728x90 AdSpace

Hot
Menu
Zon-ol na Donate

Latest News

THEIHHUAI KIALLAP UPADI Pa Lian Khen Nang

THEIHHUAI KIALLAP UPADI
Pa Lian Khen Nang
Ex. Township Law Officer


             Minam kim pau namkim zatna leitung ah mun le gam halna hang tawh i ngaihsut, i gamtat , i pau kibang lo a, nuntak zonzia zong kibang lo thei hi. Sep le bawlna pan lamkil sikkhial lo a, lamman zuihtheih na’ng thuman lam hong hilh pen Pasian thu zom ah Upadi hi, cih pen leitung mitmuh hi. Upadi thei lo cihna hang tawh kimaisak thei tuan lo (Ignorance of law is no excuse) na ci ahih manin theihhuai Upadi pawlkhat kiallap dingin a tom le theihbaih nadingin kong pulak hi. Mi khatpeuhpeuh i lungsim thangpaih nadingin ngimna tawh hi lo zaw in, theihhuai hi cih deihsakna hizaw hi.


Naupangte Kemsiam Ni
            Mailam ah gamnu gampa hong suak ding tu laitak a naupangte i makaih siam ding kisam hi. Nu le pa, le a kem a donsiamte makaihna le pattahna hang tawh a cidam a pil a siam a khangto naupangte a om mah bangin, cin le keploh donloh hang tawh siatna lam manawh naupang zong om kawmkawm hi. Kilawhtheih natna ngah, guihtheih khamtheih za kikham a zang, khutdawhngen, guta, thaikap, mithat le adang hoihlohna tuamtuam a bawl naupang zong omta hi. Naupang (Child) i cih kammal pen a suah zawh kum 16 a cing nai lote hi a, thu a neih leh zong naupang thukhen zum (Juvenile Court) ah naupang Upadi (The Child Law- 1993) tawh thukhen hi.

            Thu nei naupang pen Section 45 sungah thugol a hiphial zongin naupang thukhen zum pan thukhenna ah sihsakna, khantawn thongkiatsakna cih thukhen lo ding ci hi. Thong kiatloh phamawh puahphat theih nawnloh ding ciang dong ahih leh a tampen kum 7 dong thong kia thei hi. Section 46 ah kimu hi. Naupang thukhen zum pan thunei naupang thuhilh in khahkhia ahi zongin, tua naupang liausak ahi zongin, kum 14 a cinkhit hangin sum thalawhna a neih nai kei leh a nu a pa, a cing a kemte sum liausakin khahkhia ahi zongin, mailam ah hih bang a piannawn loh nadingin nu le pa tung pan kum 3 sung mawhna bawl nawn lo ding ci-in kamciam lai bawlin nu le pa tungah naupang apkik ahi zongin, a sawtpen kum 3 sung naupang kemcing ding a kiseh ulian (Probation Officer) i kepcing ding ahi zongin, naupang pen thuhilhna le kepna tawh a piantheih kei leh a tawmpen kum 2 dong ahih kei leh naupang kum 18 a cinni dong thuhilhna sang (Trainning School) ah puak dingin thukhen thei hi, cihna thute Section 47 sungah kimuthei hi. Hih naupang Upadi (The Child Law) pen naupangte a gamtatsiatna pan nakpi takin kikhel a gamtat hoih le mihoih mipha hong suah nang lametna le ngimna Upadi ahi hi. I naupangte kemsiam ciat ni.

            Naupang siatna lam ah a makaih a panpih mi pawlkhat om thei a, tua mite Upadi in koih khong lo hi, cih theihhuai hi.

