728x90 AdSpace

Hot
Menu
Zon-ol na Donate

Latest News

April 25 ANZAC DAY. ANZAC: Australian and New Zealand Army Corps.

April 25 ANZAC DAY 
ANZAC: Australian and New Zealand Army Corps     
Gelh - T. Zokhai     
  
Australia leh New Zealand gamliante baan-ah Cook Islands, Niue, Pitcairn Islands, Tonga, Papua New Guinea leh Samoa te-ah kumsim-in kibawl-a, ataangpi gambup tawlngakni (national holiday)-in kizangh-hi. Kei' omna Australia bang-ah nasia tak-in kibawl-a, gamukte mahmah-in sumlehpaai sik, gammite'nzong tua' ading lawmhsum zonna atuamtuam, limkilhte, limkhaite, khutbuh, taukual, angkilhlim cih-a kipan phawkna-tawh kizom vanneu bawl-a lawmhsum zonna nasia tak-in kinei-hi.

ANZAC Taangthu Tomno:

1915 April 25 ni-in Australia leh New Zealand Gaalkaappawl-in Ottoman Empire akici Turkish Empire alangdo nading Gallipoli-ah atunkhop ni-uh ahihi. Gaalpi Khatna hunsung Turkish Empire-pen German-tawh gaalpawlkhawm hi-a, Australia leh New Zealand te' gaalpawlkhoppihte ahihleh United Kingdom, France leh British India ahihi. 

Gaaldona ngiimnapi-pen - Ottoman Empire Khuapi Constantinopole buluak (capture) nading ahihi. Gaalphual-ah aliam leh asi gaalkaap-pen Irish 4,000 tawh kigawm UK pan-in 21,255., French 10,000., Australian 8,709., New Zealanders 2,721., British Indians 1,358 ahihi. Gallipoli buluhna thu-in Australian leh New Zealand naakpi-in laaina leh zuansial sak ahihman-in April 25 ni-a luangbei kipiakna-in zuanphawksial ni (memorial day) thupi khat hongpiang sak-hi.

Gaaldona-ah zawh leh lelh-tawh hilo-in amau' gammi gaalkaapte' luangbeina leh a' nunna-uh apiakna ziak-in hih ni-pen gambup tawlngakni-a akibawl ahihi. Gallipoli-ah atunkhawm ni-uh April 25 lian teekteek mah-in kumsim-in kibawl-a, bangni bangni-tawh kituak taleh tua-ni mah-in bawl-in thupisak uhhi. Sunday ni-tawh akituak lehzong bawl veve uh-a, Sabbath ni-tawh akituak lehzong bawl veve uhhi.

Hih ni-in tua gaalphual akuankha-a asilo gaalkaapluui (veterans) te naakpi-in pahtawi uh-a, ningkum bang-in nih leh thum omlaai-in teek cihtak-in teek-uh hitaleh naakpi-in kipahtawi-in zahtaakna lianpi kipia-hi. Tua gaalphual-ah asi mite' tute tate dongtak-in pahtawinate nasia tak-in kibawl-in, AU-ah zaandiak mah-a gaaltaai peemta leltak ahi kei mahmah nangawn-in khitui luanlawh liang-in kithupibawl mahmah-hi.

Zomi Kalsuanzia-tawh Tehgenna:

Zomi minam kalsuanna hunbeisa khempeuh tuni ciangdong  ka' lungngaih kiik ciang-in akhanglian nampi gamliante' kalsuanzia-tawh kikeelkii-in kitumpelh ahihlam ka-phawkthak mahmah-a, hih lai honggelh ka-hihi. Zomite-pen Kawlgam kiukna BIA-in British khut pan-in Tonpenna (Independence) hong mualsuakpih taktak ciang-in BIA Makaaipipa Gen. Aung San hong suamlum uh-a, tua asiahuai mahmah huaiham duhop tualthahna leh paampaihna-pen "ahi dingmah" akisak nading-in nungzomte-in thun cihtak-in hongthun uhhi.

