728x90 AdSpace

Hot
Menu
Zon-ol na Donate

Latest News

Itna tawh pumkhat nasuah theih nading uh ka deih hi. ~ Bishop Felix Lian Khen Thang

Itna tawh pumkhat nasuah theih nading uh ka deih hi.
(cf. Col. 2:2)
~ Bishop Felix Lian Khen Thang

Thu masa:
Piancil Lai Siangtho sungah Pasian in, "Adam pen a mah kia a om ding hoih lo hi, a lawm ding khat bawl sak ni", ci-in Eva a bawlsak mah bangin, Pasian in mihingte pen, a kipawl khawm ding, a vaihawm khawm, asem khawm thei dinga hong bawl ihi hi. Thuk suang thum tung ah, bel kisuang thei-in meh leh an ki huan thei hi. Zang thum tawh a kiheek khauhual bawhsat hak hi. Tua ahih manin khangluite in kilungtuahna manphatna a gen uh teh, "Nupa kilungtuak khua khat in zolo, khua khat kilungtuak khua 9 in zolo, Putu kilungtuak sahangin zahtak, kikta", na ci ngiat uh hi. Tua banah, khua sung tui sung vai tawh kisai-in,"khua ki ciim ding zong, meigongnu mang sungah kihil thei", ci-in, meigong tagahte nangawn thu nadong thei uh hi. Gatamtui, anci cihte na kitaang phial uh hi. Lothak khawh ding, lothak meihalding, gan zansiah ding, gan hawi ding, khuado ding, lamsialding cihte na kidong diamdiam uh hi. Vai kuan vai ciah, khualzin gamvaknate ah, na ton khawm na ciat khawm, a kal niam, a hatlo pente ki masasak in, na kingak dimdiam uh hi. Lo matun zolote na ki huh hi. Vangik puate na kidawn hi.Hih te in, ei khangthakte a dingin a etteh huai kipumkhatna tawh akizawi tawn thu laigil pawl khat hipah hi.


I.              Kipumkhatna  :
Mihing khat kia tuikul banga om theilo, mihing pen lawm leh gual tawh a om khawm nam hi, cih Mangte' paunak tawh kizui-in, No man is an island, man is social being, i pu i pate in khua khat a sat ding ciangun, Hausa, Siampi, Siksek, Tuinak zong ding mi kitel masa in, a kingap uh leh khua sat pan uh hi. Hausa sem dingin, mipil, mitei mawkmawk sung pan hilo in, ukpi nam, nampi deuh sung pan, a thukhual, a muan huai, a lungduai mi, natel uh hi. Tua mah bang in, siampi gui, gal hang galvil siam nam, siksek nam, tuinak zong thei nam ci-in a gui, a nam in, na zong uh hi. Ih pu i pa te'n, tul na tawi khawm, tual na bia khawm uh hi. Cihnopna ah, khua sung tui sung khat ah kum khen, khuado pawi bawl ma ahi zong in, hun thupi om sial in, beh sung tek pan tulpite te in gambiakna na nei khawm in, tua khit te, a pawi bawl dingte uh na kipan pan uh hi. Khua sung khat ah zong bek pawl khat te acitawm luat uh leh bek dang khat tawh ki pawl in, tul na tawi khawm uh hi. Tua ban ah, sawmtaang khat ah na giak khawm, zu leh sa a ne khawm, anuam khawm adah khawmte ahi uh hi. Ki-itna leh ki pumkhatnate ah na picing mahmah uh hi. Khua sung khat ah zong beh nam tuamtuam om thei a, beh khat sungah nopna dahna, thusia thupha a om ciangin, beh sung phung sung papi te’ thu vaihawm, thu khensatte pen, thu tawpna-in koih uh a, pi sanin, zui ciatciat pah uh hi. Tua ahih man in, khua sung tui sung vaihawmnate daupai-in picing hi, asa tonna omlo-in in et lawm mahmah hi. Minam khempeuh in, "Kipawl khopna in thahatna hi", ci-in gentehna a neihtek mah bangun gam leh minam khantoh thei nadingin "kipawl khawm aa nasepna" in a thupi mahmah khat ahi hi. Ei Tedim Zomite pen, manta khalgah ih neek man hiam, nahtang tolawk ih nek man hiam? Kithutuak theilo, kipumkhat theilote i hi citciat hi. Biakna thu, leitung thute ah zong kipawlkhawm theiloin a kikhenkham pahpahte i hih man in, tua in minam khantohna ding leh picin theih nading thanem sak mahmah hi. Ei mi pawlkhate bangin, i Tedim gamah pawlpi tam pen Pasian thupha hi, khantona khat hi ci luilam hi. I Tedim gamah biakna hongtun zaw kumza pha in pawlpi zong zabang pha khin, Lai Siangtho sang leh Tagah sang kigawm bang 70 dek phata ci ven, a nuam huai hiam, adah huai hiam cih ngaihsut huai mahmah sa ing. Kei muhna a bel, ki pumkhatna tawh a kileh bul kha diam ci pian ing. Mangte' paunak khatah zong, "United we stand, divided we fall" cih a neih bangin, i mite nuntak kipawl khawmna sung ah zong, kipumkhatna in gualzawhna leh kikhenthaangna in guallelhna bulpi ahihna acian atai in hong phawk sak hi. Minam thahat, minam gualzo, minam khangto le thupha ngah minam i suah theih nadingin i minam bup mahmah in kipumkhatna i neih masak ding kisam hi. Ei Zomite sungah kipawlna khat peuhpeuh akipat cilin "kihi liailiai napi'n asawtsawt teh hi luailuai" thei zel hi. Bang hang hiam cih leh panmun lente in minam itna sang, ang sung vanna le min le za deihna kimasuan zaw leh kilawm hi. Mipi khanto ding sang, nai huai teng khanto ding peuh kihan ciam zaw hi (Nepotism). Khangluite in hausa masa, khuasat masa, tuikhuat masa, sakap masa, a pil masa, a hang masa, makai masate napi bawl, nadot bawl uh a, panmunte zong na kituh sese lo uh hi. Tuhun ciangin a pan masa agel masa, aphut masa le agim atawl masa cih om lo-in, mizawng daipam, meigong tagah ahih nak leh ki simmawh bawl zanzan a, mihau sum nei piante ahih nak leh bang mah athei kei phial ta zongun ki masak ki maibiak zanzanin, i dot bawl kei thei hi. Adot huai, amuan huai, abelh huaite peuh i paampaih kha a, mi kamsiamte, mi mai et asiamte, hong nek deihte khawng peuh i masak zanzan i pibawl gawm thei hi. Kawlte’ paunak tawh kizui-in, mun man ah mimaan cih dan hilo-in, mimaanlote peuh mun hoih mun thupitata ah tung zaw sawp in thu nei mahmah hi. Kipawlna khat peuhpeuh ah, no, ko cih tam lua in, athu nei ding leh maipha ngah ding bek kituhin (partiality), asem taktak, ahanciam taktak kitam phalo hi. Tua tawh kizawitawnin bang hong piang hiam cih leh, kipawlna khat peuhpeuh ah, picinna, lawhcinna, guitunnate kinei zolo-in, kitel khelhna leh kikhen thaangna in hong nung zuihpah hi. Tua ahih man in, ei khangthakte-in, na khat peuhpeuh i sep ma-in, thunung thuma i ngaihsut phat mahmah ding kisam hi. Kipumkhat nading abulpi khat in mimal deihnate sangin atamzaw deihna (aituam deihna sang in, taangpi deihna) man'na zong ahi hi. Khangluite in, "Sialpi amah bekin lian a, mihingte khat bek kilian theilo; Suangpi zong suangneu in thek hi", na ci lai uh hi. Tua hi-in minam kipumkhatna a om theih nadingin azawng ahau, apil amawl, nampi namneu cih bang in kikhen thaang lo in, i hihna bangbang tawh i muntek pan in khutkhat tawi khekhat khai bang in, kithutuak taka i kalsuan theih diamdiam ding kisam mahmah hi.

