728x90 AdSpace

Hot
Menu
Zon-ol na Donate

Latest News

A Hoih Ki-Ukna (Good Governance). Gelh - Bob Tuangpi

A Hoih Ki-Ukna (Good Governance)
Gelh - Bob Tuangpi
                                 
Leitungah ki ukna tuamtuam om tek hi. Communism, Dictatorhip, Socialism, Anarchism, Monarchism, Constitutional Monarchism, Facism,Nazism leh Democracy cih bang om aa, Democracy bebekah zong Social Democracy, Liberal Democracy, Federal Democracy cih bangin kikhen toto lai hi. Tua ki ukna te a hun tawh ki zui in hun tawh kituak thei dingin kikhel toto hi. Nidang taangtawng pekpanin tua kiukna thupomzia kidemna ( thauvui thautang tawh kidona panin a thu tawh kidona, ideology conflicts ) tawh galpi nihna khit  zawh pan kipan 1990’s ciang lungsim galdona(cold war) ciangdong nasia mahmah hi. 1990 khit panin Soviet Union sial-ekk satzan a bat khit teh leitung gamthu ki ukna tawh kisai mipilte lakah kam kiseelna(debate) nasia takin hong piangkhia kik leuleu hi. Tua in leitung gam ki-ukna ah thutawh kidemna(ideological competition) beita hi, a ci tawh beinailo hi, a ci pawl tawh khennih kisuah uh hi. 


Ahizongin 21th century tuhun tak ciangin leitung bup phial (sehli suah sehthum 75%) bangin Democracy tawh ki-ukna amau gam tangthu, ngeina, a tuahkhak uh thute tungtawnin amau gam tawh kituak dingin Democracy amau dan tek tawh zanghciat ta uh hi.  Manglai-in Democracy cih kammal pen Greek kammal Demo(mipi) leh Kratos(ki-ukna) kigawmin Demokratos(mipi thuneihna ki-ukna) cih pan hong piang khia ahi hi.       
   
2010 pawlin leitungah apiang ngeilo gamthu khanlawhna(political awakening) nisuahna gamlaita(middle east) gamte ah hong piangkhia aa Arab khuakhal (Arab Spring) cih hong kipan aa, tua in mitawmno khatin biakna paulapin ukcipna(ditactorship) ki-ukna tawh gammite zawhthawh bawlna pan mipi tangpi tangta gammite thuneihna tawh ki-ukna(democracy) ngetna huihpi hong nungin tu in lamzang mahmah ta hi. Zogam leh Zomi zongh mangkang gamkekte hun ma pekin India in lah hong uklo Kawl kumpi in lah thu hong neilo in eima dan tawh I ngeina  zangh in ei leh ei ki uk te ihi hi. Mangkang gamkekte( British colony) khut sung pan suahtakna lakhawm ding cih paulap hoih mahmah tawh  kawlmi makaipi Gen. Aung San leh apawlte in mualtung gamte(hills region) leh zanggam adiakdiakin kawlmite( flat region) kipawl in kibeel pawlna gam(Union) phutkhia in mangkang gamkekte khut sungpan suahtkana lakhia ding cih tawh mualtungmi makaite( Kachin, Shan, Chin) te thuzawhin Panglong Agreement tawh thukimna na neihpih in kamciam tampi na pia aa, 1948 kumin mangkang gamkekte’ khut sungpan suahtakna kipawlin kilakhia zo hi.            
A hoih ki-ukna (good governance)tawh akalsuan gamkhat ahih theih nadingin anuai aa thubulpi te tawh akilam kul hi. Tuate pen ki-ukna hoih kitehna piciang(the pillars of democracy/ good governance) ahuampi-in kici thei hi.  

Mikim Huamkimna (Inclusiveness)            
Apil asiam ahaute bebek in gamkhat makaihna, teeltuam pawlkhat in makaihna(exclusive) hilo ding aa, mikim ahuam, tangpi tangta ahuamkim, mikhempeuh ahuamkim ki-ukna(inclusive governance) ahih ding thupi hi. Doctorate vive, leitung aa sanghoih vive pan aa man mitawmno khat(elite) te leh mihau sumhaute bek thuneihna(crony) peisuk peitoh hilo ding hi. Gammite kihelna( citizen participation) a om banah, gammite in gamthu(politics) ah suaktatakin semthei ding uh hi. Gam makaite kiteelna(election) ah adeih makai uh teelna meekhiatna( voting) suaktatakin piathei ding uh hi. Gambup tawh kisai vai khat pepeuhah mipi kikhopna( people’s forum) cihte leh thukhat pepeuh deihna pulaktheihna kinial ngeingaina( freedom of speech&debate) cihte ahunzui-in bawlthei ding uh hi.   

