728x90 AdSpace

Hot
Menu
Zon-ol na Donate

Latest News

MAKAI LEH PUMPI KIKHALNA. ~ Dr. Lian Muan Kim

MAKAI LEH PUMPI KIKHALNA. 
Gelh ~ Dr. Lian Muan Kim

Pumpi kikhalna (self-discipline) icih in Greek kam pan hong pai hi-a “kiptak a lencip” cihna hi. Piangthak khami khat ihih nak leh pumpi kikhalna ineih loh phamawh hi. Banghang hiam cihleh pumpi kikhalna in Khasiangtho gah nam 9 te lak ah anam 9na hipah a (Gal. 5:22,23), piangthak ihih nak leh ih nuntakna pan ih gah khiat ding ahi hi. 

Amah leh amah aki uk zolo mi in mi suakta hilo hi. Jesu in hih thu thei ahih manin Phariseete’ kiangah makai dingin na cingtaak kei uh hi naci hi. Amau leh amau kikhal zolo pi-a makai sem nuam mawkmawk uh ahih manin “mittaw makaite” naci lai hi. Mittaw makai a suah loh nadingin Paul in Kawlentu pawlpi kiangah “Ka pumpi uk in ka kikhal hi. Tua hi kei leh kei mahmah zong midangte tung thu kagen hang ka cingtaak kei ding hi” naci hi.

Makaipa makaih masak ding mi-in “Amah” ahi hi. Ih hai lai in leitung ih uk nuam a, ih pil ciangin ei-le-ei ih ki-uk nuam hi. Khat vei mikhat in D.L.Moody kiangah, “Moody aw, kua in na nasepna hong nawngkaai sak pen hiam? Ci-in a vadot leh “D.L.Moody sanga hong nawngkaai sak zaw om kei,” ci-in dawng pah lek hi. 

Alexander the Great in a khan sungin gal lel ngeilo hi. Sakol tungtuan siam in galsiam thahat mahmah ahih manin ama hunlai-a gam kitheitham khempeuh zo gawp hi. Ni 11 sungin tai 400 bang galsim kawmsa in tungzo hi. India atun ciangin “galsim nading om nawnlo maw” ci-in kap zawzen hi. Persia gam khawng hong lakzawh khit teh tua gamsunga hauh -na khempeuh ngah ahih manin nuamsa mahmah a, a ut bangin hong omta hi. A galkap mangte tawh zudawn peuh kidem in nuamsa mahmah hi. Khatvei a zudawn kidemna na ah alawm it pen khat in zu thawl 18 adawn khit phet in si pah lian hi. Tua zawh asawtlo in aman zong zu thawl 9 bang adawn leh cisanat ngah in si hi. Asih in kum 33 pha pan hi. Gal lel ngeilo in leitung lumlet hi. Leitung a-uk pa amah leh amah ki-uk zolo hi. Kikhalzo nawnlo ahih manin sih lawh hi. 

Tua ahih manin makai khat ih hih nak leh pumpi kikhalna pen ih hanciam ding thupi mahmah hi. Hun maan ngeilo makai khat in hun maan un aci thei diam? Zatep, tuibuk, zu leh kunza zang napi midangte zatloh diing a gen thei diam? Ama pumpi kikhal zolo makai-in midangte khalzo, ukzo ngeilo ding hi. Gamtatna in kampau sangin ngaihzaw a muibun zaw hi. 

Makai hoih suah theih nading pilna siamna nei napi na kikhal nai kei leh tu’n kikhal kipan in. Tua bek thamlo in piangthak khat nahih nak leh Pasian in nahoih sep nading leh kikhal nading utna hong pia khin hi. “Ama deihna hoih tawh kituak a na gamtat theih nading leh na lunggulh theih nading in Pasian in nasung ah na hong sem hi” (Phil. 2:13). 

Zingciang a kipan ka pumpi kikhal ta ning. Kazat na tuamtuamte kideek ta ning. Nasep hanciam ta ning. Ka vaipuak khat peuh zo ta ning ci-in nahih ding khat peuhpeuh sot toto ken. Zingciang pen nang ading hilo kha thei ding hi. Tua laitak mah, ahih kei leh na neulai mah in kikhal inla tua na kikhal nate pen na zongsatna hisak pah in. Talent nei aa  akikhal lote sangin hanciam a akikhalte mithupi suak zaw hi. 

Siamna khat peuhpeuh uuk ding leh sinding haksalo a, ih siam nading a pumpi kikhalna haksa zaw hi. Piangthak makai akici khat in zu peuh, beer peuh dawndawn mawk leh, teptheih tepmawh teptep mawk leh, mite muhna ah a kilawmlo in gamta kampau leh kuama’n zui nuamlo ding hi. Ih zongsatsa khat peuh pen ih phiat pah ding haksa mahmah hi. Ih zongsat nailoh khat zong ih nuntak pih ding haksa veve hi. Tua ahih manin zongsatna hoihlote paaikhia a, zongsatna hoih ih neihtheih nadingin hih anuai a, lamlahna nam 10 te ih zuihzawh nading kisin ni: 
1) Na kikhal zawhloh nam 5 gelhkhia in. 
2) Na zawhzawh nadingin hanciam pah in. 
3) Khat khit khat in zawhsawm in. 
4) Bangci zawh ding cih pen Laisiangtho leh adang ngaihsutna hoih tuamtuamte in hong hilh ding hi. 
5) Zongsatna hoihlo a phiatsa mite kiangah bangci bangin phiat uh cih dong in. 
6) Zingsangtung in minute 15 sung bangci kikhal ding kahiam cih ngaihsun masa in. 
7) Sumkim ciangin minute 5 khawng hunla inla bangci bangin kikhal zo kahiam cih enkik in. 8) Nitak ciangin minute 5 khawng mah hunla inla bangci bangin khangto kahiam cih enkik in. 
9) Zongsatna hoihlo khat na phiat khit teh adang khat na phiat kik ma-in ni 6 sung bang hunla phot inla zongsatna lui pen zo dipdep phot in. 
10) Na gualzawhnate hangin mite tawh lungdam khawm inla midangte’n zong nangmah bangin a kikhal zawh nading uh hanciam pih in.

Lai gelh Pa Dr. Lian Muan Kim

Ref. & Source :
(Laisiangtho Tawh Kituak MAKAIH PILNA, Lian Muan Kim. Pp 52-58)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MAKAI LEH PUMPI KIKHALNA. ~ Dr. Lian Muan Kim Description: Rating: 5 Reviewed By: Cinpu Zomi
Scroll to Top