728x90 AdSpace

Hot
Menu
Zon-ol na Donate

Latest News

Kibatlohna, Kikupkhopna le Khantohna (Diversity, Dialogue and Development). Gelh - Pau Sian Lian

Kibatlohna, Kikupkhopna le Khantohna
(Diversity, Dialogue and Development)
Gelh - Pau Sian Lian

     Leitung mun tuamtuam ah Pasian nasep kipawlna lian khat ahi Youth for Christ pan South-East Asia Director pa Kawlgam hong zin khatin Kawlgam’ a tumdanna, a tuamdan’ diakna bang hi nasa hiam ci-in ka dong kha hi. Amah in nambat khatna ah mun khempeuh ah Buddhistte’ pagoda (ေစတီ) om kawikawi sa ing. Thunihna-ah Myanmar mi kua taktak hiam cih telhak sa ing, pawlkhatte India minam meel pua, pawl khatte Sente peuh tawh kisun, pawl khatte lah Philippineste le Malaysiate tawh a kisun mahmah lah om sa ing, hong ci hi.

     Ama’ genzah tak bilbel in Kawlgam pen pau le ham, meel le sa, tun le tong, dan le zia, upna le biakna tuamtuam tampi tak kigawm nianua, kihel zau, om khawm ziazua mah hi. Tuma’ kum (5) vallai-in Dr Simon Pau Khan En in a thugenna, lai-in ka simkik khak khat-ah kumzalom 21 ah Pasian nasemte’ phutkhak ding tonapi (challenge) nih in- 
(1) globalization hi a, a 
(2) na-in biakna tuamtuam kam kikup khopna hi, cihdan khat ka sim khangei hi. A laimal tiktek ka mangngilh a, a thu pen tuadan khat ahi hi.

     Tu hun-in ahih leh, Siapa’ genpen Kawlgam-ah tuate hong lim thupit tektek ta hi. Biakna tuamtuamte kimu khawmin kam kikup khopna (dialogue) pen makaite’ veipen le deihpen kammal hong hi-in, a munmun ah hong lang mahmah hi. Tunung June, 2013 sungin American Centrete’ vaihawmna tawh Yangon khua-a om biakna tuamtuamte’ biakbuk ah ka hawh kawikawi uha, Muslimte’ mosque ah a makai, lamlak siapipa hita leh, International Theravada Mission University a, makaipa’ genna hita leh a kuakua-in biakna tuamtuam makaite’ dialogue hih ding cihpen gen thithe uh hi.

     Bang hang hiam cihleh Kawlgam pen a huam-in Buddhist gam a hih zenzen hang, Christian, Muslim le Hindu zong a tawmlo khatmah a ki-om veve himawk hi. Hih biaknateng kitel siamna, kitheihsiamna om keileh Kawlgam pen sunkhat zankhat-in vut le vai a suakthei lua himawk hi. Biakna paulam-in gamtuamtuam a om mi gilo, mi ngongtatte’ nawkgawp, sukgawp zong kithuak kha thei hi. Rakhine pan a hong piang kithahna, gam’tatnate a kipan, Meikhtila, Oakkan le Lashio khua lama thupiangte en le hang biakna tuamtuam lampan makaite’n kimuhkhop, kam kikupkhopte nei-in, ngongtatnate a ven mengmeng theihnang lampi hong zon mengmeng dingpen seploh pelmawh ahihna kithei semsem hi.


     United Nations te’n May kha 21 ni pen ngeina kibanglote’ kithukupkhopna le khantohna ni ci-in, na ciamteh uh hi. Tua ni-in a kibang kilkel lo ngeina, biakna le pau le hamte’n koici bangin a lemthei penin thu le la vaihawm khawm, nungta khawm thei ding hiam cih, zuihhuai ngaihsut piakna nam (10) pulak khia uh hi. Tuate enkhawm pak ni.

