728x90 AdSpace

Hot
Menu
Zon-ol na Donate

Latest News

Tangpi Khantohnading (Towards Social development). Gelh : Pau Sian Lian

Tangpi Khantohnading
(Towards Social development)
Gelh : Pau Sian Lian


Tuni dong mah Zogam thu mi namdangte in hong kidot ciangin a nungta Pasian a bia gam le Kawlgam ah a zawng pen gam i hih lam ka zom pahpah kha hi. Pasian bia gam dingin bang hang zawngpen cih zong ngaihsut huaikhat hi. 2010 khit kumpi thak i neih khitteh gamtawng lamah tangpi nasemte’ khasum kumpi in a zah nihin khan a, i gamah zong nuamtuam kisa, kitheituam mahmah hi. Tua bek tham lo gamdang ah tun, a teeng kitam semsem ta-in, gamdang pan sumlut khauhpai zaw semsem ta hi. Ahi zongin hih dinmunte pen nidang tawh i tehkakna-in nuntakna nuamtuam zawbek hi a, midangte tawh kiteh kak lehang bangmah kihitham nai hiaulo hi.
Photo credit : Cinpu Zomi
Mizoram State lam pan Zogam(Chin State) lam aki zaih hi.

     Leitung muntuamtuam a kithehthang Zomite’n i gam, mipihte huh, puahin zuun ding thu kilim gen mahmah, kivei semsemta a, lungdam huai mahmah hi. Tua ahih manin i gam koici puah ding i hiam, cih pen phatakin ngaihsut huai hi. Professor Hans Rosling thugente bulphuhin Zomite khantoh theih nadingin thu pawlkhat kong sung ding hi. Amah pen zato siavuan khat lah hi-in, Africa gamah kum 20 val teengin khantohna tawh kisai thugil tampi a kankhia, a mukhia ngiat mipil mahmah khat hi. Tu laitak zong Bill Gate tawh kithuah-in zawnna ngaunate a dokhawm khat hi. Ama’ gen pawlkhat bulphuh kawmsa le Zogam ah thugil kanna (research) bawlna vai-in ka zin zeelna pan ka theihkhak thute kong sung nuam hi.

     Thu khatna-ah, zawnna nungngatin i khantoh theih nadingin setkhuak siamna ci ding i hiam, technology cih hong thupi mahmah hi. Technology i cihteh laithei loteng computer tawisak ni cihna hipah sam lo-in, i gam a piang mehteh mehgah, singggahte zatsiam, kepsiam, bawlsiam nading cihna lam hizaw hi. Gentehna-in, Zogam ah ka zinsim ka zak theihzeel khatah huan le lo pan a piang sahawk, lenggah, singgah tuamtuamte a minteh nek manman ne, zuak manman zuak cih himawkin a kine manlo, a kizuakman lo, a kikhawng pahlote hun tomno sungin a muat hiziau mawk hi. Tuate a muat pah lohnang, hun sawtpi kemin sum asuah nading pilna kinei lo hi. Tua munah i technology cih kisam mahmah hi.

     Vaimim ciang nangawn zong tudong mah sum mah tawh a kisusu hi lai hi. Tua mun ah mihing thatang bei lo-in mihing tha tawh nibup a kisemte settha tawh minute 10 in a kizo thei lua ta hi. Set tawh nasem theile hang kum 70, 80 a phasa pitek putekte  nangawn in olno takin na tampi a sem thei lai uh suak hi. Mi khempeuh mannei, kizang thei ding hihang. Zogam ah a kigen thei zeel mahmah thu khat in, i gamah vaimin bek tuh thapai lo-in gam-le-lei tawh a kilem, a kisuan thei, sumsuak thei ding adang khaici hoih nono bangteng om hiam cih gam tuamtuam a om mipihte’n hong zonsak zo leh  cih pen hong thupi simsim hi. 

