728x90 AdSpace

Hot
Menu
Zon-ol na Donate

Latest News

ZAWL TUAHSIAM SISAN. Sia Kung Za Mung

Zawl tuahsiam Sisan
Sia Kung Za Mung
Ciimnuai Private High School, Kalaymyo

Tuangno le Kimnote veng khat ah om uh a, a nu a pate uh zong ki-it mahmah hi. Pawlpi kibang lai hi. A inn nihun a hau lua ahih loh uh hangin zaanglo pan kum khat khamkhop ding buh piangin Aizawl ciangciang zin uh ahih manin veng sungah a cithei pawl uh hi a, thu nangawn a nget theihloh uh hangin pawlpi Upa bangin kiteel tangtang hi.

Tuangno le kimno zong a khua theih tunga kipanin tengta kineihkhawm, kimawlkhawm, Nipisang kahkhawm lasinkhawm, sanginn ah ciah le kuan tonkhawm cih bangin kithuah toto uh hi. A nu a pate un zong phal lel uh a, amaugel lah neu lawm ahih manun unau bangin ki-it uh hi.


Nikhat ni-in Tuangno’ pa a khualzinna ah migilote’n thatin a sum le a van teng sutmang cih thusia lianpi hong kizavat mawk hi. Meigong tagah ci-in a kihehpih ding a sak leh Tuangno’ nu bang a mel hoih ahih manin a neh khutkhut nuam khawng om laidep a, nasa mahmah hi. Amah’n lah Tuangno ngak dingin a khensatsa hi. Tua ban ah cikmahin a zak ngeiloh uh leiba loh ding peuh hong tam pongmawk a, tuangno’ nu lungkham mahmah hi. A hi tawh a hi lo tawh leibasik khempeuh, a lungkimna bangun loh lel ding, Pasian ap dingin khensat hi.

Leiba loh nading sum omlo ahih manin a taihinnpi uh zuak hong kul ta hi. Tuangno’ nu zong Tuangno’ pa hanah va pai-in tamlo kawmin a pasal tungah a haksatnate va ko a, a lamsa innpi zuak loh a phatmawhna le a tunna mun pan a theihsiam nading a singlamteh kawi kawmin va gen ngiatngiat hi. Mite in sun nangawnin hanmual lipkhap ta le Tuangno’ nu in a it a pasal’ luang kivuina munah zan thapai va kapin, va hopihin thu va ngen hi.

Inn zuakna-ah zong kimno’ pa mahin vaihawmpih hi kei leh a netum nuam, a phawhlawh ngah nuam bekbek lit dawk bang latlat hi. Inn zuakna sum tawh, “na pa un sum tuazah hong ba hi,” a cingam khempeuh loh lel a, a omlai sum tawh khuanawl lamah cipeek-inn khat lei hi.

Tuin inn hong kigamla ahih manin Tuangno le Kimno sangkahna-ah a tonkhop ding uh hong baih nawn lo hi. Tuangno lah ama dinmun kitel in Kimno tawh kikholh ding hong kisuang ta hi. Lawm le gualte in zong a hemlam hi taleh a tang takin hi taleh Tuangno koko thei uh hi. Tuangnote’ inn pen sanginn tawh kigamla zaw hi napi, Kimno in va leh zot tangtang hi.

Tan 9, tan 10 hong tungta uh a, a nihun nungak tangval hong hi ta uh hi. Kimno bel bangmah zong ngaihsut tuak se loin, a neulai vua a ki-kholh dan mah bangun om lel hi. Tuangno bel thu tampi ngaihsun hi. Lawmta itna pan lawmngaihna lamah a lungsim kahto ta hi. A nuntakna uh kikhai lua ahih manin khuisa thapai hi. Kimno in, “bang lungkhamna nei na hiam” ci-in a dot ciangin, “bang mah om kei, lai ka sang on zawh lohkhak ding patau ing,” ci-in zuau namtui tawh khem zel hi.

