima a suak idea thakte gelh khia pahpah hi.
Nisim zingsang tungin tuni a sep ding teng a banban in kipanin sem pah a, sun ciangin tuni sep ding a a geelna laibu enkikin a zawh nai lohte a zawh nading hanciamin sem hi.

Ama lawhcinna lampi sagih ahi hi. Tua lampite mi kimin zang thei ding hi ci hi.
1. Tuni pen na ni tawpna ding danin ngaihsun-in nungta inla, na sepna leh na sep dingte na hih theihna zah khempeuh tawh sem in.
2. I ngah ding hamphatna a vekin ei bek sepna tawh kingah zolo hi. Midangte, na lawmte, a pil a siamte kiangpan huhna ngen, a hih keileh amaute tungpan pilna la in.
3. A tangpi mihingte‘n i sep theihna 1/10 bek khawng i zang hi. Nang ii thahatna leh na ngaihsutnate a vekpi-in zang lecin lamet ngamloh lawhcinna na ngah ding hi.
4. Midangte phattuam nadingin na sem in. Nang hangin mite in hamphatna ngah semsem leh nang-aa dingin zong thupha lian semsem hong hi ding hi.
5. Na geel, na tup, na ngim bang hiam? Khensatna kician nei in. Tua teng khit ciangin hahkat takin sem pah in. Na tupna pen na omna pan gamla lua hilo hi cih na mu ding hi.
6. Hangsan inla, thasanna tawh mainawt in. Na tupna na tangtun masiah lungkia kei inla, lung duai takin kalsuan teitei in. Tua bangin na kalsuan leh na kiim na pam a na ma hong dal a nengnengte hong ven lamtak na mu ding hi.
7. Lawhcinna pen eima hih theih tawp khempeuh tawh sepna pan kingah bek hi. A kisam lo nate hangin na hun, na sum leh na tha na ngal beisak kei in. Lawm-le-gual tawh vak suk vak tohna Cinema en a hun beisak nate nusia in.

# Hih a tunga lampi sagihte pen Henry Keisar ii lawhcinna lampi sagihte ahi hi.

Mi lawhcingte pen thakhat thu in a lawhcing hilo uh a, leitung a om haksatna kici khempeuh zong na thuak kha veve uh hi. Ahi zongin tua haksatnate sungpanin thusim nei-in kuhkal takin hong kalsuan uh ciangin mi lawhcingte hong hi uh a, mite enn leh pahtaak pente hong suak uh hi.

Amaute thusim in a tangpi in:
1. Tupna kician nei!
2. Lungkia ngei lo!
3. Thadah lo!
4. Kuhkal ngiat!
5. A siate a pha suak sak!
6. Amah leh amah ki-ukzo!

Mi lawhcingte pen tupna kician nei, lungkia ngeilo, kuhkal ngiat, a siate a pha suaksak leh amau le amau a ki-ukzote na hi uh hi.
1. Tupna kician nei
Prov.15:22 “Lim ngaihsut lo a sepna tawh bang mah piang zo lo a, limtak a geelna tawh ma kitun‟ zo bek hi”.

Mi lawhcing, mi minthangte in tupna kician nei uh hi. Nam nih nam thum saikaak kawmkawm-in nungta lo uh hi. A vom a cih vua leh a vom bekmah ci tinten uh hi. Na khatpeuh a sepna uah tupna gil tawh sem uh a, haksatna a thuakkhakte uh siksanin nei-in thasan uh hi.

Tupna kician a nei Abraham Lincoln in a neulai-in “Ni khat ni ciang America President ka hi ding hi”, ci-in taan 5 (Class V) a sin lai-in na tum tinten khin hi. A tup mahbangin 1860 kum in America-te President hong suak takpi hi.

Indiate Prime Minister 11 na ahi Chandra Shekhar in ―Khat vei teh Indian Prime Minister hih ding ka tup ahi hi”, na ci hi. A tup bangin hong hi takpi mawk hi.

