728x90 AdSpace

Hot
Menu
Zon-ol na Donate

Latest News

Anuamsa Nuntakna (Happy Life). Gelh - Bob Tuangpi

Anuamsa Nuntakna (Happy Life)
Gelh - Bob Tuangpi
Photo : Bob Tuangpi

Mi khempeuh in nuamsa lungnuam in tawldam nuam ciat hi. Mite in alungnop a nopsak lungkimna ding uh ahih naak leh a neihsa na manpha pente nangawn itsiitlo-in piakhia ngam uh hi. Ahizongin mihingte in a gulnopna lungkimna uh a susia thei nawngkaisak nate sem-in ngaihsun zel hi. Tua ahih manin mite I lungnop lungkim nopsak theihna dingin I lungkimna hong susia hong guksak nate I kiim leh paam a thupiangte hong lungkimsak hong lungnuamsak ding nate thute tawh I nelhsiah ding kisam hi. Na nisim nuntakna ah lungdam kipahna tawh zingni suakkhawmin lungnop maitaina tawh zan na lupna na zuatnop leh anuai aa thu nam(23) tawh nungta kalsuan sawm lecin:

1) Na ngahnailoh na muhnailoh nate khat pepeuh hangin kisialkhol-in om laplap kei inla tu tadih a nasep ding omte lawptak lungkimtakin sem inla na ngahnailoh nate asawtlo-in ngah ding cih upna tawh nasep ding omte sem masa in!
2) Ngalkhaat bangin nang bek tangtat kenla na lungsim sungah na ngaihsut thuakna(feeling) na ki maingappih na it na lawm na gualte' kiangah pulaak suungkhia in!

3) Nang leh nang midangte tawh ki tawiteh thapai kei in! Tua bang na hih leh leitung tulvei a kilumlet zongin na lungkim ngeilo ding hi. Nangma kivakna(talent) leh na uuknate sem inla na muibut tetek nading hanciam zaw in. Leitungah nang bang mihing nang bek mah om cih phawk in!

4) Mi mawhlo khat amawhna ding zong, a cih bangin a tawntungin mite' kicinlohna hoihlohna bebek mu-in gensiat sawm kei in. Nang zong tua na mawhsak det keii mite' lakah mihing khat na hihna mangngilh ngei kei in. Nang zong a kicingkimlo thaneemna anei na hih mah bangin mite zong kisapna khatciat anei leitung vanpi nuai ah a nungta mihing mah hitek uh hi.

5) A beisa hunah na thangpaihna na hehna na dahnate ngaihsun in thaksuah kikkik kei in. Na lungsim hong nasak mite' maisak inla lungsim thak tawh na zingnithak kalsuan in. Nang leh nang kimaisak sawm in. Tua bang hilo-in a beisa thute tawh na ki buanbuan leh ui cithakvei cituinuhsak tawh kibang lel ding hiteh!

6) Mun khempeuhah mite' thusimna pibawl ding ut lua kei in. Tua bang lungtang na vom laiteng na lungkim ngeilo ding hi. Nang leh nang kimuanna(self-confidence) nei inla hangsan in mainawt zaw in. Hong lungkimsak nate sem in.

7) Na matutlohna na guallelhna ah mi khat pepeuh hang hi, ci-in paulap zonsawm kei in. Nang' lawhsapna pen nangma hang mah hi. Nasep ding a kilawm pen in na ngimna tupna na tun nangin lamlak(roadmap) koih aa tua zui-in na kung(goal) ah na taiding hizaw hi.

8) Nasepkhialh nate' hangin nang leh nang kimawhsak ki zahpih kei kenla na khialhna panin pilna ngah sawm zaw inla na hun mawk beisak nawn kei in.

9) Gamtat luheek hoihlohna ah ki veivei bualbual nawn kenla pusuak khia in. Nang hong nuamsasak gamtathoih ah zongsat sawm ta in.

10) Na hun manphate Facebook, Gtalk chatting , TV leh Internet peuh tawh mawk beisak thapai kei in. Tuate sangin na nuntakna ah a thukzaw khiatna nei nasep khat sem in.

11) Mite' omsak gamtat luheeksak hoihsak dan bek zui-in a gamtang khuasa na hih leh na nuamsa ngei kei ding hi. Nang' nopsak dan tawh na gamtat khuasak ciang bekin na lungkim bek ding hi. Nangma khuasak dan(life style) tawh na kalsuan tak teh na nuntakna ah khiatna a thukzaw na muding aa nuam nasa mahmah ding hi.