Sumlepai mah in thugen hi ding hi ven, Kimno’ nu pen nidang hong bang nawn pha lo hi. A pasal’ kiangah, “mi banga ta tampi nei hi lo ihih ciangin Kimno pen meigong tagah daipam peuh tawh ke’n kitengsak zo lo ding hi’ng,” cih dan gengen ta hi. A pasal in bel, “Ei zong i kitencilin bang teng nei i hiam. Neihsa lamsa sangin ki-itna thupi zaw hi,” cihsan zel hi. Ahi zongin Kimno’ nu om thei loin Kimno mizawng tagah tawh kiteng leh ei zong i vang kiam ding cih dan peengmawh tammawh in a gengen ciangin a pasal in, “Kei lah khualzin den hi ve’ng, Kimno’ mailam vai bel nangma thuthu ci leng aive,” ci ta hi.

Nitak khat khangno lasin khit ciangin Tuangno in a ngeina bangin Kimno a inn ciang va kha hi. Kimno’ nu in aw khum dikdek tawh innsung lutsak hi. Kimno niangtui bawlsaka, tua hun sungin Tuangno kiangah a hun lai-in kithuah nawn kei un, nang zong na dinmun kitel in cih dan a tangpi a tangneu tawh khut dikdek hi. Tuangno in bangmah dawng se loin, Kimno in a maipuak en a, a theih khak loh nading hanciam hi. Ahi zongin a lungsim sungah atomic bomb puakkham hi. A nu’ thanem luat ding ut lo ahih manin Tuangno in a nu’ kiangah hih vai kam keek se lo hi. Tua laitak pen tan 10 laivuan khit, sangkhakpi sung hi bilbel in, Kimno tawh nisimin kimuh kul lo a, phadawm lai hi.

Tan 10 laivuanna hong kitheih ciangin a nihun lai ong tuak uh hi. A meizom bel om zo lo hi. Tu-in pilna sang sinna sangpi (university) zop ding hong hita hi. Kimno’ ading haksatna a om loh hangin Tuangno’ ading sang zop nading ol nawn lo hi. A lungsim tawngah zong Kimno’ nute’n hong deih lo lua uh ahih teh, Kimno in pilna sang va sin henla, ke’n ka sep theih bangbang semin ka nu ka vak kawmin distance tawh degree khat peuh la mai leng hoih in teh. Hong kideih lo lua pipi zong maizumhuai, kikhen theih nading Pasian’ hong lampi khunsak hi-in teh, ci-in ngaihsun hi. A lungsim kizo hi. Kimno in bel a nu in a U Tuangno’ tungah a cihgawp teng lah theikha lo a, sangpi kahkhawm ding ci-in lawp mahmah hi. U Tuangno’ kiangah a lawpna teng a gen leh a U Tuangno nuam mahmah dingin a up pen hong maikhing keei mawk hi. A hang a dot ciangin a hi bang lianin lah gen ngam lo in, “Ka nu nasep hat nawn lo, ke’n ka vak kul ta, kei sangkah thei nawn lo ding,” cih ciang bekin dawng hi. Mi’ thu tel loin Kimno in, “Ke’n cycle khat lei ding, U Tuangno in hawl ding, i nihin pello sangkah lai ding, i nu na semsak nawn lo ding, kei ma’n kanute’ kiangah gen le’ng, i nute a kilawmta hi, huh lua ding hi,” ci-in thangah takin a gen ciang, na teltheih hun ciangin hehpihhuai si ni cia,” ci-in Tuangno in a lungsim sungah nasa mahmah hi.

Kimno in a ngimna teng a nu a theihsak ciangin a nu’n zong, “naupang hi nawn lo na hih ciangin hoihtak na ngai-in,” ci-in a khennopna teng gen hi. “Kingaih lai-in bangbang i cih hangin nupa suahzawh teh sumlepai mah kisam hi. A hau khinsa zong zawng kik thei lai, a zawngsa pen ngaihsut vetloh ding, nangma pasal ding kei mah’n na kituahpih ding hong ngaihsun nading hi’ng. Na pilna sin hoih takin zom inla, Tuangno tawh a kigamla theithei in tuni-a kipan om in,” ci-in thudang zong tampi genpih lai hi. Kimno in khitui luangin a gengen hangin a nu in, “ka sunga piang ka tanu hi cin, ka cih bangin ta peuh le cin na nahlawhpek zaw ding hi. Bangmah hong gen nawn ke’n,” cih beh lai hi.