Alipkhaphuai hih gamtatna-pen Kawlgam taangthu-ah ngeina bang-in kizom to-a, Gen. Aung San kisuamlum-a akipaampaih mahbang-in ama' zom Gen. Ne Win-zong ahun ciang-in paampaihna thuak-in asihciang nangawn-in kuama' theihloh phial-a sisim dinmun tung-hi. Tua azom Sein Lwin, Saw Maung, cihte bangciang tungta cih akitheilo khop-in thuneihna akilaak khiat phetleh athu mipi-in za nawnlo zahdong hito-a, tua nung-a thuneipi Gen. Khin Ngyunt-zong thongsung (tu-in asuahtaak saam hang-in) kideenna cihbang-in kizom toto-hi. Sr Gen. Than Shwe-zong bang hongci dinghiam cih kitheilo dinmun hi-a, I'gennop bulpi-pen: Makaai masate zahtaakna kipialo cihthu ahihi.

Hih Kawl Gamuk makaai lubawkte Gen. Aung San longal zahtaakna piakding akilawm lo-zong himai uh-a, ahitazong-in amau' khawisa penglam gaalkaapte beek-in vaangpia-in pahtawi beekleh leitung ngeina hi bilbel zaw-hi, ahizong-in "na' vawh bang-in na-at ding" acihbang-in kisualto giapgiap lel-uhhi. Hih paizia-pen taangtuan-a thumaan leh muanhuai, upa zahtaak asiam mahmah ngei khinsa Zomite' sung-ah up ngamloh zahding-in hongtung-a, minam kalsuanna naakpi-in cina-suuk mahmah, kigiakpih ta-hi.

Minam min paulam-in kipawlna tuamtuam tam cihtak-in tam-a, minam vei taktak leh minam' phattuam nading ngiimna taktak-tawh asepsuah taktak mitmuhding haksa mahmah-hi. Biaknalam-zong tuabangmah hi-a, makaai upa cihkhat lunggulh thei bilbel-in makaai upate' neihding kilawm thukhualna-a kipan leadership skills te neilo-in pawltuam saatna, kipawlna tuamtuam phuhna naakpi-in khang-in "leitung buppi" bang huamkha pahpah zawzeen dinmun-ah Zomite tualbial laaitak-hi.

Kipawlna khat-in tua kipawlna min-pen Lailam ahihleh Zolai-tawh kisai khempeuh athupiibawl-a, aphungvuhding, Ngeinalam ahihleh Zongeina-zong akician-a aki zat khollohna Tedim, Kawlpi peuh pan-a akiphuaktawm laam/la maimaite' sang-in Zola, Zolaam kiciantak tuni dong-a akisakna akilaamna khuate-ah research bawl-a a promote-ding cihbang-in amau' kipawlna min-tawh kituak tuplehngiim nei-in, tua tuplehngiim-tawh kituak-a sepsuahding ahihi. Ahizong-in, min leh mimal dawkna, neekzonna ciangbek-tawh kitaaklah thei mahmah-uh ahihman-in kipawlna min hoih mahmah napi-in amau' pawlpi, meeltheih naaihuai, lawmta kimaaingaap pihteng-tawh "Leitung Bup" pahpah uhhi. Atelsiam ding-in Pasian-in khuak ciimna hongguan tahen!

Atung-a angsung lungtang-in Zomite hong nawnvalh ahihman-in Zomi ataangpi-in amau' pawlpi-mi, amau'political party member, amau' khuakuam-mi, beh, meeltheih cbt (PPPKKBM) ahihkeileh mi khat-in bangzahta-in minam' ading luangkham-in mapang taleh lupeiisan lel-a, bangzahta-in gaalmaai-ah si taleh kitheihmawhbawl ngam tazen uhhi. Amau' PPPKKBM ahihleh bangmahlopi pumphat gawp, pahtawina tuamtuam, Zomi buppi sung-a Ngalliam, madawkpen, pilpen cbt cihzahdong-a kihaiidemna tuihual naakpi-in khang-a singkhuah suangtum ataih luapluap hun ahihi.