Leitungah minam khat, gam khat, pawlpi khat, khua khat le veng khat akhantoh nadingin kipawl siamna kisam mahmah hi. Kipawl siamna thupi kisa lua ahih manin UNO, NATO, UNICEF, ASEAN, FIFA...etc: le biakna lam WCC, UBS, MCC, CBCM le Zomite sungah ZBC, PED (Post Eden Drive), ZCLS, ZOLUS, ZOMUS, ZOFA, ZYA, ZOCIA, ZOMI SIAMSIN... cih bangin nasep kipawlkhopna tuamtuam kinei hi. Hih kipawlnate athahat, apicin semsem nadingin nasemte kipawl siamna kisam mahmah hi. Ei mite pen, a pil/a thu thei/a zongzo/asemzo/amuzo kawmkawm ki om sam hi. Ahi hang kitangtat pian, khat kia om khawng phamawh kisa sese lo hi. Tua ahih manin, khantona lampi man ih tawt zawh nadingin, ngalkhaat banga tangtatnate nusia-in, ki pawlkhawm theinate angpom ni. US te in Iraq akap dingin zo lua mahmah ding hi napi'n kipawlpih beelpawl dingna zongin, na nei hamtang uh hi. Jew minamte bang atuntun na uh ah, kipawlna nanei hamtang uh hi. Aci tawm zenzen uh hang mite in zatak-in, zong kita pah uh hi. Sente zong, leitung mun khempeuh ah na kizel in, a tunna peuhpeuh ah na kipawl khawm ciatciat uh hi. Et lawm in en huai mahmah hi. Zong etteh huai mahmah hi.

Pasian hehpihna tawh tulamlam ciangin i mit kihong zawdeuh ci ding i hiam? kipumkhat nading deihna tawh gamsung le gampua-ah Zomi Christian Fellowship ci-in i neih theih manin lungdam huai mahmah hi. I khua i tui, i beh, i phungte i pau i hamte akibat lo hang, Zomi hihna khat tawh i kipumkhat sawm ding kisam mahmah hi. Kipawlna asiasak bulpi pen min le vang deih luatna hi cih phawk gige in, Zomite tu-a dinmun pan i khantoh zawk nadingin i sepna i bawlna khat peuhah angsung theihna, min le vang deihnate paikhiain i kipawlsiam ding hunta hi. Kipumkhatna in minam khantoh nading thusim hoih mahmah khat ahi hi.

