728x90 AdSpace

Hot
Menu
Zon-ol na Donate

Latest News

KIKAWI TAWNG EE, LAM TAWNG EE. Rev. Hau Khen Kham

KIKAWI TAWNG EE, LAM TAWNG EE
Rev. Hau Khen Kham
ES, ZCLS
Photo Credit : Zo Ngeina, Khuano ngeina Laam Pawi, Laibung Khua


Kikawi tawng ee, lam tawng ee;
Lamsai tawng ee, gual aw ee.
                                                                                   
Thupatna
            Khuangpu’ makaihna tawh khuang tumin numei-pasal kikawi dimdem a kalsuan kikhatin lasa kawma a kilam hih lamvui sungah thuthukpi khat a om hi. Tua in Pasian in mihingte nuntakna sungah i nuntakpih dinga a hong deihsak thu ahi hi. Kamdang khatin gen lehang muhmawh Pasian pen lamvui tungtawnin muhtheih Pasianin a hong kiphuangkhia ahi hi.

Lamvui-ah numei-pasal kihel kim hi
            Lamvui a kilam ciangin numei-pasal kikalhelh dimdiama nungak-tangval nupi-papi kigual diudeu hi. Hih in mihingte nuntakna ah numei le pasal a kikhentheihlohna, a kisaptuakna le a thupittuakna hong kilangsak hi. Hih lamvui sungah a neu a lian a niam a sang, a vom a kang, a zawng a hau, a pil a siam le a hai a mawl kihelkim ahih manin mi khempeuh liangko kikim a hihna zong hong kilangsak hi.

Lamvui ah cidamna kisam hi
            Lamvui a lam mi peuhmah a cidam mi a hihloh phamawh a, a damlote le cinate a kihel ding pen a hithei lo thu khat ahi hi. Hih in cidamna a kisapna le a thupitna hong theisak hi. Rev. J. Tial Dum in mihingte cidamna pen alangkhat 50% Pasian khut sungah om a, alangkhat 50% pen mihingte khut sungah om hi na ci hi. Hih in Pasian lam le mihing lam a kikhen theihlohna hong phawksak a, cidam nadingin thungetna kidalna  kikepna, kimawlna le kibawlna a kisapna zong hong theisak hi. Kamdang khatin gen lehang lamvui ah taksalam cidamna (physical health) a kisam ahi hi.

Lamvui ah lungdamna kisam hi
            Lamvui a lam mi peuhmah a cidam mi ahih ban ah a lungdam mi zong ahi hi. A lungdam lo mi khat a cidam hangin lam nuam lo dinga a heh a dah mi khat lam ngeilo ding hi. Hih in lungdamna a thupitna le a manneihna hong kilangsak hi. Rev. Dr. Tung Za Pau in lungdam i cih in lungsim cidam cihna hi a, gilo lo seksel lo cihna hi, a ci hi. Lungdamna in maitaisak a maitaina in cidamsakin cidamna in lamsak thei hi. Kamdang khatin gen lehang lamvui ah lungsimlam cidamna (psychological health) a kisam ahi hi.

Lamvui ah utna kisam hi
            A cidam mi khat a lamtheih nadingin a lungdam ding ban ah a ut ding zong kisam lai hi. A ut lo mi khat hahsawlna tawh kilamsak theilo hi. Kawlte in a om lo sangin theihloh haksazaw a cih danin siamloh sangin utloh a haksazaw ahi hi. Utna lungsim a omtheih nadingin a thu a la theih masak kul a, tua theihna in lawpna piangsak thei hi. Tua lawpna zong lawphuai hiam lawphuai lo hiam cih a khensat pen theihna mah ahi hi. Kamdang khatin gen lehang lamvui ah cidam lawpna (healthy emotion) le theihnalam cidamna (intellectual health) a kisam ahi hi.

