728x90 AdSpace

Hot
Menu
Zon-ol na Donate

Latest News

GAM MAKAI MINTHANGTE LEH KHRISTIAN BIAKNA. Gelh - GSPau

GAM MAKAI MINTHANGTE LEH KHRISTIAN BIAKNA
Gelh - GSPau
Photo Credit : ZOLUS

Leitung-a gam makai minthangte i et ciangin a neu lai-un Khristian biakna tawh na kisukha ngei ciat napi, a gol uh ciangin thu tuamtuam hang tawh Khristian na suak tuanlo uh, cih kimu thei hi. Pawlkhat a tomin en dih ni.

1. Joseph Stalin (1879-1953)

A neu lai-in a pa in zukham peuh leh vua gawp den ahih manin inn nuamsa lo a, inn pan paikhia-in, Khristian biakinn khat beel hi. Pastorpa in na hehpih bilbel ahih manin lim takin na keem a, sang zong na kahsak hi. Tua panin amah hong khuasuak a, hun khat ciangin Russia Communist makaipipa hong suak hi. Gam makai hong suah ciangin amah a khuasuah Khristian biakna hong langpan' hi. Russia gam sungah Lai Siangthobu hong lut khakloh nadingin nasia takin dal hi. Lai Siangtho langpan’na laibu nih gelh a, a gam sung khempeuh ah hawmkhia hi. Tua laibute sungah Lai Siangtho mun tampi kigelh ahih manin Lai Siangthobu a neilote in na phattuampih mahmah uh hi.


March 1, 1953 ni-in Russia gam sunga Judah mi 30,00,000 te thahsiang ding hong vaihawm hi. Ahi zongin amah cina khol lopi-in a zing ciang March 2, 1953 ni-in si vat a, March 9, 1953 ni-in kivui hi. Hih a kivui ni pen Esther kumpinu' hun lai-a Judah mite a kithahsiang nading pan a suahtakna ni uh phawkna Purim pawi khaamni na hi citciat hi. Ama' sih khit teh Russia gam sungah Khristian khang mahmah hi.

Stalin in kam vive tawh Russia gam kum tampi sung uk a, kiliingsak ziahziah hi. Ama' kampau peuhpeuh upadi hisak pahpah hi. Amah in, "Kammal in galhiam hoihpen hi. Pope in galkap battalion bangzah nei ahi hiam? Ama' thuneihna pen galhiam hi lo-in a kammal hi," ci-in gen hi.

2. Adolf Hitler (1889-1945)

A neu lai-in Khristian hi a, biakna zong kin hi. Lasak kiva a, kikhop simin solo sa den hi. A gol teh Khristian siampi suah ding ut hi. A gol ciangin galkap tum a, siampi a suah cih thadah, biakinn nangawn tung zo nawnlo hi. Minam itna lungsim nei khengval a, German minam lo peuhpeuh muhdah hi. Jews minam te tang muhdah a, 60,00,000 bang that hi. Thugen kiva ngiat a, thu a gen teh a khut vik kawmin, action vive tawh thuah den lai ahih manin khangnote zo mahmah a, kum (6) sungin German khangno khempeuh phial Nazy party member suaksak zo mawk hi.

Germany Nazi makaipi hong suah ciangin Khristian biakna hong langpan’ hi. Lai Siangtho nangawn phiat ding hong hanciam ngei a, ahi zongin phiatzo sam lo hi. Amah a gensia leh a langpan' biakna makai pawlkhat sihdan pia hi. Amah in, "Pasian i cih pen meidawite’ ading bekin kisam a, kei danin a hangsan mite’ adingin Pasian cih bang kisam zenzen kei," ci-in gen hi. 1945 kumin gal a lelh ciangin amah leh amah kithat hi. Ama’ sih khit ciangin Germany gamah Khristian khang mahmah hi.

3. Mao Tse Tung (1893-1976)

A neu lai-in Mikangte’ Sunday School khatah kah ngei hi. Lai Siangtho lotngah, lasak, thunget cihte hanciam ahih manin a Siamate in paakta thei mahmah uh hi. Tua laitakin Mikangte leh Sente hong buai uh hi. Nikhat a Sunday School Siamate khat in, "Sente ui tawh kibang uh" cih kam hong pau kha laizang hi. Tua kammal a zak ciangin heh mahmah a, tua-a kipan Sunday School ah pai nawnlo hi.

A gol ciangin Sen Communist kumpipa hong suak hi. Sen gam sung-a om missionary te leh Pasian’ naseemte khempeuh a hingtangin lei sungah vuksak hi. Christian tampi zong that lai hi. A mithah vekpi 26,30,000 bang pha ahih manin leitung tangthu ah mi tam a that penin kiciamteh hi. Amah 1976 kumin si a, ama’ sih khit ciangin Sen gam ah Christian khang mahmah hi. Amah in, "Mi tampi in Communism pen itna kisa kha hi. Comunism in itna hi zenzen lo a, galte satnen gawp nading-a kizang sekpi hizaw hi," ci-in gen hi.

4. Mahatma Gandhi (1869-1948)

Amah pen India gam makai, mite’ itna a ngah penpa hi. Topa Jesu paakta mahmah a, "Jesu a suun linlian Khristian khat ka muh nini-in kei zong Khristian suak pah lian ning," ci hi. A thugenna khatah, "India gamah minam kideidanna leh a zawng a hau kideidanna uang lua hi. Hih pen Jesu bek in puahpha zo ding hi," ci-in gen ngei hi. Mual tung thuhilhna Mate 5,6,7 teng bang hoihsa mahmah hi. Ahi zongin Khristian biakna sungah kideidanna tamsa lua hi.

Khatvei Mikangte bek kikhopna biakinn khatah kikhawm dingin a pai leh na kilutsak lo ahih manin a khasia sa-in ciahkik hi. Christian biakna hoihsa mahmah napi, a sih ciang dong mah Khristian suak tuanlo veve hi. Amah 1948 kumin kisuamlum hi.

5. Hirohito (1902-1989)

Amah in Japan kumpi (king) kum (62) sung seem hi. A gam mite in vaang neisa lua uh ahih manin mihing-in ngaihsun lo-in Pasian-in ngaihsun phial uh hi. 1945 kumin Japante in gal hong lelh uh ciangin gal lel-a hong ciah galkapte’ mai-ah khukdinin kap hi. Radio sung pan a gam mite tungah, "Kei pen Pasian hi ke’ng, mihing mah hi lua kisa-in, tu-in gallelpa hi lai ing. Kei'tungah kuamah hong kinga kei un. Kei zong tu-in Khristian suak nuam ta ing," ci-in gen hi. Khristian gamte kiangah, "Ko Japan gamah missionary 10,000 hong puak un la, Lungdamna thu hong gen un," ci-in na ngen hi. Kumpipa’ kammal a zak uh ciangin mi tampite in Pasian hong zong uh a, Japan gamah kum (7) sung khan’lawhna om man a, Japan Khristian tangthu-ah tua kum (7) pen "Kum manpha" ci-in na ciamteh uh hi. Amah 1989 kumin si a, a sih ciang dong mah Khristian suak tuanlo veve hi. n

Reference:
- World Encyclopedia
- The Great People of 20thCentury

- The Ten Greatest Revivals Ever.

Lai gelhpa Sia Gin Sian Pau @ GSPau in Zomi eLibrary ading in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GAM MAKAI MINTHANGTE LEH KHRISTIAN BIAKNA. Gelh - GSPau Description: Rating: 5 Reviewed By: Cinpu Zomi
Scroll to Top