II.            Thumanna le Cihtakna  :
Mahatma Ghandi once said, "To speak the truth, one has to be prepared to lose some friends". Mahatma Ghandi in, "Thuman thutak nagen ding leh na lawm pawl khatte in hong taisan ding hi cih theisa-in nei in", cih phawkin, khat veivei thuman genna hang in, kival lawh, hong ki elngat in hong kitaisan thei hi. Ahih hang, thumanna le cihtakna pen thupha ngah nading bulpi ahi hi, cih phawk siam ni (Paunak 14:34). I pu i pate thumanin cihtak uh ahih manin, thumanna lahna in Zo Vaphual lim na zang uh hi. Leitungah a khangtosa gamte enle'ng citakin, thuman a, Pasian um mite na hidiak uh hi. Tuhun ciangin i minam sungah sumbawlte, sangnaupangte, kumpi nasemte le Pasian nasemte a kipan aneu alian kithuman zo nawn lo ahih man in khantohna le picinnate kinei zo nawnlo hi. Thumanna pen zawn le hauh tawh kisai lo hi. Sumbawlna pan Pasian' deihloh na semin i hauh phial hangin thuman lohna pan i ngah ahih manin sawt kikhom tuanlo ding hi. Sangnaupangte in lai ettehna tawh distinction tampi i ngah hangin kimazang zo tuanlo ding hi (eg. MC ngah sangnaupang pawlkhatte bang a lom a tang in kia ngeingai uh hi). 


Pasian' nasemte in zong, maitang zahtakna tawh Pasian deihna sang mite' deihna peuh gennate tawh pawlpi sungah lawhcinnate kinei zolo ding a, sawt zong kikhawmlo ding hi. I paunak, "Zuau in a khap tawn hi, Thal lam cilsiat eimau tung tu", cihte phawk siam ni. Mi pawl khat in "tuhun pen kiim le paam tawh kizui-in nuntak ding hi" ci hi. Hih pen aman hetlo le azumhuai bektham lo-in adahhuai mahmah thu ahi hi. Lampi, thuman leh nuntakna ahi, Zeisu sialsa singlamteh lampi zuih kinken ding ahi hi. Thumanna le cihtakna i cih pen nang bek na om a, mi tampi tawh na om zongin thuman ding ahi hi. I innkuan sung, i pawlpi sungah thumanna pen kisam tawntung hi. I pu i pate in thumanna le cihtakna pen thupisak mahmah uh ahih manin neutunga kipan zuauphuah loh ding le ciampel loh ding na kihilh tangtang uh hi. Tua bang mahin thumanna gah ahi cidamna le khansauna thuphate na sang uh hi. Tuhun ciangin ngah nading ahih nak leh Pasian zong phawk nawnlo, kihta lo, zuau kiphuak ngamin, Lai Siangtho nangawn namin kiciam ngam mawk hi hang. Tuhun ciangin i sepna thaman asia apha pen nitun' phialmawk ahih manin zuau le khemna cih pen zat ngam huai peuhmah lo hi. I thuman zawhloh manin i hauh zah ding le i khantoh zah dingin kikhangto zolo hi. Tua ahih manin koikoi-ah bangbang i sem zongin ei Pasian' tate i thuman ding ahi hi. Thupha ngah akhangto minam i suahnop leh i pu i pate' thumanna le cihtakna sul zui siam ni. Minam khantoh nading thusim khat in thumanna le cihtakna ahi hi.

III.Kihuh Kipanpihna:  

Lai Siangtho sungah "Acingh mite hau sem sem dinga, midang ahuhte in huhna mah ngahkik ding uh hi", naci hi (Pau. 11:25). Khanglui lai - in Pasian' thu kithei nailo hi napi'n, ki-itna le kihuh kipanpihna pen na khauhpai mahmah hi. Zu le sa nekhawm, thu kikum khawm, inn le lo neizo lote kihuh liailiai uh hi. Nuteek, Pateekte na kidon na ki khoi siam hi. I leitung Pasian ci-in na kizatak hi. Abraham, Isaac, Jacob, Joseph te’n, atu atate uh, thupha apiak mah bangin, ipu pate in zong atu atate uh thupha na pia sawnsawn in, thupha tuamtuam in hong uap pah hi. Taang lai in, Nu leh Pate pen, thupha nakpi-in ki ngaih sun in amaute tung pan thupha kingen ngiatngiat hi. Ih pu ih pate’n nopna dahnate ah thu nakhual mahmah uh hi. Tagah sanggahte zong, Pute’n nakem nakhoi uh ahih man in, pute’ tuikuang tui tawh na ki khang khawm a, Pu leh lam sak ci-in, Pute pen, ki-it in zong kizaktak mahmah hi. Tua ahih man in, ei Tedim Zomite’ ngeina ah, tagah sang, PiteekPuteekte koihna inn (Orphanage, Home for Aged) cibang na om ngei lo hi. Tuhun ciangin Pasian' thu kithei sak bek thamlo in khami cihmah, thu ki-umsak lua kisa in hingtangphial-a vankah sawm keei mite om napi hang, angsung ding bek ngaihsutin nei-in midang huhna, thukhualna, piakkhiatna, kikep kihuaina lamah tha nem mahmah lai hi hang. U le nau sung kihuhnate sangin kihazatna le ki-elna vive tam zawsop hi. Ei inn kuan le angsung ading bekin kihau thei mahmah hi. Pasian hong piak thuphate aituam nei - in kepcip ding hilo a, khangsak in hawmkhiatding hizaw hi. Sanna sangin, piakkhiatna thupizaw, manphazaw, thupha kingahzaw hi, cih, Lai Siangtho kammalte phawk siam ni. Tuhnun ciangin Zomite Pasian' thupha ngah hi hang, kici-in la ngaih nono ki phuak kei napi'n, kihuh kipanpihna lamah minam dangte kiban zonai peuhmah lo hi. 