Lamvui lamte kikawi dimdem hi
            Lamvui a lam mi khempeuh khainiang bangin kizom diudeu a, ban phalhin kipaihpelhsak dimdiamin, kawngcin ah kilenin kikawi dimdem hi. Kikawi dimdemna in ki-itna lim ahi hi. A ki-it mi peuhmah kikawi uh a, ahi zongin a kikawi khempeuh a ki-it hikhin tuanlo hi. Kikawi dimdemna in kipumkhatna lim zong ahi hi. A kipumkhat mi khempeuh kikawi uh a, ahi zongin a kikawi khempeuh a kipumkhat hikhin tuanlo zel hi. Bangbang ahi zongin kikawina in ki-itna le kipumkhatna lahkhiatna nam khat ahi hi. Kamdang khatin gen lehang, lamvui ah a cidam ki-itna (healthy love) le a cidam kipumkhatna (healthy unity) a kisam ahi hi.

Lamvui ah kalsuan kituak diamdiam hi
            Lamvui a lam mi peuhmah lungsim kikhatin kalsuan kituak a, khekhai hun le khe vikdan kibangin a aw le a vuak kituak lianlian hi. Hih in kithutuahna le pankhopna i a kisapna le a manphatna hong kilangsak hi. Kithutuak loh manin kisongsawlawi thei a, kisongsawlawi leh etlawm nawnlo hi. Kamdang khatin gen lehang lamvui ah kipawlkhopna lungsim le lungsim kikhat (team spirit & same spirit) neih ding a kisam ahi hi.

Lamvui ah a kidawngin la kisa hi
            Lamvui ah lamna le lasakna pen lim le tak bangin tonkhawm a, a kikhen theilo ahi hi. Khuangpu in a la sam-a kimkhat in a bul panin kimkhat in a dawn a zo hi. A bul loin a dawn guak a kisak theihloh mah bangin a dawn loin a bul guak zong kisathei tuanlo hi. A bul le a dawn a kigawm ciang bekin a deihna kicing pan hi. Hih in a bul a sate le a dawn a sate a kisap tuakna le a tan nasep uh a zawhtuak ding uh a thupittuakna hong kilangsak hi. Lim in maw bel, maw in lim bel cih i paunak a man mahmah ahi hi. Kamdang khatin gen lehang lamvui ah kibelhtuakna (interdependence) a kisam ahi hi.

            La tawh kimematin la nam tampi a om hi. Aituam la a om mah bangin tangpi la zong om a, la-el a om mah bangin la gualnuam zong a om hi. A beisa huna la kiphuak (Zomite’ laphuahte) a tamzawte pen aituam (individual) la le a huampi-a (general) a kiphuak vive ahi hi. Tuhun la i phuah ciangin i bulphuah (specific) dingin minam bup gambup le leitungbup huama (universal) phuah ding le sak ding a kisam ahi hi. Tua ban ah nuntak-khuasakzia (context) tawh kituaka phuah ding le sak ding zong ahi hi.

            Tuhun khangthak mi pawlkhat in khanglui i pi i pute neumuhin niammuhkha uh a, a laphuahna le a lasakna uh tungtawnin kilangkhiasak uh hi. Hih laikungpu in hih thu pen kikhialkha thei ding hi, ci-in a mu hi. Bangbang ahi zongin i laphuahte le i lasakte (Zola, Biakinn (hymm) la, zawlla (lovesong), khangthak la (revival song ...) pen kikona, ki-elna, kikapna late hi lozawin; ki-itna, kingaihna, kikhualna, kipumkhatna late ahih ding a thupipen ahi hi.

Thukhupna
            Hih lamvui in a hong theihsak thu nih om a, a hawng le a tak ahi hi. A hawng i cih in mit-a muhtheih le bil-a zaktheih ahi a lam le a awte hi a; a tak i cih in i nuntakna ah gamtatna tungtawn-a a kilangkhia cidamna, lungdamna, theihtelna, ki-itna, kipawlkhopna, sepkhopna, thuakkhopna le hamphatkhopnate hi a, tua in lamvui tungtawn-a i neih Pasian thulaigil (Lamvui Theology) ahi hi.



Kikawi tawng ee, lam tawng ee;

Lamsai tawng ee, gual aw ee.

*********************************************

Source : 
ZYA -Myanmar Tin Jubilee Magazine Laibu (2015-2015)

ZYA in Zomi eLibrary ading in phalna hongpiak ahi hi.
     

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KIKAWI TAWNG EE, LAM TAWNG EE. Rev. Hau Khen Kham Description: Rating: 5 Reviewed By: Cinpu Zomi
Scroll to Top