Mi lawhcingte‘n tupna kician nei uh hi.
“Maang khat ka man hi”. Martin Luther King Jr.
“Gualzo dinga kigingte mah a gualzo uh hi”. Ralph Waldo Emerson
“Na maang tangtun ding na deih leh khanglo in”. Yiddish Proverb
“Innkangpi ah a om manin Abraham Lincoln mi thupi hilo a, a tupna hang ahi hi”. Dale Carnegie
“Na geelna bangin nungta inla, na tupna bangin kal suan in”. Henry David
“Tupna nei te‟n leitung khempeuh zo ding uh hi”. D. Ambani
“Tupna in mi khempeuh adingin kisam hi. Mi khat pen a tupna zahzah-in hau ding hi”.  Kim Woo Choong

2. Lungkia ngeilo
Prov.24:10 “Haksatna na tuah ciangin na lung a kiat leh, a gina lo mi na hi hi”.

Mi lawhcingte pen a pilpen teng, a khuak hoihpen teng leh a cidam pen, a thahat pente leh a haupente na hi khollo zaw uh hi. Mi neih bang nei zolo, mi nek bang ne zolo, mi nuai a om, bangmah hilo teng peuh hi thei zaw uh hi.

Mi lawhcing minthang tampi lakah a lungkia ngeilo a, lawhcinna a ngah Abraham Lincoln nuntakna en leng:
1) Tagah, a nu bek tawh khuasa!
2) Zawng lua in singluang inn ah teng!
3) 1831—Sum bawlna ah sumh!
4) 1832—Gamkek ukpi kiteelna ah—ngah lo!
5) 1834—Sumbawlna ah sum leuleu!
6) 1835—A it a nu‘n sihsan!
7) 1836—Lungkia gawp a om!
8) 1838—Gam uk thuvanpi kiteelna ah—ngah lo!
9) 1840—Leitang thusaipi kiteelna ah—ngahlo!
10) 1843—Congress Upa kiteelna ah—ngahlo!
11) 1846—Congress Upa kiteelna ah— ngahlo!
12) 1848—Congress Upa kiteelna ah—ngahlo!
13) 1855—Senate Upa kiteelna ah—ngahlo!
14) 1856—Vice-President kiteelna ah—ngahlo!
15) 1858—Senate Upa kiteelna ah—ngahlo!
16) 1860—America President kiteelna ah—-NGAH!

Abraham Lincoln nuntakna ah lungkiat huai mahmah tase leh amah lungkia loin hong hanciam a, US President hong hi takpi hi. Amah pen tuciang dongin US President te lakah a minthang pen khat ahi hi. A zenzenin na lungkia hi leh US President suak ngeilo ding hi.

Mi lawhcingte thusim in lungkia ngei lo!
“Lungkia, lungkia, lungkia ngei ken”. Winston Churchill
“Na lungkiat ngei kei nak leh na lawhcing ding hi”. Dan O‟Brien
“Lawhcinna thusim in lungkiat ngeilohna ahi hi”. Wilma Mankiller
“Sagih vei na tuk leh giat vei tho in”. Japanese Proverb
“Khatvei bek nungta ding na hih manin lungkia ngei ken. Kalsuan suak in”. Richard E. Grant

3. Thadah lo
Rom.12:11 “Thadah kei unla, nakpi takin na sem un….”

Mi lawhcingte thusim khat in thadah hetlo a nakpi taka na sep ahi hi. Amaute in a hun uh hawm thawh uh a, hanciamin nakpitak in na sem uh hi. Midangte nuamtak ihmu in a naksiat dapdap laitakun na a semsemte ahi uh hi. Mi thadahte pen Pasian‟ cih thadah Satan‟ na ngawn in zang nuamlo hi.

America mi ahi Thomas Edison in ni khat in nai 3/4 sung khawng bek ihmu in sun le zan hanciamin na a sep man tu-in nuamtaka i zat ahi khuaphelep mei (electric) a kipan van a thak nam 2000 val bang hong mu khia, hong bawlkhia ahi hi.