Kileekkim Dimdiam Thuneihna( Check and Balance/Separation of Powers)       
Ki-ukna hoih tawh a kalsuan gam(democracy) khat ahih nadingin thuneite in athuneihna uh akhengvalin azatloh nadingun gamuknaza asemte( executive), thukhun bawl pawlte( legislature) leh thukhen pawlte( judiciary) cihte khat leh khat alampiallohna dingun kikang dimdiam ding uh hi. Hih panmun thumte in kuamah khutnuai ah om tuanlo(independent body)hiding uh aa,gambup thukhunpi( constitution) in amaute tungah apiak thuneihnate amau munciatah zangh ding uh hi. Thuneihna khengvalin zatna leh golhgukneekna(corruption) cihte apalsat  khat pepeuh a om leh adangte in thuhilhin thukhun om bangin mawhsakna paih ding hi. Tua ahih manin ki-ukna hoih(good governance) a om theih nadingin akileekkim dimdiam thuneihna(check and balance) a om loh phamawh hi.  

Liangko Kikimna( Equality)           
Gammi khat hihna tawh gammi khempeuh in gammi khat ii ngah ding hamphatnate kikim diamdiam-in guptuam paihtuam omlo ding hi. A ngah ding uh hamphatna tanh(rights) kikim ding hi. Tanglai kumpi ki-ukna(monarchy) danin gamuknaza apa asih teh atate in luahsuk cih bang hilo dingin mikim gammi khempeuhin makai septheihna amau siamna leh hihtheihna(quality) zui-in septheihna liangkokimna( equality) nei ding uh hi. Tua pen gambup thukhunpi ii piak hamphatna hiding aa, kuamah thukham tungah om theilo ding hi( no one is above the law) cih tawh kigamta ding hi. Liankokikimna cih ciangin, mikhat khedap nambat size(6)na piak leh amah sangin kheneuzawkhat nambat size(6) mah pia cihna hilo aa, akheneuzawpa ahih leh ama khe tawh kituak ama deihna bangin geelsiamsakna(Equity) ahi hi. Mihing tetek akibang, amau pianzia leh kisapna tungtawnin, amau ngah ding sehtanh, amau lungkimna zui-in hamphatna piakna (equity) om ding aa, mihing hihna tawh mihing ngeina, mihing danin kiho, kizom kinungta-in mihing hihna, kikimna kikuitungsak ding hi. Minampi te panmun( majority role) a om mah bangin minamneu te hamphatna( minority rights) cih tawh kikalsuan diamdiam ding aa, minampi(majority) pawl-in gamthu ah lungsim picingtakin minamtawm(minority/ethnicity) te hamphatna kepbitsaknanei( political tolerance) aneih ban vuah khat leh khat ki zahtakna( mutual respect) om ding hi.   

Thuneihna Hawmdimdiamna(Decentralization of  Power/resource Sharing) 
A hoih ki-ukna om theih nadingin thuneihna hawm dimdiam ding kisam hi. Mun khempeuhah aphualpi pan thukhempeuh peisuk peitohna(centralize or centralization) kalsuanzia tawh gamkhat khangto theilo hi(gtna:Myanmar, N.Korea). Aphualpi in gambup tawh kisai ah thuneihna atamzaw nei ding aa, ahizongin gamke( state&division/region) te ah aphualpi( Nay Pyi Taw) in thu va neito lualo ding hi. Atawdap(grass roots/village level) pan Myone(township level), khazyai(district level) pan State/region pan aphualpi(central government) cih bangin amau munciat(local) pan gambup(national) cih bangin thuneihna kikhilsuk kithuap dimdiam ding hi.   