            Tua mite in naupangte adingin nuntakna lauhhuai nasep ahi zongin, pumpi natna ngah theih nasep ahi zongin, gamtat siat nading nasep sawlna le phalna ahi zongin, zu zuakna mun ah tonpih, a lut ding kham lo, zu leisak zuaksak, zu dawn ding kham lo zu lei zu zuak dingin phalin semsak ahi zongin, thai kap na’ng hanthawn, zolna, thapiakna ahi zongin, naupang vanpong sanna le thapiakna, naupang vakvaite vanzuak leina ahi zongin, thukhenna thuaksa naupang a kipuakna mun khat peuhpeuh pan a taimang nadingin zolna le a taina ah huhna, a taimang hi, cih thei napi-in kemsimin hong taikhiatna mun a paikik ding kham cih bang teng lak ah khat peuhpeuh tawh a kipaaikan khak a thukhen zum a tun leh tua mi in kha 6 dong thong ahi zong, liausum (Ks. 1000) dong ahi zong, tua thongkhiat le liausum kigawm ahi zongin thukhenna thuak ding hi, ci-in Section 65 sungah kimu thei hi.

            Mi khatpeuh in ama cin ama kep kum 16 cing nai lo numeino in ama pumpi kizuakin nuntakna a zon lam thei napi kitheihmawh-bawlna, a cin a kep naupang pen pumpi kizuak a nuntakna zongte tawh munkhat ah omkhawm kithuahkhawmsakna, ama phattuam nadingin naupang khutdawhngetsakna, a cin a kep naupang khutdawhngen a om lam thei napi-in khaamlohna, ama khutdawh ngetna ah naupangno zat hamtangna, nu le pa/a cing a kemte’n naupang pil nading deihsakna tawh thuhilhna simloh naupang bawlsiat nopna tawh naupang tung gamtatna, naupang thukhen zum i phalkholhna om lopi-in thunei le thusit thuak naupangno i lim tawh lakin, film, TV, Video, Radio le laituamtuamte ah thu tangkona, naupangno pen a lipkhaphuai gamtatnate gamtasakin Film, TV, Video-te tawh tangkona cih bang teng ah khat teitei a gamtatkhak a, thu a neih leh tua mi pen kum 2 dong thongkiatna ahi zong, liausum (Ks. 10,000) dong ahi zong, thongkhiat le liausum gawm ahi zongin thu kikhen ding hi, ci-in Section 66 ah kimu thei hi.

Kidophuai Guihtheih Khamtheih Zate Thu Tom
            Kawlgam sunga i zat Upadi Narcotic Drugs and Psychotropic Substance Law-1993 sunga thute tawh kipaikanthei za kikham nampi khat pen Narcotic Drugs ci-in tua sungah za kikham nam gawm 123 bang pha zo a, i zakngeisa ahi Heroin, Opium, Cannabis cihte zong kihel hi. Za kikham nampi khat pen psychotrapic substance ci-in nam gawm 113 bang pha zo a, Amphetamine, Maclogualone, Metagualone cihte zong kihel hi. Nampi khat leuleu pen Procurror Chemical ci-in a tunga za kikham namtuamtuamte bawlna a kizang vangawmte hi-in nam gawm 25 bang phakhinta a, Ephedrine, Sulpheric Acid, Ergometrine, Pseudoephedrinete zong kihel hi. Zate pen 2003 kum June kha dong kumpi tangkosate kong pulaak hi. Tuate tawh kipaikan kha-in thu bawl thuakte pen a masa penin za kikhamte a pumpi tungah motzat le zatloh khentel nadingin tua mi a kimat hun pan nai 72 sungin a zun la-in Chemical Examiner in entelin a zun ah za kikhamte zang hi, cih a muhkhiat leh tua mi in za kikhamte zang keng, a ci ahi zongin, matna tawh kisai siavuan in hong zatsak hi a ciphial ta zongin kiphelkhiat nang baih lo thei a, hih Upadi Section 15 tawh thukhen a thuak leh kum 3 pan kum 5 dong thong kikhiatkul hi. Za kikhamte zatna hang tawh khantom khangno zong tampi om khin hi hang. Ka tuahkhakte lak pan a nu in za kikham a zang a ta it a kikhel ding lunggulh lua ahih manin palikte’n tawmvei sung hong kepsak leh kikhel thei ding hi, ci’n ama upmawh ngaihsutna tawh ka tapa in guihtheih khamtheih za kikham zang hi, ci-in palik ah vakhia hi. A zun ah za kikham zang hi cih mukhia-a thong kum 3 a kikhiat ciangin a nu kisikin khitui naptui tawh om hi. Upadi thei hileh zatopi ah siavuante tawh kikumin za kham zat nawnloh nading kibawlna nei leh khitui naptui luang loin ta manpha khat ngahkik ding hi, cih theihhuai hi.       