*Henry Ford
Leitung ah mihau in a minthang Henry Ford pen a hanciam leh a kuhkal mi khat mah hi-in thadah hetlo hi. Ama kum 28 a phak ciangin na bawlna (factory) khat ah thuvanpi sem hi. Nuntakna haksat luatna hangin hun khen bek tawh khutsiamna sang khat ah sangsia sem kawm hi. Kicingzo mahmah lo ahih manin nai sia bawlna phual (shop) khat hongin a hun awngkalin nai siate puah kawmin hong sem lai hi. Mi khat bek ahih hangin ni khat in nasep nam thum a sep kawmkal ah a hun awng sunsun ah mawtaw (motor) hong bawl kawmkawm lai hi. Ama hihtheihna zah tawh thadahlo, hanciam, kuhkalin na hong sep manin leitung ah mi haupen khat hong suak hi.

Mi lawhcingte thadah lo hi.
“A neu mahmah hei khat tawh a lian mahmah sing kung khat sat mun peuh leng a tawp ah puk veve hi”. William Shakespeare
“Ka tuukkhak ciangin ka hanciam kik,kik, kik hi”. Nick Vujicic

4. Kuhkal ngiat 
Lam.3:26 “Tua ahih ciangin thuakzawhna tawhngak kenkanzo leng hoih pen hi. A hong hotkhiat ding amah ngak ni”.

Phil.3:13b “…..Tua ahihman in a beisa thute mangngilh bawlin mainawt in ka hanciam a…”.
Mi lawhcingte pen bangzah takin haksatna thuakin, lungkiat huai dinmun ah om mah tase le-uh zong hanciamin kuhkal ngiat uh hi. Haksatna sungah kuhkalna tawh khitui luangliang mah-in hong kal suante na hi uh hi.

Kuhkal i cihciang in ―thadah huai, lungkiat huai, lamet bei huai tase mahleh thadah lo, lungkia lo, lamet na lianpi tawh sem teitei, bawl teitei-in a tawpdong tun”, cihna ahi hi. Mi lawhcingte‘n tua thusim nei uh ahih manun lawhcing uh hi.

 John Aqurwary
1968 kum in Mexican khuapi a kibawl leitung bup Olympic Marathon tai kidemna ah Tanzania gam aitangin John Aqurwary zong va kihel hi. Tua kum Olympic Marathon tai kidemna ah a minthang penpa khat ahi hi. Banghangin minthang hiam cih leh a kuhkalna hang ahi hi. Tai kidem a kipatcil lam un tuuk kha ahih manin a khe langkhat kitansak kha hi. Ahi zongin ki demna pan khawl sawm tuan het loin kuhkal takin hong tai teitei hi. Midang taikidemte khawl mang khinta uh a, amah pen nitak lam nai 7:30 ciangin tung zo pan hi. Mipite‘n zong ciahsan loin a tutna uh pan dingin khut na bet uh a, tha na pia uh hi.

A tawp ciangin ―Banghangin khawllo a dem teitei na hiam?‖,ci-a a dot uh ciang in, ―Ka gam in tai (mile) 7000 gamlatna pekpan hong sawlna pen kidemna sunga a lut bek hi lo-a, a tawp dong dem dinga hong sawl ahi hi‖ ci-in a dawng hi. Tua bangin nat le sat thuakkawmsa mah-in kuhkalna tawh hong dem teitei a, a tawpdong hong tun hi. Tua kum kidemna ah a khatna ngahpa sangin amah min thang zaw, lawhcing zaw hi.

 Panama Canal
Panama Canal (Panama Leitawhtan) pen a tawhtan ma un ahi theilo ding, a piang theilo ding dan a kilang ahi hi. Major General Goethal makaihna tawh hanciamin to uh hi. A kimciang khawng alaih/tawh khit uh ciangin lungkia lua uh leh lamet bei kisa lua uh ahih manin, na semte‘n tawpsan sawmin a van teng uh la-in ciah a sawm uh hi. Tua laitakin Major Genaral Goethal in “to kik un‖ ci-in thu hong pia a, hong to kik uh hi.

Major General Goethal makaihna tawh kuhkal takin hong tawh kik uh leh a tawptawpin hong zo khongkhong uh hi. Tuni dongin leitung bup ni suahna gam leh ni tumna gam lamte sum bawlna teembaw (longh) lampi thupi pen khat suak hi.