Pasian' hehpihna tawh leitung mun tuamtuamah sumzong paaizongin i om kawikawi hi. Tua banga thupha i sannate pen i innkuan ading bek hi lo, i pawlpi sung ading bek zong hi lo-in, i minam sungah huhhuai panpihhuai mizawng daipamte huhzawh nadinga Pasian in hong piak ahih lam phawkhuai hi. Tuhun pen ei kia bek nuntak hun hinawn lo-in midangte tawh nuntak khop hun ahih manin, khattang khantohna sangin, mizapi khantohna lam ngaihsut ding kisam hi. Apiakhia mite mah hau semsem ahih manin a piakhia nuam dingte mah Pasian in hausak hizel kawikawi hi.

Khanglui papite in "Nekkhawm lim, puakkhawm zang" cih paunak a neih mah bangin a nekhawm, a thuakkhawm minamte i hi hi. Gentehna bang in, i pu i pate in sa vabengin, a tuahphat uh leh, khua mual ah samualsuah ci-in thau hong lawn uh a, nupite in zungau tawh na dawn in, na nuam khawm nakipak khawmin sa zong nahawm diamdiam uh hi. Paltan khat hong tung leh zong van hawm mah hong nei thei hi. Tua ban ah, bek sung phung sung, khua sung tui sung khat ah zong, kamsiat leisiat leeiba thaangba, liau nading luang le banthu lawi 8 dong tuaksiatna khat akineih khak leh khat le khat na kihuh diamdiam in, na kipanpih diamdiam uh hi. Hih thute i ngaihsut teh, eimite-in hamphatna ah angsung pil in, haksatna ah akitaisan minamte hilo hi hang. Kihuh kipanpihna pen i pu i pate maban ahihmah bangin, ei khangthakte in zong, ki-itna taktak le Pasian deih nuntaknate tawh i pu i pate maban zomsiam ni. I mi i sa, i khua i tui i puah kei leh midangte in hong awlmawh masa lo ding hi.Tua ahih manin kihuh kipanpihna pen minam, khua le tui, u le nau sungah ki-itna, kipumkhatna le khantoh nading thusim hoih mahmah khat ahih manin hanciamin picing sak ni. - Eimite in, social relationship, mite tawh I kizop ziate cingtak zo nailo hi. Kipahtawina, ki uapna leh khat leh khat vang kipiak dan zong kisiam zo nailo hi. Kinoppih leng I lungdamna azahkhatin khangto a, kidahpih leng zong I dahna a lang hong bei in, paaidan hong nuam tuampah hi. I khialhna, I thanemna, kicin lohna le I ginat lohna teng kawmkalah I hihzawhna le I septhei sunsunte tungah kinga-in tha I lak thei ding ki sam hi. Thanemna le hihzawhlona tampite lakah Galngam thaltang banga I neih ihih theina kiau khat pen I zat siam theih ding kisam hi. Kigalbawlna leh kinenniamnate in gu bangin kha a, kideihsakna leh kithapiaknate in khuaizu bangin khum hi. Tua hi a, leitung taksa lam hita leh kha le biakna lam hi ta leh mun khat peuhpeuh ah gualzawhna, matutna khat peuhpeuh I neih ciang ei leh ei kipahtawi tangtang thei leng kilawm in zong hong etlawm mahmah ding hi. Ki pahtawina pen nget ding sang piak dingin kilawm zaw hi. Mi napahtawi thei leh nang zong apahtawi huai zaw kan lai na hi hi. A pahtawi huaite pahtawi siamna-in kipak huai in, mipi tanna zong ahi hi. Ngaihsut hoihnate leh pilna siamnate-in, leitung pahtawi-in etlawmsak in, khangto sak a, paakpalhte leh agim namtuite in gamlak leh huihlak no suahsakin namtuisak hi. Vukkhalte in mual sangte pahtawi a, kha le aaksite in vantung pahtawi in tang zeizai sak uh hi. Guaitui in nu leitang pahtawi in khaicite posak a, nitang in zong ankungte pahtawi-in khangsak hi. Ciktui leh luituite in guntuite pahtawi uh a, guntui in tuipi pahtawi hi. Tuipi in zong mihing ganhingte pahtawi in, nuntakna le noptuamna tampitak hong pia hi. Singkung lopate in huih siangtho le adang a kisam tuamtuamte hong pia in, mihing ganhingte' nuntakna tha hong pia in hong pahtawi hi. Mihingte in upna leh muanna tawh Pasian pahtawi uh a, Pasian in itna hehpihna leh mawhmaisaknate tawh ei mihingte hong pahtawi hi. I kipahtawi ciang zong athu ala I tot siam ding kisam hi. Midik mithupite in pahtawi nading, kammal, athu leh ala ding zong tangtang in, mi pahtawi tawntung thei uh hi. Ei leh ei kipahtawi siamna-in lungsimleh pumpi hong cidamsaka, sep le bawlzia dingte zong hong theisak in, daupaina le matunna hong pia hi. Ei leh ei I kipahtawi ciang I tha khauhin zong ki muibun zaw deuh hi. Mainawt lungsim hong neisak a, sepding leh vai tuamtuamte ah thalawpna leh kimuanna hong pia hi. Nakhat peuhpeuh I sep ding ciang mainawt lungsim I neih tawntung ding kisam hi. Tua hilo-in, ei leh ei kienneu, kikosia ngingei in, 'a lo' lam vive a I kingaihsut leh a ki lalthang thei ziau ding ahi hi. I gamtat I luhek I kampaunate a kipan sep leh bawlnate leh I ngaihsutnate avek in hoihin, dik khin loding hihmah tase leh ei leh ei ki pahtawi tha kipiak siam in, mainawt lungsim tawh kalsuan kinken leng I kicintaklona leh I khialnate hong beibei in, dikna leh picinnate in hong zuan dinga, a hun hongtun ciang gualzawna leh mintannate pen ei a mah hong hi veve ding hi. Tua hi leh I theih loh kal in, I theih ngei nai loh thupi zaw I sak khat I ngah bek ding hi. Tua nung ciangin, I pilnate in hong haisak nawnlo in, I siamnate in zong hong maizumsak nawnlo dinga, I gualzawhnate hangin mite lakah zukham ankham I bang nawn kei ding hi. Ei leh ei ki pahtawi siam ding kisama, ei leh ei I kipahtawi khial loh ding zong thupi mahmah hi. 