Hih thu hangin Kimno hing kiam hi. Anu’ cih bangin a U Tuangno tawh kikhen ding dan a lungsim ah a gel hangin piang thei mahmah loin, a ngaihna khang semsem zawsop hi. Zan ciangin ihmu thei lo a, tuisik nangawn valhhaksa hi. Nino nitak lasin hun a tunkal a ngaklah den pen tu-in a U Tuangno a muh ding lawp napi, a langkhat ah mungam lo hi. A mah a nei, a hauzaw hi a, nidangin a zahkaizaw, a lungneuzaw a U Tuangno a inn zot den hi a, tu-in a va zot ding ol lo hi. Tuangno in a lungsim thuakna a ip zawh hangin Kimno in im zo lo a, a maipuak ah kilang pah hi. A lawmte in, “Bangci na hiam, natna hoih lo ngah na hiam, hi ci hing kiam,” a cih ciangin natna hoih lo a cihin thangpaisaka, a lawmnu khat kiangah a sungthu teng genkha-in mitengin thei thang hi. Tuangno lah a ngeina dan ciang mahin a om lel teh Kimno pen om thei mahmah loin nikhat thu kikuppih hi. Tuangno in bangmahin a vei lo dan khatin, “Ahi mah ve, Kimno, nute pate thumangte a nahlawhpeek, ci-in paunak i nei ve,” a cih hiathuat se pen Kimno lungkim zo lo hi. Ama deihna ah, “Na nu in tua bang hong cih vial, zawltai ziau ni,” cih dan za nuam hi. Ka U Tuangno in hoh hong ngai zo taktak lo ahi tam, ci-in zong muangmawh pian hi.

Kimno zong tha ngah lopi-in sangkah pong hi. A pa khualzin hong tun ciang, Kimno gawng salua ahih manin a lung nuam vetlo hi. A zi kuppihin, “Ei kiten ding lai-in zong ka sunghnu ding in zawng lua hong sa in hong deih kei ve. Kitensak loh phamawh dinmun i tun cianga, a pau nawnlo bek hi-in kei hong deih keei lohpi, tu’n lah na khempeuhah hong muang hong suang ngel ve; ei’ hun lai zong phawk ve,” a cihleh Kimno’ nu in “Zum thei o maw,” ci kawmin a gilvun nuaisaka, Kimno’ pa in nasa pipi awngkhia ngam loin thuak tentan hi.

Tuangno le Kimno pen pawlpi khangno sungah a kimuang, a makai lam hi den uh hi. Pasian le nu le pate’ mindaisak nuam lo uh hi. Kimno’ nu lungsim mahmah Pasian in a khel nading lungsim sungah thungenngen mai uh hi. Kimno pen a it a ngai tamin a U Tuangno kiangah a gen zel teh, “Kituak mah uh cia. A pil tuak, a hau tuak,” cihdanin a dawn teh Kimno heh mahmah hi. Kimno sangkahin Tuangno bel moh saipi khat pan mohte niangtuisai teng ah puak kawikawi hi. Nitak ciangin a veeng vua mizawng tuition kah zo lo sangnaupangte sum la loin laihilh hi.

Nikhat ni-in Kimno mawtaw cycle tawh sang a kah leh ama lampi zuih dan a maan hi napi, a nung panin tangval zukham thum cycle khat ah hong tuangto in, hat lua a, hoihtak hawl thei lo uhin Kimno cycle a nunglam pan phuto uh hi. Tangvalte nih phualsih pah in, Kimno le tangval khat in khuaphawk lo uh hi. Kimno a khe liama, si tam luang mahmah hi. Lukhu khu ahih manin a lu liam lo hi. Tangval khuaphawk lo pen ganpi gawh cianga a si nai lo deuhte danin a gawl ciakin tau nainai hi. Ki-um ngeingai, ki-awng ngeingai pongmawkin kuamah in bangmah hih thei mello hi. Moh puak dingin a pai Tuangno in va tuakkha a, Kimno ahih lam a theih ciangin a puan balkekin a siluanna a kheliam tuampah hi. Peithum mawtaw khat samin a khuaphawk lo tegel zatopi-ah puak vingveng hi.