Kuhkalna in hong lawhcingsak ding hi. Mi lawhcingte kuhkal ngiat uh hi.
“Lawhcinna leh lawhsapna pen kuhkalna ah kinga hi”. David Sarnoff
“Dokdawn/toktol pen kuhkalna hang bek tawh teem-baw (longh) dawn tungzo hi”.
Charles Spurgeon
“Kuhkalna i cih pen 19 vei tuka a 20 veina ah lawhcinna ahi hi”. Julie Andrews
“Na lawhcin nadingin kuhkalna kisam hi. Kuhkalna in vanglian hi”. Mark R. Douglas

5. A siate pen a pha suaksak
Gen. 50:20 “Note in ahih leh kei tungah a sia dingin na ngaihsun uh hi. Ahih hangin Pasian in tuhun-a mah bangin mi tampi te a nuntak theihna a pian nadingin a hoih dingin a ngaihsut ahi hi”.

Mi pawlkhatte thusia nengno khat hangin siatlawh semsem thei uh a, pawlkhatte in a hoihlam suaksakin lawhcinna in zang uh hi. A ginatlohna uh lawhcinna in zang zaw uh hi.

Mr. Ben Fortson
Kum 24 a phakin Van (motor) a sing a puak sawm leh gam taang khial kha-in a singtum in su kha a, tua ciangin a kawng pan a nuailam teng zaw ahih manin zato mang (doctor)te‘n a khe tegel tansak uh hi. Kaamsia kisa-in khasia mahmah a kum bangtan hiam a om khit nungin, hong kingaihsun pha kik hi. Tua ciangin nuihmai dan, kam siam dan leh omdan siam…cih khawng hong kisin hi. Tua ban ah laisim hong hahkat hi. Tua bek hi loin tumging (music) leh a dangdangte sin a, tua khitciangin Politics ah hong lut hi. A tutphah pei nei (wheel chair) pi mah tawh thu dotna leh dawnna khawng kisin a, thugen khawng hong kisin-in a tawpna ah Georgia State adingin Secretary of State in hong pang hi.

Peng Shuilin
Amah pen Sen gam(China) Hunan Province a teeng khat ahi hi. Kaamsiatna tawh 1995 kum in Truck Mawtaw pi tawh tuahsia kha-in a kawng nuaisiah a kitansak mipa khat ahi hi. Zato ah zato mang (doctor) te‘n a kawng nuaisiah ding hanciamin bawlsak/zopsak tawm uh a, ahi zongin deih bang zolo hi. A kawng nuai siah a om nawnloh hangin kaamphatna tawh a tunglam teng bel hong hoih bilbel hi.

Tua danin a lungkiat huai dinmun ah a om hangin, Peng Shuilin pen lungkia het loin, exercise khawng bawlin hong hanciam toto hi. Tua bang teng tawh sum bawlna lam ah hong lutin van zuakna (store) khat bawl-in a min ―Half Man- Half Price Store‖ (A mi a lang- Van man a lang) ci hi. Amah pen tu-in businessman khat hi-in lawhcing mahmah hi.

Mi lawhcingte in a thanem nate uh thakhauhna in zang uh a, a siate a pha suaksak uh hi.
“A khial ngeilopa pen a sem ngeilo pa hi”. Theodore Roosevelt
“Khat veivei midangte khialhna panin pilna i ngah thei zaw hi”. Henry Wadsworth Longfellow
“A khialhna kipuah nuam lote khialhbeh lailai ding uh hi”. Confucius
“A khialhna pan pilna ngahte‟n lawhcinna tangthu gelh ding uh hi”. Lloyd Cory

6. Amah leh amah ki-ukzo
Prov. 16:32b “…khuapi khat ukna sangin ei ma pumpi ki-uk zawhna hoih zaw hi”.

Mi lawhcingte tangthu kan leng amau leh amau a lungsim, a pumpi a ki-uk zote na hi uh hi. Lawhcin nadingin lungsim, pumpi ki-uk zawhna in a bulpi khat hong hi hi. Ki-ukzo i cih ciangin tupna, ngimna kimakaihsak cihna zong ahi hi.

Ken Gnanakan in a gelhna ah, ―Bang mun leh hun ah ki-ukzawh ding kisam hiam cih leh 1) Na pumpi; 2) Na hun leh 3) Na uuknate ah ahi hi‖, a ci hi.