Tu hun pen pil hun leh ki pahtawi hun hi a, ei hun lap lai khangnote in, I tung I nuai, I kim I paam, anai agamla deidan selo-in ki pahtawina le ki thapiak siamna tawh I lungsim, I ngaigsuhna le I nuntaknate no suak sak tawntung ni( e.g, My mother honoured me with a dinner party whenever I passed my exams, and that became a driving force for the next year. For that reason, I am what I am now, thanks be to God and to my deceased mother). Et in lawmsak ni. mainawt lungsim vom vinven/kinken ding hihang. Khantoh gimnamsak ding hihang. Mihingte-in social being i hih mah bangin, ahun luanzia tawh kizui a kipawl khawptheina leh sep khawmtheinate kisam mahmah hi. Nidang lai in, ton leh han, gal aih sa aihte kithupisak mahmah hi. Tu hun ciang ahih leh gal le sate zong bei ta hi. Gal man sa man te hun bei in, pawl man, lawm man in gual huai thei hun hi ta hi. Na khat peuhpeuh I sep ciang, vomlo nawk hun beita a, hi diamdiam a nasep hun, kipawl theih kipawlmawh a kipawl hun hi ta hi. Kei, nang, kopawl, nopawl cih hunte bei khin a, ei cih hun hita hi. Nidang lai in, ipu ipate in, khua khat peuh ah, zawl nanei uh hi. Zintun paai khaina in na kinei uh hi. Mihingte nuntakna sungah thu hoih la hoih a om mah bangin, thusia lasia zong om hi. An leh kiak bang in apo khawm akhang khawm ahi hi. .Ahoihte in asia kilangsaka, asiate in ahoih hong kilangsak hi. Lumbangsun a thalbang suanding i tuaidawngte lambang paakin, pattah siam ni (Ignatius Thang Sut Mung, M.A.).Diplomatic relationship is another story. - Tung sun ni leh tung solkha tawh kong et cim theilo, an bang i it mubang i ngaih, deihteng cinna Zogam Tuunnu kiang sulhei kik ni! Ngalliam vontawi, Zosuantate, upna sung ah Abraham suanthakte, lung kihual in, ngahna sang in piak khiatna thupi zaw hi (Acts 20:35) cih bulphuh in, khutkhat tawi khekhat khai bang maapangkhawm diamdiam ni. Sum leh paai leitung nate tampi aneite a hau hi lo in, sum lei paai neisate tampipi a pia khia zote a hau hi zaw hi cih phawk siam ni. Pasian hong piak, vantung thupha, leitung thupha te tawh i Zomi, i Zogam, i Zolai, i Zongeinate tawi sang in, keem siam, giabang zunsiam dih ni!


Thukhupna:
Khangluite ii lungsim puakzia a huampi a i et ciang in, ki-itna, kithutuahna, kihuaina, thukhualna, kihehpihna, kihuhnopna leh kipumkhatnate a nuntaknate uh ah na nosuahsak, na paklunsak mahmah uh hi. I pu i pate' nuntakna, a paunak, a lakaamte leh azat ngeinate sung ah, lungdamna thu leh nuntakna Pasianthu laigilte a na om gige ahihlam phawk ni. Nuntakna Pasian kammalte amaute nuntakna sung ah akip akho in na om khin a, aciintuiguh sungah zong nateng khin ta hi. Tua ahih manin, i pu i pate-in, ngeina hoih, ngeina picingte tawh nanungta uh ahih man un, minam picingte a hi uh hi. Tua ahih manin, ei khangthakte in zong, minam picing, athahat, agualzo, thupha ngah le akhangto minam i suah theih nadingin ei Zomite mahmah lung kihual a, i kithutuah photphot ding kisam masapen hi. Tuhun khangthakte in i gam i lei le i minam bup mailam kalsuan zia ding tawh kisai mailam saupi enkawmin kalsuan ding le muhkholh ding kisam hi. Akipawlkhawm theilo phadiak minamte i hih sesena telsiam in, tu laitak i dinmun pan thasanin minam veina lungsim thak nei dih ni. Tua ciang bekin thupha ngah minam, agualzo minam le akhangto minam i suakzo pan ding hi. Tua hi-in Zomi Tapidawte i dinmun pan kalkhat suanto lai-in Pasian' deihna ahi Lai Siangtho bangin i nuntak kei mawk leh a khangto minam kisuak theilo ding hi.

“Zomite in Vaphual lim deih mahmah napi hangin,Vaphual lungtang ih nei zo nai kei hi". (Rev. Dr. Cin Do Kham).


“Zomite-in Degree ngah ding ih thupi sak a, pilna ih ngah nading ih thupi sak nai kei hi." (Rev. Dr. Do Suan Mung).

 “Zomite akipilsak a tam hang, a pil taktak tam nai lo hi" (Me).


“Hauhna pen pilna in makaih hen la, pilna pen Pasian zahtakna ah ki bulh ta hen."
(Rev. Dr. Do Sian Thang).

