728x90 AdSpace

Hot
Menu
Zon-ol na Donate

Latest News

Social Democracy Ki-ukna. Gelh - Pau Sian Lian

Social Democracy Ki-ukna
Gelh - Pau Sian Lian
Thupatna
Tu laitak USA gam kumpi thak ding-in party nih (Democratic le Republican) te-in amau party tek pan president dinmun dem khuan ngah nading a kidem henhan laitak uh ahi hi. Tu a kidemna-ah a tuamdang diak cihnop huai thu pawlkhat hong om-a, tuate lakpan US president a sem ngei Clinton zi lah ahi, US gamdang thu vanpi a sem ngei Hilary Clinton tawh a kidem Bernie Sanders in zong pilna nei US khangnote sung-ah min hong ngah mahmah hi. Amah pen capitalism cih sumbawl te suakta tak-in sumbawl sakna gam-ah social democracy cih khat policy a deih mahmah khat hi a, sumhau le ulian lamte’ huat nam khat hong suak hi. Tua ahih man-in social democracy cih politic kammal hong ki lunglut san a, hih thului sungah zong a tom thei pen leh telnop pen dingin i kikum ding hi.  


Social Democracy ading Mungpi 3
Theory danin en lehang social democracy ah thu mungpi thum kihel hi. A masa pen-in, suahtakna (freedom) hi-a, mikhat-in ama nuntakna tawh kisai hoih a sak pendan lungkim dandan-in khensat in suak tatak-in nuntakna hi-a, mihing khat nuntakna tawh kisai sum zatzia, pilna zonna le hamphat na zonna te-ah kumpi le kim-le-pam te-in thatang tawh pum zawhthawh khuan om lo hi.  A nihna-ah thumanna (justice) hi-a thukhun mai-ah mi khempeuh kibang, kikim linlian hi, cihna ahi hi. Numei/pasal hihna, innkuanpihte neihsa lamsa, za liatnate tawh kisai lo-in mi khempeuh kibang kim hi-a, hamphat nading khat peuhah kidei danna om thei lo ding hi. Ahi zongin hanciam tak-in sepkhiatna tungtawn a gualzawhnate (achievement)te bel thu tuam khat ahi hi.

Social democracy ah kihel a thumna, mungpi khat-in kihualna (solidarity) ahi hi. Hih kihualna cih in mipi sungah khat-le-khat hualkhat in luangkhawm, kihuh kipanpihna ahi hi. Mipite nuam tak-in  omkhop theih nading a a henkhawm kaw(glue) ahi hi. Hih mungpi thumteng social democracy ah kihel loh a phamawh hi. Mimal suahtakna, thumanna le tangpi kihualnate tawh kilamna ultun ukna khat ahi hi. Tua bek thamlo-in Social Democracy sung-a tuicik(laigil) sungah UN thukhun tawh kituak mihingte suahpih thuneihna (human rights) nam nih om hi.

Social Democracy Laigil
Social Democracy deihna thuguipite pen mihing suahpih thuneihna (human rights) (ahk) mipite suahtakna(civil liberties)  kici-a, tuate zong nam nih-in na kikhen lai hi. Negative human rights/civil liberties le positive human rights/civil liberties te, cih bangin kikhen hi. Negative civil liberty cihteh mi khat-in vai khat peuhtawh kisai-in hoih a saksak bangin suakta tak-in thu sung thei-a, thuzawhna le holhthawhnate tawh kuamah in nawngkai sak thei lo hi. Positive civil liberty cih leuleu-in, mihing khat-in suakta tak-in thu a khensat theih nading-in ngaihsutna limci, thu kician a theih masak kul hi. Khuak zang mihing suak kul masa hi. Khuak a zat theih nading-in sang pilna(education) kisam-a, zong cidam-in nek tawm ciang tawh buai lo-in zum-le-hiam cihte pan patauh ven(social security) ding kisam hi.
Tua bang mihing khat kisapnate panpihna-in positive liberty kici hi. Hih sangpilna le cidamnate ngah theih nading panpih-na in gam sung-ah mihaute cit piakna le mipi-in amau neihsa hauhnate  tawh kituak-in siah(tax) piakna thupi phadiak hi. Tua ahih man-in social democracy ah negative right le positive rightte pen mai nih nei sumtang tawh kibang hi. Ol gen mahmah lehang social democracy cih pen tangpi ading thumanna (social justice) om nading hanciamna ki-ukna, kici thei hi.