Mihing Hamphatna( Human Rights)          
Leitung mihing khempeuh in pianpih hamphatna(birthright) kinei tek hi. Mipi ki-ukna(democracy) ii thuguipi ahi suahtakna, liangkokikimna leh thutangna(liberty, equality & justice) cihte mipi in neikim zanghthei kim  ding uh hi.  Gambup ii thuneihna thahatna( sovereignty) in gamsung mite tungtawnin hong piang khia ahih mah bangin gammi khempeuh in suahtakna, liangkokikimna leh thutangna cihte akikim-in ngah ding uh aa, tua bang mah in gamuk kumpi in zongh gammite(citizens) tungah thukhun om bangin gamta ding uh hi. Mihing hamphatna(human rights) ah nam tampi tak om toto lai hi. Mi khempeuh pilsin theihna(right to education), ankhing khamna( right to food), suaktatak pautheihna(freedom of speech), suaktatak lungphotheihna(freedom of expression), pawlzawt theihna(freedom of organization) suaktatak kikhoptheihna( freedom of assembly), thukizakna suahtakna( freedom of social media),gamsung om minam tuamtuamte ngeina kepcing theihna(social& culture rights), gamthu ah mikim kiheltheihna(political rights), mikim ahuam  hamphatna(collective rights)  sumbawl suahtakna( economic freedom/free market economy) ,mihing hamphatna thuneihna leh thupitna mihingvaang kepna( human dignity),tangpi tangtate ngaihsutna(public opinion)zahtakna, suaktatak thutuamlentheihna(agree to disagree) cih teng banah leitungbup(UN members) khempeuh in azuih ding aa kitangkokhia mihing hamphatna(universal declaration of human rights1948/article30) bangin kikalsuanna om ding hi. Bang hang hiam cih leh hih mihing thupitna hamphatna(human rights) in ki-ukna hoih(good governance) ading leh mipithuneihna tawh ki-ukna(democracy) ii thugilpi/thubulpi ahi hi. Eimihing khempeuh hong bawlpa/piangsakpa Vanglian Pasian in liangkokikim leh akibang in hong bawl ahi hi(We, the humans were equally born and created by the divine creator,USA declaration of independence, 2nd paragraph,1st&2nd line). 

Asiangthosuakta leh Thutang Kiteelna(Free and Fair Election)  
Asuaktak gamkhat hihna tawh gambup thukhunpi(constitution) ah zuih ding leh sepzia dingdan ding akikhungsa thu om bangin kumli khatvei(gtna:USA),kumnga khatvei(gtna:Myanmar) sial-in gammakai kiteelna om den ding aa, tua bang kiteelna aom sim-in kiteelna pen thuman leh siangtho kiteelna hiding hi. Thumanlo tawh mee(vote) ngahna cihte zanghlo dingin, party khat leh khat kidem ding uh hi. Alel pawlte in lungsim picingtakin azote tutna awn ding uh aa, azote in zongh asiamtawp un mipi deihna(people’s will), mipi kisapna(people’s need) mitsuan(people’s centred/focus) in gamkhantoh nang(national interest) hamciam ding uh hi. Gambup thukhunpi in a ciangtanzahhun khelvalin kuamah in gam makai semtheilo ding hi. Kidemna ah alelte pawlin gammite leh thukhunpi zahtaknaneitheihna(accepting the result of election) tawh azote pawl tungah gam uknaza pia ding uh hi. Gamukza ngah pawl-in a uk hun sungun gamsungah daihna leh khantohna kilemna aom theih nadingin amau mahmah in thukhun tawh nungta gamtang ding uh ah aa, gammite in zong azuih nading(rule of laws) tawh makaih ding uh hi.
  
Tua bang gambup kiteelna(general election) ah party khat leh nih bek hilo ding aa, pary tuamtuam tampitak kidemna(multi-party system) hiding hi. Mipi deihna tawh ki-ukna(democracy) gamte ah mipiteel(elected party/representative) te bekin gamukza sem uh hi. Ahizongin gam tuamtuam(gtna: China) cih bang leuleu-in mipi teelna himah leh party khat bek(one party system) zangh uh aa, akumzui, a uhamzaw(senior) zui-in paisak uh hi. Tua bang kiteelna ah gam makaipi (president&prime minister) ding pen mipi deihlah hiding(popular), zongh pilmahmah ding(qualified) ding cih bangdan tawh makai teel uh ahih manin (meritocracy/ selected&elected) ci-in kalsuan uh hi.   

Vaipuaklakna Leh Mawhpuaklakna(Responsibility& Accountability)            
Gamsung aa om gammite leh gamukza sem kumpite ahizongin ihamphatna(rights) khempeuhah vaipuaklakna(responsibility) kineitek hi. Mi khempeuh in mawtaw hawltheihna(driving licence) aneih theih hangin a mawtaw hawlna lampi ah azuih ding vaipuaklakna(responsibility) anei gige tek hi. Adiakdiakin gamuk kumpi makaite in gammite kisapna leh ngah ding hamphatnate( basic needs& fundamental rights) apiak zawh ding alutung vuah a om banah vaipuakna(responsibility) anei uh hi. Tua banah gambup tawh kisai ahizongin, munkhat khuakhat(local/village level) hita leh gambuphuam(nationwide) thute ah ahizongin vaikhat pepeuh ahawm ageel ciangin gammite deihna lakna(referendum) nei phot ding uh aa, mipi deihna(concensus) atheih khit uh ciangin asep abawl ding uh (project) khat pepeuh ah kiciantakin mipiteel ding thugencianna(transparency) aneih hamtang ding uh ahi hi.