Tua tuihual tung-ah khenkhatte-in "Zomi" aci nuamlo, "Chin" mah amitsuan denkeei ulian mipil masate naakpi-in thupiisak leuleu-in genthalim-in gelhthalim uhhi. Zomi vaai ahihleh Zomi bekmah kigenleh ahiding., Zomi ahilopi Zomi mi-thupi lak-ah helloh ziauding thumaan ahihi. Ahizong-in atung-a PPPKKBM ziak mah-in "Zalian mahmah, hau mahmah peuhleng 'Zomi hikeng' ci-in ka-koko zong-in Zomite-in 'Zomi Ngalliam' ci-in hong pahtawi veveding, hong maaivil veveding" cihbangphial lungsim omkhinleh kilawm kalsuanzia kimu thei-hi.

Anzac Thupuak hongsau zeel-in, vei-khaak leh lungsim hongphawng thu-in: Zomi Minam zil-a luangkham, nunnapia mite, liamlawh baailawh mite, suplawh baailawh mite a' Zomipihte mah-in zahpih-in paampaih thei den-a, tuabang lungsim minam sungpan-in akhiap-siam mateng minam kalsuanna cidam ngeilo dinghi ci-kim theiciat lehang lunggulhna ahihi. Tua hi-a, anuai-a dotnateng I' lungsim ciat-ah dawng lehang:

  • Zomi min taktak-tawh luangkham nunnapia bangzah neikhin I-hihiam?
  • Zomi min taktak-tawh mapang-a asuplawh abaailawh bangzah nei I-hihiam?
  • Zomi min taktak-tawh koi kipawlnate kalsuan takpi uhhiam?

Athu-in "Zomi" cici napi-in "Chin"-mah akici teeiteeite hih dotna-tawh kisai lo-hi. Kam-tawh "Zomi" cihcih kawm-in "Chin"-tawh vaai ahawmden, vaai apaaikaanden, ahuai ahuam bang-a thugenden mite kihel theilo-hi. BSPP hunlaai-a "Chin OoSii Yone" khawng "Zozum" cih miaumiau daan-a mipihte akheemkheem mite kihel theilo-hi. Tuabang hileh atung-a dotna 3 bekbek lak-ah Zomi bangzah a-om tam?

Thukhupna: 

Zomite-in gaaldo lo-in "Ngalliam" suaknuam uh-a, gaalphual phu ngamlo-in gaalkaapmaang seem-nuam uhhi. Amau' gaalphual aphu masate' sang-a ahaangsanzaw, akipiazaw, athupiizaw-a akimuhding haanciam uhhi.

Gaalman lo-in gaal-aih thalawp uh-a, sapi manlo-in sa-aihding lunggulh-uh ahihman-in sacia, savokphual, zuleii, thankiik cihkhawng ai pahpah uhhi.

Seem lo-in aseem uut uh-a, vawh lo-in aat-nuam uhhi. Mi' vawhsa atding mitsuan uh-a, avawhte paampaih uhhi.

Kam-tawh democracy cici napi-in taanglaai tote bang-a kibawlding lunggulh uhhi.

Hihte khempeuh aki-khiap mateng Zomi leh Zogam cidam ngeilo dinghi.

Zomi Pasian' Thupha!

Zokhai

Lai gelh Pu T. Zokhai in Zomi eLibrary / Laibusaal ading in phalna hong piak ahi hi.

"Cinpu Zomi (www.cinpuzomi.com)" <cinpuzomi@gmail.com>
date:Sat, Apr 23, 2016 at 10:44 AM
subject:ANZAC Day & Zomi

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: April 25 ANZAC DAY. ANZAC: Australian and New Zealand Army Corps. Description: Rating: 5 Reviewed By: Cinpu Zomi
Scroll to Top