728x90 AdSpace

Hot
Menu
Zon-ol na Donate

Latest News

Guite Numei in Sal Khawi Thei. (Zomi Nute Pahtawina) Tg. Hang Khan Lian

Guite Numei in Sal Khawi Thei.
Tg. Hang Khan Lian
Photo : Cinpu Zomi (Zomi eLibrary) leh Anu Nu Dim Khan Niiang

“Tuni-a Pute tung-a k’ong nget nop uh thupha in, “leitung kumpi minthang David, Solomon leh mawhna pan aa ong gumkhia i Topa Zeisu khangsimna-ah a kihel a pian’na pi uh Ruth tung-a i Topa’ piak thupha tawh a kibang Thupha, hih, ko na tute uh ii pian’na ka Nu uh, na sanggamnu uh, na tanu uh tung-ah n’ong piak na’ng uh ong ngen hi ung” ci-in pute zu kholhna-a a kingen, thupha ngetna kammal ka za ngei hi.

Lungkim huai leh cidam huai mahmah kasa hi.

Zomite in i khang i sim ciangin ih Pa’ lam beh leh phung i la-a, i Nute’ beh leh phung i la kei hi. Tom ngaihsutte’ aadingin, i Nute bangmah man lo dan khat-in om-a tua dungzui mah-in numei ahih leh simmawh nopna lungsim, thusim lohna lungtang om kha thei hi. Khatvei katute, Biakna sangsia seem, Biakna pilna sang sin behlai khat in, “No numeite leltak” cih kammal khat ong zang kha-a ka khasia mahmah hi. A pian’na a nu simmawh, thusim lo leh a Nu’ beh leh phung thu-a ong sim het lo hitah-a ci-in ka lungsim a hilo lamlam-in ka lam toto kha hi.


Ahih hang, daai takin ngaihsun phapha lehang, i ki pasal sak mahmah hang i innsung bek hi lo, i beh bup i phung bup-a mi ong suah, ong van leh a vai hawmpi in behdang phungdang ahi, i Pi te i Nute hi zaw gige hi. I beh sung, phung sung, i u sung nau sung thu khempeuh i Pu te i Pate leh ei mahmah sang-in i Pite i Nute in vaan zaw, en zaw, seem zaw, geel zaw leh laamto zaw ahih lam nial theih hi lo hi. Amin ngah ciang i Pate lam, eilam in ngah ahih hang a seem taktak, mi ong suah taktak, i pite i nute hi zaw hi. Hih teng mah taanglai i Pu, i Pate’n na mu khol gige uh ahih manin, “Pute leh lam phung”, “Pute lo-in hanmual kikhum zolo” cih te-a kipan i Nu leh a nunglam ahi i Pute zahtaak nading thu tampi na khung khol uh hi.

Sih leh nat i tuah ciangin zong handal ni-in, “Pu te n’ong kim nai uh hia…” ci-in Pute tung hun ngetna i laak khit ciang, melmuh i cih hun, kipan-a i nun’taak lai-a Pute ong kepna, ong itnate-a kipan lungdam thu suut kik-in, lungdam ko kik tangtang hi hang. “Pute k’ong khasiat sakna uh, ka gamtat, ka kampau khialhna uh a om leh zong ong maisak un”, ciin kithum hi hang. I sih khit nangawn-in i pian’na i pute zahtaakna a nunung peen-in a pia tangtang minam i hi-a tua in i pian’na i Nu ih thupi bawlna ahi hi. Mihing muhna-ah etlawm mahmah-in Pasian in zong ong lungkimpih mahmah ding in ka um hi.

Khatvei khangno lai khat in “Pu” ci-in ong lo laizang-a, “Nang bang hang-a ‘Pu’ ong ci na hiam” ka cih leh “Ka Pa’n i pute hi ong ci hi” ong ci hi. “Tua ahih leh na Pi ko beh hiam”, ka cih leh, “Hi kei” ong ci-a, “Tua ding nang’n lah Pu n’ong ci-a” ka cih leeuleeu leh, “ka Pu in ka Pa kiang i Pute hi a cih hi” ong ci leeuleeu hi. A naai pen a Pu’ nu ko beh maw, ahih kei leh amau’ pian’na a Pi-te uh khat peuh, (ko geel leh a Pa nangawn in theih nawn loh khat) pen ko hi kha ngei ka hih man vua pian’na ‘Pu’ ong ci ahih lam ka theih teh, “Hih te innkuan’ nun’taak zia cidam huai mah si”, ci-in,  i pianna i Nute a zahtaak mahmah minam, Zomite i hihna ka phawk kik saansaan-a Topa’ hoihna ka mu seemseem hi. Hih bang ngeina nei minam sung-a ong pian’sak Topa ka phat niloh hi.

Zogam ukpi Pu Guite ong khan’ khit, Pu Sukte ong hat ciang, a nung-a khang Pu Sukte tawh teen’ khop ding nuamsa nawn lo-in Pu Guite te a tamzaw saklam-ah lal to uh hita se leh taanglai Pu Sukte a tamzaw in zi ding, ta dingin Pu Guite mah a tun’tun’na pan na la kik hamtang uh-a, “Guite numei in sal khawi thei” na ci uh hi. Hih in bangzah ta-in i lian, i mang zongin i inn sung thu a saipi i Nute ahih gige lam, i ukna, i liatna, i vangneihna, i vaihawm zawhna, i kipasal sakna, i minthan’na khempeuh ei sang i Nute, i zite ahih lam ong lak mahmah i taang ngeina, i kamciin’ khat ahi hi. I pian’na i Pute a zahtaak, a pahtawi, a lungdam thei  tang ngeina hoih neite i hih lam ong lak phadiak hi. Tua bek tham lo-in, i taang Zo ngeina in Laisiangtho ah zung kip nei gige ahih lam kimu thei hi.

Tua ahih ciang, Zomi u leh nau in,
Leitungbup in “Nute Ni”-a a ciapteh May kha nipi (nihna) ni-in Nute zahtaakna, itna i lah khit ciang, thupha thuap dingin “Pute zu kholh Ni” cih tawh thuah to hi leeng, ong Siampa in leitung minam dangte ngeina aa a neih loh leh a nget theih loh a “Thupha-thuap” ong piak na’ng a ngen thei minam-a ong siam hi mawk lo i hi hiam.

Ngen thei, zang thei hi leeng i taang ngeinate Thupha ngah nading ngeina ahih lam phawk kawmin hih bang ngeina sung-a ong piangsak, ong pantah, mi ong suah ong Siampa leh i Nu/Pute tung lungdam ko khial kei ni.

I inn sungah i Pite, i Nute i zahtaak, i lapsang, i pahtawi leh mun i piak masiah Zomi numeite kilapsang nading thu om thei lo hi. I Pite i Nute i Pute, i Pate zah-in sang thei masa phot phot dih ni.

Laigelh Pa Tg. Hang Khan Lian

Source :
[Hih lai, 29 MAY 05 SUN ni-in kingah hi.]

Page  143  of  200

Vahui Magazine 2006

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Guite Numei in Sal Khawi Thei. (Zomi Nute Pahtawina) Tg. Hang Khan Lian Description: Rating: 5 Reviewed By: Cinpu Zomi
Scroll to Top