            Za kikham khat peuhpeuh a piankhiatna a kung a ciing a suante pen kithei a thu bawl a thuak leh hih Upadi Section 16 Subsection (a) sungah kum 5 pan kum 10 dong thongkhia ding ahih manin mun-awng gam-awng peuhah tua a kungte i cin i suan khakloh nading theihhuai hi. Tua teh za kikhamte bawlna a kizang Preasor Chemicalte tawh thu bawl a thuakte pen hih Upadi Section 16 Subsection (b) palsat hi a, kum 5 pan kum 10 dong mah thongkiat thuak ding hi. Tua teh za kikham (Section 26 sungah a kigelhte le tua zate i a gihna sangin a tawmzaw hiding) keem in, mipuak, mipia sawn, mitung ap cih nate tawh thubawl a thuak leh kum 5 pan kum 10 dong thongkhiat kul hi ci-in Section 16(c) ah kimu thei hi.

            Khatvei lai-in mikhat in ka tapa a vui kang tawh kiman a kum 25 thong kikhia hi. A vuikang tawh kiman tektek lakah ka tapa kum tamkia diak si e, ci’n hong dong hi. Tua thu tawh kisai-in Section 19 Subsection (a) tawh thu kikhen hi a, kum 10 pan kum kiciangtan lo thongkhia thei hi, cih ka gen hi. Section 19 le Section 20 tawh thong a khiattheih nangin Section 26 sunga kigen zate le tua zate le tua zate a gikna a phazah le a tungsiah hi hamtang ding hi cih kimu hi. Section 26 sungah Heroin-three grammes, morphine-three grammes, monoacetyl morphine-three grammes tua namthum sung pan mah in namnih kigawm - three grammes, crude opium (ahih keileh) Processed Opium (ahih keileh) tua nih gawm-One Rundraed grammer, Cannabia (ahih keileh) Essence of Cannabis (ahih keileh) tua nihgawm twenlty five grammes, Cocoleaf- one hundred grammes, Cocoine-three grammes, tua ban ah Ministry of Health pan hunzui-a a ciangtan zate ahi guihtheih khamtheih za (ahih keileh) lungsim kiheisak zate i a gihna le a phazahte tawh thu bawlthuak mi in tua zate pen a zuak ding hi, cihna tawh thu bawl thuak hi. Tua teh guihtheih khamtheih le lungsim kiheisak za kikhamte a bawlkhiate, a zeekkhiate, a zuakte, gampua pan gamsung  lutsak ahi zong gamsung pan gampua ah puakhia ahi zong, thu bawl a thuakmi pen kum 15 pan kum kiciangtan lo ahi zong, sihsakna ahi zong, thuak ding cih pen Section 20 sungah kimu hi.

            Tua leh a tunga Section 16 (Section 17, 18 te pulak nawn lo) Section 19, 20 te a palsat a thubawl a thuakmi thubawl a thuak nading a huhmi pen Section 21 tawh tua thu ah awk thei a, thubawl a thuakmi mah bangin thukhenna kibang hi. Tua teh Section 16 pan 21 dongte thu khenna ah guihtheih khamtheih (ahih keileh) lungsim kiheisak thei zate tawh kisai-in a semte in gamsung gampua kipawla sem ahi zong, hiam (ahih keileh) a puakkham thei vante tawi-in sem ahi zong, tua bang gamtatna ah kum 16 cing nai lo naupang zang ahi zong, kumpi nasem i a za a min septheihnate suangin a gamtat leh thubawl a thuakna Section a kigelh a sangpen thongkhiat thuak ding hi, ci-in Section 22 sungah kimu hi.

            Tua leh Section 16 pan 21 dong thukhen thuak mikhat in tua ma-in tua thumah tawh thukhenna a thuak ngei leh tua a thuakkik thukhenna adingin a sangpen thongkhiat ding hi, ci’n Section 23 sungah kimu hi. Thu bawl a thuak masa Section tawh tu-a Section kibat kul hi.