Tua bang hikei leh gammite in gamuk kumpite muanna haksa(less of trust) tawntung hi.Tua bek thamlo-in tua bang nasepna ah asia apha mawhpuaklakna(accountability) nei ding uh hi. Tua in ki-ukna hoih hi aa, mipi leh makaite kikalah kimuanna(trust) omsak tawntung ahi hi. Gammite hita leh kumpipa nangawn in asep abawlna khempeuh ahamphatna(rights) ah vaipuaklakna leh mawhpuaklakna(responsibility&accountability) neiciat uh hi. A thupi mahmah khatah ki-ukna hoih(good governanc) ahih theihna dingin gam-uk kumpi makaite bek mawhpuak hisamlo-aa,   munlaksiam gammi(citizen duty), gammi hoih( good citizen) leh atangzang akizen gammi(active citizen) kisam hamtang hi.   

Thukong Khakna(Concluding Remarks
Igam (Union of Myanmar) in 1948 kum aa kipanin asuakta gam(sovereignty country) hi. 1947-1958(1947 constitution) thukhunpi tawh parliament democracy tawh kikalsuan-in ASEAN gambupah akhangto mahmah gam khat kihi ngei hi. 1958-1960 kum sung, innngak kumpi(house caretaker government) tawh tawmvei sung kimakaih to hi. 1962-1974 kum sung tengin tawlanzyii council ( revolutionary council)cih tawh galkap thuneihna nuai-ah kilutsuk hi. 1974-1988 kikal sungin(1974 constitution/Burmese way to socialism) cih bangin one party system tawh kitawn leuleu hi. 1988 khit nungsiah ah galkap makaihna mah tawh(state law and order restoration council-SLORC&state peace and development council-SPDC) cih bangin galkap ukna nuai-ah ki opcip dikdek hi. Ahizongin (2008 constitution) tawh march, 2011 kumpi thak (disciplined democracy/ clean government&good governance) tawh hong kipan khin hi. Mipi ki-ukna (democracy) ah hong paipih hi ung, ci na pi un atung aa tehna piciang(good governance/the pillars of democracy) cihte kumpi thak in hong zangzo nailo uh cih kimu hi. Gam kikhelna ahih leh mipithuneihna ki-ukna(democracy) hizo tatak nailo-in mipideihna tawmnokhat alangkihel(quasi-democracy) kici thei pan hi.

1964 kum Gen.Ne Win hunin tangpi tangta neihsa khempeuh gambup kumpi aa suahsakna(nationalization/nationalized)in gammite zawnna tawh kidim hi. Tua khit leuleu 1988 kum khit galkap kumpi mahin gamuknaza(political power) khempeuh alakkik khit vuah tua mipi neihsa alaksakte uh pen mipite tungah piakikna(privatization) bawlkik ung, ci uh hi napi’n tuni ciang dong anuamsa, ahau te galkapte tawh kinaihuai teng bek mah in nopsaklawh uh hi. Galkapte gamthu pan anungkikna ding uh hun(demilitarization) ding pen kum tamsim khat mah ngakkul lai ding hi, ci uh hi.              


Tua ahih manin, igam makaite in mipideihna zahtaknailo(autocracy)paizia tawh paipai lai uh aa, mipi thusimnailo uh hi, cih atung aa tehna piciangte i-et ciangin kimu thei hi. Mailamah ahoih ki-ukna mipi thuneihna gam tatak isuah theih nadingin imaban tampitak omlai hi, cih kimu thei hi.   
Agelh:Bob Tuangpi(Mauvom)
Refs: The Principles of Democracy& Democracy Sourcebook.  

***********************************************
date:Thu, Apr 7, 2016 at 4:19 AM in Bob Tuangpi in Zomi eLibrary / Laibusaal ading in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A Hoih Ki-Ukna (Good Governance). Gelh - Bob Tuangpi Description: Rating: 5 Reviewed By: Cinpu Zomi
Scroll to Top