Tangvalpa bel a lu liamin a khuak sungah si lut ci uh a, sawt nungta tuan lo hi. Kimno pen “a lauthawng lua hi, patauh ding om kei, sisan manlang takin thun kul,” ci-in siamahte’n gen hi. Tuangno le Kimno a tan 9 lai-un Red Cross thusinna kah ngei uh a, a sisan uh zong AB tuak ahi hi. Sihawm ding adang om pak lo ahih man leh, a hawm ding tulsawm a om phial zongin Tuangno in hawm nuam ngiat ahih manin sit ding kisam teng sit semsem uh a, siang hi, a cih ciangun Kimno si hawm hi. Thawlkhat a lak khit uh ciangin kisam lai ding ci hi.

Tua laitak Zomi Khangno Kipawlna (ZYA) pan sihawm ding mi hong tung ahih manin Tuangno a lung hong nuam pah hi. Kimno’ lupna gei-ah Tuangno tu in, Kimno’ pumpi sungah a sisan mal khat khit mal khat a lut ngelhngelh a muh ciangin Tuangno lungkim mahmah hi.

Kimno’ nu zong nik khek man lo, sam hiat man lo liangin zato hong tunga hong kidik keei hi. Kimno’ nu hong tun madeuhin Tuangno kihemkhiasim hi. Siavuante’n “Den mah teh khua hong phawk ding hi, si kisam bek hi, patauh ding omlo hi,” a cih ciangin a awm hong vang zawdeuh hi. Kimno in khua hong phawk ciangin a nu hong kap saan leuleu hi. Kimno in sihawm kua cih a dot hangin a gen thei kuamah om pak lo hi. Siamahte khat in, “Na tanu a sitam luangkhia lua, tawm hong ziakai kha le uh cin kilap lo ding hi. A sinam kibatpih a om pah zong na hin nading vua kisiam hi,” ci-in gen hi.

Tuahsiatna pan a phongpah, a puansilh kimlai tawh liamma a tun, a nasep nusia-in zato a puak, sisan a hawm, a tanu’ nuntakna a honkhia pen Kimno’ nu in mak dingin a deih loh, a zumpih ngam loh, a deihlohna thu a bil dimin a khutpa, meigong tagah ci-in a simmawhpa a hih lam a theih ciangin Kimno’ nu zong aimitdeh hong bang pah sam hi.

Tom gen leng Tuangno le Kimno siangtho kitenna tawh pumkhat hong suak uh hi. A lupkhop masak ni zanun:
Kimno  -   “U Tuangno, Pasian mahmah hoih lua, i thunget hong dawng mate.”
Tuangno-   “Ai ve, kilungkim ciata i kiten theih, ahi zong, nang bel tagah zi nai ta ve.”
Kimno  -    “U Tuangno, nang bel, thanemna mah neinei lai. Kei adingin ka Pasian zom, ka lutang hi teh.”
Tuangno-    “Gen thu lailak in, i mopawi ah, hua nang hong phukha tangval thumte, a nungta bang uh hi leh a tuam vilvel in samin letsong pia nuam tak ing ei.”
Kimno  -    “U Tuangno, hai pianpian na hia, hong phu lum dektakte letsong pia nuam cih mahmah, a genin genhuai kei.”
Tuangno  -  “Hi lo ee, kei adingin amau teng thupi lua hi ven, Sakha ngah kha lo a, bawmta a sem uh ai vi.”
Kimno    -    “Bang ci e, a koi ci dan e.”
Tuangno -   “Nidang lai a, lawm kingai kikalah a kiten theih nading palai a semte bawmta kici.               Tuate’n mopawi ciang sa kigo a khaguh nuai lam ngah. Ei gel pumkhat suah nading amau zawltuah hong sem napi sakha ngah man lo uh.”
Kimno            -       “Kheltatpa, nang lah thukhelkhel, kei’ muhna ah amau lah hi, a diakdiakin zawltuahsiam na sisan ai ve......”

            Piakkhiatna lakah nuntakna sisan piakna pen piakkhiatna lian penpen ahi hi. Sihopna tawh Zomite in ki-itna lakkhia ciat ni.

************************************

Source : 
ZYA -Myanmar Tin Jubilee Magazine Laibu (2015-2015)

ZYA in Zomi eLibrary ading in phalna hongpiak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZAWL TUAHSIAM SISAN. Sia Kung Za Mung Description: Rating: 5 Reviewed By: Cinpu Zomi
Scroll to Top