Social Democracy Olgenna
Social democracy cih teh gamsung a om tangpi tangtate kikal ah nuntakna dinmun kikim dimdiam (equality) le daihna (security) om theih nading-in kumpite mahmah in mipite khuasakdan nuntakzia puahpha-in khantohsakna ahi hi. Ahi zongin thauvui thautangte tawh ngongtat in pum-ukna hilo-a, democracy ngeina tawh kizui-in thuman taktawh teelna a ngah kumpi suah masakna tawh ukna, ahi hi. Social democracy-ah nuntakna dinmun (class, living standard) ki-uang khaihnate khiapna khat hi-in mihau le mizawng te neih-le-lam kikhaih gawp lohna ding hanciamna khat ahi hi.

Hih bang ki-uk zia a limzat le a phuangkhia gamte in Europe gam lamte hipha diak hi.  Adiakdiak-in Scandanavia gam kici Denmark, Finland, Norway, Sweden gam lamte ah (Nordic gamte ci-in zong kisam) kilim zat a, Nordic model cih min zong kivawh hi. Tua gam lamte ah Social democray party hat mahmah-in ki-ukna kumpi mun ah zong panmun ngah den uh hi. Social democracy ki-ukna ah kumpi lamte kihelna hat sak diak uh-a gam phattuam zawk nading hi cihlam in la uh hi. Kumpite-in sumzuak sumbawlna (market) lam-ah kisawh hamtang uh a, summet bawlte-in amau aituam hamphat nading uanglua-in a peipuang loh nading kham zeel hi. Tua bang khat mah-in sumbawlna pan kingah metna(profit)te mipite tungah kikim thei pen-in hawmkikna (redistributive) hi-a nunniamte (lower class) ading mapansakna ki-ukna nam khat ahi hi.

Ahi zongin Social Democracy le Democratic Socialism cihte kibang mahmah napi kibang sitset lo hi. Tu laitak social democracy gamte ah capitalism (free market) mah kizang lai a, ahi zongin democratic socialism gamte ah capitalism zang ngiat lo uh hi.  Tua bek tham lo social democracy cih-in mizawngte huhna (poverty alleviation) hizaw lo-in nunna laihawlte (working class) leh nunna sangte (upper class) ki-kal nunna kilim khaih luatloh nading vaihawmna ahi hi.

Social Democracy le Capitalism
Politics ngeina a ki-et ciangin democracy ki-ukna le capitalism (free market) sumbawl ziate tonkhawm phadiak a, Socialism pen ama aituam ki-ukna zia le tua ki-ukna ah kizang sumbawl zia a om khinsa ahi hi. Capitalism sumbawlna-ah a ki-ultungsak thu-in gam khat peuhpeuh-ah hauhna lam khantohna deih taktakna leh suakta tak-in (freedom) sumbawl sakna hi-in kumpi lampan kisawh loding (no intervention) ahih keh kumpi lam pan a tawm penin kihelna (minimal state intervention) cih thupi sak-a siah (tax) cih zong don luat loh ding, cih thupi sak hi. A siamngap lo kumpi lamte sumbawl na-ah ong ki lakhel uhteh vaiteng sawngsawlawi hi, cih um uhhi. Sumbawlte-in suakta tak-in ong kipei le-uh mabun (efficient) zaw, cih thu hi-a Adam Smith phuahkhiat free market ngaihsutna hi phadiak hi. Socialism ahih leh bel gam sung a om neih-le-lam hauhna cih khempeuh kumpi neihsa hi, cih upna hi-in capitalism tawh kileh bulh hi. 

Social democracy ah capitalism mah kizang veve a, sum bawlte zuih ding thukhun tam sakzaw, thudik tak-in (fair) sumbawlnate thapiakna le ngongtat gamh tatna (votile) a tawm thei pen-in sepna ahi hi. Tua ahih man-in social democracy ki-ukna pen motor khat bangin en lehang capitalism pen a engine hi-a kumpite-in siahdonna (taxation), tangpi vai ah sumbawlte zuihding thukhun (rules) cihte tawh kumpi in tua motor engine heek (steers) kawikawina ahi hi.