Tua banah i phawk mahmah ding thu bulpi khat in bang hiam cih leh upna le pilna tawh i minam i lamsang ding, nambat khat in koih ni. Bang hang hiam cih leh mi haite leh sum leh paai leh khantona, om khawm theilo, tawnkhawm theilo hi. I leitung pumpi ading thupha i san theih nadingin i mimal mahmahin cihtakna le thumanna lamah hanciam sawm phot ni. I sepna khat peuhpeuh ah thumanin hanciam ni. Adiakdiakin khangnote in ngimna kician nei-in i gam le i minam ading akimang thei ding nasep sep sawm ni. Singphung dang lo, pianpih laizom, tun sung khat piang, Ciimnuai vontawi, tun leh zua ciin leh tuaite, i gam i lei, imi isa gia bang zun siam ni. Sianmang sinthu nau bang san siam in, Sian mang von tawi i To Zeisu naubang pawm siam leng, i lei nun khua en in lawm ding, thang van sausiang tuang i tun dong lungdeih teng libang cing ding... Tua hi-in i minam khantoh nading thusimte ahi, upna, pilna, kipumkhatna, thumanna le cihtakna, khat le khat kihuh/kipanpihna-te ah hanciam sawm mahmah le'ng akhangto le thupha ngah Zo minamte i suak pan ding hi. Tua ahih man in, i ngeinate, anungta Pasian kammal tawh phungvuh leng, minam picingte i hih banah, Christian picingte i hi sawnsawn lai ding a, thupha ngah minamte i hi pah ding hi. Gal kizo nawnlo: Nidang lai-in i galte pen a gamla pipan hong pai uh a hih manin, ei kithawi man, kigingkhol man, ki galging man i hih man leh i gal panna hong theilo man un, gal kizo hi. Tu hun ciang in, mun khempeuh ah gal lian/neu kinei ciat hi. Tu hun i galte pen, gamlapi pan hong pai nawnlo in ei tawh an nekhawm, tui dawn khawm, hong it ding a i ngaihsut  i lawm leh i gual, i naseppihte sungpan gal hong piang ahih man in, gal i zawh ding baih nawn lo hi. Gal a kilelh den hun hi ta mai hi. Tua ban ah, ni dang lai in, tualgal naki kita mahmah hi. Tu in a hih leh tua sang a, a suuk zaw sunggal hong piang ta hi. Lasiam Sai Thi Saai in, "Vantung pan hong kia guah mal leh leitung ah a kituung phimdawn a kisuk khak ding a hamsat mah bang in, mihinga pianding ding baih lo hi", na ci hi. A hih hang, thu tuamtuam la tuamtuam hang in, numei pawlkhat te in a sung a lai a om nau pen a deihlo uh tek, a suak ma in zatui zang in, a nuntakna laksak ziau or that ziau thei lel uh hi. Tua a hih man in, naubu sung pen tualgal pianna leh hankhuk sung hong suak ta hi. Ngaihsun thei leng khasiat huai mahmah hi, mulkim huai, ci zek huai mahmah hi. Tua a hih man in, ih nuntakna ah, khamuanna leh lung nopna om nawn pha lo hi. Lung len huai mahmah hi. Alleluai, praise the Lord, gumna ngah khin zo ing, i ci gam lai lai diam? Ngaihsut huai mahmah hi. Tua a hih man in, nisim naisim i Christian nuntakna ah, leitung ci leh sa, leh dawi mangpa tawh gal a kido do i hih man in, Pasian galvante zat siam ding kisam mahmah hi. ...(SK. Gin Khan Pau, President – KZBA). India kumpi Gandhi in, "I kim i pam a om singkung lopate pen a nei taktak ahi, tu laitaka naungekte' tungah ni khat ni ciang i piak dingin a cing a kemte i hi hi", na ci hi. A gamsungte ah zong, "singkung lopate na kep leh amau in zong na hong kem ding hi", na ci lai uh. Tua ban ah, Siapi Rev. Do Sian Thang in, "Zomite i pianthak taktak ciangin singkung-lopa, singtum suangtuumte i it taktak thei pan ding hi", hong cihna phawh siam ni, Bang hang hiam cih le Pasian bawlsa na khempeuh i it theih ciang bekin, Pasian zong a it taktakte i hi zo pan ding hi. Pasian bawlsa mihing, ganhing, singkung lopate ih zatak thei kei a ih zat siamthei kei leh Pasian hong gup khiatna thupha zong manpha ih sathei kei ding hi (if you do not respect the creation of God you will not appreciate alsp the redemption of Christ. Our environment is destroy by egoism, and it will be redeemed by selfless love of God and neighbour). Professor James Withey of Notre Dame in, "Nang in midangte i kim leh pam na hi hi" (Quoted by Edward Fisher in Nostre Dame Magazine, summer 1988, 77) hong ci hi. Tua ahih manin, eite in zong, inn veng hoih, lo veng hoih, khualzin tek, mite ton pi nopte, mi muan misuan, mi etteh thei, mi pangbeltheihte i hih nading in han ciam ni. Ih phawk ding khat ah, mipi phat tuam nading a kipiak khiatna in, Christiante thu bulphukpi khat ahi hi. Tu in, Pasian hong sawl kim leh pam cin nading te ah picing tak a i hih zawh na ding in, 1979 kum a, a lian bel Siampipa in, kim leh pam kem te' lutang, amakaih ding a aciapteh St Francis