            Siavuante’n mi nuntakna hotkhiat nadinga, a zatsak simloh pumpi tungah sinnopna lungsim tawh zatloh nading le zuakna lei nate a omloh nading a deihsak hi.

Thau Tawh Kisai Thute
            Thau deihdiak ei Zomite in thau i lei zel, i zuakzelna ah licence nei lo thau tawh buaina om thei hi. Hun khat lai-a kizang galdona mikang thau le avui atangte pen licence om tuan hi loin i lei, i neih, i zuakna pan hong kiphawkkha leh thubawlna kithuak thei hi.

            Thau Upadi (The Auma Act-1878) sungah Section 19 Subsection (a) pan (i) dong om a, tua pan a kituak khadiak den pen subsection (a) (e) le (f) teng a tomin kong pulak hi. Tua Section 19 Subsection (a) pen licence nei lo thau seektawm, kem in, zuak cihte tung thu bawl thei hi. Section 19 subsection (e) pen licence om lo zum a hiam (hiam) nam khat peuhpeuh tawisuk tawitote mi nawngkaisak loh nading a khemna hizawdeuh in zukhamsa khawngin hiam tawi-a paisuk paito-a a awngawngte kidophuai hi. Setion 19 Subsection (f) pen licence nei lo thau (thaupi thauneu) avui atangte kemin ama huamte tungah  thu bawl thei hi. Hih thute tawh kisai-in thong kum 3 dong ahi zong, liausum ahi zong, thong le liausum kigawm ahi zong, thukhenna thuak thei hi. Tua teh kumpi langpang dingin thau le a vui a tang a tawi leh The Arms (Temporary) Amendment Act-1951) sunga Section 19-A tawh kum 3 pan kum 7 dong thongkhia ding cihna kimu hi. Thau tawh kisai thu khauh penpen khat omlai-a tua in kumpi sunga om thau (api aneu) avui atang galvan khat peuhpeuh gukna le guk ding hanciamna, zuakna le zuak ding hanciamna, mitung piak le mi tung piak ding hanciam hi, ci-in thubawl a thuak leh Arms (Emergency Punishment) (Temporaly Act- 1949) sunga Section 2 (1) (a) ahi zong, Section 2 (1) (b) ahi zong, Section 2(1) (a) ahi zong, Section 2 (1) (b) ahi zong, Section 2 (1) (c) ahi zong, Section 2 (1) (d) ahi zong tawh thu a khen leh tua mi pen sihsakna ahi zong, khantawn thong ahi zong, kumsawm sang a tamzaw lo thongkhiat ahi zong, thuak ding hi, ci-in kimu hi. Tua ahih manin thau lei le zuak tawh kisai-in a tunga i gensa Upadi-te tawh i kipaikan khakloh nading deihsakna hi.

Thaikap Kikhaam Hi
            Thaikap nasep tawh nuntakna a zong mite in khantohna lam manawh sangin kiamna lam manawh zaw uh hi. Thaikap Upadi (Gambling Act-1986) sungah mihon kisuktuahna mun ah thai kapna a tuamtuam sum kikham a, a sem a bawlna ah a kihelte thubawl thuakin thukhen zum pan thukhennate ah kha 3 pan kha 6 dong thongkhiat kul ban ah liausum (Kyats 500) dong zong liausak thei hi. Tua kikhap kimawlna tawh thongsung pan a suahtak khit teh kimawl leuleu-a thubawl a thuak leuleu leh kha 6 pan kum khat dong thongkhiat kul hi, ci-in Gambling Act Section 12 Subsection (a) le (b)te ah kimu thei hi. Tua teh Phe kimawlna, bawhlung suih kikhapna, nambat mal nih, nambat mal thum i cih sum kikhapnate ah a phungpi a semte le a zuakte in thubawl a thuak leh thukhenna pan kum 1 pan kum 3 dong thong a kiat kul ban ah sum Ks. 1000 pan Ks. 5000 dong liausak thei lai hi. Tua kikhap kimawlna tawh thong sung pan a suahtak khitteh khawl tuan loin sem leuleu-a thubawl a thuak leh kum 3 pan kum 5 dong thong a kiatkul ta hi, ci in Section 14 (a) (b) le Section 15 (a) (b)te ah kimu thei hi. Thaikap phungpite tawh kizoma thaikapte pen thu bawlthuakna ah kha 6 pan kum 1 dong thong a kiat kul ban ah sum Ks. 1000 dong liausak thei hi. Thong pan a suahtak zawh kimawl teitei lai-in thubawl a thuak leh kum 1 pan kum 3 dong thong a khiatkul ban ah sum tul Ks. 1000 pan Ks. 5000 dong liausak thei lai hi, ci-in Section 13 (a) (b) le Section 16 (a) (b)te ah kimu thei hi a, mi sum tawh hi lo ama neihsa sum hang tawh thong kiatlawh ahih manin kidophuai hi.