12) Nasep ding khat pepeuh a hun khinto sotto denkeii kei in. Nuntak hun tom mahmah hi. Na ngah hun manpha sunsun khiatna neitakin zanghsiam in.

13) Na mailam thu ding lungkham ngaihsun lunghimawhval lua zel kei in. Na lungsim siangsak zangsak in. Nang leh nang vangik ki guanguan kei in. Tua bang hi lecin na nuntakna ah nuntakna ii nopsakna na ngah ding hi. Nuntak hun tomlua hi. Lungkhamna tawh zingnisuakin khuisa kawmsa aa na lupna na zuat det keii ding na hun pammaih lua hi.

14) Ka sepnop ka uuk semkha keng ci'n phunphun ciakciak kei in. Nang' uuk nang'kivak nangmah in suakta tak teltheihna (free choice) leitung in hong pia hilo hiam? Na ut nasepnop telkhial kenla na matut dong semsuak in!

15) Mi citing nang' deihdanin seeksawm zenzen kei in. Mi khempeuh in amau mun tekah thupi uh hi. Midangte' hihtheih siamna(quality) zahtak inla muang in!

16) Mi khempeuh sang'n a theizaw hi'ng cih lungsim paaikhia in. Ki theisakin om laplap pau lualua se dah in. Leitung mihing billion(7) lakah nang zong khat hi ciuciau lel ha hih lam kiphawk in. Nang sang'n athei asiamzaw mipil misiam na theih ngeiloh na muhban loh adil aha om hi cih ngaihsun zel veteh! Mi khempeuh in kivakna khat tek nei ciat uh hi. Midangte zahtak inla mite tawh kipawl theih siamna(team spirit) nei zaw in. Ki niamkhiat inla mite' maingap ittheih dingin omsiam in.

17) Mun khempeuh ah ngah masak ding bebek ngaihsun kei in! Bang hang hiam cih leh piak masaklo-in kingah masalo(give and take) cih om hi. Mite tungah na hoih na sep leh mite in zongh nang' tungah na hoih hong bawl ding uh hi.

18) Khawlhpih hoihlo peel in, a cih mah bangin na hoihna a tamzawte mulo-in na kicinlohna neucik bek a muthei citciat deuhse mite peel inla nang tha hong pia na thupitna sunsun hong ciaptehsak hong itte lakah tualbual in. Tua hileh amaute' thapiakna bek tawh na lungsim hangsanin na mailam thu ding kihtalo na lungnuam ding hi. 

19) Mi' cih khempeuh "aw leh" ci pahpah kei inla selhuai ahih leh selpah inla maitang zahtakna bek tawh na kizawhlohpi mangpahpah kei zaw in. Tua in nang leh nang thupi na kisakna hi a, ahizongin awdam tawh na manzawhlohna thu kiciantakin genpah in.

20) Min thannop luat man leh gualtungtuannopna tawh thutanglo(thumaanlo) tawh mi dem kei in. Thutang tak leh thumaan tak tawh a hanciam a citak mite adingin a kilawm a kituak mun leitung in piazo lua mahmah hi.

21) Hun tawh kizui-in apiang van thakthakte leh thuthak pilna siamna thakte na zat ding na sin ding lau kei in.

22) Sunmang bek mah a man thapai lel mawk (idealist) hi kenla na sunmangte sepkhiatna tawh a lakkhia (realist) hih sawm in.

23) Leitung pen mihangsan(hero)te' gam hi a, mi meidawite in mun ngahzolo hi. Hangsan in! Na lungsim sungah na ngaihsut bangin a pualamah khuadak pusuak lecin leitung tua zahin lauhuai zenzen lo hi.

Atung aa thu(23) tawh na nisim nuntakna na kalsuan leh leitung in nang hong zolo ding hi. Nang mah pen leitung azo nu/pa na hiding hi. Na kiim na paam thupiang leh mite tungah kinga ki uksak kenla nangmah in na kiim na paam leh leitung khel nu/pa hita in!(Do not let your circumstances control, you change your circumstances). Nang mah in hih thei hi teh!(You can do it). Na khempeuh nangma khentat(teel) ahi hi.
Happiness is a choice!!!

Agelh : Bob Tuangpi
Source : Ciimnuai Magazine 2013.

****************************************

Laigelh pa Bob Tuangpi in Zomi eLibrary / laibusaal ading in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Anuamsa Nuntakna (Happy Life). Gelh - Bob Tuangpi Description: Rating: 5 Reviewed By: Cinpu Zomi
Scroll to Top