of Assi i kim leh pam a it ziat leh a kep ziat te phawk ni (Cf. Apostolic Letter Inter Sanctos: AAS 71[1979], 1509f.). Ama in, ei Christian te etteh theih ding in, kim leh pam leh nuntakna nei khempeuh koi cih zahtak in kep siam ding cih pen anuntakna mahmah tawh hong lak khin hi. St. Francis in piansaksa nakhempeuh ahi, ganhing, singkung lopa, sang gampa ni, sang gamnu khapi, cih te'n Pasian a pahtawi ding leh aphat ding in hong hanthawn hi. A kiniamkhiat mahmah Francis Assi in, eite mang ngilh lo ding in teci hong pan na ah, Pasian tawh i kilemna hang in, kim leh pam na khempeuhte kep siam zaw na ding tha hong pia a, tua in eite lak ah zong ki-itna leh ki pumkhatna te hong nei sak hi cih thu hong tel sak hi. Topa sung ah kong it u leh naute, St. Francis i makaina tawh eite khat leh khat unau sanggam khat bang in ki-it diamdiam a, kim leh pam Pasian piansaksa na khempeuh tawh zong et lawm tak in, zak takna lian pi tawh kem siam in, leitung inn kuanpi khat bang a i nungtak zawh nading in, Topa in thupha hong pia den ta hen! Tua hi leh ei mihingte khempeuh in piansaksa na khempeuhte tawh, lung sim thak leh ngaihsutna thak tawh i ki zawm thei ding a, hong tung ding Pasian gam i malep ding hi (Cf. Is. 11:6-9). Siamsinte Awging: by Manglek, Zingsol Special Issue lom 11, Hawm 12, April 2010, back cover: Hong hilh un, a sinnuamte hi ungh. Lam honglak un, a zuinuamte hi ungh. Hong hanthawn un, lungsim thanemte hi ungh. Hong mapii un, khangto nuam ungh. Hong tai un, a khial theite hi ungh. Hong pantah un, a siam nuamte hi ungh. Hong it bawl un, na itna uh lunggulh ungh. Tha hongpia un, a thazawmte hi ungh. Hong kem un, lam a pialtheite hi ungh. Hong sam un, a baigsa-in om ungh. Hong sawl un, ong hanciam ding hi ungh. Hong huai un, ki pumkhatna lunggulh ungh. Hong lamsang un, na tanote hi ungh. Thu hong ngetsak un, thungetna kisam ungh. Hong panpih un, lungdam tawntung ding hi ungh. ( Me: Thupha hong pia un, ka daupai ding uh hi). "Itna…a kici-in…": by Zeelpi, Zingsol Special Issue lom 11, Hawm 12, April 2010, p 21: "Nang leh nang ki-it masa in. Tua ahih leh leitung in zong nang hong it ding hi". Mihing nuntakna in manpha mahmah hi. A mah leh a mah a ki-it siamte in, a hun nei sunsun metbawl thei hi. Sang naupang khat in a hun om lai-in lai limtakin sim leh, lai vuanpi hong tun ciang, lungnuamtakin phi thei bek thamlo gual tungtuangin a nunna hong kilam sang ding hi. I paallai nite kua mahin hong zatpih theilo hi. Ei mahmahin zangsiam kei leng, I nuntakna ni hong tum kuan ciang, lawm le gualte' thalawhsate eng in I om kha ding hi. Mi dangte I huh zo kei phial zongin, mi' huhna lamente I hihloh ding ut huai hi. Ei leh ei ki-it siam ni I cih ciang in, angsung thei ni cihna hi hetlo hi. Paunak Lai Siangtho sungah, "Bang mah na mawk beisak kei un", na ci hi. A hausa leh a pilsa a asuak mi tawm mahmah hi. Hauna le pilna, lungnopna le cidamna cihte pen Pasian tungpan a hun om lai-in a kithalawh ahi hi.Sum zatsiamte hau a, annbuuk kemsiamte'n, (an nek siamte'n) an khing hau uh hi. Sum neih zahzah zat tum sawm pahpah leng cik mahin ki haulo dingaa, an nei ta'ng ci-in ne gai, an val buak sawm pahpah leng, a sawtlo-in neihsa lamsa teng mit phial kalin hong bei mang ding hi. Pilna deih ten a hun om lai-in zong ni. Pilna neite-in midangte phattuamna piangsak ni. Neih le lam, I sum I paaite tawh ki panpih ciat ni. Khantohna lampi hong tangzai zaw ding hi. Tha le ngal tawh ki huh ciat ni. Thungetna tampi behlap ni. Tua hi leh, itna man tawh I ki-it thei pan ding hi. Sehnel gam ah…: by Zolianu, Zingsol Special Issue lom 11, Hawm 12, April 2010, p 9: Nunna simlei sehnelgam bang guai in, keu ta ci-in, lungkiatna I tuah ciang, tuisik phulna, tawlngakna liim in hong ngak hi cih phawk in. Khuamial mahmah zan lai takin, khuangbaite aw kiza zaw hi. Tua mah bangin haksa dongtuak in I om laitakin, Pasian aw nem kiza zaw hi. Sunni taang leh guahmalte in paak nam kim palhsak hi. A hih hang, zan kimlai-in a palh paak hoih mahmahte zong om veve hi. Lungzuang khuangai-in nangkia na om laitakin, Pasian phatna la tam nasa mun zaw dingaa, la dang khempeuh sang ngaih zaw ding hi. Lampi nuamlo natot khak hang, na kiim na paamah singkung lopa, paak nam tuamtuam palh lihleh uh aa, vasate'n zong lasa veve uh hi. Nuntakna sehnelgam ah nang guak na kawi vak ciang, hi thute phawk in. Bang tanvei Zomi