Kidophuai Thu Pawlkhat
            Penal Code Section 354 sung enleng numei i vangkiam nading nenniam nopna tawh numei va su va paupih a, zawhthawhna a neih leh thong kum 2 dong ahi zong, liausum ahi zong, tua gel gawm ahi zong, thukhenna thuak ding ci ahih teh numei thubawl i thuakloh nangin pasal lungsim manlangte, pau manlangte, khut manlangte kidophuai hi. Zomite sungah kingeinaseh i om phial zongin minam dangte’n thupilak hi.

            Upadi sungah kum 14 cing nai lo pasalno, kum 16 cing nai lo numeino le lungsim kicinglote pen a cing a kemte thukimna om loin zolin a paipihte pen mi gu hi, Section 361 ah ci hi. Tua mi pen thubawl a thuak leh kum 7 dong thongkiatna namkhat teitei khiatkul ban ah sum zong liausak thei, ci-in Penal Code Section 363 sungah kimu hi. Kumcing nai lo numeinote pasal neih ding pen cidamna lampan zong muhna tuamtuam tawh hoihkhin kisa lo ahih ban ah Upadi in zong a kham veve hi zaw hi. Lawm kingaite zong kumcing nai lopi nu le pa awilohpi kitaipiha pasal neih ding sawm masakhuai lo hi.

            Khat veivei numei ngaihlohpi pasal ngaihna bek tawh numei thukimna om lopi zolin khemin thatang zangin a zi ding gu a, a taipih om thei a, tuate pen Section 366 sungah kum 10 dong thongkhiat teitei  a kul banah sum liausak thei lai cih kimu hi. Hanthotna hi kei na ven, kumcingsa lawm kingai kitaipih pen numei lam pan awi loin thu a bawl pen thukhen zum pan thu kidotna ah “ka ngaihno in kei hong gu hi lo a, ken ka ngaihno gu hizaw ing” cih dawnkikna tawh a lawmpa suakta hi. Kawlgam News Paper sungah kipulaak ngei hi.

            Numei le pasal kilungkim taleh kilungkimta kei leh kimawhnate ah numei in thukim loin, nial ahi zong, phal lo a hi zong, numei in a phal kei leh that ding, a na thuaksak ding cih patauhsakna hang tawh phal ahi zong, numei in amah a tenpih pasal hi, cihna tawh a phal hangin a pasal in ama zi hi lo hi, cih thei gige ahi zong, phal le phal ta kei leh numei pen kum 14 cing nai lo cihte ahihleh tua pasal pen section 376 tawh thu bawl thuak dinga khantawn thong ahi zong kum 10 dong khat teitei thong ahi zong thongkhiat kul ban ah sum liausak thei lai hi. Thu man hi-a thu kibawl mi tampi a om mah bangin hih bang thute pen mite muhna ah gamta hi lo zaw ahih man kibawlsiat nopna hang tawh mawhpih khialhpih lopi thubawl thuak zong om ngei hi. Tua teh mawhpih dingin buan a, a ngah zawh kei leh section 376/511 tawh thubawl thuak thei a section 376 i thongkhiat zah alang zah ciang thong kikhia thei hi.