John C. Maxwell in a gelhna ah, ―Ei-le-ei ki-ukna i cih in-I sep nop loh pen sem a, i tupna ah lawhcinna ngahna ahi hi. Na lawhcin khit ciangin nang-le-nang na ki-uk zawhna in hong makaih kik dinga na deihte na ngah ding hi. Nisimin ki-ukzo lecin na kisek to semsem dinga nuamsa-in na lawhcing ding hi‖, ci-in gelh hi.

Mi lawhcingte pen tupna mitsuanin ihmutsuah simin zong ihmu lo, gilkial simin zong an ne lo, gim simin zong tawlnga lo uh hi. A duh, a deih khempeuh uh ne in, lei pah pah lo uh a, a ut loh danun om zaw, nungta zaw, khuasa zaw uh hi. Amau leh amau ki-uk ngiat uh hi.
Daniel leh a lawmte (Daniel 1)

Judah gam ah kumpi Jehoiakin in a uk a kum thumna ciangin Babylon kumpi Nebuchadnezzar in Jerusalem hong simin hong zo a, Judah mite saal-in kaai hi. Judah kumpipa leh Biakinnpi-a van hon khat zong a gam vuah ciahpih hi. Tua lakah Daniel leh a lawmte zong hong kihel kha uh hi. Babylon pilnate sin dingin Daniel leh a lawmte zong hong kiteel kha hi.
Amaute pen kumpi inn sunga nasem dangte mahbangin nisim-in an leh lenggahzu tawh a kivak dingin kumpipa in thu pia hi. Ahi zongin Daniel in kumpipa inn sung a om an leh lenggahzu tawh a pumpi a thanghuaisak lohna dingin a lungsim a khensat hi (v.8).
Danielte lawmta in kumpipa an leh lenggahzu a duhlo zong hilo kha ding uh hi. Ahi zongin a pumpi uh thanghuai sak nuamlo uh hi. Amau leh amau ki-ukzo uh a, Topa in thupha a pia hi. Amau leh amau a ki-uk zawhna hangun a dang teng khempeuh sangin a hoih zawk tuam lam uh mu uh hi (v.19). Tua ahihman kumpipa vaihawmna gam sungah ulian pawl suak uh hi. A lawhcing uh hi.

Mi lawhcingte amau leh amau ki-uk zote ahi hi.
“Midangte upmawh loh mipawl khat lawhcing uh hi. Ahi zongin amah leh amah a kimuangngam lote lawhcing ngeilo uh hi”. Herb True
“Kimuan‟ ngamna in midangte nuntakna ahoih zaw in khel thei hi. Na theih gige dingin ah nang-le-nang a gualzo dingin ki-um lecin nang adingin leitung hong hoih ding hi”. Mary Ann Mobley
“Lawhcinna thusim in kimuan‟ ngamna ahi hi”. C.N.Bovee

THU KHUPNA

Gen.1:26 “Tua ciangin Pasian in, „Eima lim, eimah hong sunin mihing bawl ni; tuipi ngate tung, huih lak vasate tung, gan hingte tung, leitung khempeuh tung, lei tunga a bokvakte khempeuh tungah ukna neisak ni‟ ci hi”.

Rom.8:28 “Ama deihna bang a sem dingin Pasianin a hong sap amah a it eite‟ adingin na khempeuh a hoih lamin piangsak hi, ci-in i thei hi”.

Nang pen Pasian lim-le-mel sun-in leitung ah a nungta mi khat na hihna na kitel leh Pasian hong piak septheihna, hihtheihnate zangin hanciam, kuhkal, lungkia loin na kalsuan leh lawhcinna nang ading ahi hi. Leitung ah mi lawhcingte‘n lawhsapna cihte na thuak masa uh hi. A lawhcing i cih mite pen a lawhsam mite mah ahi uh hi.

Topa in midangte zong lawhcinna pia ahih leh nang zong hong pia taktak ding hi.

Lai gelhpa Sia Dong Za Mung.

Source : LAWHCINNA LAMPI (Laibu)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NANG LEH LAWHCINNA. Gelh - Dong Za Mung Description: Rating: 5 Reviewed By: Cinpu Zomi
Scroll to Top