1. Ngeina tuamtuamte ngimngiat-in a kilak limlahna pawi (art exhibition) le khanglui vante kepna inn (museum) ah hawh in.
2. Na innvengte lak panin biakna dang (ahih keh) ngeina dang ahi innkuan khat pongpong na innah anneek pihin la, nuntakna tawh kisai na muhnate uh kihawmsawn un.
3. Ngeina dang le biakna dangte’ bawl movie a hihkeh laibu kawm inla en-in, sim in..
4. Minam dangte na innah kihawh sak inla, na ngeina, na dante uh gen in.
5. Nang minam le ngeina sungpan ahilo minam dang thuthuk ngaihsun mipilte’ thu sim in. (Gentehna, Confucius, Socrates, Avicenna, Ganesh, …cihte)
6. Mai nipi sungin biakna dangte’ kikhopna ah va lengla inla, a pawite uhah zong va kihel sin in.
7. “Tuampian kimawlna” (stereotypes game) kimawl-in. Na tal tungah gam min kigelh laineng khat na lawmte belh sak in (Nang bang gam cih en ke’n). Midangte’ kiang tua natal-a om gammite amau bang danin mu cih amau aituam muhnate dong kawikawi-in. Amau gennate tungtawn-in na tal tunga om gam min pen na genkhiat theihleh nang a zo nahi hi.
8. Ngeina tuamtuamte’ dan le ziate kan in. Kawlte’ tuibuah pawi, Islamte’ Ramadan, Sente’ kumthak cih bangte kan in.
9. Facebook zangin na ngeinate leitung bup theihin pulak kawikawi inla, midangte’ ngeina zong kan den in.
10. Ngeina dangte’ tumging le la te zong ngai zeel in... cih bangteng ahi hi. Hih thu (10) lo, a dang septheih, zattheih lampi nam tul val bang omlai hi. Hih thute pen zatpak theihte ahi hi.

     A tunga UNte’ ngaihsut piakna thu (10) te san haksa a sa lai, a lipkhap upna le biakna, kisam a sa lua nailo mi, Zomi sung le Kawlmi sungte ah dil tham ding hi. Theihna kibehlapna (knowledge) hong hi photphot ding hi.


     Kawlgam Nay Pyi Taw-ah a sawt nailo-in a kibawl leitung bup sum le pai tawh kisai kikupna (World Economic Forum) ah Aung San Suu Kyi le mipil honkhat in hih biakna le ngeina kibatloh nahangin a piang thusiate a ven nadingin khat le khat kitheihsiamna le khat le khat kizahtakna om limlim masa leh cih limgen pha diak uh hi. 2011 kumin mipilte’n, leitung bupah a uangpen kilem lohna, kibawlsiatna (25) lakah (2) in gamkhat le gamkhat kikal hi-in, a dang (23)te pen gamkhat, huangsung dai-sung khat-ah a piang kilemlohna, kibawlsiatna le gamh tatna (violence) vive ahih lam hong mukhia lailai uh hi. Kawlgam zong hih upna, biakna, ngeina kibatlohna zatkhialhna hangin siatlawh, suplawhna ngen ah a awkawk kihi toto ta hi.

     Laigelh pa kei mahmah zong Christian, Pasian a um khat ka hi hi. Ahi zongin biakna dangte pen langdo, langpan ding cih hituan samlo hi. Totbawl, neubawl, kobawl-in, midangte’upna, biakna le ngeinate va simmawh sak ding hi lo hi. A kibang lo upnate uppih zawh zenzen loh hang zahpih loh ding, zahtak sak ding ahi hi. Biakna, ngeina  kibanglote i kithuaksiam (religious tolerance, culture tolerance) kul pelmawh hi. Tua hi keileh i gam pen biakna le upna kibatlohnate puaklahna thang sungah awk-in siatna, supna, sihna tawh zawn leh ngau-in hong ukcip den kha ding hi.


*******************************************
Lai gelh pa Tg. Pau Sian Lian

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Kibatlohna, Kikupkhopna le Khantohna (Diversity, Dialogue and Development). Gelh - Pau Sian Lian Description: Rating: 5 Reviewed By: Cinpu Zomi
Scroll to Top