            Pasalte in a tenpih ngeilohpi ding tenpih ding ci-in khem a, kingaihbawla umsakin pumpi kisawh a, nau nei zong oma thu kibawl zong tampi om hi. Thu kibawl a thuak leh kum khat dong thong ahi zong liausum ahi zong thong le liausum ahi zong thukhen thuak ding hi, cih section 417 ah kimu hi. Numei hileh pasal hileh a kidophuai thu hi.

            Zawlthu tawh kisai-in gen zom laileng section 456 sungah nitum pan khuavak kik dong kikal sung mi’ inn ah na lutsim ahi zong inn umna kawm kongkhakte susia-in a sunglut ahi zong tua mi pen kum 3 dong thong khat teitei khiat kul ban ah sum liausak thei ci hi. Hih section pen zawl thang kisiah (Trap) na a zang mi om kawmkawm hi. Pasal don nawnlohna hang ahi zong a zawlthu uh a kip a kho ding le a tai theih nawnloh nading deihna ahi zong pasal bawlsia nuam ahi zong, phul nopna thu tuamtuam om ahi zong numei zolna hang tawh pasal a lut lian leh veng aw pam aw mi hong lut ci-in thang kisaisak hi. Thangawkpa buai ta hi. Hih bang thu pianloh na’ng kidophuai hi.

            Mi’ huamna sung kawma mawh bawlna a kici thei criminal trespass tawh kisai in section 441 ah kicing takin kigelh khin hi. Mi khat peuh in lo, leitang, mun le huang le inn kikansak kilutsaka thu kibawl zong om thei hi. Tua lo leitang mun, huang, inn a omte patausak ding simmawh ding lungsim nawngkaisak cihte ngimna tawh tua huang le innte va kawma va lut a, thubawl thuak ahih leh tua a gamta mi pen section 447 sungah thong kha 3 dong khat peuhpeuh ahi zong, liausum ahi zong a nih gawmin ahi zong thukhen thuak thei hi, ci-in kimu hi. Tua teh mi innsunga lut-a a om mite patauh lauthawnsaknate simmawhna, lungsim nawngkaisakna a bawl leh tua a lut mi pen thu kibawl thukhenna a thuak leh section 448 tawh thong kumkhat dong ahi zong, liausum tulkhat dong ahi zong a nih gawm ahi zong thukhenna thuak thei hi, cih kimu hi.

            Thong khiathuai ding gamtatsia gamta dingin mi omna inn ah a va kah, a va luta thubawl a thuak leh section 451 tawh thong kum 2 ciang dong khat teitei a khiat kul ban ah sum liausak thei lai hi, cih kimu thei hi. Tua teh mi khat i pum tungah nat le sat thuak nading tua mi khaktan nading kigin khitteh tua inn ah a lut leh thong kum 7 dong khat teitei khiatkul ban ah sum liausak thei lai hi, ci-in section 452 sungah kimu hi.

            Upadi tampi om sung pan theihhuai ka sakte athu pianzia zawitawnin keima tel bangin ka gelh ahi hi. Upadi langngat loin mimal khat le khat kikal thute neusekin thu neute beisak zaw a, kilemna innpi Topa’ sungah lam ciat ni.


(Hun tawh kizui-in penal code section 376 i ingredient pen section 375 nambat 5na ah numei kum 14 tangin kum 16 in laih ding, section 375 exception a a zi kum 13 tangin kum 15 in laih dingte leh section 417 i thukhenna penalty dingin thong kum 3 dong ahi zong liausum ahi zong thong le liausum ahi zong tawh laih ding ci-in gelkhiatna kisuaksak hi. Hih lai gelh hun ciangciang ah Upadi kipsakna om nai lo hi.)

**********************************************
Source :
ZYA Tin Jubilee Magazine Laibu (2005-2015)

ZYA in Zomi eLibrary / Laibusaal ading in phakna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: THEIHHUAI KIALLAP UPADI Pa Lian Khen Nang Description: Rating: 5 Reviewed By: Cinpu Zomi
Scroll to Top