hi ding? Dr. Dal Lian, Zolus Journal Number 12 - 2008, pp28,30, 32-34: Zomite paak banga hong palhkhiat hun uh om dinga sawtpi tak paak ding uh hi. Hun beisa sawtpi peka minthangsa tu huna kuama theih khaak nawn loh I hih sangun, a sawtlo-a thang ding I hih sese uh pen hamphat huai kasa hi. Zomite hun hong tun ding kaal ka ngaklah hi. Tua hun a hong tun theih nadingin pan laak theihna ciat tekah pan la dingin kong hansuah hi. Zo ngeinate kem ni: Ngeina I cih leh biakna I cih kibang lo napi biakna tung tawnin ngeina om hi (My version: Biakna leh ngeina tawn khawm hi). Tua ahih manin tanglai I Zongeina tampite pen I tanglai biakna tawh kizawi tawna om ahi hi. Ngeina a guakin a om thei kei a, biakna zong a guakin om thei lo hi. Ngeina I cih pen I nuntakpih ahi a, nisima I khawsak dan, I luheek dan, I kipi I kiten dan leh misite I kivui dan khawng ahi deu pen hi. Atunga I gente pen I upna, I biakna tung tawnin kisem hi. Dawi biakna tawh kizom I ngeinate Christian biakna tawh kizom  ngeinate tawh I kheek kul ding hi. Ahi zongin ngeina I cih khempeuh biakna pana piang ahi kei hi. Tua ahih manin, Christian biakna I zuih mana I Zongeina teng paih ding cihna hipeuhmah lo hi. Pupa ngeina I zuih theih liai leh I kep thei liai teng kepcing ding, tulai hun leh biakna tawh kituak lote bangcih kheek ding cih ngaihsut ding ahi hi. Mangkang, mangvomte'n zong amau gam tek mah puah uh hi, it uh hi, angtanpih uh hi. Lainat mahmah uh hi. Mang ngilh cih thadah phawk mahmah uh ahih manun mite lakah gen thanuam mahmah uh hi. I tuntun na-ah I gam I lei phawk siam ni. Na tu na tate uh Zomi mah ahi den dingin na hih sawn un. Judahte a omna peuhpeuh uah  Judahte mah hi uh a, Vaphual zong a omna peuhah Zo Vaphual mah va hi hi. Koikoi-ah om taleng Zoheisa paak pen Zoheisa ahih mah bangin, no zong koikoi-ah na om kha uh zongin Zomi mah hong hiden a, sum leh paai, pilna siamna leh neihsa lamsate tawh a gaal panin I Zogam hong phung vuh un, hong puah hong zuun siam un, ci-in Zogam min tawh kong thuum hi. Eimah in I pat kei leh kua'n hong patsak ding hiam? Zekai nai kei, a hun om lai, lap lai mahmah hang. Sul hei kik ni. Better late than never; Rome was not built in a day, cih paunaakte phawk siamin, lung duai takin maa pangkhawm ni. Zogam in mi citak kisam hi. A gam it ding mi kisam hi. Gam phattuam nadinga nakpi taka na a sem ding mi kisam hi. Azawng ahau, alian aneu, cih om lo-in mi khempeuh kisam hi. Tangval thahatte thagui thatang tawh hong pang ding uh a, pilna siamna leh sum leh paai nei te'n, a pilna a siamna uh leh a sum a paaite uh tawh kuhkal takin ma hong pang ding uh hi. Naupangte-in thumanna, sawlmanna leh thukhualna tawh gam ading bang ka sem thei ding hiam, bang ka hih thei ding hiam cih thu tawh hong pang ding uh hi. Zogam hong paallun ding hi. Nang lo-a a paal ding na deih hiam? Nang zong a paallun sakte lakah khat hi nuam lo na hiam? Zogam adingin hih bangin ka pang ngei, ka pang khin, ka pan laitak hi, na ci thei hiam? Kingiahsun pha in. Zomite'n Zogam I puah kei leh, hong puah sak dingin kuamah hong pai lo ding hi, cih phawkin a zuun dingin kipan ni. Mi minthangsa, gam minthangsate khempeuh in minthan nailo hun, minthan laitak hun leh minthan nawnlo hun na nei ciat uh hi. Zogam pen a koizawte ahi tam? A thang nailo, a thang pah tading, Zogam bangtan a thang diam cih pen Zomite tungah kinga hi. Zomite kithutuaka, khut khat tawi khe khat khai bang ahih lai teng, lung kituak taka na a sepkhop laiteng uh leh a gam uh a kepbit zawh laiteng uh, a thang ding uh hi. Zogam omlai siah Zomite om dinga, Zomite omlai siah a sunga teeng mite Zomi I hi den ding uh hi. I Zomi hihna pen puan banga silh theih, suah theih, gal leh sa om cianga lum leh phaw beka zatding hilo-a I ci I sa, I lungsim ngaihsutna khempeuh-ah Zomi I hih ding ahi hi. Tuma khang tampi peka kipan Zomi a om mah bangin tuzawh khang tampi bek hilo, I teenna sim leitung a omlai siah, Zomite a om ding uh a, zong a khangto ding uh hi., Mite tungah gual tungtuang ding leh a vaihawm zo ding in Tung Sianmang in, hong ompih, hong panpih in thupha hong pia tawn tung ta hen. Amen.


Ngaitui Vontawi,
Zogam Siampi.
Msgr. Zo Heisa

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Itna tawh pumkhat nasuah theih nading uh ka deih hi. ~ Bishop Felix Lian Khen Thang Description: Rating: 5 Reviewed By: Cinpu Zomi
Scroll to Top