     Thu nihna ah, van zuakna phual (market) zong i zon kul hi. Zong ding i hiam ahih keh bawltawm in mi kizuan sak ding i hiam cih khat hi ding hi. Ih Zogam ah tu laitak lenggah, zawngtah, elephant food yam (kawllai - wahuh) cihte mun dang pan broker (pwesar) te’n hong tan zeel uh hi. Hi theileh ei-ngiat in pwesarte kullo in van zuakna phual ngiat ah direct in vazuak theile hang sum meet tampi kingah beh ding hi.

Tua ahih leh market i cih vanzuakna phual dong i vante a tun theihna dingin bangteng kisam hiam?
1. Sang pilna (school) kisam hi. Laisim theilo, ganan tuat theilo khat in van manpha tampi a nei zongin zatsiam theilo ding hi. Tua ahih manin sum le pai i deih mahmah ta zongin pilna a hiciang khatmah i zonkul ding hi (ahihkeh) pilna zontheih nading i panpih kul hi.
2. Mi khat in bangzah ta-in pil-in a siamta zongin cidam keileh bangmah kisem thei tuanlo hi. Innkuan sungah tate cina-in ngap keileh nulepa, innkuan pihte’n a pualam bangmah semthei lohi. I gamah cidamna lam kikepna pen nanglua mahmah ahih lam i theih ciatsa hi. Hi theileh Tedim bangah basic nurse aid training ciang peuhmah nei thei-in, Zogam a om khuakim pan khuamite ngiat teel-in tuate training pia zo lehang, kumpite’n a khuakhua ah siavuan siamah hong puak zokei phial zongun tampi phatuam veve ding hi.
3. I gam pen mualkuam, kenkawm ah om ahih manin infrastructure lam zong kinhuai mahmah hi. I huan le lote pan a piang mehteh mehgahte mundang khua dangah pua-in i zuak theih nang lampi hoih kisam mahmah hi.  A lungdam huai mahmah khatah tu laitak i gamah leito set i cih bulldozer a nei ki-om liplip ta ahih manin, khua kim ciatin ko khua-ah motor a tun mateng, saikel banghun banghun a tun ziauhziauh theih mateng cih i hanciam lai ding hi. Khua om khempeuh i kizop sak ngeingai loh in pianglo ding hi.
4. Sumbul leitawi theih (credit) zatpak theih ding zong i neih huai hi.  Vai tampi ah nasep i kipat nop hangin sumbul nei kei lehang kitang thei mahmah lo hi. A meet tamlua lak loh (zong lalo phial), sumbul zattheih nang vaihawm huai mahmah hi.
Yangon khuasung lamgei ah Rakhine an zuak numei khat a sai kipat dan ka dot leh amah zong a tungin sum neilo pimah, sai hon zawh nadng Rakhine Associationte kiang sum na kileitawi theidan hi. Kawlgam sum 150, 000 ks leitawi khitteh sai neu khat a kipat leh kha 2 sungin loh kikzo-in amah le amah sai nei nu suakziau mawk hi. Ei kiangah zong a dan hoihtak in hihsiam lehang hih sumbul leitawina tawh nasep a kipan nuamte’n tampi mah nuamtuam lawh ding hi.
5. Hih teng i neih khitteh a thupi laikhat ah thu le la kizakna (information) zong thupi mahmah hi. Eimite pen thu-ip sim khawng kiva mahmah hihang. I mipih sapihte’ noptuam nading ahih leh kipan pihin kitheihsak ding thupi ding hi. Koilai munah bang om, kuate’n bang deih in, bang kizuak thei cih a kipan kitheihsak zawhnang hanciam kul hi.

     Tu laitak Zomi Radio neih zawh nading i hanciam laitak hi-in, i neihzawh teh thuhoih lahoih tampi, thuthang tuamtuamte i kizaksak kul hi. Khantohna tawh kisai a kantelte’n thu le la kihopsawnna pen mihing thapia-in thuneihsakna (human empowerment) hoih mahmah khat in a ciapteh uh ahi hi. I minam, i gam puahin, lapsang nadingin hih a tunga te hihtheih zahin hanciam lehang tampi mah kithei hanhan dingin ka lamen hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Tangpi Khantohnading (Towards Social development). Gelh : Pau Sian Lian Description: Rating: 5 Reviewed By: Cinpu Zomi
Scroll to Top