Kikhelna ading Social Democracy Lampi
Social democracy ah mipite thatang le zum-le-hiam zatna a kipan thatang tawh thuneihna khupletna (revolution) cih zanglo uh hi. Tua sangin democracy ngeina tawh kituak kiteelna-ah thuman takin dem-a, kiteelna ah demna tawh thuneihna ngah nading hanciam zaw uh hi. Gam uktheihna panmun a ngah leh zong gamsung a om mipite nunzia le sum bawlna ah kihual kimna om thei pen dingin policy hoihte cian tak-in geel a makaihna ahi hi. Adiakdiak-in leitung galpi nihna khit lamteh Europe gam a om social democrat lamte-in capitalism sum bawlna ziate laihgawp ding hanciam zawlo-in capitalism (free market) lempha-in khauh sak semsem uh a, mimal sumbawlzia thak phuatnate (entrepreneuship) zong thapia uh hi. Ahi zongin metna lam-ah nunniam mite le zawngkhalte a kinelhsiah khak loh nading in sumbawlna (market) pen kumpi lamte-in sai zeuhzeuh uh hi.

Socialist taktak te le social democrat te kilamdanna a kikak sak semsem pen kum zalom 19 lampan hidiak hi. Social democrat ngaihsutna hong khan semsem teh capitalism zia-le-tong tawh a kibat sitset loh hang Marxist orthodoxy  hilhna ahi thatang le zum-le-hiamte tawh thu neihna khuplet a ukna lakna (revolution) cih lam pel uh-a, party phuan ngiat-in kiteelna tungtawn-in thuneihna ngahsawm zaw uh hi.

Social Democracy ah kizang policy
Social democracy cih policy a kizat teh seploh a phamawh khat-in welfare state a kici, tangpi kepna mah hipah hi. Tua tawh kisai-in mipil Esping Anderson in tu laitak leitung ah kizang tangpi kepnate nam (3) in hong khenkhia hi. A masa pen welfare state in US, UK le Australia gamte-ah kizang Liberal Welfare state nam ahi hi. Hih gamte ah gammite-in a sep zawh zahzah tan uh tungtawn-in panpihna ngahkikna hi-a kumpi lamte panpihna zong amau gam dinmun tawh a ki-et teh sihkam ciang hizaw-in sum a zong zote-in private insurance lam-ah kinga pha diak uh a, hih gamte-ah mizawng mihau kikhai mahmah hi. Gentehna-USA gamah gambup hauhna lakpan 25% pen gammi bup lakpan 1%te neihsa himawk hi.

Nam nihnate-in Conservative Welfare state kici-a, Europe gamte a tam simsimte hih huang sungah om uh hi. Hih gamte-ah kumpi lamte panpihna-ah kideidanna tam pian-a, numei/pasal hihna, khat tangte (single) le innkuan (married) neihna cihte a kipan kideidanna om kawikawi hi. A thumna gamte in Social democratice welfare state hi-in, tu ciangciang leitung bup-ah a kipakta pen ngeina khat hi-a Scandinavia gamte (Norway, Finland, Denmark, Sweden) gamte le Germnay gamte-ah kizang phadiak hi. Hih gamte lak-ah siah (tax) pen sang tak-in kidong leuleu a, tua siah donna pan kingah sumte kumpi-in mipi bup nop tuam nading lemtang thei pen-in hawmkik hi. Mipite ading nuntakna panpihna khauhpai-in ulian/uneu, zalian/nautang, numei/pasal, mizawng/mihau kideidan lo-in kumpi-in panpih kik hi. Gambup cidam kikepna lam a khawnkhong-in kibawl theihna cihte a kipan sum beilo sang pilna sin theih nading in kumpi in mipite panpih kik uh hi.

Mong Neilo Lampi
Social democracy zatna ah a tawntung in zat theih ding, a hoih pen policy kip cih om thei ngeilo hi. A hun le mun tawh kituak-in zat nuam pen ding kigeel, kipuah, kilem pha den hi. Tua ahih manin kisapna tungtawn-in policy zatziate zong kilaih zelzel thei hi. Hih social democracy pen democracy gamah mipi bup in huamkim in khantoh khop na namkhat ahih man-in Myanmar gam mailam ah zong deihhuai mahmah hi. Social democracy tawh kituak-in policy geelte  lungngaih loh phamawh thute in, a nuai a bang ahi hi.
1. Globalization
2. Tangpite Nunna kikhelzia (Social change)
3. Sumbawlna (Economic)
4. Gammi phazah (Demographic)

*************************************************

Lai gelhpa Tg. Pau Sian Lian in Zomi eLibrary / Laibusaal ading in hong piak khiat ahi hi.
Sat, Mar 26, 2016 at 2:45 PM





Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Social Democracy Ki-ukna. Gelh - Pau Sian Lian Description: Rating: 5 Reviewed By: Cinpu Zomi
Scroll to Top